Nabuthirawa e Netherlands omwa 1948. Omwaka owakwamako, eka yethu muyahumira e São Paulo, e Brazil. Ababuthi baghe ibahambirire eby’edini, kandi ng’eka mughulhu wosi ithukasoma e Biblia thwabirya ekyakiro. Kandi omwa 1959 muthwahuma lero muthwaya e United States, eyo thwayikalha omwa bulhambu bwe Massachusetts.

Thatha mwakolha kutsibu eriwathikya eka yethu y’abandu munani. Mwakolesibwa omwa mibiiri muthina-muthina ng’ey’obutembeyi, erikolha esyonguda, kandi amakolera omwa kampuni eyikakolha okwa by’erighenda omo syondegge. Abosi omw’eka mubatsema akabana omubiiri oyu kundi mukyaleka ithwabya ithwangana hika omwa myanya mingyi.

Ingane omwa siniya, iningabera eriyibulya, ‘Ngendisyakolhaki nabirikulha?’ Abandi banywani baghe mubathwamu erighenda okwa yunivasite n’abandi bamaghenda omwa by’amahe. Aliwe ingye isindi lengekanaya okwa by’amahe kundi isinganzire eby’erikakalhukana n’abandu, n’erilhwa. Munathwamu erighenda okwa yunivasite nuku singaye omwa by’amahe. Aliwe omwa muthima inganzire eriwathikya  abandi, iningalengekanaya indi ekyo kikendi leka ingathunga engebe eyiwithe ekighendererwa.

Okwa yunivasite, munanza erisomo erihambire okwa mibere y’abandu, kundi inganzire eriminya enzuko y’engebe. Muthweghesibwa omwatsi w’ebindu eriyibuthukira kandi abakathusomesaya ibakalengekanaya bathi thukendi kwama ky’eribiligha. Aliwe okw’ingye erindi soborera isiririyitheghereribawa kandi irikayithagha erikwama kyaligha kitura muthwe, ekindu ekihukene n’emikangirirye y’esayansi.

Omwa byathwabya thukasoma isithulikangiriribawa eby’esyongeso. Omwakanya k’ekyo, omuwathu iniakahirawa okwa bya thwangakolha erithoka erilhaba ndeke ebizamu. Eribya n’abanywani baghe okw’iyitsemesya n’erinywa ebibatsi ebikathamiraya ikikanyirethera etseme, aliwe isiyiri malha. Munayibulya, ‘Kwenene eyi nina ngebe eyiwithe ekighendererwa?’

Ebyo bine aho, munahumira omwa tawuni ye Boston n’erihandikwa okwa yunivasite y’eyo. Eriyibanira efizi ingawithe omubiiri ogho nabya ingakolha omwa kihumuru eyo nabana Abema ba Yehova omurundi w’erimbere. Oyo thwabya thukakolha nayu mwanyikanirya okwa buminyereri bwe “mighulhu irinda” obuli omu Danieli sura 4 n’erinyisoborera ngoku thuli omwa buthuku bw’enduli. (Dan. 4:13-17) Munalhuaho inaminya ngoku namalholha embere n’ebya thukakanayako ebi n’eribighenderako, iningendi hindulha engebe yaghe. Neryo munakolha ekyosi-kyosi erimuyihighulhako.

Okwa yunivasite, munasoma ebyanga nyithegheka erikolha emibiiri ey’eriwathikya omwa South America. Iningalengekanaya nyithi eriwathikya abandi kyangalekire ingabya n’engebe eyiwithe ekighendererwa. Aliwe munongera eribulha nga nangabana indi engebe eyiwithe ekighendererwa. Munayiponera neryo munakya okwa by’eyunivasite etamu yikahwa.

Omwa Kwakathano 1970, munahumira e Amsterdam, omwa Netherlands, eriyakolera omwa kampuni eya thatha waghe aby’akakoleramo. Busana n’omubiiri oyu, munathoka erighenda omwa bihugho bingyi e Afirika, e Americas, Europe, n’omwa Far East. Omwa buli kihugho ekyo nahikamo, munalhuaho inalhangira ngoku abosi bawithe ebitsibu kandi ngoku sihali oyuwanga bighunzaho. Ingakinanzire eriberererya ekindu kikulhu omwa ngebe yaghe, munathwamu erisuba e United States n’erithasyayasomera okwa yunivasite eyo nabyako e Boston.

