1. Cosa kanaton ta anima si Jehova que hace?

BIEN importante con Jehova el amor leal. (Os. 6:6) Quierre le que mira tambien kita con este como bien importante. Por medio con profeta Miqueas, el Dios ta anima kanaton que “ama con el amor leal.” (Miq. 6:8, ftn.) Pero siempre antes kita puede hace con ese, necesita kita sabe si cosa el amor leal.

2. Cosa el amor leal?

² Cosa el amor leal? El expresion “amor leal” ya abuya maga 230 beses na New World Translation of the Holy Scriptures. Cosa este? Si tiene amor leal el un persona, ta ama gayot le con el otro persona que hay continua le ama y esta junto con este. Si Jehova el de con todo buen ejemplo de amor leal. Na este articulo, hay discuti kita si paquemodo si Jehova ta dale mira amor leal con el maga gente. Na siguiente articulo, discuti kita si paquemodo el maga siervo del Dios puede imita con Jehova si ta dale kita mira amor leal con uno y otro.

3. Cosa ya revela si Jehova con Moises acerca na De Suyu mismo cuerpo?

³ Nuay tarda despues sale el maga Israelita na Egipto, tiene cosa ya revela si Jehova con Moises acerca na De Suyu nombre y maga calidad. Ele ya habla: “Jehova, Jehova, un Dios lastimoso y tiene compasion, gendeh pronto rabia y abundancia de amor leal y verdad, quien ta dale mira amor leal con el miles de maga gente, ta perdona con el kamali, culpa y pecado.” (Ex. 34: 6, 7) Por medio na este maga bonito palabra, ya revela si Jehova con Moises un cosa que bien especial acerca con el De Suyu amor leal. Cosa este?

4-5. (a) Cosa ya habla si Jehova acerca na de suyu mismo cuerpo? (b) Cosa maga pregunta kita hay considera?

⁴ Nuay lang habla si Jehova que tiene le amor leal sino “abundancia de amor leal.” Ese expresion ya menciona seis beses pa na Biblia. (Num. 14:18; Neh. 9:17; Sal. 86:15; 103:8; Joel 2:13; Jon. 4:2) Ya usa con ese todo para refiri solamente con Jehova y nunca con el maga gente. Gendeh ba notable que manada beses este ya usa si Jehova para refiri con el de suyu mismo cuerpo? Poreso, bien claro que importante con ele el amor leal. * Gendeh maka-estraña si porque si Rey David ya puede habla: “O Jehova, el de tuyu amor leal ta alcanza na cielo . . . Bien precioso el de tuyu amor leal, O Dios! Na sombra del de tuyu maga alas, el maga anak del gente ta hace refugio.” (Sal. 36:5, 7) Igual con David, ta aprecia ba gayot kita con el amor leal del Dios?

⁵ Para mas entende si cosa el amor leal, hay considera kita dos pregunta: Con quien ta dale mira amor leal si Jehova? Y paquemodo kita puede beneficia na amor leal de Jehova?

6. Con quien ta dale mira amor leal si Jehova?

⁶ Con quien ta dale mira amor leal si Jehova? Ya menciona el Biblia que puede kita ama manada cosas igual como na “agricultura,” “vino y aceite,” “disciplina,” “saber” y “sabeduria.” (2 Cron. 26:10; Prov. 12:1; 21:17; 29:3) Pero, gendeh puede dale mira amor leal con el maga cosas sino con el maga persona lang. Pero, gendeh ta dale mira amor leal si Jehova con maskin quien lang. Ta dale le este mira con aquellos quien tiene especial relacion con ele. El diaton Dios leal con el de suyu maga amigo y amiga. Tiene le un bonito proposito para kanila y gendeh le descanza ama kanila.

