آپبیتی
میں اِک بامقصد زندگی گزارنا چاہنا ساں
میں بحیرۂروم دے کنارے توں بڑی دُور اپنی کشتی چلا رہیا ساں۔ پر فیر اچانک کشتی پانی نال بھرن لگ پئی تے میں بوہت ڈر گیا۔ دراصل میری کشتی بوہت ای پرانی سی تے ایہدے چ مورا ہو گیا سی تے سونے تے سہاگا ایہہ کہ سمندر چ طوفان وی آ گیا۔ میں بوہت زیادہ ڈر گیا تے دُعا کرن لگ پیا۔ مینوں یاد نئیں کہ میں کِنّے سالاں بعد دُعا کیتی سی۔ آؤ، میں توانوں دَسنا واں کے میں اوس کشتی چ سفر کیوں کر رہیا ساں۔ اوس توں پہلاں میں توانوں اپنی زندگی دے شروع دے کجھ سالاں بارے دَسنا واں۔
جدوں میں سَت سالاں دا ساں تے میں تے میرے گھر والے برازیل چ رہنے ساں۔
میں 1948 چ نیدر لینڈز چ پیدا ہویا۔ میرے پیدا ہون دے اِک سال بعد میرے گھر والے برازیل دے اِک شہر ساؤ پاؤلو رہن چلے گئے۔میرے ماں پیو بڑے مذہبی سن۔ ہر شام کھانا کھان توں بعد اَسی سارے گھر والے مل کے بائبل پڑھنے ساں۔ 1959 چ اَسی برازیل توں امریکہ دی اِک ریاست میساچیوسٹس چ رہن چلے گئے۔
اَسی چھ بھین بھرا ساں تے ابو ساڈیاں ضرورتاں پوریاں کرن لئی بڑی محنت کردے سن۔اوہ اِک سیلزمین تے اک مزدور سن تے اِک اِنٹرنیشنل ائیر لائن کمپنی چ وی اِک نوکری کردے سن۔ جدوں اوہناں نُوں ائیر لائن والی نوکری ملی تے اَسی سارے بڑے خوش ہوئے کیونکہ ایہدی وجہ توں اَسی دُوجیاں مُلکاں دا اسانی نال سفر کر سکنے ساں۔
جدوں میں سکول چ پڑھنا ساں تے میں اکثر ایہہ سوچنا ساں کہ وڈا ہو کے میں کیہہ کراں گا؟ میرے کجھ دوستاں نے یونیورسٹی جان دا تے کجھ نے فوج چ بھرتی ہون دا فیصلہ کیتا۔ پر میں تے کدی وی فوج چ جان بارے نئیں سوچیا سی کیونکہ لڑائی جھگڑے کرنا مینوں بالکل پسند نئیں سی۔ ایس لئی میں یونیورسٹی چ داخلہ لے لیا تاکہ مینوں فوج چ بھرتی نہ ہونا پووے۔ پر میری ایہہ خواہش سی کہ میں دُوجیاں دی مدد کراں کیونکہ مینوں لگدا سی کہ اِنج کرن نال میری زندگی نُوں اِک مقصد مل جائے گا۔
یونیورسٹی چ زندگی
میں کئی سالاں تک بامقصد زندگی دی تلاش کردا رہیا۔
جدوں میں یونیورسٹی چ ساں تے مینوں ایہہ جانن دا بڑا شوق سی کہ زندگی دی شروعات کِنج ہوئی۔ ایس لئی میں ایہدے بارے مطالعیا کرنا ساں۔سانوں اِرتقا دی تلیم دِتی جاندی سی تے ساڈے کولوں ایہہ توقع کیتی جاندی سی کہ اَسی ایہنوں سچ منیے۔پر اِرتقا دے بارے کجھ گلاں تے بڑیاں ای بےتکیاں سن تے اوہناں نُوں سچ منن لئی ضروری سی کہ میں سائنسی ثبوتاں نُوں نظرانداز کر دَواں۔
