Hna hnaho ni e Pays-Bas lo 1948. Ame la macatre thupen, hnei huni hna fek a tro Sao Paulo e Brésil. Ame kaka me nenë ke, lue ka catre hmi nyidro, nge majemine huni e Tusi Hmitrötr thupene la eahuni a ase xen. Ame lo 1959, hne huni hna fek a tro Etazini.

Hnei kaka hna catre huliwa ke, ala 6 lae eahun. Eje hi, köni huliwa i kaka. Nyidrëti a huliwa hune he, me kuci gojeny, me huliwa ngöne avio. Celë hi lai ka aijijë huni troa ihamë ngöne la itre xaa nöj.

Ame lo eni a nekötrahmany, eni palahi a mekun la meleng elany. Ame la itre xaa sine ining, hnei angatr hna lö ngöne la itre uma ne ini ka tru maine sooc. Xele ni troa sooc ke, tha ka pi iwesitrë kö ni me isi. Celë hi matre, hnenge hna lö ngöne la ketre uma ne ini ka tru. Ame la sisitria koi ni ke, troa xatua itre xan, matre hetre aliene la meleng.

Ame ngöne la uma ne ini, madrine catre ni la kola qaja la qaane la mel. Itre porofesör a ini huni ka hape, ka xulu xane la mel. Ngo  tha ka meköti kö koi ni la itre xaa ithuemacanyi hna hamën. Öni angatr ka hape, ngacama pëkö ka anyipicin, ngo loi e troa mejiune kowe la ini cili.

Ame ngöne la hna ini, tha hne huni kö hna inine troa atrehmekune la loi qa ngöne la ngazo. Kolo pe a upi hun troa catre huliwa me ini hnyawa. Ketre, madrine catre ni troa feet me xomi dorog, ngo tha ka huti kö la madrineng. Öning ka hape, ‘Ka hetre aliene kö la mele celë?’

Thupene lai, hnenge hna fek a tro Boston ngöne la ketre uma ne ini ka tru. Hnenge hna huliwa ngöne la itre ijine mano, matre troa nyithupene la hna ini. Celë hi ijine eni a nyiqaane ithanata memine la ketre Atre Anyipici Iehova ka ce huliwa me eni. Hnei angeic hna qaja la hna thingehnaean göne la “seven lao macatre” ngöne la tusi Daniela mekene 4. Öni angeic ka hape, easa melën la itre drai ne la pun. (Dan. 4:13-17) Atre hi ni laka, maine tro palahi ni a dreng me ithanata me angeic, tro hë ni lai a saze la aqane meleng. E cili, hnenge hna thele jëne troa kötre angeic.

Ame ngöne la hna ini, hnenge hna saen matre ixatua ngöne la itre nöj gaa aja ixatua, tune e Amérique du Sud. Ame koi ni, maine tro ni a xatuane la itre atr, tro ha hetre aliene la meleng. Ngo tria kö la mekunang. E cili, hnenge hna trotrije la uma ne ini ka tru.

Ame lo Mei 1970, hnenge hna fek a tro Amsterdam matre huliwa ngöne avio, lo hnë huliwa i kaka ekö. Celë hi ka aijijë ni troa ihamë e Afrique, Amérique, Europe me Asie. Ame ngöne la itre nöje cili, hnenge hna öhne laka, nyimutre la itre jol hna cile kow hnene la itre atr, nge pëkö ka atreine xatua angatr. E cili, hnenge hna bëek e Boston me lö hmaca ngöne lo uma ne ini ka tru.

Ame pe, tha sa kö angatr la itre hnyingeng. Thatre kö ni la nyine troa kuca, matre hnenge hna wang la porofesör ka ini hun la pengöne la atr. Öni nyidrë: “Maine tha öhne kö eö la itre mekun cili, nga tha nyipiewekë hmaca kö tro eö a ini.” E cili, hnenge hna tro palua.

Thupene lai, hnenge hna lö hnine la ketre gurup, nge angatr a isa kuca la mekuna i angatr. Hne huni hna trongë ihnadro e Etazini uti hë Acapulco (Mexique). Kösë ka lolo me tingeting la mele i angatr, ngo tha celë kö mel hnenge hna ajan. Tha madrine kö ni ke, itre ka huliwa thoi angatr me huliwa atrekënö.

Ame lo eni a co, eni a ajane troa kapen me ihamë ngöne la itre xaa nöj, ngo pëkö he. Eloine pe, celë fe aja i Tom, ketre sineeng. E cili, hnei nyio hna kanothe la fen hune he. Eni a trengeneune troa traqa ngöne la ketre hnapet ka mingöming, nge pëkö ka troa hnöthe la meleng.

