Ekj wort aune 1948 en Hollaunt jebuaren. Een Joa lota trock onse Famielje dan no São Paulo, Brasilien. Onse Elren wankten pinkjlich no de Kjoakj un wie läsden jeweenlich no Owentkost toop de Schreft. Aune 1959 trock wie dan no de Stäts, wua wie en de Prowins Massachusetts wonden.

Wie wieren sas Kjinja un onse Pape schauft sea toom fa de Famielje sorjen. Hee haft met veschiednet jeschauft, soo aus romreisen un Sachen vekjeepen, Heiwäs moaken un bie eene internazionale Zhettkompanie. Wie freiden ons sea, aus hee fa de Zhettkompanie schauft, wiels dan kunn wie leichta wua hanreisen.

En miene Schooljoaren wundad ekj foaken: “Waut woa ekj doonen, wan ekj ieescht groot sie?” Eenje Frind jinjen no de Uniwersität un aundre worden Soldot. Oba wiels ekj strieden un kjamfen noch kjeenmol jleicht, wull ekj nich Soldot woaren. Enne Städ daut schreef ekj mie bie de Uniwersität en. Ekj haud emma dän Wensch aundre to halpen, wiels ekj docht, daut mien Läwen dan werkjlich waut enhoolen wudd.

Bie de Uniwersität intressieed ekj mie sea fa de Menschheitsjeschicht, wiels ekj weeten wull, von wua daut Läwen häakjeem. Dee lieeden ons, daut aules derch de Ewoluzion kjeem, un wullen haben, daut wie daut jleewen sullen. Oba eenjet, waut dee doa säden, paust fa mie goanich toop un ekj must daut eefach jleewen onen eenen Bewies.

Dee lieeden ons nich, woo wie een reinet, aunstendjet Läwen fieren kunnen, oba daut wie aules doonen sullen, om bie de Uniwersität no bowen to komen. Ekj wia schaftich, wan ekj met miene Frind toop bie Fasten wia un Droggs brukt, oba daut Scheengonen wia uk wada bosich äwa. Ekj docht soo: “Helt mien Läwen opp iernst waut en?”

Entweschen trock ekj no de Staut Boston un studieed doa bie de Uniwersität. Aus ekj de Somma schauft, daut ekj daut Schooljelt betolen kunn, bejäajend ekj toom ieeschte Mol wäm von Jehova siene Zeijen. Daut wia een Oabeitspoatna, waut mie de Profezeiunk von de “säwen Joa” en Daniel, Kapitel 4 utläd un säd, daut wie nu en de latste Tiet läwden (Dan. 4:10-14). Ekj wort boolt en, daut ekj wudd mien Läwen endren motten, wan ekj wieda met dän räd un daut jleewd, waut ekj doa ut de Schreft lieed. Doawäajen jinkj ekj dän dan soo goot aus mäajlich utem Stich.

Bie de Uniwersität leet ekj mie utlieren toom lota de Menschen en Sied-Amerika halpen. Ekj docht, wan ekj aundre halpen wudd, wudd mien Läwen mea enhoolen. Oba ekj twieweld emma dolla doaraun, aus daut Läwen werkjlich eenen Senn haud. Ekj wia enteischt un hieed met de Uniwersität opp.

En Mei 1970 trock ekj no Amsterdam, Hollaunt, un schauft fa deeselwje Zhettkompanie, aus onse Pape deed. Doaderch kunn ekj aulawäajen hanreisen, biejlikj no Afrika, Nuad-Amerika, Sied-Amerika, Europa un Asien. Daut dieed goanich lang, bat ekj enwort, daut et en jieda Launt, wua ekj wia, groote Trubbels jeef, un daut späad sikj soo, daut kjeena dee fiksen kunn. Wiels ekj mie noch emma wenscht, daut ekj waut doonen kunn, waut opp iernst waut enhilt, wort ekj mie eenich, wada trigj no de Stäts to trakjen un bie deeselwje Uniwersität en Boston wiedatostudieren.

