Joʼuushi taya soʼu 1948 chaa Países Bajos. Wanee juya süchikijee tia, akolojooshii waya chamüin São Paulo (Brasil). Oʼunawaipuʼushi tashikai sümaa teikat suluʼu tü iküleesiakat otta waashajeʼerapuʼuin tü Bibliakat aipaʼawai. Akolojooshii waya wachikuaʼa soʼu 1959 chamüin Massachusetts (Estados Unidos).

Mekiisatshii waya otta aʼyataashi waneepia chi washikai süpüla naapüin tü choʼujaakat wamüin. Wainma kasa niʼyataaka anain, oikaapuʼushi nia, akumajapuʼushi karateet otta aʼyataapuʼushi nia suluʼu wanee compañia eʼikajütkat chisooui suluʼumüin wanee mma wattamüin suluʼupünaa katünasü. Talatüsü waaʼin süka niʼyataapuʼuin suluʼu tia compañiakat, jama eein süpüla wawaraijaain wattamüin.

Jülüjapuʼusü taaʼin jimaʼaliiwaʼaya taya tü taaʼinreekat miyoʼupa taya. Eeshii waneinnua taʼaleewainyuu ekirajaaka suluʼu tü eʼiküleekat miyoʼu otta waneinnua surulaatshii naya. Tayoutapejeʼe surulaalüinjachin taya süka mamalain tamüin atkawaa. Müshijeseʼe toʼunuin suluʼu eʼikülee miyoʼu. Tü taaʼinreekat maʼin amüin shia takaalinjain maʼin wayuu, süka jülüjain taaʼin shieerüin talatüin atuma taaʼin.

Soʼu chajachin taya suluʼu tü eʼiküleekat miyoʼu, kamalainsü tamüin tü ekirajünakat süchiki tü sukuwaʼipainjatkat wayuu. Nekirajapuʼuin waya na eʼiküliikana sünain tü evoluciónkot, keeʼireepuʼusü naaʼin wanaawainjatüin waaʼin namaa sünain anoujaa tia. Eepejeʼe waneirua kasa nnojotka pansaain sümaa tü nekirajakalü anain, tanoujale sünain tia, müsü tanoujakai sünain wanee kasa süpaʼa mma.

Tü ekirajünakalü anain taya süpülajatü tountuin waneirua kasa suluʼu tü eʼiküleekat miyoʼu, nnojoishi taya ekirajünüin sünain wuleinjatüin takuwaʼipa. Sutuma namaain taya taʼaleewainyuu sünain miʼiraa jee sutuma takaijain yüi, jülüjapuʼusü taaʼin shiainjatüle talatüin atuma taaʼin tia.

Akolojooshi taya suluʼumüin tü pueulokot Boston, tashajirüin tanülia süpüla tekirajaain suluʼu wanee eʼikülee miyoʼu. Süpüla tawalaajüin tü tekirajaakalü anain, aʼyataʼawaishi taya wakasionpa. Teʼraajaka yala wanee aküjai pütchi nüchiki Jeʼwaa, aʼyataajiraashi nia tamaa. Nüküjain tamüin süchiki «tü akaratshikat kaʼi» saashajaaka achiki Daniel kapiitulo 4 otta nüküjain tamüin sülüʼülüin tü kaʼi sajaʼttajatkalü oʼu kasa süpüshuaʼa (Dan. 4:13-17). Tayaawataka saaʼu taʼwanajaainjatüin takuwaʼipa ayatüle taashajaain nümaa süchiki tü Bibliakat, müshijeseʼe tounjulaʼawalin nuulia.

Suluʼu tü eʼiküleekat taneeküin waneirua ekirajawaa süpüla tekirajünüinjachin sünain tü taaʼinrajatkat süpüla takaalinjain wayuu chaa América del Sur. Jülüjasü taaʼin shieerüin talatüin atuma taaʼin takaalinjale wayuu. Tayaawataka saaʼu nnojoluin talatüin taaʼin waneepia sutuma. Tooʼulaaka suulia ekirajawaa suluʼu tü eʼiküleekat miyoʼu.

