1. Iehova be ita e hagoadadamu dahaka baita kara?

IEHOVA enai mia hanaihanai lalokauna na mai anina bada. (Hos. 6:6) Ia ese ena hesiai taudia e hagoadadiamu una kara bae hahedinaraia. Dirava ese peroveta tauna Mika amo ita e hagoadadamu ‘mia hanaihanai lalokauna baita ura henia.’ (Mika 6:8, NWT futnout) To una baita karaia totona mia hanaihanai lalokauna anina baita dibaia guna na namo.

2. Mia hanaihanai lalokauna anina be dahaka?

² Mia hanaihanai lalokauna anina be dahaka? New World Translation Baibul lalonai una hereva na nega 230 bamona e hedinarai. Bema ta na mia hanaihanai lalokauna e hahedinaraiamu, anina na ia ese ta be lalokau henia badamu bona be badinaia hanaihanaimu. Nega momo una na Iehova ese taunimanima ediai e hahedinaraiamu lalokauna e herevalaiamu. To, una lalokau na taunimanima ese danu e hahedinaraiamu. Iehova na mia hanaihanai lalokauna e hahedinaraiamu tauna hereadaena. Ina atikol ai, Iehova ese taunimanima ediai mia hanaihanai lalokauna e hahedinaraiamu dalana baita herevalaiamu. Atikol iharuana ai, ita ese Iehova baita tohotohoa bona ta ta edai mia hanaihanai lalokauna baita hahedinaraia dalana baita herevalaiamu.

3. Iehova ese Mose enai be dahaka e gwauraia hedinarai?

³ Israel taudia na Aigupto amo e raka lasi bena nega sisina murinai, Iehova na Mose enai ia ladana bona ena kara e gwaurai hedinarai. Ia na e gwa: “Iehova, Iehova, hebogahisi bona kara namo Diravana, badu ai e halahemu bona mia hanaihanai  lalokauna bona hereva momokani ai e honuhonu-dae, taunimanima tausen momo ediai mia hanaihanai lalokauna e hahedinaraiamu, kerere bona kara dika e gwautaomu.” (Eso. 34:6, 7, NWT) Unu hereva namodia amo Iehova ese Mose enai mia hanaihanai lalokauna anina e hahedinaraia. Una be dahaka?

4-5. (a) Iehova sibona be ede e hegwaurai toma? (b) Ededia henanadai baita herevalaimu?

⁴ Iehova ese sibona e hegwaurai neganai, e gwa ia na ‘mia hanaihanai lalokauna ai e honuhonu dae.’ Baibul ai una hereva na ma nega siks e gwauraia. (Num. 14:18, NWT; Neh. 9:17, NWT; Sal. 86:15, NWT; 103:8, NWT; Ioel 2:13, NWT; Iona 4:2, NWT) Baibul ese una hereva e ḡaukaralaia neganai, ia na Iehova sibona mo e herevalaia, dia taunimanima. Iehova na sibona e hegwauraimu mia hanaihanai lalokauna amo e honuhonu dae. Una ese e hahedinaraiamu Ienai una kara na mai anina bada. Una dainai King David na e gwa: “Iehova e, emu mia hanaihanai lalokauna na bada herea, ena bada ese guba danu e abiamu, . . . Dirava e, emu lalokau karadia na namo herea! Oi hanimu ikerukerudia ai taunimanima na bae hehuni diba.” (Sal. 36:5, 7, NWT) David heḡereḡerena, ita ese Dirava ena mia hanaihanai lalokauna ta laloa badamu, a?

⁵ Mia hanaihanai lalokauna baita lalopararalaia namonamo totona, mani ini henanadai rua aita herevalai: Iehova be daidia ediai mia hanaihanai lalokauna e hahedinaraiamu? Bona edena dalai Iehova ena mia hanaihanai lalokauna ese ita e durudamu?

6. Iehova be daidia ediai mia hanaihanai lalokauna e hahedinaraiamu?

⁶ Iehova be daidiai ediai mia hanaihanai lalokauna e hahedinaraiamu? Baibul ese baita ura heni ḡaudia momo e herevalai, heḡereḡere “biru” ḡaukara, “mata-hakani,” “vine ranuna bona dehoro,” bona “aonega.” (2 Sis. 26:10; Her. 12:1; 21:17; 29:3) To, mia hanaihanai lalokauna na ḡau ta ai basita hahedinaraia diba; una na taunimanima ediai mo baita hahedinaraia karana. To, Iehova ese mia hanaihanai lalokauna na dia taunimanima iboudiai ediai e hahedinaraiamu. Ia ese una kara na ia turana namodia ediai e hahedinaraiamu. Eda Dirava ese turana na se rakatanidiamu. Ia na e uramu idia ediai ḡau namodia bae vara, bona be lalokau henidia hanaihanaimu.

