1. Мар карыны Иегова мылкыдмес ӝутэ?

 ИЕГОВА оскымон яратонэз туж кулэен лыдъя (Ос. 6:6). Солэн потэ, ужась-тыршисьёсыз но та сям шоры озьы ик мед учкозы шуыса. Михей пророк пыр Инмар милесьтым мылкыдмес ӝутэ оскымон яратонэз яратыны (Мих. 6:8). Кызьы сое возьматоно шуыса валан понна, нырысь тодоно, мар со сыӵе оскымон яратон.

2. Мар со сыӵе оскымон яратон?

² Библилэн «Выль дунне» берыктэмаз «оскымон яратон» яке «оскымон яратыны» шуыса веранъёс ог 230 пол пумисько. Кыллюкам, кудӥз Библилэн та берыктэмаз пыртэмын, та сямлы таӵе валэктон сётэ: «Оскымон яратон — со яратон, кудзэ возьматыны мылкыдэз ӝуто сётэм кылъёс, возетъёсъя улон, оскымон луон но кин ке борды юн дышон. Ӵем дыръя со возьматэ яратонэз, кудзэ Инмар адямиослы возьматэ, озьы ик адямиос куспысь яратонэз». Иегова оскымон яратонэз котькинлэсь умой возьматэ. Та но вуоно статьяосын еврей кыл, кудӥз «оскымон яратон» шуыса берыктэмын, Удмурт Библиын «гажан-жалян» шуыса берыктӥське. Та статьяын ми эскеромы, кинэ но кызьы Иегова оскымон яратэ. Нош вуонояз статьяын эскеромы, кызьы Инмарлэн ужась-тыршисьёсыз быгато Иеговалэсь та сямзэ адӟем карыны но ог-огзылы оскымон яратонзэс возьматыны.

3. Мар Иегова вераз Моисейлы ачиз сярысь?

³ Израиль калыкез Египетысь поттэмез бере ӝоген Иегова Моисейлы ачиз сярысь но аслаз нимыз сярысь туж кулэзэ вераз: «Кузё-Инмар, Кузё-Инмар, адямиез яратӥсь, гажась-жалясь, кема чидась, туж гажась-жалясь, зэмлыко Инмар. Со сюрсэтӥ выжылы но гажан-жалянзэ возьматэ, Со янгышъёсты, йыружъёсты, сьӧлыкъёсты ӵуше-куштэ» (Пот. 34:6, 7). Тӥ соглаш луоды, дыр, куке ми тодӥськомы, Иеговалэн таӵе сямъёсыз вань шуыса, та милесьтым сюлэммес ик шунтэ. Со сяна, та кылъёсын Иегова Моисейлы возьматӥз, оскымон яратонэзлэсь одӥг аспӧртэмлыксэ. Кыӵе аспӧртэмлык сярысь со вераз?

4, 5. а) Оскымон яратонэзлэн кыӵе аспӧртэмлыкез сярысь вераз Иегова? б) Кыӵе юанъёсты ми эскеромы?

⁴ Висъялэ саклыктэс: Иегова ачиз сярысь вераз, со туж гажась-жалясь, яке оскымон яратонэн пачылмемын, шуыса. Библиын та кылъёс Иегова сярысь вераку гинэ кутӥсько. Валамон, Иеговалэн туж потэ, ми та сямыз сярысь мед тодомы шуыса. Иеговалэн оскымон яратонэз туж бадӟым. Давид эксэй со сярысь псалом но гожтӥз. Со кырӟаз: «Кузё-Инмаре! Тынад гажан-жалянэд инбамозь... Макем дуно Тынад гажан-жалянэд, Инмаре! Тынад бурдыдлэн вужераз адямиос каньылэн кышкатэк улыны быгато» (Пс. 35:6, 8). Нош ми, Давид сямен, Иеговаез оскымон яратонэз понна тау кариськомы-а?

⁵ Умойгес валан понна, мар со сыӵе оскымон яратон, ми эскеромы кык юанъёсты: кинлы Иегова оскымон яратонзэ возьматэ но кыӵе пайда со соослы вае?

6. Кинлы Иегова оскымон яратонзэ возьматэ?

