1. Ko so o Jehova podstaknini amen?

E JEHOVASE tano but važno o verno mangipe (Os. 6:6). Ov mangela hem amenđe odija osobina te ovel važno. Prekalo prorok Mihej, o Devel podstaknini amen te manga o verno mangipe (Mih. 6:8, fusn.). Ama, te šaj te ćera odova, valjani te đana soj tano o verno mangipe.

2. Soj tano o verno mangipe?

² Soj tano o verno mangipe? O lafija „verno mangipe“ pominena pe prekalo 200 putija ko prevod Novi svet, ki srpsko ćhib. Premalo Rečnik pojmova o verno mangipe značini „te ova potpuno predana, verna, privržena hem odana. Odola lafija mothovena kobor o Jehova mangela e manušen, ama hem o mangipe kova o manuša mothovena jekh jekhese.“ O Jehova tano najbaro primer ko odova sar mothovi pe o verno mangipe. Ko akava članko, ka dikha sar o Jehova mothovi o verno mangipe premalo manuša. Ko aver članko, ka dikha sar šaj amen te ova sar oleste hem te mothova o verno mangipe jekh jekhese.

3. So o Jehova pestar phenđa e Mojsijese?

³ Sigate palo odova so o Izraelcija ikljilje ando Egipat, o Jehova phenđa e Mojsijese diso pestar. Ov phenđa: „Jehova, Jehova, o Devel soj tano milosrdno hem samilosno, strpljivo, pherdo verno mangipaja hem ćaćipaja, kova mothovi o verno mangipe e hiljadenđe, oprostini o prestupija, i krivica hem o grehija“ (Izl. 34:6, 7). Odole šuže  lafencar o Jehova mothovđa e Mojsijese diso ando po verno mangipe. So o Jehova phenđa lese?

4-5. (a) So o Jehova pestar vaćerđa? (b) Sostar ka vaćera akana?

⁴ O Jehova na phenđa samo so ov isi le verno mangipe, već so ov tano „pherdo verno mangipaja.“ Akala lafija pominena pe ko nekobor thana ki Biblija (Br. 14:18; Nem. 9:17; Ps. 86:15; 103:8; Joilo 2:13; Jona 4:2). Svako puti, odola lafija odnosinena pe samo upro leste, a na upro manuša. Ađahar o Jehova mangela te mothovi amenđe savo tano. O verno mangipe tano but važno olese. * Odolese, o kralj David phenđa: „Jehova, to verno mangipe resela đi ko nebo... Kobor tano šukar to verno mangipe, Devla! Talo te phakha o manuša šaj te garaven pe“ (Ps. 36:5, 7). Da li hem tu cenineja e Devleso verno mangipe sar o David?

⁵ Te šaj pana pošukar te haljova soj tano o verno mangipe, akana ka odgovorina ko duj pućiba: Kase o Jehova mothovi po verno mangipe? Sar šaj te pomožini amenđe e Jehovaso verno mangipe?

6. Kase o Jehova mothovi po verno mangipe?

⁶ Kase o Jehova mothovi po verno mangipe? Ki Biblija pisini so o manuša šaj te mangen but buća. Na primer, vino, ulje, disciplina, đandipe, mudrost hem te ćeren buti e phuvjaja (2. Let. 26:10; Posl. 12:1; 21:17; 29:3). O verno mangipe našti te mothovi pe premalo buća kola nane đivde. Odija osobina šaj te mothovi pe samo e manušenđe. Ama, o Jehova na mothovi po verno mangipe premalo sare. O verno mangipe mothovi okolenđe soj tane paše oleja. Ov tano verno pe amalenđe. O Devel mangela te del amen but šužo životi hem niked na ka aćhavi amen.

7. Sar o Jehova mothovđa so mangela sa e manušen?

⁷ O Jehova mothovi mangipe premalo sa o manuša. O Isus phenđa e Nikodimese: „O Devel odobor manglja o sveto so dinđa pe jedinobijande Ćhave, te na ovel uništimo nijekh kova mothovi vera ano leste, nego te ovel le večno životi“ (Jov. 3:1, 16; Mat. 5:44, 45).

8-9. (a) Sose o Jehova mothovi po verno mangipe pe slugenđe? (b) So ka dikha akana?

⁸ Sar so phenđam, o Jehova mothovi po verno mangipe okolenđe soj tane paše  oleja. Odova dićhola ando lafija kola phenđe o kralj David hem o prorok Danilo. Na primer, o David phenđa: „Nek to verno mangipe zauvek aćhola upro okola so penđarena tut.“ A ko aver than, phenđa: „E Jehovaso verno mangipe zauvek ka ovel okolencar kola darana olestar.“ O prorok Danilo phenđa: „Jehova, tu hijan pravo Devel... hem mothoveja verno mangipe okolenđe kola mangena tut hem kola ićerena pe ko te zapovestija“ (Ps. 36:10; 103:17; Dan. 9:4). Sar so mothovena akala lafija, o Jehova mothovi po verno mangipe pe slugenđe odolese so penđarena le, darana olestar, mangena le hem ićerena pe ko olese zapovestija. O Jehova mothovi po verno mangipe samo okolenđe so služinena lese ko ispravno način.

