1. Jehofa o re kgothaletša gore re dire’ng?

JEHOFA o lebelela seka sa gagwe sa botho bjo bogolo se le bohlokwa kudu go yena. (Hos. 6:6) Le gona o nyaka gore le rena re se lebelele se le bohlokwa kudu go rena. Moporofeta Mika o ile a bolela gore Modimo wa rena o re kgothaletša gore re ‘rate botho.’ (Mika 6:8) Eupša pele re dira seo, re swanetše go tseba gore botho bjo bogolo ke eng.

2. Botho bjo bogolo ke’ng?

² Botho bjo bogolo ke’ng? Lentšu “botho” goba lerato leo le sa felego le tšwelela ka makga a mantši ka Beibeleng ya Phetolelo ya Lefase le Lefsa ya Mangwalo a Makgethwa. Motho yo a nago le botho o rata batho ba bangwe kudu e bile o dula a ba thekga ka dinako ka moka. Gantši Modimo o bontšha batho botho bja gagwe ka gobane a ba rata, eupša ka dinako tše dingwe batho le bona ba bontšhana botho. Ga go na motho yo a nago le botho bjo bogolo go feta Jehofa. Sehlogong se re tlo ithuta kamoo Jehofa a bontšhago batho botho bja gagwe. Sehlogong se se latelago, re tlo ithuta gore re ka bontšha ba bangwe bjang botho go swana le Jehofa.

3. Jehofa o ile a botša Moshe gore ke yena Modimo wa mohuta mang?

³ Ka moragonyana ga gore Baisiraele ba tloge Egipita, Jehofa o ile a botša Moshe leina la gagwe le dika tša gagwe. Moshe o itše: “Jehofa, Jehofa, Modimo yo a gaugelago le yo a šokelago, yo a diegago go galefa, yo a tletšego botho le therešo, yo a bolokelago ba dikete botho bja gagwe, yo a swarelago molato, karogo le sebe.” (Ek. 34:6, 7) Ge Jehofa a be a botša Moshe mantšu a a kgothatšago, o ile a mmotša le selo se sengwe  se bohlokwa kudu ka botho bja gagwe. Selo seo ke eng?

4-5. (a) Jehofa o itlhalosa bjang? (b) Re tlo araba dipotšišo dife?

⁴ Jehofa ga a no bolela gore o na le botho feela eupša o itlhalosa e le Modimo yo a “tletšego botho.” Jehofa o itlhalosa ka tsela ye ka makga a fetago a tshelelago ka Beibeleng. (Num. 14:18; Neh. 9:17; Ps. 86:15; 103:8; Joele 2:13; Jona 4:2) Le gona mantšu ao a rego ‘o tletše botho’ a lebišitše go yena feela, e sego go batho. Go a kwagala gore gantši ka Beibeleng, Jehofa ke yena feela a itlhalosago a na le seka se sa botho bjo bogolo. Re kgona go bona gore seka sa botho se bohlokwa kudu go yena. * Ke ka baka leo Kgoši Dafida a ilego a re: “Wena Jehofa, botho bja gago bo magodimong. . . . Botho bja gago ke bjo bohlokwa gakaakang, wena Modimo! Bana ba batho bona ba tšhabela ka tlase ga moriti wa maphego a gago.” (Ps. 36:5, 7) Na botho bja Modimo bo bohlokwa kudu go rena go swana le ge bo be bo le bohlokwa go Dafida?

⁵ E le gore re kwešiše ka mo go tseneletšego gore botho ke eng, a re arabeng dipotšišo tše tše pedi: Jehofa o bontšha bomang botho bja gagwe bjo bogolo? Gona rena re holega bjang ge Jehofa a re bontšha botho bja gagwe bjo bogolo?

6. Jehofa o bontšha bomang botho bja gagwe?

⁶ Jehofa o bontšha bomang botho bja gagwe bjo bogolo? Beibele e bontšha gore re ka rata dilo tše dintši, tše bjalo ka go “lema,” “beine le makhura,” “kgalemelo,” “tsebo,” “bohlale,” le tše dingwe. (2 Dikor. 26:10; Die. 12:1; 21:17; 29:3) Jehofa o bontšha batho feela botho bja gagwe e sego dilo tše dingwe. Le gona Jehofa ga a no bontšha motho yo mongwe le yo mongwe botho bja gagwe bjo bogolo. Eupša o bo bontšha feela batho bao ba nago le segwera se sebotse le yena. O tshepiša gore o tlo ba direla dilo tše dibotse le gore o tlo dula a ba rata.

