Mʉ̃ra tosida Países Bajos pʉwʉrʉde 1948de. Wuarebema poagadera daira mʉ̃ mebẽrãbawara wãsida São Paulo pʉwʉrʉeda (Brasil). Mʉ̃ yibarirãra badua wãpanasi iglesiaeda akʉza diamasi nekoda tẽã ãbaʉba akʉpasi Daizeze Bedʼeara. 1959de akʉza wãsida mamaʉ̃ba, mamina naʉ̃arera Massachusetts pʉwʉrʉeda, Estados Unidos.

Mʉ̃ zezera zarea trajasi dai akʉita, daira 8 panasi dedara. Iyira nekʼãrẽ biode trajabasi, ode ne nedobaribasi, karreterata parãbasi akʉza trajabasi empresa abione wãbaride. Naʉ̃ trajodera daira sobiapanasi, wãseapanasi baera drʉa awaura awuaraka.

Mʉ̃ bachiyerato basidera mʉ̃a krĩchabasi, ¿kʼãrẽta oita mʉ̃ waribʉrʉdera? Ʉ̃kʉrʉ mʉ̃ neũdukʼawuarãra wãsida unibersidaeda, ʉ̃kʉrʉta wãsida gorogoroeda. Mamina mʉ̃itara yibia ẽ basi gorogorodeda wãira, mʉ̃ra jipa yõkĩrã ẽ basi baera akʉza yi bʉekĩrã ẽ basi baera. Mawũẽ mʉ̃ra wãsi unibersidaeda gorogoro ba ẽ baita. Mamina mʉ̃a sodera erbasi ẽbẽrarã kʼarebaita, krĩchabasi baera mawũãtrʉ sobia bʼaita.

Mʉ̃ara estudiabasi antropologiata, kʼawuakĩrãbasi baera dayi ẽbẽra sãwũã zedata. Jaradiapanasi nejõma iyidoba zeda ʉ̃rʉ adewara maʉ̃neba propesorerabara kãgapanasi maʉ̃ ʉ̃rʉ jipa ĩjãnamarẽã. Mamina jarada ẽ basi kʼãrẽa ĩjãnaibarata maʉ̃ ʉ̃rʉra.

Akʉza jaradia ẽ basi sãwũã ẽbẽra bia bʼaira. Awuarabʉrʉ jaradiapanasi nekʼãrẽ badu obʉrʉde bia wãita. Piesta eda wãiba akʉza chirua kayirua doiba edaʉde sobiabibasi, mamina ewari jõma ẽ basi. Mʉ̃yikʉza widisi, ¿mʉ̃ kʼãwũãbʉde wãrĩnu sobia bʼaika?

Maʉ̃ tẽã mʉ̃ra wãsi Bostonʼeda akʉza unibersidade wãsi maʉ̃nebida. Ʉ̃kʉrʉ trajota obasi unibersida pagaita, maʉ̃ne bedʼeakata bedʼeabarisi Jeowa ʉ̃rʉ Kʼawuabipanʉrãbawara. Mʉ̃me ãba trajabʉba, mʉ̃a jara ũrĩbisi propesia 7 tiempo ʉ̃rʉ, Daniel yi zroma 4de jarabʉta akʉza jarasi dayirãra naʉ̃ ewari jõbodoare barabʉta (Dan. 4:13-17). Aramaʉ̃ta kʼawuasi mʉ̃ta iyiʉ̃me badua bedʼeabʉbʉrʉ mʉ̃a nekʼãrẽ idubʉibarata awuara bʼai kʼarea. Maʉ̃ kʼarea krĩna wua yi ũdu ẽ basi iyiʉ̃me.

Unibersidadera kʼawuasi sãwũã bari trajaita América del Surde kʼarebai kʼarea. Mʉ̃a krĩchabasi wuabemara soiduba kʼarebaiba mʉ̃ra sobiabita. Mamina mawũã berabari ẽ basi. Sobia ẽ ba kʼãrãpe idubʉsi unibersidara 6 jedeko jõbodoare.