Ekj moakjt boolt, daut ekj doa bie de Uniwersität nich de Auntwuat opp miene Froagen äwa daut Läwen kjrieech. Wiels ekj nich wist, waut ekj doonen sull, fruach ekj eenen von miene Liera no Rot. Ekj wundad mie sea, aus dee to mie säd: “Wuarom west wiedastudieren? Wuarom hieescht nich fuaz met de Uniwersität opp?” Daut durf dee mie nich tweemol sajen. Ekj veleet de Uniwersität fa emma.

Mien Läwen haud noch emma kjeenen Senn un doawäajen jinkj ekj bie eene Grupp bie, waut nich väl von Räajlen hilden un no Fräd un Leew sträwen wullen. Ekj reisd met eenje Frind toop derche Stäts bat no Acapulco en Mexiko. Wie wonden met soone toop, waut gaunz aundasch läwen wullen aus aule aundre Menschen. Ieeschtlich späad sikj daut soo, dee hauden nich väl Trubbels ooda Sorjen. Oba boolt wort ekj en, daut dee äa Läwen uk nich väl Senn haud un daut dee oppe Lenjd nich schaftich wieren. Ekj sach, woo onopprechtich un ontru väle doa wieren.

To jane Tiet foll mie wada waut bie, waut mie aul von kjlien aun jejankat haud. Ekj wull Kapitän sennen un met een Säajelboot oppem Mäa reisen. Doatoo must ekj mien ieejnet Säajelboot haben. Mienen Frint Tom jankad daut uk, un wie worden ons eenich, toop romme Welt to säajlen. Ekj wull eene schmocke Insel finjen, wua ekj soo läwen kunn, aus mie daut jankad.

Ekj un Tom reisden no Arenys de Mar, dicht bie Barcelona, Spaunien. Doa koft wie een Säajelboot, waut Llygra heet un meist 9 ¹/₂ Meeta (31 Schoo) lank wia. Wie fungen aun, daut to repäaren, daut et wada reed wia toom reisen. Wiels wie nich bosich wieren, neem wie dän Moota rut, daut wie mea Wota toom drinkjen metnämen kunnen. Daut wie uk bie kjliene Howes naunfoaren kunnen, koft wie ons twee Roodlen, waut 5 Meeta (16 Schoo) lank wieren. Dan jinkj et loos. Ons Plon wia, delenjd de wastne Kaunt von Afrika to säajlen un dan bie Sied-Afrika romtodreien opptoo no de Seyschellen en daut Indische Mäa. Wie kjikjten no de Stierns un brukten Bieekja, Launtkoaten un eefache Dinja, daut wie no de rajchte Rechtunk fuaren. Daut wia toom wundren, woo krakjt wie met daut rutfinjen kunnen, wua wie jroz wieren.

Daut dieed goanich lang, bat wie enworden, daut et met ons oolet Boot nich väl enhilt. Doa kjeemen jieda Stund soo bie 22 Lieta (6 Galoon) Wota nenn, wäajen daut soo ondicht wia. Un soo aus ekj aum Aunfank aul säd, kjrieech ekj bie eenen Storm groote Angst un bäd toom ieeschte Mol no väl Joaren. Ekj vespruak Gott, daut ekj proowen wudd, am kjanen to lieren, wan wie läwen bleewen. De Storm leet no un ekj deed daut, waut ekj vesproaken haud.

Doa medden opp daut Meddelmäa funk ekj aun de Schreft to läsen. Woo scheen daut nich jinkj! Doa wieren veschiedne Sorten Fesch un eena kunn soo wiet kjikjen, aus eena wull. De Nacht kunn ekj aum Himmel de schmocke Voagelbon seenen un ekj wort mie emma sechra, daut et eenen Gott jeef, waut om de Menschen bekjemmat wia.

No een poa Wäakj oppem Mäa kjeem wie no Alicante en Spaunien. Doa wull wie ons Boot vekjeepen un een bätret kjeepen. Oba daut wia goanich soo leicht, eenen Kjeepa to finjen fa een oolet, ondichtet Säajelboot, waut nich mol eenen Moota haud! Emmahan wia daut eene feine Jeläajenheit fa mie, de Schreft to läsen.

