Nidabadwira ku Países Baixos mu 1948. Gole yamangwana yake banja yathu idafulukira ku São Paulo, Brasil. Azibereki wangu enze odzipereka maninge kutchetchi, ndipo nthawe zose timbawerengera pabodzi Baibolo tikandomaliza kudya chakudya cha maulo. Kudzafika mu gole ya 1959 tidafuluka pomwe, koma apa manje tidayenda ku Estados Unidos ndipo tidafikira mu boma ya Massachusetts.

Ababa angaphata basa mwakhama kuti asamalire banja ya wanthu 8. Iwo ambakomedzewa maninge kumbachita maulendo yokagulisa vinthu, kuphata basa yokonza misewu na kuphata basa pa kampani yoona va mafambidwe ya ndeke padziko yose. Tose tingakondwa na basa yawo ndawa imbachitisa kuti timbachite maulendo mosashupa.

Paningamaliza shikola, nimbadzibvunza nthawe zose kuti: ‘Nidzachite chani nikadzakula?’ Azishamwali wangu anango adasankhula kuyenda ku univerisidade ndipo anango adayenda kukapfunzira usocha. Koma inepano nimbafunalini ne pang’ono kuyenda ku usocha ndawa kumenya nkhondo kumbaniyipira. Ndipomwapa nidasaina kuyenda ku univerisidade pakundofuna kuthawa usocha. Nimbafunisisa  kuthandiza wanthu ndipo nimbawona kuti imwiyi ndiyo njira yokhalira na moyo waphindu.

Ku univerisidade nidakomedzewa na pfunziro yofotokoza momwe moyo udayambira ndipo nimbafuna kale kuidziwa bwinobwino nkhani mwiyi. Kumuku ambatipfunzisa kuti moyo udachita kuchinja ndipo ambafuna kuti timbatsimikizire. Vinthu vinango venze viribe umboni, koma iwo ambafuna kuti timbatsimikizire basi.

Kumashikola yomwe nidapfunzira, ambatipfunzisalini kusiyanisa chabwino na choipa. Koma ambafuna kuti timbandochita vomwe tinkufuna. Nimbakomedzewa kuyenda kumaphwando na kuphatisira basa mankhwala yosokoneza msolo. Koma chimwemwe changu chimbakhalisalini. Nimbadzibvunza kuti, ‘ko umoyu ndiye moyo waphindu?’

Kanthawe pang’ono nidafuluka nkuyenda ku thaundi ya Boston nkumbakachita mapfunziro yangu ya ku univerisidade. Kuti nikwanise kumbalipira shikola, nimbaphata basa yomwe idanichitisa kuti nigumane koyamba na Mboni za Yahova. Mwamuna munango yemwe nimbaphata naye basa adanifotokozera ulosi wa m’bukhu ya Danieli msolo 4 wolewa va ‘nthawe zokwana 7’ ndipo adati tinkukhala munthawe ya mapeto. (Dan. 4:13-17) Nidazindikira mwakankulumize kuti nikapitiriza kupfunzira naye nkumbavitengera siriyasi vomwe tinkupfunzira, vichitise kuti moyo wangu uchinje. Ndipomwapa akafuna kuti tipfunzire nimbamuthawa.

Ku univerisidade nidapfunzira basa zomwe zidanikonzekeresa kukaphata basa yakundodzipereka ku América do Sul. Nidaganiza kuti basa yothandiza wanthu inithandize kukhala na moyo waphindu. Koma nimbakaikira maninge kuti peno vomwe ninkuchita vinithandizedi kukhala na moyo waphindu. Pamwapo nidasiya mapfunziro ya ku univerisidade kumapeto kwa trimestre.

Mu Maio 1970 nidafulukira ku Amsterdam, ku Países Baixos kuti nikaphate basa pakampani ya ndeke ninge ababa wangu. Basa mweyi idanithandiza kuchita maulendo yokazungira madziko ya mu África, América na ku Ásia. Nidazindikira kuti wanthu wa m’madziko yose yanazungira ankugumana na mabvuto ndipo palibe ne m’bodzi yemwe angayamalise. Panidakhala pomwe na shungu yochita chinthu chinango chaphindu pamoyo wangu, nidabwerera ku Estados Unidos kuti nikapfunze pomwe ku univerisidade ya ku Boston.

