1. Weh Jehoava inkorij wi fi du?

LAAYAL lov veri impoatant tu Jehoava. (Hos. 6:6) Hihn waahn dis kwaliti bee veri impoatant tu wee tu. Chroo di prafit Maika, Jehoava inkorij wi fi “lov laayal lov.” (Mic. 6:8, ftn.) Bot bifoa wi ku eevn du dat, wi need fi andastan wat da laayal lov.

2. Wat da laayal lov?

² Di frayz “laayal lov” deh eena di New World Translation of the Holy Scriptures bowt 230 taimz. Bot, wat da laayal lov? If sohnbadi ga laayal lov, dat meenz dat ih ku lov wahn nada persn soh moch dat ih wuda kip aan di lov ahn an stik bai ih said eevn chroo haad taimz. Jehoava da di bes egzampl a laayal lov. Eena dis aatikl, wi wahn diskos how Jehoava shoa laayal lov tu hyoomanz. Eena di neks aatikl, wi wahn diskos how wee az Jehoava servants ku kapi fi hihn egzampl ahn shoa laayal lov tu wan anada.

3. Weh Jehoava mi tel Moaziz bowt ihself?

³ Noh tu lang afta di Izrelaits mi lef Eejip, Jehoava mi tel Moaziz sohnting bowt fi Hihn naym an ih kwalitiz. Ih mi seh: “Jehoava, Jehoava, wahn Gaad weh mersiful ahn weh ga kompashan, wahn Gaad weh noh eezi fi geh beks, ahn weh ful op a laayal lov ahn chroot. Ih shoa lov tu towznz a peepl, an ih fergiv dehn sinz.” (Ex. 34:6, 7) Wid dehnya byootiful werdz, Jehoava mi tel Moaziz sohnting veri speshal bowt fi Hihn laayal lov. Weh Ih mi-di tel ahn?

4-5. (a) How Jehoava mi diskraib ihself? (b) Weh kweschanz wi wahn diskos?

⁴ Jehoava neva jos seh dat hihn ga laayal lov bot dat ih  “ful op a laayal lov.” Di way how Jehoava mi diskraib ihself geh menshan lata taimz eena di Baibl. (Num. 14:18; Neh. 9:17; Ps. 86:15; 103:8; Joel 2:13; Jonah 4:2) An eech taim ih kom op, ih onli di rifaa tu Jehoava, noh tu hyoomanz. Ih inchrestin fi si dat Jehoava diskraib ihself soh aafn da way deh eena di Baibl. Soh ih klyaa fi si dat laayal lov veri impoatant tu Jehoava. * Dat da wai King Dayvid mi seh: “Oa Jehoava, yu laayal lov reech way op eena di hevnz . . . Yu laayal lov soh preshos, Oa Gaad! Anda di shado a yu wingz, hyoomanz goh fi protekshan.” (Ps. 36:5, 7) Wi ku aks wiself, ‘Gaad laayal lov preshos tu wee jos laik how ih mi preshos tu Dayvid?ʼ

⁵ Fi help wi andastan beta wat da laayal lov, mek wi diskos dehnya too kweschan: Hoo Jehoava shoa laayal lov tu? Ahn how wee benifit wen Jehoava shoa laayal lov tu wee?

6. Hoo Jehoava shoa laayal lov tu?

⁶ Hoo Jehoava shoa laayal lov tu? Di Baibl seh dat wee ku lov wahn lata tingz, laik “agrikolcha,” “wain an ail,” “disiplin,” “nalij,” “wizdom”—jos fi menshan wahn fyoo. (2 Chron. 26:10; Prov. 12:1; 21:17; 29:3) Bot nobadi shoa laayal lov tu tingz; da sohnting weh wi onli shoa tuwaadz peepl. Bot Jehoava noh shoa laayal lov tu evribadi. Hihn shoa it tu dehn wan weh ga wahn kloas rilayshanship wid hihn. Fi wee Gaad laayal tu ih fren dehn. Hihn ga wahn wandaful perpos fi dehn, ahn hihn wahn neva stap lov dehn.

