Guleʼ lu iza 1948 ndaaniʼ guidxi Países Bajos. Ti iza despué yendezaniaʼ familia stinneʼ São Paulo (Brasil). Nabé guyé bixhozeʼ ne jñaaʼ yuʼduʼ ne guiráʼ gueelaʼ despué de guidóʼxhidu ridúʼndadu Biblia guiradu. Lu iza 1959 bidxaʼdu de guidxi yendézadu Estados Unidos, estado stiʼ Massachusetts.

Nácadu ti familia de xhono ne guizáʼ biʼniʼ bixhozeʼ dxiiñaʼ para cadi guiaadxaʼ laadu gastiʼ. Bíʼnibe gadxé gadxé dxiiñaʼ, bitoobe lu calle bíʼnibe dxiiñaʼ ra cayaca carretera ne bíʼnibe dxiiñaʼ né ti compañía de avión internacional. Biecheʼ familia stinneʼ dxi bíʼnibe últimu dxiiñaʼ ni bizeeteʼ riʼ purtiʼ biʼniʼ viajardu stale.

Dxi maʼ joven naa, siempre guníʼ iqueʼ xi guneʼ ora maʼ huaniiseʼ. Caadxi de ca xhamiguaʼ gulicaʼ checaʼ universidad ne xcaadxi gulí chuʼ lade ejércitu. Peru naa qué lica niníʼ iqueʼ ñuaaʼ lade ejércitu purtiʼ qué riuuladxeʼ tindeʼ. Ngue runi guliéʼ chaaʼ universidad ti cadi guneʼ serviciu militar. Peru racalaʼdxeʼ gacaniaʼ binni purtiʼ guníʼ iqueʼ pa guneʼ ni zabaneʼ nayecheʼ.

Dxi guyaaʼ universidad guyuuladxeʼ materia de Antropología, purtiʼ riuuladxeʼ gannaʼ ximodo bizulú guendanabani. Rusiidiʼ ca maestru que evolución ne racaláʼdxicaʼ guni credu ni. Caadxi de ca cosa ni rusiidicabe que rihuínnica cadi dxandíʼ ca ni. Ne caquiiñeʼ guni creluʼ ca ni neca qué gapa ca ni prueba. Peru cadi zacá nga rusiidiʼ ca científicu.

Lu ca clase que, qué rusiidicabe laadu gúnidu ni jneza, sínuque rusiidicabe laadu gúnidu intiica cosa para cheni laadu galán ra universidad que. Riniáʼ ca xhamiguaʼ saa ne rigúbadu droga, riguu ngue naa nayecheʼ peru ti ratu si. Peru guníʼ iqueʼ pa zaqué nga ribani binni nayecheʼ.

Tiempu que yendezaniaʼ familia stinneʼ ndaaniʼ guidxi Boston, raqué bicaaʼ laʼyaʼ para chaaʼ universidad. Bineʼ dxiiñaʼ dxi napaʼ vacación para ganda quixeʼ scuela stinneʼ ne raqué nga binebiaʼyaʼ ti testigu stiʼ Jehová. Bineniaʼ laabe dxiiñaʼ ne bisiénebe naa profecía stiʼ gadxe tiempu ni zeeda lu capítulo 4 stiʼ Daniel ne gúdxibe naa maʼ nabáninu lu ca últimu dxi (Dan. 4:13-17). Bieneʼ pa guinieniaruaʼ laabe de Biblia ne gucaadiaʼgaʼ laabe napa xidé guchaaʼ modo nabaneʼ. Ngue runi bixooñeluaʼ de laabe.

Ra universidad que guliéʼ clase ni gusiidiʼ naa para gacaniaʼ binni ni nabeza América del Sur. Guníʼ iqueʼ zabaneʼ nayecheʼ pa chigacaniáʼ binni ni caquiiñeʼ tu gacané laa. Peru jmaruʼ si guníʼ iqueʼ ximodo guneʼ ni, cumu qué nidxelaʼ xi guneʼ la? bisaanaʼ universidad que.

Lu beeu mayo iza 1970 yendezaʼ Ámsterdam (Países Bajos) para guneʼ dxiiñaʼ né ti compañía aérea internacional, ra biʼniʼ bixhozeʼ dxiiñaʼ. Pur dxiiñaʼ que nabé bineʼ viajar stale ne binebiaʼyaʼ stale guidxi stiʼ África, América del Norte ne América Sur, Asia ne Europa. Peru biiyaʼ guiráʼ guidxi que napa ca ni guendanagana ne guirutiʼ ganda guni chaahuiʼ ca ni. Neca zaqué racaladxeruáʼ gacaniaʼ binni. Ngue runi biguetaʼ Estados Unidos para guneʼ estudiar ndaaniʼ universidad ni nuu Boston.

