Nkhababikira ku Netherlands mu chaka cha 1948. Mu chaka chakulondezgapo, mbumba yakwithu yikasamira ku São Paulo, Brazil. Ŵapapi ŵane ŵakaŵa ŵakujipeleka chomene pa nkhani ya chisopa, ndipo kanandi mu banja la kwithu tikatemwanga kuŵerenga Baibolo lumoza para tamara waka kurya chakurya cha mise. Mu 1959, tikawukakoso ku Brazil na kusamira ku United States, ndipo tikakhalanga ku Massachusetts.

Adada ŵakalimbikiranga chomene ntchito kuti ŵapwelelere mbumba yakwithu ya ŵanthu ŵakukwana 8. Ŵakagwirapo ntchito zakupambanapambana nga ya kuguliska malonda, kupanga msewu, kweniso ŵakagwirapo ku kampani yikuru ya ndege. Tose mu banja lakwithu tikaŵa ŵakukondwa ŵati ŵayamba kugwira ntchito ku kampani ya ndege chifukwa tikaŵa na mwaŵi wa kwenda mu vyaru vyakupambanapambana.

Apo nkhaŵa ku sekondare, kanandi nkhajifumbanga kuti, ‘Kasi nizamuchita vichi para nakura?’ Ŵanyane ŵanyake ŵakasankha masambiro gha ku yunivesite, apo ŵanyake ŵakasankha kunjira usilikari. Kweni ine, nkhakhumbanga yayi kunjira usilikari chifukwa nkhatemwanga yayi vya kwambana, kweniso kutchayana. Ntheura, nkhasankha kuluta ku yunivesite m’malo mwa kunjira usilikari. Kweni pa vyose, nkhakhumbanga kovwira ŵanthu chifukwa ndivyo nkhaghanaghananga kuti vinganipa umoyo wakukhorweska.

Ku yunivesite, nkhanweka chomene na masambiro ghakukhwaskana na vya sayansi (anthropology), chifukwa nkhakhumbanga kumanya vinandi vya umo umoyo ukambira. Tikasambira vyakuti vinthu vikaŵako vyekha, ndipo asambizgi ŵakakhumbanga kuti tigomezgenge kuti ndiwo mbunenesko. Kweni kwa ine vinyake ivyo ŵakalongosoranga vikaŵa vyambura kupulikikwa, ndipo nkhakhumbanga yayi kuti nigomezgerengemo waka bweka kwambura ukaboni.

Mu kilasi, ŵakatisambizgangapo yayi fundo za makhaliro ghawemi kuti timanye uwemi na uheni. M’malo mwake, ŵakatisambizganga waka umo tingachitira kuti nyengo zose tikwerenge makora mayeso. Nkhakondwanga para nkhuchezga na ŵabwezi ŵane ku vikondwelero kweniso para nayezga minkhwala ya kutimbanizga wongo yakupambanapambana, kweni nkhakondwanga kwakanyengo waka. Ndipo nkhajifumbanga kuti, ‘Kasi uwu ndiwo umoyo wanadi?’

Pa nyengo iyi, nkhasamira mu msumba wa Boston, ndipo nkhamba kusambira ku yunivesite yakwenekuko. Nkhagwiranga ntchito nyengo ya holide kuti nisange ndalama zakulipilira sukulu yane, ndipo ku ntchito ndiko nkhakumana na Kaboni wa Yehova kakwamba. Munyane uyo tikagwiliranga lumoza ntchito, wakaniphalirapo vya uchimi wa “nyengo 7” uwo ukusangika pa Daniyeli chaputara 4, ndipo wakalongosora kuti tikukhala mu nyengo zaumaliro. (Dan. 4:13-17) Mwaluŵiro nkhamanya kuti para nilutilirenge kudumbiskana nayo vya mu Baibolo nyengo zose na kuvigomezga ivyo wakaniphaliranga, mbwe pakhumbikwenge kuti nisinthe kachitiro ka vinthu mu umoyo wane. So nkhamugwenthanga waka.

