Ngavualewe mu 1948 gu Pays-Bas. Givo gialanduile, fami yetu yagasue tuayile gu São Paulo, gu Brésil. Mvuaji jiami jiakhalele muya mu église muavula, tuakhalele nji mutanga Biblia muavula hamoshi mu ngueze. Mu 1959 tuakatugile gu Brésil, tuayile mukhala gu États-Unis, mu dimbo dia Massachusetts.

Mu fami yetu tuakhalele ana 8. Tata wakhalele mutshita mudimo wakola ha gudisa fami. Tata wakalegele midimo yavula: wakhalele musumbisa ima, wakhalele mutshita mudimo wa gulonda njila, wakhalele nji mutshita mudimo gu compagnie aérienne internationale. Tangua tata wahetele mudimo gu compagnie aérienne, mukut’etu agasue tuasuangulugile handaga yakhalele gutuhana njila ha guwenda muavula.

Tangua ngakhalele gu école secondaire, ngakhalele gudihula egi, ‘Itshi mbangukalagala gula ngakula?’ Mafut’ami ako atombele ha guya gu université, uvi ako ayile gu mudimo wa gisuta. Uvi ame ngakhalelego muzumba mudimo wa gisuta, handaga ngakhalelego mutshigina khadilo dia gumana nu dia gulua. Hene ngazudile desizio dia guya gu université ha gutuna guya gu mudimo wa gisuta. Uvi ngakhalele mutshigina gukuatesa athu handaga ngakhalele mutangiza  egi gula ngatshita ngenyi, mbangukhala nu gusuanguluga.

Gu université, ngatommbele ha gutshita anthropologie handaga ngakhalele mutshigina gujiya gula monyo wakatugile gui. Akhalele gutulongesa egi longo dia évolution diakhala dia giamatshidia. Uvi ngakhalelego mutshigina ndaga jiko akhalele muzuela mukunda nu évolution, handaga guakhalelego nga nu gima giakhalele mumonesa egi longo diene didi dia giamatshidia.

Akhalelego nji gutulongesa mikhuala idi mutunyisa gutshita ndaga jiabola. Uvi akhalele gutulongesa egi tudi naye gutshita ndaga jiagasue tuatshigina ha gubinga gu université. Ngakhalele mubalegesa tangua nu mafut’ami, tuakhalele mutshita ba fête nu gunua drogue. Yakhalele gutusuanguluisa, uvi gusuanguluga guene guakhalele phamba gua tangua diazonda. Ngasedesele gudihula egi: ‘Gugu gusuanguluga gua giamatshidia ngakhalele mukamba ba?’

Mu tangua diene, ngayile mu dimbo dia Boston, nganginyile mu université guene. Ha guheta makuta a gufuta gu université, ngakhalele mutshita mudimo mu congé. Gu mudimo wene guene ngataganele nu Matemue a Yehowa mbala ya thomo. Futa diami mumoshi wa mudimo wangulongesele profesi idi mu mukanda wa Danyele mukhapho 4, idi muzuelela “ivo sambadi.” Wanguwambelele nji egi tudi mujinga mu masugu a gisugishilo. (Dan. 4:13-17) Ngakotelesele egi gula ngalandula guta n’enji maga nu ngatshigina ndaga jiakhalele muene gunguwambela, mbangusombegesa makalegelo ami. Hene ngatshitshile yagasue ha gutuna guta n’enji luko maga.

Gu université yene, ngazanguile formasio ha guya mukuatesa athu gu Amérique du Sud. Ngakhalele mutangiza egi gukuatesa athu adi nu lamba, mbagungubatela gusuanguluga. Uvi mudimo wene nji wangubatelego gusuanguluga ngakhalele mukamba. Yangulebesele diago muila, hene ngabembele gami université.

Mu mbeji ya thano 1970, ngayile gu Amsterdam, gu Pays-Bas, ha gutshita mudimo gu compagnie aérienne, gifua muakhalele mutshita tata. Mudimo wene wanguhuile luendu lua guya mu ifutshi yavula ya gu Afrique, Amérique, Europe nu gu Asie. Gungima ngakotelesele egi mu ifutshi yagasue ngawendele, athu agasue akhalele nu malamba avula. Guakhalelego nga muthu wajiya gumanesela malamba ene. Luholo ngakhalele mutshigina diago gukuatesa athu, ngazudile desizio dia guvutuga gu États-Unis. Ngasendesele guya luko gu université ya Boston.