7. How Jehoava shoa lov tu aal hyoomanz?

⁷ Jehoava don shoa lov tu aal hyoomanz. Jeezas mi tel wahn man weh naym Nikodeemos: “Gaad lov di werl [aal hyoomanz] soh moch dat ih giv ih onli Son, soh dat evribadi weh shoa fayt eena ahn noh wahn geh dischrai bot wahn liv fareva.”—Jan 3:1, 16; Mach. 5:44, 45.

8-9. (a) Wai Jehoava shoa laayal lov tu ih servant dehn? (b) Weh wi wahn diskos now?

⁸ Laik weh wi seh erliya, Jehoava onli shoa ih laayal lov tu dehn wan weh ga wahn kloas rilayshanship wid ahn. Wi ku si dis bays pahn weh King Dayvid ahn di prafit Danyel mi seh. Fi egzampl, Dayvid mi seh: “Kantinyu fi shoa yu laayal lov tu dehn wan weh noa yu.” “Jehoava laayal lov wahn laas fareva fi dehn wan hoo fyaa hihn.” Ahn Danyel mi seh: “Oa Jehoava  di chroo Gaad, [di Wan weh] shoa laayal lov du dehn wan weh lov ahn an kip fi hihn komanment dehn.” (Ps. 36:10; 103:17; Dan. 9:4) Akaadn tu dehnya vers, wi ku si dat Jehoava shoa laayal lov tu ih servant dehn bikaaz dehn noa hihn, fyaa hihn, lov hihn, ahn kip fi hihn komanment dehn. Jehoava shoa laayal lov onli tu dehn wan weh wership ahn di rait way.

⁹ Bifoa wi mi staat tu serv Jehoava, wi mi benifit fahn di lov weh hihn shoa tuwaadz aal hyoomanz. (Ps. 104:14) Bot bikaaz wee wership hihn, wi geh fi benifit fahn fi hihn laayal lov. Az a mata a fak, Jehoava pramis ih servant dehn: “Mai laayal lov fi unu wahn aalwayz egzis.” (Isa. 54:10) Dayvid mi si fi ihself dat “Jehoava chreet ih laayal wan dehn eena wahn speshal way.” (Ps. 4:3) Weh dis shuda moov wi fi du? Di saamis mi seh: “Enibadi weh waiz wahn kansida dehnya tingz ahn kyaafuli tink bowt weh Jehoava du bikaaz a ih laayal lov.” (Ps. 107:43) Da gud advais kohn fahn Jehoava. Soh now mek wi diskos chree wayz how Jehoava shoa ih laayal lov tu wi ahn how wee benifit fahn Jehoava laayal lov.

10. How wee benifit wen wi noa dat Jehoava laayal lov laas fareva? (Psalm 31:7)

¹⁰ Gaad laayal lov laas fareva. Dis geh menshan 26 taimz eena Psalm 136. Di fers vers seh: “Gi tanks tu Jehoava, bikaaz hihn gud; fi hihn laayal lov laas fareva.” (Ps. 136:1) Eena eech vers fahn vers 2 tu 26, wi reed oava ahn oava di werdz: “Fi hihn laayal lov laas fareva.” Az wi reed dis saam, ih reeli toch wi haat fi si how Jehoava noh hoal bak fahn shoa ih laayal lov eena lata wayz. Di fak dat lata taim hihn seh dat “fi hihn laayal lov laas fareva,” wee ku bee shoar dat di lov weh Jehoava ga fi ih servants wahn neva chaynj. Ih soh inkorijin fi noa dat Jehoava noh kwik fi stap lov ih servant dehn! Insteda dat, wen hihn staat tu shoa lov tu sohnbadi hoo serv hihn, ih noh lef dehn, espeshali joorin haad taimz. How wee benifit? Wi geh lata jai wen wi noa dat Jehoava  stay bai wi said. Wi aalso geh di schrent weh wi need fi deel wid eniting weh kaaz wi fi schres owt, ahn dat help wi fi kip aan di serv wi Gaad.—Reed Psalm 31:7. *