Ku yunivesite, nkhasankha visambizgo ivyo vingazakanovwira kugwira ntchito ya kujipeleka ku South America. Nkhaghanaghananga kuti para nkhovwira ŵanthu mwakuŵachitira vinthu viwemi awo ŵakukhumbikwira wovwiri mbwe niŵenge na umoyo wakukhorweska. Ndipouli nkhawona kuti nanga ningachita nthena, kweni ningaŵaso na umoyo wa chandulo yayi. Nkhagongowa chomene, ndipo paumaliro nkhaleka masambiro gha ku yunivesite.

Mu Meyi 1970, nkhasamira ku Amsterdam, ku Netherlands, kuti nkhagwire ntchito ku kampani ya ndege yeneiyo adada ŵakagwirako. Chifukwa cha ntchito iyi, nkhaŵa na mwaŵi wakwenda mu vyaru vyakupambanapambana nga vya mu Africa, America, Europe na Asia. Mwaluŵiro nkhamanya kuti nanga ni mu vyaru ivyo nkhendangamo, vyose vikaŵa na masuzgo ghakuru, ndipo pakaŵavya uyo wakaŵa wakunozgeka kumazga masuzgo agha. Nipera, nkhakhumbanga kufiska chinthu chinyake chakukhumbikwa mu umoyo wane. So nkhawona kuti chikaŵa chiwemi kuweleraso ku United States kuti nkhalutizge masambiro ghane pa yunivesite yeneyira ya Boston.

Kweni nati naweleraso ku sukulu, mwaluŵiro nkhamanya kuti masambiro gha pa yunivesite ghakanovwiranga yayi kusanga mazgoro gha mafumbo ghakukhwaskana na umoyo wane. Nkhasoŵa chakuchita, so nkhafumba yumoza wa ŵasambizgi ŵane kuti wanovwireko mahara. Ivyo wakazgora vikanizizika chomene. Iyo wakanifumba kuti: “Chifukwa wuli ukulutilira waka na masambiro? Walekerachi kuleka waka?” Nkhaghajowolezga nyengo yeneyiyo! Nkhawukako ku yunivesite ndipo nkhawelerakoso yayi.

Chifukwa chakuti nkhawonanga kuti umoyo wane ukaŵavya chandulo, nkhakolerana na kagulu ako kakakananga kulondezga mitheto yinyake, ndipo kakawonekanga kuti chilato chake nkhukhuŵilizga mtende kweniso kuti ŵanthu ŵatemwanenge. Ine na ŵabwezi ŵane ŵanyake tikenda vigaŵa vyakupambanapambana mu United States m’paka kufika ku Acapulco, Mexico. Tikakhalanga na ŵanthu awo ŵakakananga kwendera malango ghanyake ghakakhaliro, ndipo ŵakawonekanga kuti ŵakukhala umoyo wambura masuzgo kweniso  vyenjezgo. Kweni apo nkhakhalanga na ŵanthu aŵa, mwaluŵiro nkhawona kuti umoyo wawo ukaŵa wambura chandulo panji kuŵa na chimwemwe chanadi. M’malo mwake ŵanandi mwa ŵanthu aŵa ŵakaŵa ŵaryarya kweniso ŵambura kugomezgeka.

Pa nyengo iyi, nkhamba kughanaghaniraposo pa ivyo nkhakhumbanga kuchita apo nkhaŵa mwana. Nkhakhumbanga kwenda mu nyanja, nga wakwendeska boti yayi kweni nga kaputeni. Kuti nikwaniske kuchita ichi nkheneranga kuŵa na boti lane na lane. Pakuti munyane zina lake Tom nayo wakakhumbanga kuchita vyenevivi, mbwe tikakolerana kuti tende pa boti kuzingilira charu chose lumoza. Nkhakhumbanga kusanga chirwa chakutowa uko ningaŵa wakufwatuka ku malango gha charu.

