Tumbu ndraʼo ba Belanda me döfi 1948. Döfi aefa daʼö, findra nösi nomogu ba São Paulo, Brasil. Owölö-ölö sibai ndra satuagu weʼamöi ba gereja ba asese fao ndraʼaga wombaso Sura Niʼamoniʼö na no aefa manga ndraʼaga ba zi bongi. Me döfi 1959, findra ndraʼaga ba Amerika Serikat ba toröiga ba Massachusetts.

So datölu gaʼagu ba darua nakhigu. Iforege wohalöwö bapagu ba wombönökhi soguna khöma. No irai tobali ia sogale si möi ba mbanua si faböʼö-böʼö, sohalöwö ba wamazökhi lala, ba mohalöwö ia ba gafuriata ba zi sambua perusahaan penerbangan internasional. Omuso sibai dödöma me mohalöwö ia ba perusahaan andrö börö me tola asese möiga manörö-nörö.

Me SMA ndraʼodo, asese uʼangeragö waʼaurigu ba zi so miföna. So ösa ndra awögu si möi kuliah ba so göi zi tobali saradadu. Hizaʼi, lö adöni dödögu tobali saradadu börö me lö omasido fakara, mendrua manö faʼudu. Börö daʼö, uhalö gangetula weʼamöi kuliah enaʼö lö moguna tobali ndraʼo saradadu. Hizaʼi bakha ba dödögu, omasido utolo niha böʼö. Uwaʼö tödögu wa tola itugu moʼeluaha waʼaurigu na ufalua zimane daʼö.

Ba universitas, adöni dödögu ba mata kuliah antropologi, börö me omasido uʼila hezo moroi waʼaurida andre. Lafahaʼö ndraʼaga sanandrösa ba evolusi ba omasi ndra dosen na mafaduhusi tödö wamahaʼö andrö. Hizaʼi ba wamaigigu, so ösa nitutunö sanandrösa ba evolusi si lö ikhamö fangera-ngeragu, ba lö teʼodane-dane ia ba dandra si tola mufaduhusi tödö.

Ba ngawalö kelas niʼondrasigu, lö lafahaʼö ndraʼaga sanandrösa ba zatulö hegöi si lö atulö. Lafarou ndraʼaga enaʼö maforege wanöndra nilai si baga ba universitas. Me owulo ndraʼo khö ndra awö-awögu ba utandraigö wangogunaʼö ngawalö narkoba, so khögu waʼomuso dödö. Hizaʼi, lö arara urasoi daʼö. Ibörögö manofu dödögu hadia zindruhunia geluaha waʼaurigu andre.

Ba gafuriata, findra ndraʼo ba Boston, ba ufasuraʼö döigu ba zi sambua universitas si so ba daʼö. Enaʼö tola ubönökhi zoguna khögu ba kuliah, ulau mohalöwö ba ginötö libur ndraʼaga. Ba nahia wohalöwögu, falukha ndraʼo khö zi samösa Samaduhuʼö Yehowa. Yaʼia andrö awögu wohalöwö, ba itutunö khögu wamaʼeleʼö nisura ba Danieli faza 4 sanandrösa ba zi ”fitu götö”. Iʼombakhaʼö göi khögu wa no so ita iadaʼa ba ngaluo safuria. (Dan. 4:13-17, nis) Aboto ba dödögu wa moguna ubulöʼö lala waʼaurigu na lö tebulö fahuhuo ndraʼo khönia ba ufaduhusi tödö hadia zi no urongo. Börö daʼö, uforege enaʼö lö fahuhuo ia khögu.

Ba universitas, uʼondrasi ngawalö kelas samaʼanö yaʼo tobali relawan ba Amerika Selatan. Uwaʼö tödögu wa tola itugu moʼeluaha waʼaurigu na fao ndraʼo ba wameʼe bantuan kemanusiaan. Hizaʼi, awena aboto ba dödögu ba gafuriata wa lö itugu moʼeluaha waʼaurigu hewaʼae na no ufalua daʼö. Afatö sibai dödögu. Börö daʼö, uböhöli kuliah ba gangohorita semester daʼö.

