1. Aha do na dipangido Jahowa sian naposona?

MASSAI lomo do roha ni Jahowa patuduhon holong na manoktong. (Hos. 6:6) Lomo do tong rohana asa naposona patuduhon sifat i. Songon na dipaboa Panurirang Mika, dijujui Jahowa do hita ‘makkaholongi holong na manoktong’. (Mik. 6:8, surat na di toru) Asa boi tapatudu holong i, ikkon parjolo do taboto aha do sasittongna holong na manoktong i.

2. Aha do holong na manoktong i?

² Adong lobi 200 hali hata “holong na manoktong” disurat di Bibel Terjemahan Tano na Imbaru di bahasa Batak Toba, termasuk ma i di surat na di toru. Piga-piga terjemahan ni Bibel, menerjemahon holong na manoktong gabe “asi ni roha”, “burju ni roha”, dohot “holong ni roha”. Jadi molo tajaha hata i di akka ayat na dibahas di artikel on dohot di artikel na mangihut, i maksudna holong na manoktong. Aha do holong na manoktong i? Kamus Bibel mandok, “Holong na manoktong, i ma holong na tubu alani janji manang setia tu sasahalak, manang naeng marale-ale tu sasahalak. Dipakke do hata on lao patuduhon holong ni Debata tu jolma manang holong ni jolma tu donganna jolma.” Jahowa do teladan na sempurna patuduhon holong na manoktong. Di artikel on tabahas ma songon dia Jahowa patuduhon holong na manoktong tu hita jolma, jala di artikel na mangihut tabahas ma songon dia hita naposo ni Jahowa maniru Ibana patuduhon holong na manoktong tu akka halak.

3. Aha do na dipaboa Jahowa tu si Musa?

³ Dang sadia leleng dung kaluar halak Israel sian Mesir, dipaboa Jahowa do tu si Musa taringot goarna dohot sifatna. Didok Ibana, “Au do Jahowa, Debata na burju jala parasi roha. Au do Jahowa na lambat tarrimas, jala gok holong ni roha dohot hasittongan. Hupatudu do holong ni roha tu marribu halak. Jala husesa do hasalaan ni halak, hajahatonna, dohot dosana.” (2 Mus. 34:6, 7) Sian hatana i, Jahowa naeng paboahon tu hita adong na massai penting na ikkon taboto taringot holong na manoktong i. Aha ma i?

4-5. (a) Holong na songon dia do na dipatudu Jahowa? (b) Sukkun-sukkun aha do na lao taulas di artikel on?

⁴ Sian hata ni Jahowa tu si Musa taboto ma molo Jahowa dang holan Debata parholong, alai ayat i mandok “gok holong ni roha” do Ibana. Adong dope pitu hali nai hata i disurat di Bibel. (4 Mus. 14:18; Neh. 9:17; Ps. 86:15; 103:8; 145:8; Joel 2:13; Jona 4:2) Holong ni Jahowa do na dimaksud di sude ayat i, dang holong ni jolma. On patuduhon, sifat holong na manoktong i massai penting do di Jahowa. * Alani i, didok Raja Daud ma, “Ale Jahowa, sahat tu langit do holong ni roha na pinatudum . . . massai arga do holong ni roha na pinatudum, marlinggom do akka anak ni jolma di toru ni habongmu.” (Ps. 36:5, 7) Songon si Daud, pasti taargai do holong ni Jahowa na manoktong i.

⁵ Asa lam taattusi aha do lapatan ni holong na manoktong i, taalusi ma dua sukkun-sukkun on: Tu ise do dipatudu Jahowa holong na manoktong i? Jala aha do manfaat na tadapot sian holong na manoktong na dipatudu Jahowa i?