Tom na ine tikanyamuka ulendo kuluta ku Arenys de Mar, kufupi na Barcelona, ku Spain. Uku ndiko tikakagura boti la mamita 9.4 lakuchemeka Llygra. Tikamba kunozga boti ili kuti tendenge makora pa nyanja. Pakuti ulendo withu ukaŵa wakuchimbilira yayi kuti tikafike uko tikakhumbanga, tikawuskamo injini na kugwiliskira malo ghake kuti tisungengemo maji ghakumwa ghanandi. Boti lithu tikagulirako mapolo ghaŵiri gha mamita 5 mwakuti ghatovwirenge kuyimikira boti ili mu madowoko. Paumaliro, tikawuyamba ulendo withu wakuluta ku Seychelles, mu Indian Ocean. Pulani yithu yikaŵa yakwenda ku manjiliro gha dazi kwa Africa kweniso ku chigaŵa cha Cape of Good Hope, ku South Africa. Tikagwiliskiranga ntchito nyenyezi, mapu, mabuku, na vipangizgo vyambura kusuzga kuti vitovwire kwenda munthowa yakwenelera. Nkhazizwa chomene kuwona umo tikamanyiranga malo ghithu.

Mwaluŵiro tikamanya kuti boti lithu la mathabwa likaŵa lakwenelera yayi kwenda nalo pa nyanja. Maji pafupifupi malita 22 ghakanjiranga mu boti pa ora lililose. Nga umu nanguyowoyera kukwamba, nyengo ya chimphepo chikuru nkhaŵa na wofi ndipo kakaŵa kakwamba kuti nilombe pati pajumpha vyaka vinandi chomene, ndipo Chiuta nkhamulayizga kuti para tiponenge, niyezgeskenge kuti nimumanye makora. Chimphepo chikaleka, ndipo nkhasunga layizgo lane.

Nkhamba kuŵerenga Baibolo apo tikaŵa pa nyanja iyi. Ghanaghanirani waka umo vikaŵira vyakunozga kukhala mu boti lane kutali na ku mtunda mu Nyanja ya Mediterranean iyi, ndipo vyose ivyo nkhawonanga yikaŵa waka mitundu yakupambanapambana ya somba na kutowa kwa charu. Nyengo ya usiku, nkhanwekanga chomene na unandi wa nyenyezi izo nkhawonanga, ndipo vikanikhorweskanga kuti kuli nadi Chiuta uyo wakunweka nase taŵanthu.

Pati pajumpha masabata ghanandi tili pa nyanja, tikafika pa dowoko la Alicante, ku Spain, uko tikayezga kuguliska boti lithu kuti tigure linyake liwemi. Chikaŵa chakuzizika yayi, kuti chikaŵa chakusuzga kusanga munthu wakugura boti lithu ilo likaŵa lakale, lambura injini, kweniso la kusulura. Kweni yikaŵa nyengo yiwemi kwa ine kuti niŵazgenge Baibolo lane.

Nati namba kuŵazga chomene Baibolo, ndipo nkhamba kumanya kuti ni buku ilo lili na fundo izo zingatovwira kuti tiŵe na umoyo wa chimwemwe. Nkhakondweskeka chomene na ulongozgi wa mu Baibolo wa umo tingakhalira na umoyo uwemi, ndipo nkhajifumbanga chifukwa icho ŵanthu ŵanandi, kusazgapo ine, tikajitoranga kuti ndise Ŵakhristu kweni tikalondezganga yayi ivyo Baibolo likuyowoya.

Nkhaŵikapo mtima kuti nkhwenera kusintha vinthu vinyake pa umoyo, ndipo nkhaleka kugwiliskira ntchito munkhwala wakuzweteska wongo. Nkhaghanaghananga kuti pakwenera kuti pali ŵanthu awo ŵakulondezga fundo za mu Baibolo, ndipo nkhakhumbanga kukumana nawo. Nkhalombaso kachiŵiri, kupempha Chiuta kuti wanovwire kuŵasanga ŵanthu aŵa.

Kwa ine, nkhawonanga kuti likaŵa suzgo yayi kusanda chisopa chilichose pachekha kuti m’paka nisange chisopa chaunenesko. Apo nkhendanga mu misewu ya Alicante, nkhawona nyumba za chisopa zinandi. Kweni chifukwa chakuti zinandi zikaŵa na vikozgo, chikaŵa chipusu kumanya kuti ntchisopa chaunenesko yayi.