Akolojooshi taya chamüin Ámsterdam (Países Bajos), maayoʼu soʼu 1970 süpüla taʼyataain suluʼu tü compañia niʼyataapuʼukat aluʼu chi tashikai. Sutuma tia, wainma mma teʼraajaka chaa África, América del Norte, América del Sur, Asia otta Europa. Sutuma wainmain mma teʼraajaka, tayaawatamaata aaʼu wainmain kasa mojusü alataka sainküin mma otta nnojolin eein wanee wayuu anouteʼerüinjachikai shia. Ayatapejeʼe tachajaain sukuwaʼipa süpüla taaʼinrüin waneirua kasa talatüinjatka atuma taaʼin, müshijeseʼe takolojooin tachikuaʼa chamüin Estados Unidos jee tekirajaain tachikuaʼa suluʼu tü eʼikülee miyoʼu chajatkat Boston.

Koleejiapa taya tachikuaʼa, tayaawatamaata aaʼu nnojoleechin tekirajünüin sünain tü taaʼinrajatkat süpüla talatüinjatüin taaʼin. Süka nnojoluin tayaawatüin saaʼu tü takuwaʼipainjatkat, achuntushi taya kaalinwaa nümüin chi ekirajakai süchiki tü sukuwaʼipainjatkat wayuu, ponusü maʼin taaʼin soʼu nümüin tamüin: «¿Kasaka paaʼinrüin yaʼayaa? Puuʼulaapa». Tooʼulaaka suulia tü eʼiküleekat miyoʼu.

Sutuma nnojoluin talatüin taaʼin, namaaka joo taya na hippie münakana, na achajaakana sukuwaʼipa süpüla anajiraain naya sümaa wayuu jee aijiraain naya. Tayakai namaa waneinnua taʼaleewainyuu achuntushii waya koliita chejee Estados Unidos süpüla wantajanain chamüin Acapulco (México). Kottiraashii waya namaa waneinnua hippie, müsü nnojotkai shapaain naaʼin. Tayaawatamaataka saaʼu nnojoluin talatüin naaʼin sutuma müin nakuwaʼipa. Nnojotsü anain nakuwaʼipa noʼutku nayakana.

Oʼuneepuʼusü taaʼin suluʼu wanee anuwa shirokupünaa tü palaakat jintüliiwaʼaya taya. Süpüla tountuin tia, eeinjatü tamaʼana wanee anuwa. Wanaawasü  tü naaʼinreekat wanee taʼaleewain tamaa, Tom nünülia. Woʼunaka suluʼu anuwa. Keeʼireepuʼusü taaʼin tantüin sünain wanee mma pasanain sünain tü palaakat eere nnojoluin süpülajünüin kasa natuma na sülaülashiikana mma.

Toʼunaka nümaa Tom chamüin Arenys de Mar, pejesü sünain Barcelona (España). Wayaʼlajaka wanee anuwa 9 meetüro sajaʼapüin, Llygra sünülia. Wanoutaka shia süpüla woʼunuin suluʼu. Süka nnojoliin washapajaain süpüla wantajanain eemüinjanale waya, wayuʼluin sumotootse tü anuwakat jee weʼitaaka wüin wasüinjatka yala eejatüle shia. Wayaʼlajaka piamasü unia 5 meetüro sajaʼapüin süpüla woʼunirüin tü anuwakat wantapa eere süshaʼwajüle anuwa eekai joʼuuchoin. Woʼunaka chamüin Seychelles shirokupünaa tü palaakat Índico, woʼunireein shia soʼutpünaa tü palaa chajatkat África, wopumüinpünaa sünain otta walatireein shia chamüin cabo de Buena Esperanza (Sudáfrica). Suulia maaʼawain waya, weirakaain sümüin tü shüliwaikat, sümüin mapa otta sümüin wanee kasa ayaawatirüinjanaka waya jalapünaainjanain walatüin. Ponoshootosü maʼin taaʼin süka eein süpüla watüjaain saaʼu jalain waya.

