Napagwile mu 1948, ku Netherlands. Kaneko, chaka chakuyichisya liŵasa lyetu lyasamile mu msinda wa São Paulo, ku Brazil. Achinangolo ŵangu ŵanonyelaga mnope ya dini mwamti ndaŵi syosope panyuma pa chakulya cha ligulo, liŵasa lyetu lyaŵalangaga yimpepe Baibulo. Kaneko mu 1959, liŵasa lyetu lyasamile ku Brazil ni kwawula ku United States. Kweleku twatamaga m’tawuni ja Massachusett.

Baba ŵangu ŵalimbichilaga kukamula masengo kuti akombole kusamalila liŵasa lyetu lyalyakwete ŵandu 8. Babaŵa ŵakamulaga masengo gakulekanganalekangana mpela kupita mchisumisya yindu, kulinganya misewu soni ŵakamulaga pa kampani jakulola ya maulendo ga pa ndege. Paŵatandite kukamula masengo ku kampaniji, wosope twasangalalaga ligongo twakolaga upile wakwawula kulikose.

Pandaŵi jinaliji pasukulu naliwusyaga kuti, ‘Ana pachinjikulapo chinjikamulaga masengo gamtuli?’ Achimjangu ŵane ŵasagwile kwawula ku Yunifesite pele ŵane ŵasagwile kwinjila usilikali. Nambo une nganisakaga kwinjila usilikali ligongo yakangana soni kumenyana yasakalisyaga mnope. Myoyo nasagwile kwawula ku Yunifesite kuti ngajinjila usilikali. Nambope chanasakaga mnope chaliji kwakamuchisya ŵandu ligongo naganisyaga kuti yeleyi mpaka yingamuchisye kukola umi wakusangalala.

Panaliji ku Yunifesite nasangalalaga ni majiganyo gane gakwe (anthropology) gagasalaga yakwamba ŵandu ligongo nasakaga kumanyilila kuwatyochele umi. Twalijiganyaga kuti yaumi yatesile kuchenga kutyochela ku yindu yine soni matichala gasakaga kuti tuyikulupilileje yeleyi. Nambope yanalijiganyagayi nayikayichilaga ligongo yasakaga kuti nayikulupilileje pali pangali maumboni gakwe.

M’kalasi janaliji nganatuliganyaga yindu yakutukamuchisya kulekanganya yambone ni yakusakala. Mmalo mwakwe ŵagombelechesyaga yampaka tutende kuti tukombole chenene majiganyo ga ku Yunifesitego. Nasangalalaga kwawula ku yisangalalo ni achimjangu soni kukamulichisya masengo mtela wakusokonasya mtwe. Nambope chisangalalo chelechi chaliji cha kandaŵi kamnono. Mwamti naliwusyaga kuti, ‘Ana yeleyi yikundendekasya kuŵa jwakusangalala yisyesyene?’

Kaneko nasamile ku msinda wa Boston kwele kunapitilisye majiganyo ga ku Yunifesite. Kuti mbate mbiya syakulipila ku Yunifesite nakamulaga masengo pandili ku holide. Kumasengoku ni kunasimene kandanda ni jwa Mboni sya Yehofa. Jwamboniju jwasalile yakulochesya yakwamba “yaka msano ni yiŵili” yayikusimanikwa m’buku ja Daniele chaputala 4 soni jwasalile kuti tukutama m’masiku gakumalisya. (Dan. 4:13-17) Kaneko nayikopochele kuti naga ngupitilisya kukambilana ni munduju ngani syelesi, chiyindendekasye kuchenga umi wangu. Myoyo ndaŵi syosope namsyembaga jwamboniju.