Zuŵa linyake pa Sabata kumise, nkhaŵa mumphepete mwa phiri kuthyana na dowoko, nkhaŵerenganga lemba la Yakobe 2:1-5, ilo likuchenjezga za uheni wakutemwera awo mbasambazi pakuchita vinthu. Apo nkhaweleranga ku boti lithu, nkhajumpha apo pakawonekanga nga pakuwungana ŵanthu ŵanyake ŵa chisopa, ndipo pachanya pa chijaro chake pakalembeka kuti: “Nyumba ya Ufumu ya Ŵakaboni ŵa Yehova.”

Nkhaghanaghana kuti, ‘Niŵayezge ŵanthu aŵa, ndipo niwone umo ŵanipokelerenge.’ So nkhanjira mu Nyumba ya Ufumu kwambura kuvwara skapato, nkhaŵa na mwembe unandi, ndipo nkhavwara jinzi ya kukeruka. Uyo wakapokeleranga ŵalendo, wakanitora na kunipa malo pafupi na mama wachilara, uyo mwachitemwa wakanovwira kusanga malemba agho uyo wakadumbanga nkhani wakazunuranga. Tati tamara maungano, nkhazizwa na chitemwa cha ŵanthu wose awo ŵakiza kuzakanitawuzga. Mwanalume yumoza wakanichemera kunyumba kwake kuti tikadumbiskane vya mu Baibolo, kweni chifukwa chakuti nkhaŵa kuti nindamare kuŵazga Baibolo, nkhamuphalira kuti, “Nizamumumanyiskani para nanozgeka.” Pa nyengo iyi, nkhamba kuluta ku maungano ghose gha mpingo.

Masabata ghanandi ghati ghajumphapo, nkhaluta ku nyumba kwa mwanalume uyo wakanichemera ku nyumba kwake, ndipo wakazgora mafumbo ghane gha mu Baibolo. Sabata yakulondezgapo, wakanipa chikwama chakuzura na malaya ghawemi ghanandi. Wakaniphalira kuti mwenecho wa vyakuvwara ivi wakaŵa ku jele chifukwa cha kupulikira dango la Baibolo la kutemwana yumoza na munyake na kukana kusambira nkhondo. (Yes. 2:4; Yoh. 13:34, 35) Sono ndipo nkhakhorwa kuti nasanga ivyo nkhapenjanga, awo ni ŵanthu awo ŵakulondezga ivyo Baibolo likuyowoya pa nkhani ya kukhala umoyo wambura kabanga na charu! Chilato chane chikaŵaso chakuti nisange chilumba icho ni paradiso yayi, kweni kuti nisambire Baibolo na kulipulikiska. So nkhawelera ku Netherlands.

Vikanitolera mazuŵa ghanayi kuti nkhafike ku tawuni ya Groningen, ku Netherlands. Nkhakhumbikwiranga kusanga ntchito kuti nikwaniske kujipwelelera. Pa shopu yinyake ya ukalipentara iyo nkhafumbirapo ntchito, nkhapika pepara ilo likaŵa na mafumbo ghakupambanapambana, ndipo limoza mwa igho likafumbanga za chisopa chane. Nkhalembapo kuti, “Kaboni wa Yehova.” Mwenecho wati waŵerenga, nkhawona kuti kawonekero ka chisko chake kakasintha. Wakayowoya kuti, “Nikuyimbirenge.” Kweni wakayimba yayi.

Pa shopu ya ukalipentara yinyake, nkhafumba mwenecho usange wangakhumba wovwiri. Wakanifumba za masambiro ghane kweniso ntchito izo nili  kugwirapo kale. Nkhamuphalira kuti nkhanozgapo boti la mathabwa. Nkhazizwa, apo wakayowoya kuti, “Ungazakayamba ku muhanya uku kweni ukwenera kukwaniska chinthu chimoza. Nkhukhumba yayi kuti wize na masuzgo pa shopu yane pano, chifukwa ndine yumoza wa Ŵakaboni ŵa Yehova, ndipo nkhuchita vinthu mwakukolerana na fundo za mu Baibolo.” Nkhazizikika chomene ndipo nkhazgora kuti, “Naneso ndine yumoza wa Ŵakaboni ŵa Yehova!” Chifukwa chakuti nkhaŵa na sisi litali kweniso mwembe unandi, wakamanya kuti nkhaŵa yumoza wa iwo yayi. So wakati, “Mbwenu, nisambirenge nawe Baibolo!” Mwachimwemwe nkhazomera pempho lake. Apa ndipo nkhamanya chifukwa icho kalipentara wakwamba wakanikanira. Yehova wakakhumbanga kuti nisambire Baibolo, ndipo apa wakazgoranga malurombo ghane. (Sal. 37:4) Nkhagwira ntchito ku shopu ya mubali uyu kwa chaka chimoza. Panyengo yose iyi wakasambiranga nane Baibolo, ndipo pamanyuma mu Janyuwale, 1974 nkhabatizika.

