Aku lahir bas Belanda tahun 1948. Sada tahun kenca si e, pindah keluargaku ku São Paulo, Brasil. Rajin kel orang tuaku ku gereja janah rusur kami mbaca Pustaka ras-ras kenca dung man berngi. Bas tahun 1959, pindah kami arah Brasil ku Amerika Serikat janah tading kami i Massachusetts.

Enem kami sembuyak, lima dilaki ras sada diberu. Kerja keras kel bapak erdahin ncukupi keperlun keluarga kami. Pernah ia erbinaga, erdahin bas pembangunen dalan, ras dungna erdahin ia bas perusahan penerbangen internasional. Meriah kel kap kami sanga erdahin bapak bas perusahan e perban banci kami rusur gawah-gawah.

Sanga aku SMA, rusur kuukuri masa depanku. Lit temanku si kuliah, lit ka si ikut jadi militer. Tapi, aku labo pernah merhat jadi militer perban labo kuakap meriah rubati apai ka ertinju. Emaka gelah la aku ikut jadi militer, kuliah aku. Tapi situhuna merhat aku nampati kalak si deban, perban adi kusampati kalak si deban erguna kuakap geluhku.

Sanga aku kuliah, tertarik aku mpelajari mata pelajaren antropologi (ilmu si mpelajari kerna jelma), perban merhat aku metehsa ja nari kin rehna kegeluhen enda. I je iajarken me man kami kerna evolusi, janah ate dosen kami tek kami man ajaren e. Tapi lit piga-piga penjelasen kerna evolusi si la kuakap masuk akal janah la lit bukti si jelas kerna ajaren e.

Bas pelajaren si kuikuti sanga kuliah, la lit iajarken man kami kerna kai si mehuli ras si lang. Si pentingna arus usahaken kami mejile nilai kami bas universitas. Sanga pesta-pesta aku ras temanku, kucubaken piga-piga jenis narkoba janah tenang kuakap, tapi kentisik ngenca. Dungna tersungkun-sungkun aku, ‘Kai kin situhuna tujun geluh enda?’

Bas pudi wari pindah aku ku kota Boston janah ndaftar aku ku universitas si lit i je. Erdahin aku sanga wari libur gelah lit sen kuliahku. Bas inganku erdahin me tangtangna aku jumpa ras sekalak Saksi Jahwe. Ia me temanku erdahin janah turikenna man bangku nubuat kerna “pitu masa” si icatat bas Daniel pasal 4. Jelaskenna ka maka gundari kita nggeluh bas wari-wari pendungi. (Dan. 4:13-17) Adi kuterusken ercakap-cakap kerna Pustaka ras ia janah tek aku man kai si katakenna e, arus kuperobahi lagu langkahku. Emaka kuusahaken kel gelah la jumpa ras ia.

Bas universitas e, kuikuti kelas-kelas si njelasken kerna kai saja si perlu kusikapken guna jadi relawan i Amerika Selatan. Menurutku paksa si e adi kusampati kalak si merluken, lit me tujun geluhku. Tapi dungna kuteh maka amin pe enggo kuban bage, lenga kudat tujun geluhku. Kecewa kel aku, emaka dungna ngadi aku kuliah bas akhir semester e.

Bas bulan Mei tahun 1970, pindah aku ku Amsterdam, Belanda, guna erdahin bas perusahan penerbangen ingan bapakku erdahin mbarenda. Perban aku erdahin bas ingan e, banci aku lawes ndahi negara-negara si lit i benua Afrika, Amerika, Asia, ras Eropa. Bas kerina negara si kudahi e, banci kuidah maka kerina kalak ngadapi erbage-bage masalah si mberat janah lenga lit jalan keluarna. Perban kudatken ateku keriahen ukur bas geluhku, mulihken aku ku Amerika Serikat janah ndaftar aku ku universitas i Boston, inganku kuliah mbarenda.

Dungna kuteh maka kelas-kelas si kuikuti bas universitas la banci nampati aku ndatken jawapen arah penungkunenku kerna kegeluhen. Lanai kuteh kai si arus kulakoken. Emaka kupindo nasehat arah dosenku si ngajari kerna antropologi man bangku. Sengget aku sanga nina, “Adi bage, engkai maka lanjutkenndu kuliah? Pangen kam ngadi saja gundari.” Cocok kuakap nasehatna e. Emaka ngadi aku kuliah janah lanai pernah aku reh ku je.

Perban lenga kuakap lit tujun geluhku, kuikutken sada kelompok si la nggit ngikutken aturen si iban jelma si enterem. Kuidah maka kelompok e pe merhat ia nggeluh dame ras la lit masalah. Aku ras piga-piga temanku numpang bas piga-piga motor lawes arah Amerika Serikat nari ku Acapulco, Meksiko. Bas ingan e, tading  kami ras kelompok hippie, si geluhna tempa-tempa la lit masalah. Tapi sanga tading kami ras kalak e, kuteh maka labo lit tujun geluh kalak e janah labo tuhu-tuhu meriah ukurna. Si kuidah, enterem arah kalak e si la jujur ras la setia.

