1. Sowtu taanga-sikin Yehofa e gi den sama di e dini en?

YEHOFA lobi soi bun-ati gi taawan (Hos. 6:6). Ai gi den sama di e dini en taanga-sikin fu du aseefi sani ya tu. Yehofa be meke polofeiti Mika sikiifi taki ‘u mu lobi du bun’ (Mika 6:8). Ma fu man du a sani ya, u mu sabi fosi san a wani taki fu soi bun-ati gi taawan.

2. San a wani taki fu soi bun-ati gi taawan?

² San a wani taki fu soi bun-ati gi taawan? A wan sani fu 230 leisi a Nyun-Grontapuvertaling e taki fu a sani ya. Ma san a sani ya wani taki? Te wan sama e soi bun-ati gi wan taawan, a sani ya e soi taki a lobi en. Winsi san e pasa noiti a o gwe fika en. Gaanse leisi te Beibel e taki fu bun-ati, da na a lobi di Gadu lobi libisama ai taki. Ma son yuu a abi fu du anga tu sama di lobi denseefi tu. A Yehofa na a moo bun sama di u sa waka neen baka, te u luku a fasi fa ai soi bun-ati gi sama. Aini a artikel ya, wi o luku fa Yehofa e soi bun-ati gi libisama. Aini a taa artikel wi o luku fa den sama di e dini Yehofa sa soi bun-ati gi taawan leti enke en.

3. Sowtu manii Yehofa taigi Mosesi taki a abi?

³ A á langa baka di den Islayelisama komoto a Egepte, neen Yehofa taigi Mosesi san a den manii fi en. A taigi en taki: ‘Yehofa, Yehofa, a wan Gadu di abi tyali-ati. A abi switifasi. En ati nai boon gaw. Ai du bun ala yuu. Ai du ala san a taki. Ai du bun gi dunsudunsu  sama. Ai gi sama paadon te den meke fowtu, te den du ogii efuso sondu’ (Ek. 34:6, 7). Den sani di Yehofa taigi Mosesi ya e leli u wan pelensipali sani fi en. San na a sani de?

4-5. (a) Sowtu manii Yehofa abi? (b) Sowtu akisi wi o luku?

⁴ Yehofa á taki en a wan Gadu di e du bun namo da a kaba, ma a taki ‘a abi bun-ati pasa peesi’. Ete sigisi tekisi de aini Beibel di e taki fu aseefi sani ya (Num. 14:18; Neh. 9:17; Ps. 86:15; 103:8; Yowe. 2:13; Yona 4:2). Nawan fu den tekisi ya e soi taki wan libisama abi bun-ati pasa peesi. A fu a bun-ati fu Yehofa ala den e taki. A sani ya e soi taki Yehofa e si a manii ya enke wan pelensipali sani. * Kownu David seefi be taki: ‘Yehofa, a bun-ati di yu e soi sama e doo te a hemel . . . a bun-ati di yu e soi sama bigi. Libisama e lon kon kibii a den mapaapi fi yu ondoo’ (Ps. 36:5, 7). Yu e si a bun-ati fu Yehofa enke wan pelensipali sani leti enke David?

⁵ Wi o poti pakisei a tu akisi di o yeepi u fu fusutan moo bun san a bun-ati fu Gadu wani taki. Sama Yehofa e soi bun-ati gi? Sowtu wini wi e fende te Yehofa e soi bun-ati gi u?

6. Sama a den sama di Yehofa e soi bun-ati gi?

⁶ Beibel taki a omen sani u sa lobi. Son sama lobi paandi, taawan lobi sani enke win anga oli. Yu abi sama tu di lobi poti taawan a pasi (2 Kolon. 26:10; Odo 12:1; 21:17; 29:3). Ma wi á poi soi bun-ati gi ala sani, a libisama namo u poi soi bun-ati gi. A ná ala sama Yehofa e soi bun-ati gi tu. Beibel taki a den sama di Yehofa e si enke en mati wawan ai soi bun-ati gi. Ai paamisi u taki noiti Yehofa o gwe fika u.

7. Fa Yehofa soi taki a lobi ala libisama?

⁷ Yehofa lobi ala libisama. Yesesi be taigi wan man den e kai Nikodeimesi taki: ‘Gadu be lobi goontapu te, neen a sende a wan kodo Manpikin fi en kon dede gi u, fu meke den sama di e biibi en fende teego libi.’​—Yoh. 3:1, 16; Mat. 5:44, 45.

8-9. (a) Saide Yehofa e soi bun-ati gi den sama di e dini en anga den hii ati? (b) San wi o luku aini den paragraaf di e kon?