7. Paquemodo si Jehova ya dale mira amor con el todo maga gente?

⁷ Ya dale mira amor si Jehova con el todo maga gente. Si Jesus ya habla con el hombre que si Nicodemo: “Cay ansina gayot de grande el amor del Dios para con el mundo: que ya dale Le su Unico Anak para todo quien ta cree con Ele gendeh ay muri, sino ay tene Vida hasta para cuando.”—Juan 3:1, 16; Mat. 5:44, 45.

8-9. (a) Porque si Jehova ta dale mira amor leal con el de suyu maga siervo? (b) Cosa kita sunod considera?

⁸ Como ya menciona enante, ta dale lang mira amor leal si Jehova con aquellos quien tiene cerca relacion con ele—el de suyu maga  siervo. Claro este na cosa ya habla kanda Rey David y profeta Daniel. Por ejemplo, si David ya habla: “Continua dale mira el de tuyu amor leal con aquellos quien conoce contigo.” “El amor leal de Jehova hasta para cuando para con aquellos quien ta tiene miedo con ele.” Y si Daniel ya declara: “O Jehova el verdadero Dios, [quien] ta dale mira amor leal con aquellos quien ta ama con ele y ta obedece con el de suyu maga mandamiento.” (Sal. 36:10; 103:17; Dan. 9:4) Asegun na este maga inspirao expresion, ta dale mira amor leal si Jehova con el de suyu maga siervo cay conoce sila con ele, ta tiene miedo con ele, ta ama con ele y ta obedece con el de suyu maga mandamiento. Ta dale mira amor leal si Jehova con aquellos lang ta sirvi con ele na justo manera.

⁹ Antes kita ya principia sirvi con Jehova, ya ricibi kita el amor que ta dale mira el Dios con el todo maga gente. (Sal. 104:14) Pero como de suyu maga siervo, ta beneficia tambien kita na de suyu amor leal. Gane, ya asigura si Jehova con el de suyu maga siervo: “El de mio amor leal gendeh perde contigo.” (Isa. 54:10) Como cosa ya experiencia si David, “hay trata si Jehova na especial manera con el quien leal con ele.” (Sal. 4:3) Cosa debe el diaton reaccion na especial cuidada de Jehova para kanaton? El salmista ya habla: “El sabio hay observa con este maga cosas y hay considera le enbuenamente con el amor leal que ta dale mira si Jehova.” (Sal. 107:43) Uyun con ese consejo que estaba con Jehova, hay considera kita tres manera si paquemodo el maga siervo de Jehova ta beneficia na de suyu amor leal.

10. Na cosa manera ta ayuda kanaton cay sabe kita que ta esta hasta para cuando el amor leal del Dios? (Salmo 31:7)

¹⁰ El amor leal del Dios ta esta hasta para cuando. Ya menciona con este 26 beses na Salmo 136. Na primer versiculo, puede kita le: “Rindi gracias con Jehova, cay ele bueno; el de suyu amor leal ta esta hasta para cuando.” (Sal. 136:1) Na cada versiculo principia versiculo 2 hasta 26, puede kita le con el maga palabra “cay el de suyu amor leal ta esta hasta para cuando.” Mientras ta le kita con este salmo, gendeh kita puede evita que man bilib con el manada manera que ta continua dale mira  amor leal si Jehova. El maga palabra “cay el de suyu amor leal ta esta hasta para cuando” ta asigura kanaton que gendeh ta cambia el amor del Dios para con el de suyu maga siervo. Ta puede gayot anima kanaton cay sabe kita que si Jehova gendeh pronto descanza ama con el de suyu maga siervo! Sino si principia le dale mira amor con aquellos quien ta sirvi con ele, gendeh le ta deja kanila especialmente na tiempo de dificultad. Si paquemodo kita ta beneficia: Cay sabe kita que ta esta junto kanaton si Jehova, ta dale este kanaton alegria y fuerza que necesita kita para enfrenta con el maga problema y para continua camina na camino para na vida.—Le con el Salmo 31:7.

