Familiaypeqa pusaj karqayku. Tataytaj mayta trabajaj. Tatayqa tukuy imapi trabajaj, callespi vendespa, ñankunata ruwaspa, avionpi waj suyusman viajanapaj pasajesta vendespa ima. Chaypi trabajasqanqa mayta gustawaj kayku. Imaraykuchus tukuy ladoman viajayta atej kayku.

Jovencitollaraj kashaspa piensaj kani jovenyaspa imatachus ruwanaypi. Wakin amigosneyqa universidadman yaykorqanku, wakintaj cuartelman rerqanku. Noqatajrí mana cuartelman riyta munarqanichu. Imajtinchus runaswan discutiy, maqanakuypis mana gustawajchu. Chayrayku mana cuartelman rinaypaj universidadman yaykorqani. Jinapis runasta yanapayta munarqani. Imaraykuchus yuyarqani ajinamanta kusisqa kausakunayta.

Universidadpeqa runaj kausayninmanta estudiay allin rijchʼawarqa. Imaraykuchus yachayta munarqani kausay imaynamantachus rikhurisqanta. Profesoresqa kausay jinallamanta rikhurisqanta yachachiwaj kayku, munajtaj kanku ajinapuni kasqanta creenaykuta. Yachachisqankoqa mana ciertochu kaspa jinarqa, jinapis chaypi creenallayku  karqa. Yachachisqankoqa nipuni cientificospa estudiasqankuman jinachu karqa.

Clasespeqa allinta kausakunaykupaj mana imatapis yachachiwajchu kayku. Astawanpis yachachiwaj kayku allin rinawaykupaj imatapis ruwarpanallayku kasqanta. Amigosniywan fiestasman rispa, drogakuspa ima kusisqa kaj kani. Jinapis chayqa uj ratollapaj karqa. Jinapi piensarej kani: “Kaykunata ruwaspa sonqo, ¿juntʼasqapunichu kani?”, nispa.

Chaypacha Boston llajtaman riporqani chaypitaj watejmanta universidadman yaykorqani. Universidadpi gastosniyta pagakunaypajtaj vacacionespi trabajakorqani. Trabajoypeqa primera vez uj Jehovaj testigonta rejserqani. Payqa “qanchis watas” profeciamanta parlariwarqa. Chayqa Daniel libroj tawa capitulonpi kashan. Sutʼinchariwarqataj qhepa pʼunchaykunapi kausakushasqanchejta (Dan. 4:13-17). Reparakorqanitaj paywan Bibliamanta parlajtillaypuni, chayman jinataj kausakunay kajtenqa, kausayniyta cambianaypuni kasqanta. Chayrayku manaña paywan parlayta munarqanichu.

Universidadpeqa clasesta pasarqani América del Surpi runasta yanapamunaypaj. Yuyarqani runasta yanapaspa kusisqa kausakunayta. Jinapis repararqani ni chayta ruwaspapis kusisqachu kasqayta. Chayrayku universidadmanta llojsiporqani.

Mayo de 1970 watapitaj Ámsterdam llajtaman riporqani. Chayqa Países Bajospi kashan. Chaypitaj tatay trabajasqan empresallapitaj trabajarqani. Chaypi trabajaspaqa tukuy ladoman viajarqani: Africaman, América del Norteman, América del Surman, Asiaman, Europaman ima. Jinapis chaypi repararqani chay lugarespeqa imaymana chʼajwas kasqanta. Nitaj pipis allinchayta atisqanta. Jinapis runasta yanapayta munaspa watejmanta Boston llajtaman kutiporqani, chaypitaj universidadman kutiykullarqanitaj.

Universidadpeqa repararqani qhasillata estudiashasqayta. Chayrayku ni imata ruwayta atispa profesorniyta tapurikorqani. Paytaj niwarqa: “Imapajñataj qhasita estudiashankiri. Ripullay universidadmanta”, nispa. Chʼirmiykuytawantaj chay rato riporqani, niñataj ujtawan kuterqanichu.

