1. Jméni xi tsoná je Jeobá nga sʼiaan.

JE Jeobá tsjoa sʼe kon nga bakó xi ñaki kjoatsjoacha (Os. 6:6). Kʼoatsole je choʼndale nga kʼoati katasʼín. Jé profeta Miqueas kisichjén Jeobá nga kʼoatsoná nga tjínnele koakoá xi ñaki kjoatsjoacha (Miq. 6:8, nota). Kʼianga koakoá kjoatsjoacha jebi machjén nga kataʼya josʼin tíjna.

2. Jósʼin tíjna je xi ñaki kjoatsjoacha.

² Je én “xi ñaki kjoatsjoacha” tso 230 kʼa faʼaitʼa ya La Biblia. Traducción del Nuevo Mundo. Kʼianga bakóle xi ñaki kjoatsjoacha xínkjín chjota alikuikʼia nga tsín tsjoake ma kʼoa kixi fitʼale ngantsjai. Kui kjoatsjoacha jebi xi bakóle Niná je chjota, tonga kʼoati kui nchja̱ni je kjoatsjoacha xi bakóle xínkjín je chjota. Jé Jeobá xi ngisa bakó kjoatsjoacha jebi. I̱ kjoaʼmiya jebi kui chótʼayajiaan josʼin bakóle kjoatsjoacha Jeobá je chjota, kʼoa ya kjoaʼmiya xi ijngo kui jchaa josʼin chjénngilee Niná nga koakolee kjoatsjoacha xíngiaa.

3. Jméni xi kitsole Jeobá je Moisés.

³ Kʼianga to chriankʼia kitjoni Egipto je chjota israelita, nga kui kisikʼaxki̱le Jeobá je Moisés xi tʼatsʼe jaʼaínle kʼoa jokjoan, i kitsole: “Jeobá, Jeobá, jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle xi ñaki kjoatsjoacha kʼoa kao xi ñaki kʼoatjín, kʼoa jmi mani xi bakóle je kjoatsjoacha, síchatʼa jñani tsín kʼoanʼia, jñani saténgiaa kʼoa jñani bijnyijée” (Éx. 34:6, 7). Nga kʼoakitso Jeobá nʼio chjíle xi tsakakóyale  Moisés xi tʼatsʼe kjoatsjoachale. Kataʼyala jme xi kinchja̱ni.

4, 5. 1) Jókitso Jeobá xi titʼatsʼeni. 2) Jmé xi chótʼayajiaan i̱ kjoaʼmiya jebi.

⁴ Je Jeobá kʼoakitso nga nʼio tjínle je xi ñaki kjoatsjoacha. Kʼoa én jebi ngi ñato kʼa faʼaitʼa ya Biblia (Núm. 14:18; Neh. 9:17; 13:22; Sal. 86:15; 103:8; Joel 2:13; Jon. 4:2). Kʼianga jngó jngó kʼa bʼaxki̱ ya Biblia én jebi jé Jeobá nchja̱ni, alikuikʼia nga je chjota nchja̱ni. Nʼio tjínle kjoandosin nga kʼoatsole yaole Jeobá nga tjínle xi ñaki kjoatsjoacha. Kui xi bakóyaná nga nʼio chjí bekon Jeobá je xi ñaki kjoatsjoacha. * Kuijin nga i̱ kitsoni je rey David: “Ji Jeobá, je xi ñaki kjoatsjoachali bichókangi ngʼajmi [...]. Ji Niná, nʼio chjíle je xi ñaki kjoatsjoachali. Yaa ngingʼiánle jngali bichókationgi je xtile chjota” (Sal. 36:5, 7). Kʼoa ñá, a kʼoati nʼio chjí ʼyaa je kjoatsjoachale Niná joni David.

⁵ Kʼianga ngisa nda koa̱njinná josʼin tíjna je xi ñaki kjoatsjoacha, kuila nga jao koya jebi chótʼayajiaan: ʼyáni xi bakóle Jeobá je xi ñaki kjoatsjoacha, kʼoa jósʼin basenkaoná nga bakó Jeobá je xi ñaki kjoatsjoacha.

