Newo nivyalikila ku Netherlands mu 1948. Chaka chokonkhapo, makolo ŵangu efulukila ku São Paulo, ku Brazil. Makolo ŵangu enze olipeleka ngako mu chipembezo chetenze, ndipo nchingulo mulimonse tikasilija kulya, tenzeŵelenga pamozi Baibolo monga banja. Mu 1959, tifumako ku Brazil noluta ku United States, ndipo tenzenkhala kudela ya Massachusetts.

Atata enzekata ntchito mwakhama kuti akosamalila banja yasu yamene yenze na ŵana 8. Ove enze ekatapo ntchito zosiyana-siyana monga yogulisa katundu, kukonza misewu komasoti yopanamila kampani iyakine ya ndeke pa nkhani zamalonda. Aliyense m’banja mwasu esangalala, atata pechifwana ntchito ku kampani yamene iyi ya ndeke chifukwa tenze na mwayi woyenda m’madela anyinji.

Penenze ku sekondale, nthawe zinyinji nenzelikonsha kuti, ‘Kansi nikazakula nikochita chinji?’ Ayakine mwa azishamwali ŵangu esankha kuluta ku yunivesiti, koma ayakine eloŵa usodja. Newo nenzeganizilakolini olo patontho zakuti ningaloŵe usodja, chifukwa nenzekondalini vokangana olo voniyatana. Tetyo nisankha kuluta ku yunivesiti kuti nipewe kuloŵa usodja. Koma kupambana vonse, nenzefuna kuti nikoyavya ŵanthu ayakine, chifukwa niganiza kuti vamene ivi vinganiyavye kunkhala na moyo watanthauzo.

Penenze ku yunivesiti, nisankha kuchita maphunzilo okhuza ŵanthu, pakuti nenzefunishisha kuziŵa kuti moyo wiyamba tyani. Tenzephunzisiwa kuti vinthu vichitachinja kufumila ku vinthu viyakine ndipo maticha enzefuna kuti sewo tikokhulupilila kuti vamene ivi n’vachendi. Koma kuli newo mfundo ziyakine zenzemvwikalini bwino-bwino, mwakuti nenzeungokhulupilila koma osaziŵa maziko ŵake, vamene n’vosemphanasoti ngako na sayansi yamene yufuna kuti pankhale umboni wa vinthu vamene ivo vaukhulupilila.

Mu kalasi tenzephunzisiwalini mfundo za minkhalidwe iweme. Mmalomwake, nthawe zonse tenzekungoujiwa kuti tikochita vonse vatingakwanishe kuti tikokwanisha luweme ku yunivesiti yamene iyo. Newo nenzesangalala kuchita nawo maphwando komasoti kukatishila ntchito mankhwala osokoneza tomfwe, koma chisangalalo chake chenzenkhalishalini. Nenzelikonsha kuti, ‘Kansi newo nunkhala na moyo watanthauzo?’

Pavuli pake nifulukila mu tauni ya Boston, ndipo nichiyayamba kuphunzila pa yunivesiti iyakine kwamene uko. Kuti nikopeza ndalama yolipilila sikulu yamene iyi, nenzekata ntchito pa nthawe ya holide pa malo ayakine ŵenikumana na a Mboni za Yehova ulwendo woyamba. Munthu muyakine wenenzekata naye ntchito, eniuja za ulosi upezeka m’chapitala 4 cha buku ya Danieli unena za “nthawe 7” ndipo efotokoza kuti palipano tunkhala mu nthawe ya mapeto ngayo-ngayo. (Dan. 4:13-17) Newo mokulumija niziŵa kuti keno ningapitilije kukambilana naye nkhani zamene izi noziikila nzelu ngako, sembe nichinja moyo wangu. Tetyo, nenzemupewa muyangu wamene uyu wenenzekata naye ntchito mulimonse mwaningakwanishile.

