1. Sortu deki-ati Yehovah e gi wi?

GI YEHOVAH bun-ati prenspari srefisrefi (Hos. 6:6). A e gi den futuboi fu en a deki-ati fu si bun-ati na a srefi fasi tu. Nanga yepi fu en profeiti Mika a e taigi wi fu „lobi fu du bun” (Mik. 6:8). Ma a de krin taki fosi wi man du dati, wi musu sabi san na bun-ati.

2. San na bun-ati?

² San na bun-ati? A wortu disi abi fu du nanga wan sma di de nomonomo fu tai hori na wan trawan fu di a lobi a sma dati nanga en heri ati. Furu leisi te den e gebroiki a wortu disi a abi fu du nanga a lobi di Gado e sori gi libisma. Ma den e gebroiki en sosrefi fu taki fu a lobi di libisma e sori gi makandra. Yehovah na a moro bun eksempre fu wan sma di e sori bun-ati. Na ini na artikel disi wi o leri fa Yehovah e sori bun-ati gi libisma. Na ini a tra artikel wi o leri taki wi leki futuboi fu Yehovah e teki na eksempre fu en te wi e sori bun-ati gi makandra.

3. San Yehovah fruteri Moses fu ensrefi?

³ Syatu baka di den Israelsma gowe fu Egepte, Yehovah taigi Moses san na a nen fu En èn sortu fasi a abi. A taigi en: „Yehovah, Yehovah, wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki. A e du bun gi dusundusun sma, èn a e gi sma pardon te den meki fowtu, te den du ogri, èn te den du sondu” (Eks. 34:6, 7). Yehovah sori Moses na wan moi fasi fa A de. Nanga den wortu disi Yehovah  fruteri Moses wan spesrutu sani fu a bun-ati fu En. San na a sani dati?

4-5. (a) Sortu fasi Yehovah abi? (b) Sortu aksi wi o piki?

⁴ Yehovah no taki nomo dati a abi bun-ati, ma taki „a abi bun-ati pasa marki”. Den wortu disi skrifi ete siksi leisi na ini Bijbel (Num. 14:18; Neh. 9:17; Ps. 86:15; 103:8; Yoèl 2:13; Yona 4:2). Na ibriwan fu den tekst disi den e taki soso fu Yehovah, ma no fu libisma. A moi fu si taki furu leisi Yehovah e taki fu ensrefi na a fasi dati na ini Bijbel. A de krin taki gi Yehovah bun-ati na wan prenspari fasi srefisrefi. * Dati meki Kownu David ben taki fu Yehovah: „Yehovah, a bun-ati di yu e sori sma, e doro te na hemel srefi . . . Gado, a bun-ati di yu e sori sma, na wan warti sani gi mi. Libisma e lon kon kibri na ondro den frei fu yu” (Ps. 36:5, 7). Yu e si a bun-ati fu Yehovah leki wan prenspari sani, neleki David?

⁵ Fu frustan moro bun san bun-ati wani taki, dan wi o taki fu tu aksi: Gi suma Yehovah e sori bun-ati? Èn sortu wini wi e kisi fu a bun ati di Yehovah e sori wi?

6. Gi suma Yehovah e sori bun-ati?

⁶ Gi suma Yehovah e sori bun-ati? Bijbel e taki dati wi kan lobi difrenti sani, soleki „sani di abi fu du nanga gronwroko”, „win nanga oli”, „piri-ai”, „sabi”, nanga „koni” (2 Kron. 26:10; Odo 12:1; 21:17; 29:3). Ma sma no kan sori bun-ati gi ala sani, wi kan sori dati soso gi libisma. Yehovah no e sori bun-ati gi ala sma. A e sori bun-ati gi den sma di abi wan bun matifasi nanga en. Wi Gado e tai hori na den mati fu en. A o du kefalek moi sani gi den èn a o lobi den fu ala ten.

