1. Ka Jéova vlé ?

ON LANMOU ki fidèl sé on biten ki enpòwtan toubònman pou Jéova (Ozé 6:6). É Jéova vlé kè sèwvitè a-y vwè sa menmjan ki-y. Jéova vlé kè nou ni on lanmou ki fidèl é i vlé kè nou ni kalité-lasa. Sé pousa, i sèvi èvè pwofèt Miché pou ankourajé-nou fè sa (Mich. 6:8, nòt). Men pou nou fè sa, fò nou sav ka on lanmou ki fidèl yé ojis.

2. On lanmou ki fidèl, ka sa yé ?

² On lanmou ki fidèl, ka sa yé ? Adan Labib Traduction du monde nouveau nou ka touvé èksprésyon-la « lanmou ki fidèl » 230 fwa apépré. Men ka sa vlé di ojis ? Lè on moun ni on lanmou ki fidèl pou ondòt moun, i tèlman enmé moun-lasa kè i ka kontinyé enmé-y, i ka kontinyé rété fidèl a-y é i ka kontinyé soutyenn-li. Yo ka sèvi èvè sé mo-lasa pou palé dè jan Jéova enmé lézimen men yo pé sèvi èvè yo osi pou palé dè jan on moun enmé ondòt moun. É adan domenn-lasa pa ni pi bèl ègzanp ki Jéova. Adan awtik-lasa, nou ké vwè kijan Jéova ka montré kè i ni on lanmou ki fidèl. É adan awtik-la ki ka vin la, nou ké vwè kijan sèwvitè a Bondyé pé imité Jéova é montré kè yo ni on lanmou ki fidèl osi.

3. Lè Jéova palé ba Moyiz, Moyiz aprann on biten asi Jéova. Ki biten ésa ?

³ Tibwen tan apré sé Izraélit-la sòti an Éjipt, Jéova fè Moyiz konnèt non a-y é ki kalité i ni. Mi sa Jéova di-y : « Jéova, Jéova, on Bondyé ki ka aji èvè pityé é ki ka pran penn a moun, ki pa ka fè kòlè vit, ki plen lanmou, on lanmou ki fidèl é ki toujou ka di lavérité ; i ka aji èvè plizyè milyé moun èvè on lanmou ki fidèl, i ka padonné lè on moun fè érè, lè on moun pa rèspèkté lwa a-y é lè on moun péché » (Ègz. 34:6, 7). Èvè sé bèl ti pawòl-lasa, Jéova di Moyiz on biten ki  vréman èspésyal anrapò èvè lanmou a-y ki fidèl. Ki biten ésa ?

4-5. a) Kijan Jéova ka palé dè-y menm ? b) A ki kèsyon nou ké réponn adan awtik-lasa ?

⁴ Jéova di Moyiz kè i « plen lanmou, on lanmou ki fidèl ». Nou ka touvé èksprésyon-lasa plis ki 6 fwa adan Labib (Nonb. 14:18 ; Néém. 9:17 ; Sòm 86:15 ; 103:8 ; Joèl 2:13 ; Jonas 4:2). Chakfwa yo ka sèvi èvè èksprésyon-lasa, sé pou palé dè Jéova, men yo pa’a jen ka sèvi èvè-y lè yo ka palé dè moun. Lè Jéova ka palé dè-y menm, souvantfwa, i ka sèvi èvè èksprésyon-lasa. I ka fè sa pou édé-nou vwè kè lanmou-lasa enpòwtan pou-y toubònman *. Sé pousa, mi sa wa David di : « O Jéova, lanmou a-w ki fidèl ka rivé jis an syèl-la ; [...] O Bondyé, lanmou a-w ki fidèl ni onlo valè ! Sé anba lonbraj a zèl a-w moun ka kouri kaché » (Sòm 36:5, 7). Ès lanmou a Bondyé ki fidèl ni onlo valè pou nou menmjan i té ni valè pou David ?

