1. Yehauvas xav kom nws cov tibneeg coj li cas?

YEHAUVAS ib txwm nyiam txojkev hlub uas tsis txawj hloov. (Hauxeyas 6:6) Nws thiaj hais kom Mikhas sau tseg cia tias: “Cog kev sib hlub kom ruaj khov.” (Mikhas 6:8) Yehauvas xav kom nws cov tibneeg cog txojkev hlub zoo li no. Tiamsis yuav kom peb cog tau txojkev hlub no, cia peb mus tham me ntswb mentsis seb lub ntsiab no yog li cas tiag.

2. Txojkev hlub uas tsis txawj hloov yog li cas?

² Vajtswv Txojlus Phau Qub hais txog txojkev hlub uas tsis txawj hloov tshaj li 230 zaug. Yuav kom peb nkag siab tau txojkev hlub no tshab tshab, muab piv hais tias muaj ib tug neeg hmov tshua txog lwm tus neeg. Nws yeej hlub tus ntawd kawg siab ntsws. Nws yeej yuav tsis nrug tus ntawd li tab txawm yuav muaj li cas los xij peem. Yehauvas coj yog nkaus li ntawd. Nws txojkev hlub yeej tsis txawj hloov. Tej zaum peb xav tias Yehauvas thiaj muaj taus txojkev hlub no xwb, tiamsis peb tibneeg yeej xyaum tau txojkev hlub no. Nyob hauv zaj no, peb yuav kawm seb Yehauvas hlub tshua tibneeg li cas. Hos zaj kawm tom ntej, peb mam li piav seb peb yuav xyaum Yehauvas rau txojke twg.

3. Yehauvas qhia rau Mauxes li cas?

³ Thaum cov Yixalayees tawm plaws hauv tebchaws Iziv los lawm, Vajtswv qhia rau Mauxes tias Nws lub npe yog txhais li cas tiag thiab Nws tus xeeb ceem zoo li cas tiag. Vajtswv piav li no tias: “Kuv yog [Yehauvas], Vajtswv tus uas muaj lub siab puv nkaus kev hlub thiab tshua, yog tus uas tsis chim sai thiab  yog tus uas muaj kev hlub thiab ncaj ncees. Kuv txojkev hlub yuav nyob nrog ntau txhiab tiam neeg, thiab zam txim rau tej neeg ua phem thiab muaj txim.” (Khiav Dim 34:6, 7) Cia peb mus kawm seb cov lus Yehauvas hais no qhia li cas txog nws txojkev hlub uas tsis txawj hloov.

4-5. (1) Yehauvas qhia li cas txog nws? (2) Peb yuav teb ob lo lus nug twg?

⁴ Thaum hais tias Yehauvas “yog tus uas muaj kev hlub,” twb yog nws txojkev hlub loj los loj dav los dav. Kuj muaj lwm nqe Vajlugkub piav ntxiv txog Yehauvas txojkev hlub tib yam nkaus. (Teev Npe 14:18; Phau Ntawv Nkauj 106:7) Qhov no qhia rau peb tias txojkev hlub uas tsis txawj hloov muaj nuj nqis rau Yehauvas kawg nkaus li. Vajntxwv Daviv thiaj hais tias: “[Yehauvas], koj txojkev hlub siab mus nto saum ntuj, . . . Vajtswv, koj txojkev hlub zoo kawg nkaus! Peb nrhiav tau koj ob phabtis tus duab ntxoov ntxoo los tsomkwm peb thiab ua peb qhov chaw nkaum xwb.” (Phau Ntawv Nkauj 36:5, 7) Ua li peb puas xav tib yam nkaus li Daviv xav?

⁵ Txuas ntxiv tuaj tom ntej no, peb yuav mus tham me ntswb mentsis txog ob lo lus nug no: Yehauvas hlub tshua tus twg? Qhov uas Yehauvas hlub tshua ho tsav tau lub neej npaum li cas? Thaum peb nkag siab lawd ces peb yuav paub tseeb tseeb txog txojkev hlub uas tsis txawj hloov.

6. Yehauvas txojkev hlub yuav tsis txawj hloov rau tus twg?

⁶ Vajtswv Txojlus qhia tias tibneeg lub siab xib ntau tsav ntau yam. Xws li, “kev txawj ntse,” “kev qhuab ntuas,” “tswvyim,” “cawv txiv hmab,” “roj muaj nqes,” thiab “cog txiv hmab txiv ntoo.” (2 Xwmtxheej Vajntxwv 26:10; Pajlug 12:1; 21:17, TT; 29:3) Thaum Yehauvas xib rau ib yam twg, tsis yog nws xib rau tej khoom ub khoom no. Tiamsis yog nws xib rau tibneeg nkaus nkaus xwb. Ua li yog tibneeg no, ho yog cov twg tiag? Yog cov uas nrog nws sib raug zoo. Nws yuav tsis tso lawv tseg ib zaug li. Nws twb npaj tej yam zoo zoo tseg cia rau lawv yav peb suab lawm.