6. Tu ise do dipatudu Jahowa holong na manoktong i?

⁶ Tu ise do dipatudu Jahowa holong na manoktong i? Di Bibel, adong do didok halak na marholong ni roha tu “parbinotoan”, “tu anggur dohot tu miak”, dohot tu “bisuk”. (Poda 12:1; 21:17; 29:3) Alai dang holong na manoktong i, alana holan tu jolma do dipatudu holong na manoktong i. Nang pe songon i dang tu sude jolma dipatudu Jahowa holong na manoktong i, holan tu akka halak na akrab tu Ibana do i dipatudu. Ai setia do Jahowa tu akka halak na marale-ale tu Ibana, dilean do harapan tu nasida, jala torus do dihaholongi Ibana nasida.

7. Sian dia do taboto na dipatudu Jahowa holongna tu sude jolma?

 ⁷ Dipatudu Jahowa do holong ni rohana tu sude jolma. Tarida ma i sian hata ni Jesus tu si Nikodemus. Didok ibana, “Ai songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.”​—Joh. 3:1, 16; Mat. 5:44, 45.

8-9. (a) Boasa dipatudu Jahowa holong na manoktong tu akka naposona? (b) Aha do na lao tabahas muse?

⁸ Songon na dipaboa nakkin, holan tu akka halak na akrab tu Ibana do dipatudu Jahowa holong na manoktong i, i ma tu akka naposona. Tarida do i sian hata ni Raja Daud dohot Panurirang Daniel. Didok si Daud, “Toktong ma patudu holong ni roham tu akka halak na mananda Ho.” “Toktong do dipatudu Jahowa holong ni rohana sahat tu saleleng ni lelengna tu akka halak na makkabiari Ibana.” Si Daniel mandok, “Ale Jahowa Debata na sittong . . . dipatuduhon Ho do holong ni roham tu akka halak na makkaholongi Ho jala na mangulahon parentam.” (Ps. 36:10; 103:17; Dan. 9:4) Sian akka ayat i taboto ma, dipatudu Jahowa pe holong na manoktong tu akka naposona ala ditanda nasida do Jahowa, dihabiari, dihaholongi, jala diulahon parettana. Takkas ma holan tu akka halak na mangulahon ibadat na sittong do dipatudu Jahowa holong na manoktong i.

⁹ Andorang so gabe Saksi Jahowa dope hita nungnga tahilala holong ni Jahowa i, alai dung gabe Saksi Jahowa hita gabe tahilala ma holong na manoktong na dipatudu Jahowa. (Ps. 104:14) Alani i ma didok Jahowa tu akka naposona, “Anggo holong ni rohakki, dang na lao mago i sian ho.” (Jes. 54:10) Songon i do tong na didok si Daud, “Dipasangap Jahowa do akka naposona na setia.” (Ps. 4:3) Ala songon i do holong ni Jahowa tu hita, attong aha ma na ikkon taulahon? Didok panurat Psalmen, “Manang ise na marbisuk diparrohahon ma on, jala manat ma dipikkiri akka ulaon ni Jahowa na patuduhon holongna.” (Ps. 107:43) On do na dipangido Jahowa sian hita. Saonari tabahas ma tolu cara ni Jahowa patuduhon holong na manoktong i, jala aha do manfaatna tu hita.

10. Ala taboto sahat tu saleleng ni lelengna do holong na manoktong na sian Jahowa i, aha do manfaatna tu hita? (Psalmen 31:7)

¹⁰ Sahat tu salelengna do holong na manoktong na sian Jahowa i. Sian dia taboto? Adong do 26 hali hata i diulangi di Psalmen 136. Di ayat 1 didok, “Mandok mauliate ma tu Jahowa, ai na burju do Ibana. Toktong do dipatudu Ibana holong ni rohana sahat tu saleleng ni lelengna.” (Ps. 136:1) Di ayat 2 sahat tu ayat 26 diulangi dope hata, “Toktong do dipatudu Ibana holong ni rohana sahat tu saleleng ni lelengna.” Pasti gabe dipatogu do hita manjaha akka ayat i. Gabe taboto ma torus do dipatudu Jahowa ‘holongna na manoktong i tu hita sahat tu salelengna’ jala dang muba holongna i. Sappe andigan pe, dang tinggalhonon ni Jahowa hita, apalagi ma tikki susa. Gabe dipatogu do muse rohatta ala sabar do Jahowa tu hita. Manfaatna tu hita: Ala taboto songon i holong ni Jahowa, gabe boi ma hita togu jala marlas ni roha nang pe godang hasusaatta. Jala i do na mambahen hita toktong di bagasan hasittongan.—Jaha Psalmen 31:7.

