1948 wata Países Bajos nishgancho yurirgä. 1949 watachona familiä São Paulo (Brasil) marcaman aywacärirgan. Taytäcunaga iglesiaman aywapäcoj y cenata usharcur familiacho Bibliatapis leipäcoj cä. 1959 watachoga Estados Unidos naciunman Massachusetts marcamanna aywacärirgä.

Familiächo pusajmi cargä, chaymi taytäga ali aroj cuidamänanchipaj. Imaycacunachomi taytäga arurgan: callicunacho ranticur, albañilno, y aviuncunawan achca naciuncunapa aywaj aruyninraycur. Lapanchimi cushishga carcaycargä taytä compañiacho arurcaycashganpita, chaymi achca naciuncunapa viajapäcurgä.

Mozularaj caycar imaypis tapucoj cä ‘¿jatunyar imataraj rurashaj?’ nir. Waquin amigücunaga universidämanmi aywargan y waquincunaga ejercituman yaycurgan. Nogataga rimanacuy y peliacunaga gustamajchu, chaymi ejercituman aywayta mana munar universidäman ichanga yaycurgä. Pero shongulächoga runacunata yanapayta munaycargä, chaynopa alita rurashgäta yarpar cushishga ricacunäpaj.

Universidächoga yachacunapaj cargan maypitataj yurimushcanchi, imanotaj runaman ticrashcanchi nej temacuna. Y profesorcunapis chaypitami yachachicoj y chasquicunanchitapis munapäcojmi. Pero waquin yachachicamushgancunaga alapa yäracurpis sasa cargan creinapaj, manami tincojchu yachaj runacuna wilacaramushganwanpis.

Clasicunaman aywashgächoga alilata ruranapäga yachachicärejchu, chaypa trucan quiquinchilaman yarpar imatapis ruranapämi yachachipäcoj. Amigücunawan fiestacunalacho caycar drogacunata micur cushicärej cä pero ratulapämi caj. ‘¿Caychuraj ali caway?’ nir tapucoj cä.

Chay wichan Boston marcaman aywar universidächo yachacunäpaj matriculacurgä. Gastöcunata paganapaj ishcay quimsa quillacuna arur galaycurgä, chaychomi chayraj juc cuti Jehovapa juc testigunta reguirgä. Aroj masëmi cargan, paymi parlapämargan Daniel chuscu caj capitulupita ‘siete tiempos’ nishgan profeciapita y tantiachimargan chay wichancho cawaycashganchitami (Dan. 4:13-17). Cuentata gocurgä paywan imaypis Bibliapita parlarga, imano cawaycashgächo cambiucunata ruranäpaj, pero listo manaraj caycarmi paywan mana tincunapaj pacacoj cä.

Universidächo caycar juc ishcay clasicunata acrargä América del Sur cajman aywar voluntariuno yanapacunäpaj. Chaynopachi ‘ali cawaj runano ricacushaj’ nirmi yarparaycargä. Tiempuwan ichanga sasatano ricar universidätapis cachaycurgä.

1970 wata, mayo quilla Ámsterdam (Países Bajos) marcaman aywacurgä, taytä arushgan compañiacho arunäpaj. Chay aruynëraycur reguirgä achca naciuncunata, cay continenticunacho: África, América, Asia y Europa. Chay lapan naciuncunachoga imayca problemacuna cargan y pipis alchananpaj camäpacurganchu. Chayno captinpis jinalami alita ruranäpaj yarparaycargä y Estados Unidos naciunman cutiycur, yapay yachacunäpaj yaycushcä cachaycushgä universidäman.

Chay universidächo caycaptëna cuentata gocurgä ima ashiycashgäcunata mana tarinäpaj cajta. Chaymi juc profesornëta ruwacurgä yanapämänanpaj. Pero payga nimargan: “¿Imapätaj estudiaycanquiraj? Jaguiriycur aywacuy” nir. Chayno nimashganta wiyarmi jucla aywacurgä, imaypis cutirgänachu.

Chayno captinpis jaucalaga ricacurgächu, chaymi ali cawayta ashej runacunawan juntacargä (hippie nishpan reguicaj). Caycashgäpitaga amigücunawanmi Estados Uniduspa aywapäcurgä, chaypitana bajapäcurgä México naciunman; carreterachoga achca carrucunatarämi ruwacärirgä apapäcamänanpaj. Caminuchoga tarinacurgämi hippie nishgan grupo runacunawan, ali cawacärejtano ricapäcurgä. Paycunawan juntacashga car y masna reguiycurga cuentata gocurgä rasunpaga cushi cushila mana cawacärishganta. Mana yaracuypaj runacuna cashgantami ricargä.

Chay wichanga unay yarpashgäcuna umäman chayamurgan, chayga cargan capitanno lamarpa viajanäpaj. Chaypäga barcutaraj ashinä cargan; Tom jutiyoj amigüpis viajayta munargan. Chauraga ishcalä viajayta galarcärirgä, munargächu runacunawan juntacayta; carucho cacuyta munargä.

