Ñucaca Países Bajos llajtapimi 1948 huatapi huacharircani. Huata qꞌuipaca ñuca familiahuanca Brasilpi saquirij São Paulopimi causanaman rircacuna. Ñuca yaya mamaca iglesiamanmi rijcuna carca. Shinallataj micushca qꞌuipaca Bibliatami liyij carcanchij. Pero 1959 huatapica ñuca familiaca Estados Unidos llajtapi saquirij Massachusettspimi causanaman rircacuna.

Ñucanchijca ochopurami canchij. Ñuca yayituca ñucanchijta mantiningapajmi sinchita trabajaj carca. Paica cꞌatushpa, ñancunata allichishpami trabajaj carca. Shinallataj avioncunata charijcunapaj compañiapimi trabajaj carca. Ñuca yayitu cashna chai compañiapi trabajashcamantami ñucanchij familiahuanca achcata viajaj carcanchij.

Uchillaraj cashpaca jatunyashpaca ‘¿imatashi rurasha?’ nishpami yuyarcani. Ñuca huaquin compañerocunaca universidadmanmi rircacuna. Cutin shujtajcunaca cuartelmanmi rircacuna. Pero cuartelpi macanacunata yachachishcamantami chaiman rinataca mana munaj carcani. Chaimantami mejor universidadman rircani. Pero ñucaca gentecunata ayudashpalla cushilla causai tucushcatami yuyarcani.

Universidadman yaicushpaca gentecuna ima shina tiyai callarishcata, imamanta chꞌican cashcatami estudianata munarcani. Chaipica profesorcunaca evolucionpi crichunmi obligajcuna carca. Pero paicunaca evolucionpi crichunca ima pruebacunata mana charijcunachu carca.

Universidadpica shujtajcunata ayudachun, respetachunca mana yachachijcunachu carca. Ashtahuanpish rijsishca cangapajca imatapishmi rurai tucunguichij nishpami yachachijcuna carca. Chaimantami ñuca amigocunahuan fiestaman rishpa, drogarishpa pasaj carcani. ¿Chaita ruracushpaca de verdadtaj cushilla sintirishachu? nishpami tapurircani.

Qꞌuipaca Boston llajtapimi universidadpi yachangapaj matricularircani. Estudiocunata pagangapajca vacacioncunapimi trabajarcani. Chaipi trabajacushpami punta cutin shuj testigo de Jehovata rijsircani. Cai compañeroca Daniel capítulo 4-pi “canchis huatacunamanta” parlaj profeciamantami ñucamanca yachachirca. Paica: “Ñami tucuri punllacunapi causacunchij” nircami (Daniel 4:13-17). Chaipica ñuca compañerohuan Bibliamanta ashtahuan yachashpaca Biblia yachachishcacunata ñuca causaipi de verdadtaj pajtachina cashcatami cuentata curcani. Chaita cuentata cushpami ñucaca paimanta caruyanata decidircani.

Universidadpica América del Sur llajtapi huaquin tareacunata rurashpa ayudangapajmi estudiarcani. Ñucaca ayudata minishtij gentecunata ayudashpaca cushilla sintirinatami yuyarcani. Tiempo pasajpica ¿ciertochu alli decidircani? nishpami tapurircani. Mana alli decidishcata cuentata cushpami universidadpi estudianata saquircani.

Mayo de 1970 huatapimi Ámsterdam llajtaman rircani. Ñucapish ñuca yayitu shinami avioncunata charijcunapaj compañiapi trabajanata decidircani. Chaimantami África, América del Norte y del Sur, Asia y Europa llajtacunata viajashcamanta rijsircani. Pero tucui laya llajtacunapi achca problemacuna tiyashcamanta chai problemacunata mana pi allichi tucushcatami ricurcani. Chaimantami tal vez ayudangapajca Estados Unidos llajtapi saquirij Boston universidadpi cutin estudiai callarircani.

Universidadpica ñuca rurashca tapuicunataca mana tarircanichu. Imata mana ruranata yachashpami ñuca profesorta tapurcani. Paica: “¿Imamantataj estudiashpa catingui? Mana cashpaca estudianata saqui” nircami. Chaimi universidadpi estudianata saquircani.