Kwamene uko ku yunivesiti, nisankha maphunzilo amene anganiyavye kuti nikakate ntchito yongolipeleka ku South America. Nenzewona kuti ningankhale na moyo watanthauzo keno ningoyavya ayakine pochita ntchito zachifundo. Koma pavuli pake niyamba kukaikila ngako keno vamene ivi vinganiyavye chendi kunkhala na moyo wa tanthauzo. Chifukwa chokhumudwa, nileka kuphunzila kwala ku yunivesiti petivalila.

Mu May 1970, nifulukila ku Amsterdam, ku Netherlands, kwamene nenzekata ntchito ku kampani ya ndeke, kwala kwenzeseŵenza atata. Vamene ivi vinichitisha kuti nikoyenda ngako m’vyalo vaku Africa, America, Europe, komasoti ku Asia. Pavuli pake nichizaziŵa kuti m’vyalo vonse vamene ivo veniyenda, ŵanthu enzekumana na mavuto akulu ndipo paliye enzewoneka kuti angaŵasilije mavuto amene awo. Pakuti newo nenzefunishisha kukwanilisha chinthu chiyakine chofunika pa moyo wangu, niganiza zojokela ku United States kuyayambasoti kuphunzila pa yunivesiti yala yaku Boston.

Penijokela ku sikulu, papita kanthawe katontho nichizaziŵa kuti nufwanalini mayankho a makonso ŵangu okhuza moyo. Chifukwa chosoŵa chochita, nikonsha pulofesa muyakine kuti anipase malangizo. Nidabwa ngako na vechiniyankha pechinena kuti: “Lomba ndaŵa yanji upitilija kuphunzila? Tyani kungoleka?” Malangizo amene aŵa enisangalasa mwakuti aliyefunike kuniuja kaŵili. Tetyo, nichoka kwamene uko ku yunivesiti mwakuti niliyejokelekosoti.

Koma olo n’tetyo, nenzewona kuti moyo wangu uliye tanthauzo, ndipo niloŵa m’gulu iyakine yamene yenzekana miyambo ya ŵanthu ndipo yenzewoneka kuti yulimbikisa ntendele na chikondi. Newo pamozi na ayangu tenzeyenda m’madela osiyana-siyana kufumila ku United States mpaka kuyafwika ku Acapulco, ku Mexico. Tenzenkhala na ŵanthu amene okana malamulo ŵakukonkheja ŵanthu onse, ndipo venzewoneka monga onkhala na moyo uweme komasoti uliye nkhaŵa. Koma papita kanthawe katontho nichizaziŵa  kuti moyo wa ŵanthu amene aŵa wenzelini watanthauzo ndipo wenzeyavyalini munthu kunkhala na chisangalalo chonkhalisha. Nenzewona kuti ŵanthu anyinji m’gulu yamene iyi enze achinyengo komasoti osakhulupilika.

Pakaliyepita nthawe itali, niyamba kuganizila venenzefuna ngako nili ntontho. Nenzefuna kunkhala nsogoleli wa oyendesha sitima zapanyanja. Kuti vamene ivi vikwanishike nenzefunika kunkhala na bote yangu-yangu. Pakuti muyangu muyakine zina yake Tom enze na volinga monga ni vangu, ndipo tiganiza zakuti tiyende pamozi kuluta m’madela osiyana-siyana pano pachalo. Nenzefunishisha kufwana nsuwa iyakine iweme kuti nikonkhala kwamene uko paliye kuyendela malamulo aliwonse.