Arenys de Mar (Barcelona, España) nishgan sitiuman chayaycurna barcöta ranticärirgä; tamañun cargan 9 metrusno, jutinna Llygra cargan. Alchapärirgärämi lamarcho mana malogracänanpaj. Achca junajcuna lamarcho canapaj yarparmi moturnintapis jorgarcärirgä, upunapaj achca yacutaj apapäcunäpaj. Manejanapaj ishcay remo nishgancunatapis rantipäcurgä, chay guerucunaga pichga metrucunano cargan. Mayman chayapäcunäpäga caycargan océano Índico nishgancho Seychelles situmanmi. Chaypäga pasapäcunä cargan África naciunpa laduncunapa. Viajichoga alapa yanapäcamargan sextante jutiyoj ichic maquinäcuna, mapacunapis, almanaquicunapis amanula caycargan. Cay lapanwanga ichiclapis ogracärirgächu.

Nircur cuentata gocärirgä barcöcunaman yacu yaycuycashganta, y lamarpa viajapäcunäpaj sasa ticracurishganta yarpachacärirgä. Vientupis alapami pücaramurgan y manchacärirgämi y chay hora Diosta ruwacurgä. Y aunicurgä salvapäcamaptenga Payta reguir calpachacunäpaj. Nircur vientupis upälacurgan y chaycho galaycurgä Diosta ashir rasunpa calpachacunäpaj.

Aumi, lamarcho caycar Bibliata leir galaycurgä. Leipäcushgä horaga cuyaylapami cargan; Mediterráneo jutiyoj lamarchomi caycargä, delfincunapis y saltacachaycaj pescaducunapis ricacämojmi. Chacaypapis cuyaylapami cielucho ima caycashgancuna ricacämoj; y noga nergä ‘chay lapancunapa guepanchoga Diosmi caycan, Payga yarpachacunmi noganchicunapaj’ nir.

Juc ischcay semanacuna lamarcho caycarmi Alicante (España) nishgan sitiuman chayapäcurgä y barcöta ranticärinäpaj nipäcurgä. Pero piraj rantinman cargan motorniynaj y uchcuyoj sagra barcöcunataga. Imano captinpis tiempuläga alimi camacaycargan Bibliäta leicunäpaj.

Leipacur leipacur caycaptëmi cuentata gocurgä alapa cushichicoj libro Diospa Palabran cashganta. Chaycho tarirgä Diospa naupancho ali cawacunapaj consejucunata y tapucurgä ‘¿imanirtaj cristianumi cä nejcuna Biblia consejacushganno mana cawapäcushganta?’.

Chauraga calpachacurgä Dios munashgannona cawacunäpaj, charashgä drogatapis jitarirgäna. Y nergä ‘maylachopis Biblia nishganno cawaj runacuna caycanchi’ nir. Y Diostapis yapay ruwacurgä chay runacunata tarinäpaj.

Rasunpa caj religiunta tarinäpäga calpachacurgä lutan religiuncunata manana casupänäpaj. Alicante nishgan marcachoga cajmi achca iglesiacuna. Luta religiuncuna may chaycho captinmi santuncunapis ricacämoj.

Juc cuticho jircapita lamarta ricachacuycargä, domingo junajpa tardipaypa horami cargan, chaycho leiycargä Santiago 2:1-5 textucunata  y parlaycämurgan guellayta charajcunalawan mana juntacänapaj. Barcöpa cuticaptëmi ricargä juc localcho runacuna juntacashga carcaycajta, letrerunta ricaycurmi nergä ‘caycho Jehovapa testiguncuna juntacan’ nir.

Nircur nergä ‘mä yaycushaj imanotaj cay runacuna chasquiman’ nir. Chaypäga locuno visticurgä; aumi zapatuyniynaj shaprayoj y rachicachashga pantalunwan yaycurgä. Puncuchoga juc runa chasquircamargan y edayashga warmipa ladunman jamachimargan, cay warmiga cushi cushila ricamargan y Bibliacho textucunata ashinäpäpis yanapämargan. Reunión usharcuptinpis waquincunaga cushi cushila saludamaj shapäcamurgan. Juc runapis nimargan ‘wasëman shamuy Bibliapita yachachinäpaj’ nir; Bibliata leiyta ushanäpäga pishiycämashgaraj chaymi payta nergä ‘wilashayquimi imay junaj listo caycashgäta’. Nircurga lapan reuniuncunaman aywar galaycurgä.

