1948 huatapimi Países Bajos llactapi nacirircani. Jipaca ñuca familiahuanmi Brasil llactapi causangapaj rircanchi. Ñuca taitacunaca iglesiaman rina costumbreta, chishi meriendaguta micushca jipapash Bibliaguta liina costumbretami charirca. Cutin 1959 huatapica ñuca causajushca pushtumandaca Estados Unidos llactamanmi rircanchi. Chaipica, Massachusetts nishca pushtupimi causangapaj rircanchi.

Familiapica 8purami caparcanchi. Ñucanchita cuidangapami ñuca taitaca ashtacata trabajarca. Por ejemplo, callecunapi jatushpa, panacunata rurangapaj trabajashpa, shinallata aviongunapa empresapipashmi trabajarca. Chai empresapi trabajajujpica, cushijushcami carcanchi. Chai empresapi trabajajushcamandami ñucanchicunaca shuj ladocunaman ashtahuan viajaita usharcanchi.

Colegiopi cashpaca, jatunyashpa imata ruranataca na segurochu carcani. Ñucapa huaquin amigocunaca universidadman, cutin shujcunaca cuartelmanmi rirca. Shinapash ñucaca shujcunahuan fiñanajunata, macanajunata na gushtaimandami cuartelmanga na rircani. Chaimandami universidadman estudiangapaj rircani. Shinapash ñucapa yuyaipica, gentecunata ayudana munaitami charircani. Shinallami ñucaca shuj cushilla causaita charisha yarcani.

Universidadpi cashpaca gentecuna imashna tiai callarishcatami yachajungapaj munarcani. Profesorcunaca, gentecunaca evolucionmanda llujshishcata yachachishpami, paicunapa yachachishcata ñucanchipash crichun munan carca. Chaipi yachachishcacunaca ñucapa yuyaipica na cabalchu carca. Shinapash chai cosascunapi crichunmi ñucanchitaca yachachin carca.

Universidadpica ima ali cajta, ima nali cajtaca na yachachinllu carca. Ashtahuangarin ñucanchi munashcata charingapaca imatapash ruranalla cashcatami yachachin carca. Amigocunahuan fiestacunaman rishpa, drogacunata chupashpaca cushillami sintirin carcani. Shinapash asha ratotallami shina sintirin carcani. Chaimandami, ¿cai cosascunata ruranachu ciertopacha ñuca causaipi cushilla causachun ayudanga? yashpa pensarircani.

Chai tiempopimi Boston shuti pushtuman causangapaj rircani. Chaipica shuj universidadpimi matricularircani. Chai universidadta pagangapaca vacaciongunapimi trabajan carcani. Chai trabajopimi primera vez shuj testigo de Jehovahuan tuparircani. Paica Bibliapi Daniel capítulo 4​pa profeciacunamandami parlahuarca. Y ña tucurimui punllacunapi causanajushcatapashmi intindichihuarca (Dan. 4:13-17). Chaipimi Bibliata ali, ashtahuan yachajushpaca ñuca causaipi cambiocunata rurana minishtirishcata cuenta japircani. Chaimandami ñucapa compañero Bibliamanda ama ashtahuan parlachun paihuanga casi na parlan carcanichu.

Universidadpica América del Sur nishca llactacunaman rishpa voluntario shina sirvingapami ashtahuan estudiai callarircani. “Gentecunata imagupipash ayudashpami, ñuca causaipica cushilla sintirisha” yarcani. Shinapash gentecunata imashinapacha ayudanata na seguro cashpami llaquilla sintirishpa, mejor universidadtaca saquitapacha saquircani.

Huata 1970​pimi, Ámsterdam (Países Bajos) llactaman causangapaj rircani. Chaipica imashinami ñuca taita aviongunapa empresapi trabajarca, shinallatami ñucapash trabajangapaj rircani. Cai trabajota charishcamandami, shuj llactacunata ashtahuan rijsi usharcani. Por ejemplo África llactata, América del Norte, América del Sur, Asia y Europa llactacunata rijsircani. Shinapash asha ashami cai llactacunapi ashtaca problemacuna, llaquicuna tiashcata ricurcani. Y pipash chai llactacunata na ali ayudai ushashcatapashmi ricurcani. Chaimandami gentecunata ayudangapaj munashpa cutin Estados Unidosman rishpa, cutin chai universidadpillata estudiangapaj tigrarcani.