⁵ Pou nou byen konprann ka ki on lanmou ki fidèl, an-nou réponn a 2 kèsyon : Èvè kimoun Jéova ka aji épi on lanmou ki fidèl ? É kijan nou pé bénéfisyé dè lanmou-lasa ?

6. Èvè kimoun Jéova ka aji épi on lanmou ki fidèl ?

⁶ Èvè kimoun Jéova ka aji épi on lanmou ki fidèl ? Adan Labib, yo ka di kè on moun pé enmé onlo biten. Pa ègzanp, i pé enmé lagrikilti, i pé enmé diven é luil, i pé enmé yo korijé-y, i pé enmé aprann dé biten é i pé enmé tousa ki anrapò èvè sajès (2 Kron. 26:10 ; Pwov. 12:1 ; 21:17 ; 29:3). Men yo pa’a jen ka di kè on moun ni on lanmou ki fidèl pou on biten. Lèwvwè yo ka palé dè kalité-lasa sé toujou anrapò èvè on moun oben plizyè moun. Men Jéova pa ka aji èvè on lanmou ki fidèl épi toutmoun. I ka aji konsa enki èvè moun ki bon bon zanmi èvè-y. Bondyé an nou toujou fidèl a zanmi a-y. I ni on pwojé èstraòwdinè pou yo é i pé’é jen lagé-yo.

7. Kijan Jéova montré kè i enmé toutmoun asi latè ?

⁷ Jéova montré kè i enmé toutmoun asi latè. Mi sa Jézi di on misyé non a-y sé Nikodèm : « Pas tèlman Bondyé té enmé lèmond [kivédi toutmoun asi latè], i bay sèl Gason a-y, pou tout moun ki ka montré yo ni lafwa adan-y pa détwi men ni lavi étèwnèl » (Jan 3:1, 16 ; Mat. 5:44, 45).

8-9. a) Poukwa Jéova ka aji èvè on lanmou ki fidèl épi sèwvitè a-y ? b) Ka nou ké ègzaminé aprésa ?

 ⁸ Kon nou vwè-y pi ho, Jéova ka aji èvè on lanmou ki fidèl enki èvè moun ki bon bon zanmi èvè-y. É dayè, sé sa wa David é pwofèt Danyèl ni lokazyon di. Pa ègzanp, mi sa David di : « Kontinyé aji èvè on lanmou ki fidèl épi moun ki konnèt-vou ». Mi sa i di osi : « Men Jéova ni on lanmou ki fidèl pou moun ki ka krenn-li é lanmou-lasa ka diré pou touttan. » É mi sa Danyèl ni lokazyon di : « O Jéova vré Dyé la, [...] ki ka aji èvè on lanmou fidèl épi moun ki enmé-y é ki ka suiv komandman a-y » (Sòm 36:10 ; 103:17 ; Dan. 9:4). Dapré sa Jéova fè David é Danyèl maké, Jéova ka aji èvè on lanmou ki fidèl èvè sèwvitè a-y pas yo konnèt-li, pas yo ka krenn-li, pas yo enmé-y é pas yo ka obéyi a komandman a-y. Jéova ka aji èvè on lanmou ki fidèl yenki èvè moun ki ka adoré-y konm i fo.

⁹ Avan nou té koumansé sèvi Jéova, Jéova té enmé-nou kon i enmé toutmoun (Sòm 104:14). Men alèla, konm nou ka fè volonté a-y, Jéova ka aji èvè on lanmou ki fidèl épi nou. An réyalité, mi garanti-lasa Jéova ka ba chak sèwvitè a-y : « An pé’é jen arété aji èvè on lanmou ki fidèl épi-w » (Iz. 54:10). Asiré sèten, kon Jéova fè-y èvè David, i ké « aji on mannyè èspésyal èvè moun ki fidèl épi-y » (Sòm 4:3). Lè Jéova ka aji konsa èvè nou, ka sa ka ban-nou anvi fè ? Mi sa moun-la ki maké Sòm 107 la ka di : « On moun ki saj ké tchenn kont dè sé biten-lasa é i ké pran tan réfléchi asi jan Jéova ka aji èvè on lanmou ki fidèl » (Sòm 107:43). Sé on bon ti konsèy Jéova ka ban-nou la. Alò an-nou vwè 3 mannyè Jéova ka aji épi on lanmou ki fidèl èvè nou é an-nou vwè ki bon biten sa ka pòté ban nou.

