1. Gini sanahe rengbe ani ka sana tirani na ni?

YA MO mo nidu na bakabangirise ti kura aregbo tipa agu apai nika manga kumbatayo barambeda—wa ngbatunga agu nga gbarasa ziree pambori, zubo Gogo Boro Magogo, na gu vura nga Aramegido? Mo asananga tiro nga, ‘Ho gu regbo re nika da ni, ya mo mi adu na rengba ka nye niruru re ho gi iiriwo apai re nikaa manga ni?’ Ka si du nga mo aima berãkuriipa agi asanahe re, gi sakapai du tipa ga Yesu afugo nga gu du ni kekehe rogo gu veresi du mburu gaani kekeapai riihe re nika undo ro aundo gbe. Yesu aya fu gako abawiriki wẽ: “Ka oni rúngo nga kpotoroni yo ya; oni [du na idapase].” (Yo. 14:1) Nyanyaki idapase nika undo rani ani hipai ka ginipai vura manga vurũ kumbatayo.

2. Waigu rengbe ani ka nyakasa gaani idapase, na gini apai ani nika sakapai tipaha rogo gi kekeapai re?

² Ani rengbe ka nyakasa gaani idapase ka hi agu akpakarapai du kumbatayo ni berã ani kurii wai ani amangapai awere kuti aˈasada nga ga idapase. Ho ani aberã ni kuriipa gu gene ani amangapai ngbaha ho ani agbia tirani ni na aˈasada awere, ani rengbe ka ino pa agu abangiriba si aida ani nyakasi gaani idapase rogoho. Ai gu regbo ani ahi asada, gaani idapase nada ni nyanyakihe gbe. Gipai re nika undo rani ani hi agu aˈasada du kumbatayo. Rogo gi kekeapai re, ani nika fugöpai tipa apai biama ga Yesu abawiriki agbiatiyo na ni, nga gu naayugo gupai nga i aaida na bakere idapase. Fuo gure, ani nika sakapai tipa wai rengbe ani ka gbia tirani na ngbatunga agu akpakarapai re areme na wai rengbehe ka mbakada rani tipa gupai du kumbatayo.

3. Ginipai agu afugo Yesu du rogo Matayo 6:30, 33 aundo rani ani rugutirani na ni?

³ Gu boro nga bariikporo ima du na gupai rogoni yo nga ga ida ka ye na riahe, aroko, gbiati kporo fu diani na awirini. Gipai re ti aregbo dunduko taata ka mangaha ti gi kpakarakpakara aregbo re te. Kura awirinarani ima zanga gayo asunge, na wa vura duhe nga i namanga nyanyaki asadatise ka gbia kuraha, i agbianga ha te. Agu akurayo kinaho naká ka manga gu sunge marã arẽnga fu aKristano ya. Ho ngbatunga apai amanga ni wa gure, si naida ani du na nyanyaki idapase nga Yekova nika fu agu ahe afu ani aidaha tipa gaani aborokporo. Yesu aima yugo gipai re ziazia fu gako abawiriki ti regbo gu Gako Tungusapai Naadu Rii Bagangara yo. (Oni gedi Matayo 6:30, 33.) Ho du ani ni na bakere kido nga Yekova ambunga rani te, ani nika du na rengba ka maa berãrani gbe kuti iriso Yekova. Ho ani abi wai ni Yekova aundo rani na agu ahe ani aidaha, ani nambeda gbe na Yekova na gaani idapase nanyaka.

4-5. Ginipai naundo kura riikporo sa ho i adu ni rogo bakabangirise tipa agu ahe i adu na zingoho?

⁴ Oni bingo wai kura aborokporo Venezuela yo agbia ga Yekova undo ho i adu ni na abakabangirise tipa agu ahe i adu na zingoho. Ti kura regbo sa, ga Castro riikporo aagbia marã tipa kaa raka ngbaru ni mangayo sunge rogo gayo ati. Fuo gure, akumba naadu na bundu beyo adi gayo rago na ki do yo kusayo rogoho. Baira gu kporo re nga Miguel aya: “Awere, ani nasopa bino rogo wiri tooni ba kura boro afuhe furani. Mi naatona gimi uru ni sana mi Yekova ko fu guhe ani aidaha tipa gu uru re.” Raka ni kpakarakpakaraha fu gu riikporo nga ga Castro, ono mbiko gupai nga i na bakere idapase nga gu Barani nga ga nyemuse ko nikaa ngera angerafuo gayo azingo na aˈuru dũ, i nandu tipa agu adunguratise nga ga dungurati na kini tungusipai dedede. I namaa agu apai nga ga Kindo ni bambatapai rogo gayo raka yo, na Yekova nafu agu ahe afu fuyo i aidaha.

