1948 tripantu mu, Países Bajos pingechi mapu mu, choyün. Rupalu quiñe tripantu, huiñamtuhuiyiñ ca pais, Brasil. Tañi pu chau amuquefuingu iglesia mu. Ca com iñchiñ trür papeltuquefuiñ ta Biblia. 1959 tripantu mu, amutuiñ ca pais, Estados Unidos.

Tañi familia mu pura chengeiñ, feimu tañi chau rume cüdauquefui taiñ cuidayaeteu. Tañi chau fillque cüdau femquefui: fendequefui huaria mu, cüdauquefui deumangequen mu carretera, ca cüdauquefui quiñe compañia aerea mu. Com iñchiñ rume ayüucülefuiñ feichi cüdau nielu tañi chau, huall püle amuquefuiñ.

Huechengelu iñche, rume ramtuuquefun chem dungu tañi femal ñi mongen mu. Quiñeque tañi pu hueni amuingün universidad mu. Caquelu conpuingün servicio militar. Iñche ayüquelan ñi chaftuafiel pu che ca lladcütuafiel, feimu duamtulafiñ ti servicio militar. Feimu dullin amual universidad mu. Rume ayüquefun ñi quelluafiel pu che, femngechi ñi ayüucüleal troquiuquefun.

Iñche rume ayüquefun ñi quimürpual chumngechi ñi deumangen mongen Mapu mu, feimu ayüfiñ ti antropologia. Tati universidad mu, tati pu quimeltufe quimeltuqueingün ti evolucion. Ayüquefuingün taiñ feyentual ñi rüfngen tüfa. Huelu tañi feipin engün, feyentufal-lai, niequelafuingün ta prueba. Fei engün ayüquefuingün iñchiñ taiñ feyentual müten tañi feipiel engün.

Universidad mu, quimeltungequelaiñ taiñ doi cüme chengeal ca taiñ femal cümeque dungu. Doi mai quimeltungequeiñ taiñ femal chem dungu rume taiñ cüme tripayal universidad mu. Ayüucülefun tañi pu hueni engün, amuquefuiñ fillque fiesta mu ca drogatuqueiñ cütu. Huelu tüfachi dungu rumel ayühulquelaeneu. Feimu ramtuhun: “¿Chummequen am tañi mongen mu?”.

Rupalu ta antü, amutun Boston huaria mu. Fei mu chillcaturpun. Tañi universidad mu elungen ta vacaciones, feimu eluhun tañi cüdahual. Tañi cüdau mu, quimürpufiñ quiñe Dunguquelu Ineingen Jehová. Fei nütramcaeneu quiñe profecia mülelu Daniel capitulo 4 mu, ca feipieneu epe puucülei ñi afal com huesaque dungu (Dan. 4:13-17). Fei ngüneduamün doi nütramcauliyu ti testigo engu, feyenturpuafun tañi feipieteu, fei mülefui tañi cacünutual tañi mongen. Tüfa ayülafun, feimu famentuhun.

Tañi universidad mu, pepicaungen ñi quelluafiel ta caquelu che. Tüfachi cüdau mu, cullingequelan. Raquiduamquefun: “Coneltufuli tüfachi cüdau mu, doi ayühulafeneu” troquiuquefun, huelu femlai. Petu quintuyahulpefun chem tañi ayühulafeteu, feimu tripatun universidad mu.

Mayo 1970 tripantu mu, huiñamtuhun Ámsterdam huaria mu, Países Bajos mapu meu. Fei mu cüdahurpun quiñe compañia aerea mu, cheu ñi cüdauquefel tañi chau. Tañi cüdau ñi duam mu, amuquefun fillque pais mülelu África, América, Europa ca Asia meu. Chem pais rume amufuli, mülei huesaque dungu, inei no rume cüme elcünutulayafui. Iñche ayüquefun ñi femal falinque dungu tañi mongen mu, feimu ca huiñotun tañi chillcatual Boston huaria mu.

Ngüneduamün tati universidad tañi quellunoeteu ñi huiñoldungual quiñeque ramtun tañi ramtuuqueel. Quimquelafun chem tañi femal, feimu ramtufiñ tañi quimeltufe quiñeque dungu tañi ngülamtuaeteu. Quisu feipieneu: “¿Chumngelu am petu chillcatuleimi universidad mu? ¿Chumngelu elcünulafimi?”. Feimu elcünufiñ ti universidad, fei huiñohuetulan.

Feichi mu, petu pelafun chem tañi ayühulaeteu. Feimu trahuluhun tati pu che hippie pingelu. Tañi pu hueni iñchiñ, namuntu amulequefuiñ Estados Unidos mu. Catrütuquefuiñ pu auto taiñ yeaeteu fill püle. Fei puhuiyiñ Acapulco huaria mu, México mapu meu. Üye mu, trür mülequefuiñ tati pu hippieche engün. Tüfachi pu che, tüngduamcülequelu troquingequefui.  Ngüneduamün chumngechi ñi yeniequen tañi mongen engün, rüf ayühulquelaeyu. Doi mai, epe com engün nor chengelaingün.