Peru dxi biguetaʼ ndaaniʼ universidad que bidieeʼ cuenta cadi cadxelaʼ respuesta stiʼ ca pregunta ni cuyubeʼ gannaʼ. Cumu qué guidxelaʼ xi guneʼ la? gunabaʼ maestru de Antropología que gacané naa. Guizáʼ bidxagayaaʼ ora gúdxibe naa: «¿Xi cayúniluʼ raríʼ yaʼ? Bisaana scuela riʼ». Ngue si nga ni cabezaʼ gábibe naa. Ngue runi, ziaaʼ de ra universidad que ne maʼ qué nibiguetaruaʼ.

Bineʼ sentir qué ganda guibaneʼ nayecheʼ, ngue runi guyuaaʼ lade caadxi binni ni rábicabe hippie, laacaʼ ruyúbicaʼ chuʼ paz ne gannaxhii binni. Naa ne xcaadxi xhamiguaʼ gunábadu ray para bireʼdu de Estados Unidos dede yendadu Acapulco (México). Gulézanedu xcaadxi grupu de hippie ni ruluíʼ gastiʼ naguu xizaa laacaʼ. Peru nagueenda bidieeʼ cuenta cadi dxandíʼ nabánicabe nayecheʼ. Ne bidieeʼ cuenta ribáʼnacaʼ ne qué zanda gapuʼ confianza laacaʼ.

Bizuluáʼ bineʼ ti cosa ni maca napaʼ gana guneʼ dede dxi nahuiineʼ, chaaʼ lu nisadóʼ peru cadi casi ti marineru, sínuque casi ti capitán. Ne para ganda guneʼ ni la? caquiiñeʼ gapaʼ ti barcu. Cumu laca ngueca racalaʼdxiʼ ti xhamiguaʼ láʼ Tom guni la? ngue runi biʼniʼ viajardu guirópadu lu nisadóʼ. Gucalaʼdxeʼ nidxelaʼ ti isla sicarú ni nuu zitu de guidxi ra guirutiʼ tu runi mandar.

Naa ne Tom guyuudu ti lugar ni láʼ Arenys de Mar, gaxha de Barcelona (España), ne raqué guzidu ti barcu ni ziuulaʼ biaʼ gaʼ metru ni láʼ Llygra. Biʼniʼ chaahuidu ni para ganda chinedu ni lu nisadóʼ. Cumu cadi nuudu guiuba chuudu la? ngue runi guleedu motor stini ti ganda chinedu jma nisa para guideʼdu. Laaca guzidu chupa remu de gaayuʼ metru para ganda guniibidu barcu que ora chindadu ra puertu ni nahuiiniʼ. Bedandá dxi bireʼdu ne ziuudu ziyúbidu ti lugar ra nuu stale isla ni runibiáʼcabe casi Seychelles, ni nuu lu océano Índico. Gudixhe íquedu chuudu ruaa costa occidental stiʼ África ne gudiʼdu vuelta cabo de Buena Esperanza (Sudáfrica). Para gánnadu pa biaʼsi neza ra ziuudu, biduyadxidu ca estrella, mapa ne xcaadxi aparatu ni zinedu. Guizáʼ guyuuladxeʼ guni calculardu pa biaʼsi neza ra ziuudu.

Bidiʼdu cuenta qué zuni huantar diʼ barcuhuiiniʼ ni zinedu que lu nisadóʼ. Biaʼ 22 litru nisa guyuu ndaaniʼ ni pur hora. Casi bizeeteʼ ra bizulunu que guizáʼ bidxibeʼ ora bidxaagaludu ti tormenta ne despué de stale iza bineʼ orar Dios primé biaje. Gudxeʼ Dios pa guiladu la? zuneʼ stipa guneʼ biaʼyaʼ laa. Gulezadxí tormenta que ne bineʼ cumplir ni bidieeʼ stiidxaʼ.

Bizuluáʼ biindaʼ Biblia ndaaniʼ barcu que. Bixuiʼlú pabiáʼ galán zúbaluʼ ndaaniʼ barcu stiluʼ lu nisadóʼ Mediterráneo, cayuuyaluʼ cayuubí ca benda que, ca delfín ne cayuuyaluʼ qué gapa nisadóʼ ca ra guiluxe. Huaxhinni, riuuladxeʼ guuyaʼ Vía Láctea ne ngue rucaa ni naa guneʼ cré dxandíʼ nuu ti Dios ni rizaalaʼdxiʼ binni.