Sanga aku kitik denga merhat aku erlayar i laut, tapi jadi kapten ateku labo jadi anak buah. Emaka gundari kenca aku enggo galang, kulakoken ateku sura-suraku e. Tapi arus lit lebe perahuku. Lit temanku si gelarna Tom, seri sura-sura kami. Emaka sepakat kami erlayar engkelilingi doni. Kudarami ateku sada pulau si mejile si i je la lit aturen si arus kuikutken.

Lawes me aku ras Tom ku Arenys de Mar, si lit i deher Barcelona, Spanyol. I je itukur kami sada perahu si gedangna kira-kira siwah meter si gelarna Llygra. Ipekena kami perahu e gelah banci ibaba erlayar ku tengah laut. Perban labo ate kami meter seh ku ingan e, lepasken kami mesin perahu e janah i je me tama kami mbue persedian inemen. Gelah banci kami ngadi bas pelabuhen-pelabuhen si kitik, tukur kami dua dayung si gedangna lima meter. Dungna erlayar me kami ku Seychelles, i Samudra Hindia. Erlayar ka ate kami ku daerah pesisir barat Afrika janah kelilingi kami ate kami Tanjung Harapan, Afrika Selatan. Gelah banci teh kami dalan alu tepat, nen kami bintang-bintang ras peta bintang bage pe buku petunjuk ras alat penunjuk arah. Luar biasa kel kuakap perban alu cara e banci teh kami i ja lokasi kami.

La ndekah kenca kami erlayar teh kami maka perahu e la kepe banci ibaba ku tengah laut. Tiap jam, lit kira-kira 20 liter lau si masuk ku perahu e. Bagi si kuceritaken ndai, mbiar kel aku sanga reh badai janah i je me tangtangna aku ertoto kenca piga-piga tahun. Paksa si e, erjanji aku man Dibata, adi selamat kami, kutandai ateku Ia. Dungna ngadi badai e, janah kutepati janjiku.

Mulai me kubaca Pustaka sanga kami bas tengah laut denga. Meriah kel kuakap sanga kami i tengah-tengah Laut Mediterania. I je kami ikelilingi ikan terbang, lumba-lumba, ras langit si la idah tampukna. Sanga berngi, luar biasa kel kuakap ngidah bintang-bintang si seh kel jilena. Reh tekna aku maka lit kap Dibata situhu-tuhu ermediate man jelma.

Kenca piga-piga minggu kami erlayar, ngadi kami i Alicante, Spanyol. Dayaken kami ate kami perahu e guna nukur perahu si terjilen. Perban perahu kami e enggo metua, bocor, ras la lit mesinna, mesera ndarami kalak si nggit nukursa. Emaka, janah nimai lit kalak si nggit nukursa, kubaca-baca Pustaka.

Reh rusurna kubaca Pustaka, reh jelasna kuteh maka bas Pustaka lit prinsip-prinsip si banci erban geluhta ermeriah ukur. Menarik kel kuakap nasehat si jelas arah Pustaka kerna lagu langkah si mehuli. Janah tersungkun-sungkun aku engkai maka kalak si ngaku Kristen, termasuk aku, la ndalanken kai nina Pustaka.

Kuperobahi ateku lagu langkahku, emaka ngadi aku make narkoba. Tek aku pasti lit kalak si ndalanken prinsip-prinsip Pustaka, janah merhat aku jumpa ras kalak e. Emaka ertoto ka aku man Dibata gelah ipejumpaNa aku ras kalak e.

Menurutku paksa si e, arus kupereksa kerina agama sada per sada gelah banci kudat agama si benar. Sanga erdalan aku i kota Alicante, melala kuidah ingan ibadah. Tapi bas ingan-ingan ibadah e, buen si lit patungna. Emaka kuteh kalak e labo agama si benar.

Wari minggu ciger, kundul aku bas bukit si pengalana ku pelabuhen. Paksa si e kubaca Jakup 2:1-5, si mpersingeti kita gelah ula si istimewaken kalak bayak. Sanga erdalan aku mulih ku perahu kami, kuidah sada bangunen si mirip bagi ingan ibadah janah lit i je tulisen: “Bale Kerajan Saksi-Saksi Jahwe.”

Merhat aku metehsa uga kin kalakna si lit bas ingan e, emaka masuk aku ku Bale Kerajan e. La aku erselop, janggutku mekapal, ras celana jeans si kupake pe merigat-rigat. Itaruhken petugas tata tertib aku kundul i deher sekalak diberu si enggo metua. Sampati diberu e aku ndarami ayat si ibacaken kalak si mpeseh khotbah. Kenca dung perpulungen, sengget kel aku perban kalak si lit bas ingan e mehuli ras mekacar. Lit sekalak dilaki si ngundang aku ku rumahna guna mbahas kerna Pustaka. Tapi perban lenga dung kubaca kerina isi Pustaka, ningku man bana, “Ngata kari aku yah.” Mulai jenari, enggo ratur aku reh ku perpulungen.