⁵ Ti gi kpakarakpakara aregbo re, aMiguel na diako nga Yurai, moiberã yo gbe tipa wai Yekova angerafuo yo. Ti kura aregbo, Yekova namangasunge na awirina tipa i fu gu bete ahe i aidaha fuyo watadu ka undo Miguel ko gbia sunge marã. Ti kura aregbo, Yekova namangasunge na be-basunge tipa ka fu agu ahe fuyo i aidaha. Yekova ambunga yo te. Ni sangbanaha, i ima bi gu idapase nga ga gayo aboro si ninyaki gbe. Fuo gumba yo pa gu kura regbo sa Yekova aundo yo, gu sosono wiriyo nga Yoselin, aya: “Si nipa ngarasaro ka bi wai Yekova aundo rani. Ko nga bakureami, na mi na kido nga ko nikaa undo re ti aregbo dũ.” Ri agbia kurapai kutini nga: “Agu akpakarapai gaani riikporo nahihe ima mbakada rani tipa gu kere kpakarakpakara aˈasada du furani kumbatayo.”

6. Waigu rengbe oni ka nyakasa gaoni idapase ho oni agbia tironi ni na zingo mosoro?

⁶ Ya mo oni nagbia tironi na zingo mosoro? Ka singia wo duhe, gipai re ima du ni kpakarakpakaraha furoni. Ono tie, oni ima rengba  ka mangasunge na gi regbo re ka nyakasa gaoni idapase. Oni mangi kparakpee fu Yekova na ki gedi agu afugo Yesu du ni kekehe rogo Matayo 6:25-34 na ki berẽkuriihe. Oni berẽpa agu akpiapai du ti gi gaani regbo re nga gu nayugo gupai nga Yekova nafu ahe afu fu agu aboro nairiso ko. (1 Kor. 15:58) Ka oni mangihe wo, oni nika du na nyanyaki idapase nga Yekova nika undo roni aundo kina wai ko naundo gu kura aboro nga aguyo naadu na akpakarapai wakina gaoni. Ko ima inopa agu ahe oni aidaha, na ko ima ino wai ka fuhe furoni. Wa oni nika bi ga Yekova undo rogo gaoni raka yo, gaoni idapase nika nyaka gbe tipa gupai nga oni du na rengba ka hi gu bakere aasada du kumbatayo.—Abak. 3:17, 18.

7. Ringbisihe kuti Matayo 8:23-26, waigu “bakere bayuge” aasadi ga abawiriki idapase?

⁷ Ho Yesu na gako abawiriki aandu ni rogo kurungba, bakere wege atona ka ya, Yesu amangisunge na gupai re tipa ka undo gako abawiriki i rugutiyo na gupai nga si aaida i nyakasi gayo idapase. (Oni gedi Matayo 8:23-26.) Gu wege re aima du ni kerehe na sungburo sungburo ime kini uka ku kurungba yo, Yesu aara ara zezeredi. Ho agu abawiriki naagunde agunde re azingisi ko ni rame yo na ki sana ko ko batasi yo, Gbia aruguyo zezeredi ki ya: “Tipagine oni agunde ti ni? Ako oni du na toni idapase?” Si aaida agu abawiriki naadu na gunde re rugu tiyo na gupai nga, Yekova aima du na rengba ka banda Yesu gbiati agu aboro naadu na ko be kerepai. Ginipai rengbe ani ka wirikaha ti gupai re? Nyanyaki idapase ima rengba ka undo rani ani hi gu bakere awege du na ome ti ni watadu ai gu kpakarapai rengbe kadu wakina bakere wege.

8-9. Waigu ga Anel idapase adu ni asadiasadihe, na ginipai naundo ri?

