1. Ki Zeova i anvi son bann serviter i fer?

LANMOUR fidel i vreman enportan pour Zeova. (Ose. 6:6, NWT) Zeova i anvi ki son bann serviter i santi parey. Atraver profet Mika, Zeova i ankouraz nou pour “kontan lanmour fidel.” (Mik. 6:8, not dan NWT) Me avan nou fer sa, nou bezwen konnen kisisa lanmour fidel.

2. Kisisa lanmour fidel?

² Kisisa lanmour fidel? Sa lekspresyon lanmour fidel i ganny servi apepre 230 fwa dan Labib New World Translation of the Holy Scriptures. * Si en dimoun i annan lanmour fidel, i pou sitan kontan en lot dimoun en kantite ki i pou kontinyen kontan li e reste fidel avek li. Souvandfwa sa mo i ganny servi pour montre lanmour ki Zeova i annan pour bann imen. Me i osi montre lanmour ki imen i demontre anver kanmarad. Zeova i sa pli bon legzanp lo lafason ki sa kalite lanmour i ganny demontre. Dan sa lartik, nou pou vwar ki mannyer Zeova i demontre lanmour fidel anver bann imen. Dan sa lartik ki swiv, nou pou vwar ki mannyer konman bann serviter Zeova, nou kapab swiv son legzanp par demontre lanmour fidel anver kanmarad.

3. Ki Zeova ti dir Moiz?

³ Pa bokou letan apre ki bann Izraelit ti’n kit Lezip, Zeova ti koz avek Moiz konsernan son non ek son bann kalite. Zeova ti dir: “Zeova, Zeova, en Bondye ki annan pitye ek konpasyon, i pa ankoler vitman e i annan en kantite lanmour fidel ek laverite, i demontre lanmour fidel anver plizyer  milye dimoun, i pardonn fot, lofans ek pese.” (Egz. 34:6, 7, NWT) Atraver sa bann zoli parol, Zeova ti dir Moiz en keksoz vreman spesyal konsernan Son lanmour fidel. Ki Zeova ti dir?

4-5. (a) Ki Zeova ti dir konsernan lanmour fidel? (b) Ki kestyon nou pou reponn?

⁴ Zeova pa ti zis dir ki i annan lanmour fidel, me i ti dir ki i annan “en kantite lanmour fidel.” Sa i ganny mansyonnen ankor sis fwa dan Labib. (Nom. 14:18, NWT; Nee. 9:17, NWT; Ps. 86:15, NWT; 103:8, NWT; Zoel 2:13, NWT; Zon. 4:2, NWT) Dan tou sa bann verse sa lekspresyon i refer zis avek Zeova. I pa zanmen refer avek bann imen. Dan Labib, Zeova i dir ki i annan en kantite lanmour fidel. Sa i montre nou ki lanmour fidel i enportan pour li. * I pour sa rezon ki Lerwa David ti dir: “O Zeova, ou lanmour fidel i ariv ziska lesyel, . . . Konman ou lanmour fidel i presye, O Bondye! Dan lonbraz ou lezel, bann garson zonm i pran refiz.” (Ps. 36:5, 7, NWT) Eski lanmour fidel ki Zeova i annan i sitan enportan pour nou parey i ti enportan pour David?

⁵ Pour pli byen konpran kisisa lanmour fidel, annou vwar larepons sa de kestyon swivan: Anver lekel ki Zeova i demontre lanmour fidel? Ki byenfe ki nou gannyen ler Zeova i demontre lanmour fidel anver nou?

6. Anver lekel ki Zeova i demontre lanmour fidel?

⁶ Anver lekel ki Zeova i demontre lanmour fidel? Labib i dir ki nou kapab kontan bann keksoz parey “kiltiv later,” “diven ek delwil,” “disiplin,” “konnesans,” ek “lasazes.” (2 Kron. 26:10; Prov. 12:1; 21:17; 29:3) Me lanmour fidel i ganny demontre anver zis bann imen me pa anver bann keksoz. Zeova pa demontre lanmour fidel anver tou dimoun. I demontre lanmour fidel anver bann ki annan en bon lanmitye avek li. Nou Bondye i fidel avek son bann zanmi. I annan en plan pour zot e i pa pou zanmen aret kontan zot.