Newo na Tom tiluta ku Arenys de Mar, kufupi na ku Barcelona, m’chalo cha Spain. Kwamene uko tigula boti iyakine itali mamita 9.4 yuitiwa kuti Llygra. Pavuli pake tiyamba kuikonza kuti vikwanishike kufwamba nayo panyanja. Pakuti ulwendo wasu wenzelini wokulumija ngako, tiganiza zochosa injini kuti tinkhale na malo okwanila osungilamo manzi akumwa. Kuti tikokwanisha kupanama m’tumasitesheni tutontho-tutontho, tiika vochapila bote viŵili vitali-vitali mamita 5. Pavuli pake, tiuyamba ulwendo wakuya ku Seychelles, kupita pa nyanja ya Indian Ocean. Cholinga chasu chenze chakuti tipite mmbali mwa nyanja kunchingulo kwa Africa mpaka kufwika ku Cape of Good Hope, m’chalo cha South Africa. Tenzekonkha nyenyezi, kukatishila ntchito mapu komasoti vipangizo viyakine kuti tiziŵe kwatikuya. Venzenichitisha chidwi powona kuti tukwanisha kuziŵa malo ngawo-ngawo ŵatili.

Pakaliyepita nthawe, tiziŵa kuti bote yasu yamene iyi yamene yenze yakale, yenzelini iweme kuyenda nayo panyanja. Bote yamene iyi yenze yobowoka mwakuti mwenzeloŵa manzi pafupi-fupi malita 22 pa awazi imozi. Monga mwanafotokozela kale kumayambililo, mphepo yamphamvu peiyamba pamene apo pa nyanja, nichita wowa ndipo ulwendo woyamba pavuli pa vyaka vinyinji, nipemphela nomulonjeza Mulungu kuti keno ningapulumuke nikayeje-yeje kuti nimuziŵe. Pavuli pake, yala mphepo yamphamvu ichizaleka ndipo nisimikija ntima kukwanilisha venilonjeza.

Tili pamene apo pakati pa nyanja, newo niyamba kuŵelenga Baibolo. Ganizilani tyala mwevenzele vochitisha chidwi kunkhala pakati ngapo-ngapo pa nyanja ya Mediterranean, kunja osawoneka olo patontho, kungowoneka tyala nsomba za mitundu yosiyana-siyana zulumpha-lumpha mu nyanja. Usiku nenzechita chidwi ngako na nyenyezi zenenzewona, ndipo vamene ivi vinichitisha kusimikijila kuti kuli Mulungu wamene oganizila ŵanthu.

Papita mosondo atontho pavuli pakuti tayenda panyanja, tifwika pa malo ayakine oselukila oitiwa kuti Alicante, ku Spain, kwamene uko tifuna kugulisa yala bote na cholinga chakuti tigule iyakine iweme. Kwenze kovuta kufwana munthu angatigule bote yamene yenze yakale, iliye injini komasoti yobowoka! Koma vamene ivi vinipasa mwayi kuti nipitilije kuŵelenga Baibolo yangu.

Peniyiŵelenga ngako Baibolo yamene iyi, niyesoti peniyamba kuiwona monga Buku ya malangizo amene angatiyavye kunkhala osangalala. Newo nichita chidwi na mwayufotokozela luweme Baibolo pa nkhani yonkhala na minkhalidwe iweme. Lomba nenzedabwa kuti ndaŵa yanji ŵanthu anyinji—amene onena kuti ni Akhilisitu—kupamikijapo newo, tukonkhejalini vamene ivi vayunena.

Newo nisimikija kufumila pansi pa ntima kuti nichinje moyo wangu, tetyo nisiya kukatishila ntchito mankhwala osokoneza tomfwe. Niganiza kuti pofunika kunkhala ŵanthu ayakine amene okonkheja mfundo  za m’Baibolo, ndipo nenzefunishisha kukumana nawo. Kachiŵilisoti nipemphela kwa Mulungu kuti aniyavye kuŵafwana ŵanthu amene aŵa.

Nenzewona kuti enzefunika kusakila-sakila chipembezo pacheka kuti nifwane chipembezo chachendi. Nikofwamba m’misewu ya ku Alicante, nenzewona ng’anda zinyinji zopemphelelamo. Koma chifukwa chakuti zinyinji mwa ng’anda zamene izo zenzenkhala na vifanizilo, niziŵilatu kuti vingankhalelini vipembezo vachendi.