Hnenge me Tom hna pane tro Arenys de Mar, ketre traon e Espagne, ka tha nanyi kö qa Barcelone. E cili, hnei nyio hna itöne la ketre he ka tru ka hetre sinyeu me ati ëjen, Llygra. Hnei nyio hna pane nyidrawane ej, me hule lai motör matre nyi göhnene la  tim hna xome trongën. Hnei nyio fe hna acatrene la lue galu ka 5 met. Thupene lai, hnei nyio hna ea hune la he uti hë les Seychelles. Aja i nyio troa ea ezine Afrique me kanothe la jua e Bonne-Espérance (Afrique du Sud). Ketre, hnei nyio hna goeëne la itre wëtresij, me itre imap, me itre xaa jiane huliwa ju kö. Eni a haine la itre ewekë cili ke, atre hnyawa hi nyio la gojenyi ne nyio hna trongën.

Ngazo pe, hnei nyio hna öhne laka, tha hna kuca kö la he cili thatraqane la tronge i nyio. Eje ha hnyeqetr nge kola lö la tim. Ketre, hna traqa la wene ka catr lo hnenge hna qaja ngöne lo xötrei. Eni a xou matre hnenge hna thithi koi Akötresie. Itre macatre ne tha thithi hë ni, ngo ame la ijine cili, hnenge hna sisinyi ka hape, e mele kö ni, tro ni a thele troa atrepengöi Nyidrë. Thupene lai, hna patre la wene, nge hnenge hna eatrën lo hnenge hna qaja.

Pane mekune jë laka, eni a e la Tusi Hmitrötr nge kola sesë la itre ie me siewej. Nge ame e hej, eni a goeëne la itre wëtresij. Xecie hë koi ni laka, ka mel Akötresie nge Nyidrëti a wangatrune la itre atr.

Thupene la itre wiik, hnenge me Tom hna xepe e Espagne. Hnei nyio hna salemëne la he matre troa itöne la ketre ka hnyipixe. Ngazo pe, pëkö ka pi itöne la he i nyio, matre hnei nyio hna pane treqen. Hnenge hna xome la ijine cili matre troa e la Tusi Hmitrötr.

Eni a öhne laka, Tusi Hmitrötr a qaja la nyine troa kuca matre mele madrin. Ketre, eni a haine la aqane lualai la itre trepene meköt. Öning: ‘Thatreine kö tro sa qaja ka hape, itre Keresiano së, nge tha trongëne pe së la hna qaja hnei Tusi Hmitrötr!’

E cili, hnenge hna mekun troa saze la aqane meleng. Hnenge hna nuetrije la dorog. Ketre, atre hi ni laka, hetre ka trongëne la itre trepene meköti ne la Tusi Hmitrötr. Matre, hnenge hna nyiqaane thele angatr. Hnenge hna thith me sipo Akötresie troa xatua ni troa iöhnyi me angatr.

Ame koi ni, loi e troa tro kowe la nöjei hmi, uti hë la öhne hë ni la nyipi hmi. E cili, hnenge hna ngenu ngöne la traon e Alicante me goeëne trootro la itre uma ne hmi. Atre hi ni laka, tha e cili kö la nyipi hmi ke, hetrenyi la itre hnasaatr.

Ame la ketre Sabath e hnaipajö, eni a nango lapa hune la sasala ka qëmeke kowe la hnë xep hnei he. Nge eni a lapa mekun lo hnenge hna e ngöne Iakobo 2:1-5 ka hape, tha tro kö a wangatrune la itre ka trenamo. Ame la eni a uti kowe la he, öhne ju hi ni la ketre uma ne hmi. Hna cinyihan e qëmeken ka hape: “Uma Ne Baselaia Ne La Itretre Anyipici Iehova.”

Öninge jë hi: ‘Tro ni a pane tupathi angatr, matre wange la hnei angatr hna troa kuca.’ Tha hnenge kö hna iciny, pëkö ibutreng, nge ka dro la itrauzizing. Ame pe, hnene la trahmanyi ka ikep hna hë ni troa lapa ezine la ketre qatre föe. Hnei eahlo hna amamai ni la itre xötr ne la Tusi Hmitrötr. Nge thupene la icasikeu, hnene la itre atr hna ibozu me eni. Ketre, hnene la ketre  trahmanyi hna könë ni kowe la hnalapa i nyidrë matre troa porotrik. Ngazo pe, tha fenesi palakö ni hna e la Tusi Hmitrötr, matre öning koi nyidrë, ka hape: “Qanyinge pë hë troa wai nyipë e ketre drai.“ Qaane la drai cili, hnenge hna sine la itre icasikeu.

Itre wiike thupen, hnenge hna wange lo trahmanyi ka könë ni, nge hnei nyidrë hna sa la itre hnyingeng. Thupene lai, hnei nyidrë hna hamë ni la ketre watreng ka qatreng la itre iheetr ne la ketre trahmanyi hna akalabusin. Hna akalabusi angeic ke, hnei angeic hna drengethenge la hna qaja hnei Tusi Hmitrötr ka hape, tha tro kö a isi ngo troa ihnimikeu. (Is. 2:4; Ioane 13:34, 35) Xecie hë koi ni laka, celë hi la nyipi hmi. Angatre hi la ka trongëne la itre trepene meköt göi loi me ngazo! E cili, tha eni hmaca kö a thele hnapeti ka mingöming. Ngo eni ha pi ini Tusi Hmitrötr. Celë hi matre, hnenge hna bëek e Pays-Bas.

