Zaho teraka ta Pays-Bas taminy 1948. Nifindra ta Sao Paulo, a Brezily, zahay taminy 1949. Farandraha nazoto nandeha nivavaka eky iry olobeko, matetiky zahay niaraka namaky Baiboly koa fa baka nihinan̈a alin̈y. Nifindra ta Massachusetts, an Etazonỳ zahay taminy 1959.

Tsaota zahay kibo araiky, ke niasa mare papako namelon̈o zahay. Niovaova asa izy. Niasa tamy resaka varotro izy, nan̈amboatra lalan̈a, avio izy niasa tamy sosiete maventy momba avion. Ravoravo mare zahay, papanay koa fa niasa tamy sosiete io, fotony zahay afaka nahita tany maro.

Tamy zaho tamy lycée, matetiky zaho nieritreritry: ‘Ino raha hataoko lera zaho be?’ Namako sasany nifidy handeha aminy iniversite, fa nisy ndraiky nan̈ano maramila. Fa zaho olo tsy tia malo, ke intsaka eky handeha hiady! Tsy tan̈atiny jeriko foeky han̈ano maramila, ke zaho nanohy fianaran̈a taminy iniversite. Ten̈a tiako man̈ampy olo, fotony zen̈y niritriretiko fa hampisy dikany fiain̈ananaka.

Taminy iniversite, tiako mare nianatra siansy fotony tiako ho hay karakory nampisy raha manampahin̈ana. Nampianarin̈y raha momba evôlision zahay,  kanefa hitako tsy marin̈y aby fomba nan̈azavandro izio taminay. Hitako tsy miady foeky fan̈azavan̈a sasany fa zahay raha niforsen̈a han̈eky zen̈y fo.

Tsy nampianarin̈y toro lalan̈a momba ny tsara ndreky ratsy foeky zahay ta lekoly. Fa ny raha nampodimpody taminay, mila tafiboaka fo zahay na amy fomba akory na amy fomba akory. Karaha nahatsiaro sambatra hely zaho koa fa nan̈aton̈o fety ndreky nihina jamala niaraka taminiry namako, kanefa nielan̈a fo raha zen̈y. Matetiky zaho nan̈ontany ten̈a: ‘Ino ma dikany fiain̈ana?’

Zaho baka tio nanohy fianaran̈a taminy iniversiteny Boston. Niasa zaho koa fa vakansy be, baka mahita vola hianaran̈a. Araiky taminolo fiasan̈a araiky taminaka Vavolombelon̈o Jehovah. Sambako taminio nahita Vavolombelon̈o Jehovah. Nazavainy taminaka faminanian̈a momba “fepotoan̈a fito” amy Daniela toko faha-​4. Nivolan̈a koa izy fa atsika iziô efa miain̈y aminandra farany. (Dan. 4:13-17) Direkty haiko fa izikoa tohizanay koran̈anay io avio inoako raha ianarako amy Baiboly, tsy maintsy han̈aova fomba fiain̈ananaka zaho. Kanefa zaho mbala tsy von̈ono, ke nilifilifasako fo izy.

Nisy fiofanan̈a zay nataoko tamy zaho taminy iniversite. Izio nan̈oman̈a zaho han̈ano asa soa tan Ameriky Atsimo. Nieritreritry zaho fa ho hisy dikany fiain̈ananaka, zaho koa fa nan̈ano izio. Kanefa, tsy zen̈y aby ny raha nisy. Diso fan̈antinan̈a zaho, ke vôly foeky zaho nandeha taminy iniversite.

Tamy May 1970 zaho nifindra ta Amsterdam, a Pays-Bas. Nahita asa tamy sosiete momba avion niasàny papako in̈y zaho. Ke zaho nahavita nandeha lavitry sady nitety tany, karaha ataony Afriky, Ameriky, Eropy, ndreky Asie. Tsy ela, tontohitry koa zaho fa ndray aia ndray aia tany andianako, tsy maintsy misy problemo maventy fo tany jiaby, ary tsisy olo mahavaha iro io. Zen̈y nahavy zaho mba tihan̈ano raha misy dikany amy fiain̈ananaka. Ke nimpody ta Boston ndraiky zaho nanohy fianaran̈anaka taminy iniversite in̈y.

Tsy elany nimpodianako nianatra, tontohitry zaho fa tsy taminy iniversite foeky tany hahitako valiny fan̈ontanian̈a momba fiain̈ana. Tsy haiko foeky raha ataoko. Ke zaho nangataka torohevitry tamy papianatranay araiky zay. Tsy nampoiziko foeky raha nivolan̈iny. Ho izy: “Izikoa zen̈y, ino fo varany hanohizanao fianaran̈a? Tsy sitrany anao vôly?” Zen̈y tsarabe raha nataoko, ke zaho tsy nimpody tan̈y eky!