Je mea ekj en de Schreft läsd, je dietelja wort mie, daut de Rot doabennen ons halpen kaun, opp iernst Freid to haben. Mie jefoll daut, waut de Schreft äwa een reinet, aunstendjet Läwen säd, un ekj kunn daut schia nich jleewen, wuarom ekj un een deel aundre Menschen sikj Christen nanden, oba nich no daut läwden, waut de Schreft säd.

Ekj wull een reinet Läwen fieren un hieed opp, Droggs to brucken. Ekj docht soo bie mie, daut et noch Menschen jäwen must, waut krakjt soo läwden, aus de Schreft daut säd, un ekj wull dee sieekjen. Doawäajen bäd ekj wada un fruach Gott no Help, daut ekj dee finjen kunn.

Ekj docht soo, daut ekj eenen Gloowen no dän aundren unjasieekjen wudd, bat ekj dän rajchten jefungen haud. Aus ekj velenjd de Gaussen en  Alicante jinkj, sach ekj een deel Kjoakjen, oba wiels bie de mieeschte Jettabilda to seenen wieren, wist ekj aul, daut daut nich daut rajchte wia.

Eenen Sindach no Meddach wia ekj opp eenen Eewa bowa dän Howen un läsd Jakobus 2:1-5, wua daut sajcht, daut daut orrajcht es, de Rikje väatotrakjen. Aus ekj trigj nom Boot jinkj, sach ekj een Jebied, wua een Zein aun wia. Daut säd doa: “Vesaumlungshus von Jehova siene Zeijen”.

Ekj docht soo: “Ekj woa dee mol aufproowen. Well wie mol seenen, aus dee mie fein oppnämen!” Ekj wia boaft, haud eenen Boat un tweinje Bekjsen, un soo aus dit jinkj ekj em Vesaumlungshus nenn. Een Brooda wees mie no eenen Stool biesied eene elre Fru. Dee holp mie leeftolich, de Bibelvarzhen to finjen, wua dan jroz von jerät wort. Ekj wia gaunz äwarauscht, daut no daut Toopkomen väle kjeemen un mie leeftolich bejreesten. Een Maun kroagd mie no sien Hus, daut wie doa lenja räden kunnen, oba wiels ekj noch nich de gaunze Schreft jeläst haud, säd ekj to dän: “Wan ekj ieescht reed sie, woa ekj die weeten loten.” Ekj funk fuaz aun, no aule Toopkomes to wanken.

Een poa Wäakj lota jinkj ekj no daut Hus von janen Maun un dee beauntwuad mie de Froagen, waut ekj äwa de Schreft haud. Eene Wäakj lota jeef dee mie eene Tausch voll sea schmocke Kjleeda. Hee vetald mie, daut deejanja, wäms Kjleeda daut wieren, nu jroz em Jefenkjnis wia, wiels dee daut biblische Jeboot jehorchen wull, Leew to haben un sikj nich fa dän Kjrich utlieren to loten (Jes. 2:4; Joh. 13:34-35). Nu wia ekj mie secha, daut ekj daut jefungen haud, wua ekj no jesocht haud! Dit wieren Menschen, waut krakjt daut nokjeemen, waut de Schreft äwa een reinet, aunstendjet Läwen säd. Nu wull ekj nich mea no eene schmocke Insel sieekjen, oba jrintlich de Schreft studieren. Doawäajen wull ekj trigj no Hollaunt reisen.

Vea Doag lota wia ekj dan en de Staut Groningen en Hollaunt. Doa must ekj mie Oabeit sieekjen, daut ekj to läwen haud. Bie eenen Descha must ekj eenen Zadel utfellen un doa uk noppschriewen, bie woone Jemeent ekj wia. Ekj schreef: “Jehova siene Zeijen”. De Wieet kjikjt een bät fonnich, aus hee daut läsd. Hee säd: “Ekj woa die dan fonen.” Oba hee deed kjeenmol.