11. Akaadn tu Psalm 86:5, wai Jehoava redi fi fergiv?

¹¹ Gaad laayal lov mek hihn redi fi fergiv. Wen Jehoava noatis dat sohnbadi weh komit wahn sin, ripent, ahn stap du weh bad, fi Hihn laayal lov mek hihn redi fi fergiv da persn. Dis da weh Dayvid mi seh bowt Jehoava: “Hihn noh deel wid wi akaadn tu wi sin dehn ner gi wi weh wi dizerv wen wi mek mistayk.” (Ps. 103:8-11) Fahn fi hihn oan persnal ekspeeryens, Dayvid mi noa egzakli how ih feel fi ga wahn gilti kanshans. Bot hihn mi aalso laan dat Jehoava “redi fi fergiv.” Da weh mek Jehoava waahn fergiv sohnbadi? Di ansa deh da Psalm 86:5. (Reed.) * Jos laik weh Dayvid mi seh eena ih pryaa, Jehoava redi fi fergiv bikaaz hihn ga lata laayal lov fi dehn wan weh kaal pahn hihn an aks fi fergivnis.

12-13. Weh ku help wi if wi feel gilti ahn sad bowt di mistayks weh wi mek eena di paas?

¹² Da noh wahn bad ting if wi feel sari bowt wahn mistayk weh wi mi mek. Dis ku akchwali help wi fi ripent ahn du weh wi need fi du fi chaynj ahn geh fergivnis. Bot sohn peepl kyaahn stap dehnself fahn feel gilti bowt di mistayk weh dehn mek. Dehn kip di tink dat Jehoava wahn neva fergiv dehn eevn afta dehn aks fi fergivnis ahn stap du weh rang. If yoo feel laik dat, dehn ga sohnting weh ku help yu stap feel da way. Yu need fi andastan dat Jehoava waahn shoa yu fi hihn laayal lov.

¹³ How wee benifit? Eevn doa wi noh perfek, wee ku stil injai di serv Jehoava wid wahn kleen kanshans. Dis onli pasabl bikaaz a “di blod a Jeezas ih Son [weh] mek wi kleen fahn aal sin.” (1 Jan 1:7) Weneva yu feel diskorij bikaaz a sohnting weh yu du, memba dat if yu ripent, Jehoava reeli waahn fergiv yu. Noatis how  Dayvid shoa wi dat laayal lov ahn fergivnis goh tugeda. Hihn mi rait: “Jos laik how di hevnz haiya dan di ert, sayhn way soh fi hihn laayal lov deh tuwaadz dehn wan weh fyaa hihn. Az faar az di sonraiz deh fahn di sonset, dat da how faar fahn wi hihn put wi sin dehn.” (Ps. 103:11, 12) Fi shoar, Jehoava wilin fi “fergiv eena wahn big way.”—Isa. 55:7.

14. How Dayvid mi diskraib di way how Gaad laayal lov protek wi?

¹⁴ Gaad laayal lov gi wi spirichwal protekshan. Dis da weh Dayvid mi seh eena wahn pryaa tu Jehoava: “Yoo da wahn plays wehpaat Ah ku haid; yu wahn protek mi wen chrobl kohn. Yu wahn put mi monks peepl weh rijais bikaaz yu sayv mi. . . . Jehoava laayal lov wahn protek enibadi weh chros eena ahn.” (Ps. 32:7, 10) Eena Baibl taimz, dehn mi bil sohn big waal rong wahn siti soh dat ih ku protek di peepl fahn dehn enimi. Sayhn way soh, Jehoava laayal lov da laik wahn waal weh ku protek wi fahn eniting weh ku damij wi rilayshanship wid Jehoava. Pahn tap a dat, Jehoava laayal lov da weh mek hihn waahn jraa wi kloas tu hihn.—Jer. 31:3.

