1948 miheca, itiniay i Helan hofocen kako, saka tosa miheca malinahay ko paro no lomaˈ tayra i Senpawlo no Pracil. O wama wina ako miceriday tayra i kiyokay, o paro no lomaˈ maharek malafiˈ miceriday malacafay miˈosi to Fangcalay Cudad. 1959 miheca, malinahay a pacarcaray kami tayra i Padaka, itiniay i Macoˈ a niyaroˈ mikilomaˈ.

Pakayni sapaririˈaw to fafaloay a paro no lomaˈ, midemakay ko wama ako to masakenaay a tayal. Malo pacakayay to dafong a tamdaw cingra, misangaˈay to lalan a tamdaw, ikor malo taypiway no kaysiya no hikoki. Itini kaysiya no hikoki a matayal cingra tada mahemekay kami, samanen ngaˈayay micerid miliwko.

Itini micudad i kawcong marariday kako miharateng: “Ano lomahad kako o maanan ko hademak?” O roma widang ako mipiliˈay micudad i taˈangayay picudadan, o roma tamdaw mala sofitayay. Kawra cowa ka ciharateng kako mala sofitay, samanen cowa ka olah kako malacongis to tao, cowa ka olah malalood. Mansa misaˈosi kako micudad i taˈangayay picudadan, mihaen cowato ko mamala sofitay. Kawra o soˈlinay nafalocoˈan ako o papadama to tao, o mahaenay a nokaˈorip pairaay to epoc saan ko harateng ako.

Micudad i taˈangayay picudadan i, misatapangay kako maolah mikinkiw to pakayniay i tamdaw a lalakaw, samanen sakafanaˈaw kako to pipowaran no ˈorip. Itini picudadan pasifanaˈay tamiyanan to sinkalon, makalimay tamiyanan malo soˈlinay ko hatiniay a kimad han a micada. Kawra pakayni takowanan, o sasowalen no sinkalon cangoˈotay to wacay, cowa ka tatodong to kakak.

Itini picudadan, cowa ka mananam niyam to sasamaan mihapinang to matatodongay anca mararaway, hanaca mananamay ano sakalaˈosiaw no demak haratengay sanay ko pidemak. Mirienangay kako to adihayay a picawmaˈan, mitanamayho to etok, soˈlin tada lipahakay, kawra hatiniay a lipahak cecayay liyad. Harateng ako: ‘O hatiniay a kaˈorip soˈlinay a ciepoc han?’

Ikor malinahay kako i Poseton, itiraay a taˈangayay picudadan micudad. Sapietanaw to sapicudad a payci, matayalay kako to cecay liyad a tayal. Itiniay katayalan a kitiraan sakinacecay ako malitemoh ko Misawacayay Tamdaw ni Yihofa, o cafay ako matayal cingra, pasowalay cingra to pakayni i sapairasol no “pito a liyad” saka 4 fedengan no Taniil cudad, mitadtadayho itiniay saikoray romiˈad a maˈorip kita. (Taniil 4:13-17) Kalikiay mahapinang ako, ano padadotoc kako malalengo cingranan to Fangcalay Cudad, pakasoˈlin to misowalan ningra takowanan a demak, maedeng o mamifalic to pakayraan nokaˈorip no niyah. Orato, sapiliyasaw kako tonini cafay matayal.

Sakatayraaw i Katimol a Amilika matayal, itini taˈangayay picudadan minanamay kako to milingatay a lalakaw. Harateng ako mirienang to pakatamdaway a demak papaira to ciepocay a kaˈorip, kawra cisasaay ko harateng ako tonini. Saikor tada matoleday, mahererek ko cecay liyad micudad sawad sanayto kako.

1970 miheca 5 folad, malinahay kako tayra i Amostetan no Helan, misatapang matayal i katayalan no wama i kaysiya no hikoki. Onini a tayal ngaˈayay kako talacowacowa miliwko, tayraay kako i Afrika, Amilika, Iwropa ato Asiya adihayay a kitakit. Kahnayay mahapinang ako, ano icowato a kitakit misiˈayaway to pakidemay a pasangaray, hanaca pasangaray a saysayen. Miowingay konini to harateng ako, sapidemakaw to ciepocay a demak. Orato misaˈosiay kako minokay i Padaka, miliyaw itini taˈangayay a picudadan no Poseton a micudad.