Ekj fruach uk bie eene aundre Descharie no Oabeit. De Wieet fruach no miene Schoolpapieren un wua ekj ea jeschauft haud. Ekj vetald dän dan von daut heltane Säajelboot, waut ekj repäat haud. Ekj wundad mie sea, aus dee to mie säd: “Vondoag  no Meddach kaust aunfangen, oba opp eene Bedinjunk: Ekj well nich, daut du hia en de Descharie Trubbel moakst, wiels ekj eent von Jehova siene Zeijen sie un soo läw, aus de Schreft daut sajcht.” Ekj kjikjt dän gaunz vejrazt aun un säd: “Ekj sie uk eena von dee!” Wiels hee miene lange Hoa un mienen Boat sach, säd hee: “Dan well ekj met die de Bibel studieren!” Ekj neem daut wellich aun. Nu dakjt mie op, wuarom de aundra Descha mie kjeenmol jefont haud. Jehova jeef mie daut, waut mien Hoat sikj wenscht! (Psa. 37:4). Ekj schauft een Joa fa dän Brooda. Un en Tiet studieed dee de Bibel met mie, bat ekj mie en Jaunewoa 1974 deepen leet.

Eene Moonat lota funk ekj met dän Pioniadeenst aun, waut mie väl Freid jeef. De näakjste Moonat trock ekj no Amsterdam. Doa hauden se eene spaunische Grupp oppjestalt, wua ekj methalpen wull. Ekj wia sea schaftich, daut ekj doa met Menschen opp Spaunisch un opp Portugiesisch de Bibel studieren kunn. Un en Mei 1975 wort ekj dan Sondapionia.

Opp eene Sauz kjeem eene Sondapionia-Sesta, waut Catharina heet, no een spaunischet Toopkomen. See studieed met eene Fru von Bolivien de Bibel un wull, daut dee ons kjanen lieren kunn. Ekj un Catharina beräden ons, daut wie ons Breew schriewen wullen, om ons bäta kjanen to lieren. Un wie worden boolt en, daut wie em jeisteljen no dautselwje sträwen wullen. Wie befrieden ons aune 1976 un wieren dan toop Sondapionieren, bat wie dan aune 1982 no de 73. Klauss von de Gilead-School gonen kunnen. Wie wieren sea äwarauscht un schaftich, aus se ons no Oost-Afrika schekjten, wua wie dan fief Joa en Mombasa, Kenia, deenden. Aune 1987 schekjten se ons no Tansania, wiels daut Prädichtwoakj doa nu nich mea veboden wia. Doa bleew wie dan 26 Joa, ea se ons wada no Kenia schekjten.

Ons Läwen helt werkjlich waut en, wiels wie deemootje Menschen halpen kjennen, de Woarheit ut de Schreft kjanen to lieren. Mien ieeschtet Bibelstudium en Mombasa wia een Maun, waut ekj kjanen lieed, aus ekj effentlich prädjen deed. Aus ekj dän twee Tietschreften jeef, fruach hee mie: “Waut saul ekj doonen, wan ekj dee ieescht derchjeläst hab?” De näakjste Wäakj fung wie aun, de Bibel to studieren met daut Buak Du kannst für immer im Paradies auf Erden leben, waut dan jroz opp Swahili rutjekomen wia. Een Joa lota leet dee sikj deepen un wort Pionia. Un hee un siene Fru haben aul meist 100 Menschen jeholpen, sikj Jehova hantojäwen un deepen to loten.

Aus ekj enwort, waut de Senn em Läwen wia, jinkj mie daut soo aus dän reisenden Haundelsmaun, waut eene besondre Parl funk un dee nich wada loosloten wull (Mat. 13:45-46). Ekj wull mien Läwen brucken, om aundre to halpen, uk een Läwen to finjen, waut werkjlich waut enhelt. Ekj un miene leewe Fru haben selfst jeseenen, daut Jehova siene Deena halpt, een Läwen to haben, waut werkjlich Senn haft.