Uvi ngakotelesele egi université yangukuateselego ha guheta mvutu jia mihu ngakhalele gudihula. Ngamonelego gima gia gutshita, hene ngatogele ukuateshi gudi ndombi wetu. Wanguwambelele egi: “Mukunda natshi udi mulandula giwa gutshita université? Wajiyilego gubemba gaye ba?” Ngasuangulugile nu mvutu yenji. Hene ngabembele université mbala imoshi.

Ngahetelego gusuanguluga ngakhalele mukamba, ngadibungishile nu athu akhalele mumonega gifua adi mukuatesa athu, adi nu guhuima nu guzumba. Ame nu mafut’ami ako tuayile gu États-Unis, gungima tuayile gu Acapulco, gu Mexique. Tuakhalele mujinga nu athu akhalelego mutumagela mikhuala, nu akhalele mumonega gifua ashigo gawo nu malamba. Uvi makalegelo awo angukuateselego ha guheta gusuanguluga ngakhalele mukamba. Athu ene  akhalele enya mambo, akhalelego nu makalegelo abonga.

Mu tangua diene, ngasendesele gutangiza luko ndaga ngatshiginyile gukalagala tangua ngakhalele galenge. Ngakhalele mutshigina gubua kapitene wa masuwa. Ha guyitshita, yakhalele mutoga egi ngukhale nu masuwa ami hakhami. Futa diami mumoshi jina dienji Tom, wakhalele nji nu matangi a gubua kapitene. Hene tuasendesele gukalagala n’enji hamoshi. Ngakhalele mutshigina gukhala ha hongo dimoshi diabonga dishigo nu mikhuala yavula-vula.

Tuayile nu Tom gu Arenys de Mar, hehi nu dimbo dia Barcelone, gu Espagne. Tuasumbile masuwa a 9.4 m, jina diawo Llygra. Tuasendesele gualondega, tuaabuishile gawato gazonda hagula gajiya gutukuatesa ha guwenda muabonga mu océan. Fundo tuakhalele mutshigina guya diakhalele gualeha, hene tuakangudile moteur tuabambele meya a gunua muene. Ha gubalega muabonga nu masuwa mu mafundo azonda, tuasumbile khayi mbadi jia 5 m. Tuakatugile ha guya gu Seychelles, mu océan Indien. Matangi etu akhalele a guya gu Afrique de l’ouest, hehi nu cap de Bonne-Espérance, gu Afrique du sud. Tuakhalele mukalegela themua nu ba karte, nu mikanda nu ima iko hagula itukuatese ha gulandula njila yabonga. Ngakhalele gudihula ha gumona luholo tuakhalele muya mu njila yabonga.

Thomo tuakhalelego mutangiza egi wato wetu ukulu wa mitshi wajiya guwenda mu océan. Wakhalele mungina meya ba litre 22 gungima dia tangua dimoshi! Gifua luholo ngayizuedi gu gisendeselo, tangua funji yabundjile mu muta, ngavuile woma, ngakombelele Nzambi mbala ya thomo gungima dia ivo yavula. Ngamuwambelele egi gula tuazoga nu monyo, mbangutshita yagasue ha gugujiya. Gungima, funji yabatugile. Ngakalegele ndaga ngalayele Nzambi.

Ngasendesele gutanga Biblia tangua tuakhalele mu muta. Ngakhalele mu wato ha katshi na katshi dia mer Méditerranée, gualeha nu gonze. Ngakhalele mumona jishui nu dauphins muwenda mu muta. Mu phipha ngakhalele mumona themua jiavula gosa. Ima eyi yagasue yangutumine ha gutshigina egi gudi nu Nzambi wana guzumba athu.

Gungima dia gutshita phoso jiavula mu muta, tuahetele gu Alicante, gu Espagne. Tuasendesele gukamba athu ha gusumba wato wetu hagula tuajiya gusumba wato uko wabonga. Yakhalele lamba ha guheta muthu wajiya gusumba wato ukulu, ushigo nu moteur nu udi nu mahulu! Uvi yakhalele tangua diabonga dia gutanga Biblia.

