Lau na laḡani 1948 Netherlands ai na vara. Murina laḡanina ai, egu ruma bese ida São Paulo, Brazil ala. Tamagu bona sinagu na hanaihanai dubu e laova bona nega momo aniani muridiai Baibul a duahia hebouva. Laḡani 1959 ai, United States ala bona Massachusetts ai a nohova.

Tamagu na e ḡaukara goadava ai iboumai 8 baine narimai. Iena ḡaukara na idauidau, heḡereḡere traveling salesman, dala ihanamona ḡaukara e karaiava, bona international airline ta ai e ḡaukarava. Airline ai e ḡaukarava neganai, ai na a moale badina gabu idauidau baiala diba.

Haiskul nala neganai, nega momo na lalova, ‘Egu mauri ai lau be dahaka baina kara?’ Turagu haida na e abi hidi iunivesiti ela bona haida be ami ai e vareai. To lau na asina ura ami ai baina vareai badina asina urava baina heatu bona baina tuari. Una dainai, iunivesiti ala, to na ura dikadikava taunimanima baina durudia badina na lalova una ese egu mauri baine hanamoa.

Iunivesiti ai, lau na taunimanima edia mauri dalana (anthropology) na stadilaiava, badina na urava mauri e matama dalana baina dibaia. Ai na evolution e hadibamaiva bona teacher na e urava una hereva na baia abia dae. To na daradarava, badina e herevalaiva ḡaudia na asi ihamomokanidia.

Na laova klasidiai maoro bona kerere edia idau na asie hadibamai namonamova. To, iunivesiti ai baia kwalimu daladia mo e hadibamaiva. Turagu ida na pativa bona drag na aniva neganai, na moaleva to una moale na se mia daudauva. Na lalo, ‘Ina be mauri namona, eiava?’

Gabeai, Boston nala bona unuseniai iunivesiti ta ai na skuliva. Egu skul davana ihenina totona, skul holidei negadiai moni ḡaukara na karava, bona ḡaukara gabunai Iehova ena Witnes ta na hedavari henia. Ia ese Daniel karoa 4 ai “laḡani hitu” peroveta herevana e herevalaia bona e gwa ita na nega dokonai ta nohomu. (Dan. 4:13-17) Na laloparara bema ia ida Baibul baia herevalaia louloumu bona ba dibamu ḡaudia ba abi daemu, egu mauri na ba haidaua dibamu. Una dainai, dala na tahuva basina hereva henia totona.

Iunivesiti ai, lau na kosi haida na karava, unu ese e haheḡaeḡaegu South America ai volantia ḡaukara baina karaia totona. Na lalo taunimanima baina kara namo henidia bona baina durudia neganai, egu mauri na ba moalelaiamu. To, dounu egu mauri na asina moalelaiava. Una dainai, sikuli na da asina laova.

May 1970 ai Amsterdam nala, Netherlands ai, guna tamagu e ḡaukarava airline kampanina ai baina ḡaukara totona. Una ḡaukara dainai gabu momo bainala diba, heḡereḡere Africa, America, Europe, bona Asia. Ena be tano idauidau na laova, to na laloparara unuseniai hekwakwanai badadia danu e varava, bona ta na dia heḡereḡere unu baine hamaoromaorodia. Na urava mauri namona baina davaria dainai, na lou United States bona Boston iunivesiti ai ma na skuli lou.

To, na laloparara iunivesiti ai egu henanadai badadia haeredia na asina davariva. Asi dibagu dahaka baina kara, una dainai profesa ta na nanadaia. To na hoa badina una profesa na e gwa: “Dahaka dainai doini o skulimu? Skuli ba rakatania hari namo.” Ena hereva heḡereḡerena, iunivesiti na rakatania.

Na mamiava egu mauri na asi anina, una dainai orea maraḡina ta ai na vareai, una orea na e urava maino bona lalokau bae havaraia. Lau bona turagu haida United States amo Mexico ena siti, Acapulco ala. Ai na taunimanima haida ida a nohova, idia na taravatu e dadaraiva bona vaitani edia mauri na asie lalohekwarahilaiava. To idia ida a nohova neganai, na itaia edia mauri na dia namo bona asie moaleva. Idia momo na koikoi karadia e kavara.

Una neganai, maraḡigu ai na urava baina karaia ḡauna ta na laloa. Lau na na urava kapten ta ai bainala bona bouti amo baina loa. Unu baina kara toma totona, bouti ta baina abia na namo.  Turagu Tom ena ura danu unu bamona, una dainai taumai raruosi bouti amo a loaloava. Egu ura na motumotu mai hairaina ta baina ala, unu amo egu hekwakwanai iboudiai baina laloboio.