Nsiku iyakine pa Sondo nzuŵa, ninkhala mmbali mwa lupili yololana na malo oselukila mabote ndipo nenzeŵelenga lemba ya Yakobo 2:1-5, yamene yunena kuti n’kulakwa kukondela ŵanthu olemela. Penenzejokela kwala kwenze bote yasu, nipita pa malo ayakine amene enzewoneka monga opemphelelamo, penze chikwangwani chakuti: “Ng’anda ya Ufumu ya Mboni za Yehova.”

Newo niganiza kuti, ‘Tyani niŵayese ŵanthu amene aŵa? Kuti niwone mwakuti anilondelele.’ Tetyo, niloŵa mwamene umo m’Ng’anda ya Ufumu niliye nsapato, nili na ndevu komasoti nilivwale djini yobowoka-bowoka. Wolondela alwendo enipasa malo onkhala pafupi na mayi muyakine wachikulile wamene enzeniyavya kufwana malemba mowama ntima ŵenzetomola wolaŵila nkhani. Misonkhano peisila, nidabwa ngako na kuwama ntima kuli ŵala enzewela kuzanipasa moni. Mwanalume muyakine eniitila ku ng’anda kwake kuti tikakambilane vinyinji. Koma chifukwa chakuti nenze nikaliyesilija kuŵelenga Baibolo, nimuuja kuti, “Nizakuujeni nikazakonzeka.” Pakaliyepita nthawe, niyamba kupezeka pamisonkhano yonse.

Papita masondo atontho, niluta kung’anda kwa wala munthu ndipo eniyankha makonsho ŵangu okhuza Baibolo. Pavuli pa sondo imozi, wala munthu echizanipasa chola chozula na vovwala vinyinji viweme ngako. Yove eniuja kuti munecho wa vovwala vamene ivo enze emangiwa chifukwa chomvwila lamulo ya m’Baibolo yakuti tikokondana komasoti osati tikoniyata nkhondo. (Yes. 2:4; Yoh. 13:34, 35) Lomba nichizasimikijila kuti nenze nifwana—ŵanthu okonkheja mfundo zomvwika luweme za m’Baibolo za minkhalidwe iweme! Cholinga changu chenzelinisoti kusakila-sakila nsuwa iweme, koma kuphunzila Baibolo kuti niimvwishe luweme. Tetyo, nijokela ku Netherlands.

Kwitola masiku 4 kuti nikafwike mu tauni ya Groningen ku Netherlands. Kwamene uko nenzefunika kufwana ntchito kuti nikofwana vofunika pa moyo. Penikonsha ntchito pa malo ayakine pamene enzechita za ukalipentala, enipasa fomu yamene yenze na malo ŵenenzefunikila kulembapo chipembezo changu. Newo nilemba kuti, “Nine wa Mboni za Yehova.” Munecho wa pamalo amene awo pechiwona vamene ivi, niwona kuti chinso chake chachinja. Yove eniuja kuti, “Nizakuite.” Koma aliyeniitesoti.

 Nifwika pa malo ayakine a zaukalipentala, ndipo nikonsha munecho wa pamalo amane awo keno ofuna wantchito. Yove enikonsha kuti nimuwoneshe vipepa va maphunzilo ŵangu komasoti va ntchito zanakatako kuvuli. Newo nimuuja kuti nikatapo ntchito yokonza bote yamapulanga. Nidabwa pechiniuja kuti, “Ungazayamba nzuŵa, koma tigwilizane chinthu chimozi. Nufunalini kuti uyambishe nsokonezo pa malo ŵano chifukwa nine wa Mboni za Yehova ndipo nukonkheja mfundo za m’Baibolo.” Newo nimulolesha modabwa ndipo nimuuja kuti, “Nane nine mmozi wa Mboni za Yehova!” N’vosadabwisa chifukwa nenze na sisi itali komasoti ndevu eniuja kuti, “Lomba nikophunzila nawe Baibolo!” Nisangalala ngako na vamene ivi. Tetyo, nimvwisha chifukwa chaliyeniitilesoti wala munthu woyamba kwenenze nifufuza ntchito. Yehova enzeyankha mapemphelo ŵangu. (Sal. 37:4) Niyamba kukata ntchito pa shopu ya m’bale wamene uyo kwa chaka chimozi. Pa nthawe yonse yamene iyi, ove enzephunzila nane Baibolo, pavuli pake nibatizika mu January 1974.