7. Edena dalai Iehova ese taunimanima iboudiai ediai lalokau e hahedinaraia?

⁷ Iehova ese taunimanima iboudiai ediai lalokau e hahedinaraia. Iesu ese Nikodemo e hamaoroa eto: “Dirava ese tanobada ini e  lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.”​—Ioa. 3:1, 16; Mat. 5:44, 45.

8-9. (a) Dahaka dainai Iehova ese ena hesiai taudia ediai mia hanaihanai lalokauna e hahedinaraiamu? (b) Dahaka baita herevalaimu?

⁸ Da tame herevalaia guna bamona, Iehova ese mia hanaihanai lalokauna na ia turana namodia​—eiava iena hesiai taudia ediai e hahedinaraiamu. King David bona peroveta tauna Daniel edia hereva amo una na e hamomokania. Heḡereḡere, David na e gwa: “Oi e dibamu taudia ediai emu mia hanaihanai lalokauna ba hahesiriua.” “Iehova ena lalokau na baine mia ela bona hanaihanai ia garina e garimu taudia ediai.” Bona Daniel na e gwa: “Ḡaubada e, Dirava badana bona mai garina, oi ese emu gwauhamata bona emu hebogahisi [“mia hanaihanai lalokauna,” NWT] o hahesiriudiamu, e ura henimumu bona emu haheḡani e badinadiamu taudia ediai.” (Sal. 36:10, NWT; 103:17, NWT; Dan. 9:4) Unu hereva ese e hahedinaraimu Iehova ese ena hesiai taudia ediai mia hanaihanai lalokauna e hahedinaraiamu, badina idia na mai dibadia Ia, e gari heniamu, e lalokau heniamu, bona ena haheḡani e badinamu. Iehova ese ena mia hanaihanai lalokauna na ia e tomadiho heniamu taudia ediai mo e hahedinaraiamu.

⁹ Iehova do asita hesiai henia neganai, Ia ese taunimanima iboudiai ediai e hahedinaraia lalokauna na ta mamia. (Sal. 104:14) To, ita na ia ta tomadiho heniamu dainai, ia ese mia hanaihanai lalokauna na ita edai e hahedinaraiamu danu. Iehova ese ena hesiai taudia na e hamaorodia: “Umui emui ai egu mia hanaihanai lalokauna na basine doko.” (Isa. 54:10, NWT) Momokani, David ese una na e mamia, ia na e gwa, “Iehova ese ia e badinaiamu taudia na dala namo hereana ai baine kara henidia.” (Sal. 4:3, NWT) Una ese e hagoadadamu dahaka baita kara? Salamo itorena tauna na e gwa: “Daika na mai aonegana, ia ese ini ḡau do baine lalodia, taunimanima ese Iehova ena hebogahisi [“mia hanaihanai lalokauna,” NWT] bae haeroa.” (Sal. 107:43) Unu hereva ta lalodiamu lalonai, mani Iehova ena mia hanaihanai lalokauna ese ena hesiai taudia e durudiamu daladia toi aita herevalai.

10. Dirava ena mia hanaihanai lalokauna e hesiriumu karana ese ita be ede e duruda tomamu? (Salamo 31:7)

¹⁰ Dirava ena mia hanaihanai lalokauna na e hesiriu hanaihanaimu. Una mai anina bada karana na Salamo 136 ai nega 26 e hedinarai. Siri ginigunana ai e gwa: “Iehova ba hanamoa, badina be ia na namo; ena hebogahisi [“mia hanaihanai lalokauna,” NWT] na e hesiriu hanaihanaimu.” (Sal. 136:1) Siri 2 ela 26 ai, ina hereva “mia hanaihanai lalokauna na e hesiriu hanaihanaimu” na e gwauraia loulou. Una salamo ena siri oredia ta duahimu lalonai, ta moalemu badina Iehova ese dala momo ai ena mia hanaihanai lalokauna na e hahedinaraia hanaihanaimu. Unu siri ai ina hereva “mia hanaihanai lalokauna na e hesiriu hanaihanaimu” ese e hadibadamu Dirava ena lalokau ena taunimanima ediai na se idaumu. Ta moale dikadikamu badina ta dibamu Iehova ese ena hesiai taudia na se rakatanidiamu! E lalokau henidiamu dainai, dika negadiai Ia na idia dekedekediai. Ita e durudamu dalana: Ta dibamu Iehova na ita dekedekedai dainai, una ese ita na e hamoaledamu bona e hagoadadamu metau idauidau baita haheaukalai bona dounu Ia baita hesiai henia.​—Salamo 31:7 ba duahia.