یونیورسٹی چ سانوں اخلاقی معیاراں بارے کجھ وی نئیں سکھایا جاندا سی۔ اوتھے تے بس ایس گل دے زور دِتا جاندا سی کہ اَسی یونیورسٹی چ چنگے توں چنگے نمبر حاصل کرن لئی کسے وی حد تک جان نُوں تیار رہیے۔ مینوں اوس ویلے بڑی خوشی مِلدی سی جدوں میں اپنے دوستاں نال پارٹیاں کرنا ساں تے فرق فرق نشے کرنا ساں۔ پر ایہہ خوشی تھوڑی دیر لئی ہوندی سی۔ میں سوچنا ساں کہ کیہہ میں واقعی اِک بامقصد زندگی گزار رہیا واں؟
کجھ عرصے بعد میں شہر بوسٹن شفٹ ہو گیا تے اوتھوں دی یونیورسٹی چ داخلہ لے لیا۔ اپنی پڑھائی دا خرچہ پورا کرن لئی میں چھٹیاں چ نوکری کرنا ساں۔ اوہدوں پہلی وار میری ملاقات یہوواہ دے اِک گواہ نال ہوئی جنہے میرے نال دانیایل 4 باب چ لکھی سَت دَوراں والی پیشینگوئی بارے گل کیتی۔ اوہنے مینوں دَسیا کہ اَسی آخری زمانے چ رہ رہے آں۔ (دانیایل 4:13-17) اوہدے نال گل کرکے مینوں چھیتی ای اندازہ ہو گیا کہ جے میں اِنج ای اوہدے نال بائبل چوں گل بات کردا رہیا تے میں وی بائبل چ لکھیاں گلاں منن لگ پواں گا تے فیر مینوں اپنی زندگی وی بدلنی پئے گی۔ ایس لئی میں اوس گواہ توں دُور رہن دی پوری کوشش کیتی۔
یونیورسٹی چ میں کجھ کورس کیتے تاکہ میں جنوبی امریکہ چ اِک رضا کار دے طور تے کم کر سکاں۔ میں سوچنا ساں کہ ضرورتمند لوکاں دی مدد کر کے مینوں میری زندگی دا مقصد مل جائے گا۔ پر فیر میں محسوس کیتا کہ اِنج کرن نال وی مینوں میری زندگی دا مقصد نئیں مل سکدا۔ میں بڑا مایوس ہو گیا تے یونیورسٹی چھڈ دِتی۔
بامقصد زندگی دی تلاش دُوجے مُلکاں چ وی جاری رہی
مئی 1970 چ میں نیدر لینڈز دے شہر ایمسٹر ڈیم چلا گیا تے اوسے ائیر لائن کمپنی چ کم کرن لگ پیا جِتھے میرے ابو کم کردے سن۔ ایس نوکری دی وجہ توں میں افریقہ، امریکہ، یورپ تے ایشیا دے کئی مُلکاں چ گیا۔ایہناں مُلکاں چ جا کے مینوں احساس ہویا کہ اوتھے دے لوکاں نُوں وی وڈے وڈے مسئلیاں دا سامنا کرنا پے رہیا اے تے کسے کول وی ایہناں مسئلیاں دا حل نئیں۔ میں حالے وی اپنی زندگی چ کوئی ایہو جیہا کم کرنا چاہنا ساں جدے توں دُوجیاں نُوں فائدہ ہوئے۔ ایس لئی میں فیر امریکہ چلا گیا تے بوسٹن دی اوس یونیورسٹی چ فیر توں داخلہ لے لیا۔