Mayo 1970de mʉ̃ra wãsi Ámsterdamʼena (Países Bajos), empresa abione wãbaride trajaita mʉ̃ zeze trajabadamae. Maʉ̃ trajodeba mʉ̃ra drʉaza wãbasi, Áfricaeda, América Norteʼeda, América Surʼeda, Europaeda akʉza Asiaeda. Mʉ̃ pʉwʉrʉza jʉ̃ẽbʉrʉdera akʉbasi jõmaʉ̃ba bedʼea zroma erpanasita akʉza ara oauda ẽãta. Mʉ̃a akʉza jʉrʉbʉde mʉ̃ sãwũã sobia bʼaita, krĩchasi jẽda wãita Estados Unidosʼeda akʉza jẽda estudiaita Bostonʼnebema unibersidade.

Jẽda unibersidaeda jʉ̃ẽsidera aramaʉ̃ta kʼawuasi mʉ̃a dayi bebʉ ʉ̃rʉ widibʉra, jaradiada ẽ basita. Mʉ̃a kʼãrẽ oi kʼawua ẽ nʉmʉne mʉ̃ propesor antropologiadebema widisi mʉ̃a ũrãgʼata diamarẽã. Mʉ̃ra iya krĩcha amaesi, iya mʉ̃a widiside: «¿Bʉra kʼãrẽta onʉmʉ wabida namara? ¿Kʼãrẽa idubʉ ẽ bʉa naʉ̃ra?». Maʉ̃ bedʼeaba mʉ̃ara jipa idubʉsi unibersidara.

Mʉ̃a wabida jʉrʉbasi baera mʉ̃ sãwũã sobia bʼaita, mawũẽra ãba bʼaita jʉrʉsi ẽbẽrarã aduʼa bʼaita jʉrʉbʉbawara akʉza kãgata. Neũdukʼawuarabawara daira berabarisida Estados Unidosdeba Acapulcobayeda, (México). Daira hippies komunidadebasi, dayima ãyira aduʼabʉ kĩrãkʼabasi. Ãyibawarabʉde mʉ̃a ũdusi dayi sobiabi ẽãta wãrĩnu bʼaira, awuarabʉrʉ ũdusi ẽbẽra majãchaʉta kʼẽrẽpapanʉ ẽãta akʉza wãrĩnu bedʼeapanʉ ẽãta.

Maʉ̃ne mʉ̃a jẽda kĩrãbesi mʉ̃a kʼãrẽta okĩrãbasita mʉ̃ wika yiraside: mʉ̃ra wãkĩrãbasi jãbade, mamina mʉ̃ta jãba yibari bʼaita. Mawũẽ maʉ̃ mawũã oita mʉ̃yi jãba arata erbaibarabasi. Tom mʉ̃ neũdukʼawuabida abarika  okĩrãbasi mawũẽra krĩchasida maʉ̃ drʉaza jõma jãbade wãnaita. Ũdukĩrãbasi drʉa biʼia kiruta mia kʼai neẽ nʉmʉmae, mia kʼaiba kʼãrẽ jarada ẽ mae.

Mʉ̃ra Tomʼʉ̃me wãsida Arenys de Marʼeda, Barcelona kʼawa (España). Mama edasida jãba 9 metrobʉta yi trʉ̃ra Llygrabasi. Daibara maʉ̃ jãba zakera ara osida puzadeda oʉ wãmarẽã. Daira ñabasea wãkĩrãpana ẽ basi baera ãĩ bʉesida ãyi jãba motorta, maʉ̃eda bania daiba doseabʉta bʉedaita. Dai jãba edeita akʉza puertoza jʉ̃ẽita dowiguita ũme edasida ãyira 5 metro drazoabasi. Maʉ̃ta wãsida Seychellesʼeda, Océano Índico. Daibara krĩchasida África kosta juwaʼãkare wãnaita adewara Cabo de Buena Esperanza, Sudáfricade. Dai aripe jʉ̃ẽira akʉpanasi chĩdaurata, zokʼasida maparata, librorata akʉza nekʼãrẽ dai kʼarebaseabʉta. Mʉ̃itara yibiabasi akʉita dai sama aripe wãpanʉta.