Qꞌuipaca ñuca causaihuan imata mana ruranata yachashpami ñucaca hippie gentecunahuan tandanacui callarircani. Hippie gentecunataca tranquilo causaitami charincuna, cꞌuyaitami ricuchin nijcunami carca. Chaimantami maipica ñucaca Estados Unidosmantaca Mexicocama paicunahuan viajaj carcani. Cai gentecunaca paicunallami huaquin comunacunapi causajcuna carca. Paicunaca ima preocupacionta mana charij layami carca. Pero paicunahuan causashpaca paicuna mana cushilla causashcatami yacharcani. Ashtahuanpish paicunaca gentecunata mana ayudaj, mana honrados cashcatami yachaj chayarcani.

Uchillaraj cashpaca barcocunapi viajanatami munarcani. Chaimi ña jatunyashpaca ñuca propio barcohuan jatun mama cuchacunapi viajanata  munarcani. Chaipajca shuj propio barcota charinami minishtirirca. Ñuca amigo Tompish chashnallatajmi viajanata munarca. Tucui mama cuchacunata barcopi viajashpa, shuj tranquilo causai pushtutami tarisha nircanchij.

Ñucaca Tomhuanmi Barcelona llajtapi saquirij Arenys de Mar nishcaman chayarcanchij. Chaipimi shuj 9 metrosta charij barcota randircanchij. Maucalla cashcamantami barcota allichircanchij. Maiman ringapaj mana tanto apurado cashcamantami motorta llujchishpa, limpio yacuta chaipi churashpa pasarcanchij. Shinallataj uchilla barcocuna chayana lugarman barcota chayachingapajmi ishqui remota randircanchij. Chai remocunaca 5 metrocunatami charircacuna. Chai qꞌuipaca océano Indicota rishpami Seychelles llajtaman chayasha nircanchij. Costa occidental de Africata rishpa, Buena Esperanzatami pasasha nircanchij. Chai lugarcunaman chayangapajca estrellacunata ricungapajmi shuj aparatota randircanchij. Shinallataj mapacunata, almanaque nishcacunatapishmi randircanchij. Chai lugarcunaman chayangapaj calculashcamantami animarishca sintirircani.

Ñuca compañerohuan viajacushpaca ñucanchij barco maucalla cashcamanta mama cucha yacupi purinapaj mana alli cashcatami cuentata curcanchij. Ñapish mana yuyashcapimi achca yacuca barcopi jundarca. Chaimi ñucaca ña nishca shinaca jatun tamya, acapana ricurijpica mancharishca saquirircani. Chaipimi Diostaca punta cutin ayudahuai nishpa mañarcani. “Can ayudajpica canta rijsingapajmi esforzarisha” nircanimi. Qꞌuipaca jatun tamya, acapanaca anchurcami. Ñucaca ñuca ima nishcatami pajtachircani.

Mediterráneo mama cucha yacuta ricushpami Bibliataca liyi callarircani. Chaipi cashpaca achca pescadocunata, delfincunatami ricurcani. Tutapica jahua pachapi achca estrellacuna tiyajtami ricurcani. Chashnami Dios tiyashcata, gentecunamanta preocuparishcata cuentata curcani.

Huaquin semanacunata viajashca qꞌuipaca Alicante nishca barcocuna shayarina lugarmanmi chayarcanchij. Chai lugarpimi cai maucalla barcota cꞌatushpa mushuj barcota randinata yuyarircanchij. Pero cai barco maucalla cashcamanta, motorta mana charishcamanta, yacu chai barcopi rato yaicuj cashcamantami cꞌatunaca sinchi carca. Pero cꞌatungacamaca Bibliata liyingapajmi tiempota charircani.

Bibliata ashtahuan liyishpa cushilla causangapajca Bibliaca shuj manual shina cashcatami intindircani. Bibliata liyishpaca yuyaipipish, causaipipish chuya causanatami intindircani. Chaimi cashna nishpa tapurircani, ¿ñucapish Diosta sirvinchij nij gentecunapish, imamantataj Biblia yachachishcacunataca mana pajtachinchij?

