1. Eaa ta Iehova e akamaroiroi maira ia tatou kia rave?

E MEA inangaro na Iehova te aroa takinga meitaki. (Hose. 6:6) Ka inangaro katoa aia i tona au tavini kia akapera. Na roto i te peroveta ko Mika, akamaroiroi mai te Atua ia tatou “kia inangaro i te aroa.” (Mika 6:8) Inara, i mua ake ka rave ei i te reira ka inangaroia tatou kia kite eaa te aroa takinga meitaki.

2. Eaa te aroa takinga meitaki?

² Eaa te aroa takinga meitaki? I roto i te New World Translation of the Holy Scriptures ka kitea te “aroa takinga meitaki” e 230 taime. Eaa te reira? Me e aroa takinga meitaki to tetai, ka akaperepere maata aia i tetai tangata, ka inangaro ua atu rai iaia e ka noo tamou ua ki tona pae. Taangaanga putuputuia te reira no te akataka i to te Atua aroa no te tangata, inara te akataka katoa ra i te aroa i rotopu i te au tangata. Ko Iehova te akaraanga maata rava atu no te aroa takinga meitaki. I teia atikara, ka uriuri tatou akapeea a Iehova me akaari te aroa takinga meitaki no te tangata. I te atikara ka aru mai, ka uriuri tatou akapeea tatou me aru i to te Atua tu ei au tavini nona i te akaari i te aroa takinga meitaki no tetai e tetai.

3. Eaa ta Iehova i akakite kia Mose no runga iaia uaorai?

³ Kare i roa i muri ake i te akaruke anga te ngati Iseraela ia Aiphiti, kua tuatua a Iehova kia Mose no runga i Tona ingoa e Tona au tu. Akakite aia: “Ko Iehova, Ko Iehova, e Atua takinga-meitaki, e te aroa ua, e te akakoromaki maata, e te  meitaki maata, e te tuatua-mou, E te vaoo marie i te aroa e tausani ua atu, e te akakore i te tuatua-tika kore, e te ara e te kino.” (Exo. 34:6, 7) Na roto i teia tuatua akapumaana no runga i Tona au tu, kua akakite a Iehova kia Mose i tetai mea takake no runga i tona aroa takinga meitaki. Eaa te reira?

4-5. (a) Akapeea a Iehova i te akataka anga iaia uaorai? (e) Eaa te nga uianga ta tatou ka uriuri?

⁴ Kare a Iehova i karanga ana e tu aroa takinga meitaki tona mari ra e “meitaki maata” tona, koia oki e maata tona aroa takinga meitaki. Ka kiteaia teia akataka anga e ono akaou taime i roto i te Pipiria. (Nume. 14:18; Nehe. 9:17; Sala. 86:15; 103:8; Ioela 2:13; Iona 4:2) Te akataka maira teia au irava ia Iehova anake, kare i te tangata. Kare ainei i te mea umere e te akataka putuputu ra a Iehova iaia uaorai ei Atua aroa takinga meitaki maata? Mea papu roa, e puapinga te tu aroa takinga meitaki kiaia. * No reira te Ariki ko Davida i karanga: “Kua tae toou takinga-meitaki, e Iehova, ki runga i te au rangi . . . Te meitaki o toou ra takinga-meitaki, e te Atua e! i akaruru ei te au tamariki a te tangata ki raro ake i te maru o to peau ra.” (Sala. 36:5, 7) Mei ia Davida rai, ka akaperepere maata ainei tatou i to te Atua aroa takinga meitaki?

⁵ Kia mārama meitaki atu eaa te aiteanga o te aroa takinga meitaki, ka pau tatou i teia nga uianga: Koai ma ta Iehova ka akaari i te aroa takinga meitaki? Akapeea tatou e puapinga ai me akaari mai a Iehova i te aroa takinga meitaki no tatou?

6. Koai ma ta Iehova ka akaari i te aroa takinga meitaki?

⁶ Koai ma ta Iehova ka akaari i tona aroa takinga meitaki? Te taiku maira te Pipiria i tetai au apinga ta te tangata e inangaro ra, mei “te tatanu,” “te wina, e te inu ra,” “te apii,” “te kite” e te “tuatua pakari.” (2 Para. 26:10; Mase. 12:1; 21:17; 29:3) Kareka te aroa takinga meitaki, kare te reira e akaariia no tetai apinga mari ra, no te tangata anake. Kare ra a Iehova e akaari ana i tona aroa takinga meitaki no te tangata katoatoa. Ka akaari aia i te reira ki te aronga e pirianga vaitata to ratou kiaia. Ka vai tiratiratu to tatou Atua ki tona au oa. E akakoroanga manea tona no ratou, e ka tamou ua rai aia i tona aroa no ratou.

