1. Иегова бисти неге кӱӱнзедет?

 ИЕГОВА чындык сӱӱшти * сӱреен јараш кылык-јаҥ деп кӧрӧт (Ос. 6:6). Ол бойыныҥ ишчилерин де андый ла кылык-јаҥду болзын деп кӱӱнзейт. Иегова судурчы Михей ажыра бисти чындык сӱӱшти сӱӱгер деп кӱӱнзедет (Мих. 6:8, сноска). Оныҥ учун чындык сӱӱш ол не андый деп, биске билип алар керек.

2. Чындык сӱӱш ол не?

² Агару Бичиктиҥ «Јаҥы телекей» деп кӧчӱрмезинде, орус тилде «чындык сӱӱш» эмезе «акту јӱрегинеҥ сӱӱри» деген сӧстӧр ӱлгерлерде ле сноскаларда 230 кире катап туштап јат. Чындык сӱӱш — кижини акту кӱӱнинеҥ, бастыра јӱрегиле сӱӱп, ого ӱренижип калганы. Анайда ок оны качан да таштаар кӱӱни јок болгоны. Чындык сӱӱшти озо ло баштап Кудай кӧргӱзет, је бу сӱӱш улустыҥ да ортозында болор аргалу. Мындый сӱӱшти бис эҥ ле тыҥ Иегованаҥ кӧрӱп јадыс. Бу јӧрмӧлдӧ Иегова чындык сӱӱжин кемдерге кӧргӱзип турганын шӱӱжип ийерис. А келер јӧрмӧлдӧ бистер, Иегованыҥ Керечилери, Кудайыстаҥ тем алып, бой-бойыбысты чындык сӱӱшле канайып сӱӱр аргалу деп кӧрӧрис.

3. Иегова Моисейге бойы керегинде нени айткан?

³ Иегова Израиль албатыны Египеттеҥ чыгарган кийнинеҥ Моисейге бойыныҥ ады ла кылык-јаҥы керегинде сӱреен керектӱ неме ачкан. Ол айткан: «Иегова, Иегова, килеҥкей ле буурзак Кудай. Ол чугулданарга меҥдебей јат, чындык сӱӱшле, чындыкла толо. Ол муҥдар улуска чындык  сӱӱжин кӧргӱзет. Бӱдӱрилип, јасакты бузып ийгенниҥ кинчегин таштап салат» (Чыг. 34:6, 7). Иеговада мындый кылык-јаҥдар бар деп билерге кандый јакшы! Је анайда ок Иегова Моисейге оныҥ чындык сӱӱжи неле аҥыланып турганын айдып берген. Неле аҥыланып турганын кӧрӱп ийектер.

4, 5. а) Иегова чындык сӱӱжи керегинде тереҥжиде нени ачкан? б) Бис кандый сурактар шӱӱжерис?

⁴ Иеговада чындык сӱӱш јӱк ле бар эмес — ол чындык сӱӱшле толо. Агару Бичиктиҥ «Јаҥы телекей» деп кӧчӱрмезинде, Иегованыҥ мындый сӱӱжи керегинде база да јети катап айдылат (Тоол. 14:18; Неем. 9:17; Сар. 86:15; 103:8; 145:8; Иоиль 2:13; Иона 4:2, сноска) *. Бу јерлерде чындык сӱӱшле толо деген сӧстӧр — јӱк ле Иеговага тузаланылат. Иегова бисти оныҥ мындый кылык-јаҥын билип турзын деп кӱӱнзейт. Мынаҥ дезе Иегова бу кылык-јаҥды тыҥ баалап турганы кӧрӱнет. Давид те Иегованыҥ чындык сӱӱжин кӧрӱп, мындый сӧстӧр чӱмдеген: «Иегова, сениҥ улу сӱӱжиҥ — теҥериге јетире... Сениҥ улу сӱӱжиҥ сӱреен баалу, Кудайым! Сениҥ канаттарыныҥ алдына улус кору табат» (Сар. 36:5, 7). А бис Иеговага чындык сӱӱжи учун Давид чилеп быйанду болодыс па?

⁵ Кудайдыҥ чындык сӱӱжи керегинде оноҥ тереҥжиде билип аларга, эки сурак шӱӱжип ийектер: Иегова андый сӱӱжин кемдерге кӧргӱзет? Иегованыҥ андый сӱӱжи биске кандый туза берет?

6. Иегова чындык сӱӱжиле ол эмезе акту јӱрегинеҥ кемдерди сӱӱйт?