Aliwe ingane okwa sukuru, munalhuaho ingaminya ngoku sindinabana eby’erisubirya okwa bibulyo byaghe ebihambire okwa ngebe. Omw’iyibulha-bulha, munasaba omuprofesa waghe y’amenge. Mwanyiswekya akabugha athi: “Busana naki wukinasoma? Habwaki iwuthabikyako?” Mwabugha ebyo bisa. Neryo munakya okwa by’eyunivasite.

Aliwe kandi nabya isindi nabana ekighendererwa omwa ngebe, neryo munathwamu eringira omwa gurupu y’abakaghana emirwa y’abandu aliwe ibabya ng’abakahiraho obuholho n’olhwanzo. Ingye n’abanywani baghe balebe muthwalhua e United States thwamaghenda e Acapulco, Mexico. Muthwayikalha n’abandu ababya omo ngebe eya mafu-mafu. Aliwe erikalha nabu, munalhuaho inalhangira ngoku engebe yabu siyiwithe kighendererwa kutse siyiriletha etseme eya kera na kera. Omwakanya  k’ekyo, munalhangira isibali mw’okwenene n’obuyisiwa.

Okwa buthuku obo, munatsuka erilengekania okwa kya nabya nganzire erisyakolha. Nabya nganzire eby’amathu butsira ng’oyukaghendayagho, aliwe ng’omukulhu. Enzira nguma eyo nangakolere mw’eki lyabya iry’eribya n’obwaghe-bwaghe. Kundi munywani waghe Tom aby’awithe ekilhubirirwa ekiri ng’ekyo, muthwathwamu erithimba haghuma omwa kihugho omo bwathu. Munanza eribana ekizinga ekiri ng’eparadiso eyo ngendibya bwiranda okwa bilhaghiro by’abandu.

Ingye na Tom muthwaghenda e Arenys de Mar, hakuhi ne Barcelona, e Spain. Eyo muthwaghulha obwathu obw’esyofuti 31 (esyomita 9.4) obukahulhawamo Llygra. Muthwatsuka eribukokothya nuku buthoke erikolera ndeke okwa ngetse. Kundi sithwabya thukaharabanira erihika eyo thukaya, muthwihamo e ingyini n’erikolesya omwanya oyo eribika mw’amaghetse w’erinywa. Erithoka erighendya obwathu bwethu erihika okwa myalu mike-mike, muthwaghulha esyongahya ibiri esy’obuli bw’esyofuti 16 (esyomita 5). Erighunzerera, muthwaghenda erihika e Seychelles, omwa Indian Ocean. Thwabya thuwithe epulani y’erihika okwa musike w’ebulengera lyuba bwe Afirika n’omwa Cape of Good Hope, e South Africa. Erihika eyo thukaya muthwakolesya esyongununu, esyomapu, n’ehindi hyuma ehikathusondolha. Munasweka thukaminya eyonyine-nyine eyo thukaya.

Buthuku buke, muthwaminya ngoku obwathu bwethu si buli ndeke. Obuli saha ibukingiraya amaghetse aw’ingene n’esyolita 22! Ngoku kinakanganibwe okw’itsuka, ekihunga kyabere kyahitha munakwa obuba n’erisaba omurundi waghe w’erimbere, erilhaghanisya Nyamuhanga indi thwamalhama iningendi lengaho erimuminya. Ekihunga mukyaleka, kandi munaberererya eriyilhagha lyaghe.

Munatsuka erisoma e Biblia ingane okwa ngetse. Thathera akasasani iwune omwa Ngetse Mediterane mo haali, iwune mulhangira esiswe muthina-muthina n’ekyakakalha ky’amalengetsa kalhukwe-lhukwe. Omwa kiro, iningatsema ingalhangira e Milky Way galaxy kandi munongera erikakasya ngoku hane Nyamuhanga oyutsomene abandu.

