Na ou fanau i Netherlands i le 1948. I le tausaga na sosoo ai, na siitia ai loʻu aiga i São Paulo, Pasili. Na malolosi oʻu mātua i le lotu, ma e matou te faitauina e lē aunoa le Tusi Paia pe a uma le meaʻai i le pō. I le 1959, na matou siitia ai i le Iunaite Setete ma na matou nonofo ai i le setete o Massachusetts.

Na galue mamafa loʻu tamā e tausia se aiga e toʻavalu. E tele galuega eseese na galue ai loʻu tamā, e pei o le femalagaaʻi e faatau oloa a se kamupani, fai auala, ma galue i se kamupani vaalele faavaomalo. Na matuā fiafia lo matou aiga ina ua faigaluega loʻu tamā i lenā kamupani vaalele, ona na faigofie ai ona matou femalagaaʻi i le tele o atunuu.

A o ou aʻoga i le kolisi, na masani ona ou mafaufau, ʻPo o le ā o le a ou faia pe a ou matua?’ Na filifili isi aʻu uō e ō i le iunivesite, ae o nisi na auai i le vaegaʻau. Ae ou te leʻi fia auai i le vaegaʻau, ona ou te lē fiafia i le femisaaʻi ma le fetauaʻi. O lea, na ou filifili ai ou te alu i le iunivesite ina ia ʻalofia ai le auai i le vaegaʻau. Ae i loʻu loto, na ou manaʻo e fesoasoani i isi ona na ou manatu o le auala lea ou te maua ai se olaga faamalieina.

I le iunivesite, na ou fiafia e suʻesuʻe olaga o tagata ma a latou aganuu, ona na ou fia iloa po o le ā le amataga o le ola. Na aʻoaʻoina i matou i le faaevolusione, ma na faatalitalia i matou e talia lenā aʻoaʻoga o se mea moni. Ae iā te aʻu, o nisi faamatalaga e faatatau i lenā aʻoaʻoga e lē talafeagai, ma e manaʻomia ai le talitonu e aunoa ma ni faamaoniga, ae feteenaʻi lenā mea ma le faasaienisi.

I le vasega na ou iai, e leʻi aʻoaʻoina ai i matou i tapulaa maualuluga tauamio. Ae na aʻoaʻoina i matou i le auala e taulau ai e tusa lava po o ā mea e matou te faia. O faauōga i patī, faaaogāina o fualaau faasāina na ou maua ai le fiafia, ae na vave ona toe mou atu. Na ou tomānatu ai, ʻPo o le olaga faamalieina moni lava lenei?’

I lenā taimi, na ou siitia ai i le aai o Boston ma ou aʻoga ai i le iunivesite i ina. Pe a tuua le aʻoga i le tau māfanafana, ona ou faigaluega lea e totogi ai laʻu aʻoga. O i ina na ou feiloaʻi muamua ai i se Molimau a Ieova, na ma faigaluega faatasi. Na ia talanoa mai iā te aʻu i le valoaga i “taimi e fitu” o loo i le Tanielu mataupu e 4, ma na ia faamatala mai ua tatou ola i taimi o le iʻuga. (Tani. 4:13-17) Na vave ona ou iloa, pe afai e faaauau pea na talanoaga faale-Tusi Paia ma aogā iā te aʻu, e tatau ona ou faia ni suiga i loʻu olaga. O lea, na ou faia ai mea uma ou te mafaia, ina ia ʻalofia ai le toe faia o se talanoaga faale-Tusi Paia.

I le iunivesite, na ou aveina ai nisi mataupu ina ia saunia ai aʻu mo galuega tauofo i Amerika i Saute. Na ou manatu o le faia o galuega lelei mo isi, o le a ou maua ai le faamalieina i le olaga. Peitaʻi, na ou iloa ai e oo lava i lenei galuega e lē mafai ona ou maua ai se olaga faamalieina. Na ou lagona le lē mautonu ma le lē fiafia, ma ou tuua ai le iunivesite.

Iā Me 1970, na ou siitia ai i Amsterdam i Netherlands e faigaluega i le kamupani vaalele lea na faigaluega ai loʻu tamā. Na tele ina ou malaga i isi atunuu e pei o Aferika, Amerika, Europa, ma le Atu Asia, ona o laʻu galuega. Na vave ona ou iloa, po o fea lava ou te malaga i ai e matuā ogaoga faafitauli o loo fesagaʻia e na atunuu ma e foliga mai e leai se tasi e mafai ona foʻia. O lea, na ou toe naunau ai e faia se mea tāua i loʻu olaga, ma na ou toe foʻi ai i le Iunaite Setete ma toe aʻoga i le iunivesite i Boston.