⁹ Angleder so počminđam te služina e Jehovase, amen osetinđam o mangipe kova o Devel mothovi sa e manušenđe (Ps. 104:14). Ama, akana ked služinaja olese, amen osetinaja oleso verno mangipe. O Jehova uverini pe slugen: „O verno mangipe kova mothovava tuće na ka našalđol“ (Is. 54:10). O David odova osetinđa hem odolese phenđa: „E Jehovase tano posebno okova soj tano lese verno“ (Ps. 4:3). Ko so valjani te podstaknini amen e Jehovaso verno mangipe? O psalmista phenđa: „O mudra manuša ka razmislinen ando sa odova, hor ka razmislinen ando delija kola o Jehova ćerela sebepi po verno mangipe“ (Ps. 107:43). Akava šužo savet avela ando Jehova. Akana ka dikha ko kola trin načinija o Jehova mothovi amenđe po verno mangipe hem sar oleso verno mangipe pomožini amenđe.

10. Sose tano šukar te đana so e Jehovaso verno mangipe trajini večno? (Psalam 31:7)

¹⁰ E Jehovaso verno mangipe večno trajini. Ko 136. Psalam, akala lafija pominena pe 26 putija. Ko prvo stiho pisini: „Zahvalinen tumen e Jehovase, sose tano šukar, oleso verno mangipe trajini večno“ (Ps. 136:1). Kotar 2. đi o 26. stiho, o lafija „oleso  verno mangipe trajini večno“ ponovinena pe. Đi čitinaja akava psalam, amen dikhaja so o Jehova uvek mothovi po verno mangipe hem odova ćerela ko razna načinija. O lafija „oleso verno mangipe trajini večno“ uverinena amen so oleso mangipe niked na ka ćhinavđol. But ohrabrini amen odova so đanaja so o Jehova niked na ka aćhavi amen. Umesto odova, ov tano paše amencar hem uvek tano uzo amende posebno ked tano amenđe pharo. Sose tano šukar odova te đana? Ked đanaja so o Jehova tano amencar, odova dela amen radost hem snaga koja valjani amenđe te šaj te ikljova ko krajo amare problemencar hem te nastavina te služina olese. (Čitin Psalam 31:7.)

11. Premalo Psalam 86:5, sose tano o Jehova spremno te oprostini amenđe?

¹¹ E Jehovaso verno mangipe podstaknini le te oprostini amenđe. Ked o Jehova dikhela so neko kajini pe hem so više na ćerela odova so angleder ćerđa, ov tano spremno te oprostini lese sebepi po verno mangipe. O psalmista David ando Jehova phenđa: „Na postupini amencar premalo amare grehija, niti irini amenđe premalo amare greške“ (Ps. 103:8-11). O David đanđa kobor dukhala ked mučini tut o osećaj andi krivica. Ama, ov isto đanđa so o Jehova tano spremno te oprostini. Sose tano o Jehova spremno te oprostini amenđe? O odgovor šaj te arakha ko Psalam 86:5. (Čitin.) Sar so o David phenđa ki molitva, o Jehova tano spremno te oprostini amenđe sebepi po verno mangipe.

12-13. So šaj te pomožini amen ako mučini amen o osećaj andi krivica?

¹² Ked grešinaja, šukar tano, ako tano amenđe pharo sebepi odova so ćerđam. Odova osećaj šaj te podstaknini amen te pokajina amen hem te ćera diso te ispravina amare greške. Ama, disave e Devlese sluge, hem beršencar palo odova so pokajinđe pe, isi len osećaj andi krivica. Iako molinđe e Jehova te oprostini lenđe hem više na ćerena odova so angleder ćerđe, on pana mislinena so o Jehova niked na ka  oprostini olenđe. Ako hem tu osetineja tut ađahar, but ka pomožini tut odova so đaneja so o Jehova tano spremno te mothovi po verno mangipe tuće.

¹³ Sose tano šukar odova te đana? Iako hijam nesavršena, amen šaj radosno te služina e Jehovase hem te ovel amen čisto savest. Amen šaj te osetina amen ađahar, sebepi so „o rat olese Ćhaveso, e Isuseso, čistini amen ando svako greh“(1. Jov. 1:7). Ako hijan obeshrabrimo odolese so ćerđan diso lošno, ma te bistre so o Jehova tano spremno te oprostini tuće ako ćaće kajineja tut. Dikh sar o David mothovđa so isi veza maškaro verno mangipe hem te oprostini pe. Ov pisinđa: „Sose kobor tano o nebo dur kotar i phuv, odobor tano baro oleso verno mangipe premalo okola so darana olestar. Kobor o istok tano dur ando zapad, odobor ov cidela amare prestupija amendar“ (Ps. 103:11, 12). Šaj te ova sigurna so o Jehova tano spremno te oprostini (Is. 55:7).