11. Salamo 86:5 heḡereḡerena, dahaka dainai Iehova ese dika e gwautaomu?

¹¹ Dirava na ena mia hanaihanai lalokauna dainai dika e gwautaomu. Iehova na e itaia bema kara dika tauna na e helalo-kerehaimu bona ena kara dikadia e dadaraimu neganai, ena mia hanaihanai lalokauna dainai una tau ena kara dika na e gwautaomu. Salamo e torea tauna David ese Iehova na ini e herevalaia toma: “Eda kara dika heḡereḡeredia se kara henidamu, eda kara havara na davadia se henidamu.” (Sal. 103:8-11) David na e mamia hisihisina amo e diba kara dika ilalohekwarahilaina ena metau be ede bamona. To, danu e diba Iehova ‘na dika e gwautaomu’ Diravana. Dahaka dainai Iehova ese dika e gwautaomu? Haere na Salamo 86:5 ai e herevalaia. (Ba duahia.) David ena ḡuriḡuri ai e gwauraia heḡereḡerena, Iehova na dika e gwautaomu Diravana dainai Ia e boi heniamu taudia ediai ena mia hanaihanai lalokauna e hahedinaraia.

12-13. Bema guna ta kara kereredia daidiai ta lalohisihisimu, dahaka ese be durudamu?

 ¹² Kerere ta karamu neganai ta lalohisihisimu na maoro, badina una ese be durudamu baita helalo-kerehai bona kara haida baita kara eda kerere baita hamaoromaoro. Dirava ena hesiai taudia haida na guna e kara kereredia daidiai doini e lalohisihisimu. Idia na e laloamu Iehova ese edia dika na basine gwautaomu, ena be de helalo-kerehai. Bema unu o hemami tomamu, Dirava ese mai ena ura ida ena mia hanaihanai lalokauna e hahedinaraiamu karana bo dibaiamu neganai una ese be durumumu.

¹³ Ita e durudamu dalana: Ena be kerere ta karamu, to mai moaleda ida Iehova baita hesiai henia bona laloda mamina na ḡoeva. Badina ‘ia Natuna Iesu rarana ese eda dika iboudiai e huri oho.’ (1 Ioa. 1:7) Bema o kara kereredia haida daidiai o lalomanokamu, ba helalotao Iehova na e ura dikadikamu e helalo-kerehai kara dika tauna ena dika baine gwautao. David ese mia hanaihanai lalokauna bona dika igwautaona karana e herevalaia dalana mani a laloa. Ia na e gwa: “Guba bona tanobada padadia na bada herea heḡereḡerena, iena hebogahisi [“mia hanaihanai lalokauna,” NWT] na unu e bada tomamu ia garina e garimu taudia ediai; laurabada kahana bona lahara kahana padadia edia daudau heḡereḡerena, eda kara dika na ita eda amo unu e abidia oho tomamu.” (Sal. 103:11, 12) Oibe, Iehova na mai ena ura ida “dika idoinai baine gwaua tao.”​—Isa. 55:7.

14. Dirava ena mia hanaihanai lalokauna ese ita baine gimada dalana be David ese ede e herevalaia toma?

¹⁴ Dirava ena mia hanaihanai lalokauna ese lauma dalanai e gimadamu. David na Iehova e ḡuriḡuri henia, e gwa: “Oi na egu komu gabuna, dika amo o hamaurigumu, bona hahemauri anedia amo o haheḡeḡegu daemu. . . . Iehova e abidadama heniamu tauna na hebogahisi ese e ḡeḡea daemu.” (Sal. 32:7, 10) Idaunega hanuana ta e ḡeḡea ahu habadia ese ena taunimanima e gimadiamu heḡereḡerena, Iehova ena mia hanaihanai lalokauna ese ita gimadamu ḡau ta ese ia hetura henina karana basine hadikaia totona. Danu, Iehova na ena mia hanaihanai lalokauna dainai ita e verida mai Ia baita hetura henia.​—Ier. 31:3.