7. Akapeea a Iehova te akaari anga i te aroa no te tangata katoatoa?

⁷ Ka akaari a Iehova i tona aroa no te  tangata katoatoa. Akakite a Iesu ki tetai tangata ko Nikodemo: “I aroa mai te Atua i to te ao nei [te tangata katoatoa], kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioa. 3:1, 16; Mata. 5:44, 45.

8-9. (a) Eaa a Iehova i akaari ei i te aroa takinga meitaki ki tona au tavini? (e) Eaa ta tatou ka uriuri i teianei?

⁸ Tei taikuia i mua atu ana, ka akaari a Iehova i tona aroa takinga meitaki no te aronga anake e pirianga meitaki to ratou kiaia—tona au tavini. Ka kite tatou i teia mei te tuatua a te Ariki ko Davida e te peroveta ko Daniela. Ei akaraanga, karanga a Davida: “E tamou rai koe i to takinga-meitaki ki te aronga i kite ia koe.” “Te aroa o Iehova, mei tupua roa mai ïa, e ka tu e rimua ki te aronga i mataku iaia.” E kua tata a Daniela: “E te Atu, e te Atua maata e te matakuia, i te akono marie anga i te koreromotu, e te aroa, i te aronga inangaro mai iaia ra, e ia ratou oki tei akono i tana ra au akauenga.” (Sala. 36:10; 103:17; Dani. 9:4) Kia tau ki teia au irava, ka akaari a Iehova i te aroa takinga meitaki ki tona au tavini no te mea kua kite ratou iaia, mataku iaia, inangaro mai iaia e te akono i tana au akauenga. Ka akaari a Iehova i tona aroa takinga meitaki no te aronga anake tei akamori iaia na te mataara tika.

⁹ I mua ake ka akamata ai tatou i te tavini ia Iehova, kua kite tatou i te aroa ta te Atua i akaari no te tangata katoatoa. (Sala. 104:14) Inara me riro mai tatou ei aronga akamori iaia, ka puapinga katoa tatou mei tona aroa takinga meitaki. Te tika, akakite a Iehova ki tona au tavini: “Kare ra toku takinga-meitaki ia koe e taka ke.” (Isa. 54:10) Mei ta Davida i kite, “kua ikiia e Iehova te tangata akono i te Atua ra nona uaorai.” (Sala. 4:3) Eaa ta teia ka akakeu ia tatou kia rave? Akakite te tata salamo: “Ko tei pakari ra, e ko tei akono i teianei au mea, ka kite ratou i te aroa takinga-meitaki o Iehova.” (Sala. 107:43) No ko mai ia Iehova teia akoanga meitaki, no reira i teianei ka uriuri tatou e toru ravenga ka akaari mai a Iehova i tona aroa takinga meitaki e akapeea tatou e puapinga ai mei te reira.

10. Akapeea tatou e puapinga ai me kite e ka tu oki to te Atua aroa takinga meitaki e rimua? (Salamo 31:7)

¹⁰ Ko te aroa takinga meitaki o te Atua, ka tu oki e rimua. Kua taikuia teia e 26 taime i roto ia Salamo 136. I roto i te irava mua, te na ko ra: “E akameitaki ia Iehova, e meitaki oki tona: ka tu oki tona aroa e rimua.” (Sala. 136:1) I te irava 2 ki te 26, ka kite tatou i te tuatua “ka tu oki tona aroa e rimua.” Me tatau tatou i te katoaanga o teia salamo, ka umere tikai tatou i te au ravenga tukeke e manganui ka akaari tamou mai a Iehova i tona aroa takinga meitaki. Te akapapu maira te tuatua “ka tu oki tona aroa e rimua” e kare to te Atua aroa no tona iti tangata e taui. E mea pumaana tikai i te kite e kare a Iehova e viviki i te akaatea i tona aroa no tona au tavini! Mari ra, me akamata aia i te akaari i tona aroa no tetai tei tavini iaia, kare aia e akaruke i tona tavini, noatu e ka tupu te tuatau tumatetenga tikai. Te puapinga no tatou: Me kite tatou e te piri vaitata maira a Iehova kia tatou, ka oronga mai te reira i te rekareka e te maroiroi tei anoanoia kia akakoromaki i te tumatetenga e kia tavini ua atu rai iaia.—E tatau ia Salamo 31:7.