Semanacuna pasarcuptenga chay runapa wasinman aywargä Bibliapita yachachimänanpaj. Lapan tapucushgäcunapitaga alimi yachachimargan. Visticunäpaj cuyaylapa ropatapis goycamarganmi y nimargan ‘cay ropaga juc runapa ropanmi; payga carcelchomi caycan Bibliata casucushganlapita, guerraman mana aywar cuyanacunapaj cajta yachacushganlapita’ (Is. 2:4; Juan 13:34, 35). Chaynami cuentata gocurgä, chay runacunaga Biblia mandacushganno rasunpa cawapäcushganta. Mana munargänachu lamarpa viajaytapis, Bibliapita más yachacuytami munargä. Chaymi Países Bajos nishganman cuticamurgä.

Carrucuna apamänanpaj jucta jucta ruwacurgä, y chuscu junajtaraj Groninga (Países Bajos) marcaman chayargä y chaycho trabajuta ashirgä. Juc carpintería cargan y dueñunga papeltaraj gomargan chaycho pï cashgäta churanäpaj, ima religión caycashgätapis wilanäpaj cargan, y noga churargä ‘Jehovapa testigun cä’ nir. Chay runa chayta ricaycurga jucnona ricacurgan. Cayno nimargan: “Gayashayquipäna” nir. Pero imaypis gayamarganchu.

Juc carpinteriapis cargan, chaychopis tapucurgämi imalachopis arunäpaj. Dueñun tapumargan estudiashgäpita papelnëcunata charashgäta o mana, unay trabajö ima cashgantapis tapumargan. Y noga nergä ‘juc barculatami alchapashcä’ nir. Y cushicurirgä cayno nimaptin:  “Cay tarde trabajuyquita galaycunqui, pero ama gongaychu cay tallerchoga ima problemalapis canmanchu, nogaga Jehovapa testigunmi cä y Biblia nishgantami respetä”. Jinan hora contestargä: “Nogapis Jehovapa testigun cä” nir. Pero ajchäta ricaycur y shaprayoj cashgäta ricaycur nimargan: “Chaura Bibliapita yachachishayqui”. ‘Alimi cayculanga’ nergä. Cuentata gocurgä juc caj trabajucho mana yaycunäpaj, Taytalä Jehová yanapaycalämashganta (Sal. 37:4). Juc watano cay trabajucho quedacurgä. Y chay tiempucho Bibliapita shumaj yachacurgä y 1974 watacho bautizacurgä.

Nircur precursorman ticrargä, cayga lamarpa viajashgäpitapis más cushicuypaj cargan. Juc quilla pasarcuptin Ámsterdam marcapa aywacurgä, chaychoga español grupo quichacaycämurgan. Españolchopis, portugueschopis Bibliapita yachachicur galaycurgä, cushicuypämi cargan. 1975 watachoga precursor especialnona yanapacur galaycurgä, caypis ¡alapa cushicuypaj cargan!

Juc cuticho precursora especialno yanapacoj Catharina jutiyoj cristiana, estudiantinwan caycashgä reuniunman shapäcamurgan; estudiantinga español idiomata parlaj, Bolivia naciunpita cargan. Catharina cristianawanga masla reguinacärirgä cartacunata guelgapänacur. Chayno reguinacurishpäga 1976 watacho casaracärirgä y precusor especialno 1982 watacama yanapacärirgä; juc invitaciunmi chay wata chayamurgan 73 caj clase Galaad escuelaman aywapäcunäpaj. Escueläcunapita yargurirga África Oriental nishganman mandapäcamargan. Pichga watacunapa sirvipäcurgä Mombasa (Kenia) nishgan marcacho. 1987 watapaga Tanzania naciunpana mandapäcamargan, chaycho autoridäcuna michacärirgannachu Diosta sirvinanchita. Chaycho sirvipäcurgä 26 watacuna y nircur cuticärirgä Keniapana.

Achca humilde runacunata Diospita yachacherga, ‘cayga sï imapitapis más ali’ nipäcurgä. Bibliapita yachachinäpaj naupa caj runataga Mombasa marcacho predicaycarmi tarirgä. Ishcay revistacunata macyaycurgä y chaycho pay nimargan: “Caycunata leiyta ushaptë, nircur ¿imatataj rurashaj?”. Juc semana pasarcuptin, Bibliapita yachachinäpaj juc libro cargan Usted puede vivir para siempre en el paraíso en la Tierra nishgan; cayga chaylaraj yargamurgan suajili nishgan idiomacho. Cay estudiantëga juc wata pasarcuptin bautizacurgan y precursor regularman ticrargan. Nircurga warminwan ishcan 100 runacunatano Jehovata sirvinanpaj yanapacärirgan.

Ashiycashgä rasunpa caj caminuta tariycuptëga, viajipa aywaj más alin caj perlasta ashej runanomi ricacurgä (Mat. 13:45, 46). Chaynolami nogapis waquincuna ali cawacunanpaj yanapacuyta munargä. Warmiläwan ishcäcunami waran waran ricapäcurgä Jehovaga cuyashgan sirvejnincunatami bendiciyta munan, y rasunpa caj caminucho purichiyta munan.