Kawra patikol i picudadan caka halafin, mahapinangay ako pakayni kaˈorip no niyah a sasa no harateng awaayho ko caˈof. Miliyaway a moraraw ko patosokan ako, orato mikilimay to singsi no picudadan, mitokel to sapaini ningra. Caay ka harateng saan cingra: “Hano padadotocho aki? Tangsol a misawad micudad mamaan.” Ano mahaenay ko sowal ningra, caayto ka cisasa kako misawad micudad, cowato ka patikol.

Miliyas to picudadan, kamayan mahorac ko kaˈorip ako. Itiya iraay ko cecay ˈopo a tamdaw micowatay to dipayal ato ciolahay falocoˈ sanay, misafelitay to nanaman nolitengan, misaˈosiay kako mirienang cangranan. Kako ato papina widang mikalicay to paliding, mikitini Padaka tahira i Akapoeke no Mosiko. Itira, malacafayay kako to masasifoday ko kaˈorip a tamdaw mikilomaˈ. Nengnengen konini tamdaw hato awaay ko cariraw, kawra kahnayay mahapinang ako, i lalomaˈ nangra adihayay ko cowa ka soˈlin ko falocoˈ ato cowa ka madimadi, o pakayraan nokaˈorip nangra awaay ko epoc, cowa paira to soˈlinay a lipahak.

Toya tatokian, o patosokan i kaemangho parakat to tamina i riyar miliyaway masadak. Kawra cowa piharateng kako malo matayalay i tamina, malo ˈaˈideman no tamina ngaˈ. Sapilaˈosiaw tonini a patosokan, ira ko niyah a tamina ngaˈ. O widang ako ci Tangmo malecaday ko patosokan, mihaenay misetekay kami to falocoˈ malacafay pakatamina mitaliyok to hekal. Miharateng itini faedetay a pala makilim ko makapahay a potipot, miliyas to ˈifowaay ˈalomanay ko tamdaw a kitiraan.

Kako aci Tangmo tayraay i ngata no Pasaylongna no Sipanya a Alinis ngata no riyar, itira micakay to mataˈlifay ko 9 kongce koˈedaw pakopangan a tamina, o ngangan noniya tamina o Likelahaw. Sakangaˈayaw nonini kaeming tamina romakat i riyar, miliyawan niyam misangaˈ. Samanen cowa ka macaloh tayra i katahiraan, mitastasan niyam ko incing, ho ira ko kitiraan miteli to nananomen. Sakangaˈay romakat i kaemingay minato, micakayay kako to tosa 5 kongce ko koˈedaw sapiˈiwas. Maharekto misaday, ngaˈayto tayra i riyar. Mihalakaay kami mililis to Afrika kaetipay a lawac riyar, mitaliyok to Hawangciyaw no Nanfi, tayra i Intiya Riyar a Saysie. Mihapinangay kami to cifoˈisay a kakarayan, misaka dademak to sapinengneng to foˈis a lalosidan ato wito ato rakat no tamina i riyar a koyomi matatodongay ko rakat no tamina. Tada macekiday kako, tano hatiniay a pakayraan tada matatodongay ko patosokan no rarakaten!

Malingad caka halafin, mahapinangay niyam ko tano kilangan misangaˈ a pakopangan a tamina cowa ka ngaˈay romakat i riyar, samanen cecay tatokian micomoday ko 22 kongsen a nanom i tamina. Ikor, malecad o misowalan i satapang, tahalifaay kami to cecay faliyos. Tada matalaway kako, orato midemakay to halafinay a miheca cowa ka demaken a demak, mitolon to Kawas. Mikiˈokay kako i Kawas, ano ngaˈay maˈorip kami, mamisaˈicel kako a mafanaˈ Cingranan. Ikor malowanayto ko faliyos, mitooran ako ko sakiˈok ako.

Itini tamina misatapangay kako miˈosi to Fangcalay Cudad. Itiya itiniay kako i Ticonghay, i kaˈayaw o kakahaday awaay ko tolas a riyar, iraay ko maˈeferay a futing ato i riyaray a fafoy. Itini dadaya, kakahaday a kakarayan adihayay ko foˈifoˈis tada macekiday kako! Matongalay ko pakasoˈlin ako, soˈlinay ira ko cecay ciharatengay to tamdaw a Kawas materek.

Itini i riyar romakat to pina lipay ikor, paselaˈay kami i Alikate no Sipanya, papacakayen ko tamina, mifalic to ikakaay ko kangaˈay a tamina. Oniya matelangay awaay ko incing ato micomoday ko nanom a pakopangan a tamina tada pasangaray a pacakayen. Kawra, itini pitalaan a tatokian ngaˈayay kako miˈosi to Fangcalay Cudad.