7. Fa Yehovah sori lobi gi ala libisma?

⁷ Yehovah sori lobi gi ala libisma. Yesus ben taigi wan man di nen Nikodeimus: „Bika Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”​—Yoh. 3:1, 16; Mat. 5:44, 45.

8-9. (a) Fu san ede Yehovah e sori bun-ati gi den futuboi fu en? (b) San wi o luku now?

⁸ Soleki fa wi ben taki kaba, Yehovah e sori bun-ati soso gi den sma di abi wan bun matifasi nanga en, dati na den futuboi fu en. Disi de krin fu si  te yu e luku san Kownu David nanga a profeiti Danièl ben taki. Fu eksempre, David ben taki: „Tan sori bun-ati gi den wan di sabi yu.” „Ma ala ten, iya, fu têgo Yehovah e sori bun-ati gi den sma di e anbegi en.” Èn Danièl ben taki: „Ke Yehovah di de a tru Gado, yu na wan Gado di bigi srefisrefi èn di e meki sma kisi bigi lespeki gi yu. Yu e hori a frubontu di yu meki nanga den wan di lobi yu èn di e hori den komando fu yu. Yu e sori den sma disi bun-ati” (Ps. 36:10; 103:17; Dan. 9:4). Den sani di Gado meki den man disi skrifi, e sori taki Yehovah e sori bun-ati gi den futuboi fu en fu di den sabi en, den e anbegi en, den lobi en, èn den e hori den komando fu en. Yehovah e sori bun-ati soso gi den sma di e anbegi en na a yoisti fasi.

⁹ Di wi no ben dini Yehovah ete, dan a ben sori a srefi lobi gi wi di a e sori gi ala libisma (Ps. 104:14). Ma now di wi e dini en, a e sori bun-ati gi wi tu. Yehovah e gi en futuboi a dyaranti disi: „Noiti mi o tapu fu sori yu bun-ati” (Yes. 54:10). Iya, David srefi ben „sabi taki Yehovah o gi grani na a sma di e tai hori na en” (Ps. 4:3). San wi musu du fu di Yehovah sori wi bun-ati? A psalm skrifiman ben taki dati wan koni sma „o si den sani disi èn a o poti prakseri na a fasi fa Yehovah e sori sma bun-ati” (Ps. 107:43). Na Yehovah gi wi a rai disi. Wi o poti prakseri now na dri fasi fa den futuboi fu Yehovah e kisi wini fu a bun-ati fu en.

10. Sortu wini wi e kisi te wi sabi taki Gado e sori bun-ati gi wi fu têgo? (Psalm 31:7)

¹⁰ A bun-ati fu Gado de fu têgo. A sani disi skrifi 26 tron na ini Psalm 136. Na ini a fosi vers wi e leisi: „Un pipel, un taki Yehovah tangi, bika a bun (En bun-ati de fu têgo.)” (Ps. 136:1). Na ini vers 2 te go miti 26 wi e leisi den srefi wortu disi: „En bun-ati de fu têgo.” Te wi e leisi den tra tekst na ini Psalm 136 dan wi e fruwondru fu si den furu fasi fa Yehovah  tan sori bun-ati. Den wortu „en bun-ati de fu têgo” e gi wi a dyaranti taki a lobi di Gado abi gi a pipel fu en no e kenki. Wi e firi bun te wi sabi taki Yehovah e tan sori lobi gi den futuboi fu en! A e tai hori na den wan di e dini en èn a no e gowe libi den, spesrutu te den de na ini banawtu. Sortu wini wi e kisi: Te wi sabi taki Yehovah no e gowe libi wi, dan dati e gi wi prisiri èn a e gi wi a krakti di wi abi fanowdu fu horidoro te wi de na ini banawtu èn fu tan dini en.​—Leisi Psalm 31:7.