⁶ Агару Бичикте айдылганыла, кижи нени ле сӱӱр аргалу. Темдектезе: «јер-ижин», «кызыл аракыны ла ӱсти», «тӱзедӱни», «билгирди» ле «ойгорды» (2 Лет. 26:10; Укаа 12:1; 21:17; 29:3). Је чындык сӱӱш тын јок немелерге болбой јат. Иегова чындык сӱӱжиле, ӧскӧртӧ айтса акту јӱрегинеҥ бастыра улусты сӱӱп турган ба? Јок, анай ол јӱк ле бойыныҥ најыларын сӱӱп јат. Иегова најыларына ижемји сыйлаган, олорды качан да артыргыспас.

7. Иегова бастыра улусты сӱӱп турганын канайып кӧргӱзет?

⁷ Иегова бастыра улусты сӱӱп јат. Мыны бис Иисустыҥ сӧстӧринеҥ кӧрӱп јадыс. Ол Никодим деп кижиге айткан: «Кудай телекейди сӱӱген бойынча, сок јаҥыс Уулын берген, Ого бӱткен кажы ла кижи  ӧлӱп калбай, мӧҥкӱ јӱрӱмдӱ болзын деп» (Иоанн 3:1, 16, ЈК 2003; Матф. 5:44, 45).

8, 9. а) Иегова бойыныҥ ишчилерин нениҥ учун чындык сӱӱжиле сӱӱп јат? б) Оноҥ ары нени шӱӱжерис?

⁸ Ӧрӧ айдылганыла, Иегова чындык сӱӱжиле јӱк ле оныла јуук колбуларлу улусты, бойыныҥ ишчилерин, сӱӱп јат. Бис мыны Давид каанныҥ ла судурчы Даниилдиҥ сӧстӧринеҥ кӧрӧдис. Темдектезе, Давид каан мынайып айткан: «Сени билер улусты чындык сӱӱжиҥле оноҥ ло ары сӱӱ»; «Иегова оноҥ айап тургандарды чындык сӱӱжиле јажын-чакка сӱӱр» (Сар. 36:10; 103:17). А Даниил дезе мынайып айткан: «Иегова улу чындык Кудай, айткан сӧзине турумкай. Сени сӱӱп турган ла сениҥ јакаруларыҥды бӱдӱрип турган улусты сен чындык сӱӱжиҥле сӱӱп јадыҥ!» (Дан. 9:4). Айдарда, бу ӱлгерлердеҥ кӧрзӧ, Иегова чындык сӱӱжиле ол эмезе акту јӱрегинеҥ мындый улусты сӱӱп турган: оны билер, оноҥ айап турган, оны сӱӱп турган ла јакаруларын бӱдӱрип турган улусты. Иегованыҥ мындый сӱӱжин јӱк ле оныҥ ишчилери алат — ӧскӧ кем де эмес!

⁹ Иегованыҥ ишчизи болордоҥ озо бис оныҥ ӱзе ле улуска берип турган сӱӱжин алганыс (Сар. 104:14). Је Кудайдыҥ ишчизи болгон кийнинде, бис оныҥ чындык сӱӱжин алып баштаганыс. Иегова бойыныҥ ишчилерине мындый јылу сӧстӧр бичиген: «Мен сени акту јӱрегимнеҥ јажын-чакка сӱӱрим» (Иса. 54:10). Бистер де, Давид чилеп, «Иегова бойыныҥ чындык кижизин акту јӱрегинеҥ сӱӱп јат» деп кӧрӱп јадыс (Сар. 4:3). Кудайдыҥ мындый сӱӱжин кӧрӱп, бис бойыстыҥ јаныстаҥ нени эдер аргалу? Сарнаачыныҥ айтканыла: «Ойгор кижи, бу керегинде сананар, Иегованыҥ чындык сӱӱжин шӱӱп сананар» (Сар. 107:43). Оныҥ учун Иегова бисти акту јӱрегинеҥ сӱӱп турганынаҥ улам бистерде кандый ӱч арга ачылат деп кӧрӱп ийектер.

10. Кудайдыҥ чындык сӱӱжи јажын-чакка улалганынаҥ улам биске кандый туза болот? (Сарын 31:7).

¹⁰ Кудайдыҥ чындык сӱӱжи јажын-чакка улалар. Бу керегинде 136-чы Сарында  26 катап айдылат. Баштапкы ӱлгерде мындый сӧстӧр кычырадыс: «Иеговага јалакайы учун быйанду болугар. Оныҥ чындык сӱӱжи јажын-чакка улалар» (Сар. 136:1). А 2-чи ӱлгердеҥ ала 26-чы ӱлгерге јетире, «чындык сӱӱжи јажын-чакка» улалар деген сӧстӧр кажы ла ӱлгерде туштайт. Сӧстӧрдиҥ мынайып такып-такып айтканын рефрен деп айдып турган. Бу ӱлгерлерди кычырып, Кудайдыҥ андый јаан сӱӱжин кӧрӱп, кижи кайкаар! Анайда ок бу сӧстӧрдӧҥ Иегованыҥ бисти качан да таштабазын кӧрӱп јадыс. Ол бистиҥ јастыраларысты кӧрӱп турган да болзо, је бистеҥ качан да чӧкӧбӧй јат. Карын ол бисти килеп, оҥдоп јат. Иегова анчада ла кӱч ӧйлӧрдӧ биске чындык најы болуп турган. Мынаҥ бис кандый туза аладыс? Иегованыҥ мындый јылу сӱӱжин сескенис, биске сӱӱнчи ле ийде-кӱч берет. Анайып кандый ла кӱчтерди ӧдӧдис, јӱрӱмниҥ јолыла оноҥ ло ары барадыс. (Сарын 31:7 кычырыгар.)