Wayaawatamaata aaʼu iseerüin süchiki tü anuwakat süntirüin waya eemüinjanale waya. Ekerojusü wüin suluʼu, eetaasü maʼaka 22 litro soʼu wanee oora. Ayoʼujaasü maʼin taaʼin süka shiʼitüin wanee juya miyoʼu wawaimaajatü. Toʼuraajaka nümüin Maleiwa, kakaliairü nnojoluin taaʼinrüin tia maʼaka taküjain paalapain. «Katüle woʼu putuma Maleiwa, tachajaweechi achiki pia», tamaka. Shiimalaaka tü juyakat jee tekeraajaka tanüiki nümüin Maleiwa.

Taashajeʼeramaataka tü Bibliakat. Anashaatasü maʼin süka yalajachin taya joyotuin suluʼu tü anuwakat sünain tanajüin tü palaakat Mediterráneo, teʼrüin suwanüin tü jimekalüirua, delfín otta wattain maʼin tü palaakat. Kamalainsü tamüin anajaa aipaʼawai tü shüliwaikat otta tayaawata aaʼu shiimain eein wanee Maleiwa jülüjakai aaʼin wayuu.

Woʼuniraka tü anuwakat soʼu kojuyasü semaana jee wantaka eemüin süshaʼwajüle tü anuwa chajatkat Alicante (España). Woikaaka tü anuwakat süpüla wayaʼlajüin wanee eekai anain suulia. Kapüleepejeʼe süpüla wousütüin anain chi eekai niyaʼlajeein shia, jama laülaain, mamotootsein jee shikerojüin wüin suluʼu. Soʼunnaa waʼatapajüin shiyaʼlajünüin, taashajeʼerüin maʼin tü Bibliakat.

Süka taashajeʼerüin maʼin tü Bibliakat tayaawatamaatüin saaʼu tü süküjakat süchiki tü waaʼinrajatkat süpüla talatüin waaʼin. Ponoshaatasü taaʼin süka pansaain tü sümakat tü Bibliakat süchiki tü waaʼinrajatkat süpüla wulein wakuwaʼipa. Jülüjawaipuʼusü taaʼin jamüin nnojotka naaʼinrüin tü sümakat tü Bibliakat na anoujakana nünain Jesuu naashin maʼaka taaʼin tayakai.

Tachajaaka maʼin sukuwaʼipa süpüla tanouteʼerüin takuwaʼipa, ooʼulaashi taya suulia akaijaa yüi. «Eeshii na aaʼinrakana tü sümakat tü Bibliakat. Kasataalejeseʼe tantüin anain naya», maa müsü taaʼin. Toʼuraajaka tachikuaʼa nümüin Maleiwa süpüla nükaalinjain taya sünain antaa nanain.

Süpüla tatüjaain saaʼu jaralüin tü iküleesia ekirajakat tü shiimainkat nüchiki Maleiwa, tayaawatüinjatü saaʼu pansaale tü shikirajakalü anain sümaa tü sümakat tü Bibliakat. Waraittapa taya kaayeruʼupünaa chaa Alicante, teʼrüin wainma iküleesia jee tayaawatüin saaʼu nnojoluin shiain tü iküleesia shiimainkat süka suʼwaajünüin ayaakuaa suluʼu.

 Yalajaittaa taya rimiinkoʼu aliika sünain aashajeʼeraa Santiago 2:1-5 süʼütpaʼa wanee uuchi eere jaʼyashiin tü süshaʼwajülekat anuwa. Taashajeʼerüin sünain nnojoliinjanain nayain neʼe kapülain waaʼin nakuwaʼipa na washinnuukana. Takoyotpa tachikuaʼa eejatüle tü anuwakat, alatüshi taya pejepünaa sünain wanee piichi suutkajaale wayuu sünain aʼwaajaa Maleiwa. Teʼraka wanee pütchi ashajünüsü sünain tü puettoʼukat, müsü mayaa: «Noutkajaale na aküjaliikana pütchi nüchiki Jeʼwaa».