11. Soleki fa Psalm 86:5 e sori, dan san e meki taki Yehovah wani gi sma pardon?

¹¹ A bun-ati fu Gado e meki taki a e gi sma pardon. Te Yehovah e si taki wan sondari abi berow èn taki a drai baka gi na ogri di a ben du, dan a bun-ati fu en e meki taki Yehovah e gi a sma dati pardon. Luku san a psalm skrifiman David ben taki fu Yehovah: „A no gi wi ala strafu di wi ben musu kisi gi den sondu fu wi. A no meki wi pai gi ala den fowtu di wi meki” (Ps. 103:8-11). David ben sabi heri bun taki a no switi srefisrefi te yu konsensi e fon yu. Ma a kon frustan tu taki Yehovah „de klariklari fu gi sma pardon”. Fu san ede Yehovah e gi sma pardon? Wi kan feni a piki na Psalm 86:5. (Leisi en.) Iya, a begi disi fu David e sori taki fu di Yehovah abi bun-ati pasa marki meki a e gi pardon na ala den sma di e bari kari en.

12-13. San o yepi wi te wi e sari fu di wi konsensi e fon wi fu fowtu di wi ben meki na ini a ten di pasa?

¹² Te a e hati wi taki wi du wan sondu, dan dati na wan bun sani. A kan meki taki wi sori berow, taki wi aksi Yehovah fu gi wi pardon èn taki wi no du a sondu moro. Ma son futuboi fu Gado e tan abi konsensi fonfon fu fowtu di den ben meki na ini a ten di pasa. Fu di den ati e krutu den doronomo, den e denki taki Yehovah no o gi den pardon noiti, winsi fa den ben abi berow èn den tapu nanga a sondu di den ben du. Efu yu e firi so tu, dan yu o man feti nanga den firi disi te yu frustan taki Yehovah wani sori bun-ati gi yu tu.

 ¹³ Sortu wini wi e kisi: Aladi wi e meki fowtu, toku wi kan prisiri fu di wi e dini Yehovah nanga wan krin konsensi. Wi man du dati fu di „a brudu fu en Manpikin Yesus, e krin wi fu ala sondu” (1 Yoh. 1:7). Te den fowtu fu yu e meki yu firi brokosaka, dan memre yusrefi taki Yehovah wani gi yu pardon te yu sori berow. Luku san David skrifi fu a bun-ati fu Gado nanga a gi di a e gi sma pardon. A skrifi: „Neleki fa yu no man marki o fara hemel de fu grontapu, na so yu no man marki a bun-ati di Gado e sori den sma di e anbegi en. So fara leki son-opo de fu sondongo, na so fara fu wi a poti den sondu fu wi” (Ps. 103:11, 12). Iya, Yehovah de klariklari fu gi sma pardon „nanga en heri ati”.​—Yes. 55:7.

14. Fa a bun-ati fu Gado e kibri wi, soleki fa David ben taki?

¹⁴ A bun-ati fu Gado e kibri a matifasi di wi abi nanga en. David ben begi Yehovah: „Yu na wan kibripe gi mi. Yu o kibri mi te mi de na nowtu. Te yu frulusu mi, yu o lontu mi nanga prisiri babari. . . . Te wan sma e frutrow na tapu Yehovah, dan a o sori a sma disi bun-ati” (Ps. 32:7, 10). Na ini Bijbel ten den skotu lontu wan foto ben e kibri den sma fu a foto gi feanti. Na so a bun-ati fu Yehovah de leki wan skotu na wi lontu di e kibri wi gi iniwan sani di ben o man pori a matifasi di wi abi nanga en. Boiti dati, na fu di Yehovah abi bun-ati meki a hari wi kon na en.​—Yer. 31:3.