Adihay ko miˈosian ako matongalay a mahapinang, adihayay ko ngaˈayay a sakayat i Fangcalay Cudad, pairaay to soˈlinay lipahak a kaˈorip. Tada masemeray kako ˈakawangay a palinian no Fangcalay Cudad, saan miharateng: “Ano ihkalay ko sowal no Fangcalay Cudad, o ˈalomanay misa o Krisciyangay a tamdaw, mahawpay ko niyah, hano cowa ka pitoor to sowal no Fangcalay Cudad a midemak hani?”

Misaˈosiay to kako mifalic, orato cowato piselip to etok. Pakasoˈlinay kako to iraay ko tamdaw mitooray to ˈakawangay a palinian no Fangcalay Cudad a maˈorip. Makalimay kako sapiˈarawaw tonini a tamdaw, orato sakina tosa to kako mitolon to Kawas, micangacang Cingranan padama takowanan mahela cangra.

Tano mifalahay a pakayraan mikilim to matatodongay a pihakelongan o ngaˈayay a pakayraan.  Itini maci no Alikate maˈaraway ako ko adihayay a kiyokay, misaka dademakay cangra to samiyay, mansa tangsolay kako mifalah cangranan.

O cecay kalahokan no pilipayan, itiniay kako i mimingay a lotok miˈosi to Fangcalay Cudad ngaˈayay maˈaraw ko minato, miˈosi to Yakop 2:1-5, sanay ko sinael cowa ka ngaˈay kita misakakinih maolah to cihafayay a tamdaw. Itini pinokayan tayra i tamina a lalan, maˈaraway ako ko cecay hato pisikayan tono pihakelongan a kitiraan, o papotalay a paya matiliday ko “Misawacayay Tamdaw ni Yihofa Hongti Kitakit Kasaˈopoan.”

Sapalifetaw kako tonini a tamdaw, minengneng samaan ko picada nangra takowanan, orato micomoday kako i Hongti Kitakit Kasaˈopoan. Itiya hatasi sanay kako, kangisngis sanay ko laway, macicihay ko kafer. Mikeriday ko militemohay a tamdaw takowanan tayra i tatihi no cecay matoˈasay a fafahiyan, itini saˈopo, pacafayay konini a fafahiyan takowanan mikilim to misowalan no mikimaday a sinael. Mahererek ko saˈopo, ˈalomanay tamdaw tayniay takowanan a mihamham, caay ka harateng tada ciharatengay cangra takowanan. Iraayho ko cecay tamdaw mitahidangay takowanan tayra i lomaˈ ningra malacafay milengo to Fangcalay Cudad, kawra cowaho ka emin ako miasip ko Fangcalay Cudad, pasowalan ako cingra: “Maharek kako misaday, pasowalen ako kiso.” Toya tatokian, misatapangay kako mirienang to polong a saˈopo.

Ikor no pina lipay tayraay kako i lomaˈ noniya tamdaw, pacaˈofay cingra to adihayay pakayniay Fangcalay Cudad a salicay. Ikor no cecay lipay, pafeliay cingra to cecay lofok a ngaˈayay rikoˈ, pasowalayho takowanan ono cecay faˈinayan salikaka konini a rikoˈ, mapalitay cingra nohatini, pakayni sapidofdofaw to limoˈot no Fangcalay Cudad maolah to tao, caay kakahi minanam to malalooday. (Isaya 2:4; Yohani 13:34, 35) Nohatini, mahapinangayto ako mahelaayto ako ko kakilimen a tamdaw, oyaan makahiay mitoor to matatodongay a palinian no Fangcalay Cudad a tamdaw. Mifalicay to patosokan ako konini, caayto ka sapikilimaw kako to malecaday i kakarayan a palosayan, misaˈosiay kako micalep a minanam to Fangcalay Cudad. Orato, misaˈosiay kako minokay tayra i Helan.

Mikalicay kako to mitaˈlifay a paliding tayra i Helan, ikor no sepat romiˈad tahira i Keloninken a niyaroˈ. Itira, misaaliay kako to cecay tayal ho ira ko sakaˈorip, mikilim kako to misasayhoay a tayal i, itini pitilidan a kalidopak “pihakelongan” mitilidan ako ko “Misawacayay Tamdaw ni Yihofa”. Tangsolay mafalic ko pising noya tawki, sanay pasowal: “Patingwa hanto ako kiso.” Kawra cowa ka patingwa cingra takowanan.

