Mi meke a Bakaakondee aini 1948. Wan yali baka dati, neen mi famii foloisi go a São Paulo, a Balasilikondee. Mma anga nda a be kelikiman, neen meke u be gwenti go a keliki. Ala neti te a osufamii be kaba nyan, u be e leisi u Beibel makandaa. Aini 1959 u foloisi go na Ameekankondee, a wan foto den e kai Massachusetts.

Nda be e wooko taanga fu solugu a gaan osufamii fi en. Wan pisiten a be e seli sani, bakaten a be e meke pasi. Baka dati a fende wan wooko a wan opalani peesi. Ná pikin poolo u poolo di a fende a wooko ya, bika na ala yuu u be sa go a taa kondee.

Di mi kaba lagi sikoo, mi be bigin akisi miseefi san mi o du anga mi libi. Son wan fu den mati fu mi go a universiteit, taawan be go aini suudati. Mi dati á be wani go aini suudati, bika mi á be lobi feti, neen meke mi taki mi o go a universiteit. Ma a sani di mi be wani du tuutuu a fu yeepi sama, bika mi be e si enke a sani ya be o meke mi piisii.

Ala yuu mi be wani sabi fa a libi bigin, neen meke na a sani de mi be go leli a universiteit. Den leli u taki ala sani kon fu denseefi. Den muneli anga den yefolow be wani u biibi ala san den be e leli u, winsi fa nawan buweisi á de gi son wan fu den sani ya.

Den á be e leli u fa fu tyai useefi a wan bun fasi na a sikoo ya. Den be e leli u namo taki u mu du ala san u poi fu meke en na a sikoo, winsi a sa tyai ogii gi taawan. Mi be lobi go a dansi pe u be e somoko takuu tabaka. A sani ya be e meke mi fii bun fu wan pisiten. Mi be e akisi miseefi taki: ‘A disi na a libi kaba?’

Bakaten mi foloisi go na a universiteit fu Boston. Mi be suku wan wooko fu pai gi a sikoo fu mi. Wan fu den man di be e wooko ape a be wan Yehofa Kotoigi. A so mi miti den Yehofa Kotoigi fu a fosi leisi. A man ya be taki anga mi fu den seibin ten di sikiifi aini Daniyeli kapitel 4, neen a soi mi taki aini den lasiti dei wi e libi (Dan. 4:13-17). A á langa baka di mi bigin taki anga a man ya, neen mi fusutan taki efu mi be e taki go doo anga en, mi be o abi fu kengi a fasi fa mi be e libi, neen meke mi be bigin koti pasi gi en.

Den sani di mi be e leli a sikoo be o seeka mi fu go yeepi sama a Zuid-Ameekan. Mi be wani go yeepi sama na anda bika mi be e si enke na a sani ya be o meke mi piisii tuutuu. Ma bakaten mi kon si taki a sani ya seefi á be meke mi fende a libi di mi be e suku. Neen meke mi komoto na a universiteit.

Aini mei 1970, mi foloisi go a Amsterdam, aini Bakaakondee, neen mi bigin wooko gi aseefi opalani bodeleifi di nda be e wooko gi. A omen peesi mi be e go na Afiikan, Europa, Asiya, Zuid-Ameekan anga Noord-Ameekan. Ma winsi sowtu kondee mi be go, mi be e si taki ala den abi gaan polobelema di nawan sama á be poi seeka. A sani ya meke mi be wani du wan sani fu seeka a goontapu, neen meke mi foloisi go na Ameekankondee baka, neen mi go na aseefi universiteit di mi be komoto.

Ma mi á go langa seefi neen mi si taki a sikoo á be poi piki den akisi di mi be abi fu a libi. Mi á be sabi san fu du, neen meke mi go taki anga wan fu den muneli. Baka di mi anga en taki a akisi mi taki: ‘Ma saide yu e kon na a sikoo ete? I sa fika a sikoo.’ We, mi á wakiti fu a taigi mi tu leisi. A leisi ya di mi komoto a sikoo, mi á go moo.

Mi be e fii ete taki a ná disi na a libi, neen meke mi bigin mosoo anga wan kulu sama di á be e booko den ede anga san taa sama be e taki, den be e libi enke fa den wani. Mi anga wantu mati fu mi teke pasi go a wan peesi aini Mekisikow den e kai Acapulco. Wan hii pisiten u tan anga wan kulu sama di be e libi enke fa den wani, den á be e wooko anga weiti. A be gei enke den sama ya e piisii, ma te i go tan anga den da yu e si taki a hii libi fu den a wan gaan lei.