11. Сарын 86:5-ле болзо, Иегова нениҥ учун улустыҥ кинчегин таштап турган?

¹¹ Кудай чындык сӱӱжинеҥ улам улустыҥ кинчегин таштайт. Јастыразын алынып, Кудайга јарабас јӱрӱмин артыргыскан кижиниҥ кинчегин Иегова таштап јат. Нениҥ учун дезе Иегова чындык сӱӱшле толо. Бу керегинде сарнаачы Давид бичиген: «Ол бисти јастыраларыска келиштире кату-каруузына тургуспай јат» (Сар. 103:8—10). Давид бойы да бир тушта коркышту уур кинчек эдип, бойын јинген. Је ол Иегова Кудай «јаманды таштаарга белен» деп јакшы оҥдоп алган. Айдарда, Иегованы улустыҥ кинчегин таштаарга не кӱӱнзедип турган? Каруузы Сарын 86:5-те бичилген (кычырыгар). Давидтиҥ мӱргӱӱлинде айдылганыла, Иегова јастыразын алынган кижиниҥ кинчегин чындык сӱӱжиле таштап салат (Сар. 103:11).

12, 13. Кинчектеристеҥ улам ӧйинеҥ ӧткӱре јинип турган болзоос, биске не болужар?

¹² Кижи кинчегин оҥдоп турза тузалу, нениҥ учун дезе кижи мынаҥ улам тӱзединет. Је кезикте Иегованыҥ Керечилери кинчегин алынган да болзо, бойын ӧйинеҥ ӧткӱре јинип јат. Јӱрегис бисти бурулап, Иегова мениҥ јаманымды качан да таштабас деп санаалар берет. Слерде андый сезимдер болуп турган болзо,  Иегованыҥ чындык сӱӱжи керегинде шӱӱп сананыгар.

¹³ Мынаҥ бис кандый туза аладыс? Бис толо кеминде эмес те болзоос, је Иеговага ару уйатту, сӱӱнчилӱ иштеер аргалу. Нениҥ учун дезе «Иисус Христос Уулыныҥ каны бисти кандый ла кинчектеҥ арутайт» (1 Иоанн 1:7). Слер бойоордыҥ јастыралараардаҥ улам эмдиге ле јинип турган болзоор, Иегова слердиҥ кинчегерди таштаарга тыҥ кӱӱнзеп турган деп ундыбай туругар! Давид Иегованыҥ чындык сӱӱжи керегинде мындый сӧстӧр айткан: «Канайып теҥери јердеҥ бийик, анайып ла Кудайдаҥ айап турган улуска оныҥ чындык сӱӱжи сӱреен јаан. Канайып кӱнчыгыш кӱнбадыштаҥ ыраак, анайып ла Кудай кинчектеристи бистеҥ ыраадып салган» (Сар. 103:11, 12). Айдарда, Иегова јаманын алынып турган улуска буурзап, кинчегин таштап салат (Иса. 55:7).

14. Кудайдыҥ чындык сӱӱжи бисти канайып корулап турганын Давид неге тӱҥдештирген?

¹⁴ Иегованыҥ чындык сӱӱжи кӧгӱс кору берет. Давид Иеговага мынайып кожоҥдогон: «Сен мениҥ јажынар јерим. Кыйын-шыранаҥ мени кичеериҥ, мени јайымдалыштыҥ сӱӱнчизиле курчаарыҥ. ...Је Иеговага иженип турган кижини оныҥ чындык сӱӱжи корулайт» (Сар. 32:7, 10). Библиялык ӧйлӧрдӧ каланы айландыра стенелер туткан. Бу стенелер каланы ӧштӱлердеҥ корулаган. Анайып ла Иегованыҥ чындык сӱӱжи стене чилеп бисти кӧгӱс каршунаҥ корулайт. Анайда ок Иеговала најылашканыс та биске кору болот. А оныла бис Оныҥ чындык сӱӱжинеҥ улам најылажып турган эмейис (Иер. 31:3).

15. Иегованыҥ чындык сӱӱжи коруланатан јерге ле шибееге незиле тӱҥей болот?