11. Ia Salamo 86:5, eaa tei akakeu ia Iehova kia akakore i te ara?

¹¹ Na te aroa takinga meitaki o te Atua e akakeu iaia kia akakore i te ara. Me kite a Iehova i tetai tangata ara tei tataraara e tei akamutu i te rave ara, na te aroa takinga meitaki e akakeu iaia kia akakore i te ara. Akakite te tata salamo ko Davida no runga ia Iehova: “Kare akenei aia i akaoko mai ia tatou e kia aite ki ta tatou au ara; kare oki i tutaki mai ia tatou e kia aite ki to tatou au kino.” (Sala. 103:8-11) Kua kite a Davida mei teaa rai te mamae e te maromaroa o te akava ngakau kinokino. Inara apii katoa mai aia “e kua tika ia [Iehova] i te akakore mai i te ara nei.” Eaa tei akakeu ia Iehova kia akakore i te ara? Ka kitea te pauanga ia Salamo 86:5. (E tatau.) Ae, mei ta Davida i tuatua i roto i tana pure, ka akakore a Iehova i te ara no te maata oki o tona aroa takinga meitaki ki te aronga i kapiki atu iaia.

12-13. Me taitaia tatou no te au ara i raveia i mua ana, eaa te ka tauturu ia tatou?

 ¹² Me ara tatou, e mea tau e te meitaki kia tataraapa i ta tatou ara i rave. Ka akakeu te reira ia tatou kia tataraara e kia akatanotano i te tarevake. Inara e ngata no tetai au tavini o te Atua i te akakore i te manako apa no ta ratou au tarevake i rave i mua ana. Penei ka manako ratou e kare rava a Iehova e akakore i ta ratou au ara—noatu kua pati ratou kia akakoreia ta ratou ara e kua akamutu i te rave i te tarevake. Me manako akapera koe, ka tauturuia koe me mārama koe e e āka inangaro to Iehova i te akaari i tona aroa takinga meitaki kia koe.

¹³ Te puapinga no tatou: Noatu to tatou tu apa, ka rauka ia tatou i te tavini rekareka ia Iehova ma te akava ngakau mā. Ka rauka mai teia no te mea “te mā nei tatou i ta tatou au ara ravarai i te toto o tana Tamaiti o Iesu Mesia.” (1 Ioa. 1:7) Me taitaia koe no toou uaorai tu apa, e akamaara, ka inangaro tikai a Iehova i te akakore i taau ara me tataraara koe. Akara akapeea a Davida te akataka anga i te pirianga i rotopu i te aroa takinga meitaki e te akakoreanga ara. Tata aia: “Mei te teitei o te au rangi i runga i te enua nei, mei te reira te maata o tona aroa i te aronga i mataku iaia ra. Mei te itinga o te rā e taka ke i te opunga o te rā ra, ko tana ïa akataka ke anga i ta tatou au ara ia tatou nei.” (Sala. 103:11, 12) Ae, “te maata ra oki iaia te akakore i te ara.”—Isa. 55:7.

14. Akapeea a Davida te akataka anga i te paruruanga ta te aroa takinga meitaki o te Atua ka oronga mai?

¹⁴ Oronga mai to te Atua aroa takinga meitaki i te paruruanga pae vaerua. Pure a Davida kia Iehova: “Ko koe toku pipinianga; ka akaora koe iaku i te tumatetenga; e akapini mai koe iaku ki te imene ora. . . . Kareka tei irinaki ia Iehova ra, ka pini takakaiia aia e te aroa.” (Sala. 32:7, 10) I te tuatau Pipiria, kua akapini te au patu i tetai oire ei paruru i te oire tangata mei te au enemi. Aite rai to Iehova aroa takinga meitaki ki tetai patu tei paruru ia tatou mei tetai ua atu apinga te ka takino i to tatou pirianga kiaia. Pera katoa, na te aroa takinga meitaki o Iehova e akakeu ia tatou kia akavaitata atu kiaia.—Iere. 31:3.