Mikilimay kako to roma misasayhoay a tayal, misaaliay ko tawki takowanan to picudadan ato sapisiwkay a cudad. Pasowalan ako na misangaˈay to  cecay no kilang pakopangan a tamina, caay ka harateng saan ko sowal ningra: “Kalahokan ngaˈayto kiso matayal, kawra iraay ko cecay saali, caay ciharateng kako tisowanan mifekad to tatiihay a demak, samanen Misawacayay Tamdaw ni Yihofa kako, mitooray to safalod no Fangcalay Cudad maˈorip.” Fahkaay kako minengneng cingranan saan pasowal: “Mahecaday kako i!” Samanen koˈedaway ko fokes ato kangisngis sanay ko pising, mafanaˈay cingra cowa ko Misawacayay Tamdaw ni Yihofa kako, orato sanay pasowal: “Pasifanaˈan ako kiso minanam to Fangcalay Cudad haw!” Mahemekay kako mihayi. Cipinangay to kako nohatini oya salakatay a tawki hano eca ka patingwa takowanan, soˈlinay pafelien ni Yihofa kako to micangacangan ako! (ˈOlic 37:4) Itira tora singdi no salikaka matayal kako to cecay miheca, hanaca malacafay cingranan minanam to Fangcalay Cudad. Ikor, itini 1974 miheca 1 folad micadaayto kako to paputisem.

Ikor no cecay folad misatapangay kako to cecay faelohay a tayal, o misakafahay a tayal, tada parenecay takowanan konini. Mataˈlif ko cecay folad, malinahay kako tayra i Amostetan midama to faelohay tomireng no Sipanya ko sowal a kapot. Ngaˈay tano Sipanya a sowal ato Potawya a sowal misikay to pacekiwan, tada kalipahakanto! 1975 miheca 5 folad, minilnilay ko likakawa takowanan malo mikiriwiˈay misakafahay.

Cecay romiˈad, o cecay mikiriwiˈay misakafahay ci Inici miˈorongay to cecay Polifia a pacekiwan mirienang to saˈopo niyam, misiwkay to pacekiwan mafanaˈ to Sipanya ko sowal a salikaka. Ikor misatapangay kako aci Inici patikami, mitongal to kasasifanaˈ. Kalikiay mahapinang niyam iraay ko malecaday a patosokan niyam. 1976 miheca, mararamodayto kami, ikor mararamod padotoc malo mikiriwiˈay misakafahay. 1982 miheca, matahidangay kami mirienang to saka 73 liyad Kiliyat Picudadan. Ikor no micudiyap manilnilay kami tayni i kawali no Afrika a matayal, tada fahkaay kami a mahemek! Itini kami i Mongpasa no Kenya matayal to 5 miheca. 1987 miheca, manilnilay kami tayra i Tansangniya, matedalay ko sakeceng no sifo to mitosilay a tayal. Ikor no 26 miheca matayal itira, patikolay kami tayra i Kenya.

Padama to misapoeneray ko falocoˈ ato miakoˈiday ko falocoˈ a tamdaw minanam to Fangcalay Cudad, tada ciepocay to kaˈorip niyam. Tinakoen, itini Mongpasa saka cecay pacekiwan ako itiniay i kaˈalomanan a pitosil malitemoh. Pafelian ako cingra to tosa casi, milicayay cingra: “Maharek kako miˈosi toniya tosa casi midemakho to maanan hani?” Ikor no cecay lipay misatapangay kako tano Wa Ngaˈay Kiso Tahadaˈoc Maˈorip i Lakoing a cudad pasifanaˈ cingranan minanam to Fangcalay Cudad, itiya onini a cudad faelohayho tepangen kono Swasili a sowal. Ikor no cecay miheca micadaay to cingra to paputisem, ikor malo miceriday misakafahay. Mikitiya misatapang, cingra ato fafahi 100 ko mapadamaay a tamdaw patafang to tireng micada to paputisem.

Satapang aca kako cipinang to epoc nokaˈorip i, malecaday ko niyah to sapatinako ni Yis a misasingdiay a tamdaw, mahela ko matekesay a odoˈ caay ka ciharateng malahdaw. (Matay 13:45, 46) Makalimay kako tano hakelong nokaˈorip padama to tao ira ko ciepocay a kaˈorip. Kako ato fafahi matinakoay niyam, palemeday ci Yihofa to finawlan Ningra, padama cangranan ciepoc ko nokaˈorip.