Nipuni kusisqachu kausakuspa, mana chʼajwasman satʼikoj uj grupo runasman ujchaykukorqani. Paykunaqa kusisqas, sonqo tiyasqastaj kausakuspa jinarqanku. Wakin amigosniywan khuska tukuynin Estados Unidosta viajarqayku, Acapulco llajtakamataj chayarqayku. Chayqa Mexicopi kashan. Wakin kutisqa noqayku jina purikuspa kausakoj runaswan ujchaykukoj kayku. Paykunaqa ni imamanta llakikuspa kausakuspa jinaj kanku. Jinapis repararqani purikuspalla kausasqankoqa llakiylla kasqanta. Nitaj kusisqachu kasqankuta. Imaraykuchus paykunamanta ashkhasqa mana allin kausayniyojchu karqanku.

Chay tiempopeqa piensarerqani wawita kashaspa imatachus ruwayta munarqani chaypi. Wawa kashaspaqa maytapuni munaj kani mar qochanta purimuyta noqapuni barcota manejaspa. Chayta ruwanaypajqa noqapuni barcoyoj kanay karqa. Amigoy Tompis noqa jinallataj ruwayta munarqa. Chayrayku iskayniyku mundontinta muyumunaykuta ninakorqayku. Karupi uj kʼachitu islata tariyta  munarqani, chaypi ni pejpa kamachiyninpi kausakunaypaj.

Amigoy Tomwanqa Arenys de Mar nisqa llajtaman rerqayku, chayqa Barcelona qayllapi kashan. Chaypitaj uj barcota ranterqayku. Chay barcoqa largonman 9 metrosniyoj jina karqa, sutintaj Llygra karqa. Chay barcotaqa viajanaykupaj wakin imasninta allincharqayku. Barcopi tomanaykupaj yakuta ashkhata apakunaykupajtaj, motorninta orqhorparqayku. Chantapis wakin lugarespi barcota purichinaykupaj, phishqa metrosniyoj iskay palasta rantikorqayku. Chaymantataj Seychelles islaman kachaykukorqayku, chayqa océano Indicopi kashan. Seychelles churumanqa Costa Occidental de África kantunta muyuykunayku karqa. Chaymantataj cabo de Buena Esperanza Sudáfrica nisqaj kantunta muyuykunayku karqa. Barcopi viajashaspa mana chinkarpanaykupajtaj, estrellasta, mapasta, waj imastawan allinta qhawarikoj kayku. Mapasta qhawaspaqa sutʼita reparaj kani may cheqapichus kashasqaykuta.

Manaraj ancha karuta rishaspataj, repararqayku barcoykuwanqa mana mar qochanta viajayta atinaykuta. Yakoqa barcoykuman 22 litros jinapuni uj horallapi yaykoj. Viajashajtiyku uj sinchʼi wayra oqharikojtintaj maytapuni mancharikorqani. Chayrayku may chhika watasmanta Diosman orakorqani. Nerqanitaj: “Kaymanta salvawasqayku chayqa, tukuy atisqayta ruwasaj qanta rejsisunaypaj”, nispa. Chaymantataj wayraqa tiyaykorqa, Diosman nisqaytataj juntʼarqanipuni.

Chay ratopacha Bibliata leeyta qallarerqani. Chay mar Mediterráneo chaupipi kayqa may sumajpuni karqa. Imaraykuchus tukuy laya pescadosta rikorqani, karustataj qhawariyta aterqani. Tutantaj cielota qhawarispa may chhika estrellasta rikoj kani. Ajinapi astawan sutʼita repararqani Dios kasqantapuni, paytaj tukuy runasmanta llakikusqanta.

Mar Mediterraneonta uj mashkha semanasta riytawantaj, Alicante nisqa llajtaman chayarqayku, chayqa Españallapipuni kashan. Chaypitaj barcoykuta en venta churarparqayku aswan mosojta rantikunaykupaj. Jinapis thanta barcoykutaqa ni pi rantiyta munawarqaykuchu. Imaraykuchus juskʼu, mana motorniyojtaj karqa. Jinapis barcota vendenaykupaj suyakoj jinaqa Bibliata ashkhata leerqani.