14. Premalo odova so o David phenđa, sar e Devleso verno mangipe arakhi amen?

¹⁴ E Devleso verno mangipe arakhi amen. Ki molitva e Jehovase, o David phenđa: „Tu hijan mo zaklon, tu ka arakhe man ked hijum ko pharipa. Uzo mande ka oven o manuša kola ka radujinen pe sebepi moklo spasenje... E manuše kova oslonini pe upro Jehova arakhi oleso verno mangipe“ (Ps. 32:7, 10). Sar so ko purano vreme e dizjake zidija arakhlje e manušen, ađahar e Jehovaso verno mangipe arakhi amen kotar sa o buća kola lošno šaj te utičinen ko amaro amalipe oleja. Uzo odova, sebepi po verno mangipe, o Jehova privucini amen koro peste (Jer. 31:3).

15. Sar tano e Jehovaso verno mangipe sar than kuri šaj te garava amen?

¹⁵ O David koristinđa pana jekh primer te mothovi sar o Devel arakhi pe slugen. Ov phenđa: „Tu Devla hijan than kuri šaj te garavav man, o Devel kova mothovi maje po verno mangipe.“ O David pana phenđa ando Jehova: „Ov mothovi maje po verno mangipe, ov tano mi tvrđava, ov tano than kuri šaj te garavav man hem mo spasitelj, mo štit hem mo zaklon“ (Ps. 59:17; 144:2). Sose o David phenđa so e Jehovaso verno mangipe tano sar than kuri šaj te garava amen? Kuri god te živina, o Jehova arakhi pe verno slugen hem pomožini len te aćhon amala oleja. O lafija ando 91. Psalam, uverinena amen ko odova. O psalmista phenđa: „Ka phenav e Jehovase: ’Tu hijan than kuri šaj te garavav man, mi tvrđava‘“ (Ps. 91:1-3, 9, 14). Hem o Mojsije koristinđa slična lafija (Ps. 90:1). Hari angleder te merel, o Mojsije phenđa pana diso kotar Jehova. Ov pisinđa: „O Devel tano to zaklon ando purane vremenija, olese večna vasta akharena tut“ (Pon. zak. 33:27). So o lafija „olese večna vasta akharena tut“ sikavena amen ando Jehova?

16. Ko kola duj načinija o Jehova ka pomožini amen? (Psalam 136:23)

¹⁶ Ked đanaja so o Jehova ka arakhi amen, tegani osetinaja amen sigurno. Ama, disavo puti hijam odobor obeshrabrime, so nane amen snaga te borina amen. Tegani, sar o Jehova ka pomožini amen? (Čitin Psalam 136:23.) Ov ka akhari amen ko pe vasta ja ka del amen po vas te šaj te ušta ko amare pre (Ps. 28:9; 94:18). Sose tano šukar odova te đana? Ka ova sigurna so uvek šaj te oslonina amen upro Devel. Odova ka pomožini amen ko  duj načinija. Sar prvo, kuri god te ova, ka ova sigurna so o Devel uvek ka arakhi amen. Sar dujto, šaj te ova sigurna so o Devel brinini pe amendar.

17. Ko so hijam uverime sebepi e Jehovaso verno mangipe? (Psalam 33:18-22)

¹⁷ Sar so sikljiljam, ked isi amen pharipa, šaj te ova sigurna so o Jehova hem ponodri ka pomožini amen te aćhova verna olese (2. Kor. 4:7-9). O prorok Jeremija phenđa: „Sebepi e Jehovaso verno mangipe pana hijam đivde, sose oleso milosrđe niked na našalđola“ (Tužb. 3:22). Amen šaj te ova sigurna so o Jehova hem ponodri ka mothovi amenđe po verno mangipe, sose ki Biblija pisini: „E Jehovase jaćha tane upro okola so darana olestar, upro okola so osloninena pe ko oleso verno mangipe.“ (Čitin Psalam 33:18-22.)

18-19. (a) So na valjani te bistra? (b) Sostar ka vaćera ko aver članko?

¹⁸ So na valjani te bistra? Angleder so počminđam te služina e Jehovase, ov mothovđa amenđe o mangipe kova mothovi premalo sa o manuša. Ama, okolenđe so služinena lese mothovi po verno mangipe. Sebepi po verno mangipe, o Jehova arakhi amen. Ov ka pomožini amen hem ponodri te aćhova verna olese hem ka ispunini sa so obećinđa amenđe. Ov mangela zauvek te ova olese amala (Ps. 46:1, 2, 7). Odolese, kola god pharipa te ovel amen, o Jehova ka del amen snaga te aćhova verna olese.

¹⁹ Akana dikhljam sar o Jehova mothovi po verno mangipe premalo pe sluge. Ama, ov ađićeri amendar te mothova o verno mangipe jekh jekhese. Sar šaj te ćera odova? Odova ka dikha ko aver članko.