Mwezi wati wajumphapo, nkhamba upayiniya, uwo wanipa chimwemwe chikuru. Mwezi wakulondezgapo, nkhasamira ku Amsterdam kuti nkhawovwire kagulu ka chiyowoyero cha Chisipanishi, ako kakaŵa kuti kakhazikiskika waka. Nkhaŵa wakukondwa chomene kupangiska masambiro gha Baibolo mu viyowoyero vya Chisipanishi na Chiphwitikizi. Mu Meyi 1975, nkhapika mwaŵi wakuti nkhateŵeterenge nga mupayiniya wapadera.

Zuŵa linyake, mudumbu munyake uyo wakaŵa mupayiniya wapadera zina lake Ineke, wakiza ku maungano ghithu gha Chisipanishi na sambiro lake la Baibolo ilo likayowoyanga chiyowoyero cha ku Bolivia. Wakiza nalo kuti limanyane na ŵabali na ŵadumbu awo ŵakayowoyanga Chisipanishi. Ine na Ineke tikalutilira kumanyana makora kwizira mukulemberana makalata, agho mwaluŵiro ghakavumbura kuti tikaŵa na vilato vyakuyana. Tikatorana mu 1976, ndipo tikalutilira kuteŵetera nga ŵapayiniya ŵapadera m’paka mu 1982 apo tikachemeka kuti tikanjre kilasi la nambala 73 la Giliyadi. Tikazizwa kweniso kukondwa chomene kuti tikatumizgika ku chigaŵa cha kumafumiro gha dazi kwa Africa, uko tikakateŵetera kwa vyaka vinkhondi ku Mombasa, Kenya. Mu 1987, tikatumizgikaso ku Tanzania, uko bani yikaŵa kuti yamara ndipo mulimo withu wakupharazga ukambiraso. Tikakhalako vyaka vyakukwana 26 pambere tindawelere ku Kenya.

Kovwira ŵanthu ŵakuzika kusambira unenesko wa mu Baibolo kwapangiska umoyo withu kuŵa wa chandulo. Mwachiyelezgero, sambiro lane lakwamba la Baibolo ku Mombasa, wakaŵa mwanalume uyo nkhakumana nayo apo tikapharazganga. Nati namugaŵira magazini ghaŵiri, wakayowoya kuti, “Para namalizga kuŵazga magazini agha, kasi nkhweneraso kuchita vichi?” Sabata yakulondezgapo tikamba kusambira Baibolo na buku lakuti Mungathe Kukhala ndi Moyo Kosatha M’paradaiso pa Dziko Lapansi, ilo likaŵa kuti lafumiskika waka mu Chiswahili. Wakabatizika mu chaka chakulondezgapo ndipo wakamba upayiniya wanyengozose. Kwamba waka pa nyengo iyi, iyo na mwanakazi wake ŵawovwira ŵanthu pafupifupi 100 kujipeleka kwa Yehova na kubatizika.

Nkhati namanya chilato cha umoyo, nkhajipulika nga ni wamalonda wakwendakwenda uyo wakasanga ngale ya mtengo wapatali ndipo wakayezgeska kuti wayigure. (Mat. 13:45, 46) Icho nkhakhumbanga pa umoyo wane, nkhovwira ŵanthu kuti ŵaŵe na umoyo wa chandulo. Ine na muwoli wane wakutemweka, tajiwonera tekha umo Yehova wakovwilira ŵanthu ŵake kuti ŵaŵe na umoyo wa chandulo.