Me baŵa si Lima 1970, findra ndraʼo ba Amsterdam, Belanda, enaʼö tola mohalöwö ndraʼo ba perusahaan penerbangan si no irai tobali nahia wohalöwö bapagu mböröta. Börö halöwögu andrö, tola asese möido ba ngawalö soi si so ba Afrika, Amerika, Asia, hegöi Eropa. Ba ngawalö soi niʼondrasigu andrö, aboto ba dödögu wa hasambalö so gabula dödö sebua nitaögö niha fefu ba lö hadöi si tola mangasiwai yaʼia. Omasido enaʼö moʼeluaha waʼaurigu. Börö daʼö, ufulido ba Amerika Serikat ba ufasuraʼö zui döigu ba universitas si so ba Boston.

Hizaʼi, lö ara aefa daʼö, aboto ba dödögu wa tebai usöndra wanema li moroi ba wanofu-nofugu sanandrösa ba waʼauri ba ngawalö kelas niʼondrasigu ba universitas. Lö saʼae uʼila hadia zinangea ufalua. Börö daʼö, uʼandrö mene-mene khö dosen samahaʼö yaʼo ba antropologi. Tokeado sibai me imane khögu, ”Hana wa ötohugö nasa kuliahmö? Abölö sökhi na öböhöli manö.” Iʼanemaiʼö fao dödögu ba mene-menenia andrö. Uböhöli kuliah ba lö irai ufulido saʼae.

Börö me urasoi wa lö moʼeluaha waʼaurigu, fao ndraʼo ba zi sambua ngawawa si lö omasi mamalua goi-goi si toʼölö lafalua niha. Omasi niha si farahu ba ngawawa andrö ba wangaʼasogö faʼatulö hegöi faʼomasi. Fao ndraʼo khö ndra awögu wofanö moroi ba Amerika Serikat numalö ba Acapulco, Meksiko. Toröi ndraʼaga ba nahia ndra niha hippie, ba hulö lö hadöi abula dödö ba waʼaurira. Hizaʼi, sagötö toröi ndraʼo ba daʼö, aboto ba dödögu wa lö moʼeluaha lala waʼaurira ba tenga sindruhu-ndruhu larasoi waʼomuso dödö. Sindruhunia, ato ba gotaluara zasese si falimo ba si faröi.

Me iraono nasa ndraʼo, omasido sibai weʼamöi moloyo. Hizaʼi, omasido tobali kafite göfa, tenga ono bua göfa. Me no ebua-bua ndraʼo, ibörögö uʼera-era wogamö ohitö dödögu andrö. Börö daʼö, moguna uʼöli khögu göfa loyo. Fagölö gohitö dödöma nawögu sotöi Tom. Andrö wa mahalö gangetula enaʼö fao ndraʼaga woloyo ba wamasui ulidanö. Omasido uʼalui sambua hulo si sökhi sibai enaʼö tola toröido ba daʼö irege lö moguna uʼoʼö gamakhoita niʼoʼö niha sato.

Fao ndraʼaga Tom weʼamöi ba Arenys de Mar, sahatö ba Barcelona, Spanyol. Ba daʼö, maʼöli sambua göfa nifotöi Llygra, mato 9 meter waʼanaunia. Ibörögö mafuli mahaogö göfa daʼö enaʼö tola maʼohe ia woloyo ba nasi. Börö me lö aösö-aösö ndraʼaga weʼamöi ba nahia si no matatugöi, maheta mesin si so bakha ba göfa andrö ba mabeʼe ba daʼö naha göma idanö. Enaʼö tola mafolombase göfa andrö ba pelabuhan side-ide, maʼöli dombua galukha si 5 meter faʼanau. Aefa daʼö, moloyo ndraʼaga numalö ba Seychelles, si so ba Samudra Hindia. Maʼera-era wangosisi singa nasi Afrika tanö ba gaekhula ba mafasui Tanjung Harapan, Afrika Selatan. Enaʼö lö elungu ndraʼaga, manehegö ndröfi si so ba dalu mbanua ba maʼogunaʼö peta ndröfi, buku fanuturu lala, hegöi fakake navigasi si öna-öna. Ahöli sibai dödögu börö me tola möi fanoloma fefu daʼö ba wangiʼila hezo gamaudu so ndraʼaga.