15. Edena dalai Iehova ena mia hanaihanai lalokauna na kohoro bona roho mauri gabuna na heto?

¹⁵ David ese haheḡereḡere herevana ta amo Dirava ese ena taunimanima e gimadiamu dalana e herevalaia. Ia na e gwa: “Dirava e, oi na egu kohoro; e bogagu hisimu Diravana.” Danu David ese Iehova na ini e herevalaia toma: “Ia na egu nadi-gini bona egu kohoro, igimagu bona ihamaurigu, egu kesi bona egu roho mauri gabuna.” (Sal. 59:17; 144:2) Dahaka dainai David ese Iehova ena mia hanaihanai lalokauna na kohoro bona roho mauri gabuna ida e haheḡereḡerea? Herevana edeseniai ta nohomu to ita na Iehova ena hesiai taudia dainai, Iehova ese dala idauidau ai be gimadamu, unu amo ita ese eda hetura karana Ia ida baita gimaia. Hahegoada herevana unu bamona danu Salamo 91 ai baita davariamu. Salamo itorena tauna na e gwa, Iehova na “egu roho mauri gabuna bona egu kohoro.” (Sal. 91:1-3, 9, 14) Mose ese haheḡereḡere unu bamona danu e ḡaukaralaia. (Sal. 90:1) Mose na do se mase ai ina hahegoada herevana e gwauraia. E gwa: “Noho hanaihanai Diravana na emu noho gabuna; Mia-hanaihanai imadia na henumu ai.” (Deu. 33:27) Ina hereva “mia-hanaihanai imadia na henumu ai” anina be dahaka?

16. Iehova be ededia dala rua ai e durudamu? (Salamo 136:23)

¹⁶ Bema baita abia dae Iehova na eda Roho Mauri Gabuna, baita noho namonamomu. To, nega haida baita manokamu bona baita morumu. Nega unu bamodiai Iehova be edena dalai ita be durudamu? (Salamo 136:23 ba duahia.) Iehova ese imadai be abimu, bena taina ruana be haginida toremu. (Sal. 28:9;  94:18) Ita e durudamu dalana: Ta dibamu hanaihanai Dirava enai baita tabekau diba. Una ena namo rua be ini: Ginigunana, herevana edeseniai ta nohomu, to Iehova ese hanaihanai be gimadamu. Iharuana, Tamada lalokauna gubai ese ita na e laloda badamu.

17. Dirava ena mia hanaihanai lalokauna dainai, dahaka ta dibamu? (Salamo 33:18-22)

¹⁷ Matamanai tame herevalaia bamona, hahetoho ta davarimu neganai namona na baita diba Iehova na ita daidai kara ta be karaiamu unu amo Ia baita badinaia noho. (2 Kor. 4:7-9) Peroveta tauna Ieremia na e gwa: “Iehova ena mia-hanaihanai lalokauna na se oremu, ena hebogahisi karadia na asie dokomu.” (Roh. 3:22) Namona na baita diba Iehova na ita edai ena mia hanaihanai lalokauna be hahedinaraiamu, badina salamo itorena tauna na e gwa, “Iehova ese ia garina e garimu taudia na e itadiamu; iena hebogahisi [“mia hanaihanai lalokauna,” NWT] e laroamu taudia ia ese e itadia taomu.”​—Salamo 33:18-22 ba duahi.

18-19. (a) Dahaka ta uramu baita laloatao? (b) Atikol gabenai dahaka baita herevalaimu?

¹⁸ Dahaka ta uramu baita laloatao? Iehova do asita hesiai henia neganai, ia ese taunimanima iboudiai ediai e hahedinaraia lalokauna na ta mamia. To, ita na Ia ta tomadiho heniamu taudia dainai iena mia hanaihanai lalokauna amo namo ta davari. Una lalokau dainai, Iehova ese e gimadamu, vaitani imana amo e rosidamu. Ia na hanaihanai ita dekedekedai bona ena gwauhamata ita edai na be haḡuḡurumu. Ia na e uramu ia turana ai baitala hanaihanai! (Sal. 46:1, 2, 7) Una dainai, herevana dahaka hahetoho ta davarimu, to Iehova ese be hagoadadamu ia baita badinaia noho totona.

¹⁹ Iehova ese ena hesiai taudia ediai ena mia hanaihanai lalokauna e hahedinaraiamu dalana na ta itaiamu. Bona ia na e uramu ita ta ta ese mia hanaihanai lalokauna baita hahedinaraia. Edena dalai unu baita kara toma? Atikol gabena ese una be herevalaiamu.