Hitako tsisy dikany foeky fiain̈ana, ke zaho tapakevitry hiditry tamy fikambanan̈a araiky mitady fomba hisiany fiadanan̈a ndreky fitiavan̈a. Lôso zaho ndreky namako sasany nitety Etazonỳ firaka zahay navy ta Acapulco, a Meksiky. Niaraka niain̈y taminolo tsy man̈eky fiheziny lalàn̈any fiarahamonin̈y zahay. Karaka tsisy asaloha fahitan̈a iro. Fa, arakaraka nipitrahako niaraka tamindro, nahitako fa tsy pare foeky fomba fiain̈anandro. Tsy lay tadiaviko ary tsy mampasambatra. Iro tsy nan̈ano ny marin̈y avio tsy mety atokisan̈a.

Tamy fotoan̈anizen̈y, nimpody tamy jeriko ndraiky nôfinôfinaka tamy zaho mbala hely. Zaho tihitondra sambo, fa zaho fo tsy tiako matilô fa kômandan. Tsy posibla raha zen̈y zaho koa tsisy sambolay. Nisy namako zay, Tom an̈arany, mba mitovitovy raha tian̈a taminaka, ke tapakevitry zahay hitondra sambo  hitety tany. Tamy dianay tandranomasin̈y aby zen̈y, zaho nan̈anten̈a hahita nosy araiky tsara miran̈a Paradisa, lavitry problemony donia ty ndreky tsisy lalàn̈any fiarahamonin̈y.

Zahay roeny Tom nandalo ta Arenys de Mar marikitry Barcelone, an Espagne. Zahay baka tio nivanga sambolay kadiriny 9 m. Llygra nataonay an̈arany sambo io. Namboarinay sambo io amy zay izio mahatoto daroba. Zahay tsy raha olo meky amy dianay, ke nadosonay moterany sambo io, baka zahay misy plasy han̈apitrahanay rano higiahan̈a. Nasianay five aroe kadiriny 5 m koa tamizio, baka zahay tsy sahiran̈a niditry tamy Paoro. Farany zahay rôso, nengo ta Seychelles aminy Océan Indien. Zahay baka tiô nan̈araka sisiny ranomasin̈y andrefany Afriky, avio zahay niodin̈y ta le cap de Bonne-Espérance, tan Afriky Atsimo. Ny raha nahagaga, hitanay fo lalan̈a nimboànay. Zahay nizaha lakintan̈a, avio nampiasa sarintany, boky ndreky fitaovan̈a tsotsotra mety han̈ampy zahay. Tsy very foeky zahay fa hainay tsara aia tany misy zahay.

Tsy ela, hitanay fa mila ho vaky sambonay. Kakazo niasan̈a sambo io lastio efa kay mare, avio izio efa tsy mety handihanan̈a amy ranomasin̈y maventy eky. Nisy vaky kaokiny raha io, avio izio nanomboko nidirany rano kadiriny 20 litra isaka lera. Tio fo koa, nisy andra ratsy tampoko. Araiky nivolan̈iko tamy voanalohany tarỳ in̈y. Navozo mare zaho, ke sambany taminio zaho mba nivavaka tan̈atiny taon̈o maro zay. Zaho nampan̈anten̈a Zan̈ahary fa izikoa zaho tsy maty aminio, zaho hiezaka hianatra raha momba izy. Izikoa fa jay andra ratsy in̈y, niezaka zaho nitana vava nataoko.

Mbala tamy ranomasin̈y Méditerranée tan̈y fo zaho efa nanomboko namaky Baiboly. Zaho taminio nipetraka tan̈abony sambo. Nisy laoko mitilin̈y ndreky dôfain man̈odidin̈y zaho. Tsisy raha hita foeky izikoa tsy ranomasin̈y. Izikoa fa alin̈y andra, rikian̈a anten̈a mahita lakintan̈a marobe amy Vahindan̈itry misy atsika. Zay raha tsara! Nahairesy lahatra fo zaho fa misy ankitin̈y Zan̈ahary zen̈y, avio izy ten̈a mikarakara olombelon̈o.

Tan̈atiny herin̈iandra vitsivitsy zahay tandranomasin̈y fo. Farany, zahay navy tamy paorony Alicante, an Espagne. Nalafonay sambonay efa ratsiratsy in̈y, baka io zahay nivanga araiky mbala tsara tsarabe. Tsy nora taminay nivarotro izio, fa tan̈atiny zahay nitady olo hivanga izio, nanan̈a fotoan̈a tsara zaho namakian̈a Baiboly.