Lö ara me no ibörögö moloyo ndraʼaga, aboto ba dödöma wa tebai maʼohe göfa satua andrö woloyo ba nasi sebolo. Ero sambua za, so mato 22 liter nidanö si möi bakha ba göfa andrö. Simane si no ututunö no mege, ataʼu sibai ndraʼo me alua mbade, ba ibörögö mangandrö ndraʼo hewaʼae na lö irai ufalua daʼö ba zi hauga fakhe faʼara. Ufabuʼu khö Lowalangi wa hasambalö uforege enaʼö aboto ba dödögu haniha ia na teʼorifi ndraʼaga. Ba gafuriata, tebato mbade andrö ba ufalua hadia zi no ufabuʼu.

Me ba dalu nasi so ndraʼaga, ibörögö ubaso Zura Niʼamoniʼö. Khalaigö waʼomuso dödö nirasoigu me so ndraʼo ba dalu Nasi Mediterania ba so ba zi fasuigu damo nasi, lumba-lumba, hegöi ola gotalua dalu mbanua awö nasi sebolo sibai. Ba zi bongi, ahöli dödögu wamaigi döfi soya sibai ba dalu mbanua. Itugu faduhu dödögu wa so Lowalangi soʼameʼegö tödö niha gulidanö.

Me no moloyo ndraʼaga ba zi hauga migu, mafolombase göfama ba Alicante, Spanyol. Ba daʼö, maforege ba wamawa köfama andrö enaʼö tola maʼöli göfa sabölö baga. Simane si no matahö, abua sibai wangalui niha somasi mowöli köfa daʼö börö me no atua, no aboto, ba lö hadöi mesin. Hizaʼi, so ginötögu wombaso Sura Niʼamoniʼö.

Itugu ubaso Zura Niʼamoniʼö, itugu aboto ba dödögu wa so ba daʼö goi-goi si tola manolo yaʼita ba wanöndra faʼomuso dödö. Ahöli dödögu ba mene-mene Zura Niʼamoniʼö sanandrösa ba wangamoniʼö boto hegöi amuata. Ba manofu-nofu dödögu hana wa ato niha sangotöigö niha Keriso simane yaʼo si lö moloʼö hadia niwaʼö Zura Niʼamoniʼö.

Uhalö gangetula ba wombulöʼö faʼaurigu. Börö daʼö, uböhöli wangogunaʼö narkoba. Faduhu dödögu wa so niha soloʼö goi-goi Zura Niʼamoniʼö, ba omasido falukha khöra. Daʼö mbörö wa ulau mangandrö khö Lowalangi ba zi mendrua kali, ba uʼandrö khönia enaʼö itolo ndraʼo ba wanöndra yaʼira.

Uwaʼö tödögu wa moguna ufareso ero sambu-sambua agama enaʼö tola usöndra agama satulö.  Me manörö-nörö ndraʼo ba Alicante, oya sibai nahia wamosumange niʼilagu. Hizaʼi, so nadu ba nahia wamosumange andrö. Börö daʼö, aboto ba dödögu wa tenga daʼö agama satulö.

Samuza inötö me ngaluo Migu, modadao ndraʼo ba gahe hili sangotahögö pelabuhan. Ubaso Yakobo 2:1-5, samangelama yaʼita enaʼö böi ha ba niha si kayo manö taforomaʼö waʼasökhi dödö. Me edönado ufulido ba göfama, uʼila sambua domosa si hulö nahia wamosumange. No tesura fönania: ”Nahia Gangowuloa Ndra Samaduhuʼö Yehowa.”