6. ʼYáni xi bakóle Jeobá je xi ñaki kjoatsjoacha.

⁶ ʼYáni xi bakóle Jeobá je xi ñaki kjoatsjoacha. Je Biblia kʼoatso nga nʼio nkjín koya jmeni xi tsjoacha maa, jolani je kjoabichakjáya, kjoankjíntokon, vino, siti̱ kao kjoachjine (Prov. 12:1; 21:17; 29:3). Tonga tojé chjota xi sakóle xi ñaki kjoatsjoacha ali tsojmijin. Tonga a kui xi tsonile jebi nga bakóle Jeobá je xi ñaki kjoatsjoacha toʼya chjotani. Mai. Tojé bakóle je xi nʼio miyole mani. Je Niná kixi fitʼale je miyole, nʼio tse kjoanda tsjoále kʼoa tsínkʼia tsjiónkon.

7. Jósʼin tíbakóle kjoatsjoacha Jeobá ngatsʼi chjota.

⁷ Je Jeobá bakóle kjoatsjoacha ngatsʼi chjota. Je Jesús i kitsole jngo chjota xi Nicodemo tsakʼin: “Niná kʼoasʼin koantsjoake sonʼnde [xi tsonile je chjota] nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:1, 16; Mat. 5:44, 45).

8, 9. 1) Ánni bakónile Jeobá xi ñaki kjoatsjoacha je choʼndale. 2) Jmé xi chótʼayajiaan xi fisani.

⁸ Tojosʼin kaʼyaa, je Jeobá tojé bakóle xi ñaki kjoatsjoacha je xi nʼio miyole, xi tsonile je choʼndale. Yaa tsoyaná jebi jmeni  xi kitso je rey David kao profeta Daniel. Tobʼelañá, je David i kitso: “Tosi tonda takolai xi ñaki kjoatsjoacha je xi bexkonli”. I kitsosa: “Bakóle Jeobá xi ñaki kjoatsjoacha ngantsjai nichxin je xi tsokjónke”. Kʼoa je Daniel i kitso: “Ji Jeobá, xi ñaki Ninání, xi jeya tijnai kʼoa xi tse nganʼio tjínli [...] bakolai xi ñaki kjoatsjoacha je xi tsjoakeli kʼoa xi sítjoson kjoatéxomali” (Sal. 36:10; 103:17; Dan. 9:4). Tojo tso texto jebi, je Jeobá bakóle xi ñaki kjoatsjoacha je choʼndale, nga̱ bexkon, tsokjónke, tsjoake kʼoa sítjoson kjoatéxomale. Tojé naxinandále Jeobá xi bakóle xi ñaki kjoatsjoacha, nga̱ kʼoasʼin bexkón josʼin mele.

⁹ Kʼianga kjesa je Jeobá nixájinlee, tokʼoa jebakóná kjoatsjoacha xi bakóle ngatsʼi chjota (Sal. 104:14). Tonga kʼianga jetsaʼyaxkoán Jeobá tsakakóná xi ñaki kjoatsjoacha. Je Jeobá itsole naxinandále: “Xi ñaki kjoatsjoachana alikui koase̱nxinli” (Is. 54:10). Je David ñaki tsabe josʼin bitjoson nga i̱ tso én jebi: “Je Jeobá sikatíotʼaxin xi kixi fitʼale” (Sal. 4:3). Jmé xi tjínnená sʼiaan nga kʼoasikji tsjoakená je Jeobá. Jngo xi kiski salmo i kitso: “Je xi chjine kuenta sʼin kjoa jebi kʼoa nʼio sindosin je xále Jeobá nga bakó xi ñaki kjoatsjoacha” (Sal. 107:43). Tojo tso texto jebi, janla koya kataʼyaa josʼin basenkaoná nga bakóná je xi ñaki kjoatsjoacha je Jeobá.

