1. Jehova amkam kitem korunk urba dita?

VISVAXI mog dakhovop Jehovak khub gorjechem oxem dista. (Hos. 6:6) Ani tachea sevokank pasun toxench dislolem Jehovak zai. Hea pasot, Mika provadia udexim ‘visvaxi mog dakhounk’ Jehova amkam urba dita. (Mik. 6:8 ftn, NW) Punn poilim, visvaxi mog mhunnche kitem tem polloum-ia.

2. Eka munxak visvaxi mog asta tednam to kitem korta?

² New World Translation of the Holy Scriptures hea Bible-ant, “visvaxi mog” hem utor sumar 230 pavtti melltta. Tor visvaxi mog mhunnttlear kitem? Eka munxak konnacho-i visvaxi mog asa zalear to tacho khub mog korit ravta ani taka sodanch visvaxi ravta. Ani hea vixim, amkam Jehova Devachem ek ekdom borem udharonn asa. Tor hea lekhant, Jehova munxank visvaxi mog koso dakhoita tem ami polloitolim. Ani fuddlea lekhant, Jehovachi dekh gheun tachea sevokamnim eka-mekak visvaxi mog koso dakhounk zata tem ami xiktolim.

3. Jehovan Moizesak aplea vixim kitem sanglem?

³ Israelitkar Ejipta thaun bhair aile tednam Jehovan Moizesak aplem nanv ani gunnam vixim oxem sanglem: “Sorvespor, Sorvespor, doiall-movall Kallzacho Dev! To rokddoch ragar zaina, punn bhov dulob ani visvaxi; [punn bhorpur visvaxi mogan ani sotan bhorlolo, NW] hozarank To Aplem bholeponn dakhoita;  chuki, oprad ani patok bhogxita.” (Sutt. 34:6, 7). Tor hea utramnim, Jehovan aplea visvaxi moga vixim Moizesak kitem tori khas sanglem. Tem kitem?

4-5. (a) Apnnam vixim Jehovan kitem sanglem? (b) Ami khoinchea prosnanche zobab polloitolim?

⁴ Aplea vixim uloitana, apnnak fokot visvaxi mog asa oxench Jehova sangona, punn apunn “visvaxi mogan bhorlolo” mhunn tannem sanglolem asa. Jehova visvaxi mogan bhorlolo, ani taka visvaxi mog asa oxem amkam Bible-ant zaite pavtti vachunk melltta, zoim tim utram munxank nhoi, punn Jehova Devakuch lagu zatat. (Sutt. 15:13; Ne. 1:5; Hos. 2:21; Jo. 2:13; Jon. 4:2) Tor, apleak visvaxi mog asa mhunn Jehova svota zaun sangta, karonn ho gunn khub mhotvacho mhunn Jehova lekhta. * Heach pasot, Raza David oso mhunnonk pavlo: “Tujem bholeponn [visvaxi mog, NW] Sorvespora, mollba itlem unch, . . . Kitlo omolik, Deva, mog tuzo! Dekhun monʼxanchim bhurgim Tujea pakhotteam khal asor gheunk ietat.” (St. 36:5, 7) Tor Jehova Dev visvaxi mog dakhoita mhunn Davida bhaxen tumi-i taka upkari asat kai?

⁵ Visvaxi mog mhunnttlear kitem, tem anik bore toren somzonk ami don prosnanche zobab polloum-ia: Jehova konnank visvaxi mog dakhoita? Ani Jehovan visvaxi mog dakhoilolean amkam koso faido zata?

6. Jehova konnank visvaxi mog dakhoita?

⁶ Jehova konnank visvaxi mog dakhoita? Ami zaitea vostuncho, zoxem “xetkamoticho,” “movzancho,” “xisticho,” “zannvikaiecho,” mog korunk xoktat mhunn Bible sangta. (2 It. 26:10; Mho. 12:1; 21:17) Punn visvaxi mog ami fokot munxank dakhounk xoktat. Hacho orth, Jehova soglea munxank visvaxi mog dakhoita kai? Na. Jea konnank tachea sangata ghott ixttagot asa tankanch to visvaxi mog dakhoita. Mhunnche, to tankam visvaxi ravta, tancho sodanch mog korta, ani tankam tannem ek boro fuddar dovorla.