11. Sesuai tu Psalmen 86:5, aha do na mangonjar roha ni Jahowa lao manalpuhon hasalaan?

¹¹ Holong na manoktong sian Jahowa mangonjar rohana lao manalpuhon hasalaatta. Tikki diida Jahowa sasahalak na mangulahon dosa bertobat jala dang diulahon ibana be hasalaanna i, rade do Jahowa manalpuhon hasalaanna i. Si Daud mandok, “Dang hea dibalos [Jahowa] hita hombar tu akka dosatta, jala dang hea dihukum Ibana hita hombar tu akka hasalaatta.” (Ps. 103:8-11) Hea do si Daud mangulahon hasalaan jala marsak situtu do ibana alani i, alai ‘rade do Jahowa manalpuhon hasalaanna’. Aha do na mambahen Jahowa rade mangulahon i? Tadapot ma alusna di Psalmen 86:5. (Jaha.) Sian tangiang ni si Daud i taboto ma rade do Jahowa manalpuhon hasalaan, alana dipatudu Ibana do holong na manoktong tu sude na jou-jou tu Ibana.

12-13. Aha do na ikkon taingot molo sai torus hita merasa bersalah?

¹² Tikki taulahon hasalaan manang dosa, pasti merasa bersalah do hita. Denggan do i alana i do na mangurupi hita asa muba, jala dang mangulahon hasalaan na sarupa. Alai  adong do piga-piga donganta na sai torus merasa bersalah, nang pe nga leleng dang diulahon ibana be hasalaanna i. Ninna roha ni nasida dang mungkin disalpuhon Jahowa hasalaanna i, nang pe nasida nungnga bertobat. Alai ingot ma rade do Jahowa manalpuhon hasalaanmuna, ala dipatudu Ibana do holong na manoktong i tu hamu.

¹³ Manfaatna tu hita: Nang pe dang sempurna hita boi do ias panggora ni rohatta jala marlas ni roha manomba Jahowa. Boasa? Alana Bibel mandok, “Ias ma hita sian sude dosa dibahen mudar ni Jesus, Anakna i.” (1 Joh. 1:7) Jadi molo marmetmet ni roha hamu alani hasalaan manang hahuranganmuna, ingot ma rade do Jahowa manalpuhon i sude. Alana songon na didok si Daud nakkin sai dipatudu Jahowa do holong na manoktong. Didok si Daud do muse, “Songon langit na untimbo sian tano on, songon i ma balga ni holong ni roha na dipatudu [Jahowa] tu akka halak na makkabiari Ibana. Songon dao ni timur tu barat, songon i ma dao ni hasalaatta dipadao Ibana sian hita.” (Ps. 103:11, 12) Jadi takkas ma ‘rade do Jahowa manesa sude dosatta’.​—Jes. 55:7.

14. Aha do na didokkon si Daud taringot holong na manoktong sian Jahowa i?

¹⁴ Holong na manoktong sian Jahowa manjaga hita. Hea do si Daud martangiang songon on, “Ho do inganan partabunian di au, paluaonmu do au sian hasusaakku. Bahenonmu do au jongjong di tonga-tonga ni akka halak na marlas ni roha ala dipalua Ho au. . . . Manang ise na marpos ni roha tu Jahowa, patuduhononna do holong ni rohana tu nasida lao manjaga nasida.” (Ps. 32:7, 10) Najolo asa terlindungi akka halak sian musu, ikkon dibahen do tembok ni kota. Dos songon i ma holong na manoktong sian Jahowa, mangalinggomi hita sian akka bahaya na boi mambahen gale haporseaotta. Sada cara ni Jahowa mangalinggomi hita, i ma ditarik Jahowa hita tu hasittongan.​—Jer. 31:3.