Tangua ngakhalele mutanga Biblia muavula, ngakotelesele egi Biblia idi mukanda wabonga wajiya gukuatesa athu ha gukhala nu gusuanguluga. Biblia yangumonesele makalegelo abonga tudi naye gukhala nawo. Ngadihudile egi, mukunda natshi athu avula, nu ame nji, tuana guditamega egi tudi Aklisto uvi tuanago gutumagela ndaga jiene?

Ngazudile desizio dia gusombegesa makalegelo ami nu gubemba gunua drogue. Ngatangijile egi gudi naye gukhala nu athu ana gutumagela mikhuala ya Biblia. Ngazuelele egi ngudi naye guakamba. Ngakombelele Nzambi mbala ya ngiadi hagula angukuatese ha gudimona nu athu ene.

Ngatangijile egi ngudi naye gutadila muabonga gikombelelo gimoshi-gimoshi uu nu tangua mbangumona gikombelelo gia giamatshidia. Tangua ngakhalele muwenda mu bala-bala jia dimbo dia Alicante, ngamonele ikombelelo yavula. Uvi ikombelelo yavula  yakhalele nu isongo, hene ngazuelele egi ishigo ikombelelo ya giamatshidia.

Lusugu lumoshi mu lubingo gungima dia midi, ngakhalele gu khulo ya muta mutala océan. Ngakhalele mutanga Yakoba 2:1-5, idi muzuela egi tushigo naye gukhala nu lutondo. Tangua ngakhalele muvutuga fundo diakhalele wato wetu, ngamonele inzo imoshi yakhalele yagusonega egi: “Inzo ya Ufumu ya Matemue a Yehowa.”

Ngazuelele egi, ‘Ngudi mungina ngutale gula athu awa adi nu lutondo. Ngudi mutshigina gumona luholo mbaanguyamba.’ Hene nganginyine mu Inzo ya Ufumu, ngakhalelego nu saphata gu malu, ngakhalele nu muevu wavula, ngasudigile nji muphano wa dine. Phangi wakhalele muyamba athu wanguyambele muabonga, wanguhagele hehi nu phangi mumoshi wa mukhetu. Phangi muene wangukuatesele nu gisemo giagasue ha guheta verse mu Biblia. Gungima dia gudibungisa, ngadihudile muavula luholo aphangi ajile gungumenega nu gisemo giagasue. Phangi mumoshi wa yala wangutamegene gumbo dienji ha guta n’enji maga a Biblia. Uvi luholo ngakhalele khenji ngumanesela gutanga Biblia, ngamuwambelele egi, “Mbanguguwambela gula ngaheta tangua.” Gungima, ngasendesele guya mu gudibungisa gua mu hungu phoso jiagasue.

Phoso jiavula gungima, ngayile gumbo dia phangi muene. Wanguhanele mvutu gu mihu yami yagasue. Gungima dia phoso imoshi, wanguhanele kuba diaguzala pha nu milele yawaha. Wanguwambelele egi, fumi’a milele yene wambiwe mu bologo handaga watumagele mukhuala wa Biblia wa guzumba aphangi’etu nu watunyine guya gu ita. (Yesh. 2:4; Yone 13:34, 35) Ngakotelesele giwa egi ngaheta diago athu ngakhalele mukamba, anyi ana tumagela mikhuala ya Biblia! Felela diami diakhalelego luko dia guya mukamba hongo diabonga, uvi dia gulonguga Biblia muavula. Hene ngavutugile gu Pays-Bas.

Ngatshitshile masugu nguana ha guya gu dimbo dia Groningue, gu Pays-Bas. Tangua ngahetele guene, ngakhalele nu funu ya mudimo wajiya gungukuatesa. Ngayile mukamba mudimo mu societé imoshi ya mabaya. Fumi’a societé yene wanguhudile gula ngudi muenya gikombelelo gitshi. Ngasonegele egi, “Ngudi Temue wa Yehowa.” Tangua amonele egi ngudi Temue wa Yehowa, phala yenji yasombegesele. Wanguwambelele egi, “Mbangugutamega.” Uvi khenji angutamegene uu nu mangino.