«Tooʼulaküinpa naaʼin müleka kapülainjeechire taya naaʼin tekerotpa», maa müshi taya. Tekerotka suluʼumüin tü piichikat, masapaatsesai taya, kaliimoʼuleshi taya jee chatatuasü tapantalonse. Nüsakaka taya wanee wayuu jülüjakai aaʼin na antüshiikana. «Jalaichi, püikalaa yaa süʼütpaʼa tü wawalakat», müshi nia tamüin. Kamaneesü tamüin tia wawalakat, shia wanee wayuu laülaa, shiiʼiyatüin tamüin tü wetsiikulo aashajeʼennakat. Ponusü maʼin taaʼin süka kamaneein tamüin napüshuaʼa na asakakana taya. Nuunejaaka taya wanee wayuu nipialuʼumüin süpüla waashajaain süchiki tü Bibliakat. «Taapireechi pia», tamaka nümüin süka nnojoyülüin taashajeʼerüin süpüshuaʼa tü Bibliakat. Süchikijee tia, oʼunawaishi taya sünain tü outkajawaakat.

Sülatapa kojuyasü semaana, toʼunaka nipialuʼumüin chi wayuu ounejaakai taya paala jee nüküjaka tamüin tü tasakirakalü anain suluʼujee tü Bibliakat. Wanee semaana süchikijee tia, nüsülajaka tamüin waneirua kuluulu anasü maʼin. Nüküjaka tamüin nüsheʼin shia wanee wayuu püreesakai saaliijee naaʼinrüin tü sümakat tü Bibliakat süchiki nnojolinjachin sünainpünaain nia atkawaa (Is. 2:4; Juan 13:34, 35). Tayaawatüitpa aaʼu tantüin anain na wayuu aaʼinrakana tü sümakat tü Bibliakat, nnojoluitpa taaʼin shiiʼiree tousütüin anain wanee mma anasü pasanain sünain tü palaakat. Shiaitpa taaʼinmaaka tekirajaain sünain tü Bibliakat. Takolojooka tachikuaʼa chamüin Países Bajos.

Tachuntaka koliita süpüla tantajachin suluʼumüin tü pueulokot Groninga (Países Bajos), pienchi kaʼi wopuluʼu taya. Tachajaaka süchiki wanee aʼyatawaa. Tachuntaka aʼyatawaa suluʼu wanee miichi eere sukumajünüin kasa süka taapüla, saapünaka tamüin wanee karaloʼuta eeinjatüle tashajüin kasaichin sünülia tü iküleesia kaluʼukat taya. Tashajaka suluʼu taküjalin pütchi nüchiki Jeʼwaa. Naashajeʼerapa tia chi laamakai, teʼrüin mojuleematüin nuʼupünaa. «Anakajaʼa, tayamaajeechi pia», nümaka tamüin, nnojoipejeʼe niyamaajüin taya.

Toʼunaka suluʼumüin wane piichiya eere sukumajünüin kasa süka taapüla süpüla tachuntuin aʼyatawaa. «¿Kasa pikirajaaka anain süpüla piʼyataainjachin? ¿Kasa piʼyataapuʼuka anain?», nümaka tamüin chi  laamakai. Taküjaka nümüin shiapuʼuin neʼe tanoutuin wanee anuwa. Ainküsü neʼe taaʼin soʼu nümüin tamüin: «Anashi piʼyataale soʼukai. Shiajaʼa neʼe tachuntuin pümüin nnojolinjachin pütkaain. Aküjai taya pütchi nüchiki Jeʼwaa otta kojutusü tamüin tü sümakat tü Bibliakat». «Müshia tayakai, Aküjai taya pütchi», tamaka nümüin sümaa talatüin taaʼin. Süka niʼrüin mülouin taʼwala jee kaliimoʼulein taya, nümaka tamüin: «Tekirajeechi pia sünain tü Bibliakat». «Anakajaʼa», tamaka nümüin. Tayaawatüitpa aaʼu jamüin nnojotka saapünüin tamüin tü aʼyatawaa tachuntakat paala shia süka nürütkeʼereein taya Jeʼwaa nünainmüin (Sal. 37:4). Aʼyataashi taya nümaa chi wawalakai soʼu wanee juya jee nikirajüin taya sünain tü Bibliakat soʼu tia. Woutiisashi taya eneeroʼu soʼu 1974.