Mayenga malebe ithune okwa ngetse, muthwahika okwa mwalu we Alicante, e Spain, eyo thwahira obwathu bwethu bw’okwa kathali nuku thughule obuwene. Sikiriswekaya eribya imukyakalha eribana oyukaghulha obwathu obukulire, obuthe mwe ingyini, kandi obuthobokire! Okwa lhundi lhuhandi, mubwanyibera buthuku obuwene obw’erisomeramo e Biblia yaghe.

Nabere n’ongera erisoma e Biblia, munongera erilhangira ku ni kitabu ekyanga thuwathikya omwa ngebe. Munatsemera emyatsi ye Biblia eyilhangirikire eyihambire okwa by’esyongeso n’engebe eyihenirye, kandi munabulha ekikaleka abandu bangyi​—naghe imwangane—​ithwayahulhamo Bakristayo kandi isithuli ghendera okwa ebya yikabugha.

Munathwamu erikolha esyombinduka nene-nene omwa ngebe yaghe, neryo munaleka erikolesya nabi ebibatsi ebikathamiraya. Munalengekania indi hatholere ihabya ihane abandu abakaghendera okwa bihano bye Biblia eby’esyongeso kandi munanza ngababane. Omurundi waghe wakabiri erisaba, munasaba Nyamuhanga indi angwathikaye ngababane.

Okw’ingye, munalhangira ikitholere erilebya obuli dini eribana ey’okwenene. Nabere nganemulhaba omwa tawuni ye Alicante, munalhangira amakanisa mangyi. Aliwe kundi awosi abya kw’esyosanamu, mukyanyolhobera eriminya ngoku awire.

Kyasande kighuma omw’ithungyi, ingane okwa kathwe inganasamalire omwalu, munasoma Yakobo 2:1-5, ahakathanga akasolholho. Omwa nzira ingasuba eyiri obwathu bwethu, munalhaba okwa mwanya ow’akalhangirika nga ni w’eriramiryamo okwa bwingiriro ikune akapa: “Kingdom Hall of Jehovah’s Witnesses.”

Munayibwira indi, ‘Ngatholere ingalengesya abandu aba. Ngendi lebya nga bakendi nyangirira bathi.’ Neryo muningira omwa Kisenge ky’Obwami inganalyathire ahisi, ingane kw’ebireru, kandi inganambere ejini eyitamangukire. Omuthangiriri mwanyithwalha okwa kithumbi ekiri kw’omukekulhu oyo omwa lhukeri mwanyiwathikya eribana amasako embuyi yikabughagho. Emihindano yabere yikahwa, munasweka ingalhangira eritsomana ly’abosi abasa nyiramukaya. Omulhume mughuma mwanyikokya ewiwe eriyakanirania okwa Biblia, aliwe kundi nabya isindi naghunza erisomayo, munamubwira indi, “Wuleke ngendi kubwira nabiriyithegheka.” Ebyo bine aho, munatsuka erihindana okwa mihindano eyosi.

Enyuma w’amayenga nga wayo, munaghenda ew’omulhume oyo kandi mwasubirya ebibulyo byaghe bye Biblia. Enyuma w’ewiki nguma, mwanyiha ekikapa ekyoswire mw’esyongyimba esyuwene. Mwanyibwira athi mwinye w’esyongyimba esyo ane omwa ngomo busana n’erighondera ekihano kye Biblia eky’erianzana n’erithend’ingira omwa mahe. (Isa. 2:4; Yn. 13:34, 35) Aho munakakasya ngoku namabiribana ekyo ngalhue ingasondya​—abandu abakaghendera ndeke okwa bihano bye Biblia eby’esyongeso ebilhangirikire! Ekilhubirirwa kyaghe kyabya isikikiri ky’erisondya ekizinga ekiri ng’eparadiso aliwe erigha e Biblia ya buuli. Neryo munasuba e Netherlands.

Munaghunza biro bbini inganemughenda erihika omwa tawuni ye Groningen, e Netherlands. Eyo munayithagha eribana omubiiri ow’anganyisighika. Munasaba omubiiri aho bakarandira halebe aho bamba efomu, eyabya kw’ekibulyo nga ngali w’ediniki. Munahandika indi, “Mwema wa Yehova.” Omwinye mubiiri abere asoma ekyo, munalhangira ngoku obusu bwiwe bwamahinduka. Mwabugha athi, “Ngendi kubirikira.” Aliwe mwathakolha ekyo.