پر چھیتی ای مینوں محسوس ہویا کہ یونیورسٹی دی پڑھائی کرن نال وی مینوں اپنے سوالاں دے جواب نئیں مل رہے۔ مینوں سمجھ نئیں آ رہیا سی کہ میں کیہہ کراں۔ ایس لئی میں اپنے اِک پروفیسر کولوں مشورہ لیا۔ اوہنے مینوں اِک گل کہی، جنہوں سُن کے میں بڑا ای حیران ہویا۔ اوہنے کہیا میرا خیال اے کہ تُوں یونیورسٹی چھڈ دے۔ میں تے پہلاں ای ایہہ کرن لئی تیار بیٹھا ساں۔ میں یونیورسٹی چھڈ دِتی تے فیر کدی اوتھے واپس نہ گیا۔
مینوں حالے وی اپنی زندگی بڑی خالی خالی لگ رہی سی۔ ایس لئی میں اِک ایہو جہے گروہ دا حصہ بن گیا جیہڑا دُنیا دے بنائے ہوئے رسماں رواجاں تے نئیں چلدا سی۔ مینوں لگدا سی کہ ایہہ گروہ امن تے محبت نُوں پھیلا رہیا اے۔ میں اپنے کجھ دوستاں دے نال امریکہ توں میکسیکو دے شہر اکاپولکو گیا۔ اَسی کجھ ایہو جہے لوکاں دے نال رہن لگ پئے جیہڑے اپنی مرضی دی زندگی جی رہے سن تے اوہناں نُوں ویکھ کے لگدا سی کہ اوہ مشکلاں تے پریشانیاں توں آزاد نیں۔ پر اوہناں دے نال کجھ وقت رہ کے مینوں ایہہ اندازہ ہو گیا کہ اوہ لوک جیس طرحاں دی زندگی گزار رہے نیں،اوہدا نہ تے کوئی مقصد اے تے نہ ای ایہدے توں خوشی مِلدی اے۔ میں تے ایہہ وی ویکھیا کہ اوہناں چوں کجھ لوک بےایمان تے دھوکھےباز سن۔
بامقصد زندگی دی تلاش ختم نہ ہوئی
اپنے اِک دوست نال اِک خوبصورت جزیرے تے۔
ایسے ای عرصے چ میں اپنے اوس خواب دے بارے سوچن لگ پیا جیہڑا میں بچپن چ ویکھنا ساں۔ میرا خواب سی کہ میں سمندر چ کشتی چلاواں پر اِک کیپٹن بن کے۔ ایہہ اوسے ای صورت چ ہو سکدا سی جے میرے کول اپنی کشتی ہوندی۔ میرے دوست ٹام دی وی ایہی خواہش سی ایس لئی اَسی فیصلہ کیتا کہ اَسی کشتی دے ذریعے دُنیا دا سفر کراں گے۔ میں اِک ایہو جہے جزیرے دی تلاش چ ساں جِتھے کوئی قاعدہ قانون نہ ہووے۔
ٹام تے میں آرینیس ڈیمار گئے جیہڑا سپین دے شہر بارسیلونا دے نیڑے وے۔اوتھے اَسی 31 فٹ (4.9 میڑ) لمبی کشتی خریدی جدا ناں اَسی لیگرا رکھیا۔ اَسی اپنی کشتی دی تھوڑی بوہت مرمت کیتی تاکہ سفر کردے ہوئیاں سانوں کوئی مشکل نہ ہوئے۔ سانوں اپنی منزل تک پونچن دی کوئی چھیتی نئیں سی ایس لئی اَسی کشتی دا اِنجن کڈھ دِتا تاکہ ساڈے کول پین والا پانی رکھن لئی بوہتی جگہ بن جائے۔ کشتی نُوں بندرگاہ توں اسانی نال موڑن لئی اَسی 16 فٹ (5 میڑ) لمے چپّو خریدے۔ فیر اَسی بحرہند چ واقع سیشلز جزیرے تے جان دا سفر شروع کیتا۔ ساڈا ارادہ سی کہ اَسی افریقہ دے مغربی ساحل تے جنوبی افریقہ دے اِک جزیرے دے آلے دوالے سفر کرئیے۔ اَسی صحی منزل وَل جان لئی تاریاں، کجھ نقشیاں، کتاباں تے سادہ جہے اوزاراں نُوں استمال کیتا۔ مینوں بڑی حیرانی ہو رہی سی کہ ایہناں چیزاں دی مدد نال اَسی بالکل صحی پاسے جا رہے ساں۔