10. Lèfètkè nou sav kè lanmou fidèl a Jéova ka diré pou touttan, kijan sa ka édé-nou ? (Sòm 31:7).

¹⁰ Lanmou fidèl a Bondyé ka diré pou touttan. Nou ka touvé lidé-lasa 26 fwa adan Sòm 136 la. Adan prèmyé vèwsé-la, mi sa nou ka li : « Di Jéova mèsi, pas i bon — pas lanmou fidèl la i ni la étèwnèl » (Sòm 136:1). Adan sé vèwsé 2 a 26 la, mi sa nou ka li osi « pas lanmou fidèl la i ni la étèwnèl ».  É lè nou ka li rèstan a Sòm-la nou èstèbèkwè lè nou ka vwè kijan Jéova ka aji èvè on lanmou ki fidèl èvè nou é kè i ka fè sa akontinyé. Lè yo ka di « pas lanmou fidèl la i ni la étèwnèl » sa ka montré kè lanmou a Bondyé pou pèp a-y pa ka chanjé. Lèfètkè nou sav kè Jéova pa’a lagé pèp a-y konsa, sa ka ankourajé-nou. Lè Jéova ka koumansé aji épi lanmou èvè on moun ki ka sèvi-y, i pa’a lagé moun-lasa siwtou siwvwè moun-lasa an difikilté. Kijan nou pé bénéfisyé dè lanmou-lasa ? Lèfètkè nou sav kè Jéova ka rété èvè nou, sa ka ban-nou tchè-kontan é sa ka ban-nou fòs-la nou bizwen la pou nou pé sa andiré difikilté. Anplisdisa, sa ka édé-nou kontinyé maché asi chimen a lavi (li Sòm 31:7).

11. Dapré Sòm 86:5, ka ki ka pousé Jéova padonné-nou ?

¹¹ Lanmou fidèl a Jéova ka pousé-y padonné-nou. Lè Jéova ka vwè kè on moun ki fè on péché ka rèpanti-y é kè i ka arété fè sé mové biten-la i té ka fè la, lanmou fidèl a Jéova ka pousé-y padonné moun-lasa. Mi sa David maké asi Jéova : « I pa ka aji èvè nou sèlon péché nou fè é i pa ka ban-nou sa nou mérité pou fòt an nou » (Sòm 103:8-11). David té sav byen kè lè konsyans a-w ka bat-vou ou ka santi-w koupab é sa ka fè-w lapenn. Men i aprann osi kè Jéova « paré a padonné ». Ka ki ka pousé Jéova padonné-nou ? Nou ka touvé répons-la an Sòm 86:5 (li-y). Wi, kon David di adan on priyè, lanmou fidèl a Jéova ka pousé-y padonné moun ki ka mandé-y padon.

12-13. Si nou ka santi-nou koupab parapòt a on érè nou fè avan, ka ki ké édé-nou ?

¹² Lèwvwè nou ka fè on péché é kè nou ka règrété sa nou fè, sa toutafè nòwmal. É nou pé menm di kè sé on bon biten piskè sa ka édé-nou mandé Jéova padon é sa ka édé-nou chanjé. Men ni sèwten moun, magré yo ja mandé Jéova padon, yo ka kontinyé santi-yo koupab pou érè yo fè avan. Pou yo, Jéova pé’é jen padonné-yo menmsi yo ja mandé-y padon é menmsi yo ja arété fè mové biten. Si sé sa ou ka rèsanti, sa ki pé édé-w sé si ou ka konprann byen kè Jéova ni on lanmou ki fidèl é kè i anvi montré-w lanmou-lasa.