7. Yehauvas qhia tias nws hlub tshua txhua leej txhua tus neeg li cas?

⁷ Yehauvas tau ua ntau tsav ntau yam los qhia tias nws hlub tshua txhua leej txhua tus neeg. Yexus hais rau Nikaudemaus tias: “Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis.”​—Yauhas 3:1, 16; Mathais 5:44, 45.

8-9. (1) Vim li cas Yehauvas txojkev hlub ho tsis hloov rau cov teev tiam nws? (2) Peb yuav kawm txuas ntxiv li cas?

 ⁸ Yehauvas hlub tshua txhua leej txhua tus neeg tiamsis cov uas nrog nws sib raug zoo, nws txojkev hlub rau lawv yuav nyob mus ib txhis. Vajntxwv Daviv thiab Daniyees nkawv tau hais txog Yehauvas txojkev hlub uas tsis txawj hloov. Daviv hais tias: “Thov koj tsis txhob tso cov uas hlub koj tseg.” “[Yehauvas] hlub cov neeg uas hwm nws mus ibtxhis.” Hos Daniyees hais li no tias: “[Yehauvas] uas yog Vajtswv. Koj hlub tus uas muab siab npuab koj thiab ua raws li koj tej lus.” (Phau Ntawv Nkauj 36:10; 103:17; Daniyees 9:4) Raws li nkawv tau hais no, Yehauvas txojkev hlub yuav tsis hloov rau cov neeg uas nrog nws sib raug zoo, hwm nws, muab siab npuab nws, thiab ua raws li nws tej lus. Yog li ntawd, cov uas teev tiam Yehauvas thiaj yog cov uas yuav paub nws txojkev hlub uas nyob mus ib txhis.

⁹ Thaum peb tsis tau los ntseeg Yehauvas, peb tsis paub tias Yehauvas pab tau peb lub neej npaum li cas. Peb tsuas pom tej yam Yehauvas niaj hnub muab pub rau peb xwb. (Phau Ntawv Nkauj 104:14) Tiamsis thaum peb los ntseeg Yehauvas, peb mam li pom tias nws tsav tau peb lub neej lawm hov ntau. Yehauvas thiaj hais tias: “Kuv txojkev uas hlub koj yuav tsis paub kawg li.” (Yaxayas 54:10) Hos Daviv hais tias: “Nco ntsoov hais tias [Yehauvas] yeej xaiv cov neeg ncaj ncees los ua nws tug.” (Phau Ntawv Nkauj 4:3) Ua li peb yuav tau coj li cas yog peb paub li no? Nyob rau hauv Phau Ntawv Nkauj 107:43 hais tias: “Thov kom cov neeg muaj tswvyim ras txog tej no; thov kom lawv lees paub hais tias [Yehauvas] yog tus uas muaj kev hlub uas tsis paub kawg.” Yog li ntawd, cia peb mus kawm seb Yehauvas tsav tau peb lub neej npaum li cas.

10. Vim li cas ho zoo rau peb nco ntsoov tias Yehauvas txojkev hlub nyob mus ib txhis? (Phau Ntawv Nkauj 31:7)

¹⁰ Vajtswv txojkev hlub nyob mus ib txhis. Phau Ntawv Nkauj 136 thiaj piav txog lub ntsiab no muaj li 26 zaug. Phau Ntawv Nkauj  136 nqe 1 hais tias: “Cia li ua [Yehauvas] tsaug, rau qhov nws yog tus muaj lub siab dawb siab zoo, nws txojkev hlub nyob mus ibtxhis.” Yog peb nyeem txuas ntxiv nqe 2 mus txog nqe 26, Yehauvas qhia hais tias “nws txojkev hlub nyob mus ib txhis.” Yehauvas tau hais li no vim nws xav kom peb tso siab plhuav tias yeej tsis muaj ib yam dabtsi yuav los rhuav tau txojkev hlub nws muab pub rau peb. Yog peb rau siab ntso teev tiam nws ces txawm peb yuav ntsib ntau yam kev nyuaj siab ntxhov plawv los nws yeej yuav tsis tso peb tseg. Yehauvas txojkev hlub yuav tsav tau peb lub neej li cas tiag? Yog peb nco ntsoov rau nruab siab tias Yehauvas yeej tsis tso peb tseg ces yuav txhawb tau peb lub dag lub zog, ua tiag thev, muaj kev kaj siab, thiab rau siab ntso teev tiam nws.​—Nyeem Phau Ntawv Nkauj 31:7.

