1. Was tuut Yeehoowa uns uf muute se mache?

LEAALE LIIP is aarich wichtich fer Yeehoowa. (Ose. 6:6) Tee wil hon tas mer ti leaale liip siin wii eyer se siit. Torich te profeet Mikeyas, tuut Yeehoowa uns uf muute “ti leaale liip liipe”. (Mik. 6:8, noote) Awer fer tas mache, mise mer eyerst wise was ti leaale liip is.

2. Was is ti leaale liip?

² Was is ti leaale liip? Ti wërter “leaale liip” xteen unkefeer 230 mool in te Tradução do Novo Mundo da Bíblia Sagrada. Wën yemant leaale liip hot, liipt tee een aner persoon soo fiil tas eyer tuut wayter se liipe un troy uf sayn sayt plaype. In te meyerst tsayt, wën ti Piipel iwer leaale liip xprecht, xprecht se iwer Yeehoowa sayn liip fer ti mënxe; awer tas khan aach ti liip tswixich ti mënxe sin. Yeehoowa is tas peste payxpiil fon leaale liip. In tiise artikel, tuun mer xpreche iwer wii Yeehoowa leaale liip tsu te mënxheet tsaycht. Un in tëm neekste artikel, tuun mer siin wii khene Kot sayn tiiner Yeehoowa noo mache un leaale liip eene fer ti anere tsayche.

3. Was hot Yeehoowa fer Mooses iwer sich selepst kesaat?

³ Een pisye tëm noo wii ti israeliiter fom Ejipt raus kang sin, hot Yeehoowa etwas fer Mooses iwer Sayn naame un kwaliteete kesaat: “Yeehoowa, Yeehoowa, een Kot woo parmhërtslich un mitlaytich is, ketultich un fol mit leaale liip un woerheet, woo fer tausente, leaale liip tsaycht, woo feeler, transkretsyoon un sint fertsayt.” (Eeks. 34:6, 7) Mit tiise xeene wërter, hot Yeehoowa was ekstras iwer sayn leaale liip fer Mooses kesaat. Was waar tas?

4-5. (a) Wii tuut Yeehoowa sich selepst pexraype? (b) Was fer frooche tuun mer antworte?

 ⁴ Yeehoowa hot sich pexrip net ploos wii yemant woo leaale liip hot, awer wii yemant woo “fol mit leaale liip” is. Tiise wërter tuun anere 6 mool in te Piipel foer khome. (Nuu. 14:18; Nee. 9:17; Psal. 86:15; 103:8; Yoël 2:13; Yon. 4:2) Awer tii tuun imer Yeehoowa pexraype, nii ti mënxe. Es is interesant tas Yeehoowa soo sich pexraypt, kël? Kewis, ti leaale liip is aarich wichtich fer Yeehoowa. * Weeche tas, hot te kheenich Tawi kesaat: “Oo Yeehoowa, tayn leaale liip keet pis tsum himel. (…) Oo Kot, wii weyertlich is tayn leaale liip! Ti mënxe suuche xuts in te xate fon tayn fliter.” (Psal. 36:5, 7) Sin mer petanklich fer Yeehoowa sayn leaale liip soo wii Tawi waar?

⁵ Fer peser ferxteen was ti leaale liip is, wole mer 2 frooche antworte: Fer weem tuut Yeehoowa leaale liip tsayche? Un wii helft uns Yeehoowa sayn leaale liip?

6. Fer weem tsaycht Yeehoowa leaale liip?

⁶ Fer weem tsaycht Yeehoowa leaale liip? Ti Piipel saat tas mer khene fiile tinge liipe, soo wii “planse”, “wayn un eel”, “ti tisipliin”, “ti khëntnis”, un “ti kluucheet”. (2 Kro. 26:10; Xpr. 12:1; 21:17; 29:3) Awer ti leaale liip wërt nii fer tinge ketsaycht, ploos fer mënxe. Noch soo, Yeehoowa tsaycht net leaale liip fer ale kaar. Tee tsaycht es ploos fer tii woo een ticht froyntxaft mit Tëm hon. Unser Kot is leaal mit sayn froynte. Tee hot was wunerliches fer tëne kepleent un tee tuut nii noo lose tëne liipe.

