Go long ol haf insaed long hem

Go long lis blong ol haf

LAEF STORI

Mi Stap Lukaotem Wan Laef We i Gat Mining

Mi Stap Lukaotem Wan Laef We i Gat Mining

MI STAP long olfala seling bot blong mi long medel blong Mediterenian Si, nao mi sek se plante wota i stap kam insaed from we i gat wan hol. Biaen, wan bigfala win i girap, i mekem mi fraet tumas, mo hemia fastaem long laef blong mi we mi prea long God. ?From wanem nao mi stap ya? Fastaem, bambae mi tokbaot laef blong mi.

Taem mi gat seven yia, mi mo famle blong mi i laef long Brasil

Mi mi bon long Netalan long 1948. Mo long nekis ya blong hem, famle blong mi i muv i go long São Paulo, long Brasil. Perens blong mi i stap go long jos oltaem, mo evri naet afta we mifala i kakae, mifala i stap ridim Baebol. Long 1959 mifala i aot long Brasil, mo mifala i go stap long Massachusetts long Yunaeted Stet.

Mifala sikis pikinini mo papa i wok had blong lukaot long mifala. Long ol yia we oli pas, hem i mekem plante defren wok, olsem i go olbaot blong salem ol samting, i wok long wan kampani blong wokem ol rod, mo wan kampani blong plen. Mifala evriwan i laekem taem hem i wok long kampani blong plen, from mifala i save travel plante.

Taem mi stap long haeskul, plante taem mi stap tingbaot se: ‘?Bambae mi mekem wanem long laef blong mi?’ Sam fren blong mi oli jusum blong go long yunivesiti, mo sam oli jusum blong go long ami. Be mi mi no wantem joen long ami, from mi no laekem rao mo mi no wantem faet, ale mi jusum blong go long yunivesiti. Be antap long hemia, mi wantem halpem ol narafala from mi ting se hemia nao bambae i mekem laef blong mi i gat mining.

LAEF LONG YUNIVESITI

Blong plante yia mi stap lukaotem wan laef we i gat mining

Long yunivesiti, mi intres moa blong stadi long fasin blong laef blong ol man, from mi wantem save olsem wanem nao laef i stat. Oli tijim mifala long evolusen, mo ol tija oli wantem se mifala i bilivim ol tijing ya. Be mi luk se i no stret from sam long ol tijing ya i no gat pruf.

Long ol klas we mi go long hem, oli no tijim mifala long ol fasin we oli gud mo fasin we i nogud. Be, oli tijim mifala blong mekem eni samting we mifala i save mekem blong gat gudfala mak long yunivesiti. Mi glad taem mi stap wetem ol fren long ol pati, mo taem mi testem sam drag, be glad ya i no stap longtaem. Mi stap tingting se, ‘?Hemia nao laef we i gat mining?’

Samtaem biaen, mi muv i go long taon blong Boston mo mi go long wan yunivesiti long ples ya. Long taem blong skul holide, mi wok blong pem skul fi blong mi, mo long ples ya nao hemia fastaem we mi mitim ol Witnes blong Jehova. Wan fren long wok i tokbaot profet tok blong “seven taem” we Daniel japta 4 i tokbaot, mo i eksplenem se yumi stap long ol taem blong en. (Dan. 4:13-17) Be kwiktaem nomo mi luksave se sipos mi stat blong bilivim ol samting we hem i stap tokbaot, bambae mi mas mekem sam jenis long laef blong mi. Ale mi traem blong no moa storian wetem hem.

Long yunivesiti, mi tekem sam kos we i save givhan long mi blong mekem volontia wok long Saot Amerika. Mi ting se sipos mi givhan long ol man, bambae laef blong mi i gat moa mining, be biaen, mi luksave se samting ya i no tru, ale mi harem nogud tumas mo mi lego skul.