Bibliata astawan leesqayman jina, sutʼita repararqani kusisqa, llimphu kausayniyojtaj kanapajqa chaypi sumaj yuyaychaykuna kasqanta. Chayta reparaspataj mayta tʼukorqani. Piensarerqanitaj: “Chanta, ¿imajtintaj noqa jina cristianos kayku nej runas mana Bibliaj nisqasninta kasukunkuchuri?”, nispa.

Chaymantapacha nikorqani kausayniyta cambianayta, niñataj drogakunaytapis. Noqaqa yuyarqani Bibliaj nisqanman jina kausakoj runas kanankutapuni. Chayrayku paykunata maskʼaj churakorqani. Jinapi ujtawan Diosman orakorqani chay runasta tarinaypaj.

Cheqa religionta tarinaypajqa, sapa religionman rispa allinta qhawarej kani cheqachus manachus kasqanta yachanaypaj. Alicante llajtaj callesninpi purispaqa ashkha iglesiasta rikorqani. Jinapis casi tukuynin iglesiaspi santosta rikorqani. Chayrayku nerqani: “Kayqa ni cheqa religión kanmanchu”, nispa.

 Uj domingo tarde, uj lomitapi barco sayachina qhawarisqa chukukusharqani. Chaypitaj Santiago 2:1-5 versiculosta leererqani. Chaypeqa nishan qhapajkunallata allinpaj qhawayqa mana allinchu kasqanta. Barcoyman kutipushaspataj uj cheqapi rikorqani, uj wasita iglesiaman rijchʼakojta. Chaypitaj uj letrero nisharqa: “Salón del Reino de los Testigos de Jehová”.

Sonqoypitaj nikorqani: “Kayman yaykurpasaj, a ver kay runas ima niwanqankuchus”, nispa. Chaymantaj yaykorqani qʼara chakilla, barbudo, llikʼisqa thanta pantaloyojtaj. Uj acomodadortaj pusaykuwaspa, uj kuraj señoraj ladonman tiyaykuchiwarqa. Chay señoraqa kʼacha karqa, discursantej oqharisqan versiculostataj maskʼaysiwarqa. Reunión pasaytataj tukuy may kʼachamanta saludariwarqanku. Chaytaj mayta tʼukuchiwarqa. Chaypitaj uj hermano Bibliamanta parlarinaykupaj wasinman rinayta niwarqa. Jinapis manaraj Bibliata leeyta tukusqayrayku, nerqani: “Noqa willasqayki maykʼajchus jamunayta”, nispa. Jinapis tukuynin reunionesman riyta qallarerqani.

Chaymanta uj mashkha semanasninmantaj, chay hermanoj wasinman rerqani. Paytaj Bibliamanta ashkha tapuykunasniyman kutichiwarqa. Semananmantaj uj bolsa juntʼata sumaj ropata qowarqa. Chay hermanoqa niwarqa, chay ropaj dueñonqa Bibliaj kamachiykunasninta kasukusqanrayku carcelpi kashasqanta. Bibliaqa kamachin purajmanta munanakunata, nitaj guerraman rinata. Chayta kasukusqanrayku chay ropaj dueñonta carcelman wisqʼaykusqanku (Isa. 2:4; Juan 13:34, 35). Noqaqa maytapuni maskʼasharqani Bibliaj nisqasninman jina kausakoj runasta. Chay kutipitaj repararqani paykunata tarisqayta. Chaymantapacha manaña uj kʼachitu islatachu maskʼayta munarqani. Manaqa Bibliata sumajta estudiallaytaña. Chayrayku watejmanta Países Bajosman kutiporqani.

Groninga llajtamanqa autospi pusarichikuspa pusarichikuspa tawa diapi chayarqani. Chaytaj Países Bajos nisqapi kashan. Chayaytawantaj kausakunaypaj trabajota maskʼakorqani. Uj carpinteriapi trabajanaypajtaj sulicitudta juntʼacherqani. Chay solicitudpeqa ashkha tapuykuna karqa. Ujnin tapuymantaj ima religionmantachus kasqayta kutichinay karqa. Noqataj Jehovaj testigon kasqayta nerqani. Chay carpinteriaj dueñontaj chayta leespa uj jinalla qhawariwarqa. Niwarqataj: “Wajyamullasqayki”, nispa. Jinapis ni jaykʼaj wajyamuwarqachu.