7. Wii tsaycht Yeehoowa liip fer al ti mënxe?

⁷ Yeehoowa tsaycht liip fer al ti mënxe. Yeesus hot tsu Nikotemus kesaat: “Wayl Kot ti welt [orer ti mënxe] soo fiil keliipt hot, hot eyer sayn eensiche kepoerne Soon kep, tas yeete eene woo aan tëm klaapt net fernicht wërt, awer eewiche leepe kriit.” (Yoo. 3:1, 16; Mat. 5:44, 45)

8-9. (a) Warom tsaycht Yeehoowa leaale liip fer sayn tiiner? (b) Was tuun mer yets siin?

⁸ Wii mer xon kesiin hon, Yeehoowa tsaycht sayn leaale liip ploos fer sayn tiiner — tii woo een ticht froyntxaft mit tëm hon. Te kheenich Tawi un te profeet Tanyël hon tas taytlich kelos. Tsum payxpiil, Tawi hot kesaat: “Tuu wayter tayn leaale liip tsayche fer tii woo tich khëne.” “Fer tii woo tëm tiif respektiire, halt Yeehoowa sayn leaale liip fer ti kans eewichkheet.” Un Tanyël hot  kesaat: ‘Oo Yeehoowa, te woere Kot, woo leaale liip tsaycht fer tii woo tëm liipe un woo sayn kepoote aan heere.’ (Psal. 36:10; 103:17; Tan. 9:4) Tëm noo tiise inspiriirte wërter, tuut Yeehoowa sayn leaale liip tsu sayn tiiner tsayche wayl se tëm khëne, tiif respektiire, liipe un Sayn kepoote aan heere. Yeehoowa tsaycht sayn leaale liip ploos fer tëne woo tëm in te richtich aat aan peete.

⁹ Eep mer Yeehoowa aan kefang hon se tiine, hon mer xon nutse fon Yeehoowa sayn liip kriit — ti liip woo eyer fer ti kans mënxheet tsaycht. (Psal. 104:14) Awer wii sayn tiiner, tuun mer aach tëm sayn leaale liip kriin. Yeehoowa saat fer sayn tiiner: “Mayn leaale liip wërt net fon tich wech kehool.” (Isa. 54:10) Un Tawi hot selepst kesiin wii ‘Yeehoowa ekstra pehantelt tii woo tëm leaal sin’. (Psal. 4:3) Tan, was sol Yeehoowa sayn leaale liip uns uf muute se mache? Te psalmist hot kesaat: “Weer kluuch is tuut aan tas triwer noo tenke un tuut mit acht iwer Yeehoowa sayn aktsyoone fon leaale liip tenke.” (Psal. 107:43) Tiise kuute aanreet khomt fon Yeehoowa. Mit tas im khop, wole mer yets 3 aate siin wii Yeehoowa sayn leaale liip tsaycht un wii tas uns helft.

10. Wii helft uns se wise tas Kot sayn leaale liip fer imer playpt? (Psalm 31:7)

¹⁰ Kot sayn leaale liip playpt fer imer. Tas khomt 26 mool tsum foer xayn im Psalm 136. In tëm eyerste wersikel fon tiise Psalm, leese mer: “Tankt Yeehoowa, wayl tee is kuut; sayn leaale liip playpt fer imer.” (Psal. 136:1) In yeete wersikel, fon te 2 aan pis te 26, leese mer ti wërter: “Wayl sayn leaale liip playpt fer imer.” Tiise tekste ferwunere uns, wayl tii tsayche ti fiile aate wii Yeehoowa sayn leaale liip wayter tsaycht. Ti wërter “wayl sayn leaale liip playpt fer imer”, woo noo un noo kesaat wëre, lose uns sicher tas ti liip woo Yeehoowa fer sayn folek hot, tuut sich net ënere. Es frayt uns aarich fiil se wise tas Yeehoowa tuut net laycht uf kepe fon sayn tiiner. Xtats tas, Yeehoowa halt sich fest aan sayn tiiner, un lost tëne net im xtich, hauptseechlich in xweyere tsayte. Wii helft uns tas? Wise tas Yeehoowa uns net im xtich  lost, kept uns ti kraft un frooheet fer mit unser xwiirichkheete um keen un Tëm wayter tiine. (Lees Psalm 31:7.) *