MI GO LONG OL NARAFALA KANTRI BLONG LUKAOTEM LAEF WE I GAT MINING

Long Mei 1970, mi muv i go long Amsterdam, long Netalan, blong wok long sem kampani blong plen we papa i bin wok long hem. Wok ya i mekem se mi travel i go long plante kantri long Afrika, Amerika, Yurop, mo Esia. Be nomata wanem kantri mi go long hem, mi luksave se ol man oli fesem plante problem mo i no gat man i save stretem. Mi wantem tumas blong mekem wan gudfala samting long laef blong mi, ale mi mekem desisen blong gobak long Yunaeted Stet blong stadi bakegen long yunivesiti blong Boston.

Afta we mi gobak blong skul, kwiktaem nomo mi luksave se mi no kasem eni ansa blong ol kwestin blong mi long saed blong laef. Mi no save wanem blong mekem, ale mi askem advaes long wan tija blong mi. Mi sek taem hem i talem long mi se: “?From wanem yu stap gohed yet blong stadi long yunivesiti? Yu sud stop.” Ale wantaem nomo mi lego yunivesiti mo mi no moa gobak bakegen.

Mi harem se laef blong mi i no moa gat mining, ale mi joenem wan grup we oli no laekem ol kastom mo oli talem se oli stap leftemap pis mo lav. Mi mo sam fren i travel i go long Yunaeted Stet mo godaon long Acapulco, long Meksiko. Mifala laef wetem ol man we oli no folem ol rul, mo i luk olsem se laef blong olgeta i gud nomo. Be biaen, mi luksave se laef blong olgeta i no gat mining mo oli no glad. Plante long olgeta oli ol man blong giaman mo oli no stap tru long narafala.

LAEF LONG WAN SELING BOT

Mi wetem wan fren i stap lukaotem wan naesfala aelan

Long taem ya, mi tingbaot bakegen samting we mi wantem mekem taem mi pikinini, hemia blong kam wan kapten. Be blong mekem olsem, mi mas gat wan prapa seling bot blong mi. Mi gat wan fren we nem blong hem Tom mo hem tu i gat sem tingting olsem mi. Ale mitufala i mekem plan blong travel i go raon long wol. Mi wantem faenem wan naesfala aelan we mi save stap long hem we i fri long rul blong ol man.

Mi mo Tom i travel i go long Arenys de Mar, klosap long Baselona, long Spen. Long ples ya, mitufala i pem wan seling bot, nem blong hem Llygra mo longfala blong hem i 9.4 meta. Mitufala i stat blong fiksimap sam samting long smol bot ya, blong mekem se i sef blong travel long hem. Mitufala i no hariap blong go long ples we mitufala i wantem, taswe mitufala i tekemaot enjin blong bot ya mo yusum spes blong hem blong storem plante wota blong dring. Mitufala i putum tu parel blong 5 meta long bot blong mitufala i save stiarem bot ya i go long ol smol haba. Ale, mitufala i statem trip blong mitufala i go long Seychelles, long Indian Osen. Plan blong mitufala hemia blong travel folem weskos blong Afrika mo go long Cape of Good Hope, long Saot Afrika. Mifala i yusum ol sta, sam map, ol buk, mo sam simpol tul we i halpem mifala blong travel long stret daereksen. Mi mi sapraes blong luk se mitufala i naf blong faenem stret ples we mitufala i stap go long hem.

Kwiktaem nomo mitufala i luksave se mitufala i no moa save gohed blong sel long bot ya, from i gat hol mo plante wota i stap kam insaed. Olsem we mi talem long stat blong stori ya, taem wan bigfala win i girap we i mekem mi fraet tumas, mi stat blong prea long God, mo mi promes se sipos mi stap laef, bambae mi traehad blong save hem. Afta we bigfala win ya i godaon, mi holem promes blong mi.

Mi stat blong ridim Baebol taem mitufala i stap long solwota. Mi haremgud tumas blong sidaon long bot long medel blong Mediterenian Si mo lukluk ol flying fis, dolfin, mo solwota we i nogat en blong hem. Long naet, mi laekem blong luk ol sta, mo hemia i mekem mi sua se i gat wan God we i intres bigwan long yumi ol man.