⁸ Oni berẽnga pa wai gu idapase nga ga kura wirina sa nga Ane du ni nakuparanga Puerto Rico yo ada ni nyanyakihe mbiko gupai nga ri ahi kere asada. Gari asada angia kina boro ndikidi “bakere bayuge.” Gu ga Ane asada re atona rogo 2017 ho gu bakere bavugumo nga Hurricane Maria agbarasi kpuri ni. Ni sangbana gi bavugumo re, ri azanga gari sunge. Anel aya, “Ti regbo gu kpakarakpakara aregbo re, mi aabakabangire abaka, ono mi awiriki ka kido kuti Yekova rogo kparakpee yo na mi aambunga bakabangirise si ká na mi ti gupai si aaida mi mangihe te.”

⁹ Anel aya giasangba aima undo ri a ri hi gari akpakarapai. Ri aya: “Pekafuo agu arugapai nga ga riigbu aundo re mi he zezeredi. Yekova aundo re vurube awirina. I angarasi re na ki fu agu ahe fere mi aaidaha tipa ka raka.” Ri agbia kurapai kutini nga: “Yekova aima fu dungu ahe fere susi gu mi arengbe ka sanahe tipaha, na gimi idapase aima nyaka ni bakerehe.”

10. Ginipai rengbe mo ka mangaha ka si du nga mo narungo be kere kpakarakpakarapai?

¹⁰ Ya mo mo nagbia tiro na “bakere bayuge” watadu bavugumo rogo gamo raka yo? Si rengbe ka koda kpakarakpakara aregbo mbiko gu gberãngo naye be ome zegino. Watadu si rengbe kadu nga gupai du wa bavugumo wa gu nga kere kpakarapai nga ga borose, nga gu saro  ome apai fu riro ka mo ainongo gupai ka mo mangihe ya. Mo ima rengba kadu na abakabangirise ti kura aregbo, ono ka mo mbunga abakangirise si ká na mo ti kido kuti Yekova ya. Mo mbedi na ko rogo gu kparakpee naye ngbaduse yo. Mo nyakasi gamo idapase ni berã mo kuriipa agu aregbo Yekova naundo ro kusayo ti ni. (Tam. 77:11, 12) Mo ima rengba kadu na gu kido nga ko ambunga ro te.

11. Tipagine si aida ani diberã ti ni kaa giasangba agu aboro nangbe kumbatayo?

¹¹ Gini kura pai berewe rengbe ka undo ro mo hi akpakarapai? A wa Anel agumbaha, si nga giasangba. Mo wiriki ka kido kuti agu aboro aYekova na Yesu akido kutiyo. Ti kura aregbo, agu aboro i namoi yo i naangbembatayo rengbe ka fu arugapai nga gu du wa rogoyo ti ni furani te. Ono tie, Yekova nafu maku fu aboro giasangba. Ani naino gupai re rogo Fugoko yo na ti agu akpiapai nga ga ruru airisiko nga giasangba nabatasa unga. (Gate 14:1-4; 2 Peka 20:17) Mo berẽkurii ngbatunga agu akpiapai re. Gi berãkuriipai re nika nyakasa gaoni nyemupai ka pekafuo agu arugapai ga Yekova riigbu afuhe awere na kumbatayo. (Eb. 13:17) Rogo gi gene re, ndupai adunga ho nga gu nika sa gupai nga ani gunde be bakere gberãngbi nga gu nika ye kumbatayo barambeda te.—Snz. 3:25.

12. Gini ngbanya du dagba du na idapase na hi iraira sarangbanga nga gu Ruka 18:1-8 ayugoho?

¹² Yesu aima ino gupai nga iraira sarangbanga nika asada gu idapase aˈasada nga ga gako abawiriki. Tipa ka undo yo i hihe, ko afu kpiapai nga gu du ni kekehe rogo gu buku nga ga Ruka. Yesu ape pangbanga tipa gu dekurugbo naakpara kindi fu gu basapungbanga naadunga ni ruruko ya tipa ruru sarangbanga. Ri aima du na gu kido nga, ko aundo ri aundo ka ri ka kindi kuti sana ko. Niyangaraha, gu basapungbanga re amangipai kuti gari kpe. Ginipai ani awirikaha? Yekova asaranga ngbanga ni irairaha te. Sidu, Yesu aya: “Mbori akáraga nga pa gako siasia aboro nga agu yo nakpara fu ko na uru na yuru, te?” (Oni gedi Ruka 18:1-8.) Fuo gure, Yesu agbia kurapai kutini nga: ‘Ho Wiri boro ka ye ni, ko abi idapase kpoto sende no?’ Ho ani ambu ni be iraira sarangbanga, si naida ani yugu gupai na gaani zerangbaduse gbiati kpatagara kuti pai nga ani na nyanyaki idapase wakina ga gu dekurugbo re. Na ngbatunga gi idapase re, ani rengbe kadu na gu kido nga Yekova nika undo rani barambeda watadu kusa. Si naida ani idi kuti gupai a nga kparakpee na ome ti ni. Ti kura aregbo, Mbori ima rengba ka karagapai kuti gaani akparakpee ngba agu agene ani aaberãnga paha ya.