15. Boasa boi didok holong na manoktong sian Jahowa i songon benteng manang inganan parlinggoman?

¹⁵ Di ayat na asing si Daud paboahon, “Debata do inganan parlinggomakku na aman, dipatudu Debata do holong ni rohana tu au.” Didok si Daud do muse, “Dipatuduhon Ibana do holongna tu au jala Ibana do Sipalua au, Ibana do bentengku jala Ibana do parlinggoman di au, Ibana do perisaiku jala Ibana do parlinggomakku.” (Ps. 59:17; 144:2) Boasa didok si Daud holong na manoktong sian Jahowa i, songon benteng manang inganan parlinggoman? Alana dang soal didia hita tinggal, molo toktong tasomba Jahowa pasti jagaonna do hita sian akka bahaya na boi mambahen gale haporseaotta. Songon i do tong na disurat di Psalmen 91. Didok do, “Dohonokku ma tu Jahowa, ‘Ho do parlinggoman dohot benteng na togu di au.’” (Ps. 91:1-3, 9, 14) Si Musa pe mandok, Jahowa do inganan parlinggoman di ibana. (Ps. 90:1) Jala di ujung ngolu ni si Musa didok ibana, “Debata do inganan marlinggom sian najolo, tanganna na manoktong i do na manogu-nogu ho.” (5 Mus. 33:27) Aha do lapatan ni “tanganna na manoktong i do na manogu-nogu ho”?

16. Songon dia do Jahowa mangurupi hita? (Psalmen 136:23)

¹⁶ Molo toktong taingot sai jagaon ni Jahowa do hita, gabe dame ma pakkilalaatta. Memang olo do marsak hita alani hasusaan on. Alai boha do dibahen Jahowa mangurupi hita? (Jaha Psalmen 136:23.) Gomos do ditiop Ibana tanganta, ditogu-togu Ibana do hita, jala urupanna do hita asa unang sai marsak be. (Ps. 28:9; 94:18) Manfaatna tu hita: Gabe pos ma rohatta na boi do taandalhon Jahowa. Alana, sai jagaon ni Jahowa do hita manang na didia pe hita tinggal. Jala, massai holong do rohana tu hita.

17. Aha do na taboto taringot tu holong na manoktong na dipatudu Jahowa tu hita? (Psalmen 33:18-22)

¹⁷ Songon na taparsiajari nakkin gabe taboto ma nang pe hita mangadopi hasusaan, boi do pos rohatta na urupan ni Jahowa do hita asa boi toktong setia. (2 Kor. 4:7-9) Panurirang Jeremia mandok, “Alani holong na pinatudu ni Jahowa i do umbahen dang mate hita, ai torus do dipatudu Ibana asi ni rohana i.” (And. 3:22) Pos ma rohatta, sai dipatudu Jahowa do holong na manoktong i tu hita. Jala Bibel pe paboahon tu hita, “Diparrohahon Jahowa do halak na makkabiari Ibana, halak na maima-ima holong ni roha na pinatuduna.”​—Jaha Psalmen 33:18-22.

18-19. (a) Aha ma na porlu taingot? (b) Aha do na lao tabahas di parsiajaran na mangihut?

¹⁸ Jadi aha na porlu taingot? Andorang so tasomba dope Jahowa, nungnga tahilala holongna. Alai dung gabe sisomba Jahowa hita, gabe boi ma tahilala holongna na manoktong i. Misalna dijaga Jahowa do hita jala dilehon do harapan tu hita. Lomo do rohana asa marlas ni roha hita. (Ps. 46:1, 2, 7) Alani i, manang aha pe na masa di ngolutta, pos ma rohatta lehonon ni Jahowa do tu hita gogo asa boi toktong hita setia tu Ibana.

¹⁹ Nungnga taida songon dia cara ni Jahowa patuduhon holongna na manoktong tu akka naposona. Alai lomo do tong rohana asa tapatudu holong na manoktong i tu halak na asing. Boha ma carana? Tabahas ma i di parsiajaran na mangihut.