Afta we mitufala i spenem sam wik long open si, mitufala i kamtru long haba blong Alicante, long Spen. Long ples ya, mitufala i traem salem smol bot ya blong pem wan niu wan. Be i had blong faenem wan man blong pem wan olfala bot we i no gat enjin mo i gat hol long hem. Nating se i olsem, hemia wan gudfala taem blong mi save ridim Baebol.

Moa we mi ridim Baebol, moa we mi luksave se hem i wan gudfala buk we i save halpem yumi blong glad long laef. Mi mi sapraes blong luk se Baebol i tokbaot klia olsem wanem blong gat wan laef we i klin mo i stret, mo mi stap tingting se, from wanem plante man we oli talem se oli Kristin oli no wantem luksave samting we Baebol i talem.

Mi mi gat strong tingting blong jenisim laef blong mi, ale mi stop blong tekem ol drag. Mi stap tingbaot se i mas gat ol man we oli folem ol rul blong Baebol long laef blong olgeta, mo mi wantem blong mitim olgeta. Mo hemia namba tu taem we mi prea long God mo mi askem hem blong i halpem mi blong mi faenem olgeta.

MI STAP TRAEM BLONG FAENEM TRUFALA RELIJEN

Mi stat blong go long ol defdefren jos blong faenem hemia we i tru. Taem mi stap wokbaot long eria blong Alicante, mi luk se i gat plante jos. Be from we plante long olgeta i gat ol aedol, i isi blong luksave se oli no ol trufala relijen.

Wan Sande aftenun, mi stap antap long hil, mi stap lukluk i godaon long haba, mo mi stap ridim Jemes 2:1-5, we i talem se i no stret blong mekem i gud moa long wan man we i rij. Taem mi stap wokbaot blong gobak long bot, mi pasem wan bilding we i luk olsem wan jos haos, mo i gat saen long fored we i se: “Haos Kingdom Blong Ol Witnes Blong Jehova.”

Mi stap tingting se: ‘Bae mi go traem ol man ya blong luk se bambae oli tritim mi olsem wanem.’ So mi go we mi drae leg nomo, mi gat bigfala mustas, mo mi werem wan jin traoses we i brokbrok. Taem mi go insaed, oli tekem mi mi go sidaon klosap long wan olfala woman mo hem i halpem mi blong faenem ol vas blong Baebol. Afta long miting, mi sapraes blong luk we evriwan oli kam talem halo long mi. Wan long olgeta i invaetem mi blong go long haos blong hem blong storian moa long Baebol. Be from we mi no finisim blong ridim ful Baebol, mi talem long hem se: “Bae mi letem yu save taem mi redi.” Nating se i olsem, mi stat blong go long evri miting.

Afta long sam wik, mi go long haos blong man ya mo hem i ansarem plante kwestin we mi gat. Wan wik biaen, hem i givim wan basket long mi we i fulap wetem ol naesfala klos mo i se hemia ol klos blong wan man we i go long kalabus, from i obei long tok ya blong Baebol we i se yu mas lavem narafala mo yu no mas joen long faet. (Aes. 2:4; Jon 13:34, 35) Naoia mi sua se mi faenem ol man ya we oli stap folem ol rul blong Baebol long laef blong olgeta. Mo naoia mak blong mi i no moa blong lukaotem wan naesfala aelan, be blong kasemsave moa long Baebol. Ale mi gobak long Netalan.

MI LUKAOTEM WOK

I tekem fo dei blong mi travel i go long taon blong Groningen, long Netalan. Long ples ya, mi traem faenem wan wok. Ale, mi aplae long wan stoa blong kapenta, be long fon we mi fulumap, oli askem relijen blong mi, ale mi raetem se, “Witnes blong Jehova.” Taem ona blong stoa i ridim samting ya, wantaem nomo fes blong hem i jenis mo hem i talem se: “Bae mi jes kolem bak yu.” Be hem i neva mekem.