10. Jósʼin basenkaoná nga ʼyaa nga je xi ñaki kjoatsjoachale Niná tíjna ngantsjai (Salmo 31:7).

¹⁰ Je xi ñaki kjoatsjoachale Niná tíjna ngantsjai. Ya Salmo 136 kanjaon kʼa síkʼaxki̱ nga je xi ñaki kjoatsjoacha tíjna ngantsjai. Je versículo xi títjon itso: “Tʼailao kjoanda je Jeobá nga̱ nda chjota; bakó ngantsjai xi ñaki kjoatsjoacha” (Sal. 136:1). Ya versículo 2 saʼnda 26 tikui tikui én síkʼaxki̱ni nga je xi ñaki kjoatsjoacha tíjna ngantsjai. Kʼianga bʼexkiaa salmo jebi, tokʼoamaná nga nkjín koya josʼin bakó Jeobá je xi ñaki kjoatsjoacha kʼoa bakó ʼndeʼndee. Kʼianga kʼoatso nga je xi ñaki kjoatsjoacha tíjna ngantsjai, kui bakóyaná nga je kjoatsjoacha xi bakóle Jeobá je naxinandále tsínkʼia bʼantjaiya. Nʼio  basenkaoná nga ʼyaa nga tsín tsjionkon Jeobá je choʼndale, tosaa ya tjen tíjnakao xi je síxále, ngisaa kʼianga kjoa faʼatojin. Jósʼin basenkaoná: Kʼianga ʼyaa nga ya tjen tíjnakaoná je Jeobá tsjoa sʼe tokoán kʼoa chókjoajinná je kjoa xi bitjatojiaan kʼoa tosi tonda ya mangínyaa je ndiaa xi kuichokaoná nga sʼe̱ná kjoabijnachon (tʼexkiai Salmo 31:7). *

11. Tojo tso Salmo 86:5, ánni nga síchatʼaniná je Jeobá.

¹¹ Nga tjínle je xi ñaki kjoatsjoacha je Niná síchatʼaná. Kʼianga be Jeobá nga kʼoakjimanile je jéele jngo chjota síchatʼale, nga̱ bakóle xi ñaki kjoatsjoacha. Je David i kitso xi tʼatsʼe Jeobá kʼianga kiski jngo salmo: “Alikui kʼoatísíkaoná josʼin bakinná tʼatsʼe jée xi tibijnyaa kʼoa alikui kʼoatísíkaoná josʼin bakinná tʼatsʼe jéená” (Sal. 103:8-11). Je David nda be josatío kon je chjota xi kʼoamanile nga bajngijée, tonga kʼoati tsabe nga tíjnanda Jeobá nga síchatʼaná. Kʼianga tsakʼétsʼoa je David kʼoakitso ánni nga síchatʼaniná je Jeobá (tʼexkiai Salmo 86:5). * Nga bakó xi ñaki kjoatsjoacha je Jeobá síchatʼale ngatsʼi xi síjéle kjoanichatʼa.

12, 13. Jmé xi koasenkaoná kʼiatsa tsín ndatjín tokoán xi totʼatsʼe je jée xi tsakijnyaa ngasʼa.

¹² Nga jée kajiaan, basenkaoná nga ba sʼe tokoán nga̱ yaa kjuinroani nga kʼoakoa̱nniná jme xi kanʼia kʼoa nga si̱ndayaa yaoná. Tonga tjínkʼa je choʼndale Niná xi tsín nda satío kon xi totʼatsʼe je jée xi tsakajngi ngasʼa, nga̱ kʼoasʼin síkjaʼaitsjen nga tsínkʼia sichatʼale je Jeobá. Tsa kʼoatjín tokuin, xi koasenkaoli nga nda sʼe̱ni tokuin kuinga koa̱njinli nga je Jeobá mele koakoli xi ñaki kjoatsjoacha.