Lau bona Tom na Arenys de Mar ala, una na Barcelona, Spain badinai. Unuseniai ai ese bouti ta ladana Llygra a hoia, ena lata na 9.4 mita. Ai ese palai e dogoataomu auna a haginia lou, unu amo bouti na davara ai baine heau namonamo diba. Ai na asia ḡavava baiala gabunai baia kau totona, una dainai bouti ena engine a kokia bona gabunai na inuinu ranudia a atodia. Ai na kalo rua a hoi edia lata na 5 mita, unu amo wofu maraḡidiai baia kalo vareai diba. Emai laolao ginigunana na Seychelles, Indian Ocean ala. Emai plen na Africa ena west kahanai kone hanuadia bona South Africa kahanai Cape of Good Hope baiala. Ai na hisiu a badinadiava, mapu, buka bona ḡau ma haida a ḡaukaralaiva, unu amo gabu maorodia baiala. Lau na na hoa badina unu ese e durumaiva baia lao heni gabudiai a davariva.

To gabeai, a diba emai bouti na dia heḡereḡere davara ai baine heau. Hora ta ta ai ranu 22 lita heḡereḡerena na bouti ai e vareaiva! Matamanai name herevalaia heḡereḡerena, lai badana ta e toa dainai na gari bona egu nega ginigunana na ḡuriḡuri. Dirava na gwauhamata henia, bema baina mauri, lau na dala baina tahu Ia baina dibaia. Lai e doko, bona lau ese egu gwauhamata na na badinaia.

Bouti amo dounu a laova neganai, lau ese Baibul na duahia matama. Mani a laloa, lau na bouti ai helai bona Mediterranean Davarana bogaraḡinai, gwarume e roho isi roho isiva, dolfin, bona davara kahana kahana na itadiava. Hanuaboi ai, hisiu momo herea na itadia bona na diba momokani Dirava na e nohomu bona ia ese taunimanima na e lalodia badamu.

Wiki haida muridiai, ai na Spain ai Alicante ena wofu ai a kau, unuseniai a ura emai bouti baia hoihoilaia unu amo matamatana ta baia hoia. Emai bouti na gunana, asi ena engine, bona mai matuna dainai, ta ese se hoiava! To, una na nega namona egu Baibul baina duahia.

Baibul na duahi loulouva dainai, na itaia una buka ese baine duruda diba mauri namona baita moalelaia. Na moalelaia ḡauna ta na, Baibul ese kara maoromaoro ibadinana karana na e herevalaia ḡoevaḡoeva. Bona na lalova, dahaka dainai taunimanima momo, lau danu, na a gwaumu ai na Kristen taumai, to Baibul ena hereva na asia badinaiamu.

Lalogu na hadaia egu mauri baina haidaua, una dainai drag iḡaukaralaina karana na hadokoa. Na lalo reana taunimanima haida ese Baibul ena kara maoromaoro taravatudia na e badinamu, bona na ura idia baina hedavari henidia. Bona egu nega iharuana na ḡuriḡuri, Dirava na noia baine durugu idia baina davaridia.

Na lalo dala namona ta na, tomadiho ta ta baina lao henidia ela bona tomadiho momokanina baina davaria. Alicante hanuanai na loaloava neganai, dubu momo na itadia. To, unu dubu momo ai kaivakuku e ḡaukaralaiva dainai, na diba unu na dia tomadiho momokanina.

 Sunday adorahi ta ai, lau na ororo ta ai helai bona wofu kahana na itaiava, una negai Iakobo 2:1-5 na duahia, una siri ai na e gwa dia namo taḡa taudia mo baita ura henida. Bouti na lou laova lalonai, tomadiho gabuna ta na itaia bona vareai gabunai na ina lada e hetore: “Kingdom Hall of Jehovah’s Witnesses.”

Na lalo, ‘Mani baina una dubu. Idia ese lau be ede be kara henigu tomamu.’ Una dainai Kingdom Hall ai na vareai neganai, lau na asi tamakagu, aukigu huina na lata, bona jeans hedarena na karaia. Attendant ta ese e hakaugu lao bena hahine burukana ta badina na helai, ia ese e duruguva tok heni tauna ese e gwauraiva siridia na Baibul ai baina davari. Hebou murinai, na hoa badina momo na e maiva lau e hedavari heniguva. Tau ta ese e boirigu ena ruma ai Baibul baia herevahereva, to Baibul na do asina duahia ore dainai, na hamaoroa, “Baina heḡaeḡae neganai baina hadibamu.” Una nega amo, lau na hebou iboudiai na laova.