7. Jehovan akʼkhea munxakullak mog koso dakhoila?

⁷ Jehovan akʼkhea munxakullak mog dakhoila. Ani hem amkam Jezun Nicodemus nanvachea munxak sanglolea utrantlean kollon ieta. Jezun taka mhunnttlem: “Tacher bhavarth tthevta tea dor-eka monʼxacho nas zaina zaunk punn taka sasnnik jivit mellche khatir, Devan Aplea ekleach Putak dilo; itlo Tannem sonvsaracho [munxakullacho] mog kelo!”​—Juanv 3:1, 16; Mt. 5:44, 45.

8-9. (a) Jehova aplea sevokank visvaxi mog kiteak dakhoita? (b) Atam ami kitem polloitolim?

⁸ Ami peregraf 6-ant polloilem toxem, aplea  sangata ghott ixttagot aslolea aplea sevokankuch Jehova visvaxi mog dakhoita. Oxem ami kiteak mhunnonk zata? Ami Raza David ani provadi Danielachea utrancher dhean dium-ia. Udharonnak, Davidan mhunnttlem: ‘Tuka vollkhonk pavleant tankam Tuzo mog vo visvaxi mog sodanch dakhoi.’ “Aplea bhirantin choltat tankam Jehova sasnak visvaxi mog dakhoita.” Toxench, Danielan mhunnttlem: “Sorvespora, . . . Tuzo mog kortoleank ani Tujeo adnia palltoleank Tum visvaxi mog dakhoitai!” (St. 36:10; 103:17, NW; Dan. 9:4) Hantuntlean, Jehovache sevok taka vollkhotat, dev-bhirantin choltat, tacho mog kortat, ani tacheo adnia pallttat dekhun Jehova tankam visvaxi mog dakhoita mhunn amkam kollon ieta. Tor fokot apleak manvota tea toren apli bhokti kortoleank Jehova visvaxi mog dakhoita.

⁹ Ami Jehovache sevok zaunchea poilim, to jea toren akʼkhea munxakullak mog dakhoita, teach toren to amcho mog kortalo. (St. 104:14) Punn ami tache sevok zalea uprant, to amkam visvaxi mog pasun dakhounk laglo. Ani tannem amkam aplea utrant hi khatri dilea: “Tuje thaun Mhozo visvaxi mog kodinch koddsorun vecho na.” (Iz. 54:10) Hem David pasun vollkhonk pavlo. Tea pasot tannem mhunnttlem, “Apleak visvaxi aslolea sangata Jehova eke khas toren vagta.” (St. 4:3, NW) Tor Jehova amchea sangata itlea khas toren vagta dekhun ami kitem korunk fuddem soronk zai? Stotrkaran sanglem: ‘Konn tori xanno aslear, to heo ghoddnnio nialltolo ani Sorvesporacho maiemog vo visvaxi mogachim kamam vollkhunk pavtolo.’ (St. 107:43) Tor Jehovan khoinchea tin vattamnim amkam visvaxi mog dakhoila tacher niall korun, tachea visvaxi moga thaun amkam koso faido zata tem polloum-ia.

10. Jehovacho visvaxi mog sasnak togta, hem zannam zalolean amkam koxi modot zata? (Stotr 31:7)

¹⁰ Jehovacho visvaxi mog sasnak togta. Stotr 136-ant Devacho maiemog vo visvaxi moga vixim amkam 26 pavtti sanglam. Hea Stotrachem poilem vers sangta: “Zoi, zoi Sorvespor! Sorvesporak dhinvasat: To khorench boro, Tacho maiemog [visvaxi mog, NW] mit-mer naslolo!” (St. 136:1) Toxench vers 2 tem 26-ant, dor eka versant amkam him utram mellttat: “Tacho maiemog [visvaxi mog,  NW] mit-mer naslolo.” Ani hem Stotr vachtana Jehova amkam veg-veglle toren visvaxi mog koso dakhoita tem polloun ami ojap zatat. Tor Jehova aplea lokank visvaxi mog dakhoit ravta mhunn amkam khatri melltta, chodd korun amkam transancho fuddo korcho poddtta tednam. Jehovachea visvaxi moga thaun amkam koso faido zata: Jehova amchea laginch asa hem zannam zaun ami khuxal zatat. Toxench, amchea trasancho fuddo korunk ani tachi seva korit ravonk to amkam modot kortolo mhunn amkam khatri melltta.​—Stotr 31:7 vachat.