Mawũẽra kʼawuasida naʉ̃ jãba zõrãrã puzaeda wãbe ẽãta. Maʉ̃ta jãbara baniaba birabʉsawasi 22 litro, ora abaʉde. Mʉ̃a nããra jarada kĩrãkʼa mejãcha perasi nãgʉ zromata zesi baera akʉza maʉ̃ne yiwidʼisi yiwidʼikata. Mʉ̃a Daizezeʼa jarasi, mʉ̃ta namaʉ̃ba bei ẽã ẽdrʉra mʉ̃a iyita ũdukʼawuaita. Nãgʉ zromara berabari totosi, mawũẽ mʉ̃a jaradara osi.

Mʉ̃ wabida puzadeda oʉbʉde Mar Mediterráneone, Daizeze Bedʼea akʉ jʉ̃drʉsi. Mʉ̃a akʉseabasi bedara majãchabʉta, delpinʼrata akʉza akʉbasi bisia jĩgara daukure wãta akʉza chĩdaurata diamasi, maʉ̃ba mʉ̃a krĩchabisi, bʉta Daizeze dayirã ʉ̃rʉ krĩchabʉta.

Semana bio berabaribʉrʉde wãsida puerto Alicante, Españaena, mainʉ dai jãbara nedonʉmʉsida audre yibiata edadaita. Daitara zarebasi nedoira, maʉ̃ jãbara ãrĩchuasi baera akʉza jãba zõrabasi baera, mamina mʉ̃ara ewari erbasi Daizeze Bedʼea leita.

Ewari berabari wãne badua lebʉde, mʉ̃a akʉ wãsi Daizeze Bedʼeabara mejãcha kʼarebaseabʉta. Mʉ̃ra krĩcha amaesi, Daizeze Bedʼeabara kĩrãkʼita jarabʉ baera dayi sãwũã bʼaibara akʉza kʼẽrẽpa bʼaibarata. Mʉ̃a mʉ̃yikʉza widisi, kʼãrẽa ẽbẽrarã mejachaʉba akʉza mʉ̃abida kristianoa abʉde, wãrĩnu bʼaira ũrĩ ẽãta Daizeze Bedʼeaba jarabʉra.

Mʉ̃ara krĩchasi maʉ̃neba ʉ̃ta kʼẽrẽpa bʼaita, maʉ̃ kʼarea idubʉsi chirua kayirua dobʉra. Mʉ̃ara krĩchasi panʉta ẽbẽrarã Daizezeba jarabʉde panʉta, mawũẽ maʉ̃rata ũdukĩrãbasi. Maʉ̃ne yi ũmeta akʉza yiwidʼisi, widisi maʉ̃rata ũdubidamarẽã.

Mʉ̃ara religion aba abaka akʉ wãsi ũduyeda iyi arata. Mʉ̃ Alicante pʉwʉrʉde berabari wãne mejãcha ũdusi iglesiarata. Mamina maʉ̃ranebemara yi audrebara erbasi nekʼãrẽ omata, maʉ̃ba kʼawuaseabasi maʉ̃ra religionʼra iyi ara ẽãta.

Ewari aba katuma ware zeidu puertota akʉnʉmasi mʉ̃a, maʉ̃ne akʉbasi Daizeze Bedʼeata, lebasi Santiago 2:1-5 bayeda, mama jarabʉ plata mejãcha erpanʉare ba ẽ baibarata. Jẽda mʉ̃ jãbaeda wãside, ode ũdusi ẽbẽrarã ãba yi jʉrepanʉta, eda wãbari ʉ̃tre bʉbasi: «Daizeze Nokʼo ʉ̃rʉ bedʼeabaride Jeowa ʉ̃rʉ Kʼawuabipanʉrãne».