E leʻi umi ona ou toe auai i le aʻoga, ae ou iloa ai e lē o mafai ona ou mauaina tali o aʻu fesili e faatatau i le olaga. Ou te leʻi iloa po o le ā le mea a fai, o lea na ou fesili ai i laʻu faiaʻoga polofesa mo se fautuaga. Na faateʻia aʻu ina ua ia faapea mai, “Aiseā e faaauau ai pea lau aʻoga? Ua tatau ona lava lenā aʻoga.” O lea, na ou fiafia ai e tuua le iunivesite ma ou te leʻi toe fia foʻi i ai.

Peitaʻi, e foliga mai e leai se faamoemoe o le olaga, o lea na ou filifili ai loa ou te auai i se vaega o tagata e teena tū ma aganuu masani ae e latou te faaauilumaina le filemu ma le alofa. Na matou malaga faatasi ma nisi o aʻu uō mai i le Iunaite Setete e agaʻi atu i le taulaga o Acapulco i Mekisikō. Na matou nonofo faatasi ma tagata e taʻua o hippie, lea e foliga mai e leai ni mea e popole ai i le olaga. Ae na vave ona ou iloa, o le olaga na latou ola ai e leai se faamoemoe ma se fiafia tumau. Na matuā faatumulia o latou olaga i le lē faamaoni ma le taufaalata.

I lenā taimi, na ou toe mafaufau ai i mea na ou manaʻo e fai a o oʻu laʻitiiti. Na ou manaʻo ou te folau i le vasa o se kapeteni ae lē o se tagata seila. E pau le auala ou te faia ai lenā mea o le iai o saʻu lava vaa failā. Na iai saʻu uō e igoa iā Tom e tutusa lelei o ma faanaunauga, o lea na ma filifili ai e folau faatasi i le lalolagi. Na ou manaʻo ai e suʻe se motu parataiso matagofie ou te saʻoloto mai ai i pulega a tagata.

Na ma malaga i Arenys de Mar, e latalata i Barcelona, i Sepania. O ina na ma faatauina ai se vaa failā e 31 le umi (9.4 m) na faaigoaina iā Lygra. Na ma toe faaleleia le la o le vaa ina ia mafai ona folau i le sami. Talu ai e leai se mea e faanatinati ai le ma malaga, o lea na ma aveesea ai le afi ae faaaogā le mea na tuu ai le afi e tuu ai nisi faguvai mo le malaga. Na ma faapipiiina foʻi ni foe se lua e taʻi 16 futu le uumi (5 m) ina ia mafai ai ona ma aloina le vaa i totonu o uafu lāiti. Ua oo mai le taimi e ma te folau atu ai i Seychelles, i le vasa Initia. Na ma fuafua e ma te malaga atu i le talafatai o le itu i Sisifo o Aferika, ma taamilo atu ai i le nofoaga e taʻua o le Cape of Good Hope i Aferika i Saute. Na ma faaaogāina fetu, faafanua, tusi ma se meafaigaluega faigofie, ina ia fesoasoani e ma te faimalaga ai i le nofoaga tonu lea na ma fia ō i ai. Na ma māofa i le mafai ona ma iloa o le nofoaga tonu na ma malaga i ai.

Ae na ma iloa mulimuli ane o lenei vaa ua tuai, e fai i laupapa ma e lē mafai ona faaaogā e folau ai. E pe ā ma le ono kalone (22 L) i le itula le telē o le vai e sao atu i le vaega na mama o le vaa. E pei ona taʻua i aʻu upu tomua, i le taimi na agi ai le afā na ou fefe ma o le taimi muamua lea na ou tatalo ai mo le tele o tausaga. Na ou taʻutino atu i le Atua pe a faasaoina i maʻua mai i lenei afā o le a ou taumafai e iloa o ia. Ina ua teʻa le afā, na ou faataunuuina loa laʻu taʻutinoga na fai.

Na amata ona ou faitauina le Tusi Paia a o ma folau. Seʻi faaāta le matagofie o le iai i le lotolotoi o le Sami Metitirani, a o siʻomia e ituaiga o iʻa eseese mananaia ma le tafaʻilagi matagofie e leai se mea e gata mai ai. I le pō, na ou matuā maofa ai i le aniva o le Milky Way lea o loo i ai i totonu lo tatou lalolagi ma na matuā faamalosia ai loʻu mautinoa e iai se Atua e manatu mamafa i tagata.

Ina ua mavae ni nai vaiaso o ma folau, na ma taunuu atu ai i se tamaʻi uafu i Alicante i Sepania, lea na ma taumafai ai e faatau ese atu lo ma vaa, ae faatau mai se isi vaa lelei. E leʻi faigofie ona maua se isi e faataua le ma vaa ona ua tuai, e leai se afi ma e mama! I le isi itu, o le taimi sili ona lelei lea e faitau ai laʻu Tusi Paia.