11. Tëm noo Psalm 86:5, weeche was tuut Yeehoowa fertsaye?

¹¹ Kot fertsayt uns weeche sayn leaale liip. Was macht Yeehoowa wën eyer mërkt tas yemant woo een sint kemacht hot sich wërklich peroyt hot un sayn sint im xtich kelos hot? Weeche sayn leaale liip, tuut Yeehoowa tëm fertsaye. Kuk mool was Tawi iwer Yeehoowa kesaat hot: “Eyer tuut net mit uns um keen tëm noo unsere sinte, un petsaalt net tsurik was meyer fer unsere feeler fertiine.” (Psal. 103:8-11) Tawi hot kesiin wii traurich meyer khene uns xpiire wën mer een xultich kewise hon. Awer tee hot aach kelërnt tas Yeehoowa “fërtich fer se fertsaye” is. Weeche was tuut Yeehoowa fertsaye? Ti antwort xteet in Psalm 86:5. * (Lees.) Yawool, wii Tawi im kepeet kesaat hot, Yeehoowa fertsayt weeche sayn leaale liip fer ale tii woo tëm aan ruufe.

12-13. Wën mer iwerlaat sin mit xult weeche een sint woo mer friier kemacht hon, was tuut uns helfe?

¹² Wën mer een sint mache, is es wichtich, un soo kaar kuut, tas mer uns traurich xpiire. Tas khan uns helfe uns peroye un xrite kepe fer unser feeler korikiire. Awer etliche fon Kot sayn tiiner xpiire sich iwerlaat mit xult weeche ti sinte woo se friier kemacht hon. Tii tenke tas Yeehoowa khent se nii fertsaye, opwool se sich peroyt hon un noo kelos hon tas ferkheertes mache. Wëns tuu mit tiise sort xpiirunge um keest, etwas woo tich helfe tuut is ferxteen tas Yeehoowa wil leaale liip fer sayn tiiner tsayche.

¹³ Wii helft uns tas? Opwool mer imperfekt sin, khene mer Yeehoowa froo tiine mit een sauwer kewise. Tas is meechlich wayl ‘tas pluut fon Yeesus tuut uns rayn fon yeete sint lose’. (1 Yo. 1:7) Wëns tuu traurich pist weeche een imperfektsyoon, eriner tich: Yeehoowa wil tich wërklich fertsaye wëns tuu tich peroyt host. Kuk mool ti ferpiinung woo Tawi kemacht hot tswixich leaale liip un  fertsayung. Tee hot kexrip: “Soo hooch wii te himel uf te eyert is, soo kroos is sayn leaale liip fer tii woo tëm tiif respektiire. Soo wayt wii ti sun sayn ufkang fon te sun sayn unerkang is, soo wayt hot eyer unser feeler fon uns wech ketuun.” (Psal. 103:11, 12) Yawool, Yeehoowa wil uns “krooshërtslich fertsaye”. (Isa. 55:7)

14. Wii hot Tawi pexrip ti aat wii Yeehoowa sayn leaale liip uns xitst?

¹⁴ Kot sayn leaale liip xitst uns in kaystlich aat. In een kepeet tsu Yeehoowa, hot Tawi kesaat: “Tuu pist fer mich een ferxtekel plats; tuu tuust mich fon te unruychkheet xitse. Tuu wërst um mich rom sin mit frooe yukse fon pefrayung. (...) Tee woo aan Yeehoowa traut wërt torich sayn leaale liip in ketsaunt.” (Psal. 32:7, 10) In te piiplixe tsayte, ti mauere um ti xtete rom hon ti pewooner fon te faynte kexitst. Yeehoowa sayn leaale liip is wii een mauer: tii xitst uns fon ale kefoore woo khente xaate fer unser froyntxaft mit tëm mache. Un aach: weeche sayn leaale liip, pringt Yeehoowa uns ticht pay Tëm. (Yee. 31:3)