15. Fa a bun-ati fu Yehovah kan de leki wan kibripe èn wan fortresi gi wi?

¹⁵ David ben gebroiki ete wan agersitori fu sori fa Gado e kibri a pipel fu en. A ben skrifi: „Gado na wan bergi pe mi kan lon go kibri, wan Gado di sori mi bun-ati.” Boiti dati, David ben taki fu Yehovah: „A e sori mi bun-ati. En na mi fortresi. En na a bergi pe mi kan lon go kibri. En na mi Frulusuman. En na mi skelt. Na en mi lon go suku kibri” (Ps. 59:17; 144:2). Fu san ede David ben taki dati a bun-ati fu Yehovah de leki wan kibripe èn wan fortresi? Fu di Yehovah o yepi wi fu tan krosibei na en solanga wi tan dini en, awinsi pe fu grontapu wi de. Na a srefi dyaranti dati Psalm 91 e gi wi. Drape a psalm skrifiman e taki: „Mi o taigi Yehovah: ’Yu na mi kibripe èn mi fortresi’” (Ps. 91:1-3, 9, 14). Moses ben agersi Yehovah nanga wan kibripe tu (Ps. 90:1). Èn syatu fosi Moses dede a poti prakseri na ete wan moi sani fu Yehovah di e gi wi deki-ati. A ben skrifi: „A Gado fu owruten na wan kibripresi. Fu têgo en anu de na yu ondro fu yepi yu” (Deut. 33:27). San den wortu „fu têgo en anu de na yu ondro fu yepi yu” e taigi wi fu Yehovah?

16. San na tu blesi di Yehovah gi wi? (Psalm 136:23)

¹⁶ Te wi abi a frutrow taki Yehovah na wi Kibripe, dan wi no o frede moro. Toku a kan pasa taki wi e firi sari gi wan langa pisi ten. San Yehovah o du gi wi te wi e firi so? (Leisi Psalm 136:23.) A o poti en anu na wi ondro, a o opo wi èn a o yepi wi fu firi bun baka (Ps. 28:9; 94:18). Sortu wini wi e kisi: Wi sabi taki ala ten Gado o horibaka gi wi. Disi e sori wi sortu tu blesi Yehovah gi wi. Wán, awinsi pe wi e tan, ala ten Yehovah o kibri wi. Èn tu, wi lobi-ati hemel Papa lobi wi trutru.

17. Sortu dyaranti wi abi fu di Gado e sori wi bun-ati? (Psalm 33:18-22)

¹⁷ Wi leri taki te wi e kisi tesi, wi kan de seiker taki Yehovah o yepi wi fu tai hori na en (2 Kor. 4:7-9). A profeiti Yeremia ben taki: „Na fu di Yehovah sori wi bun-ati, meki a no kiri wi. Iya, noiti wan ten o kon taki a no e sori sari-ati” (Sar. 3:22). Wi kan de seiker taki Yehovah o tan sori bun-ati gi wi fu di Bijbel e gi wi a dyaranti taki „Yehovah e poti prakseri na den sma di e lespeki en. A e poti prakseri na den wan di e wakti fu a sori den bun-ati.”​—Leisi Psalm 33:18-22.

18-19. (a) San wi no musu frigiti? (b) San wi o luku na ini a tra artikel?

¹⁸ San wi no musu frigiti? Di wi no ben e dini Yehovah ete, dan a ben sori a srefi lobi gi wi di a e sori gi ala libisma. Ma now di wi e dini en, a e sori bun-ati gi wi tu. Na a bun-ati fu Yehovah meki taki a e poti en anu na wi lontu fu kibri wi. Ala ten Yehovah o tan krosibei fu wi èn a o du ala den moi sani di a pramisi wi. A wani taki wi tan en mati fu ala ten! (Ps. 46:1, 2, 7) Dati meki wi kan de seiker taki awinsi sortu tesi wi kisi, Yehovah o gi wi a krakti fu tai hori na en.

¹⁹ Wi si taki Yehovah e sori bun-ati gi den futuboi fu en. Fu dati ede a e fruwakti taki wi e sori bun-ati gi makandra tu. Fa wi kan du dati? A tra artikel o taki fu a prenspari tori disi.