Ahandi aho bakarandira, munabulya mwinyeho ng’angananyiha mubiiri. Mwanyisaba ebipapura byaghe by’esukuru n’ebikanyikanayako.  Munamusoborera indi nganakolire okwa by’erisuba-subania amathu w’emithi. Ekyanyiswekaya, mwabugha athi, “Wangana tsuka erikolha erithungyi lya munabwire, aliwe hali kindu kighuma. Singanzire wukanyilethera ebitsibu aha waghe hano kundi ngali Mwema wa Yehova kandi ngaghendera okwa misingyi ye Biblia.” Inganaswekire munamusamalira n’eribugha indi, “Naghe ngali Mwema!” Ahathe erithika-thika, busana n’esyonzwiri syaghe nyiri n’ebireru, mwabugha athi, “Kwesi, ngendi kw’eghesya e Biblia!” Inganatsemire munaligha ekyo. Neryo munaminya ekyaleka omwinye mubiiri ow’erimbere iniathambirikira. Yehova abya iniali kusubirya erisaba lyaghe. (Esy. 37:4) Munakolera omwa by’oburande bya mughalha wethu oyo habw’omwaka mughuma. Okwa buthuku obo, mwanyeghesya e Biblia, n’enyuma waho munabatizibwa omo Kwokubanza 1974.

Enyuma w’okwezi, munatsuka omubiiri muhyaka​—obutemburi—​obwabirinyirethera etseme. Okwezi okwakwamako, munahumira e Amsterdam eriyasighika egurupu mbyaka ey’Olhuspanish. Bwabya butseme bunene eryeghesya abigha omwa Lhuspanish n’omwa Lhupotigwizi! Omo Kwakathano 1975, munabana olhusunzo lhw’erikolha ng’omutemburi w’embaghane.

Kiro kighuma, mwali wethu omutemburi w’embaghane oyukahulhawamo Ineke mwasa omwa kithunga kyethu ky’Olhuspanish erisyathukangya omwigha wiwe we Biblia owe Bolivia. Ingye na Ineke muthwathwamu eriminyana omw’ihandikirana esyobbaruha, buthuku buke enyuma waho, muthwaminya ku thuwithe ebilhubirirwa bighumerere. Muthwathahania 1976 kandi muthwalholha embere erikolha ng’abatemburi b’embaghane erihika 1982 omughulhu thwakokibawa okwa sukuru ye Gilead eya 73. Muthwasweka n’eritsema thukathumwa omwa East Africa e Mombasa, Kenya, eyo thwakolera habw’emyaka ithano! Omwa 1987, muthwathumwa e Tanzania, eyo omubiiri wethu w’erithulira abya isyakiri kw’olhukako. Muthwaghunzayo emyaka 26 thuthe thwasuba e Kenya.

Eriwathikya abandu abakasima erigha e Biblia kyabirithuha engebe eyiwithe ekighendererwa. Ng’eky’erileberyako, omwigha waghe w’erimbere e Mombasa abya mulhume oyo nabana ingathulira ahakabya abandu bangyi. Nabere nabirimuha esyogazeti ibiri, mwabugha athi, “Ngendibya nabirighunza esi, ingathasya kolhaki?” Ewiki eyakwamako muthwatsuka erigha nayu ekitabu You Can Live Forever in Paradise on Earth, ekyabya imukyamahulhuka omwa Lhuswahili. Enyuma w’omwaka mughuma mwabatizibwa n’eribya mutemburi w’omughulhu wosi. Eritsuka naho, iyo na mukali wiwe babiriwathikya abandu hakuhi 100 eriyihayo n’eribatizibwa.

Nabere ingatsuka eriyitheghererya ekighendererwa ky’engebe, munayowa ng’omuthundi oyuwabana elulu y’obughuli kandi mwathanza eriheryayo. (Mt. 13:45, 46) Munanza erikolesya engebe yaghe eriwathikya abandi eribana engebe eyiwithe ekighendererwa. Ingane na mukali waghe mwanze, nabiriyilhangirira ngoku Yehova akatsumulha abandu biwe eribya n’engebe eyiwithe ekighendererwa.