Biaʼ chupa chonna semana despué, yendadu puertu de Alicante (España), ne raqué gudixhe íquedu gutoʼdo barcu que para sidu stobi jma galán. Nagana guca para laadu guidxéladu tu siʼ ti barcu ni maʼ nayooxhoʼ, ni qué gapa motor ne ni ridaa nisa ndaaniʼ. Peru ni jma galán nga jma rapa tiempu para guundaʼ Biblia.

Ra jma biindaʼ Biblia, bidieeʼ cuenta nácani casi ti manual ra cá xi naquiiñeʼ gúninu para guibáninu nayecheʼ. Bidxagayaaʼ ora biindaʼ xii nga ca cosa ná Biblia naquiiñeʼ gúninu para gápanu ti guendanabani nayá nezalú Dios. Ne guníʼ ique xiñee stale binni ni ná naca xpinni Cristu, dede né naa, qué rinándadu ca ni.

Bineʼ stipa guchaaʼ modo nabaneʼ, ngue runi bisaanaʼ de cubaʼ droga. Guníʼ iqueʼ nuu binni ni nabani modo rusiidiʼ Biblia, ne gucalaʼdxeʼ guidxelaʼ laacaʼ. Ngue runi bineʼ orar Dios guiropa biaje para gacané naa guidxelaʼ laacabe.

Para guidxelaʼ religión ni dxandíʼ, biiyaʼ ximodo nga cada tobi dede ra bidxelaʼ religión ni dxandíʼ. Ndaaniʼ guidxi Alicante, biiyaʼ stale  edificiu stiʼ ca religión, peru cumu biiyaʼ nuu bidóʼ ndaaniʼ ca ni la? ngue runi bidieeʼ cuenta cadi laaca ni nga religión ni dxandíʼ.

Ti domingu huadxí, dxibaʼ cueʼ ti dani dede raqué rihuinni puertu que, cayuundaʼ Santiago 2:1-5, ne raqué ná cadi jneza nga gusisácanu binni ne gúninu menu xcaadxi. Ora biguetaʼ ra nuu barcu que gudideʼ ti lugar ra nuu caadxi binni ni ruluíʼ ti religión laacaʼ ra puertaʼ stini ná: «Yoo stiʼ Reinu stiʼ ca testigu stiʼ Jehová».

Ngue runi guníʼ iqueʼ: «Chiguuyaʼ ximodo guidxaagalú ca binni riʼ naa». Guyuaaʼ ndaaniʼ Yoo stiʼ Reinu que xieeñeeʼ, naraxi guicharuaaʼ ne nacuaʼ ti pantalón ni nareza. Bidxagalú ti acomodador naa ne gudxi naa cueʼ cueʼ ti señora ni maʼ huaniisi. Guca señora que nachaʼhuiʼ né naa ne gucané naa guidxelaʼ ca textu ni caníʼ ni cudii discursu que. Ti cosa ni guizáʼ bidxagayaaʼ nga biluxe si reunión que guiráʼ ca binni que beeda gudiinacaʼ naa. Biʼniʼ invitar ti hombre naa ra lidxi para guinidu de lu Biblia. Peru cumu caʼruʼ guundaʼ guidubi ni la? gudxeʼ laa: «Maʼ naa gabeʼ lii ora maʼ nuaaʼ listu». Ne dede dxí que, bizuluáʼ guyaaʼ ca reunión.

Gudiʼdiʼ si chupa chonna semana guyaaʼ ra lidxi hombre que ne bicábibe naa guiráʼ pregunta ni napaʼ de lu Biblia. Ti semana despué, bidiibe naa ti bolsa ra dxaʼ lari galán. Gúdxibe naa sti ti hombre ni nuu ndaaniʼ cárcel ca lari que, ne deguyoo hombre que purtiʼ zinanda mandatu ni zeeda lu Biblia ra ná naquiiñeʼ gannaxhiisaa binni ne cadi tíndecaʼ (Is. 2:4; Juan 13:34, 35). Bidxelaʼ ni cuyubeʼ que, binni ni nabani modo rusiidiʼ Biblia. Yanna jma gucuá iqueʼ guneʼ estudiar chaahueʼ Biblia lugar de guyubeʼ isla sicarú que. Ngue runi gudixhe iqueʼ guibiguetaʼ Paises Bajos.

Gunabaʼ ray binni dede yendayaʼ guidxi Groninga (Países Bajos). Biyubeʼ dxiiñaʼ ndaaniʼ ti carpintería para ganda gapaʼ ni iquiiñeʼ. Peru bidiicabe naa ti guiʼchiʼ ra cá caadxi pregunta, ne tobi de laacani ná xi religión stinneʼ. Bicaaʼ testigu stiʼ Jehová naa. Ora biʼndaʼ dueñu que ni, biiyaʼ maʼ gadxé modo biyadxibe naa ne gúdxibe naa: «Maʼ naa guinieniáʼ lii». Peru qué ñúnibe ni.