¹³ Jósʼin basenkaoná: Ningalani chjotajée maa, koaan nda sʼe̱ tokoán kʼoa kao kjoatsjoa si̱xálee je Jeobá, nga̱ kao “njínle Jesucristo ʼndíle Niná sítsjeyaná ngayije jéená” (1 Juan 1:7). Kʼiatsa ba sʼe tokoán nga ñʼai maná nikʼéjnaa jmeni xi tsín sasénle Jeobá, si̱kjaʼaitsjenjiaan nga  je Jeobá tíjnanda nga síchatʼale je xi kʼoama kjoaixinile je jéele. Kuenta sʼiaan jme xi kitso David xi tʼatsʼe kjoanichatʼa kʼoa nga bakóná xi ñaki kjoatsjoacha je Jeobá. I kitso: “Joni ngʼajmi nga ngisa ngʼa tíjna tikʼoajinni sonʼnde, kʼoatisʼin tíjna je xi ñaki kjoatsjoacha xi bakóle je xi tsokjónke. Jokji kjin tíjnale jña bitjoni tsʼuí kao jña kantjaini, kʼoakji kjin síkʼéjna je jée xi bijnyaa” (Sal. 103:11, 12). Je Jeobá tíjnanda nga síchatʼaná (Is. 55:7).

14. Jókitso David tʼatsʼe josʼin basenkaoná nga bakóná xi ñaki kjoatsjoacha je Niná.

¹⁴ Nga bakóná xi ñaki kjoatsjoacha je Niná basenkaoná nga tsín ya ska̱jiaan jme xi xkón sikʼéjnaná ngixko̱n. Kʼianga tsakʼétsʼoale Jeobá je David, i kitso: “Ji nikʼéjnaʼmanái; si̱kuindanái nga tsín kjoaʼaon koatejnajian. Ñaki kao kjoatsjoa si̱kʼéjnandáinái”. Kʼoa i kitsosa: “Xi je Jeobá sínʼiotʼa bakóle xi ñaki kjoatsjoacha” (Sal. 32:7, 10). Nichxin kjoatse, je xjáo xi kisʼendai naxinandá kui tsakinyakao je chjota nga tsín ya kichokʼetʼale je kontrale. Tikʼoasʼinni, nga bakóná xi ñaki kjoatsjoacha je Jeobá basenkaoná nga tsínkui kʼoasʼiaan jmeni xi chʼaosʼin sikʼéjnaná ngixko̱n. Xi ijngosani, kʼianga bakóná xi ñaki kjoatsjoacha je Jeobá kui xi mele nga koa̱nchriantʼalee (Jer. 31:3).

15. Jósʼin mangóson jngo xjáo taja kʼoa jñani ma bijnangʼiánngiaa kʼianga bakóná xi ñaki kjoatsjoacha je Jeobá.

¹⁵ Ijngosa choa̱ kisichjén David tʼatsʼe josʼin síkuinda Jeobá je naxinandále. I kitso: “Je Niná yaa mangóson jngo ʼnde jñani ma batejnangʼiánngia, je Niná xi bakóna xi ñaki kjoatsjoacha”. Kʼoa i kitsosa: “Jéní xi bakóna xi ñaki kjoatsjoacha kʼoa xi tsjoánganʼiona, jñani ma batejnangʼiánngia kʼoa xi bʼasjentjaina, jéní xi basenchjoana kʼoa jé xi síkuindana” (Sal. 59:17; 144:2). Ánni nga kui kisingósonkaoni je David jngo xjáo taja kʼoa jñani ma bijnangʼiánngiaa kʼianga bakóná xi ñaki kjoatsjoacha je Jeobá. Tojñani tiyoaa, jé Jeobá koasenkaoná nga tsín jme xi koa̱nná kʼoa nga tosi tonda nda kuiyoaa ngixko̱n nga choʼndale maa. Ya Salmo 91 kʼoati tso nga je Jeobá síkuindaná, i kitso xi kiski salmo jebi: “I xínle Jeobá: Jiní xi bisenchjoai nga tsín jme xi mana kʼoa jiní xjáo tajana” (Sal. 91:1-3, 9, 14). Je Moisés kʼoati kui choa̱ kisichjén (Sal. 90:1, nota). Kʼianga jeme kuiyá, i kitso: “Saʼnda kjoatse yaa mangóson Niná jngo ʼnde jñani ma bijnangʼiánngiaa; yaa tijnangi je xjale xi tjío ngantsjai” (Deut. 33:27). Jmé xi bakóyaná texto jebi xi tʼatsʼe Jeobá nga “yaa tijnangi je xjale xi tjío ngantsjai” tso.