¹⁵ Иегова албатызын корулап турганы керегинде Давид база бир јараш тӱҥдештирӱ эткен. Ол айткан: «Сен мениҥ Кудайым, мениҥ коруланар јерим, мени чындык сӱӱжиле сӱӱп турган Кудайым». Анайда ок мынайда айткан: «Ол мени чындык сӱӱжиле сӱӱп јат, ол мениҥ шибеем, мениҥ коруланар јерим, мениҥ аргадаачым, мениҥ куйагым. Ол меге кору берген» (Сар. 59:17; 144:2). Давид нениҥ учун Иегованыҥ чындык сӱӱжин коруланатан јерге ле шибееге тӱҥдештирген? Бис кайда да јадып турган болзоос, Иегова бисти корулап јат. Бис ого чындык иштеп турган болзоос, ол биске оныла колбуларысты кичеерге болужар. Бого тӱҥей тӱҥдештирӱ 91-чи Сарында бар, оны Моисей бичиген болор. Ол айткан: «Сен мениҥ јажынар јерим, шибеем» (Сар. 91:1—3, 9, 14). Моисей Иегованы 90-чы Сарында база шибееге тӱҥдештирип јат (Сар. 90:1, сноска). Анайда ок Моисей божоор алдында Иегованыҥ чындык сӱӱжи керегинде база бир јараш шӱӱлте айткан: «Кудай — јебрен ӧйлӧрдӧҥ бери коруланар јер болот, ол сеге ӱргӱлји колдорыла болужып јат» (Јаҥ. т. 33:27). «Ӱргӱлји колдорыла болужып јат» дегени Иегова керегинде нени айдат?

16. Иегова биске кандый эки аргала болужып јат? (Сарын 136:23).

¹⁶ Иегова бистиҥ коруланатан јерис болзо, бис недеҥ де коркыбай јадыс. Је кезикте кунугып, санааркап, чыдалыс неге де јетпей барат. Мындый ӧйдӧ Иегова биске канайып болужып турган? (Сарын 136:23 кычырыгар.) Ол «ӱргӱлји колдорыла» бисти кучактай алып, ӧрӧ кӧдӱрип, тургузып салат (Сар. 28:9; 94:18). Бис мынаҥ кандый туза аладыс? Иегованыҥ болужына јаантайын ла иженерге јараар. Нениҥ учун дезе баштапкызында, бис кайда да јадып турган болзоос, ол биске коруланатан јер болот. Экинчизинде, бисти сӱӱп турган теҥеридеги Адабыс бисти кичееп јат.

17. Иегова бисти чындык сӱӱжиле сӱӱп турган болордо, бис неге алаҥзыбай јадыс? (Сарын 33:18—22).

¹⁷ Бу јӧрмӧлдӧ кӧргӧнисле, бисте кандый да кӱчтер болотон болзо, Иегова биске чындык артарга болужар (2 Кор. 4:7—9). Судурчы Иеремия мынайып айткан: «Иегованыҥ чындык сӱӱжинеҥ улам бис тирӱ арттыс. Нениҥ учун дезе оныҥ буурзагы тӱгенбей јат» (Ыйы 3:22). Иегова бистиҥ јаныста, ол бисти јаантайын чындык сӱӱжиле сӱӱр деп, бис бир де алаҥзыбай јадыс, нениҥ учун дезе сарнаачы мынайып айткан: «Иегова оноҥ айап тургандарды ла оныҥ чындык сӱӱжине иженип тургандарды кӧрӱп јӱрет». (Сарын 33:18—22 кычырыгар.)

18, 19. а) Биске нени ундыбас керек? б) Келер јӧрмӧлдӧ нени шӱӱжерис?

¹⁸ Нени ундыбас керек? Бис Иегованыҥ ишчизи болордоҥ озо Кудайдыҥ ӱзе улуска берип турган сӱӱжин кӧргӧнис. Је сууга чӧҥӱрилген кийнинде Кудайдыҥ чындык сӱӱжин аладыс. Мындый сӱӱжинеҥ улам ол бисти јылу колдорыла кучактап јат. Ол бисти качан да артыргыспас, јаантайын бисти корулаар, берген сӧзин ӱзе бӱдӱрип салар. Ол бисле јажын-чакка најылажарга кӱӱнзейт! (Сар. 46:1, 2, 7). Оныҥ учун бисте кандый да кӱчтер болотон болзо, ого чындык артарга ийде-кӱч берер.

¹⁹ Бис бу јӧрмӧлдӧ Иегова бойыныҥ ишчилерине чындык сӱӱжин канайып кӧргӱзип турганын шӱӱштис. Је биске де бой-бойысты база чындык сӱӱшле сӱӱр керек. Оны канайып эдер? Бу сӱреен керектӱ сурак келер јӧрмӧлдӧ шӱӱжилер.