13. Waigu kparakpee aundo kura riikporo sa ho abanzengere amangi yo ni gbegberẽ?

¹³ Oni bingo gu kpiapai nga ga gu wirina du rimori nga Vero nga guri naraka Congo yo. Vero, na kumbari angianga Dezire Yekova ya, gbiati wiriyo du garãri nga 15 azubo kusayo rogo gayo gbaria ho abanzengere azubo ho ni. Ho gu riikporo re aandu ni gene, i agbiatiyo na abanzengere na i ki serekpo yo tipa ka imo yo. Ho Vero atona kpara ni, wiiri aasadi ka zeresa ri ni manga ri kparakpee na fugori kuari,  kini dogodi mangasunge na rimo Yekova rogo gari kparakpee yo. Ho ri anyasi kparakpee ni, barutiriivura nga ga agu abanzengere re asana ri nga, “Degude, da nayugu manga kparakpee foro?” Ri akaragapai ki ya, “Nina nayugu re na ni, ni manga ri sunge na gu kpiapai nga ga kparakpee du rogo Matayo 6:9-13.” Gu barutiriivura re aya, “Degude, mo ga na avunguro zezeredi, na Yekova gaoni Mbori banda roni!”

14. Ginipai rengbe ka asada gaani idapase, na ginipai nika undo rani ani hipai?

¹⁴ Ngbatunga akpiapai wa gure nayugo gupai furani nga, ka bangirani ya gonga ti wai du kparakpee na nyanyakipaha ya. Ono na ka si du nga ani agbianga akaragapai kuti gaani kparakpee ni ipo te watadu ngba iiriwo gene te? Wakina gu dekurugbo du pa ri rogo ga Yesu kpiapai, mo naamanga kparakpee kindi kidu na gu kido nga gaani Mbori ambunga ro te, na fuo regbo kusa, ko nika karagapai akaraga kuti gamo kparakpee rogo ai gu gene nika du. Mo naandu kindi kumbatayo kaa sana Yekova tipa gako ziazia toro. (Frp. 4:13) Mo tingidi gupai nga barambeda, Yekova nika fu amaku foro ni bakerehe si ki sa gupai nga bangiro go ti agu akpakarapai mo agbiatiro na ni kusayo. Ho mo ahi aasada ni na ga Yekova undo, mo nada nyanyaki, na mo kidu na rengba ka hi aˈasada kumbatayo.—1 Pet. 1:6, 7.

15. A wa duhe ni kekehe rogo Matayo 17:19, 20, gini kpakarapai ga Yesu abawiriki agbiatiyo na ni?

¹⁵ Yesu ayugu gupai fu gako abawiriki nga idapase nika undo yo i dibe akpakarapai. (Oni gedi Matayo 17:19, 20.) Ti kura regbo sa, i aarengbanga ka do daimona te, wa si avura du nga i aima du na rengba ka do adaimona ti kura aregbo. Ginipai du nasa yo ka i donga gu daimona re ya? Yesu aya, si aaida i du na bakere idapase. Ko ape gupai fuyo nga, ka i du na bakere idapase, i ima rengba ka turã agu akpakarapai du wa gangara kusayo! Areme, ani ima rengba a ka gbiatirani na akpakarapai nga gu rengbe ka ngera wa ka ani dinga behe te.