Chaipi cashpami chai universidadpica ñuca munashcataca chaipi na tari ushashcata cuenta japircani. Imata ruranata na atinajushpami, antropologiata yachachij profesorta ayudata mañarcani. Paita ayudata mañajpica paica: “¿Imamandata estudiashpa catijungui? Estudianataca saqui” nishpami nihuarca. Chaita nijhuanmi universidadta saquishpa, chai universidadmanga cutinga ñana tigrarcani.

Shinapash ñuca causaipica na cushilla sintirijurcanichu. Chaimandami shuj tranquilo ali causaita mascangapaj munaj shuj grupoman yaicurcani. Ñucaca Estados Unidosmandaca, huaquin amigocunahuan Mexicomanmi chayagrircanchi. Chaipica jipi nishca gentecunapa huaquin comunidadcunapimi causarcanchi. Paicunaca shuj tranquilo causaita charinshnami ricurirca. Shinapash asha ashami paicunapa causaipash na cushilla, na tranquilo cashcata cuenta japircani. Ashtahuangarin chaipica gentecunaca llullacuna, shuhuacuna, nalita rurajcuna cashcatapashmi cuenta japircani.

Huahua cashpaca, barcopi viajashpa shuj shuj pushtucunata rijsingapaj munaitami charircani. Chaimandami chaita yarishpa, chaita ruranata dicidircani. Shinapash marpi shuj pushtucunata rijsingapaca, ñucapachami shuj barcota manejashpa ringapaj munarcani. Chaimanda chaita rurangapaca, ñucapapacha shuj propio barcomi minishtirigrijurca. Barcopi viajashpa, shuj shuj pushtucunata rijsinataca, ñucapa amigo Tombashmi munashca carca. Chaimandami ishcandillata barcopi viajanata dicidircanchi. Barcopi viajai callarishpaca, gobiernocunapa leycuna illaj, shuj tranquilo, juyailla islagutami mascanajurcanchi.

Ñucanchicunaca España llactaman, Arenys de Mar nishca pushtuman viajarcanchi. Chaipi cashpami 9 metro midij shuj barcota randircanchi. Chai barcotami marpi ali viajai ushangapaca, huaquin arreglocunata rurarcanchi. Barcohuan shuj pushtucunaman chayangapaj na apuro tiashcamandami tiempohuan segurarcanchi. Barcopa motorta llujchishpami, motor tiajushca pushtupica, ufiana yacuta ashtahuan charingapami shuj tanqueguta churarcanchi. Ashalla yacu tiaj pushtucunapi cai barcohuan ri ushangapami ishcai remotapash randircanchi. Cai remocunaca cada unomi 5 metros midirca. Shina ña tucuita segurashpami, océano Índico marcunaman rircanchi. Ñucanchipa yuyaica, África ladolla tiaj marcunata rishpa, cabo de Buena Esperanza nishca marcunata tucuita rijsingapami munarcanchi. Barcopi viajashpa maimanbash chayai ushangapaca, sextante nishca shuj uchilla herramientagutami utilizan carcanchi. Caihuanmi estrellacunata ricushpa maiman rinata yachan carcanchi. Mapas astronómicos nishcata o estrellacunapa shuj mapatapashmi utilizarcanchi. Caicunahuan guiarishpa maipipacha cashcata yachanaca alipachami carca.

Ña cai barcohuan viajai callarishpami, ashtaca jatun marcunapi cai barco na viajai ushanata cuenta japircanchi. Barcomanga ashtaca yacu yaicui callarirca. Imashinami callaripi parlaparcani, ñucanchi viajanajujpimi ushashca huairahuan tamiai callarirca. Chaimi ninanda manllarishpa Taita Diosta mañarcani. Ñucaca Taita Diostaca unaipipachami na mañashcarcanichu. Shinapash huañunata manllaimandami Taita Diostaca mañarcani. Chaipimi Taita Diostaca: Ñuca caimanda salvarishpaca, Taita Dios, canda rijsingapami esforzarisha nishpa mañarcani. Shinapipachami ushashca huairahuan tamia bajarishpaca tranquilo quidarca. Chaipa jipami salvarishcamandaca, Taita Diosmanda yachajui callarircani.

Barcopi cashpallatami Bibliataca lii callarircani. Chaipi cashpaca, marpi cashcamanda, marpi pescadogucunata ricushcamanda, delfingunata ricushcamandami tranquilo sintirircani. Tutacunapica jahua cielopi ashtaca estrellacunata ricunatami gushtarcani. Caicunata ricushpami shuj Dios ciertopacha tiashcata, ñucanchicunamanda preocuparishcata ashtahuan crircani.