Piga-piga minggu kenca si e, reh aku ku rumah dilaki si ngundang aku ndai. Seminggu kenca si e, berena aku sada tas si dem baju-baju si mejile. Katakenna man bangku maka si mpuna baju-baju e sangana bas penjara perban matuhi perentah Dibata guna engkelengi kalak si deban ras la nggit erperang. (Jes. 2:4; Joh. 13:34, 35) Gundari, tek aku maka enggo jumpa aku ras kai si kudarami sedekah enda, eme kalak si ndalanken prinsip si jelas kerna lagu langkah si lit bas Pustaka! Tujunku gundari lanai ndarami pulau si mejile, tapi guna mpelajari terbuen isi Pustaka. Emaka mulihken aku ku Belanda.

Lit empat wari dekahna maka seh aku i kota Groningen, Belanda. I je kudarami dahin guna ncukupi keperlunku. Sanga ngelamar dahin aku ku sada ingan tukang kayu, suruhna kuisi sada formulir. Arus kutulis kai agamaku bas formulir e. Emaka kutulis i je “Saksi-Saksi Jahwe.” Kenca ibaca si mpuna ingan e formulirku ndai, sambar mis ayona. Nina, “Kari kuhubungi ka kam ya.” Tapi lanai pernah hubungina aku.

Bas ingan tukang kayu si deban, kusungkun ka si mpuna ingan e perlu ia penampat ntah lang. Emaka pindona ijazahku ras sungkunna kerna  pengalamenku erdahin. Kukataken bana maka pernah kupekena sada perahu kayu. La kusangka nina bangku, “Mulai ciger enda enggo banci kam erdahin, tapi lit syaratna. Arus mehuli lagu langkahndu bas ingan enda perban aku sekalak Saksi Jahwe, janah kuikutken prinsip-prinsip si lit bas Pustaka.” Sengget kel aku paksa si e, emaka ningku man bana, “Aku pe Saksi Jahwe.” Perban idahna bukku ras janggutku gedang, tehna maka aku lenga jadi Saksi Jahwe. Emaka nina, “Adi bage ras aku kam erlajar Pustaka ya.” Mis aku nggit. Gundari enggo kuteh engkai maka lanai pernah hubungi tukang kayu si sebelumna aku. Bagenda kepe cara Jahwe njawap toto-totoku. (Ms. 37:4) Erdahin me aku ras ia sada tahun dekahna janah paksa si e erlajar Pustaka aku ras ia. Bas bulan Januari 1974, iperidiken aku.

Sebulan kenca si e, merintis aku janah meriah ukurku. Sebulan kenca si e ka, pindah aku ku Belanda guna ndukung kelompok bahasa Spanyol si mbaru ibentuk. Meriah kel ukurku perban banci kupandu piga-piga pelajaren Pustaka bas bahasa Spanyol ras Portugis. Bas bulan Mei 1975, itugasken aku jadi perintis istimewa.

Bas sada wari, reh sekalak diberu si gelarna Ineke ku runggun kami, ia sekalak perintis istimewa. Ipetandakenna atena man bangku kalak si erlajar Pustaka ras ia si asalna arah Bolivia nari. Dung e, aku ras Ineke si kirim-kirimen surat gelah banci kami nandai terdeheren. Kepeken seri cita-cita rohani kami. Erjabu me kami bas tahun 1976 janah tetap ngelayani jadi perintis istimewa seh tahun 1982. Bas tahun 1982, iundang kami ngikuti sekolah Gilead kelas si pe-73-ken. Sengget kami sanga teh kami maka kami itugasken ku Afrika Timur, tapi meriah kang ukur kami. Lit lima tahun kami ngelayani bas ingan e eme i Mombasa, Kenya! Bas tahun 1987, itugasken kami ku Tanzania. Paksa si e, pelarangen man dahin erberita enggo icabut bas negara e. Lit 26 tahun dekahna kami ngelayani i je janah dungna mulihken kami ku Kenya.

Perban banci sampati kami piga-piga kalak mpelajari kebenaren Pustaka, enggo dat kami tujun geluh situhu-tuhu. Contohna, sanga aku erberita bas ingan si enterem jelma, jumpa aku ras sekalak dilaki. Kenca kutawarken dua majalah man bana, nina, “Adi enggo dung kubaca duana majalah e, kai si arus kulakoken?” Seminggu kenca si e, mulai kami erlajar Pustaka make buku Saudara Dapat Hidup Kekal dalam Firdaus di Bumi. Buku e mbaru irilis paksa si e bas bahasa Swahili. Dilaki e me si tangtangna erlajar Pustaka ras aku i Mombasa. Setahun kenca si e, iperidiken ia janah dungna jadi perintis biasa. Ia ras diberuna enggo nampati hampir 100 kalak seh ngasa iperidiken.

Sanga tangtangna kuteh kai tujun geluh enda, perasanku bali bagi pedagang keliling si ndatken mutiara si meherga janah la ia nggit mulahisa. (Mat. 13:45, 46) Kupake ateku geluhku guna nampati kalak meteh tujun geluh enda. Enggo gejapken kami duana maka ibere Jahwe tujun geluh si mehulina man umatNa.