Gungima, ngayile mukamba mudimo mu societé iko ya mabaya. Fumi’a societé yene wangutogele ba diplome nu mikanda yakhalele mumonesa egi ngatshitshile gale midimo iko. Ngamuwambelele egi ngakalegele mudimo wa gulondega mawato a mitshi. Muene wanguwambelele egi, “Wajiya gusendesa  mudimo mangino gungima dia midi. Uvi ngudi gugutoga phamba gima gimoshi: Ungukambelago milonga mu societé yami handaga ngudi Temue wa Yehowa, ngana tumagela mikhuala ya Biblia.” Ngadihudile muavula, ngamutalele gu phala, ngazuelele egi, “Ame nji ngudi Temue wa Yehowa!” Uvi luholo ngakhalele nu sanga dialeha nu muevu wavula, wajiyile egi ngakhalelego Temue wa Yehowa. Hene wazuelele egi, “Mbangugulongesa Biblia!” Ngatshiginyile nu gusuanguluga guagasue. Ngakotelesele giwa mukunda natshi muenya societé ya thomo watunyile gunguzula gu mudimo. Yehowa wakhalele gunguhana mvutu gu isambu yami. (Ngi. 37:4) Ngakalegele mudimo mu societé ya phangi muene givo gimoshi. Mu tangua diene, wangulongesele Biblia. Gungima ngabatijiwe mu janvier 1974.

Mbeji imoshi gungima, ngasendesele mudimo wa muvundji wa njila. Mudimo wene wangusuanguluishile muavula. Mu mbeji yalanduile, ngayile gu Amsterdam ha gukuatesa groupe ihe-ihe ya zuelelo dia espagnol. Ngakhalele nu gusuanguluga guavula ha gulongesa athu Biblia mu espagnol nu mu portugais! Mu mbeji ya thano 1975, ngabuile pionnier spécial.

Lusugu lumoshi, phangi mumoshi wa mukhetu wa pionnière spéciale, jina dienji Ineke, wajile mu gudibungisa guetu gua mu hungu dia espagnol. Wajile gutudijiga mukhetu mumoshi wa gu Bolivie akhalele mulonguga n’enji Biblia. Ame nu Ineke tuadivile ha gudisonegela mikanda hagula tudijiye muabonga. Gungima, tuakotelesele egi muyadi’etu tuakhalele nu nzala ya gudihana muavula mu mudimo wa Yehowa. Tuadizudile mu ulo mu 1976. Tualanduile gutshita mudimo gifua ba pionniers spéciaux uu nu mu 1982. Gungima, atutamegene gu khalasa dia 73 dia Gileade. Atutumine gu Afrique de l’Est, mu dimbo dia Mombasa, gu Kenya. Tuadihudile nu tuasuangulugile muavula! Tuatshitshile guene ivo thano. Mu 1987, atutumine gu Tanzanie. Mu tangua diene, mafumu a leta akhalele akatula gale mukhuala wakhalele mutunyisa midimo yetu. Tuatshitshile guene ivo 26 gutuama egi tuvutuge gu Kenya.

Gukuatesa athu a gudibulumuisa ha gujiya giamatshidia gia Biblia, guatusuanguluishile muavula diago. Ha gufezegesa, muthu wa thomo ngalongesele Biblia mu dimbo dia Mombasa wakhalele yala. Ngadimonele n’enji tangua ngakhalele muya nu gulongesa. Ngamuhanele zulunalu mbadi. Gungima wanguhudile egi, “Gula ngamanesela gutanga zulunalu eji, itshi mbangukalagala?” Mu phoso yalanduile, ngasendesele gulonguga n’enji Biblia mu mukanda Vous pouvez vivre éternellement sur une terre qui deviendra un paradis, wa Swahili. Gungima dia givo gimoshi, wabatijiwe nu wabuile muvundji wa njila wa tangua diagasue. Sendese mu tangua diene, phangi muene nu mukaji’enji akuatesele gale athu hehi nu 100 ha gudihana gudi Yehowa nu ha batijiwa.

Tangua ngajiyile mbala ya thomo luholo lua gukhala nu gusuanguluga gua giamatshidia, ngadivuile gifua muenya mungenda yonu wamonele musanga wa ndando yavula, gatshiginyilego guwutotesa. (Mat. 13:45, 46) Ngakhalele mutshigina gudihana ha gukuatesa athu ha guheta gusuanguluga gua giamatshidia. Ame nu mukaji’ami, tuamonele gale luholo Yehowa wana kuatesa akombeledi enji ha gukhala nu gusuanguluga gua giamatshidia.