16. Jñánile nga jao koya kjoanichikontʼain xi tjínná (Salmo 136:23).

¹⁶ Kʼianga ñaki tjínjngo tokoán nga je Jeobá sikuindaná alikui jme xi nokjonlee. Ninga kʼoalani, sakʼoajin kjuinroajen tokoán kʼoa ba sa̱tío tokoán. Jósʼin koasenkaoná Jeobá kʼianga kʼoasatío tokoán (tʼexkiai Salmo 136:23). * Kao xjale skómitjenniná kʼoa ngasin nganda koasenkaoná nga kuisenkixi ijngokʼá (Sal. 28:9; 94:18). Jósʼin basenkaoná: Nga ʼyaa nga basenkaoná je Jeobá kui faʼaitsjenná je kjoanichikontʼain xi tjínná. Xi títjon, tojñani tiyoaa, ʼyañá nga je Jeobá sikuindaná. Kʼoa xi majaoni, ʼyañá nga nʼio chjí bená je Jeobá.

17. Jméni xi tsín jao kʼoé tokoán (Salmo 33:18-22).

¹⁷ Tojosʼin tiʼyaa, alikui jao kʼoé tokoán nga je Jeobá koasenkaoná nga kjoa kuitjátojiaan  kʼoa koasenkaoná nga kixi kjuintʼalee (2 Cor. 4:7-9). Je profeta Jeremías i kitso: “Totʼatsʼe xi ñaki kjoatsjoachale Jeobá nga kjesa fesonjián, nga̱ je kjoamatokonle alikui fetʼa” (Lam. 3:22). Alikui jao tjín tokoán nga tosi tonda koakoná Jeobá xi ñaki kjoatsjoacha, nga̱ je Biblia kʼoatso nga “je xko̱n Jeobá yaa tíkotsenle je xi tsokjónke, je xi tjíokoya nga koakole xi ñaki kjoatsjoacha” (tʼexkiai Salmo 33:18-22). *

18, 19. 1) Tojosʼin kachotʼayajiaan, jméni xi si̱kjaʼaitsjenjiaan. 2) Jmé xi chótʼayajiaan ya kjoaʼmiya xi ijngo.

¹⁸ Tojosʼin kachotʼayajiaan, nga kjesa je Jeobá nixájinlee tokʼoa jebakóná kjoatsjoacha tojo síkao ngatsʼi chjota. Tonga kʼianga jetsaʼyaxkoán tsakakóná xi ñaki kjoatsjoacha. Kʼianga bakóná Niná xi ñaki kjoatsjoacha síkuindaná. Jé Jeobá koasenkaoná nga chrian kuiyolee ngantsjai, kʼoa sitjoson jmeni xi tongini tsoná. Kui xi mele nga miyole koaan ngantsjai (Sal. 46:1, 2, 7). Tojme kjoa xi kuitjátojiaan, jé Jeobá koasenkaoná nga kixi kjuintʼalee.

¹⁹ Jekaʼyaa josʼin bakóle Jeobá xi ñaki kjoatsjoacha je choʼndale kʼoa kui xi mele nga kʼoati koakolee xi ñaki kjoatsjoacha je xíngiaa. Yaa kjoaʼmiya xi ijngo chótʼayajiaan jósʼin koakoá xi ñaki kjoatsjoacha.