Koma nidazindikira mwakankulumize kuti mashikola yalibe kunithandiza kugumana midawiro ya mibvunzo yangu yolewa va moyo. Pinidasowa chochita, nidakabvunza aticha wangu kuti anithandizeko nzeru. Vadanidawira vidanidabwisa maninge. Iwo adati: ‘Tani usiye kupfunza? Ndoyasiya mapfunziro ya ku univerisidade.’ Nidawona kuti vingakhaledi bwino kuti nisiye. Ndipomwapa nidasiyadi.

Ningaona kuti moyo ulibe phindu, ndipomwapa nidangena mukagulu ka wanthu womwe ambalewa kuti tisambandobvera vilivose. Gulu mweyi imbawoneka kuti ibwerese ntendere na kuthandiza wanthu kukondana. Inepano na azishamwali wangu tidayenda ku Estados Unidos mpakana ku Acapulco, México. Timbakhala na wanthu womwe ambabveralini boma ndipo ambawoneka ninge alibe mabvuto. Koma nidazindikira kuti kukhala na wanthu mwawa kunithandizelini kukhala na moyo  waphindu na kukhaladi wokondwa chaivo. Koma kundonichitisa kuti nikhale wosakhulupirika na wosowa chilungamo.

Panthawe mweyi nidayamba kuganizira vanimbafuna kuchita penenze mwana. Nimbafuna kumbachita maulendo yapamadzi, osati kuchita kunyamuliwa, koma kumbafambisiratu nekha. Kuti nikwanise vimwevi nidagula barko yanguyangu. Pakuti shamwali wangu Tom ambafunambo vimwevi, tidasaina kuti timbachitire pabodzi maulendo mwaya. Timbafuna kuchita maulendo mwaya mpakana tikagumane ntsuwa yabwino kuti waboma asambakatishupe na malamulo yawo.

Inepano na Tom tidachita ulendo wa panyanja mpaka kukafika ku Arenys de Mar, kufupi na Barcelona ku Espanha. Kumuko tidagula barko itali 9.4 metro yochemerewa Llygra. Tidayamba na kuikonzakonza kuti timbachite maulendo ya panyanja motetezeka. Pakuti wenzelini ulendo wakuti tifike-tifike, tidachosa injini nkuikhapo madzi yazinji kuti timbamwe paulendo. Kuti timbakwanise kuiyimisa pamalo yotsamisira yang’ono, tidakonza ng’ombo ziwiri zotalimpha 5 metro. Pamapeto pake tidayamba ulendo wa ku Seychelles, ku Oceano Índico. Cholinga chathu chenze kuyenda m’mbali-m’mbali mwa África mpakana kukafika ku Cape of Good Hope (Cabo da Boa Esperança) ku África do Sul. Kuti tileke kusokera, timbaphatisa basa sextante, nyenyezi, gráfico de estrelas na amanaques. Nidakondwa kuwona kuti tinkuyenda bwinobwino ne kusokera.

Koma mwadzidzidzi tidazindikira kuti barko yathu itifikiselini bwinobwino. Iyo imbangena madzi yokwana 22 litru pa ora iliyose. Ninga mwanafotokozera kale kumayambiriro, panthawe yoshupa mweyi, nidapemphera koyamba kwa Mulungu pamoyo wangu nkumupolomisa kuti, peno angatipulumuse, nidzayesese kuti nimudziwe bwino. Tidapulumuka pangozi mwiyi, koma nidasunga polomisi yangu.

Nidayamba kulewenga Baibolo panthawe yetenze pamadzi. Ndoganizani imwepo kukhala panyanja ya Mediterrâneo pomwe panavintsomba vikuluvikulu ndipo kose kwamunganyang’ane, maso kumbaperewera. Usiku nimbachita chidwi na mulalang’amba wochemerewa kuti Galáxia Via Láctea womwe udanichitisa kutsimikiza kuti udachita kukonzewadi na Mulungu.

Patidachita ulendo kwa masondo yanganani panyanja, tidafika ku Alicante ku Espanha. Kumuku tidayamba kutsatsa barko yathu kuti tigumane kobiri yogulira inango. Pakuti yenze ya kalekale, tilibe kudabwa kuwona kuti inkuguliwalini kankulumize. Panthawe mwiyi nidakhala na mpata wowerenga Baibolo yangu.