7. Jehofa o bontšhitše bjang gore o rata batho ka moka?

⁷ Jehofa o bontšhitše gore o rata batho ka moka. Jesu o ile a botša monna yo a bitšwago Nikodemo gore: “Modimo o ratile lefase [e lego batho] kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Joh. 3:1, 16; Mat. 5:44, 45.

8-9. (a) Ke ka baka la’ng Jehofa a bontšha bahlanka ba gagwe botho bjo bogolo? (b) Re tlo ithuta’ng?

 ⁸ Pejana re boletše gore Jehofa o bontšha bahlanka ba gagwe bao ba nago le segwera se sebotse le yena botho bjo bogolo. Bohlatse bja se re bo bona ka seo se ilego sa bolelwa ke Kgoši Dafida le moporofeta Daniele. Ka mohlala, Dafida o itše: “Tšwela pele o bontšha botho bja gago go bao ba go tsebago.” “Botho bja Jehofa ke bja go tloga mehleng ya neng le neng gaešita le go iša mehleng ya neng le neng go bao ba mmoifago.” Le gona Daniele o itše: “Joo Jehofa Modimo wa therešo, yoo a bontšhago botho go bao ba mo ratago le go bao ba bolokago ditaelo tša gagwe.” (Ps. 36:10; 103:17; Dan. 9:4) Go ya ka ditemana tše, Jehofa o bontšha bahlanka ba gagwe botho ka gobane ba mo tseba, ba mmoifa, ba mo rata e bile ba boloka ditaelo tša gagwe. Jehofa o bontšha botho bja gagwe bjo bogolo go batho bao ba mo hlankelago ka tsela yeo a e amogelago.

⁹ Pele re thoma go hlankela Jehofa, o be a re rata go swana le motho yo mongwe le yo mongwe. (Ps. 104:14) Eupša ka ge gona bjale re le bahlanka ba gagwe, ga a no re rata fela eupša o re bontšha botho bja gagwe bjo bogolo. Le gona, Jehofa o kgonthišetša bahlanka ba gagwe ka gore: ‘Botho bja ka bo ka se tlošwe go lena.’ (Jes. 54:10) Dafida le yena o ile a bona gore ka nnete Jehofa o swara bao ba mmotegelago ka botho. (Ps. 4:3) Go tseba gore Jehofa o a re rata go re dira gore re ikwe re nyaka go dira’ng? Mopsalme o itše: “Yo bohlale ke mang? Yena yoo o tla latela dilo tše a ba a ela hloko ditiro tša Jehofa tša botho.” (Ps. 107:43) Keletšo ye e botse e tšwa go Jehofa. Ga bjale re tlo ithuta ka ditsela tše tharo tša kamoo Jehofa a re bontšhago botho bja gagwe bjo bogolo le gore seo se re hola bjang.

10. Go tseba gore Jehofa o re bontšha botho bja gagwe go ya go ile go re hola bjang? (Psalme 31:7)

¹⁰ Modimo o re bontšha botho bja gagwe bjo bogolo go ya go ile. Go Psalme 136, seka se se bohlokwa sa botho bjo bogolo se ngwadilwe ka makga a 26. Temaneng ya mathomo kgaolong ye, re bala gore: “Lebogang Jehofa,  gobane o lokile, gobane botho bja gagwe ke bja go iša mehleng ya neng le neng.” (Ps. 136:1) Mantšu ao a rego “botho bja gagwe ke bja go iša mehleng ya neng le neng,” re a hwetša temaneng e nngwe le e nngwe go tloga go ya bobedi go fihla go ya bo-26. Ge re bala mantšu a mafelelo kgaolong ye, re kgongwa kudu ke go tseba gore Jehofa tla dula a re bontšha botho bja gagwe bjo bogolo ka ditsela tše dintši. Polelwana yeo e tšwelelago gantši kgaolong ye yeo e rego: “Botho bja gagwe ke bja go iša mehleng ya neng le neng,” e re kgodiša gore re dule re tseba gore Modimo a ka se tlogele go rata bahlanka ba gagwe. Go kgothatša kudu go tseba gore Jehofa ga a felele bahlanka ba gagwe pelo! Go e na le moo o ba rata kudu e bile o a ba thekga, kudukudu dinakong tša mathata. Re holega bjang? Go tseba gore Jehofa o tla dula a na le rena go a re thabiša e bile go re fa matla a gore re dule re kgotlelela mathata le go mo hlankela.—Bala Psalme 31:7.