11. Raws li Phau Ntawv Nkauj 86:5, vim li cas Yehauvas thiaj zam tau luag lub txim?

¹¹ Vim Vajtswv txojkev hlub tsis txawj hloov, nws thiaj zam tau peb lub txim. Thaum ib tug ua txhaum tag tiamsis nws ho muab tej kev txhaum ntawd tso pov tseg lawm, Yehauvas yeej zam nws lub txim. Xws li thaum Daviv pheej ua tau tej yam rov los nkaug nws lub siab. Thaum Daviv pom tias Yehauvas yeej “zam peb lub txim,” nws thiaj piav li no txog Yehauvas tias: “Nws tsis rau txim rau peb raws li tej kev txhaum uas tsimnyog peb raug, lossis tsis ua pauj peb lub txim thiab tej kev txhaum uas peb ua.” (Phau Ntawv Nkauj 103:8-11) Vim li cas Yehauvas thiaj zam tau luag lub txim? Yog peb mus nyeem Phau Ntawv Nkauj 86:5 ces yuav qhia rau peb tias yog vim li cas. (Nyeem.) Twb yog vim Yehauvas txojkev hlub uas tsis paub kawg.

12-13. Peb yuav tau nco ntsoov li cas yog tias peb lub siab ib sij rov nkaug peb ib lwm?

¹² Yeej zoo tias peb paub txaj muag txog peb tej kev txhaum vim tias yuav pab tau peb muab peb tej kev txhaum tso pov tseg. Tiamsis muaj ib txhia ntseeg lub siab pheej nkaug lawv tas zaj tas zog, ua rau lawv fim tsis taus Yehauvas. Ces lawv xav tias Yehauvas yuav tsis zam lawv lub txim hlo li. Yog tias peb ib tug twg pheej xav zoo li tau hais tas los no, nco ntsoov tias Yehauvas txojkev hlub rau peb yeej tsis txawj hloov.

 ¹³ Yehauvas txojkev hlub yuav tsav tau peb lub neej li cas tiag? Peb yeej yog noob txaug neeg txhaum. Txawm li ntawd los, peb haj tseem muaj peevxwm teev tiam tau Yehauvas vim nws “tus Tub Yexus Khetos cov ntshav twb ntxuav peb tej kev txhaum huv tibsi lawm.” (1 Yauhas 1:7) Yog muaj tej lub caij peb ho qaug zog vim peb ua tsis tau qhov zoo qhov yog, los cia peb nco ntsoov tias Yehauvas yeej tos ntsoov yuav zam peb tej kev txhaum. Daviv sau tseg tias: “Lub ntuj nyob siab ntawm lub ntiajteb npaum li cas, [Yehauvas] hlub cov uas hwm nws heev npaum li ntawd.” (Phau Ntawv Nkauj 103:11, 12) Yog li ntawd, txawm peb lub txim yuav loj luaj twg los Yehauvas yeej zam tau.​—Yaxayas 55:7.

14. Daviv hais tias Vajtswv yuav tiv thaiv peb li cas?

¹⁴ Vajtswv yuav pab peb tuav rawv peb txojkev sib raug zoo nrog nws. Daviv thov Vajtswv tias: “Koj yog kuv lub chaw nkaum, koj yuav cawm kuv kom dim ntawm txojkev puastsuaj. Kuv yuav hu nkauj nrov nrov qhuas koj txojkev cawm dim, rau qhov koj yog tus tsomkwm kuv. . . . [Yehauvas] txojkev hlub yuav tsomkwm cov neeg uas cia siab rau nws mus li.” (Phau Ntawv Nkauj 32:7, 10) Yav thaum ub, muaj tus ntsa yeej los tiv thaiv tej pejxeem huab hwm. Zoo tib yam li ntawd, Vajtswv yuav tiv thaiv peb zoo li tus ntsa yeej. Thaum peb raug kev sim siab, nws yuav qaws peb rau hauv xub ntiag kom thiaj pab peb tuav rawv peb txojkev sib raug zoo nrog nws.​—Yelemis 31:3.