Pichicalu iñche, rume ayüquefun ñi miyahual lafquen mu quiñe farcu mu. Tañi femal tüfa, mülefui ñi nieal quiñe velero. Niequefun quiñe hueni, Tom pingelu. Quisu ca ayüquefui ñi femal tüfa, nütramcahuiyu fei amuyu. Rume ayüquefuyu ñi puhual quiñe isla cheu ñi ngenon ta ley.

Tom iñchiu amutuyu España mapu meu. Üyeu ngillafiyu quiñe velero. Cüme elcünutufiyu fei ñi cüme amual. Nentufiyu ti motor fei tayu doi ngülümal co. Ngillafiyu epu remo, tañi medin quechu metro. Femngechi cüme amulnieafuyu ti velero pichique puerto mu. Feula mai amutuyu cheu ñi mülequen alün pichique isla, Seychelles pingelu. Ayüfun ñi hualloñmayafiel África mapu ñi puhual cabo de Buena Esperanza pingelu. Ngüneduamquefuyu pu huangülen, fillque mapa, lifru ca fillque quellu taiñ adnieaeteu cheu püle amual. Ca femngechi quimfiyu cheu tayu amulen, afmatufali.

Ngüneduamiyu tayu velero huesañmahui, coni fentren co. Fei acurumei quiñe fütra cürüftucu mahun, fei rume llican. Llellipufiñ ta Chau Dios, fütra cuifi tañi llellipuhuequenofiel. Feipifiñ: “Mongetripafuli, quintuayu femngechi tañi doi cüme quimafiel ta eimi”. Rupai ti fütra cürüftucu, fei femün tañi feipicünuel.

Feimeu müten papeltufiñ Biblia, lafquen meu amulelu iñche. Anülelu iñche tañi velero mu, rume ayüfali tañi pefiel itrofill challhua. Pun mu, rume ayüfiñ ñi pefiel fentren huangülen. Feimu quimconün ñi mülen quiñe Chau Dios ca ñi duamniefiel tati pu che.

Fei rupai quiñe mufü semana, puhuiyu Alicante pingechi puerto mu, España meu mülelu. Fei mu ayüfuyu tayu fendeal tayu velero, fei tayu ngillayal quiñe doi cümelu. Rume cüdautuyu tayu fendeafiel huesañmaulu am, ca nielai motor. Huelu alün tiempo nien ñi papeltual ta Biblia.

Doi papeltufiñ ta Biblia, fei ngüneduamün tañi quelluafeteu ñi ayüucüleal tañi mongen mu. Afmatulehuequen fentren cümeque dungu ñi feipiel ta Biblia taiñ yenieal lif mongen. Feimu ramtuhun chumngelu fentren che cristiano troquiuquelu, iñche reque, inaquelafi Biblia ñi ngülam.

Feimu elcünun tañi huesa femqueel ca drogatuhuelan. Fei raquiduamün: “¿Mülepelai che inaquefilu Biblia ñi ngülam?”. Fei ayün ñi quimafiel. Ca quiñe rupa llellipufiñ Dios tañi quelluaeteu.

Tañi peal tati rüf religion, trürümfiñ ñi femquen caque quiñeque religion. Miyaulu Alicante mu, pefiñ fentren iglesia. Feiti iglesia nielu am adentun, fei quimün ñi coneltulenon ti rüf religion mu.

Quiñe domingo tarde mu, anülelu quiñe huincul mu, papeltumequefiñ ñi feipin Santiago  2:1-5. Fei mu feipilei cümelai ñi huesalcangeal pu pofre ñi dullintungeal pu ricu müten. Amutulu ñi farcu mu, rumen inafül quiñe Trahunhue Ruca pu Dunguquelu Ineingen Jehová.

Feimu raquiduamün: “Peafiñ tüfachi pu che chumngechi llohuaeneu iñche”. Conpun ti Trahunhue Ruca mu. Zapatotulelan, ñi pantalon hucürcülei ca fütra payuntulen. Quiñe huentru quellupaeneu, yeeneu ca anücünupaeneu quiñe domo ñi inafül. Feichi ñaña quellueneu ñi quintual chi texto ñi feipin tati hueupife. Aflu chi trahun, afmatulehuen com ñi chalipaeteu pu che. Quiñe huentru mangeleneu ñi ruca mu tañi nütramcayaeteu Biblia ñi dungu. Huelu iñche com papeltunofilu am chi Biblia, feimu feipifiñ: “Iñche feipiayu”. Huelu amuquen com chi trahun mu.