Mi go long wan narafala stoa blong kapenta, mo mi askem sipos oli nidim wan wokman. Ona blong stoa ya askem setifiket blong mi mo sam leta blong soem ol ples we mi bin wok long hem. Mi eksplenem long hem se mi bin riperem wan seling bot. Mo mi sapraes taem hem i talem se: “Yu save stat long aftenun ya, be mi no wantem se yu mekem eni problem long stoa blong mi, from we mi mi wan Witnes blong Jehova mo mi folem ol rul blong Baebol.” Mi sek mo mi talem long hem se: “!Mi tu mi wan Witnes blong Jehova!” Be from we mi gat longfala hea mo mustas, hem i save se mi mi no wan Witnes. Taswe hem i talem long mi se: “!Bae mi stadi Baebol wetem yu!” Ale mi akseptem. Naoia mi kasemsave from wanem ona blong narafala stoa ya i neva kolem bak mi. Jehova i stap ansarem ol prea blong mi. (Sam 37:4) Mi wok wan yia long stoa blong brata ya. Long taem ya, hem i stadi Baebol wetem mi, biaen mi baptaes long Jenuware 1974.

!NAOIA MI FAENEM LAEF YA WE I GAT MINING!

Wan manis afta, mi stat blong paenia mo mi glad tumas. Mo long nekis manis blong hem, mi muv i go long Amsterdam blong sapotem niufala grup we oli toktok lanwis Spanis. Mi mi glad tumas se mi save mekem Baebol stadi blong ol man long lanwis blong Spen mo Potugal. Long Mei 1975, mi kasem blesing ya blong wok olsem wan spesel paenia.

Wan dei, wan spesel paenia sista we nem blong hem Ineke i kam long miting blong mifala blong introdiusum Baebol studen blong hem blong Bolivia we i toktok Spanis. Mi mo Ineke i disaed blong raetem leta long mitufala blong traem savegud mitufala moa, nao mitufala i faenemaot se mitufala i gat ol semfala mak. Biaen, mitufala i mared long 1976 mo mitufala i gohed blong mekem spesel paenia kasem long yia 1982 taem oli invaetem mitufala i go long namba 73 klas blong gilead. Mitufala i sapraes mo mitufala i glad tumas blong go prij long Is Afrika, mo mitufala i spenem faef yia long Mombasa, Kenia. Long 1987, oli sanem mitufala i go long Tansania, we bifo wok blong prij long ples ya i tabu. Mo mitufala i stap long ples ya blong 26 yia, biaen mitufala i gobak long Kenia.

Mi mo waef blong mi i glad blong halpem ol man blong Is Afrika, blong lanem trutok blong Baebol

Taem mitufala i halpem ol man blong lanem ol trutok blong Baebol, mitufala i harem se laef blong mitufala i gat mining. Eksampol, faswan man we mi stadi wetem hem long Mombasa, mi prij long hem long pablik ples. Afta we mi givim tu magasin long hem, hem i askem se: “Sipos mi ridim flatem tufala magasin ya, ?afta, bae mi mekem wanem?” Long nekis wik blong hem, mitufala i stat blong stadi long buk ya Yu Save Laef Olwe Long Paradaes Long Wol, we oli jes rilisim long lanwis blong Swahili. Wan yia biaen, hem i baptaes mo i stat blong mekem wok blong fultaem paenia. Stat long taem ya, hem mo waef blong hem oli bin halpem klosap 100 man blong oli givim laef blong olgeta long Jehova mo tekem baptaes.

Mi mo Ineke i luksave olsem wanem Jehova i stap halpem ol man blong gat wan laef we i gat mining

Faswan taem we mi kasemsave se laef blong mi i gat mining, mi harem olsem bisnes man ya we i faenem sas perel mo i no wantem lego. (Mat. 13:45, 46) Mi wantem spenem ful laef blong mi blong halpem ol narafala blong olgeta tu oli faenem laef ya we i gat mining. Mi mo waef blong mi i luk olsem wanem Jehova i stap halpem ol man blong oli gat wan laef we i gat mining.