7. Ki mannyer Zeova in demontre lanmour anver tou dimoun?

⁷ Zeova in demontre lanmour anver tou dimoun. Zezi ti dir Nikodenm: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.”​—Zan 3:1, 16; Mat. 5:44, 45.

8-9. (a) Akoz Zeova i demontre lanmour fidel anver son bann serviter? (b) Ki nou pou diskite aprezan?

 ⁸ Parey in ganny mansyonnen pli boner, Zeova i demontre lanmour fidel anver zis bann ki annan en bon lanmitye avek li e sa i son bann serviter. Nou kapab konpran sa, atraver sa ki Lerwa David ek profet Danyel ti dir. Par egzanp, David ti dir: “Kontinyen demontre lanmour fidel avek bann ki konn ou.” “Lanmour fidel Zeova i la pour leternite anver bann ki annan gran respe pour li.” Danyel ti dir: “O Zeova sa vre Bondye, ki demontre lanmour fidel anver bann ki kontan li e ki obei son bann komannman.” (Ps. 36:10, NWT; 103:17, NWT; Dan. 9:4, NWT) Dapre sa bann verse, Zeova i demontre lanmour fidel anver son bann serviter parski zot konn li, zot annan en gran respe pour li, zot kontan li e zot obei son bann komannman. Zeova i demontre lanmour fidel anver zis bann ki ador li dan sa fason ki li i oule.

⁹ Avan ki nou ti vin en serviter Zeova, Zeova ti kontan nou parey i kontan tou dimoun. (Ps. 104:14) Me konman son bann serviter, Zeova i osi demontre lanmour fidel anver nou. Annefe Zeova i dir son bann serviter: “Mon lanmour fidel pa pou ganny retire avek ou.” (Iza. 54:10, NWT) Lerwa David ti eksperyans sa e i ti dir ki “Zeova i demontre faver spesyal anver son bann serviter.” (Ps. 4:3, NWT) Ki sa i devret fer nou anvi fer? En Psalmis ti dir: “Tou dimoun ki saz pou obzerv sa bann keksoz e zot pou reflesi byen lo sa ki Zeova in fer pour demontre son lanmour fidel.” (Ps. 107:43, NWT) Sa bon konsey i sorti kot Zeova. Aprezan annou vwar trwa fason ki Zeova i demontre son lanmour fidel e ki byenfe nou gannyen ler i demontre son lanmour fidel anver nou.

10. Ler nou konnen ki lanmour fidel Zeova i dire pour touzour, ki mannyer sa i ed nou? (Ps. 31:7)

¹⁰ Lanmour fidel Zeova i dire pour touzour. Sa i ganny mansyonnen 26 fwa dan Psonm 136. Premye verse dan sa psonm i  dir: “Remersye Zeova parski i bon, son lanmour fidel i dire pour touzour.” (Ps. 136:1, NWT) Depi verse 2 ziska verse 26 i dir ki “lanmour fidel Zeova i dire pour touzour.” Anmezir ki nou lir sa psonm, nou enpresyonnen avek bann diferan fason ki Zeova i kontinyen demontre lanmour fidel. Vi ki sa psonm i dir plizyer fwa ki son “lanmour fidel i dire pour touzour,” sa i asir nou ki son lanmour pour son bann serviter pa zanmen sanze. I vreman ankourazan pour konnen ki Zeova pa vitman aret kontan son bann serviter. O kontrer ler i konmans demontre lanmour anver bann dimoun ki konmans servi li, i pa kit sa dimoun sirtou ler sa dimoun i dan problenm. Ki byenfe nou gannyen? Ler nou konnen ki Zeova pa pou zanmen kit nou, sa i donn nou lazwa ek lafors ki nou bezwen pour fer fas avek nou bann problenm e pour kontinyen servi Zeova.​—Lir Psonm 31:7, NWT.