15. Akapeea to Iehova aroa takinga meitaki i riro mei te akapuanga e te punanga?

¹⁵ Kua taangaanga a Davida i tetai atu akatutuanga ei akataka akapeea te Atua me paruru i tona iti tangata. Tata aia: “Ko te Atua, te Atua i aroaia mai ei au ra, ko toku ïa akapuanga.” Akakite katoa aia no Iehova: “Ko toku meitaki, e toku punanga; toku are teitei, e te akaora iaku; toku paruru, e taku e irinaki nei.” (Sala. 59:17; 144:2) Eaa ra a Davida i akaaite ei i to Iehova aroa takinga meitaki ki tetai akapuanga e te punanga? Noatu teiea tatou i te enua nei, me tavini tatou ia Iehova, ka oronga mai aia i te paruruanga ta tatou e anoano ra kia tamou i tetai pirianga akaperepere kiaia. Ka kite katoaia teia akapapuanga ia Salamo 91. Akakite te tata salamo: “Te tuatua nei au kia Iehova, Ko koe toku akapuanga, e toku pinanga.” (Sala. 91:1-3, 9, 14) Taangaanga a Mose i tetai akatutuanga aiteite no te akapuanga. (Sala. 90:1) Kare i roa ana i mua ake ka mate ei a Mose, akakite aia i tetai tuatua akapumaana. Tata aia: “Ko te Atua mutu kore ra ko toou ïa punanga; e nga rima mate kore ra toou ïa mou.” (Deu. 33:27) Eaa ta te tuatua “e nga rima mate kore ra toou ïa mou” e akakite maira no runga ia Iehova?

16. Eaa te nga mataara ka tauturu mai a Iehova ia tatou? (Salamo 136:23)

¹⁶ Me ko Iehova to tatou Akapuanga, ka paruru meitakiia tatou. Inara tetai taime, penei ka taitaia to tatou ngakau e ka ngata i te akakore i teia manako. Me tupu te reira, eaa ta Iehova  ka rave no tatou? (E tatau ia Salamo 136:23.) Ka mou aia ia tatou ma tona nga rima, ka tāki ia tatou ki runga e ka turu ia tatou. (Sala. 28:9; 94:18) Te puapinga no tatou: Kite tatou e ka rauka i te irinaki ua rai i te Atua. Ka tauturu teia ia tatou kia akamaara e kua akameitakiia tatou na roto i teia nga mataara. Mea mua, noatu e teiea tatou, e akapuanga mou to tatou. Te rua, akaperepere maata to tatou Metua i te rangi ia tatou.

17. No te aroa takinga meitaki o te Atua, eaa ta tatou ka irinaki papu? (Salamo 33:18-22)

¹⁷ Mei ta tatou i uriuri, me tupu te au turanga ngata, papu ia tatou e ka tauturu mai a Iehova ia tatou kia vai tiratiratu kiaia. (2 Kori. 4:7-9) Akakite te peroveta ko Ieremia: “No te aroa tini o Iehova i kore ei tatou i pou, no te mea kare tona tangi e mutu.” (Aue 3:22) Ka papu ia tatou e ka vai marie rai to Iehova aroa takinga meitaki ki runga ia tatou no te mea mei ta te tata salamo i tuatua: “Tei runga to Iehova mata i te aronga i mataku iaia; i runga i te aronga i irinaki i tona ra aroa.”—E tatau ia Salamo 33:18-22.

18-19. (a) Eaa ta tatou ka tau kia akamaara? (e) Eaa ta tatou ka uriuri i te atikara ka aru mai?

¹⁸ Eaa ta tatou ka tau kia akamaara? I mua ake ka tavini tatou ia Iehova, kua kite tatou i te aroa ta te Atua e akaari ra no te tangata katoatoa. Inara ei aronga akamori iaia, ka puapinga katoaia tatou mei tona aroa takinga meitaki. Na te reira e akakeu ia Iehova kia takave mai ia tatou ma tona nga rima paruru. Ka piri vaitata ua rai aia kia tatou e ka akatupu i tana i akakoro no tatou. Inangaro aia kia riro tatou ei oa nona e tuatau ua atu! (Sala. 46:1, 2, 7) No reira, noatu eaa te turanga ngata, ka akamaroiroi ua rai a Iehova ia tatou kia vai tiratiratu kiaia.

¹⁹ Kua uriuri tatou akapeea a Iehova te akaari anga i tona aroa takinga meitaki no tona au tavini. Ka inangaro katoa aia ia tatou kia akaari i te aroa takinga meitaki no tetai e tetai. Akapeea ra? Ka uriuri te atikara ka aru mai i teia tumu manako puapinga.