¹³ Kijan nou pé bénéfisyé dè lanmou-lasa ? Menmsi nou enpawfè nou pé ni  tchè-kontan pas nou pé sèvi Jéova èvè on konsyans ki nèt. Nou pé fè sa pas « san a Jézi, Gason a-y, ka lavé-nou dè tout péché » (1 Jan 1:7). Lè ou dékourajé, fò ou sonjé kè si ou rèpanti-w, Jéova ké vréman anvi padonné-w. An-nou vwè kijan David montré kè lèwvwè on moun ni on lanmou ki fidèl i paré a padonné lézòt. Mi sa i maké : « Menmjan pa ni mwayen miziré distans ki ni ant syèl-la é tè-la, sé menmjan osi pa ni mwayen miziré kantité lanmou fidèl Jéova ni pou moun ki ka krenn-li. Menmjan koté-la solèy [-la] ka lévé la lwen koté-la i ka kouché la, sé menmjan-la i ka mété péché an nou lwen an nou » (Sòm 103:11, 12). Wi, Jéova ka ‘padonné anplen’ é i toujou paré pou fè sa (Iz. 55:7).

14. David ni lokazyon palé dè lanmou fidèl a Bondyé ki ka pwotéjé-nou. Ka i di asi sa ?

¹⁴ Lanmou fidèl a Jéova ka pwotéjé-nou adan domenn èspirityèl. David té ka priyé Jéova é mi sa i ni lokazyon di-y : « Ou sé on koté an pé kouri kaché ; ou ké pwotéjé-mwen lèwvwè an ké an difikilté. Ou ké lantouré-mwen èvè moun ka hélé tèlman yo kontan ou sové-nou. [...] On moun ki ka mèt konfyans a-y an Jéova lantouré èvè lanmou a-y ki fidèl » (Sòm 32:7, 10). An tan a Labib, on masonn ki té ka lantouré on vil té ka pwotéjé sé moun-la ki té ka viv an vil-la kont sé lènmi-la. Menmjan-la osi, lanmou fidèl a Jéova kon masonn ki ka pwotéjé-nou dè tousa ki té’é pé anpéché-nou rété bon bon zanmi èvè Jéova. Anplisdisa, konm Jéova ni on lanmou ki fidèl, i anvi fè-nou vin owa a-y (Jér. 31:3).

15. Poukwa nou pé konparé lanmou fidèl a Jéova èvè on koté nou pé kouri kaché é èvè on abri ?

¹⁵ David sèvi èvè ondòt ègzanp pou montré kijan Jéova ka pwotéjé pèp a-y. Mi sa i maké : « Bondyé sé on koté an pé kouri kaché pou mwen ansékirité, Bondyé-la ki ka montré lanmou fidèl i ni pou mwen ». Mi sa i di ankò anrapò èvè Jéova : « I sé sila ki montré-mwen on lanmou ki fidèl é i sé abri an mwen, i sé on koté an pé kouri kaché pou mwen ansékirité é i sé sila ki ka sové-mwen la, i sé boukliyé an mwen é sila ki ka pwotéjé-mwen la » (Sòm 59:17 ; 144:2). Poukwa David konparé lanmou fidèl a Jéova èvè on koté ou pé kouri kaché é èvè on abri ? Kèlkèswa koté-la nou ka viv la asi latè, dépi nou ka sèvi Jéova i ké ban-nou tousa nou bizwen pou pwotéjé-nou kont biten ki pé anpéché-nou rété bon bon zanmi èvè-y. Nou ka touvé lidé-lasa osi adan Sòm 91 la. Mi sa moun-la ki maké sòm-lasa ka di : « An vlé di Jéova : “Ou sé on koté an pé kouri kaché é ou sé abri an mwen” » (Sòm 91:1-3, 9, 14). Moyiz sèvi èvè on mo ki ka fè-nou sonjé on koté nou pé kouri kaché (Sòm 90:1, nòt). Tibwen tan avan i mò, i bay on ti détay ki entérésan. Mi sa i maké : « Bondyé sé on koté ou pé kouri kaché dépi nanni-nannan, i ka soutyenn-nou èvè bra a-y pou touttan » (Dét. 33:27). Adan vèwsé-lasa, lè yo ka di-nou « i ka soutyenn-nou èvè bra a-y pou touttan », ka sa ka aprann-nou asi Jéova ?