11. Asegun na Salmo 86:5, cosa ta manda move con Jehova para perdona?

¹¹ El amor leal del Dios ta manda move con ele para perdona. Si ta mira si Jehova con el un persona quien ya culpa que ya arripinti y ya descanza hace con el de suyu maga mal trabajo, el amor leal ta manda move con Ele para perdona. Si salmista David ya habla acerca con Jehova: “Gendeh le kanaton ta castiga asegun na diaton maga pecado, y gendeh le ta cubra kanaton asegun na cosa conviene na diaton maga kamali.” (Sal. 103:8-11) Ya puede experiencia mismo si David si paquemodo de dificil si tan conciencia el un persona. Pero, ya aprende tambien le que si Jehova “preparao para perdona.” Cosa ta manda move con Jehova para perdona? El contestacion puede mira na Salmo 86:5. (Le.) Como cosa ya habla si David na rezo, ta perdona si Jehova cay lleno le de amor leal para con todo aquellos quien ta llama con ele.

12-13. Si sobra kita tan conciencia na maga kamali que ya hace kita del antes, cosa puede ayuda kanaton?

¹² Si ta culpa kita, justo lang—gane bueno—si ta sinti kita triste na cosa kita ya hace. Puede este manda move kanaton para arripinti y hace maga manera para corecta con el diaton maga kamali. Pero, el cuanto maga siervo del Dios ya sinti sobra culpable por causa na kamali que ya hace sila de antes. El diila corazon ya convinci kanila que nunca kanila puede perdona si Jehova maskin paquemodo pa sila arripinti. Si ta sinti tu igual ansina, puede contigo ayuda si entende tu que quierre gayot si Jehova dale mira amor leal con el de suyu maga siervo.

 ¹³ Si paquemodo kita ta beneficia: Maskin pa na diaton maga imperfeccion, puede siempre kita sirvi con Jehova con alegria y con limpio conciencia. Posible este cay “el sangre del disuyo Anak si Jesus ta limpia todo el diaton maga pecado.” (1 Juan 1:7) Si tan luya tu por causa na cuanto imperfeccion, acorda que bien quierre contigo perdona si Jehova si arripinti tu. Nota si cosa el coneccion del amor leal na perdon asegun con David. Ya escribi le: “Igual si paquemodo el cielo mas alto que con el tierra, ansina tambien de grande el de suyu amor leal para con aquellos quien ta tiene miedo con ele. Si paquemodo de lejos el subida del sol na abajada de este, ansina tambien de lejos le ya pone kanaton el diaton maga pecado.” (Sal. 103:11, 12) Deverasan gayot que si Jehova quierre “perdona completamente.”—Isa. 55:7.

14. Cosa ya habla si David acerca si paquemodo el amor leal del Dios ta protege kanaton?

¹⁴ El amor leal del Dios ta dale kanaton espiritual proteccion. Na de suyu rezo con Jehova, si David ya habla: “Un lugar tu onde yo puede esconde; hay guarda tu conmigo na problema. Hay hace tu palibut conmigo el maga gritada de alegria de salvacion. . . . Palibut con el quien ta confia con Jehova el De Suyu amor leal.” (Sal. 32:7, 10) Igual si paquemodo el maga pader alrededor del ciudad ta protege con el maga gente na tiempo del Biblia, palibut tambien kanaton el amor leal de Jehova que ta dale kanaton espiritual proteccion na maga peligro que puede pruba con el diaton integridad. Mas pa, el amor leal de Jehova ta manda move con ele para guia kanaton para con ele.—Jer. 31:3.