پر چھیتی ای سانوں اندازہ ہو گیا کہ سمندری سفر لئی ایہہ کشتی صحی نئیں سی کیونکہ ایہہ چھوٹی تے پرانی سی۔ ایہدے چ اِک گھنٹے بعد تقریباً 22 لیٹر (چھ گیلن) پانی بھر جاندا سی۔ تے جیویں کہ میں مضمون دے شروع چ ذکر کیتا سی، جدوں سمندر چ طوفان آیا تے میں ایناں ڈر گیا کہ میں بڑے سالاں بعد میں خدا کولوں دُعا کیتی۔ میں اوہدے نال وعدہ کیتا کہ جے میں زندہ بچ گیا تے میں اوہدے بارے سکھن دی پوری کوشش کراں گا۔ تھوڑی دیر بعد طوفان رُک گیا تے میں اپنا وعدہ پورا کیتا۔
میں سفر دے دوران بائبل پڑھنا شروع کر دِتی۔ تُسی سوچ سکدے او کہ بحیرۂروم وچ کشتی چ بیٹھ کے اپنے آلے دوالے فرق فرق قسماں دِیاں مچھیاں تے دُور تک پھیلے سمندر نُوں ویکھ کے مینوں کِنّاں چنگا لگدا ہوئے گا۔ تے رات دے ویلے جدوں میں تاریاں نال بھریا اسمان ویکھنا ساں تے میں بوہت حیران ہو جانا ساں۔ ایس گل توں میرا یقین ہور وی پکا ہو گیا کہ خدا موجود اے تے اوہنوں انساناں دی فکر اے۔
کجھ ہفتیاں تک سمندر چ سفر کرن دے بعد اَسی سپین دے اِک شہر الیکانتے دی بندرگاہ تے پونچے۔ اوتھے اَسی اپنی کشتی ویچن دی کوشش کیتی تاکہ اَسی ایس توں بہتر کشتی خرید سکیے۔ سانوں ایس گل دا پتہ سی کہ اپنی پرانی، بغیر اِنجن تے مورے والی کشتی نُوں ویچنا اسان نئیں ہوئے گا۔ پر ایس دوران مینوں بائبل پڑھن دا کافی وقت مل گیا۔
جِنّاں زیادہ میں بائبل نُوں پڑھدا گیا،اوناں ای زیادہ مینوں ایہہ احساس ہوندا گیا کہ ایس کتاب چ لکھیاں ہدیتاں تے عمل کرن نال ساڈی زندگی خوشیاں نال بھر سکدی اے۔مینوں ایہہ گل بڑی ودھیا لگی کہ بائبل چ صاف صاف لکھیا اے کہ سانوں پاک صاف زندگی گزارنی چاہی دی اے۔ میں سوچن لگ پیا کہ اَسی بائبل چ لکھیاں گلاں نُوں تے من دے نئیں تے فیر اَسی اپنے آپ نُوں مسیحی کیویں کہہ سکنے آں۔
میں فیصلہ کیتا کہ میں اپنی زندگی نُوں پاک صاف رکھن لئی پوری کوشش کراں گا۔ ایس لئی میں نشہ کرنا چھڈ دِتا۔ مینوں یقین سی کہ کِتے نہ کِتے ایہو جہے لوک ضرور ہون گے جیہڑے بائبل دے اصولاں تے عمل کردے ہون گے تے میں اوہناں نُوں ملنا چاہنا ساں۔ فیر میں زندگی چ دُوجی وار خدا توں دُعا کیتی تے کہیا کہ اوہ ایہو جہے لوکاں نُوں لبھن چ میری مدد کرے۔