11. Dapre Psonm 86:5, kwa ki motiv Zeova pour pardonnen?

¹¹ Lanmour fidel Bondye i motiv li pour pardonnen. Ler Zeova i vwar ki en dimoun in repantir e in aret fer sa ki mal, lanmour fidel i motiv Zeova pour pardonnen. Psalmis David ti dir sa konsernan Zeova: “I pa’n tret nou dapre nou bann pese, ni rann nou sa ki nou merite pour nou bann fot.” (Ps. 103:8-11, NWT) David ti deza annan en konsyans sarze alor i ti konnen ki ler en dimoun i annan en konsyans sarze sa i fer li santi li koupab e sagren. Me David ti osi aprann ki Zeova i pare pour pardonnen. Kwa ki motiv Zeova pour pardonnen? Larepons sa kestyon i trouve dan Psonm 86:5, NWT. (Lir.) Zeova i pardonnen parski i annan en kantite lanmour fidel pour bann ki demann li pardon.

12-13. Kwa ki pou ed nou si nou santi nou koupab e sagren pour bann fot ki nou’n fer dan lepase?

¹² Ler ou fer pese, i bon ki ou regrete pour sa ki ou’n fer. Sa pou ed ou pour repantir e pour aret fer sa ki mal. Serten serviter Zeova i kontinyen santi zot koupab pour bann keksoz mal ki zot in fer dan lepase. Zot ankor krwar ki Zeova pa pou  zanmen pardonn zot menm si zot in demann pardon e zot in aret fer bann keksoz mal. Eski ou santi koumsa? Ler ou konpran ki Zeova i vreman anvi demontre lanmour fidel pour son bann serviter, sa pou ed ou.

¹³ Ki byenfe nou gannyen? Menm si nou annan bann defo, nou kapab servi Zeova avek lazwa e avek en konsyans kler. Sa i posib parski “disan Zezi son Garson i pirifye nou avek tou pese.” (1 Zan 1:7) Ler ou dekouraze akoz en defo ki ou annan, rapel ki Zeova i vreman anvi pardonn ou si ou repantir. David ti montre ki mannyer lanmour fidel i relye avek pardonnen. I ti dir: “Parski zis parey lesyel i pli o ki later, osi son lanmour fidel i pli gran anver bann ki annan gran respe pour li. Parey kot soley i leve i lwen avek kot soley i kouse, pareyman i’n met tou nou bann lofans lwen avek nou.” (Ps. 103:11, 12, NWT) Nou asire ki Zeova i “pare pour pardonnen.”​—Iza. 55:7, NWT.

14. Ki mannyer David ti dekri lafason ki lanmour fidel Zeova i protez nou?

¹⁴ Lanmour fidel Bondye i protez nou spirityelman. Dan en lapriyer ki David ti fer, i ti dir: “Ou en landrwa kasyet pour mwan, ou pou protez mwan ler mon dan difikilte. Ou pou antour mwan avek kri lazwa akoz ou’n delivre mwan. . . . sa enn ki met konfyans dan Zeova i antoure avek Son lanmour fidel.” (Ps. 32:7, 10, NWT) Dan letan Labib, bann miray ki ti otour en lavil ti protez bann zabitan kont bann lennmi. Lanmour fidel Zeova i protez nou spirityelman kont tou sa ki kapab gat nou lanmitye avek Zeova. Osi lanmour fidel Zeova i motiv li pour atir nou ver li.​—Zer. 31:3, NWT.