Panaliji ku Yunifesite kula, nalijiganyisye yindu yayangamuchisye kuti ngakamule masengo gakwamba kulipeleka gakwakamuchisya ŵandu ku South America. Naganisyaga kuti kukamula masengo gakwakamuchisya ŵandu ŵakusosechela chikamuchisyo mpaka kundendekasye kuŵa jwakusangalala. Kaneko namanyilile kuti yeleyi ngayingamuchisyape kukola umi wakusangalala. Yeleyi yandengwisye mnope mwamti kumbesi kwa chakacho, natyosile nikuleka majiganyo ga ku Yunifesite gala.

Mu Meyi 1970, nasamile ku Netherlands mumsinda wa Amsterdam kuti ngakamuleje masengo kukampani jakulola ya maulendo ga pa ndege mpela muŵatendelaga baba. Ligongo lya masengoga nakombwele kwenda m’yilambo yakulekanganalekangana mpela Africa, America, Europe soni ku Asia. Yeleyi yandendekasisye kumanyilila mwachitema kuti chilambo chilichose chikwete yakusawusya yakwe soni kuti pangali ŵampaka akombole kumalana nayo. Nambope nasakaga kukwanilisya chakulinga changu chakwakamuchisya ŵandu. Myoyo naganichisyesoni yakuwujila ku United States kuti ngatandile majiganyo gangu ga ku Yunifesite.

Ndili mbujile ku Yenifesiteku, nayiweni kuti majiganyoga ngagangamuchisya kupata kwanga kwa yiwusyo yanakwete yakwamba umi. Ligongo lyakuti pandaŵiji nganimanyililaga yampaka ndende, namŵendile mtichala jwine kuti angamuchisye. Nasimonjile mnope mtichalaju paŵambusisye kuti, “Ligongo chichi mgamba kupitilisyape majiganyo? Wuli ngagamba kuleka majiganyo ga ku Yunifesitega? Yiwusyo yeleyi yangamwile mtima mwamti nalesile majiganyogo.

Ligongo lyakuti paumi wangu nalipikanaga kuti ngangusangalala, najinjile mgulu jine jajakanaga kutenda ya miyambo soni jawonekaga kuti jikulimbikasya mtendele ni chinonyelo. Une ni achimjangu ŵane twapite ku United States soni mpaka twapite kwika ku Mexico, mumsinda wa Acapulco. Natamaga ni ŵandu ŵanganasamalaga ya umi soni ŵawonekaga kuti nganakola chakusawusya chilichose nambosoni nganadandawulaga. Nambo panatandite kutama ni jemanjaji ni panayikopochele kuti yakutenda soni umi wawo ngaŵa  mkukamuchisya mundu kuŵa jwakusangalala yisyesyene. Mmalo mwakwe nayiweni kuti ŵajinji mwa jemanjaji nganatendaga yindu mwakuwona mtima soni ŵaliji ŵangakulupichika.

Pandaŵiji natandite kuganichisya yindu yanasakaga kutenda panaliji mwanache. Pandaŵijo nasakaga kuti pachinjikula chinjendesyeje maboti. Nganisakaga kwamba kuŵa jwakwendesya mabotipe nambo nasakaga kuŵa jwamkulungwa jwa ŵakwendesya maboti. Kuti yikomboleche yeleyi nasosekwaga kukola liboti lyangu. Pakuŵa mjangu jwine lina lyakwe Tom jwakwete nganisyo mpela syangu, twasagwile kuti tujendeleje yimpepe pa maulendo getu ga panyasa gakwendajenda chilambo chosope. Pa maulendoga chakulinga chetu chaliji kupata chilumba chakusalala mnope kwele kwampaka tutame mwagopoka soni mwakusangalala.