Fentren semana rupai, fei amun ñi pemeafiel ti huentru ñi mangeleteu. Fei huiñoldungueneu com ñi ramtun ñi niequeel Biblia meu. Quiñe semana rupai, fei elueneu rume cümeque ropa. Quisu feipieneu: “Tüfachi ngen ropa presulei. Quisu presungei ñi feyentufiel mu Biblia ñi dungu” (Is. 2:4; Juan 13:34, 35). Feula quimün ñi pefiel pu che rüf inaniequefilu Biblia ñi feipin ca eluucülelu ñi yenieal lif mongen. Feimu feipin: “Feula quintuhuelayafiñ ti isla tañi quintuyahulquefel. Doi mai cüme papeltuafiñ ta Biblia ñi cüme pepilafiel”. Feimu huiñotun Países Bajos mapu mu.

Meli antü yeniefun tañi catrütuquefiel auto ñi puhual Groninga huaria mu. Quintun cüdau tañi mongeleal. Quiñe carpinteria mu pefun cüdau, fei mu ramtungen tañi religion, “Dunguquelu Ineingen Jehová” pin. Quimlu tüfachi ngen cüdau, feipieneu: “Mütrümayu”. Huelu turpu femlai.

Pefun cüdau cangelu carpiteria mu, fei feipifiñ tati ngen cüdau tañi eluaeteu chi cüdau. Fei ramtueneu: “¿Niepeimi mai quiñe titulo? ¿Chem cüdau femquefuimi cuifi mu?”. Fei feipifiñ: “Iñche cüme elcünutufiñ quiñe velero”. “Cüdahuafuimi fau” pieneu, “huelu chem huesa dungu no rume femlayaimi. Iñche poyequefiñ Jehová, inaniefiñ Biblia ñi feipin” pieneu. “¿Rüfcünu? Iñche ca testigongen” pifiñ. Huelu iñche payuntulefun ca cupilcülelan tañi lonco. Quisu peñmaeneu tañi chumngechi adcülen iñche, fei ngüneduami  tañi rüf testigongenon. Fei feipieneu: “Iñche enseñalelayu Biblia”. “Felei” pifiñ. Fei raquiduamün: “Feula quimün chumngelu elungelan chi cüdau ti cangelu carpinteria mu. Jehová adnieneu ñi cüdahual tüfa mu, allcütuñmaeneu tañi llellipufiel” (Sal. 37:4). Quiñe tripantu mu cüdahuelfiñ feichi peñi, ca enseñaleneu Biblia. Fei enero 1974 tripantu mu fautizahun.

Quiñe cüyen rupai, fei precursorngerpun, tüfa rume ayühuleneu. Ca quiñe cüyen rupai, fei huiñamtuhun Ámsterdam huaria mu. Fei coneltulerpun quiñe pichi troquiñche amuldunguquelu huincadungun meu. Rume ayühuleneu quimeltulelafiel Biblia tati pu che huinca ca portugués quehun meu. Mayo 1975 tripantu mu, elungen quiñe falin cüdau: precursor especialngerpun.

Quiñe antü, quiñe lamngen Catharina pingelu ca precursora especialngelu, amui taiñ trahun mu huincadungun meu. Fei mangelfi quiñe domo Bolivia tuhun-ngelu ñi quimafiel caquelu peñi ca lamngen huincadunguquelu. Fei Catharina iñchiu, eluhuiyu tayu doi cüme quimuhual. Fei mandaleluuquefuyu carta. Mür ayülefuyu ñi doi cüdahuelafiel Jehová. 1976 tripantu mu, cureyehuiyu. 1982 tripantu mu, mangelngeyu tayu amual Galaad pingechi Escuela mu. Fei mangelngeyu tayu amual Mombasa, Kenia mapu meu. Rume ayüufuyu. Quechu tripantu amuldunguyu üyeu. 1987 tripantu mu, feipingeyu tayu amual Tanzania mapu mu. Üyeu taiñ pu peñi ca pu lamngen catrütungehuequelai ñi amuldungual. 26 tripantu mülefuyu Tanzania mapu mu, fei hula huiñotuyu Kenia mapu meu.

Quimeltulelafiel Biblia tati pu che ñom piuquengelu, rüf ayühulqueyumu. Mombasa huaria mu, amuldungun meu quimfiñ quiñe huentru. Elufiñ epu revista, fei feipieneu: “Com papeltufili hula, ¿chuman cai?”. Quiñe semana rupalu, trür chillcatufiyu Biblia. Fei ngüneduamfiyu ti lifru Usted puede vivir para siempre en el paraíso en la Tierra. Feichi lifru, hue tripai suajili quehun mu. Quiñe tripantu rupai, fautizahui ca hunelerpui amuldungun mu. Quisu tañi domo engu epe pataca che quellufingu ñi fautizahurpual.

Quimfilu iñche ti rüf dungu rume falintufiñ, chumngechi ñi femün feiti negociante pefilu quiñe perla rume falilu (Mat. 13:45, 46). Iñche rume ayüquen ñi quelluafiel pu che ñi quimafiel ta Jehová fei ñi ayüucüleal engün. Tañi domo iñchiu ngüneduamiyu Jehová cümelcaquefi tañi pu che, femngechi ñi ayüucüleal engün.