 Mawũẽ mʉ̃a krchasi: «Mʉ̃a akʉyi naʉ̃ra ẽbẽrarã sãwũãbʉta edara akʉza mʉ̃ sãwũã edadaita». Mawũẽ mʉ̃ra mamaeda wãsi jĩrʉ awa, ikaraseabasi akʉza pantalon jẽguesoabʉta jʉ̃basi. Mebẽã abaʉba mʉ̃ra edesi wẽrã yõdra kiru kʼawa jewedamarẽã, iya kʼarebabasi testora ũduita, diskurso jaradiabʉba jarabʉta. Ãba yi jʉrepanʉ jõna tẽã, mʉ̃a akʉbasi ãya mʉ̃ra kʼãrẽaba bia edapanʉta, jõmaʉ̃ba mʉ̃aʼa bedʼeaita zesida baera. Maʉ̃ranebemaba abaʉba jarasi iyi deidu jʉ̃ẽmarẽã bedʼeaita, mamina mʉ̃ara Daizeze Bedʼeaba jõma akʉ ẽ chuasi baera mʉ̃a jarasi: «Mʉ̃a kʼawua jarayi». Maʉ̃ tẽã badua wãbasi ãba yi jʉrebarieda.

Semana bio berabarida tẽã iyi deidu wãsi mʉ̃ra, mʉ̃a Daizeze Bedʼea ʉ̃rʉ widibadara panʉsi. Akʉza semana aba berabarida tẽã maʉ̃ mebẽãbara mʉ̃aʼa maletade diasi wua biʼia kideta. Iya mʉ̃aʼa jarasi maʉ̃ wua yibarira karseldedabʉta, Daizeze Bedʼea jarabʉta obʉ kʼarea, yiya kãgaibarata akʉza yõena wã ẽ baita (Is. 2:4; Juan 13:34, 35). Mawũẽ biʼia kʼawuasi mʉ̃a jʉrʉbadara ũdusita: ẽbẽrarã aripe obʉta Daizeze Bedʼeaba jarabʉta dayi sãwũã bʼai ʉ̃rʉ. Maʉ̃neba ʉ̃ta mʉ̃ara wua jʉrʉ ba ẽ basi drʉa puza ẽzadra biʼia kirunʉmʉta awuarabʉrʉ Daizeze Bedʼeata biʼia ũdukʼawuaita. Maʉ̃ tẽã jẽda wãsi Países Bajos pʉwʉrʉeda.

Ewari kimarene jʉ̃ẽsi Groningaeda (Países Bajos). Mʉ̃ mainʉ jʉ̃ẽsidera nesidabasi trajo ũduita, nekʼãrẽ edaita mʉ̃ita. Karpinteriade mʉ̃a trajo jʉrʉnʉmaside diasida karta bedʼea bio widibʉta, maʉ̃ne widisida mʉ̃ religion ʉ̃rʉ. Mʉ̃a bʉsi: «Jeowa ʉ̃rʉ Kʼawuabipanʉrã». Karpinteria yibariba maʉ̃ akʉside iyi kĩrãra awuara totosi, mõbe jarasi: «Tẽã trʉñi daiba bʉra». Mamina trʉ̃kabasi wua.

Awuru karpinteriade mʉ̃a widisi kʼareba nesidabʉ kʼawuaita. Iya mʉ̃a widisi mʉ̃ diplomata akʉza karta mʉ̃ ʉ̃rʉ wuabemaraba bia jarabʉta. Mʉ̃a iyaʼa jarasi, mʉ̃a ara obasita jãba bakuru omata. Iya mʉ̃aʼa jarasi: «Idi kewara trajaseabʉ bʉra. Mamina mia kʼãrẽ bedʼea zromata orãra mʉ̃ trajode. Mʉ̃ra Jeowa ʉ̃rʉ Kʼawuabibari baera akʉza Daizeze Bedʼeaba jarabʉde bʉ baera». Mʉ̃ra maʉ̃ba chupea totosi, mõbe jarasi: «Wãrĩnu, mʉ̃sida Jeowa ʉ̃rʉ Kʼawuabibari». Mʉ̃ra ikaraseachuasi baera akʉza buda drazoachuasi baera iya jarasi: «Mõbera mʉ̃a bʉaʼa Daizeze  Bedʼea jaradiaseabʉ». Mʉ̃ra sobia kʼãrãpe jarasi jaradiamarẽã. Mʉ̃a idibʉrʉ kʼawuasi kʼãrẽa awuru karpinteriadebema yibaribara mʉ̃ra trʉkabasita. Jeowaba mʉ̃a diasi baera mʉ̃ soba kãgabʉta (Sal. 37:4). Maʉ̃ mebẽãʉ̃me poaga ababayeda trajasi akʉza Daizeze Bedʼea kʼawuasida, maʉ̃ tẽã buru kʼoesi enero 1974de.