Une ni Tom twajesile mpaka ku Arenys de Mar chiŵandika ni Barcelona, ku Spain. Tuli tuyiche kweleko twasumile liboti lya mtundu winewakwe (Llygra) lyekulungwa mamita 9.4. Kaneko twatandite kulilinganya libotili kuti tujendeje panyasa mwangali woga. Pakuŵa nganituŵa pachitema kuti tukayiche ulendo wetu, twatyosisye yinjeni ni kujikamulichisya masengo pakusunjila mesi gakumwa. Pakusaka kuti tujendeje panandipanandi twasumile yakupalasila liboti yiŵili yelewu mamita 5. Pambesi pakwe twawutandite ulendo wakwawula ku yilumba ya Seychelles, ku Indian Ocean. Chakulinga chetu chaliji chakuti tukayiche mbali jine ja South Africa. Kuti tukayiche kweleku twakamulichisyaga masengo mapu, ndondwa, mabuku soni yipangiso yine kuti tukasokonechela. Nambope nganimanyililaga yampaka tutende kuti tukayiche pamalo gasyesyene gatwasakaga.

Kaneko mwachitema twayikopochele kuti liboti lyetu nganiliŵa lijesile chenene panyasa. Yaliji myoyo ligongo liboti lyetu lyapoweche, mwamti pa awala jilijose mwibotimu mwajinjilaga mesi gakwana malita 22. Mpela musalile kundanda kula, pandaŵiji kwatendaga chimbungo chamachili mnope mwamti woga wangamwile. Myoyo napopesile kandanda pali papitile yaka yejinji mkanimbopele. Namsalile Mlungu kuti naga tukukulupuka chindende yakuti nammanyilile jwalakwe. Kaneko chimbungo chamachili chila chalesile, nambo une nganindiŵalila yinamsalile Mlungu yila.

Patwapitilisyaga ulendowu natandite kuŵalanga Baibulo. Kusala yisyene yaliji yakusangalasya kutama mwiboti lyangu pasikati pa nyasa ja Mediterranean ni kulolaga somba sya mitundu jakulekanganalekangana soni kwinani kwesalale. Chilo natendaga chidwi ni mwawuŵelele uchinga usiku soni yeleyi yasimichisyaga kuti Mlungu apali nambosoni akusatenda chidwi ni ŵandu.

Pali pamasile mawiki tuli mkwenda panyasa, twayiche pa chiko cha Alicante, ku Spain. Kweleku ni kwatwasumisye liboti lyetu kuti tusume lyambone. Kusala yisyene yaliji yakusawusya kupata mundu jwampaka asume liboti lyetu lyakalakalali ligongo lyaliji lyepowoche soni lyangali yinjeni. Nambope yeleyi yambele upile wakupata ndaŵi jakuŵalanga Baibulo jangu.

Panatandite kuŵalanga mnope Baibulo ni panamanyilile kuti jili buku jakamuchisya kuŵa ni umi ŵakusangalala. Nasangalele kumanyilila kuti Baibulo jasalaga mwakupikanika yakwamba ndamo syambone soni naliwusyaga kuti ligongo chichi ŵandu ŵajinji kupwatikapo uneji ŵatukusalikolanga kuti tuli Aklistu ngatukusakuya yeleyi?

Nalinganyisye ya kuchenga ndamo soni nalesile kukamulichisya masengo mtela wakusokonasya mtwe. Kaneko natandite kuganisya kuti pana ŵandu ŵane ŵakusatenda yindu pakuya mfundo sya m’Baibulo soni nalinganyisye yakuti simane ni jemanjajo. Mwamti napopesile kaŵili paumi ŵangu kumŵenda Mlungu kuti angamuchisye kusimana ni ŵandu ŵeleŵa.

Kwa une nayiwonaga kuŵa yakamuchisya kwawula mu dini jilijose ni chakulinga chakuti mbate dini jisyesyene. Panajendaga m’misewu jakwawula kwa Alicante nagaweni machalichi gejinji, nambope m’machalichimu ŵajambwile mafano. Yeleyi yandendekasisye kumanyilila mwachitema kuti gali machalichi ga unami.