15. Warom is Yeehoowa sayn leaale liip mit een xuts plats ferklaycht?

¹⁵ Tawi hot een aner ferklaychung penutst fer se tsayche wii Kot sayn folek xitst. Tee hot kexrip: “Kot is mayn sicher plats, te Kot woo mich leaale liip tsaycht.” “Tee xenkt mich leaale liip un is mayn xuts plats; Tee is mayn sicher plats un mayn reter, mayn xits xilt, aan weem ich xuts fine.” (Psal. 59:17; 144:2) Warom hot Tawi Yeehoowa sayn leaale liip mit een sicher plats un een xuts plats ferklaycht? Wayl een tuun woo mer uf te eyert woone, soo lang wii mer Tëm sayn tiiner sin, Yeehoowa tuut uns wayter xitse, tas wërklich kaar niks xaate fer unser froyntxaft mit tëm pringt. Meyer khene tiise selwich sicherheet fine in te Psalm 91. Te xrayper fon tiise psalm hot kesaat: “Ich tuun fer Yeehoowa saan: ‘Tuu pist mayn xitsung un mayn fest plats.’”(Psal. 91:1-3, 9, 14) Mooses hot aach iwer een xits plats kexproch. (Psal. 90:1, noote) Un een pisye foer sayn toot, hot eyer een aner xeen ferklaychung kemacht. Tee hot kexrip: “Fon friirixe tsayte aan, is Kot een xits plats, sayn eewiche aarme sin unich tich.” (Teut. 33:27) Was tuun ti wërter “sayn eewiche aarme sin unich tich” uns iwich Yeehoowa saan?

16. Wii helft uns Yeehoowa? (Psalm 136:23)

¹⁶ Wën Yeehoowa unser xits plats is, fine mer uns sicher. Awer, als mool xpiire mer uns oone muut un es khan xweyer sin too triwer wech khome. Wën tas pasiirt, was macht Yeehoowa fer uns? (Lees Psalm 136:23.) * Tee tuut sayn aarme unich uns un heept uns liiplich uf. (Psal. 28:9; 94:18) Wii helft uns tas? Meyer wise tas mer khene imer uf Yeehoowa traue un tas erinert uns fon 2 seechen woo mer hon. Eyerst: een tuun woo mer leepe, meyer sin uns sicher tas Yeehoowa uns imer xitse tuut. Tsweet: unser liipliche Fater im himel khimert sich mit uns aarich fiil.

17. Weeche Kot sayn leaale liip, fon was khene mer uns sicher sin? (Psalm 33:18-22)

¹⁷ Wii mer kesiin hon, wën mer xwiirichkheete mit mache, khene mer uns sicher sin tas Yeehoowa uns helfe tuut wayter troy tsu tëm plaype. (2 Kor. 4:7-9) Te profeet Yeeremias hot kesaat: “Weeche Yeehoowa sayn leaale liip, sin mer net fernicht kep, wayl tee lost nii net noo parmhërtslichkheet tsayche.” (Yaa. 3:22) Yeehoowa tuut wayter sayn leaale liip tsu uns tsayche. Warom khene mer uns sicher  fon tas sin? Wayl ti Piipel saat uns: “Yeehoowa sayn aue phase ale uf woo tëm tiif respektiire, tii woo uf tëm sayn leaale liip waarte.” (Lees Psalm 33:18-22.) *

18-19. (a) Was sole mer net ferkese? (b) Was tuun mer im neekste artikel xtutiire?

¹⁸ Tan was sole mer net ferkese? Eep mer Yeehoowa aan kefang hon se tiine, hon mer xon nutse fon Yeehoowa sayn liip kriit — ti liip woo eyer fer ti kans mënxheet tsaycht. Awer, wii sayn tiiner, tuun mer aach sayn leaale liip kriin. Weeche sayn leaale liip, xitst uns Yeehoowa mit sayn umaarm. Tee tuut uns imer ticht pay tëm hale un tuut mache was eyer fer uns kepleent hot. Tee wil hon tas mer tëm sayn froynte fer imer wëre! (Psal. 46:1, 2, 7) Tes weeche, een tuun ti xwiirichkheet woo mer mit mache, Yeehoowa kept uns ti kraft woo mer prayche fer troy tsu tëm plaype.

¹⁹ In tiise artikel, hon mer kesiin wii Yeehoowa leaale liip fer sayn tiiner tsaycht. Awer eyer waart tas mer leaale liip eene fer ti anere tsayche. Wii khene mer tas mache? Te neekste artikel tuut iwer tiise important phunkt xpreche.