Möido ba nahia gangowuloa andrö enaʼö tola uʼila hewisa dania gamuatara khögu. Me möido ba daʼö, lö hadöi badagahegu, anau gambigu, ba ufake zarewa jeans si no agasika. So samösa petugas tata tertib samasao yaʼo wedadao ba ngai zi samösa talifusöda ira alawe si no alawa döfi. Itolo ndraʼo talifusöda andrö ba wamokai ayati nitötöi zamaʼema huhuo. Me no awai mufalua gangowuloa, tokea sibai ndraʼo börö me latemaʼö ndraʼo si fao faʼafahuwu. So samösa dalifusöda ira matua sogaoni yaʼo weʼamöi ba nomonia ba wanutunö ösi Zura Niʼamoniʼö. Hizaʼi, börö me lö nasa sahori ubaso Zura Niʼamoniʼö, umane khönia, ”Hasambalö ufatunö khöu na no tefaʼanö ndraʼo.” Iʼotarai daʼö, lö tebulö uʼondrasi gangowuloa.

Mato hauga migu aefa daʼö, uʼondrasi nomo dalifusöda andrö ba ahori ibeʼe wanema li moroi ba wanofu-nofugu sanandrösa ba Zura Niʼamoniʼö. Samigu aefa daʼö, ibeʼe khögu tasi ba oya sibai mbaru si baga ba daʼö. Ifatunö khögu wa no mubeʼe ba gurunga niha sangokhögö baru daʼö börö me iʼoʼö goroisa Zura Niʼamoniʼö enaʼö iʼomasiʼö niha böʼö ba lö ifahaʼö ia fasuwö. (Yes. 2:4; Yoh. 13:34, 35) Iadaʼa, faduhu dödögu wa no usöndra niʼalu-aluigu, yaʼia daʼö niha samalua goi-goi Zura Niʼamoniʼö sanandrösa ba gamuata. Ohitö dödögu tenga saʼae ba wangalui hulo si sökhi sibai, hizaʼi ba wondrouʼö faʼaboto ba dödö niʼokhögögu sanandrösa ba Zura Niʼamoniʼö. Börö daʼö, ufulido ba Belanda.

Öfa hari ndraʼo ba lala me möido ba mbanua Groningen, Belanda. Ba daʼö, moguna uʼalui halöwögu enaʼö tola ubönökhi zoguna khögu. Me uforege enaʼö latema ndraʼo wohalöwö ba zi sambua panglong, laʼandrö khögu ba wamoʼösi sambua formulir. Ba formulir daʼö, moguna uʼombakhaʼö hadia agamagu. Börö daʼö, usura: ”Samaduhuʼö Yehowa”. Me ibaso daʼö sokhö halöwö andrö, iʼanemaiʼö faböʼö zikhalania. Imane khögu, ”Ufatunö khöu dania.” Hizaʼi, lö irai ifalua daʼö.

Manofu ndraʼo khö zokhö panglong tanö böʼö hadia moguna khönia wanolo. Iʼandrö ijazahgu ba isofu hadia manö halöwö si no irai ufalua ba zilalö. Ufatunö khönia wa no irai ufuli uhaogö sambua  göfa si no tekiko. Imane khögu, ”Tola öbörögö wohalöwö ba zi laluo andre, hizaʼi so zinangea öʼoʼö. Moguna öhaogö-haogö gamuatamö sagötö mohalöwö ndraʼugö ba daʼa, börö me yaʼodo andre samösa Samaduhuʼö Yehowa ba uʼoʼö goi-goi Zura Niʼamoniʼö.” Tokea sibai ndraʼo me urongo daʼö, ba umane khönia, ”Samaduhuʼö Yehowa göi ndraʼo.” Börö me iʼila wa anau mbugu hegöi gambigu, aboto ba dödönia wa lö nasa si tobali ndraʼo Samaduhuʼö Yehowa. Börö daʼö, imane khögu, ”Na simanö, akha ufahaʼö ndraʼugö ba Zura Niʼamoniʼö.” Iʼanemaiʼö fao dödögu. Iadaʼa, aboto ba dödögu hana wa lö irai ikaoni ndraʼo wohalöwö sokhö panglong si oföna no mege. Sindruhunia, daʼö lala Yehowa ba wameʼe fanema li ba wangandrögu. (Si. 37:4) Mohalöwö ndraʼo ba nahia dalifusöda andrö ba zi döfi faʼara. Sagötö mohalöwö ndraʼo ba daʼö, ufahaʼö ndraʼo khönia ba Zura Niʼamoniʼö. Aefa daʼö, tebayagö ndraʼo idanö me baŵa si Sara 1974.