Lyamlungu line musi, napite kukwendajenda mu litumbi line kwineku ndili mkulola malo gakwimika maboti. Kaneko naŵalasile lilemba lya Yakobo 2:1-5 lyalikusatukalamusya kogoya kwa kwanonyela ŵandu ligongo lyakuti ali ŵakusichila. Panawujilaga kwalyaliji liboti lyetu napitile pa chimjumba chine chachawonekaga kuti ŵadini akusatendelamo misongano jawo. Penani pa mlango wakwinjilila mchijumbachi paliji chikwangwani chelembe kuti, “Nyumba ja Uchimwene ja Mboni sya Yehofa.”

Kaneko mumtimamu natite odi nalinje ŵandu ŵeleŵa kuti ndole yachajile pakumbochela. Myoyo najinjile m’Nyumba ja Uchimwenejo ndili jwangawala sapato, ndili ngwete ndewu syelewu soni nawete talawusa jepapuche. Jwakupochela achalendo jwambechesye kuti ngatame chiŵandika ni jwamkongwe jwine jwachikulile. Jwamkongwejo jwangamuchisyaga kupata malemba gaŵakolangaga jwakuŵecheta ngani. Pajamasile misongano nasimonjile ni chinonyelo chaŵalosisye ŵandu wosope ŵaŵayiche kukungomasya. Jwamlume jwine ŵambilasile kumangwakwe kuti tukakambilane yine ni yine. Nambope ligongo lyakuti pandaŵiji naliji nganimalisye kuŵalanga Baibulo, namsalile kuti, “Pachinjikosekapo chinjasimana.” Mkanipapite ndaŵi natandite kusimanikwa pa misongano josope.

Pali pamasile mawiki gakuŵalanjika namjawulile jwamlume jula. Kaneko jwalakwe jwajanjile yiwusyo yosope yanakwete. Pali pamasile wiki jimo ŵambele chikwama chegumbale ni yakuwala yambone mnope. Jwalakwe jwasalile kuti msyene yakuwalayo ŵataŵidwe ligongo lyakuti akusapikanila lilamusi lya m’Baibulo lyakunonyelana jwine ni mjakwe soni ngajinjilila ngondo. (Yes. 2:4; Yoh. 13:34, 35) Pelepa nasimichisye kuti napatile ŵandu ŵanasakaga, ŵakusakamulichisya masengo mfundo sya m’Baibulo pangani syakola ndamo syambone. Sambano chakulinga changu nganichiŵasoni kusosasosa chilumba chakusalala nambo chaliji kulijiganya Baibulo kuti najipikanichisye chenene. Myoyo nawujilesoni ku Netherlands.

Najesile kwa masiku mcheche kuti ngayiche ku Netherlands mumsinda wa Groningen. Kweleku nasosagasosaga masengo kuti mbateje yindu yakungamuchisya paumi wangu. Ndili mbite mu shopu jine ja ŵakupala matabwa kukuwuchisya masengo, msyene shopujo ŵambele fomu. Chimo mwa yiwusyo yayaliji mufomujo ŵasakaga kuti sale ya dini jangu ni nalembile kuti ndili “Jwamboni sya Yehofa.” Msyene shopujo pajwaŵalasile yanalembileyo nayiweni kuti ngope jakwe jachenjile.  Jwalakwe jwatite, “Jawulagani chinjimŵilangape” nambo nganambilanga.

Napitesoni mu shopu jine ja ŵakupala matabwa ni namwusisye msyene shopujo naga akumsaka jwamasengo. Jwalakwe jwambusisye naga ngwete yikalata ya masengo nambo namsalile kuti nakamwile masengo gakulinganya liboti lyejonasiche. Nasimonjile mnope msyeneju alimkusalila kuti, “mpaka myiche musiwu kuti mtande kukamula masengo. Nambo chinampe lilamusi limo, ngangusaka kuti yitendo yenu yisokonasye yindu pashopupa ligongo une ndili jumo jwa Mboni sya Yehofa soni ngusakuya yajikusajiganya Baibulo.” Namlolite mwakusimonga ni namjanjile kuti, “Unesoni ndili jwa Mboni sya Yehofa.” Ligongo lyakuti nakwete wumbo ni ndewu syelewu, jwalakwe jwasalile kuti, “Chinamjiganyeje Baibulo.” Yeleyi yasangalesye mnope soni yangamuchisye kupikanichisya ligongo lyakwe msyene shopu jwandanda jula nganambilangasoni. Kusimana ni m’baleju yalosisye kuti Yehofa akwanga mapopelo gangu. (Sal. 37:4) Nakamwile masengo ni m’baleju kwa chaka chamtundu. Pandaŵiji m’baleju jwanjiganyaga Baibulo, kaneko nabatisidwe mu Januwale 1974.