15. Vim li cas ho hais tau tias Yehauvas txojkev hlub zoo li lub chaw cawm siav?

¹⁵ Daviv siv lus piv txwv los qhia tias Vajtswv tiv thaiv nws cov tibneeg li cas rau li cas. Nws hais tias: “Vajtswv yog kuv lub chaw cawm siav, Vajtswv thiaj yog tus hlub kuv.” Daviv hais ntxiv tias: “Nws yog tus tiv thaiv kuv thiab tuaj kuv tog, yog kuv lub chaw cawm siav thiab yog kuv tus cawmseej, kuv tso siab plhuav rau nws.” (Phau Ntawv Nkauj 59:17; 144:2) Vim li cas Daviv ho muab Yehauvas piv rau ib lub chaw cawm siav? Txawm peb yuav nyob rau sab ntuj twg los xij peem, yog peb rau siab ntso teev tiam Yehauvas ces nws yeej yuav pab peb tuav rawv peb txojkev sib raug zoo nrog nws. Tus sau phau ntawv nkauj tau hais li no txog Yehauvas tias: “Koj yog tus tiv thaiv thiab tsomkwm kuv.” (Phau Ntawv Nkauj 91:1-3, 9, 14) Mauxes los kuj hais tias Yehauvas ib txwm yog peb lub chaw cawm siav. (Phau Ntawv Nkauj 90:1) Ua ntej Mauxes txojsia yuav tu, nws tau hais tias: “Vajtswv yog tus uas ibtxwm tsomkwm nej; nws ob txhais npab puag rawv nej mus ibtxhis.” (2 Kevcai 33:27) Thaum Mauxes hais tias Vajtswv “ob txhais npab puag rawv nej mus ibtxhis,” yog txhais li cas tiag?

16. Muaj ob yam twg uas peb yuav tau cim ntsoov cia? (Phau Ntawv Nkauj 136:23)

¹⁶ Yog tias peb tso siab tau tias Yehauvas yeej yog peb lub chaw cawm siav ces peb yuav tsis txhawj tsis ntshai. Tab txawm li ntawd los, muaj qee hnub qee tsam peb tseem yuav qaug zog zuj zis. Thaum muaj tej lub caij lub nyoog zoo li no, Yehauvas yuav pab peb li cas? (Nyeem Phau Ntawv Nkauj 136:23.) Nws ob txhais npab yuav puag rawv peb cia, peb thiaj rov kaj siab. (Phau Ntawv Nkauj 28:9; 94:18) Yehauvas txojkev hlub yuav tsav tau peb lub neej li cas tiag? Peb yeej tso siab tau rau Yehauvas. Cim ntsoov ob yam no tseg. Thawj yam yog, txawm peb yuav nyob rau sab ntuj twg los xij, Yehauvas yeej yuav tiv thaiv peb nyob qhov ntawd. Yam ob yog, peb Leej Txiv Yehauvas yeej hmov tshua peb tshaj plaws li.

17. Peb tso tau siab plhuav li cas? (Phau Ntawv Nkauj 33:18-22)

¹⁷ Zaj no qhia tau peb li cas tiag? Peb kawm tau tias txawm yuav muaj qho yam los sim peb txojkev ntseeg los cia peb tso siab plhuav hais tias Yehauvas yeej saib ntshis kom peb tsis txhob muab nws tso pov tseg. (2 Kauleethaus 4:7-9) Tus cev Vajtswv lus Yelemis tau hais tias: “[Yehauvas] txojkev hlub uas ruaj khov thiab nws txojkev hlub tshua yeej muaj tsis paub kawg.” (Nkauj Quaj Ntsuag 3:22) Yog li ntawd, peb cia li tso siab plhuav tias Yehauvas txojkev hlub yeej yuav tsis txawj hloov. Vajtswv Txojlus thiaj hais tias: “[Yehauvas] yeej saib ntsoov txhua tus uas hwm nws, thiab cov uas cia siab rau nws txojkev hlub uas tsis hloov li.”​—Nyeem Phau Ntawv Nkauj 33:18-22.

18-19. (1) Peb kawm tau li cas ntxiv nyob hauv zaj no? (2) Zaj tom ntej peb yuav kawm txog dabtsi?

¹⁸ Peb kawm tau li cas ntxiv ntawm zaj no? Peb kawm tau tias thaum peb haj tseem tsis tau los paub Yehauvas, peb tsis paub tias Yehauvas pab tau peb lub neej npaum li cas tiag. Peb tsuas pom tej yam Yehauvas niaj hnub muab pub rau peb xwb. Tiamsis thaum peb los ntseeg Yehauvas, peb mam li pom tias nws tsav tau peb lub neej lawm hov ntau. Nws tiv thaiv peb thiab yuav ua raws li nws tej lus cog tseg yam pem suab. Nws xav kom peb ua lub neej tshav ntuj qas nrig. (Phau Ntawv Nkauj 46:1, 2, 7) Yog li ntawd, txawm peb yuav raug txojkev sim siab twg los nco ntsoov tias Yehauvas yuav pub lub dag lub zog kom peb tuav rawv peb txojkev ntseeg.

¹⁹ Tamsim no peb paub tseeb tseeb lawm tias Yehauvas hmov tshua nws cov tibneeg npaum li cas lawm. Zaj tom ntej peb yuav kawm seb peb yuav xyaum Yehauvas li cas vim nws xav kom peb txawj sib hlub sib tshua.