16. Wai du idapase aundo Geydi tipa ri hipai tifuo i imi kumbari?

¹⁶ Oni berẽnga pa gu kpiapai nga ga gu wirina nga Geydi, nga guri du rogo gu rago nga Guatemala. I aimi kumbari nangia Edi, ho i aayego ni ba gu dunguratise yo nga ga dungurati. Waigu ga Geydi idapase aundo ri ri dibe gu bakere gberãrago ri adu na ni? Ri aya: “Kparakpee naundo re mi ba gimi akpakarapai ku auru Yekova, nga gu nasa re mi du zezeredi. Mi nabi wai abi Yekova angera fuo re vurube gimi aborokporo gbiati abakureami rogo dungurati. Padu du mi tingba ga Yekova sunge ti aregbo dunduko naundo re ka mi dunga na bakere gberãrago ya na si naundo re mi naaraka na aˈuru dũ zanga bakabangire ni bakerehe tipa gupai nika manga gba. Fuo gupai namangi re re, mi wiriki gupai nga ka kina gini asada vura ye kumbatayo, mi aduadu na rengba ka hihe mbiko gu undo nga ga Yekova, Yesu, gbiati riigbu.”

17. Ginipai rengbe ani ka mangaha ho ani agbia tirani ni na agu akpakarapai du wakina gangara?

¹⁷ Ya mo mo narungo tipa pa kpio ga boro? Mo di regbo ka nyakasa gamo idapase kuti gu maabangirise du tipa zingabekpio ni geda mo  agu apangbanga du rogo Ziazia Kekeapai yo tipa agu aboro i azingisi yo be kpio. Ya mo mo na bakere gberãrago mbiko gupai nga i kusi gamo borokporo kusayo rogo dungurati? Mo mangi wisigopai tipa wa ka mo idi kuti gupai nitiro nga ga Mbori arugute ti aregbo dunduko ni wenehe. Ka mo vura kaa gbia tiro na kina gini kpakarapai vurũ, mo mangisunge na ni wa momu ka nyakasa gamo idapase. Mo kusuko kpotoroyo fu Yekova. Ka mo kparanga tiro nisaro ya, ono mo nye mbembedi na awirinamo. (Snz. 18:1) Mo mangi agu apai rengbe ka undo ro mo hipai, ka si vura du nga mo nakpara akpara ho mo aberãpa agu apai ni namangi ro. (Tam. 126:5, 6) Mo naandu kindi kumbatayo kaa ndu tipa adunguratise, kini tungusipai, na kini gedi Ziazia Kekeapai. Na mo nye kindi kaa berãkuriipa gu weneahe Yekova nakidopa fuhe foro kumbatayo. Wa mo nikaa bi wai Yekova aundo ro, gamo idapase kutiko nikaa nyaka gbe.

18. Ka mo ini gupai nga gamo idapase ni nyanyakihe gbe te, ginipai rengbe mo ka mangaha?

¹⁸ Ka si du nga agu aasada mo asusi rogoyo watadu gu du mo rogoho awere yugu gupai foro nga gamo idapase anyakanga gbe te, ka mo dunga na bakere gberãrago ya. Mo bi gipai re nipa momu ka nyakasa gamo idapase. Mo sanahe wakina gu ga Yesu abawiriki asanahe, i aya: “Mo kíisi gaani idapase.” (Rk. 17:5) Berewe a, mo berẽkurii agu akpiapai ani nasakipai tipaha rogo gi kekeapai re. Wakina aMiguel na Yurai, mo tingidipa agu aregbo dunduko Yekova naundo ro ti ni. Wakina wiri Vero gbiati Anel, mo kpari kakaka fu Yekova, gbe ho du mo ni na bakere kpakarapai. Na wakina Geydi, mo tingidi gupai nga Yekova ima rengba ka fu gu undo mo aidaha vurube aborokporo watadu abakureamo. Ho mo ambu Yekova ni ko undo ro mo susi rogo agu aasada mo agbia tiro na ni awere, mo nika du na bakere kido nga ko nika undo ro aundo mo hi ai agu aasada rengbe mo ka gbia tiro na ni kumbatayo.

19. Gini kido Yesu adu na ni, na ginipai rengbe mo kadu na kido tipaha?

¹⁹ Yesu aundo gako abawiriki i bi agu abangiriba si aaida i du na bakere idapase rogoho, Yekova aima rengba ka undo yo i hi agu aasada niruru yo narengbe kadu fuyo kumbatayo. (Yo. 14:1; 16:33) Ko adu na gu kido nga bakere rimbasa aboro kinaho nika bata ti regbo bakere gberãngbi mbiko gayo nyanyaki idapase. (Yugo. 7:9, 14) Ya mo mo adu dagbayo? Na ga Yekova undo, mo ima rengba kadu dagbayo ka mo mangi ai gupai rengbe mo ka mangaha awere ka nyakasa gamo idapase!—Eb. 10:39.