Ñuca causaipica cambiocunatami rurarcani. Shinallataj drogarinatapishmi saquircani. Huaquin gentecunaca Biblia yachachishca shinami causangacuna. Cashna gentecunatami mashcasha nini nishpami yuyarcani. Chaimi cutin Diostaca cai laya gentecunata mashcangapaj ayudahuai nishpa mañarcani.

Alli religionta taringapajca shuj listatami rurarcani. Alicante llajtapi saquirij callecunata ricushpaca shuj jatun iglesiacunatami ricurcani. Chai iglesiacunapica achca santocunatami charirca. Chaimi anotashca listapica chaicunataca tachashpa rircani.

Shuj domingo chishitaca shuj urcumanmi llujshircani. Chai urcuca barcocuna maipimi saquirin chai  lugarpimi carca. Chaipica Santiago 2:1-5-tami liyicurcani. Chai versopica charijcunataca mana jatunyachina cashcatami yachachirca. Ña barcoman tigracushpaca shuj tandanacuna huasitami ricurcani. Chai huasipica shuj letreropimi “Salón del Reino de los testigos de Jehová” nishca tiyacushcarca.

Tandanacuiman chayashpaca cashna nishpami yuyarcani: “Cunanca shuj pruebatami churasha. Cai gentecunaca ñucataca ima shinataj chasquin”. Ña chai tandanacuna huasiman chayashpaca ñucaca barbasyuj, zapato illaj, pantalonpish lliquimi chayarcani. Shuj acomodadorca ñucataca ‘caiman shamupai’ nishpami shuj mayorlla huarmipaj ladopi tiyachirca. Chai mayorlla huarmica Bibliapi tiyaj versocunata mashcashpami ayudarca. Ña tandanacui tucurishca qꞌuipaca achcacunami ñucata saludangapaj cꞌuchuyarcacuna. Chaimi mancharishca saquirircani. Shuj runacarin Bibliamanta ashtahuan parlangapajmi paipaj huasiman invitarca. Pero ñucaca: “Bibliataca manaraj tucui liyishcanichu. Tucui liyishpami listo casha” nishpami cutichircani. Shinapish tandanacuicunamanmi ri callarircani.

Huaquin semana qꞌuipaca ñucata invitashca runapaj huasimanmi rircani. Paimi ñuca imalla rurashca tapuicunataca Bibliahuan cutichirca. Shuj semana qꞌuipaca ñucamanca paica alaja ropacunatami convidarca. Paica ñucamanca “Cai ropapaj dueñoca carcelpimi can. Paica shujtajcunata cꞌuyashcamanta, mana guerraman rishcamantami carcelpi can” nishpami parlarca (Isaías 2:4; Juan 13:34, 35). Cashna gentecuna Biblia yachachishcacunata yuyaipipish, causaipipish pajtachij cashcatami intindircani. Chaimantami mama cuchapi saquirij alaja llajtacunata mashcanapaj randica Bibliata alli estudianata decidircani. Qꞌuipaca Países Bajos nishca llajtamanmi tigranata decidircani.

Chuscu punllacunata viajashpami Groninga llajtaman chayarcani. Chai llajtapimi trabajota mashcai callarircani. Shuj carpinteriapimi trabajota japircani. Chai carpinteriapaj dueñoca shuj hojatami huaquin tapuicunata jundachichun curca. Shuj tapuipica ima religión cashcatami cutichina carcani. Ñucaca chai hojapica testigo de Jehovami cani nishpami anotarcani. Dueñoca chai hojata liyishpaca paica: “Bueno cayashami” nircami. Pero nunca mana cayarcachu.