⁸ Enke fa u be luku kaba, da a den  sama di e dini Yehofa, efuso den mati fi en wawan ai soi bun-ati gi. Wi e si a sani ya kiin te u luku san Kownu David anga polofeiti Daniyeli be taki. David be taki: ‘Tan soi bun-ati gi den sama di sabi i. Na ala yuu Yehofa e soi bun-ati gi den sama di e lesipeki en.’ Daniyeli be taki: ‘Yehofa, a yu na a tuu Gadu. A yu na a moo gaan Gadu, neen meke sama e lesipeki i. Ala yuu yu e du san i paamisi. Yu e soi bun-ati gi ala den sama di e holi den weiti fi i’ (Ps. 36:10; 103:17; Dan. 9:4). Enke fa den tekisi ya e soi, da Yehofa e soi bun-ati gi den sama di sabi en, den sama di e lesipeki en, anga den sama di e holi den weiti fi en. A den sama di e dini en enke fa a wani wawan ai soi bun-ati gi.

⁹ Fosi u be bigin dini Yehofa, a be soi kaba taki a lobi u, leti enke fa a lobi ala libisama (Ps. 104:14). Ma di i bigin dini en, i si fa ai soi bun-ati gi i. Yehofa e paamisi den sama di e dini en taki ‘a o tan soi bun-ati gi den’, winsi san e pasa (Yes. 54:10). Kownu David seefi be taki: ‘Yehofa o hei den sama di nai gwe fika en’ (Ps. 4:3). San mi anga i mu du? A psalm sikiifiman be taki: ‘A sama di koni o si den sani ya, a o poti pakisei na a fasi fa Yehofa e soi bun-ati gi sama’ (Ps. 107:43). A Yehofa na a sama di e gi u taanga-sikin fu du a sani ya, neen meke wi o luku dii fasi fa Yehofa soi bun-ati gi u, anga sowtu wini wi e fende fu a bun-ati fu Yehofa.

10. Sowtu wini wi e fende fu di Yehofa e soi bun-ati gi u? (Psalm 31:7)

¹⁰ A bun-ati fu Yehofa e tan fu teego. A 26 leisi Psalm 136 e soi u taki a bun-ati fu Gadu nai kaba noiti. A fosi vers fu a kapitel ya e taki: ‘Gi Yehofa daa, bika a bun. A bun-ati fi en a fu teego’ (Ps. 136:1). Aini vers 2 te anga 26, a omen leisi wi e leisi taki ‘a bun-ati fu Yehofa e tan fu teego’. Den vers fu a Psalm ya e soi u den somen fasi fa Yehofa  e soi bun-ati gi u. Den e soi u tu taki na ala yuu Yehofa e du a sani ya. Den tekisi ya e gi u taanga-sikin, bika den e yeepi u fu biibi taki noiti Yehofa o gwe fika den sama di e dini en anga den hii ati. Ala yuu ai holibaka gi den sama ya, moomoo te den fuka. Sowtu wini wi e fende fu a sani ya? A sabi di u sabi taki Yehofa ná o gwe fika u noiti, e meke u piisii. Ai gi wi a kaakiti di wi abi fanowdu tu fu holidoo te tesi e miti u.​—Leisi Psalm 31:7.

11. Enke fa Psalm 86:5 e soi, da saide Yehofa e gi u paadon?

¹¹ A di Yehofa abi bun-ati meke ai gi u paadon. Te Yehofa si taki den sondu di wan sama du e hati en tuutuu, anga te a sama de e meke moiti fu kengi, da ai gi en paadon. A psalm sikiifiman David be taki: ‘A á gi wi ala a sitaafu di u mu fende fu den sondu fu u. A nai meke u pai fu ala den fowtu di u meke’ (Ps. 103:8-11). Fu di David seefi be du wan gaan sondu, meke a be sabi taki te i kosensi e fon i, a wan hebi sani fu tyai. Ma a sani ya be soi en tu taki Yehofa a wan Gadu di ‘de kabakaba fu gi u paadon’. Saide Yehofa e gi u paadon? A piki fu a akisi ya de a Psalm 86:5. (Leisi en.) Di David be e begi Yehofa, a be taki Yehofa de kabakaba fu soi bun-ati gi ala den sama di e akisi en paadon.

12-13. San o yeepi u te u kosensi e fon u naamo fu wan sondu di u be du?

¹² Te i du wan sondu, a wan bun sani te i kosensi e fon i, bika na a sani de o yeepi i fi yu á du en moo taa leisi. Ma son wan fu den sama di e dini Yehofa kosensi e fon den naamo fu wan sani di Yehofa gi den paadon fi en kaba. Den ati e koli den taki noiti Yehofa o poi gi den paadon fu a sani di den du, winsi fa den soi taki ai hati den tuutuu. Efu a so yu e fii, da a fusutan di yu o fusutan taki Yehofa de kabakaba fu soi bun-ati gi i, o yeepi i fi i kosensi á fon i moo.

¹³ Sowtu wini wi e fende fu a sani ya?  Winsi fa wi a sondu sama toku u sa dini Yehofa anga wan kiin kosensi, bika ‘a buulu fi en Manpikin e kiin ala den sondu fu u’ (1 Yoh. 1:7). Te yu e fii booko-saka fu wan fowtu di i meke, da gaantangi holi a pakisei taki Yehofa de kabakaba fu gi i paadon. David be taki: ‘Leti enke fa wi á poi maiki fa hemel hei moo goontapu, a so wi á poi maiki a bun-ati di Gadu e soi den sama di e dini en. Leti enke fa a peesi pe a san e opo de faawe fu pe a san e dongo, a so a poti den sondu fu u faawe fu u’ (Ps. 103:11, 12). Den tekisi ya e soi u kiin taki Yehofa de kabakaba fu gi u paadon winsi u du wan gaan sondu.​—Yes. 55:7.