11. Lokgonnti 14:19-a pormonnem, Jehova amkam kiteak bhogxita?

¹¹ Aplea visvaxi mogak lagon Jehova Dev amkam bhogxita. Ek patki, poschatap korun aplem patki jivit soddun dita tednam tachea pasot aslolea visvaxi mogak lagon Jehova taka bhogsunk toiar zata. Davidan Jehova add patok adarlem tednam tachem ontoskornn taka khatalem. Punn uprant, Jehova bhogsunk toiar mhunn taka kollon ailem. Karonn tannem poschatap kelo tednam Jehovan taka bhogxilo. Tea pasot, Jehova vixim to oxem mhunnonk pavlo: “Amchea patkank favo tea mapan To khast laina, amchea guneanvanchem favo tem farikponn magina.” (St. 103:8-11) Punn prosn ieta, Jehova amkam kiteak bhogxita? Hacho zobab amkam Lokgonnti 14:19-ant melltta. (Vachat.) Tor, apnnank ulo martolea sogleancho Jehovak visvaxi mog asa dekhun to tankam bhogxita.

12-13. Ami adim kelʼlea patkank lagon ami guneanvkari asat oxem amkam dista zalear, kitem kelolean amkam modot zatoli?

¹² Ami patok adartat tednam amkam tea vixim khub vaitt dista. Hem borem zaun asa, karonn him bhavnam amchi chukichi vatt soddunk ani Deva lagim bhogsonnem magonk amkam fuddem kaddttat. Punn Jehovachea thoddea sevokank tannim adim kelʼlea patkank lagon tim guneanvkari asat ani tannim Jehovachem bhogsonnem maglea uprant pasun, Jehova tankam kednanch bhogxicho na oxem dista. Tumkam-i toxem dista zalear Jehovan aplea sevokank visvaxi mog koso dakhoila tacher niall korat. Toxem kelolean tumkam modot zatoli.

¹³ Jehovachea visvaxi moga thaun amkam koso faido zata: Jehova visvaxi mog dakhoita dekhun to amkam bhogxita. Amkam guneanvkari bhavnam astat tednam ‘Jehova amkam udar kallzan bhogsunk’ toiar asa mhunn ugddas  dovrat. (Iz. 55:7) Hea vixim Davidak khobor asli dekhun tannem oxem boroilem: “Prithume poros sorg jitlo unch-unch asa, titlo vhodd Tachi bhokti kortoleam thaim Tacho mog! [visvaxi mog, NW] Udent ani Ostomt jitleo ekameka thaun pois-pois asat, titlim pois To amchim patkam kaddun uddoita!” (St. 103:11, 12) Tor ami opurnn aslear pasun, ami patok adartat tednam poschatap kortat zalear “Jezuchem rogot sogllea patkantlim amkam xuddh-nirmoll korta.” Ani hea pasot, ami nitoll onstoskornnan Jehovachi seva korunk pavtat.​—1 Juanv 1:7.

14. Jehovacho visvaxi mog amkam rakhonn koso dita hea vixim Davidan kitem sanglem?

¹⁴ Jehovacho visvaxi mog tachea sangata amchi ixttagot rakhta. Hea vixim, Davidan magnneant Devak oxem sanglem: “Tujea gopant hanv lipun ravtam, akantachea vella Tum mhaka rakhun dovortai; sorbhonvtim suttkeche ulʼlas Tum mhaka aikunk ditai. . . . Apnnacher visvas dovortoleak Sorvespor kaklutin ani maiemogan [visvaxi mogan, NW] guttlaita.” (St. 32:7, 10) Zoxem adlea tempar, xara sorbhonvtim asloleo vonnttio xarantlea lokank tanchea dusmana thaun rakhtaleo, teach bhaxen, Jehovacho visvaxi mog tachea sangata amchi ixttagot piddʼddear korunk xokta toslea soglea vostum thaun amkam rakhta. Khorench, tachea visvaxi mogak lagon to amkam tachea lagim voddun haddtta.​—Jer. 31:3.