11. Go ya ka Psalme 86:5, ke eng seo se dirago gore Jehofa a rate go lebalela?

¹¹ Modimo o a re lebalela ka gobane o na le botho bjo bogolo. Ge Jehofa a bona gore motho yo a dirilego sebe o a itshola gomme a tlogela go dira dilo tše mpe tšeo a bego a di dira, o mmontšha botho bjo bogolo ke moka a mo lebalela. Mopsalme Dafida o ile a bolela ka Jehofa gore: “Ga se a re swara gaešita le go ya ka tšeo di lebanego dibe tša rena, le gona ga se a re tlišetša tšeo di swanelago melato ya rena.” (Ps. 103:8-11) Dafida o be a tseba gore go ba le letswalo le molato go bjang. Eupša o be a tseba gore Jehofa o “ikemišeditše go lebalela.” Ke’ng seo se dirago gore Jehofa a rate go lebalela? Karabo ya potšišo ye e go Psalme 86:5. (Bala.) Dafida o ile a bolela thapelong ya gagwe gore Jehofa o a lebalela ka gobane o bontšha botho bja gagwe bjo bogolo go batho ka moka bao ba mo kgopelago gore a ba lebalele.

12-13. Re ka thušwa ke’ng ge e ba re ikwa re nyamišwa ke dilo tšeo re di dirilego nakong e fetilego

¹² Ge re dirile sebe, ke ga tlhago e bile ke mo gobotse gore re ikwe re itshola. Seo se tla re thuša gore re itshole le gore re se sa tšwela pele ka go dira sebe seo. Bahlanka ba bangwe ba Jehofa ba ikwa ba nyamišwa ke dibe tšeo  ba di dirilego nakong e fetilego. Seo se dira gore ba dule ba nagana gore Jehofa a ka se tsoge a ba lebaletše le ge ba ka itshola. Ge e ba le wena o ikwa ka tsela ye, go tseba gore Jehofa o ikemišeditše go go bontšha botho bja gagwe bjo bogolo go tlo go thuša.

¹³ Re holega bjang? Le ge re se ra phethagala, re ka hlankela Jehofa re thabile le ka letswalo le le hlwekilego. Se se a kgonega ka gobane “madi a Jesu Morwa wa gagwe a re hlwekiša sebeng sohle.” (1 Joh. 1:7) Ge e ba o nyamišitšwe ke sebe seo o se dirilego, tseba gore Jehofa o fela pelo ya gore o itshole e bile o ikemišeditše go go lebalela. Bona gore Dafida o swantšhitše bjang botho bjo bogolo le go lebalela. O ngwadile gore: “Go etša ge magodimo a phagametše lefase, le botho bja gagwe ke bjo bo bogolo ka tsela yeo go bao ba mmoifago. Go etša ge bohlabela bo le kgole le bodikela, le dikarogo tša rena o di lahletše kgole le rena ka tsela yeo.” (Ps. 103:11, 12) Ruri Jehofa o ikemišeditše go re “lebalela kudu.”—Jes 55:7.

14. Dafida o hlalositše bjang tsela yeo botho bjo bogolo bja Jehofa bo re šireletšago ka yona?

¹⁴ Botho bjo bogolo bja Jehofa bo a re šireletša. Dafida o ile a rapela Jehofa ka gore: “O lefelo la ka la go ikuta; o tla ntšhireletša tlalelong. Ke tla dikanetšwa ke tlhalalo yeo e tlišwago ke ge o ntlhakodiša. . . . Eupša yo a botilego Jehofa o dikologilwe ke botho.” (Ps. 32:7, 10) Go no swana le ge mehleng ya kgale go be go na le maboto ao a bego a šireleditše metse gore e se ke ya hlaselwa ke manaba, botho bjo bogolo bjoo Jehofa a re bontšhago bjona bo re šireletša gore go se be le selo seo se senyago segwera sa rena le yena. Le gona ka ge Jehofa a na le botho bjo bogolo, seo se dira gore a re gogele go yena.—Jer. 31:3.