Sara waŵa aefa daʼö, ibörögö merintis ndraʼo ba urasoi waʼomuso dödö. Me no numalö zi sara waŵa andrö, findra ndraʼo ba Amsterdam ba wanolo kelompok sangogunaʼö li Spanyol sawena mufasindro ba daʼö. Omuso sibai dödögu börö me so ösa wamahaʼö ba Zura Niʼamoniʼö nidöniaʼögu ba li Spanyol hegöi Portugis. Me baŵa si Lima 1975, mufataro ndraʼo tobali perintis istimewa.

Samuza maʼökhö, so samösa perintis istimewa sotöi Ineke sangondrasi angowuloama. Omasi ia iʼohe niha nifahaʼönia ba Zura Niʼamoniʼö moroi ba Bolivia ba wamalukhaisi yaʼaga. Enaʼö itugu aboto ba dödöma nawöma, mahalö gangetula Ineke enaʼö faoma mafaʼoheʼö zura. Awena maʼila ba gafuriata wa fagölö gohitö dödöma ba wamati. Mangowalu ndraʼaga me döfi 1976, ba lö tebulö mangai halöwö ndraʼaga tobali perintis istimewa irugi döfi 1982. Ba ndröfi daʼö, lakaoni ndraʼaga wefao ba Sekolah Gilead kelas si 73. Omuso sibai dödöma ba tokea ndraʼaga me maʼila wa mufataro ndraʼaga ba Afrika Timur. Ba daʼö, lima fakhe mangai halöwö ndraʼaga ba Mombasa, Kenya! Me döfi 1987, mufataro ndraʼaga ba Tanzania. Ba soi daʼö, lö saʼae lasaisi halöwö fanuriaigö nifaluada. Mangai halöwö ndraʼaga ba daʼö ba zi 26 fakhe faʼara, aefa daʼö mafuliga ba Kenya.

Börö me tola matolo niha sangokhögö fangide-ngideʼö ba wamahaʼö yaʼira sanandrösa ba zindruhu moroi ba Zura Niʼamoniʼö, itugu moʼeluaha waʼaurima. Duma-dumania, me ufalua wanuriaigö ba nahia sato niha ba Mombasa, falukha ndraʼo khö zi samösa ira matua. Me no ubeʼe khönia dombua majalah, imane khögu, ”Na no awai ubaso majalah si dombua andre, hadia zinangea ufalua?” Samigu aefa daʼö, ibörögö mafahaʼö ndraʼaga ba mbuku Saudara Dapat Hidup Kekal dalam Firdaus di Bumi sawena murilis ba li Swahili. Yaʼia niha si oföna sibai ufahaʼö ba Zura Niʼamoniʼö ba Mombasa. Döfi aefa daʼö, tebayagö ia idanö ba mangai halöwö ia tobali perintis biasa. Iʼotarai daʼö, so arakhagö 100 niha nifahaʼönia hegöi foʼomonia si tebayagö idanö.

Me awena uʼila geluaha waʼaurigu andre, urasoi zimane nirasoi zogale soʼanöröi tanö misa, sanöndra mutiara sebua böli ba si lö omasi maniboʼö yaʼia. (Mat. 13:45, 46) Omasido uʼogunaʼö waʼaurigu andre ba wanolo niha böʼö enaʼö laʼila hadia zindruhunia geluaha waʼaurira. No marasoi samösa foʼomo niʼomasiʼögu wa sindruhu-ndruhu moʼeluaha waʼauri nibeʼe Yehowa ba nono mbanuania.