سچے مذہب دی تلاش
میں سوچیا کہ جدوں تک مینوں سچا مذہب مل نئیں جاندا،اوہدوں تک میں ہر مذہب دا اِک اِک کر کے جائزہ لواں گا۔ میں شہر الیکانتے چ پھردے ہوئیاں بوہت ساریاں مذہبی عمارتاں ویکھیاں۔ ایہناں وچوں زیادہتر چ بُت رکھے ہوئے سن۔ ایس لئی میں سمجھ گیا کہ ایہناں عمارتاں چ عبادت کرن والے لوکاں دا مذہب سچا نئیں اے۔
اِک اِتوار دی دوپہر نُوں میں اِک پہاڑ تے بیٹھا ہویا ساں تے یعقوب 2:1-5 نُوں پڑھ رہیا ساں جدے چ لکھیا سی کہ اِک بندے دی دولت دی وجہ توں اوہدی طرفداری کرنا غلط اے۔ جدوں میں اپنی کشتی وَل جا رہیا ساں تے راہ چ میری نظر اِک عمارت تے پئی جدے تے لکھیا سی: ”یہوواہ دے گواہواں دی عبادتگاہ۔“
میں سوچیا کہ کیوں نہ ایہناں لوکاں نُوں وی ملاں تے ویکھاں کہ ایہہ مینوں کیس طرحاں مِلدے نیں۔ میں ننگے پیر اوہناں دی عبادتگاہ دے اندر چلا گیا۔ میری جینز پاٹی ہوئی سی تے میری داڑھی وی ودھی ہوئی سی۔ اوتھے اِک بندے نے مینوں بیٹھن لئی جگہ دِتی۔ میرے نال والی سیٹ تے اِک وڈیری عورت بیٹھی ہوئی سی۔ اوہنے مینوں بائبل چوں اوہ ایتاں وکھائیاں جیہڑیاں مقرر دَس رہیا سی۔ جدوں عبادت ختم ہوئی تے سارے مینوں بڑے پیار تے محبت نال ملے۔ایس گل نے میرے تے بوہت اثر کیتا۔ اِک بندے نے مینوں ایہہ وی کہیا کہ بائبل چوں گل بات کرن لئی میں اوہدے گھر چلاں۔میں حالے تک پوری بائبل نُوں نئیں پڑھیا سی ایس لئی میں اوہنوں کہیا کہ میں آپ اوہنوں دَساں گا کہ اَسی کدوں بائبل چوں گل بات کر سکنے آں۔ پر اوہدوں تک میں گواہواں دی ہر عبادت تے جاندا رہیا۔
میں کئی ہفتیاں بعد اوس بندے دے گھر گیا۔ اوہنے بائبل دے بارے میرے سوالاں دے جواب دِتے۔ ایہدے اِک ہفتے بعد اوہنے مینوں بڑے چنگے کپڑیاں نال بھریا ہویا اِک بیگ دِتا۔ اوہنے مینوں دَسیا کہ ایہہ کپڑے جیس بندے دے نیں، اوہ ایس ویلے جیل چ وے۔ اوہنوں ایہہ سزا ایس لئی ملی کیونکہ اوہنے بائبل دے ایس حکم تے عمل کیتا کہ سانوں اِک دُوجے نال محبت کرنی چاہی دی اے تے جنگ نئیں کرنی چاہی دی۔ (یسعیاہ 2:4؛ یوحنا 13:34، 35) ہُن مینوں پورا یقین ہو گیا کہ مینوں اوہ لوک مل گئے نیں جنہاں نُوں میں لبھ رہیا ساں یعنی اوہ لوک جیہڑے بائبل دے ایس حکم تے پوری طرحاں عمل کردے نیں کہ سانوں پاک صاف زندگی گزارنی چاہی دی اے۔ ہُن میری زندگی دا مقصد ایہہ نئیں سی کہ میں اِک خوبصورت جزیرے نُوں لبھاں سگوں ایہہ سی کہ میں بائبل دے بارے ہور چنگی طرحاں سکھاں۔ ایس لئی میں واپس نیدر لینڈز چلا گیا۔