15. Botho bjo bogolo bja Jehofa bo swana bjang le lefelo la go ikuta?

¹⁵ Dafida o ile a diriša papišo e nngwe go bontšha gore Modimo o šireletša bahlanka ba gagwe. O ngwadile gore: “Modimo o sebo sa ka, Modimo yo a mpontšhago botho.” Le gona o ile a ngwala gore: “Yena yo e lego botho bja ka le sebo sa ka, mošireletši wa ka le mohlakodiši wa ka, kotse ya ka le yo ke tšhabetšego go yena.” (Ps. 59:17; 144:2) Ke ka baka la’ng Dafida a ile swantšha botho bjo bogolo bja Jehofa le lefelo la go ikuta? Go sa šetšwe gore bahlanka ba Jehofa ba dula kae mo lefaseng, o tlo dira sohle seo a ka se kgonago gore a ba šireletše gore ba dule ba na le segwera se sebotse le yena. Mantšu a a boletšwego ke Dafida a swana le ao a lego go Psalme 91. Mongwadi yoo wa Dipsalme o itše: “Ke tla botša Jehofa ka re: ‘O setšhabelo sa ka le sebo sa ka.’” (Ps. 91:1-3, 9, 14) Moshe le yena o ile a bolela gore Jehofa ke setšhabelo sa gagwe. (Ps. 90:1) Pejana ga ge a ka hwa o ile a bolela mantšu a mangwe ao a kgothatšago. O itše: “Modimo e bile lefelo la boutamo go tloga mehleng ya bogologolo, matsogo a gagwe a neng le neng a a go thekga.” (Doit. 33:27) Mantšu a a rego “matsogo a gagwe a neng le neng a a go thekga” a re botša’ng ka Jehofa?

16. Jehofa o re thuša bjang? (Psalme 136:23)

¹⁶ Ge re tshepa gore Jehofa o tlo re šireletša, re tlo ikwa re šireletšegile. Eupša ka dinako tše dingwe re ka ikwa re nyamile e bile re sa tsebe gore re dire eng. Jehofa o dira’ng ge re ikwa ka tsela ye? (Bala Psalme 136:23.) O re thekga ka matsogo a gagwe, a re matlafatša le go re thuša gore re se sa ikwa re nyamile. (Ps. 28:9; 94:18) Re holega bjang? Go tseba gore Modimo o ikemišeditše go dula a re thekga, go dira gore re gopole gore o a re thuša.  Modimo o re thuša bjang? O tlo dula a re šireletša go sa šetšwe gore re dula kae. E bile Tatago rena wa magodimong yo a re ratago o tloga a na le taba le rena.

17. Ka ge Modimo a na le botho bjo bogolo, re ka kgodišega ka’ng? (Psalme 33:18-22)

¹⁷ Re ithutile gore ge re na le mathata, re ka kgodišega gore Jehofa o tla dula a re thekga gore re be le segwera se sebotse le yena. (2 Bakor. 4:7-9) Moporofeta Jeremia o ile a re: “Ke ka baka la ditiro tša botho bja Jehofa ge re sa fedišwa, ka gobane dikgaugelo tša gagwe di ka se fele.” (Dillo 3:22) Re ka kgodišega gore Jehofa o tlo dula a re bontšha botho bja gagwe bjo bogolo ka gobane mopsalme o ngwadile gore: “Leihlo la Jehofa le lebeletše bao ba mmoifago, le go bao ba letetšego botho bja gagwe.”—Bala Psalme 33:18-22.

18-19. (a) Re swanetše go dula re gopola’ng? (b) Re tlo ithuta’ng sehlogong se se latelago?

¹⁸ Re swanetše go dula re gopola’ng? Pele re hlankela Jehofa, o be a re rata go swana le motho yo mongwe le yo mongwe. Eupša ka ge gona bjale re le bahlanka ba gagwe, ga a no re rata feela, o re bontšha botho bja gagwe bjo bogolo. Ka ge Jehofa a re rata o a re šireletša. Le gona o nyaka gore re dule re na le segwera se sebotse le yena e bile o tlo re direla dilo tše dibotse tšeo a re tshepišitšego tšona. O nyaka gore re dule re le bagwera ba gagwe. (Ps. 46:1, 2, 7) Ka gona ge re na le mathata, Jehofa o tlo re matlafatša gore re dule re na le segwera se sebotse le yena.

¹⁹ Re kwele kamoo Jehofa a bontšhago bahlanka ba gagwe botho bjo bogolo. Le gona o nyaka gore le rena re bontšhe ba bangwe botho bjo bogolo. Re tlo kwa gore re ka dira seo bjang sehlogong se se latelago.