Waj carpinteriapiñataj tapurikorqani ayudanteta necesitasqantachus manachus. Dueñotaj  tapuriwarqa imapi estudiasqaymantapis chayri imapi trabajasqaymantapis papelesniy kasqantachus manachus. Noqataj nerqani: “Maderamanta uj barcollata allincharqani”, nispa. Paytaj niwarqa: “Kunanpacha trabajayta qallariwaj. Jinapis mana ima chʼajwatapis rikhurichinaykita munanichu. Imaraykuchus noqaqa Jehovaj testigon kani, Bibliaj nisqantataj kasukuni”, nispa. Noqataj kuticherqani: “Noqapis testigo kani”, nispa. Paytaj chujchasapa, barbudotaj kasqayrayku qhawarillawarqa. Niwarqataj: “Entonces Bibliamanta yachachisqayki”, nispa. Noqataj kusiywan “ya” nerqani. Chaypi repararqani Jehovapuni chay llankʼayman pusawasqanta Bibliamanta yachakunaypaj (Sal. 37:4). Chay hermanoj carpinterianpi uj watata trabajarqani. Paywantaj Bibliata estudiarqani. Enero de 1974 watapitaj bautizakorqani.

Bautizakusqaymanta killanman, precursor kayta qallarerqani. Chaytaj mayta kusichiwarqa. Killanmantaj Ámsterdam llajtaman riporqani españolpi uj grupota yanapakoj. Chay grupoqa reciellanraj qallarisharqa. Runasman españolpi, portuguespi Bibliamanta yachachispaqa maytapuni kusikorqani. Mayo de 1975 watapitaj, precursor especial kayta qallarerqani. Chayqa may sumajpuni karqa.

Uj día uj precursora especial Catharina sutiyoj, reunionniykuman jamorqa. Payqa uj estudionta reunionman pusamusqa. Chay estudionqa boliviana karqa. Chaymantapacha Catharinawan noqawanqa allinta rejsinakunaykupaj cartitasta apachinakorqayku. Repararqaykutaj kikin imasta ruwayta munasqaykuta. Chaymantataj 1976 watapi casarakorqayku, 1982 watakamataj precursores especiales karqayku. Chay watapeqa Galaad Escuelaman wajyariwarqayku. Chay escuelaqa clase número 73 karqa. Chaymantataj Africaman kachawarqayku, Mombasa llajtaman, chayqa Kenia suyupi kashan. Chaypeqa phishqa watasta sirverqayku. Chaymantataj 1987 watapi Tanzania suyuman kachawarqayku. Chaypeqa chay pachasllaraj testigosta watejmanta predicanankuta saqesharqanku. Tanzaniapeqa 26 watasta karqayku. Chaymantataj watejmanta Kenia suyuman kuterqayku.

Bibliamanta yachakuyta munaj runasta yanapaspaqa maytapuni kusikorqayku. Mombasapi predicashaspaqa uj runata tarerqani. Paytaj chay llajtapi primer estudioy karqa. Paymanqa iskay revistasta qorqani. Paytaj niwarqa: “Leeyta tukuytawan, ¿imatá ruwasaj?”, nispa. Qhepan semananmanqa payman Bibliamanta yachachiyta qallarerqani, Usted puede vivir para siempre en el paraíso en la Tierra nisqa librowan. Chay libroqa reciellanraj llojserqa suajili parlaypi. Chay estudioyqa watanman bautizakorqa, precursor regulartaj karqa. Paywan señoranwanqa, chaymantapacha casi 100 runastaña bautizakunankupaj yanapanku.

Imaynatachus kusisqa kausakuyta entiendespa, sumaj perlasta maskʼaj ranqhero jina sientekorqani. Bibliaqa nin chay runaqa may valorniyoj perlata tarispa, tukuy imasninta vendeytawan chay perlata rantikapusqanta (Mat. 13:45, 46). Munarqani wajkunapis noqa jina kusisqa kausakunankuta. Señoraywanqa sutʼita reparayku, Jehová kamachisninta kusiy kausaywan bendecisqanta.