Shujtaj carpinteriapica dueñotami tal vez shuj trabajadorta minishtinguichu nishpa tapurcani. Chai dueñoca: “¿Estudiashca certificadota o maipi trabajashca certificadota charinguichu?” nishpami tapurca. Chaimi ‘ñucaca shuj barcota allichishpami trabajaj carcani’ nircani. Cai runaca: “Cunan chishillatajmi trabajashpa callari tucungui. Pero cai carpinteriapica ama ima problemata rurangui. Ñucaca testigo de Jehovami cani. Ñucanchijca Biblia yachachishcatami cazunchij” nircami. Chaimi ñucaca: “Ñucapish  testigomi cani” nircani. Pero cai runaca ñuca jatun ajchata charijta ricushpa, barbasta charijta ricushpaca paica: “Shinashpaca, canmanca Bibliamantami yachachisha” nircami. Chaimi ñucaca cushilla chai trabajota chasquircani. Chaipimi intindircani imamanta caishuj trabajoman mana cayashcata. Jehová Diosca ñuca imata shungumanta munashcataca allimi yacharca (Salmo 37:4). Chai huauquipaj carpinteriapi trabajacushpami Bibliamantaca shuj huatata estudiarcani. Enero de 1974 huatapicarin Jehová Diosman mingarishpami bautizarircani.

Shuj quilla qꞌuipaca precursorado canatami agllarcani. Qꞌuipa quillacarin Ámsterdam llajtapimi español shimipi predicangapaj rircani. Español shimipi, portugués shimipi parlaj gentecunata Bibliamanta yachachishpacarin cushillami sintirircani. Mayo de 1975 huatapicarin ñucataca precursor especial cachunmi agllarcacuna. Chaica alajami carca.

Shuj punllaca Catharina shuti panimi ñucanchij tandanacuiman shamushca carca. Paica Boliviamanta shuj Bibliamanta estudiajtami español shimipi rijsichingapaj pushamushca carca. Chaipimi Catharinapish, ñucapish ashtahuan rijsinacungapajca cartacunata quillcarcanchij. Catharina cachashca cartacunapica paipish ñuca shinallataj Diosta sirvingapaj huaquin metacunata charishcatami ricurcani. Qꞌuipaca 1976 huatapimi cazararcanchij. 1982 huatacamami precursores especiales carcanchij. Ñucanchij mana yuyashcapimi Escuela de Galaadman invitarcacuna. Chaimi cushilla sintirircanchij. Chai qꞌuipaca África Oriental llajtapi sirvichunmi cacharcacuna. Chai llajtapi saquirij Mombasapimi cinco huatacunata Jehová Diosta sirvircanchij. 1987 huatapica ñucanchijtaca Tanzania llajtapimi sirvinaman cacharca. Chai llajtapica Diosta sirvichunmi saquishcacuna carca. Chaipimi 26 huatacunata sirvircanchij. Cutin qꞌuipaca Kenia llajtamanmi tigrarcanchij.

Humilde gentecunata Jehová Diosta rijsichun ayudashpaca cushillami sintirishcanchij. Por ejemplo, Mombasa llajtapimi punta cutinca shuj Bibliamanta estudiajta charircani. Chai llajtapi predicacushpami cai runahuanca tuparcani. Chaimi paimanca ishqui revistacunata saquircani. Cai runaca: “¿Cai ishqui revistacunata tucui liyishpaca imatataj rurasha?” nircami. Chaimi catij semanaca Usted puede vivir para siempre en el paraíso en la Tierra nishca librohuan Bibliamanta estudiota cui callarircani. Chai libroca recienllami suajili shimipi llujshishca carca. Qꞌuipaca paica bautizarircami. Huata huashacarin precursor regularmi tucurca. Qꞌuipacarin paipaj huarmihuanmi casi 100 gentecunata Yayitu Diosman mingarishpa bautizarichun ayudashcacuna.

Jehová Diospaj munai maijan cashcata ñuca causaipi intindishpaca tucuimanta yalli alli perlata ricushpa, paipaj tucui charishcacunata cꞌatushpa chai perlata randij runa shinami sintirircani (Mateo 13:45, 46). Achca gentecunatami imapaj causacushcata intindichun ayudasha nircani. Ñuca cꞌuyashca huarmisitahuanca Jehová Dios ima shina bendiciashcatami ricushcanchij. Yayitu Diosca ñucanchij imapaj causashcatami alli intindichishca. Chaimantami cushilla sintirini.