Panidakhala nthawe itali ninkuwerenga Baibolo, nidawona kuti inganithandize kukhala na moyo waphindu. Nidachita chidwi maninge kuwona kuti Baibolo inkufotokoza kuti tifunika kukhala waukhuzi na wa khalidwe yabwino. Koma nimbadabwa kuti wanthu azinji kuphatanidzapo inepano, timbafunalini kutewedza mpfundo za m’Baibolo podiya kuti timbadziona kuti ndise Akhrisitu.

Nidatsimikiza kukonza vinthu pamoyo wangu,ndipomwapa nidalekeratu kuphatisa basa mankhwala yosokoneza msolo. Nidayamba kuganiza kuti alipo wanthu womwe atewedzadi mpfundo za makhalidwe yabwino za m’Baibolo, ndipo nenze wofunisisa kugumana nawo. Kachiwiri, nidapemphera kwa Mulungu kuti anithandize kuwagumana.

Inepano nimbawona kuti nivobveka kumbapitirira vipembedzo vinango pomwe ninkufagafaga chipembedzo chaicho. Paningafamba m’misewu ya ku Alicante, nidawona matchetchi yazinji, koma ndawa yakuti yazinji yenze na vifaniziro, venze vosashupa kuti niyachose pa ndandanda yangu ya vipembedzo.

Ntsiku inango pasondo masikati, penenze khale pamalo yotsamisira mabarko nimbawerenga lemba ya Yakobo 2:1-5, yomwe ifotokoza kuti ayi kuti timbaikhire kumbuyo wanthu wolemera. Paningabwerera kuti tikakwere barko yathu, nidawona nyumba inango yomwe ingawoneka kuti ni yochitira misonkhano yachipembedzo, ndipo yenze yonemba kuti: “Nyumba ya Ufumu ya Mboni za Yahova.”

Nidayamba kuganiza kuti: ‘Nifuna niwayese wanthu mwawa, nifuna nikangene kuti nikawone momwe akanitambirire.’ Nidangena nilibe ntsapato, ninavindebvu na buluku ya djini yong’ambikang’ambika. Adanitambira nkunikhazika pafupi na munthu wachikulire yemwe adanithandiza mwachikondi kugumana mavesi ya m’Baibolo mosashupa pomwe nkhani ingakambika. Misonkhano paidamala, nidakondwa kuwona wanthu ankubwera kudzanimonisa mwantsangala. Mwamuna munango adanichemerera kumuyi kwawo kuti tikacheze. Koma pakuti nenze nikalibe namaliza kuwerenga Baibolo, nidamuuza kuti: ‘Nikugumaneni manjemanje nikapeza mpata.’ Muntsiku pang’ono, nidayamba kugumanika m’misonkhano yose ya mpingu.

Masondo pang’ono, nidayenda kumuyi kwa mwamuna ule ndipo adadawira mibvunzo yangu pakuphatisa basa Baibolo. Paidamala sondo ibodzi, iye adanipasa chola chodzala na vovala vabwino. Iye adaniuza kuti munikachiro wa vovala vimwevi ali kudjeri ndawa yobvera lamulo yakuti timbakondane na yakuti ayi kuti timbapfunzire nkhondo. (Yes. 2:4; Yoh. 13:34, 35) Vimwevi vidanitsimikizira kuti nawagumanadi wanthu womwe achaphatisira basa mpfundo za makhalidwe yabwino ya m’Baibolo. Nidasiya cholinga changu chakuti nifagefage kantsuwa kabwino ndipo nidadziikhira cholinga chakuti nipfunzire Baibolo. Ndipomwapa nidabwerera ku Países Baixos.

Nidamala ntsiku zinayi ninkuchita ulendo wa ku thaundi ya Groningen, ku Países Baixos. Kumuku nimbafunika kugumana basa kuti nimbadzisamalire. Panidakumbira basa pa banka inango yokonza vamatabwa, adati niwadziwise kuti nipemphera tchetchi yanyi. Nidanemba kuti: ‘Ndine wa Mboni za Yahova.’ Padawerenga, adaniuza kuti: ‘Nidzakuchemere.’ Koma alibe kunichemera.