Bakaten mi bigin pakisei wan sani di mi be wani du senten mi be de wan pikin boi. Mi be wani koi lontu goontapu enke wan kabiten fu wan boto. Mi be sabi taki a wan kodo fasi fa mi be o poi toon kabiten fu wan boto, a te mi abi mi eigi boto. Wan fu den mati fu mi be wani du aseefi sani de tu, neen meke u miti ede kon a wan fu suku wan boto. Mi be wani go tan a wan moin tabiki pe sama á be o poi taigi mi fa mi mu libi.

Mi anga Tom go a wan peesi aini Sipanyookondee den e kai Arenys de Mar, neen u bai wan boto di be langa pasa 9 meter. A nen fu a boto ya a be Llygra. A be wan booko boto, neen meke a omen sani u be mu seeka neen fosi a be sa go a wataa. U puu a masini fu a boto, neen u lai diingiwataa a pe a masini be de. U be fasi tu pali na a boto fu u fu be man tii en te u be e go a lanpeesi. Di u kaba seeka ala den sani ya, neen u teke pasi fu go na a Indiya Se. U be wani koi pasa na a pisi fu Afiikan. U be e wooko anga den sitali, wan kaita, wantu buku, anga wantu taa sani fu luku pe u de. Mi be e foondoo fu si fa den sani ya be e soi u pilisisi pe u be de.

A á langa seefi neen u si taki a booko boto fu wi á be bun fu tan a wataa tapu. Aini wan yuu langa, a wan sani fu 22 liti wataa be e kon aini a boto. Enke fa mi taki na a bigin fu a toli fu mi, da wan leisi di wan gaan winta be e wai, moo wataa be e kon aini a boto. Mi be feele te neen mi bigin begi Gadu. Mi taigi en taki efu a meke mi tan libi, mi o meke moiti fu kon sabi en. We, mi á dede a dei de, neen meke mi du san mi be paamisi en.

A so mi bigin leisi Beibel. A be e switi gi mi fu sidon a mindii wataa pe ala sowtu fisi e suwen lontu a boto, e leisi mi Beibel. Te neti, mi be e sidon luku den somen sitali di de a hemel. Den sani ya meke mi bigin biibi taki wan Gadu musu de di e booko en ede anga libisama.

Baka wan pisiten, u go a wan peesi den e kai Alicante aini Sipanyookondee fu go suku seli fu a boto fu u, bika u be wani wan betee wan. Ma a sani ya á be makiliki, bika a ná be wan bunbun boto. Te go taki u be puu a masini neen. Mi be e koboloiki a ten di u be e wakiti fu fende seli fu a boto, fu leisi mi Beibel.

O moo mi be e leisi a Beibel, o moo mi be e si en enke wan buku di e soi u fa u mu libi. Beibel e taki kiin fa Gadu wani u libi. Di mi kon fusutan den sani ya mi be e akisi miseefi saide omen sama di e kai denseefi Kelesten e du sani di Beibel e taigi u kiin taki wi á mu du. Miseefi a be wan fu den sama ya, bika mi be e si miseefi enke wan Kelesten.

Mi be wani kengi a fasi fa mi be e libi, neen meke mi á be e somoko takuu tabaka moo. Mi be e biibi taki sama be musu de di e libi enke fa Beibel taki. Mi be wani miti den sama ya. Neen meke mi begi Gadu, neen mi akisi en fu a yeepi mi fu fende den sama di e dini en enke fa a wani.

Mi be wani waka na ala den keliki te enke mi fende a tuu biibi. Di mi bigin luku lontu aini Alicante, a á be taanga gi mi fu sabi sowtu wan mi ná abi fu go seefi, bika gaanse fu den be abi fowtow anga pobiki.

Wan sonde bakadina, mi be sidon a wan pikin mongo tapu e leisi Yakowbesi 2:1-5, di e soi taki wi á mu e tyai den guduman a tapu, da wi e wai fesi gi den pootiman. Di mi de a pasi e go na a boto, mi si wan keliki pe sikiifi ‘Kownukondee zaal fu Yehofa Kotoigi’.

Di mi si a sani ya mi taki: ‘Meke mi go luku efu den sama ya e du san Beibel e taki osi. Mi o luku efu den o libi bun anga mi.’ Neen meke mi waka go aini a Kownukondee zaal anga soso futu, fudyuu baiba, anga wan piiti loisi buuku. A man di be de na a doomofu tyai mi go sidon a wan gaandi uman se. A uman yeepi mi fu suku den tekisi aini mi Beibel a hii komakandaa. Baka a komakandaa, mi foondoo di ala sama kon taki anga mi. Wan man kai mi kon neen osu fu taki fu Beibel. Ma mi á be kaba leisi a hii Beibel ete, neen meke mi taigi en taki: ‘Te mi kaba fu taki fu Beibel, mi o piki i.’ Baka dati mi bigin go na ala den komakandaa.