Traqa koi foa lao drai ne eni a trongë ihnadro a tro Groningue (Pays-Bas). E cili, hnenge hna nyiqaane thele huliwa, me pane tro kowe la hnë tratrau sinöe. Hnene la maseta hna hamë ni la ketre pepa matre nyialien. Nge kolo fe a hnyingëne la hmi, matre hnenge hna cinyihan ka hape, “Atre Anyipici Iehova.” Thupene la nyidrëti a e la pepang, hna saze la iqëmeke i nyidrë. Öni nyidrë: “Tro pë ni a hë nyipë.” Ngo tha hnei nyidrëti kö hna hë ni.

Ame pena ngöne la ketre hnë tratrau sinöe, hnene la maseta hna hnyingëne la itre pepang. Öning ka hape, hnenge hna nyidrawan me ahnyipixene la ketre he. E cili, eni a sesëkötr la nyidrëti a qaja ka hape: “Nyipëti a nyiqaane huliwa edrahe hnaipajö. Ngo eni a mejiune laka, pëkö jol ka troa traqa. Ketre anyipici Iehova ni, nge eni a trongëne la itre trepene meköti ne la Tusi Hmitrötr.” Öninge jë hi: “Ketre atre anyipici Iehova fe ni!” Ngazo pe, tha hnenge kö hna iciny me xötre ihe, matre öni nyidrë: “Nga tro nyiso a ini Tus!” Madrine catre ni ke, atre hë ni la kepin matre tha hna hë ni kö hnene lo ketre trahmany. Eje hi, hnei Iehova hna sa la thithing. (Sal. 37:4) Hnenge hna ce huliwa memine lai trejin koi caa macatre me ini Tusi me nyidrë. Nge ame hë lo Januare 1974, hnenge hna xomi bapataiso.

Thupene la caa treu, hnenge hna xome la huliwa ne pionie, nge nyimutre la itre manathith hnenge hna kapa qa ngön. Ame la treu thupen, hnenge hna fek e Amsterdam, matre ixatua ngöne la ketre gurup ka hnyipixe nge ka qene Espagnole. Tru la madrineng troa ini Tusi memine la itre atr ka qene Espagnole me Portugais. Ame lo Mei 1975, hna acili ni troa pionie hut.

Ame la ketre drai, hnei Catharina, ketre pionie hut hna sine la icasikeu hun qene Espagnole. Hnei angeic hna ce traqa memine la ketre föe ka ini Tusi me angeic. Thupene lai, hnenge me Catharina hna icinyanyikeu matre troa iatre hnyawa. Öhne hi nyio laka, caasi hi la hnei nyio hna mekun me ajan. Hnei nyio hna faipoipo lo 1976, nge hnei nyio hna xome la huliwa ne pionie hut uti hë lo 1982. E cili, hna hë nyio troa sine la hna 73 lao kalas ne Ini Ne Gileada. Hna upi nyio kowe la götrane ahië e Afrique, nge traqa koi 5 lao macatre ne cainöje nyio e Mombasa (Kenya). Ame lo 1987, hna upi nyio e Tanzanie ke, hna nue hmaca troa cainöj e cili. Matre, hnei nyio hna lapa koi 26 lao macatre. Thupene lai, hnei nyio hna bëeke hmaca e Kenya.

Celë hi aliene la meleng, ene la troa tro fë la nyipici kowe la itre atr. Ame e Mombasa, hnenge hna hamëne la lue zonal kowe la ketre trahmany. Öni nyidrë: “Nemene la nyine tro ni a kuca thupene la eni a ase e la lue zonal?” Ame la wiike thupen, nyio a nyiqaane ini Tus jëne la itus, Vous pouvez vivre éternellement sur une terre qui deviendra un paradis, hna nyipi fejan qene Swahili. Thupene la caa macatre, hnei nyidrë hna xomi bapataiso me xome la huliwa ne pionie lapa. Hnei nyidrëti me föe i nyidrë hna xatuane la 100 lao atr troa sa xepu koi Iehova me xomi bapataiso.

Tru la madrineng ke, hetre aliene hë la meleng. Ceitui eni memine lo atre saleme trootro ka öhne la penina ka tru alameken. Xele kö ni troa apatrene la penina cili. (Mat. 13:45, 46) Eni a ajane troa nue la meleng troa xatua itre xan matre hetre aliene la mele i angatr. Mama hnyawa ha koi ni me Catharina laka, Iehova a amanathithine la itre hlue i Nyidrë me hamë aliene la mele i angatr.