Pali papitile mwesi natandite upayiniya. Yeleyi yangamuchisye kuŵa jwakusangalala mnope. Mwesi wakuyichisya nasamile ku Amsterdam kuti ngakamuchisyeje m’kagulu kakuŵecheta Chisipanichi. Kusala yisyene nasangalele kutendesya majiganyo muyiŵecheto ya Chisipanichi soni Chipwitikisi. Mu Meyi 1975, natandite kutumichila mpela mpayiniya jwapadela.

Lisiku line Mlongo Ineke juŵatendaga upayiniya wapadela, jwayiche ku misongano jetu ja Chisipanichi. Jwalakwe jwayiche kumpingo wetu, kukummanyikasya jwakulijiganya Baibulo jwakwe jwa ku Bolivia. Kaneko une ni Mlongo Ineke twasakaga kumanyigana mwamti twatandite kulembelana yikalata. Yeleyi yatukamuchisye kumanyilila kuti tukwete yakulinga yakulandana. Kaneko mu 1976 twalombene, soni twapitilisye kutumichila yimpepe mpela apayiniya ŵapadela mpaka mu 1982 paŵatuŵilasile kuti tukajinjile kalasi nambala 73, ja sukulu ja Giliyadi. Yaliji yakusangalasya mnope paŵatusalile kuti tujawule ku Africa mumsinda wa Mombasa, mchilambo cha Kenya. Mu 1987, ŵatusalile kuti tujawule ku Tanzania. Kweleku pandaŵiji abale ŵaliji ali atandite kulalichila mwagopoka. Twatumichile kwa yaka 26, mkanituwujile ku Kenya.

Kwakamuchisya ŵandu ŵakulinandiya kumanyilila usyesyene wa m’Baibulo kwatukamuchisye kuŵa ŵakusangalala mnope. Mwachisyasyo, mundu junatandite kulijiganya najo Baibulo ku Mombasa, jwaliji jwamlume jwine junasimene najo panalalichilaga pamalo gakusimanikwa ŵandu ŵajinji. Munduju panampele magasini gaŵili, jwambusisye kuti ana pachingamalisye kuŵalangapo ndende chichi? Kaneko wiki jakuyichisya natandisye lijiganyo lya Baibulo pakamulichisya masengo buku jakuti, “Mungathe Kukhala ndi Moyo Wosatha Mpaladaiso Padziko Lapansi.” Bukuji jaliji jili jigambile kopoka kwene muchiŵecheto cha Chiswahili. Munduju jwabatisidwe pali pamasile chaka. Kaneko jwatandite upayiniya wakutamilichika soni kutandila ndaŵi jelejo, munduju ni ŵamkwakwe ŵakamuchisye ŵandu chiŵandika 100, kulipeleka kwa Yehofa soni kubatisidwa.

Panatandite kupikanichisya chakulinga cha umi, nalipikene mpela jwamalonda jwakwendajenda juŵapatile chindu cha mtengo wapenani soni jwatesile yakomboleka kuti chinducho chiŵe chakwe. (Mat. 13:45, 46) Nasakaga kukamulichisya masengo umi wangu pakwakamuchisya ŵandu kupata umi usyesyene. Une ni ŵamkwangu tuyiweni yakusati Yehofa pakwapa upile ŵandu ŵakwe pakwapa umi wambone mnope.