Wanee kashi süchikijee woutiisain taya, pürekutsootshi rekulaat taya. Wanee kashi süchikijee tia, akolojooshi taya Ámsterdammüin süpüla takaalinjain waneinnua wawalayuu aküjakana pütchi namüin na aashajaakana alijunaiki. Talatüshi maʼin taya süka tekirajüin na aashajaakana alijunaiki otta portugués. Pürekutsootshi pesiaat taya maayoʼu soʼu 1975. Anataʼaleesüjaʼa maʼin takuwaʼipa.

Soʼu wanee kaʼi, antüsü wanee wawala suluʼu tü Piichi Outkajaaleekat, pürekutsoot pesiaat shia, Catharina sünülia. Antüsü shia süpüla shiʼraajirüinjanain waya wanee wayuu shikirajaka sünain tü Bibliakat alijunaikiruʼu, chejeʼewat shia Bolivia. Tayakai sümaa Catharina ashajiraashii waya karaloʼuta süpüla weʼraajüin wakuwaʼipa jee wayaawatamaataka saaʼu wanaawain waaʼin süchiirua tü waʼyataweekat nümüin Maleiwa. Kasaatshii waya soʼu 1976. Ooʼulaashii waya suulia pürekutsooliin pesiaat soʼu 1982 wounejaanapa sünain tü Ekirajaaleekat Galaad sünain tü ekirajawaakat 73. Talatüshii maʼin waya süka waluwataanüin chamüin África Oriental. Soʼunnaa jaʼrai juya, aʼyataashii waya nümüin Maleiwa chaa Mombasa (Kenia). Soʼu 1987, aluwataanüshii waya Tanzaniamüin eere nnojoluitpain süpülajüin waʼyataain nümüin Maleiwa. Aʼyataashii waya soʼunnaa 26 juya chayaa otta mapa aleʼejaashii waya wachikuaʼa Keniamüin.

Talatüsü maʼin taaʼin süka tekirajüin wayuu sünain tü Bibliakat. Chi palajachikai wayuu tekirajüin sünain tü Bibliakat chaa Mombasa nia wanee wayuu taküjakai amüin pütchi. Piamasü rewiisüta taapaka nümüin jee nümaka tamüin: «Kettaapa taashajeʼerüin shia, ¿kasa maa taaʼinrüinjatka?». Wanee semaana süchikijee tia, tekirajüin nia sünain tü Bibliakat sükajee tü karaloʼutakat Usted puede vivir para siempre en el paraíso en la Tierra, jeketü ojuʼitüin tia karaloʼutakat suluʼu suajili soʼu tia. Wanee juya süchikijee tia, woutiisashi nia jee pürekutsootshi rekulaat. Eetaainna maʼaka 100 wayuu nükaalinjaka sümaa nuʼwayuuse süpüla woutiisain naya.

Wanaa sümaa tayaawatüin saaʼu tü naaʼinrajatkat wanee wayuu süpüla talatüinjatüin naaʼin, müsü taaʼin maʼaka naaʼin chi wayuu ousütakai wanee kaaʼürüi jee achajaakai sukuwaʼipa süpüla niyaʼlajüin shia (Mat. 13:45, 46). Suchuntaain taaʼin takaalinjeein wayuu süpüla natüjaainjatüin saaʼu tü naaʼinrajatkat süpüla talatüin naya. Tayaawatüitpa aaʼu sümaa taʼwayuuse anakuwaʼipaliin nutuma Jeʼwaa na aʼyataashiikana nümüin sümaa naapüin talataa aaʼin namüin.