 Pinidayenda pa banka inango yokonza vamatabwa, nidabvunza munichiro kuti peno ankufuna womuthandiza. Iye adati nimupase diploma yangu na vitsamba vofotokoza basa zomwe nidaphatako kale. Nidamufotokozera kuti nidaphatako kale basa yokonza mabarko yodzongeka. Nidadabwa maninge padaniuza kuti: ‘Iwepo ungayambiretu basa masikati yano, koma nifuna nikuuze chinthu chibodzi. Osati unibweresere mabvuto pano ndawa ndine wa Mboni za Yahova ndipo nitewedza mpfundo za m’Baibolo.’ Nidamunyang’anisisa modabwa nkumuuza kuti: ‘Inembo ndine wa Mboni za Yahova.’ Iye padawona ndebvu zangu na tsitsi yangu itali adadabwa nkuniuza kuti: ‘Peno nteno nimbapfunzire nawe Baibolo.’ Nidabvuma na moyo wose. Pamwapo nidabvesa kuti ndawa chani munthu woyamba ule adalamba kuninemba basa. Yahova angafuna kudawira mapemphero yangu munjira yabwino. (Sal. 37:4) Nidaphata basa pa banka ya munthu moyu kwa gole ibodzi. Panthawe mweyi iye adanipfunzisa Baibolo ndipo nidabatizika mu Janeiro 1974.

Pinidamala mwezi ubodzi nidayambiratu upainiya womwe udachitisa kuti nikhale wokondwa maninge. Mwezi wa mangwana yake nidafuluka nkuyenda ku Amsterdam kukathandiza kagulu ka chiseweredwe cha Espanhol. Nidakondwa kuchitisa mapfunziro ya Baibolo mu Espanhol na Português. Mu 1975 nidakhala na mwayi wotumikira ninge mpainiya wapadera.

Ntsiku inango mulongo munango yemwe wenze mpainiya wapadera dzina yake Ineke, adabwera kumisonkhano yathu ku Bolívia na pfunziro yake kuti idziweko abale na alongo. Inepano na Ineke tidapangana kuti timbanemberane makalata kuti tidziwane bwino. Makalata mwaya yadatithandiza kuwona kuti tinavolinga volingana. Tidalowolana mu 1976 ndipo tidapitiriza kutumikira ninge apainiya wapadera mpakana mu 1982 pomwe tidachemerewa kuti tikangene turma 73 ya Shikola ya Giliyadi. Tidakondwa padatitumiza ku África kuti tikatumikire ku Mombasa ku Quênia. Mu 1987 tidatumiziwa ku Tanzânia komwe basa yathu yenze yolambiziwa koma apa manje kwenze ufulu. Tidatumikira kumoku kwa magole 26 ndipo patsogolo pake tidabwerera ku Quênia.

Kuthandiza wanthu wolemekeza choonadi cha m’Baibolo kudatithandiza kukhala na moyo waphindu. Mwakulinganiza, munthu woyamba kupfunzira naye Baibolo ku Mombasa, tidagumana naye patingalalikira muyi na muyi. Panidamusiyira magazini yawiri iye adati: ‘Manje nikadzamaliza kuyawerenga nidzachite pomwe chani?’ Sondo ya mangwana yake nidayamba kupfunzira naye Baibolo pophatisa basa bukhu ya Mungathe Kukhala ndi Moyo Kosatha m’Paradaiso pa Dziko Lapansi yomwe yenze idabula kale mu Chiswahili. Paidamala gole ibodzi iye adabatizika nkuyambiratu upainiya wokhazikika. Kundochokera nthawe mweyo, iye na nkazi wake akhala ankuthandiza wanthu pafupifupi 100 kuti adzipereke na kubatizika.

Pinidayamba kubvesa cholinga cha moyo, nidabva ninge wamalonda wofambafamba yemwe adagumana chuma chantengo wapatali ndipo ambafunalini kuchiluza. (Mat. 13:45, 46) Nenze wofunisisa kuphatisa basa moyo wangu pakuthandiza anango kuti akhale na moyo waphindu. Inepano na nkazi wangu tachita kuwona tekha momwe Yahova ankuthandizira wanthu kukhala na moyo wa phindu. Ineke na inepano tachita kuowa tekha momwe Yahova ankuthandizira wanthu kukhala na moyo waphindu