15. How Jehoava laayal lov da laik wahn plays a protekshan?

¹⁵ Dayvid help wi fi si how Jehoava protek ih peepl eena wahn nada way. Dayvid seh: “Gaad da mai plays a protekshan, di Gaad hoo shoa laayal lov tu mee.” Dayvid mi aalso seh: “Hihn da mi laayal lov ahn mi sayf plays, mi plays a protekshan ahn di Wan hoo reskyu mi, mi sheel ahn di Wan hoo Ai ron tu fi tek shelta.” (Ps. 59:17; 144:2) Wai Dayvid mi kompyaa Jehoava laayal lov tu wahn plays a protekshan er wahn sayf plays? Noh mata wehpaat wi liv, az lang az wi serv Jehoava, hihn wahn mek shoar wi ga aal di protekshan weh wi need soh dat wi ku kip wi preshos rilayshanship wid hihn sayf. Psalm 91 help wi fi bee shoar a dat. Psalm 91:2 seh: “Ai wahn seh tu Jehoava: ‘Yoo da mai plays a protekshan ahn mai sayf plays.ʼ”(Ps. 91:1-3, 9, 14) Moaziz mi aalso taak bowt wahn plays a protekshan. (Ps. 90:1, ftn.) Noh tu lang bifoa Moaziz mi ded, hihn mi seh sohnting byootiful; ih mi seh: “Gaad da wahn plays a protekshan fahn aynshent taimz, fi hihn evalastin han dehn di sopoat yu.” (Deut. 33:27) Weh di frayz “fi hihn evalastin han dehn di sopoat yu” tel wi bowt Jehoava?

16. How Jehoava help wi? (Psalm 136:23)

¹⁶ Wen wi chros dat Jehoava di protek wi, wi feel sayf. Bot dehn mait stil ga taimz wen wi feel soh diskorij dat wi jos kyaahn stap feel da way. Weh yu tink Jehoava wahn du fi wi wen wi feel da way? (Reed Psalm 136:23.) * Eena wahn jentl ahn lovin way hihn lif wi op ahn help wi fi stap feel soh diskorij. (Ps. 28:9; 94:18) How wee benifit? Ih reeli help wi fi noa dat wi ku aalwayz pen pahn Jehoava. Fers, wi noa dat noh mata wehpaat wi liv, wi ku bee shoar dat Jehoava wahn aalwayz protek wi. Sekant, wi noa dat wi lovin hevnli Faada reeli kay bowt wi.

17. Bikaaz a Gaad laayal lov, weh wee ku bee shoar bowt? (Psalm 33:18-22)

¹⁷ Laik weh wi diskos, weneva wi di goh chroo haad taimz, wi ku bee shoar dat Jehoava wahn help wi kip wahn gud rilayshanship wid hihn soh dat wi ku stay  faytful tu ahn. (2 Kor. 4:7-9) Di prafit Jerimaiya mi seh: “Da bikaaz a Jehoava laayal lov wee stil deh ya, bikaaz ih mersi noh ga no en.” (Lam. 3:22) Wi ku bee shoar dat Jehoava wahn kantinyu fi shoa laayal lov tu wee bikaaz dat da weh di Baibl seh. Di saamis mi seh: “Jehoava di wach oava dehn wan hoo fyaa hihn, dehn wan hoo wayt pahn fi hihn laayal lov.”—Reed Psalm 33:18-22. *

18-19. (a) Weh wi aalwayz waahn memba? (b) Weh wi wahn diskos eena di neks aatikl?

¹⁸ Weh wi aalwayz waahn memba? Bifoa wi mi staat tu serv Jehoava, wi benifit fahn di lov weh hihn shoa tu aal hyoomanz. Bot now dat wee di wership hihn, wi aalso di benifit fahn fi hihn laayal lov. Bikaaz Jehoava ga laayal lov fi wee, hihn hog wi op tait ahn wi sayf eena fi hihn lovin han dehn. Hihn wahn aalwayz kip wi kloas tu hihn an ih wahn mek shoar dat ih wandaful pramis dehn kohn chroo. Hihn waahn mek wi bee fi hihn frenz fareva! (Ps. 46:1, 2, 7) Soh den, noh mata weh kaina chraiyalz wi mait haftu fays, Jehoava wahn gi wi di schrent weh wi need fi stay faytful tu hihn.

¹⁹ Wi laan how Jehoava shoa laayal lov tu ih servant dehn. Now, hihn ekspek wee fi shoa laayal lov tu wan anada. Bot how wi ku du dat? Eena di neks aatikl wi wahn diskos dat.