O le tele na ou faitauina ai le Tusi Paia, o loʻu vaai foʻi lena iai e pei o se tamaʻi api o loo tusi ai faamaumauga aogā e taulau manuia ai se tasi i le olaga. Na ou matuā maofa i le manino o fautuaga a le Tusi Paia e faatatau i le ola i se olaga mamā tauamio. Na ou tomānatu, aiseā ua toʻatele ai tagata e aofia ai ma aʻu ua faapea mai o Kerisiano, ae e lē o ola e tusa ai ma fautuaga a le Tusi Paia?

Na ou maumauaʻi e faia suiga ina ia ou ola ai i se olaga mamā, o lea na ou lē toe faaaogāina ai fualaau faasāina. Na ou manatu e iai tagata o loo ola i tapulaa tauamio a le Tusi Paia, ma ou te manaʻo e feiloaʻi iā i latou na. O le taimi lona lua na ou tatalo  ai i le Atua, na ou talosaga ai e fesoasoani mai iā te aʻu ia maua i latou.

Ou te manatu o se mea talafeagai le saʻilia o le lotu moni, seʻia oo lava ina ou maua. A o oʻu savali atu i le auala i Alicante, na ou vaaia ai le tele o falesā. Peitaʻi, ona o le tele o na falesā e iai faatusa, na ou iloa ai e lē o ni lotu moni.

I le aoauli o le Aso Sa, na ou nofonofo ai i luga o se mauga i le mea e iloa atu ai le uafu, ma faitau le Iakopo 2:1-5, lea o loo iai le lapataʻiga e faatatau i le faailoga tagata. Ina ua ou toe foʻi i le ma vaa, na ou vaaia ai se fale e foliga mai e fai ai ni sauniga lotu, o loo i ai se faailoilo i le pito i luga o le faitotoʻa e faapea, “Maota mo Sauniga a Molimau a Ieova.”

Na ou mafaufau, ʻSeʻi tofotofo tagata nei, ma vaai po o le ā le auala e tali mai ai.’ O lea, na ou alu ai i totonu o le Maota mo Sauniga e leai ni seevae, fai laʻu ʻava, ma na fai loʻu ofuvae masaesae. Ae na ave aʻu e se tautua ma faanofo i tafatafa o se tinā matua, na fesoasoani ma le agalelei iā te aʻu e suʻe mau o le Tusi Paia o loo taʻua e le failauga. Ina ua uma le sauniga, na ou maofa i le auala agalelei na faaalia e i latou uma na faafeiloaʻia aʻu. Na valaaulia aʻu e se tamāloa i lona fale mo se talanoaga faale-Tusi Paia. Peitaʻi, e leʻi uma ona ou faitauina le Tusi Paia, o lea na ou fai i ai, “O le a ou faailoaina atu se aso e ta te feiloaʻi ai pe a ou sauni.” Talu mai lenā taimi, na amata ai loa ona ou auai i sauniga uma.

I nai vaiaso mulimuli ane ai, na ou asiasi i le fale o le tamāloa ma na ia taliina aʻu fesili faale-Tusi Paia. I le vaiaso na sosoo ai, na ia aumaia iā te aʻu se ato e tumu i ofu mananaia. Na ia taʻu mai o loo faafalepuipui le tagata e ona ofu ona o le usiusitaʻi i le faatonuga a le Tusi Paia, ia alofa le tasi i le isi ma aua le auai i taua. (Isa. 2:4; Ioa. 13:34, 35) O lea, na ou mautinoa ai ua ou maua le mea na ou saʻilia, o tagata latou te faatatauina fautuaga manino a le Tusi Paia e uiga i tapulaa tauamio! Ua suia loʻu sini mai le saʻili o se motu parataiso ou te nofo ai, i le suʻesuʻeina o le Tusi Paia ina ia ou malamalama lelei i ai. O lea, na ou toe foʻi ai i Netherlands.

E fā aso na ou suʻesuʻe lifi atu ai i le auala, faatoʻā ou oo i le aai o Groningen i Netherlands. O inā na suʻe ai loa laʻu galuega. Na ou suʻe galuega i se fale kamuta. I le pepa na ou faatumuina, na iai le fesili po o le ā laʻu lotu, na ou tusiina ai “Molimau a Ieova.” Ina ua faitau i ai le tamāloa e ona le fale kamuta, na ou mātauina ai le suia o ona foliga. Na ia faapea mai, “Ou te vili atu.” Ae e leʻi vili faatasi mai.