Huaquin semanacunata marpi viajajushca jipami, barcocuna shayarina pushtuman España llactapi, puerto de Alicante nishcaman chayarcanchi. Chaipimi ñucanchi barcotaca shuj mushuj barcota randingapaj munashpami jatui callarircanchi. Ñucanchi barcoca motor illaj, yacupash yaicujujmi carca. Chaimandami na fácil jatuita usharcanchi. Na jatui ushashpapash, Bibliata liingapaca ashtaca tiempotami charircani.

Bibliata liishpami, ñucanchicuna cushilla causachun ali consejocuna tiashcata cuenta japircani. Shuj limpio causaita charingapaj imacunatalla rurana cashcatami yachajurcani. Chaimandami ¿imashpata ashtaca gentecuna Jesusta catinchi nishpapash Bibliapi yachachishcacunataca na catin? yarcani.

Shuj ali causaiguta charingapami ñuca causaipica cambiocunata rurarcani. Chaipaca drogata chupanatami  saquircani. Bibliapi yachachishcacunata pactachishpa causaj gentecunaca tianga yashpami, paicunata mascai callarircani. Chaimandami, cashna gentecunata taringapaj ayudahuai nishpa cutin Taita Diosta mañarcani.

Ali religionda taringapaca, asha ashami shuj shuj religiongunata ricui callarircani. Españapi callecunata purijushpaca, shuj shuj iglesiacunatami ricurcani. Chai iglesiacunamandaca mayoriami ashtaca santocunata, imagengunata charirca. Chaimandami chai iglesiacuna Taita Diosta na ali adoraj cashcata seguro carcani.

Shuj domingotaca shuj laderalla lomapimi, barcocuna shayarina pushtuta ricushpandi, Santiago 2:1-5​ta liijurcani. Chaipica charijcunahuan o ricocunahuanllaca na llevarina cashcatami yachachijurca. Barco shayajuj pushtuman tigrajushpaca, shuj pushtupica “Salón del Reino de los Testigos de Jehová” nijujtami ricurcani.

Chaimanga, “chai gentecunaca ¿imashinashi tratahuan?” yashpa ricungapallami, chaqui lluchu, barbaspash junda, pantalongunapash liqui liqui yaicurcani. Chaiman yaicujpica shuj acomodador chasquishpami, shuj mayorlla señoragupa ladopi tiachihuarca. Cai señoraguca ali alimi carca. Discursota cuj huauquigu nijuj textocunatami Bibliapi mascashpa ayudahuarca. Reunión tucurijpica, tucuicunami ñucataca saludangapaj shamurca. Tucuicunami ali ali chasquihuarca. Chaita ricushpaca manllarishpami quidarcani. Shuj huauquica paipa huasipi Bibliamanda yachajungapami invitahuarca. Shinapash ñuca Bibliata tucuillata nara liishca caimandami, “nara listo canichu. Listo cashpaca villashami” nircani. Chai punllamandami tucui tandanajuicunaman ri callarircani.

Huaquin semanacuna jipami, chai invitashca huauquipa huasiman rircani. Chaipimi huauquiguca ñucapa tucui tapuicunataca Bibliahuan contestahuarca. Shuj semana jipaca, shuj fundapi junda ropatami carahuarca. Cai huauquica nihuarcami: “Cai ropaca, shuj huauquigupami can. Cai huauquiguca, Bibliapi mandashcacunata pactachimandami carcelpi tiajun. Paica guerraman na ringapaj munaimandami” carcelpi churai tucurca nihuarca (Is. 2:4; Juan 13:34, 35). Chaita uyashpami, por fin Bibliapi mandashca consejocunata pactachij gentecunata tarishcata cuenta japircani. Shuj tranquilo islata mascanataca ñana munarcanichu. Ashtahuangarin Bibliata ashtahuan yachajunatami pensarircani. Chaimandami Países Bajos nishca llactaman cutin tigrarcani.

Carrocunata shayachishpa shayachishpami, chuscu punllacunapi Groninga nishca llactaman chayarcani. Chaipimi ñucallata mantiniringapaca shuj trabajota mascarcani. Chaipaca shuj carpinteriapimi trabajota mascangapaj rircani. Chai carpinteriapica, shuj documentota jundachichunmi mañarca. Chai documentopa tapuicunapica shujca: “¿Ima religionda cangui?” nishpami tapujurca. Chaimandami ñucaca: “Testigo de Jehovami cani” nishpa escribircani. Chai documentota ña jundachishca jipaca, carpinteriamanda dueñoca ñucata ricushpaca: “Ña shinaca ñami cayasha” nihuarcami. Shinapash nunca na cayahuarcachu.