14. Fa David be soi taki a bun-ati fu Gadu e kibii u?

¹⁴ A bun-ati fu Gadu e yeepi u fu wi anga en á poli. Di David be e begi Yehofa a be taki: ‘A yu a mi kibiipeesi. Yu o kibii mi te mi fuka. Yu e meke mi piisii ala yuu fu di i fii mi. Yehofa e soi bun-ati gi a sama di e fitoow en’ (Ps. 32:7, 10). Leti enke fa den sikotu fu den foto fu fositen be e kibii den sama di be e tan aini a foto, a so a bun-ati fu Yehofa e kibii u. Ai yeepi u fu sani á poli wi anga Yehofa. A bun-ati fu Yehofa e yeepi u tu fu toon wan moo bun mati fi en.​—Yel. 31:3.

15. Saide u sa taki a bun-ati fu Yehofa de enke wan kibiipeesi gi u?

¹⁵ David be taki wantu sani di e soi fa Yehofa e kibii a foluku fi en. A be taki: ‘A Gadu a mi kibiipeesi, a Gadu di e soi bun-ati gi mi.’ A be taki tu: ‘Ai soi bun-ati gi mi. Neen mi e go kibii. Na ape mi e lon go suku yeepi. Ai yeepi mi te mi de a nowtu. Neen a mi skelt, neen mi e go kibii’ (Ps. 59:17; 144:2). Saide David be e maiki a bun-ati fu Gadu anga wan kibiipeesi? A ná abi toobi pe fu goontapu wan sama e tan, solanga ai dini Yehofa, a o kibii en. A o yeepi en fi en anga en á poli noiti. Na aseefi sani ya sikiifi aini Psalm 91 tu. A sama di sikiifi a Psalm ya be taki: ‘Mi o taigi Yehofa taki: ‘A yu mi e lon go kibii, mi Gadu di mi e fitoow’ (Ps. 91:1-3, 9, 14). Mosesi be taki sowan seefi sani tu (Ps. 90:1). Fosi a dede a be taki: ‘Na a tide Gadu de enke wan kibiipeesi, den ana fi en o tyai i fu teego’ (Deit. 33:27). San den wowtu ‘den ana fi en o tyai i fu teego’ e leli u fu Yehofa?

16. Fa Yehofa e yeepi u? (Psalm 136:23)

¹⁶ Te wi e biibi taki Yehofa o kibii u, u ná o buuya. Ma toku wi e fii booko-saka son yuu. San Yehofa e du gi u te wi e fii so? (Leisi Psalm 136:23.) A paamisi u taki a o yeepi u fu kisi useefi baka (Ps. 28:9; 94:18). Sowtu wini wi e fende fu a sani ya? A sabi di u sabi taki Yehofa o holibaka gi wi ala yuu, e yeepi u fu holi a pakisei taki winsi pe fu goontapu u de, Yehofa e tan u kibiipeesi. Ai yeepi u tu fu wi á feegete taki u Dda di de a hemel lobi u tuutuu.

17. San u sa biibi taki Yehofa o du ala yuu? (Psalm 33:18-22)

¹⁷ Enke fa u luku aini a artikel ya, da te tesi e miti wi u sa biibi taki Yehofa o yeepi u fu wi á gwe fika en (2 Kor. 4:7-9). Polofeiti Yelemiya be taki: ‘Na a bun-ati fu Yehofa meke u de a libi ete.  Noiti wan ten o kon pe a ná o soi tyali-ati gi u’ (Tyali 3:22). U sa biibi taki Yehofa o soi bun-ati gi wi ala yuu, bika Beibel e taki: ‘Yehofa e poti pakisei a den sama di e lesipeki en. Ai poti pakisei a den sama di e wakiti fu a soi den bun-ati.’​—Leisi Psalm 33:18-22.

18-19. (a) San u mu holi a pakisei? (b) San wi o luku aini a taa artikel?

¹⁸ San u mu holi a pakisei? Fosi u bigin dini Yehofa, a be soi u kaba taki a lobi u leti enke fa a lobi ala taa sama. Ma di u bigin dini en, u si fa ai soi bun-ati gi u. Yehofa e kibii wi ala yuu. A de leti enke a holi wi aini en ana. U sa biibi taki a o du ala den sani di a paamisi u. A wani yeepi u tu fu wi anga en tan mati fu teego (Ps. 46:1, 2, 7). Neen meke winsi sowtu tesi e miti i, i sa biibi taki Yehofa o gi yu a kaakiti di yu abi fanowdu fu holidoo.

¹⁹ U si fa Yehofa e soi bun-ati gi den sama di e dini en. Ma Yehofa wani ala sama di e dini en soi bun-ati gi taawan tu. Fa u sa du a sani ya? Wi o taki fu a toli ya aini a taa artikel.