15. Ki mannyer lanmour fidel Zeova i parey en refiz ek en fortres?

¹⁵ David ti servi en lot legzanp pour dekrir lafason ki Zeova i protez son pep. I ti dir: “Bondye i mon refiz solid, sa Bondye ki demontre lanmour fidel anver mwan.” David ti osi dir sa konsernan Zeova: “I mon lanmour fidel e mon fortres, mon refiz solid e mon sover, mon boukliye e sa Enn dan ki mon’n pran refiz.” (Ps. 59:17, NWT; 144:2, NWT) Akoz David ti konpar lanmour fidel Zeova avek en refiz ek en fortres? Nenport landrwa kot nou ete lo later, tan ki nou serviter Zeova, Zeova pou donn nou tou sa ki nou bezwen pour protez nou lanmitye avek li. Nou vwar sa menm nide dan Psonm 91. Sa psalmis i dir: “Mon pou dir Zeova: ‘Ou mon refiz e mon fortres.’” (Ps. 91:1-3, 9, 14, NWT) Moiz ti servi en legzanp en pe parey. (Ps. 90:1) Pa bokou letan avan Moiz ti mor, i ti dir en keksoz vreman rekonfortan. I ti dir: “Depi letan lontan Bondye i en refiz pour ou, i anmenn ou dan son lebra pour touzour.” (Det. 33:27, NWT) Ki sa lekspresyon “i anmenn ou dan son lebra pour touzour” i dir nou lo Zeova?

16. Ki mannyer Zeova i ed nou? (Psonm 136:23)

¹⁶ Ler Zeova i nou refiz, nou santi nou an sekirite. Me parfwa nou kapab dekouraze e nou pa kapab aret santi koumsa. Dan sa bann moman, ki Zeova pou fer pour nou? (Lir Psonm 136:23, NWT.) I pou pran nou dan son lebra, relev nou e fer nou aret santi nou dekouraze. (Ps. 28:9; 94:18, NWT) Ki byenfe nou gannyen? Ler nou konnen ki nou kapab depan lo Zeova, sa pou ed nou dan de fason. Premyerman, nenport landrwa kot nou reste, nou konnen ki Zeova pou toultan protez  nou. Dezyenmman, nou Papa ki dan lesyel i kontan nou en kantite.

17. Vi ki Bondye i annan lanmour fidel, ki nou kapab asire? (Psonm 33:18-22)

¹⁷ Parey nou’n aprann, ler nou dan problenm nou kapab asire ki Zeova pou ed nou reste fidel avek li. (2 Kor. 4:7-9) Profet Zeremi ti dir: “Si nou pa’n disparet se akoz Zeova in demontre lanmour fidel anver nou, parski i pa pou zanmen aret demontre konpasyon.” (Lam. 3:22, NWT) Nou kapab asire ki Zeova pou kontinyen demontre lanmour fidel anver nou, parski Labib i dir ki “lizye Zeova i vey lo tou bann ki annan en gran respe pour li, bann ki pe esper son lanmour fidel.”​—Lir Psonm 33:18-22, NWT.

18-19. (a) Ki nou anvi gard antet? (b) Ki nou pou vwar dan sa lot lartik?

¹⁸ Ki nou anvi gard antet? Avan ki nou ti konmans servi Zeova, i ti kontan nou parey i kontan tou dimoun. Me konman son bann serviter, Zeova i osi demontre lanmour fidel anver nou. Lanmour fidel Zeova i motiv li pour protez nou. I pou toultan ed nou pour reste pros avek li e i pou gard son bann promes ki i’n fer. I anvi ki nou reste son zanmi pour touzour! (Ps. 46:1, 2, 7) Alor nenport problenm ki nou fer fas avek, Zeova pou donn nou sa lafors ki nou bezwen pour reste fidel avek li.

¹⁹ Nou’n vwar ki mannyer Zeova i demontre lanmour fidel anver son bann serviter. Me i ekspekte ki nou demontre lanmour fidel anver kanmarad. Ki mannyer nou kapab fer sa? Nou pou vwar larepons sa kestyon dan sa lot lartik.