Jedeko abaʉde mʉ̃a jʉ̃drʉsi yi naã edebari oita, maʉ̃neba mejãcha sobia zebʉrʉ mʉ̃ra. Jedeko berabarida tẽã mʉ̃ra wãsi Ámsterdamʼena, mama kʼarebaita kongregasion zake español bedʼeade bedʼeabʉmae. Kʼãrẽaba yibiabasi español bedʼeade Daizeze Bedʼea jaradiaita akʉza portugue bedʼeade. Mayo 1975de mʉ̃aʼa jarasida yi nãã edebari 130 ora oita.

Ewari aba dai kongregasionʼena zesi mebẽã wẽrãta aba, iyi nekʼawuabari Boliviadebemata mebẽrãʼa ũdubita, maʉ̃ mebẽã trʉ̃ra Catharinabasi, iya obasi yi nãã edebari 130 ora obarita. Mʉ̃ra Catharinaʉ̃me krĩchasida yi ũdukʼawuadaita karta yiya dia bʉepanʉne. Maʉ̃neba kʼawuasida nekʼãrẽ abarika okĩrãpanʉta. Daira juwa jidasida 1976de akʉza yi nãã edebari 130 ora obaride panasi 1982 bayeda, maʉ̃ poagade trʉ̃sida daira eskuela Galaadʼeda wãita klase 73de. Daira mejãcha sobiasida zokʼasidade África Oriental drʉaeda wãita. 5 poagabayeda jaradiapanasi Mombasade (Kenia). Mamaʉ̃ba poaga 1987de zokʼasida Tanzaniaena, mainʉra ʉ̃rabʉrʉ jẽda iduaribisida Daizeze Bedʼea jaradiaita. Mama panasi 26 poagabayeda, tẽã jẽda Keniaena wãita.

Ẽbẽrarã wãrĩnu Daizeze Bedʼea kʼawuakĩrãbʉʼa jaradiapanʉba daira wãrĩnu sobiabi zebʉrʉ. Bari jaraita, mʉ̃ nekʼawuabari nããra ũdudara Mombasade, iyara jaradiabaribasi ode. Mʉ̃a kartara ũme diabʉrʉde, iya mʉ̃aʼa widisi: «Mʉ̃a naʉ̃ jõma akʉ berabaribʉrʉdera, ¿kʼãrẽta oi mʉ̃ra tẽã?». Maʉ̃ semana tẽã daira Daizeze Bedʼea kʼawua jʉ̃drʉsida libro Usted puede vivir para siempre en el paraíso en la Tierra. Maʉ̃ra dããraba ẽ basi ʉ̃tʉ zedara suajili bedʼeade. Maʉ̃ ẽbẽrarã buru kʼoesi poaga aba berabarida tẽã akʉza yi nãã edabarita jʉ̃drʉsi. Iya yi kimaʉ̃meba kʼareba zebʉrʉ ẽbẽrarã 100 kʼawa, Jeowa ota jidamarẽã.

Mʉ̃a ũduside za mʉ̃ sobiabibʉta, mʉ̃ra sentibasi jari ẽbẽra perla kĩrãwãreã ũduda kĩrãkʼa, mʉ̃ara aduabiamabasi (Mat. 13:45, 46). Mʉ̃ara mʉ̃ ewari jõmaʉ̃nẽ ẽbẽrarã jõma jaradiabaibasi, ũdudamarẽã sãwũã wãrĩnu sobia bʼaita. Mʉ̃ara mʉ̃ kimaʉ̃meba ũdu zebʉrʉ Jeowaba kʼarebabʉta iyi pʉwʉrʉra, ãyi bebʉde sobiapanamarẽã.