15. Jehovacho visvaxi mog ek kottʼtt ani kilʼlo, oxem ami kiteak mhunnonk zata?

¹⁵ Jehova Dev aplea sevokanchi koxi rakhonn korta tem somzaunk Davidan anik ek udharonn uzar kelem. Tannem mhunnttlem: “Tum, Deva, mhozo Kilʼlo, mhojea mogacho Dev Tum.” Tannem oxem-i mhunnttlem: “To mhozo Mog, mhojem Kottʼtt, mhozo Kilʼlo, mhozo Tarok, Ddhal mhozo, Xeronn mhojem!” (St. 59:17; 144:2) Tor Davidan Devachea visvaxi mogak ek kottʼtt ani kilʼlo kiteak mhunnttlem? Ami sonvsarachea khoinchea-i konnxeak asum, ami Jehovachi seva kortat tea meren, tachea sangata amchi ixttagot piddʼddear zata toslea soglea vostum thaun to amkam rakhonn ditoloch. Ani hich khatri amkam Stotr 91-ant pasun melltta. Thoim Stotrkaran mhunnttlem: “To Sorvesporak mhonntta: ‘Tum Mhozo Asro, mhozo Kilʼlo.’”(St. 91:1-3, 9, 14) Moizesan pasun oxench kitem mhunnttlem. (St. 90:1) Ani to morchea thoddo temp poilim, tannem him bhuzvonnechim utram mhunnttlim: “Dev sodanch tumchi rakhonn korta; Tachea sasnnache bavlle tumcho dhir-alaxiro.” (D.S. 33:27) Tor ‘tachea sasnache bavlle vo bhuzam tumcho dhir-alaxiro’ hea utrantlean Jehova vixim amkam kitem kollon ieta?

16. Jehova amkam adar kortolo hem zannam zalolean amkam khoinchea don toren modot zata? (Stotr 136:23)

¹⁶ Jehova amkam rakhta mhunn ami patietat tednam amkam bhuzvonn melltta. Thodde pavtti ami khubuch niraxi zatat. Tednam Jehova amchea pasot kitem korta? (Stotr 136:23 vachat.) To amkam ubarta, aplea vengent gheta, ani amchem niraxiponn pois korunk amkam modot korta. (St. 28:9; 94:18) Jehovachea visvaxi moga thaun amkam koso faido zata: Jehova amkam sodanch adar kortolo mhunn zannam zalolean amkam don toren modot zata. Poilem, ami khoinsor-ui ravom, Jehova amkam rakhta. Ani dusrem, amchea mogall sorginchea Bapak amchi kallji asa mhunn amkam khatri melltta.

17. Jehovak visvaxi mog asa dekhun to kitem kortolo mhunn ami khatri dovrunk zata? (Stotr 33:18-22)

¹⁷ Ami atam meren polloilem toxem, amkam oddchonneo astat tednam Jehova sangata amchi ixttagot ghott samballunk to amkam modot kortolo mhunn ami khatri dovrunk zata. (2 Kor. 4:7-9) Provadi Jeremiasan mhunnttlem: “Sorvesporache upkar sompunk nant, Tachea visvaxi doiall mogak xevott na.”  (Vil. 3:22) Toxench, Stotrkaran mhunnttlem: “Sorvesporachi konn bhokti kortat, Tachea maiemogacher [visvaxi mogacher, NW] konn visvas tthevtat, toslea monʼxancher Tachi nodor boslea.” (Stotr 33:18-22 vachat.) Tor tanchea utrantlean amkam khatri melltta ki Jehova amkam visvaxi mog dakhoit ravtolo.

18-19. (a) Hea lekhant ami kitem xiklim? (b) Fuddlea lekhant ami kitem xiktolim?

¹⁸ Hea lekhant ami kitem xiklim? Ami Jehovache sevok zaunchea poilim to jea toren akʼkhea munxakullak mog dakhoita teach toren to amcho mog kortalo. Punn ami tache sevok zalea uprant, to amkam visvaxi mog pasun dakhounk laglo. Ani heach moga pasot to amkam rakhta, sodanch amkam aple ixtt mhunn lekhta ani amkam ek boro fuddar dita. (St. 46:1, 2, 7) Toxench, oddchonneo ietat tednam taka visvaxi ravonk to amkam goroz titli ghottai dita.

¹⁹ Jehovan aplea visvaxi sevokank koso mog dakhoila tem ami polloilem. Punn osloch mog ami dusreank dakhoilʼlo Jehovak zai. Ami tem koxem korunk zata? Tea vixim ami fuddlea lekhant xiktolim.