Wantu wiki baka dati, mi go na a man ya osu. A piki ala den akisi di mi be abi. Baka wan wiki a gi mi wan saka anga moin koosi aini. A taigi mi taki a sama di be abi den koosi de a sitaafu-osu fu di a á be wani go aini suudati (Yes. 2:4; Yoh. 13:34, 35). Di mi yee taki a man ya be de kabakaba fu go a sitaafu fu di a lobi taawan, mi be sabi taki a disi na a tuu biibi. Den sama ya e du san sikiifi aini Beibel. Mi á be wani suku wan tabiki fu go tan mi wawan moo, ma mi be wani fusutan a Beibel moo bun, neen meke mi foloisi go a Bakaakondee baka.

A fo dei langa a teke fu doo Groningen, aini Bakaakondee. Di mi doo ape, mi be abi fu suku wan wooko fu solugu miseefi. Wan fu den peesi pe mi go suku wooko, be akisi sowtu keliki mi de. Mi sikiifi na a pampila taki mi a wan Yehofa Kotoigi. Di a basi luku a pampila, ala en fesi kengi. A taigi mi taki a o telefon mi, ma noiti moo mi yee wan sani fi en.

 Baka dati mi go suku wooko a wan taa peesi pe den e meke sani anga udu. A basi akisi mi sowtu pampila mi abi, anga sowtu wooko mi be du kaba. Di mi taigi en taki mi be seeka wan booko boto, a taigi mi taki mi sa bigin wooko a bakadina de, ma mi mu tyai miseefi moin bika en a wan Yehofa Kotoigi. Di a taki a sani ya mi taigi en taki: ‘Miseefi a wan Yehofa Kotoigi.’ A ten de mi be de anga langa ede uwii anga fudyuu baiba ete. Di a luku mi te a kaba, a fusutan taki mi á be toon wan Kotoigi ete, neen meke a taigi mi taki a o sutudeli Beibel anga mi. Ná pikin poolo mi poolo. Now mi be fusutan saide a taa man á be telefon mi. Yehofa be seeka wan moo bun sani gi mi (Ps. 37:4). Mi wooko wan yali gi a baala ya. Den pisiten de a sutudeli anga mi te enke mi dopu aini yanuari 1974.

Baka wan mun, mi bigin du a pioniliwooko. Ná pikin piisii a wooko ya be e meke mi piisii. Wan mun baka dati, mi foloisi go a Amsterdam fu go yeepi aini wan nyun kulu di be e taki Sipaniyootongo. Mi be e piisii tuutuu fu sutudeli anga sama aini Sipaniyootongo anga Potogisitongo. Aini mei 1975, mi fende a gaandi fu du a spesuutu pioniliwooko.

Wan dei, wan spesuutu pionili sisa den e kai Ineke tyai wan Beibelsutudi fi en di komoto a Bolifiya fu kon luku a kemeente fu u. Mi anga Ineke bigin sikiifi biifi gi useefi. U toow aini 1976, neen u bigin pionili makandaa. Aini 1982 u kisi a kai fu go na a Gileyad sikoo. Disi a du fu 73 leisi di a sikoo ya be holi. U poolo di den sende u go na Afiikan. U tan 5 yali langa aini Mombasa, a Kenya. Aini 1987, den sende u go a Tanzania. A wan hii pisiten a wooko be tapu na a kondee ya, ma now lanti be gi den piimisi fu peleiki. A 26 yali u tan ya fosi u daai go a Kenya baka.

U be e piisii fu leli sama di be abi sakafasi sani fu Beibel. A fosi Beibelsutudi di mi fende aini Mombasa, a wan man di mi be gi tu Wakititolen. Di mi gi en den neen a akisi mi taki: ‘San mi mu du baka te mi kaba leisi den?’ Wan wiki baka dati, u bigin sutudeli a buku di den e kai Joe kan libi foe têgo na ini wan paradijs na grontapoe. A buku ya be de aini Swahilitongo. Wan yali baka dati a dopu neen a toon wan kowownu pionili. A wan sani fu 100 sama en anga en uman yeepi fu kon dini Yehofa.

Di mi kon fusutan saide u de a libi, mi be e fii enke a bisnisman di be fende a dii parel. A man ya be du ala san a poi fu a á lasi a parel ya (Mat. 13:45, 46). Mi be wani du ala san mi poi fu yeepi sama fu denseefi kon fusutan den pelensipali leli fu Beibel. Mi anga mi uman si kiin fa Yehofa yeepi u fu kon abi wan bun libi.