Izikoa fa lôso lavitry vaky Baibolinaka, nanjary hitako fa mahatsara ndreky mampasambatra toro lalan̈a amizio ao. An̈isany raha nanaitry zaho nahita fitsipikiny Zan̈ahary momba fitondranten̈a, ke lôso eritreritry zaho nan̈ino olo maro, an̈isanizen̈y zaho, masaky mivolan̈a fa Kristianin̈y, kanefa tsy mijery raha koran̈iny Baiboly foeky.

Tapakevitry zaho han̈ova fomba fiain̈ananaka, ke vôly zaho nihinan̈a jamala. Tan̈atiny jerinaka, tsy maintsy misy olo fo an̈y miezaka man̈araka fitsipikiny Zan̈ahary amy Baiboly ao, ke zaho mba tihitraotro amindro. Nivavaka zaho baka Zan̈ahary han̈ampy zaho hahita iro.

Tan̈atiny menimeninaka, handeha hitety fivavahan̈a foeky donko zaho misy hahitako fivavahan̈a marin̈y. Ke sendra zaho nandeha tamy lalan̈a ta Alicante, zaho nahita leglizy maro maventy. Fa ankamaraozandro io, nisy sary vongana ke nora taminaka nahay fa tsisy izy iro io.

 Tandraraiky, zaho tamy zen̈y nangala tsitsiko tan̈abony bongo araiky mahatazan̈a paoro zay, dimansy folakandra taminio. Zaho namaky Jakoba 2:1-5. Hitako tao fa tsy mety man̈avakavaka olo baka amy raha anan̈any. Zaho koa fa tamy lalan̈a hody tamy sambonay, zaho nahita tran̈o tsotsotra karaha tany fivavahan̈a zay. Tan̈abony varavaran̈anizio nisy soratra: “Vavolombelon’i Jehovah—Efitranon’ny Fanjakan’Andriamanitra.”

Ho zaho tamy jeriko tan̈y: ‘Hitesteko iro olo aby ty, misy ahitako akory fandraisandro zaho.’ Ke zaho in̈y niditry tamy Tran̈o Fivorian̈a io tao tsy amy kiraro. Zaho tamy zen̈y bisômbotro avio zaho nisikiny patalon̈o jìny loadoaka zay. Pikarakara pan̈atriky nan̈ano karibo zaho, avio zaho napetrany tankilany matoevavy zay. Tsara fan̈ahy mare man̈angy io nan̈aboaka taminaka zay toko sy andininy koran̈iny pan̈ano kabaro. Izikoa fa tapitry fivorian̈a, lany fan̈ahy zaho nahita iro jiaby tsara fan̈ahy sady ravoravo nan̈ano mbalatsara zaho. Nisy lelahy araiky zay nan̈ontany zaho izikoa zaho tihianatra Baiboly antran̈onany an̈y, fa vaky Baibolinaka taminio mbala tsy vita, ke ho zaho taminany: ‘Lera zaho pare, zaho mivolan̈a aminao.’ Tantsefatsefaka zen̈y, zaho niezaka nan̈aton̈o fivorian̈a jiaby.

Herin̈iandra maromaro tafara, zaho nandeha tantran̈ony lelahy nitaon̈o zaho hianatra Baiboly in̈y, ke nivaliany tamy Baiboly aby fan̈ontanian̈anaka. Herin̈iandra tafara, zaho namezany saka feno lamba maro tsara aby zay. Tômpiny lamba aby io ho izy, nigadra fotony izy man̈araka raha ampianariny Baiboly man̈iraka atsika mifankatia ndreky tsy mianatra miady. (Isaia 2:4; Jaona 13:34, 35) Hitako amy zay raha nitadiaviko ela jiaby in̈y, tsy azovy zen̈y fa olo man̈araka raha koran̈iny Baiboly ndreky miezaka baka hadio fitondranten̈a. Komansy tamy zen̈y, niova tanjon̈onaka. Zaho fa tsy nitady nosy miran̈a Paradisa in̈y eky fa handalin̈y Baiboly. Ke zaho nimpody ta Pays-Bas.

Kadiriny efatra andra laniko tamy lalan̈a, zay zaho vo navy ta Groningue, a Pays-Bas. Nila nitady asa amy zay zaho namilaomako ten̈a. Nisy asa hitako tamy pandrafitry zay, fa zaho nirahindro nameno taratasy. Tan̈atinizio tao nisy fan̈ontanian̈a, ‘ino fivavahan̈anao?’ Nisoratiko tao “Vavolombelon̈o Jehovah.” Raha io koa fa nivakiany patron, hitako niova be saoranany. Ho izy taminaka: “Kahiako fo anao.” Fa izy tsiary nikaiky firaka niany.