16. Kijan Jéova ka édé-nou ? (Sòm 136:23).

¹⁶ Lè nou sèten kè Jéova ké pwotéjé-nou, nou ka santi-nou ansékirité. Men dépawfwa, nou pé ka santi-nou dékourajé é nou pa ka vwè ka pou nou fè pou nou pé woupran doubout an nou. A moman-lasa, ka Jéova ka fè pou édé-nou ? (li Sòm 136:23). I ka soutyenn-nou èvè 2 bra a-y é piti-a-piti i ka lévé-nou jistan nou woupran doubout an nou (Sòm 28:9 ; 94:18). Kijan nou pé bénéfisyé dè lanmou-lasa ? Nou sav kè nou pé toujou fè fon asi Bondyé é sa ka édé-nou dè 2 fason diféran. Prèmyèwman,  nou sav kè kèlkèswa koté-la nou ka viv la Jéova ké toujou pwotéjé-nou. Dézyèmman, Pap’an-nou ki an syèl-la é ki enmé-nou onlo ké toujou pran swen an nou.

17. Konm Jéova ni on lanmou ki fidèl pou nou, dè kibiten nou pé sèten ? (Sòm 33:18-22).

¹⁷ Kon nou vwè-y, chakfwa nou ka jwenn difikilté, nou pé sèten kè Jéova ké toujou édé-nou pou nou pé sa rété bon bon zanmi èvè-y (2 Kor. 4:7-9). Mi sa pwofèt Jérémi di : « Sé pas Jéova ni on lanmou ki fidèl pou nou kè nou pa disparèt, pas mizérikòd a-y pa ka bout » (Lam. 3:22). Nou pé sèten kè Jéova ké kontinyé aji èvè on lanmou ki fidèl épi nou pas mi sa Labib ka di : « Zyé a Jéova asi moun ki ka krenn-li pou pwotéjé-yo, asi moun ki ka konté asi lanmou fidèl la i ni la » (li Sòm 33:18-22).

18-19. a) Ka pou nou mèt fon an tèt an nou ? b) Ka nou ké vwè adan awtik-la ki ka vin la ?

¹⁸ Ka pou nou mèt fon an tèt an nou ? Avan nou té koumansé sèvi Jéova, Jéova té enmé-nou kon i enmé toutmoun, men dépi nou koumansé sèvi-y, i ni on lanmou ki fidèl pou nou. Lanmou-lasa ka pousé-y pran-nou an 2 bra a-y pou pwotéjé-nou. I vlé kontinyé rété owa an nou é i vlé kontinyé tchenn sé pwomès-la i fè-nou la. I vlé rété bon bon zanmi èvè nou pou touttan ! (Sòm 46: 1, 2, 7). Sé pousa, kèlkèswa éprèv-la nou ka jwenn la, Jéova ké ban-nou fòs-la nou bizwen la pou nou rété fidèl a-y.

¹⁹ Nou vwè kè Jéova ka aji èvè on lanmou ki fidèl épi sèwvitè a-y. Men i ka atann osi kè nou aji èvè on lanmou ki fidèl yonn èvè lòt. Kijan nou pé fè sa ? Sé sa nou ké vwè adan awtik-la ki ka vin la.