 Chaimandami cutin shuj carpinteriaman rircani. Chaipimi carpinteriapa dueñotaca: ¿Nachu trabajogu tiapan? nishpa nircani. Chaimi paica tapuhuarca: ¿Imatapash estudiashcachu cangui? ¿O shuj trabajopipash imatapash rurashcachu cangui? nihuarca. Chaimi: Shuj barcotallami arreglashcani nishpa villarcani. Shina nijpica dueñoca: “Shinaca ña trabajai callarilla” nircami. “Shinapash caipica imapash problemataca ama ruranguichu. Ñucaca testigo de Jehovami cani. Bibliapa nishcacunata pactachishpami causani” nircami. Shina nijpimi: “Ñucapash testigo de Jehovami cani” nircani. Shinapash ñuca ajcha largota ricushpa, barbasta ricushpaca: “Ña, shinaca Bibliatami yachachisha” nihuarca. Chaimi ñucaca cushijushpa ari nircani. Chaipimi cuenta japircani caishuj carpinteriapi imamanda na cayahuashcata. Jehovami ñuca munashcata tarichun ayudahuajurca (Sal. 37:4). Carpinteriapica shuj huatatami trabajarcani. Y shuj huatatami Bibliataca estudiarcani. Enero de 1974 huatapimi bautizarircani.

Bautizarishcamanda shuj quilla jipami precursoradota japircani. Chaimanda shuj quilla jipaca Ámsterdam llactamanmi español shimipi shuj grupota apoyangapaj rircani. Chaipi cashpa español, portugués shimicunapi Bibliamanda yachachishpaca cushillami sintirircani. Mayo de 1975​pimi precursor especial tucuchun nombrahuarca. Chaica cushijushcapachami carcani.

Shuj punllaca ñucanchi reunionmanmi, Catharina shuti precursora especial panigu shamushcarca. Paica, paihuan Bibliamanda estudiajuj Bolivia llactamanda shuj huarmiguta pushashpami shamushcarca. Chaipimi Catharinata rijsishpaca, ashtahuan rijsiringapaj nishpa, cartagucunata escribishpa parlaringapaj quidarcanchi. Ishcandillatami Jehová Diosta ashtahuan sirvina munaita charishcarcanchi. Chaimandami 1976 huatapi cazarashpa, 1982 huatacaman precursor especialcuna shina sirvircanchi. Chai jipami, Galaad Escuelapa clase 73man invitarca. Chai Galaad Escuelamandaca, África Orientalmanmi cacharca. Chaipica, picha huatacunatami Mombasa pushtupi sirvinajurcanchi. Cutin 1987 huatapica, Tanzania pushtumanmi cacharca. Chaipimi ñucanchipa obraca ñana prohibishca carca. Chaipi 26 huatacunata cashpami cutin Mombasaman tigrarcanchi.

Ali shungu gentegucunata Bibliamanda yachachishpa ayudashpaca cushillami sintirishcani. Mombasa llactapi cashpami villachijushpaca shuj jariguta tarircani. Paimanga ishcai revistacunatami curcani. Chaimi cai jariguca: “Lii tucuchishpaca ¿imatata rurasha?” nihuarca. Chaimandami shuj semana jipaca Bibliata yachajui callarircanchi. Bibliataca, Usted puede vivir para siempre en el paraíso en la Tierra nishca librohuanmi yachajui callarircanchi. Chairallami suajili shimipi llujshishca carca. Chai jariguca Bibliata estudiashpaca shuj huata jipami bautizarirca. Shinallata precursor regularpashmi tucurca. Chai punllamanda caimanga, cai huauquigu, paipa huarmigupash casi 100 gentecunatami Jehová Diosmanda yachachishpa Jehová Diosta sirvichun ayudashca.

Ñuca causaipi cushilla cangapaj imata rurana cashcata cuenta japishpaca, shuj negociante runa shuj juyailla, valishca perlaguta tarishcashnami sintirircani (Mat. 13:45, 46). Chaimandami shujcunapash ñucashnallata shuj cushilla causaiguta tari ushachun ayudangapaj munarcani. Ñuca, ñuca huarmigundica Jehová Diosta sirvijpi, Jehová Dios imashina bendiciashpa cushilla causaiguta charichun ayudashcatami cuenta japipashcanchi.