 I le isi fale kamuta, na ou fesili ai i le pule, pe na te manaʻomia se fesoasoani. Na ia fesili mai mo soʻu tusi pasi ma ni tusi mai i le mea na ou faigaluega muamua ai. Na ou fai i ai na ou faia galuega kamuta e toe faaleleia ai se vaa failā. Na faateʻia aʻu ina ua ia faapea mai, “E mafai ona e amata nei le aoauli ae tasi lava le mea e tatau ona e faia. Ou te lē manaʻo e te faatupuina se vevesi i inei i loʻu fale faigaluega, ona o aʻu o se Molimau a Ieova ma ou te ola e tusa ai ma mataupu silisili o le Tusi Paia.” Na ou tilotilo atu iā te ia ma le ofo tele ma ou fai atu, “O aʻu foʻi o se Molimau a Ieova!” E mautinoa o le uumi o loʻu ulu ma laʻu ava na ia faapea mai ai, “Ia o le a ou faia la lau suʻesuʻega faale Tusi Paia!” Na ou talia ma le fiafia. O lea, ua manino iā te aʻu le māfuaaga e leʻi vili mai ai le pule o le isi fale kamuta. Na finagalo Ieova ia ou faigaluega i se uso, ina ia ou suʻesuʻeina ai le Tusi Paia. Ua ia foaʻi mai iā te aʻu le mea na manaʻo i ai loʻu loto. (Sala. 37:4) Na ou faigaluega i le fale kamuta o le uso mo le tausaga. A o faagasolo lenā taimi, na ma suʻesuʻe ai le Tusi Paia, ma na ou papatiso iā Ianuari i le 1974.

I le masina mulimuli ane ai, na amata ai laʻu paeonia sauatoa, lea na ou maua ai le matuā faamalieina. I le masina na sosoo ai, na ou siitia ai i Amsterdam e fesoasoani i se vaega fou e tautatala i le gagana Sipaniolo. O se fiafiaga tele iā te aʻu le faia o suʻesuʻega faale Tusi Paia i le gagana Sipaniolo ma le gagana Potukali! Iā Me 1975, na ou maua ai se faaeaga e auauna o se paeonia faapito.

I se tasi aso, na sau ai se tuafafine paeonia faapito e igoa iā Ineke i le matou sauniga faa-Sipaniolo, e faafeiloaʻi mai lana suʻesuʻega faale-Tusi Paia e sau mai Polivia. Na amata ai i ina le ma faigāuō ma Ineke, ma na ma fetusiaʻi ai ina ia iloa lelei e le tasi le isi. E leʻi umi ae o ma iloa e tutusa o ma sini. Na ma faaipoipo i le 1976, ma faaauau ai ona ma auauna o ni paeonia faapito seʻia oo i le 1982, ina ua valaaulia i maʻua e auai i le aʻoga lona 73 o Kiliata. Na faateʻia i maʻua ma na ma fiafia tele, ina ua tofia i maʻua i Aferika i Sasaʻe i Mombasa Kenya, lea na ma auauna ai mo le lima tausaga. I le 1987, na toe tofia ai i maʻua i Tanzania, lea ua toe faataga ai le tatou galuega talaʻi. Na ma auauna ai i ina mo le 26 tausaga, a o ma leʻi toe foʻi atu i Kenya.

O le aʻoaʻoina o tagata lotofaamaoni i upu moni o le Tusi Paia, na ma maua ai le olaga faamalieina moni. Mo se faataʻitaʻiga, o laʻu suʻesuʻega muamua i Mombasa, o se tamāloa na ou fetaui ai i le talaʻiga. Ina ua ou ofoina iai ni mekasini se lua, na ia faapea mai, “A uma ona ou faitauina mekasini ia, o le ā le isi mea ou te faia?” Na ou fai i ai, i le vaiaso fou o le a ta suʻesuʻeina ai le Tusi Paia e faaaogā ai le tusi, E Mafai Ona E Ola e Faavavau i Parataiso i le Lalolagi lea faatoʻā tatalaina i le gagana Swahili. Na papatiso lenei tamāloa i le tausaga na sosoo ai, ma avea ma paeonia sauatoa. Talu mai lenā taimi, na la fesoasoani ai ma lana avā i le toetoe selau tagata ia tuuina atu ma papatisoina.

O le taimi muamua na ou malamalama ai i le uiga o le olaga, na pei oʻu faalogona o se tagata faatauʻoa na malaga ma mauaina se penina faapitoa, ma e leʻi manaʻo e faamamulu ese. (Mata. 13:45, 46) Na ou manaʻo e faaalu loʻu olaga atoa e fesoasoani ai i tagata ia maua se olaga faamalieina moni. Ua ma tofo ma laʻu avā i le auala ua faamanuia ai e Ieova ona tagata i se olaga faamalieina.