نوکری دی تلاش
مینوں نیدر لینڈز دے شہر گرونیگن جان لئی چار دن دا سفر کرنا پیا۔ مینوں اوتھے رہن لئی کم لبھن دی لوڑ سی۔ میں اِک ترکھان دی دکان تے نوکری دی درخاست دِتی۔ ایس نوکری دے فارم تے اِک سوال ایہہ سی کہ میرا تعلق کیس مذہب نال اے۔ میں لکھیا: ”یہوواہ دا گواہ۔“ جدوں باس نے ایہنوں پڑھیا تے اوہدے چہرے نُوں ویکھ کے مینوں اندازہ ہو گیا کہ اوہنوں ایہہ گل پسند نئیں آئی۔ اوہنے مینوں کہیا کہ میں تینوں فون کرکے دَساں گا کہ تینوں ایہہ نوکری ملے گی یاں نئیں۔ پر اوہدا فون کدی وی نئیں آیا۔
فیر میں اِک ہور ترکھان دی دکان تے گیا تے اوہنوں پچھیا کہ کیہہ اوہ مینوں کوئی نوکری دے سکدا اے۔ اوہنے میری سند منگی تے میری پرانی نوکری دے مالک وَلّوں اِک خط وی۔ میں اوہنوں دَسیا کہ میں تے بس اِک لکڑی دی کشتی دی مرمت کیتی اے۔ میں دَس نئیں سکدا کہ مینوں کِنّی حیرت ہوئی جدوں اوہنے مینوں کہیا: ”تُوں اَج توں ای کم شروع کر سکنا ایں۔ پر صرف اِک شرط تے۔“ اوہنے کہیا کہ میں نئیں چاہندا کہ تیری وجہ توں میری دکان تے کوئی مسئلہ ہوئے کیونکہ میں یہوواہ دا گواہ واں تے بائبل چ لکھے اصولاں تے عمل کرنا واں۔ میں فیر حیرت نال اوہنوں ویکھن لگ پیا تے کہیا:”میں وی یہوواہ دا گواہ واں۔“ شاید میرے لمے والاں تے لمی داڑھی نُوں ویکھ کے ای اوہنے مینوں کہیا کہ فیر میں تینوں بائبل کورس کرانواں گا۔ میں اوہدے نال بائبل کورس کرن تے راضی ہو گیا۔ مینوں پکا یقین ہو گیا سی کہ یہوواہ نے مینوں میریاں دُعاواں دا جواب دِتا اے۔ ایس لئی کسے ہور جگہ تے میری نوکری دی درخاست منظور نئیں ہوئی۔ (زبور 37:4) میں اوس بھرا دی دکان تے اِک سال کم کیتا۔ ایس عرصے چ اوہ مینوں بائبل کورس کراندا رہیا۔ ایہدے بعد جنوری 1974 چ میں یہوواہ دے گواہ دے طور تے بپتسمہ لے لیا۔
اخیر مینوں زندگی دا مقصد مِل گیا
اِک مہینے بعد میں پہلکار بن گیا تے ایہدی وجہ توں میں بوہت خوش ساں۔ فیر ایہدے اِک مہینے بعد میں نیدر لینڈز دے دارالحکومت ایمسڑ ڈیم چلا گیا۔ اوتھے جان دی وجہ ایہہ سی کہ اوتھے سپینش زبان دا اِک نواں گروپ شروع ہویا سی تے میں اوہدی مدد کرنا چاہنا ساں۔ ایمسڑ ڈیم چ میں سپنش تے پُر تگالی بولن والے لوکاں نُوں بائبل کورس کرایا جدے توں مینوں بڑی خوشی ملی۔ مئی 1975 چ مینوں خاص پہلکار بنن دا شرف ملیا۔