Guyaaʼ ndaaniʼ sti carpintería ne gunabadiidxaʼ dueñu que pa zanda guneʼ dxiiñaʼ raqué. Gunabadiidxabe naa pa napaʼ  certificadu stiʼ scuela o guiʼchiʼ ra bineʼ dxiiñaʼ ante. Gudxeʼ laabe bineʼ chaahueʼ ti barcu de yaga. Guizáʼ bidxagayaaʼ ora gúdxibe naa: «Zanda guzululuʼ yannadxí. Peru chitidxeʼ lii ti cosa, qué racalaʼdxeʼ tindeluʼ ndaaniʼ taller riʼ purtiʼ testigu stiʼ Jehová naa ne rinandaʼ ni ná Biblia». Dede né gana gudxeʼ laabe: «¡Naa laaca Testigu naa!». Peru ora bíʼyabe naraxi guicha iqueʼ ne guicha ruaaʼ gúdxibe naa: «Chigudieeʼ lii estudiu de lu Biblia». Gudxeʼ laabe zaa gudiibe estudiu naa. Bieneʼ xiñee qué nudiicabe naa dxiiñaʼ ndaaniʼ sti carpintería que Jehová ngue cudii naa guiráʼ ni canabaʼ ladxiduáʼ (Sal. 37:4). Bineʼ dxiiñaʼ ndaaniʼ carpintería stiʼ hermanu que ti iza, ne bidiibe estudiu naa biaʼ tiempu ca ne lu beeu enero iza 1974 guyuaanisaʼ.

Ti beeu despué, bineʼ sti cosa ni guluu naa nayecheʼ, gucaʼ precursor. Gudiʼdiʼ si sti beeu, yendezaʼ Ámsterdam para gacaniáʼ ti grupu ni riníʼ diidxastiá ni deruʼ bizulú. Guizáʼ guyuaaʼ nayecheʼ ora bidieeʼ estudiu binni ni riníʼ diidxastiá ne portugués. Ne lu beeu mayo iza 1975 gucuaaʼ ti privilegiu nabé sicarú, gucaʼ nombrar precursor especial.

Ti dxi, guyé ti precursora especial ni láʼ Catharina reunión stidu, yenebe ti gunaa de Bolivia ni cudiibe estudiu para gunibiaʼdu laa. Naa né Catharina biseendasaadu carta para gunibiaʼdu jma, ne bidiʼdu cuenta ngueca meta nápadu. Bichaganadu lu iza 1976, ne gúcadu precursor especial dede lu iza 1982 purtiʼ biʼniʼ invitárcabe laadu chuudu clase 73 de Galaad. Guizáʼ bidxagayaadu ora biʼniʼ asignárcabe laadu chuudu África Oriental. Ne gaayuʼ iza biʼniʼ servirdu ndaaniʼ guidxi Mombasa (Kenia). Lu iza 1987, biseendacabe laadu Tanzania, tiempu que maʼ rudiicabe lugar gaca xhiiñaʼ Dios lugar que. Guyuʼdu raqué 26 iza, ne despué biguétadu guidxi Kenia.

Naa ne xheelaʼ guizáʼ riuuláʼdxidu gacanedu binni humilde gunibiaʼcaʼ ni dxandíʼ rusiidiʼ Biblia ne nga rusiecheʼ ni laadu. Primé binni bidieeʼ estudiu dxi nuaaʼ Mombasa nga ti hombre ni bidxelaʼ dxi canayuneʼ predicar. Bidieeʼ laabe chupa revista ne gúdxibe naa: «¿Xi guneʼ ora maʼ guiluxeʼ guundaʼ ca ni yaʼ?». Sti semana que bizuluáʼ bidieeʼ laabe estudiu né libru Usted puede vivir para siempre en el paraíso en la Tierra, ni deruʼ biree lu diidxaʼ suajili. Ti iza despué guyuunísabe ne gúcabe precursor regular. Ne dede dxí que, laabe ne xheelabe maʼ gucanécabe biaʼ ti gayuaa binni gaca dedicar Jehová ne chúʼnisa.

Ora bieneʼ xi riguu naa nayecheʼ bineʼ sentir casi biʼniʼ sentir comerciante ni bidxela ti perla nabé risaca ne nagueendaca guzíʼ ni (Mat. 13:45, 46). Racaladxeruáʼ gacaniáʼ binni guibánicaʼ nayecheʼ. Naa ne xheelaʼ maʼ bidúʼyadu ximodo riguu Jehová ndaayaʼ ca xpinni purtiʼ racanebe laacaʼ guibánicaʼ nayecheʼ.