15. Na cosa manera el amor leal de Jehova igual na un refugio y un fortaleza?

¹⁵ Tiene pa otro cosa ya habla si David para dale mira si paquemodo ta protege el Dios con el de suyu maga siervo. Ya escribi le: “El Dios amo el de mio protegido refugio, el Dios quien ta dale mira amor leal conmigo.” Si David ya habla tambien acerca con Jehova: “Ele el de mio amor leal y el de mio fortaleza, el de mio protegido refugio y el de mio salvador, el de mio defensa y onde yo puede esconde.” (Sal. 59:17; 144:2) Porque ya compara si David con el amor leal de Jehova na un refugio y un fortaleza? Maskin onde man kita ta queda, basta ta sirvi kita con ele, si Jehova hay dale kanaton el todo proteccion que necesita kita para guarda con el diaton precioso relacion con ele. Ese tambien el asiguranza que puede kita incuntra na Salmo 91. El escritor de este salmo ya declara: “Hay habla yo con Jehova: ‘Etu el de mio refugio y el de mio fortaleza.’” (Sal. 91:1-3, 9, 14) Ya usa si Moises un semejante palabra acerca na refugio. (Sal. 90:1, ftn.) Mas pa, cuando cerca ya le muri, si Moises ya menciona pa un bonito detalle. Ya escribi le: “El Dios amo un refugio desde antes, el de suyu eterno brazo ta suporta contigo.” (Deut. 33:27) Cosa ta habla kanaton el frase “el de suyu eterno brazo ta suporta contigo” acerca con Jehova?

16. Cosa el dos manera que ta ayuda kanaton si Jehova? (Salmo 136:23)

¹⁶ Si Refugio diaton si Jehova, ta sinti kita protegido. Maskin pa ansina, tiene maga tiempo que tan luya kita y ta sinti kita que dol dificil ya queda enbuenamente otravez. Na ese maga situacion, cosa puede hace si Jehova para kanaton? (Le con el Salmo 136:23.) El de suyu maga brazo hay suporta kanaton, hinay-hinay kanaton hace levanta y ayuda kanaton para puede otravez para. (Sal. 28:9; 94:18) Si paquemodo kita ta beneficia: Cay sabe kita que pirmi kita puede depende na suporta del Dios, ayuda este kanaton para acorda con el dos cosas. Una, pirmi kanaton ta protege si Jehova maskin onde man kita ta queda. Ika-dos, el diaton amable Tata na cielo ta ama gayot kanaton.

17. Por causa na amor leal del Dios, cosa kita puede asigura? (Salmo 33:18-22)

¹⁷ Como cosa kita ya considera, si ta enfrenta kita probanza, puede kita asigura que si Jehova hay ayuda kanaton y dale kanaton el suporta que necesita kita para puede mentena con el diaton integridad. (2 Cor. 4:7-9) Si profeta Jeremias ya habla: “Por causa na amor leal de Jehova poreso nuay kanaton destroza, cay gendeh ta acaba el de suyu lastima.” (Lam. 3:22) Puede kita tene confianza que si Jehova hay continua kanaton dale mira amor leal cay como cosa ya asigura kanaton el salmista, “el ojos de Jehova ta vicia con aquellos quien ta tiene miedo con ele, aquellos quien ta espera con el de suyu amor leal.”—Le con el Salmo 33:18-22.

18-19. (a) Cosa kita quierre pirmi acorda? (b) Cosa kita hay considera na siguiente articulo?

¹⁸ Cosa kita quierre pirmi acorda? Antes kita ya principia sirvi con Jehova, ya ricibi ya kita con el amor que ya dale le mira con el todo maga gente. Pero como de suyu maga siervo, ta beneficia tambien kita na de suyu amor leal. Por causa na ese amor, ta protege kanaton si Jehova. Pirmi le hay esta cerca kanaton y cumpli con el de suyu proposito para kanaton. Quierre le que queda kita de suyu maga amigo y amiga hasta para cuando! (Sal. 46:1, 2, 7) Poreso maskin cosa probanza kita posible enfrenta, si Jehova hay dale kanaton el fuerza que necesita kita para puede mentena con el diaton integridad.

¹⁹ Ya puede kita mira si paquemodo si Jehova ta dale mira amor leal con el de suyu maga siervo. Ta expecta le que hay dale kita mira amor leal con uno y otro. Paquemodo kita puede hace con ese? El siguiente articulo hay considera con este importante topico.