اِک دن اِک خاص پہلکار ساڈی عبادت تے آئی جدا ناں اِنیکے سی۔ اوہنے میرا تعارف بولیویا توں تعلق رکھن والی اِک عورت نال کروایا جنہوں اوہ بائبل کورس کروا رہی سی۔ اِنیکے تے میں اِک دُوجے نُوں پسند کرن لگ پئے۔ اَسی خطاں دے ذریعے اِک دُوجے نُوں جانن دا فیصلہ کیتا۔ چھیتی سانوں پتہ چل گیا کہ یہوواہ دی خدمت بارے ساڈے منصوبے اِکو جہے نیں۔ 1976 چ اَسی شادی کر لئی تے 1982 تک خاص پہلکار دے طور تے خدمت کیتی۔ ایہدے بعد سانوں گلئیڈ سکول دی 73ویں کلاس چ شامل ہون دی دعوت ملی۔ اَسی اوس ویلے بوہت حیران تے خوش ہوئے جدوں سانوں مشرقی افریقہ چ یہوواہ دی خدمت کرن لئی کہیا گیا۔ اَسی کینیا دے شہر ممباسا چ 5 سال رہے تے لوکاں نُوں بائبل چوں تلیم دِتی۔ 1987 چ سانوں ملک تنزانیہ گھلیا گیا کیونکہ اوتھے ساڈے مُنادی دے کم توں پابندی ہٹ گی سی۔ اَسی اوتھے 26 سال تک رہے تے ایہدے بعد واپس کینیا آ گئے۔
مشرقی افریقہ چ لوکاں نُوں پاک کلام دِیاں سچائیاں سکھان نال مینوں تے میری بیوی نُوں بوہت خوشی ملی۔
خاکسار لوکاں نُوں بائبل دِیاں سچائیاں سکھان نال سانوں ساڈی زندگی دا مقصد ملیا۔ مثال دے طور تے ممباسا چ میرے پہلے طالبِعلم نال میری ملاقات عوامی تھانواں تے گواہی دیندے ویلے ہوئی۔ جدوں میں اوہنوں دو رسالے پڑھن لئی دِتے تے اوہنے مینوں پچھیا: ”ایہناں نُوں پڑھن دے بعد میں کیہہ کراں؟“ اگلے ہفتے میں اوہنوں کتاب ”آپ زمین پر فردوس میں ہمیشہ زندہ رہ سکتے ہیں“ چوں بائبل کورس کران لگ پیا جیہڑی تھوڑا عرصہ پہلاں ای سواحلی زبان چ چھپی سی۔ اوس بندے نے اِک سال بعد بپتسمہ لے لیا تے پہلکار بن گیا۔ اوہدوں توں اوہنے تے اوہدی بیوی نے تقریباً 100 لوکاں دی بائبل تلیم نُوں سکھن چ مدد کیتی اے تاکہ اوہ وی اپنی زندگی یہوواہ دے ناں کرن تے بپتسمہ لین۔
میں تے اِنیکے نے ویکھیا اے کہ یہوواہ اپنے بندیاں نُوں بوہت برکتاں دیندا اے۔
جدوں میں زندگی دا مقصد سمجھ گیا تے شروع شروع چ مینوں لگیا کہ میں اوس سوداگر وانگوں آں جنہوں اِک بوہت ای قیمتی موتی ملیا سی تے اوہ اوہنوں کسے وی قیمت تے گوانا نئیں چاہندا سی۔ (متی 13:45، 46) میں ساری زندگی ایہہ ای چاہنا ساں کہ میں زندگی دا اصل مقصد لبھن چ دُوجیاں دی مدد کراں۔ میں تے میری بیوی نے ایس گل دا تجربہ کیتا اے کہ یہوواہ اپنے بندیاں دی مدد کردا اے تاکہ اوہ اِک بامقصد زندگی گزارن۔