Nan̈ontany pandrafitry hafa koa zaho, tsao izy mila piasa. Patron tao nangataka diplaominaka ndreky fan̈amarihan̈a baka tamy tany niasako taloha. Nazavaiko taminany fa zaho taloha nan̈amboatra raha robaka tamy sambo kakazo. Tsy  nampoiziko foeky izy hivolan̈a karaha ty: “Efa mety miasa anao folakandra, fa ty edy ay: Zaho tsy mila zistoara foeky ato fotony zaho Vavolombelon̈o Jehovah, ke zaho man̈araka raha koran̈iny Baiboly.” Lany fan̈ahy zaho, ke ho zaho taminany: “Zaho koa mba Vavolombelon̈o Jehovah!” Direkty hainy fa zaho tsy Vavolombelon̈o Jehovah, fotony zaho lava fan̈eva baka io bisômbotro. Ho izy taminaka: “Alô anao ampianariko Baiboly.” Ke zaho nan̈eky sady ravoravo mare. Nanjary nazava taminaka amy zay nan̈ino pandrafitry araiky in̈y tsy nikaiky zaho foeky, fotony Jehovah namaly vavakanaka. (Sal. 37:4) Ke zaho niasa tamy rahalahy io, baka io zaho nianatra Baiboly taminany. Taon̈o araiky tafara, tamy Zanvie 1974, zaho natao batisa.

Fanjava araiky tafara, zaho nanomboko nan̈ano pisava lalan̈a, ary ten̈a nahitako haravoan̈a raha zen̈y. Avio fanjava araiky tafaranizen̈y, zaho nifindra ta Amsterdam nan̈itatra taminy antokopitory mampiasa volan̈a espan̈ioly. Tiako mare nitariky fampianaran̈a Baiboly tamy teny espan̈ioly ndreky portigey. Ravoravo koa zaho tamy May 1975 voatendry pisava lalan̈a manokan̈a.

Indraiky andra, nisy ranabavy pisava lalan̈a manokan̈a zay nivory taminy antokopitory nisy zahay. Catharina an̈arany. Nitondra pianatra Baibolinany baka a Bolivia izy. Zahay roeny Catharina baka tio nifanoratra matetiky baka zahay mifankahay tsarabe. Tsy ela, tsapanay fa mitovy tanjon̈onay. Nan̈ano mariazy zahay tamy 1976, baka io zahay nanohy fanompoan̈anay. Pisava lalan̈a manokan̈a fo zahay firaka taminy 1982. Tamy taon̈o io zahay navoakaiky han̈aton̈o Sekoliny Gileada, kilasy faha-73. Ravoravo mare zahay tamy zen̈y! Tsy nampoizinay foeky koa zahay ho voatendry hanompo tan Afriky Antin̈iana. Nanompo ta Mombasa, a Kenya zahay tan̈atiny dimy taon̈o. Taminy 1987 zahay navoatendry ta Tanzanie. Voasakana asa fitorian̈a ataontsika tan̈y taloha, fa tamy taon̈o navianay tan̈y io raha zen̈y nivaha. Nidôko tan̈y fo zahay tan̈atiny 26 taon̈o, baka io zahay nimpody ta Kenya ndraiky.

Nanjary nisy dikany fiain̈ananaka fotony zaho nahavita nan̈ampy olo manetry ten̈a hahay ny marin̈y amy Baiboly ao. Olo voanalohany nampianariko Baiboly ta Mombasa, lelahy fanôjy zaho tamy zahay nitory tamy tany maro olo. Namezako gazety aroe izy tamy zen̈y. Ho izy taminaka: “Ino raha mila ataoko, izikoa fa voavakiko boky aby ty?” Herin̈iandra nan̈araka, zahay efa nanomboko nianatra Baiboly tamy boky “Azonao Atao ny Hiaina Mandrakizay ao Amin’ny Paradisa eto An-tany” edy. Vo niboaka tamy teny swahili boky io tamy zen̈y. Natao batisa izy taon̈o araiky tafara, baka io izy nan̈ano pisava lalan̈a maharitry. Komansy tamy zen̈y, iro roeny vadiny nahavita nan̈ampy olo efa tsy ela ho 100 hanokanten̈a amy Jehovah ndreky hatao batisa.

Somilany zaho nahay antony niasàny Zan̈ahary olombelon̈o, nitovy tamy raha tsapany lelahy pivaromandeha nahita perla valera in̈y raha tsapako. Izy von̈ono hahafoe raha baka azahoan̈a izio. (Mat. 13:45, 46) Tiako hampiasain̈a han̈ampian̈a olo fotoan̈a jiaby hiain̈ako, amy zen̈y ho hisy dikany koa fiain̈anandro. Hitanay roe fivadiany fa ten̈a man̈ampy panomponany i Jehovah, ary ataony raha mampisy dikany fiain̈anandro.