Wiki haida muridiai, una tau ena ruma nala bona ia ese egu henanadai iboudiai na Baibul e haerelai. Wiki ta murinai, ia ese baege ta e henigu, una baege na dabua namodia amo e honu. Ia ese e hamaorogu unu dabua biaguna na dibura ai, badina Baibul ena haheḡani, ba helalokau heheni bona basio tuari karana e badinaia. (Isa. 2:4; Ioa. 13:34, 35) Una neganai na diba momokani, lau ese Baibul ena kara maoromaoro taravatudia e badinamu taudia vada na davaridia! Lau baina karaia ḡauna na, dia motumotu hairaina ta baina tahua, to Baibul baina stadilaia namonamo. Una dainai Netherlands na lou lao.

Dina 4 muridiai, Netherlands ena siti, Groningen ai na kau. Unuseniai baina ḡaukara na namo egu dabu ḡaudia baina abi totona. Kapenta stoana ta ai ḡaukara totona na noinoi neganai, fom ta e henigu, una fom ai na henanadai idauidau, idia ta na tomadiho e henanadailaia. Egu fom ai na ini na torea toma, “Iehova ena Witnes.” Stoa biaguna ese una e duahia neganai, na itaia toana na e idau. E gwa, “Baina rini henimu.” To se rini.

Kapenta stoana ma ta ai, stoa biaguna na nanadaia bema heduru e uramu baina durua diba. Ia ese egu skul diploma bona guna na ḡaukara pepadia haida e henanadailai. Na hamaoroa lau na bouti gunana ta ihanamo louna ḡaukarana na karaia. Na hoa, badina ia na e gwa, “Hari  adorahi ba ḡaukara diba, to ḡau tamona na ina, lau na asina uramu egu stoa ai hekwakwanai ba havara, badina lau na Iehova ena Witnes ta bona Baibul ena hahekau herevadia na badinamu.” Na hoa bena na gwa, “Lau danu!” Huigu bona aukigu huidia na lalata dainai, e diba lau na do dia Witnes tauna. E gwa, “Bema unu bamona Baibul amo baina stadi henimu!” Mai moalegu ida una na abia dae. Na diba dahaka dainai una stoa ginigunana biaguna ese se rini henigu lou. Iehova ese egu ḡuriḡuri na e haerelaidiava. (Sal. 37:4) Laḡani ta lalonai una tadikaka ena stoa ai na ḡaukara. Una negai, ia ida Baibul a stadilaia, bena January 1974 ai na bapatiso.

Hua ta murinai, painia ḡaukara na hamatamaia, una ese e hamoalegu bada. Gabe huana ai, Amsterdam nala, Spanish gado grup matamatana baina durua totona. Spanish bona Portuguese gadodia ai Baibul stadi na karava dainai, na moale! May 1975 ai, spesol painia ḡaukara na karaia matama.

Dina ta, spesol painia taihu ta ladana Ineke na e stadi heniava Bolivia hahinena e mailaia emai Spanish hebouna ai. Lau bona Ineke na revareva ai a hetore heheniva, bona gabeai a laloparara hesiai ḡaukara ai a urava baia kara ḡaudia na heheḡereḡere. Laḡani 1976 ai a headava bona dounu spesol painia ḡaukara a karaiava ela bona laḡani 1982 ai, e boirimai Gilead skul ena klas namba 73 ala. Ai na a moale badina East Africa e siaimai lao, unuseniai Mombasa, Kenya ai, laḡani 5 hesiai ḡaukara a karaia! Laḡani 1987 ai, e siaimai Tanzania ala, unuseniai haroro ḡaukara taravatuna na e kokia. Unuseniai laḡani 26 a noho bena gabeai Kenya ma a lou lao.

Manau taudia a durudia Baibul ena hereva momokani e dibaia neganai, ai na a moale bada. Heḡereḡere, Mombasa ai egu Baibul stiuden ginigunana na pablik haroro ai na davaria. Magasin rua na henia murinai, ia na e gwa, “Bema ini baina duahi ore murinai, lau be dahaka ma baina kara?” Wiki ta murinai, ai ese Swahili gado ai e halasia buka matamana, You Can Live Forever in Paradise on Earth, amo stadi a hamatamaia. Laḡani ta murinai, ia na e bapatiso bona regula painia ḡaukarana e karaiava. Una nega amo, ia bona adavana ese taunimanima 100 heḡereḡerena e durudia Iehova enai edia mauri e gwauhamatalaia bona e bapatiso.

Mauri anina korikorina na lalopararalaia neganai, na mamia lau na hoihoi tauna heḡereḡerena, ia ese dava bada pearl e davaria neganai se ura baine hoihoilaia. (Mat. 13:45, 46) Na ura egu mauri ibounai lalonai ma haida baina durudia mauri anina korikorina bae dibaia. Lau bona adavagu lalokauna na a itaia, Iehova ese ena taunimanima e durudia mauri anina korikorina bae dibaia.