Papita mwezi umozi, niyamba upainiya—wamene waniyavya kunkhala na moyo wokhutilisha. Mmwezi wokonkhapo, nifulukila ku Amsterdam kuti nikayavye kagulu ka Chisipanishi kamene kenze kechingonkhazikishiwa kwalombapano. Venze vokondwelesha ngako kuchitisha maphunzilo a Baibolo mu Chisipanishi komasoti Chipwitikizi! Mu May 1975, neikiwa kunkhala mpainiya wapadela.

Nsiku iyakine, mulongo muyakine wamene enze mpainiya wapadela, zina yake Ineke, echizawela kumisonkhano yasu pamozi na wophunzila Baibolo wake waku Bolivia kuti azaziŵane na abale komasoti alongo olaŵila Chisipanishi. Newo na Ineke tiganiza zakuti tiziŵane bwino-bwino mwakuti tenzelembelana makalata ndipo pakaliyepita nthawe itali, tiwona kuti tenze na volinga volingana. Tichizalungulana mu 1976 ndipo tipitilija kutumikila monga apainiya apadela mpaka mu 1982, Petiitiwa kuyaloŵa kalasi namba 73 ya sikulu ya Giliyadi. Tikondwela ngako petitumijiwa kuyatumikila kummawa kwa Africa ndipo kwa vyaka 5 titumikila ku Mombasa, m’chalo cha Kenya! Mu 1987, titumijiwa ku Tanzania, kwamene ntchito yasu yenzelinisoti yoleshewa. Tinkhala kwamene uko vyaka 26 ndipo pavuli pake tijokelasoti ku Kenya.

Kuyavya ŵanthu olichefwa kuphunzila chendi cha m’Baibolo kwichitisha kuti tinkhale na moyo watanthauzo. Mwachisanzo, munthu woyamba kuphunzila naye Baibolo ku Mombasa nikumana naye pochita ulaliki wa mmalo opezeka ŵanthu anyinji. Penimupasa magazini aŵili enikonsha kuti, “Lomba nikasilija kuŵelenga amene aŵa nichite tyani?” Sondo yokonkhapo, tiyamba kuphunzila Baibolo pokatishila ntchito buku yakuti, Mungathe Kukhala ndi Moyo Kosatha M’paradaiso pa Dziko Lapansi, yamene yenze ichingofumyiwa kwalombapano m’Chiswahili. Papita chaka chimozi ebatiziwa ndipo pavuli pake, eyamba upainiya wonkhazikika. Kufumila nthawe yamene iyo, yove pamozi na nkazi wake eyavya ŵanthu pafupi-fupi 100 kuti alipeleke kwa Yehova nobatiziwa.

Penichimvwa cholinga cha moyo ulwendo woyamba, nichimvwa monga ni wala wamalonda enzeyenda-yenda, wamene echizafwana chuma chantengo wapatali ndipo aliyefune kuchisiya. (Mt. 13:45, 46) Nenzefunishisha kukatishila ntchito moyo wangu poyavya ayakine kuziŵa cholinga cha moyo. Newo na nkazi wangu wokondewa, tawona seka mwakudalisila ŵanthu ŵake Yehova poŵayavya kunkhala na moyo watanthauzo.