⁶ Яратыны трос мае ке луэ. Кылсярысь, Библиын вераське, кин ке но яратэ музъем ужъёсты, винаез но вӧез, нодъямез, тодон-валанэз, визьлыкез но мукетсэ (2 Пар. 26:10; Мад. 12:1; 21:17; 29:3). Но оскымон яратонэз лултэм макеослы возьматыны уг луы. Возьматэ-а Иегова оскымон яратонзэ вань адямиослы? Уг. Сое со возьматэ эшъёсызлы гинэ. Азьланяз Иегова соослы туж умой улон кузьмалоз. Инмар эшъёссэ ноку уз кельты.

7. Кызьы Иегова вань адямиослы яратонзэ возьматэ?

⁷ Иегова вань адямиослы яратонзэ возьматэ. Иисус Никодимлы вераз: «Инмар сокем дуннеез [адямиосты] яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса» (Иоанн 3:1, 16; Матф. 5:44, 45).

8, 9. а) Малы Иегова аслаз ужась-тыршисьёсызлы оскымон яратонзэ возьматэ? б) Мае ми эскеромы вуоно абзацъёсын?

 ⁸ Кызьы вераськиз ини, Иегова оскымон яратонзэ возьматэ аслаз ужась-тыршисьёсызлы гинэ — соослы гинэ, кинъёсын солэн матысь кусыпъёсыз вань. Та адӟиське Давид эксэйлэн но Даниил пророклэн кылъёсысьтызы, кудъёсыз Библиын гожтэмын. Кылсярысь, Давид вераз: «Тонэ тодӥсьёс дорын гажан-жаляндэ возь»; «Кузё-Инмарлэн гажан-жалянэз Солэсь кышканэн улӥсьёс понна вапумъёсысь вапумъёсы улэ» (Пс. 35:11; 102:17). Нош тани, мар вераз Даниил: «Кузё-Инмаре, быдӟым но паймымон, сӥзён-косонэз возись, Тонэ яратӥсьёсты гажась-жалясь, курон-косонъёстэ чакласьёсты утись Инмаре» (Дан. 9:4). Та кылъёсысь адӟиське, Иегова ужась-тыршисьёсызлы оскымон яратонзэ возьматэ, малы ке шуоно соос сое тодо, солэсь кышкало, сое ярато но солэсь курон-косонъёссэ чаклало. Иеговалэн зэмос ужась-тыршисьёсыз гинэ ас вылазы солэсь оскымон яратонзэ шӧдо.

⁹ Иеговалы ужаны-тыршыны кутскеммылэсь азьло со милемыз мукет адямиосты кадь ик яратӥз (Пс. 103:14). Но куке ми солы йыбыртъяны кутскимы, ми ас выламы солэсь оскымон яратонзэ шӧдӥмы. Тани кыӵе шуныт кылъёсын Иегова котькуд ужась-тыршисезлы вазиське: «Мынам гажан-жалянэ тон бордысь уз кошкы» (Ис. 54:10). Давид сямен, ми ас выламы шӧдӥськомы, Иеговалэн аслаз ужась-тыршисьёсыныз матысь кусыпъёсыз шуыса (Пс. 4:4). Тае тодыса, милям сюлэммы ик бугырске. Та сярысь псаломъёсты гожъясь кырӟаз: «Визьмо мурт тае адӟоз но Кузё-Инмарлэсь гажан-жалянзэ валалоз» (Пс. 106:43). Та кылбурысь кылъёсты лыдэ басьтыса, ойдолэ эскеромы куинь амалъёсты, кызьы Иегова милемлы оскымон яратонзэ возьматэ но кыӵе со милемлы пайда вае.

10. Малы тодамы возёно, Иеговалэн оскымон яратонэз пумтэм вапумъёс улэ шуыса? (Псалтирь 30:8).

¹⁰ Инмарлэн оскымон яратонэз пумтэм вапумъёс улэ. Та сярысь 135-тӥ Псаломын 26 пол вераське. Та псалом таӵе кылъёсын кутске: «Кузё-Инмарез данъялэ, Кузё-Инмар ӟеч, пумтэм вапумъёс улэ Солэн гажан-жалянэз»  (Пс. 135:1). Собере 2-тӥ кылбурысен 26-тӥ кылбурозь выльысь но выльысь пумиське таӵе чур: «Пумтэм вапумъёс улэ Солэн гажан-жалянэз». Та псаломез лыдӟыса, туж паймоно, кыӵе пӧртэм амалъёсын но дугдылытэк Иегова оскымон яратонзэ возьматэ. «Пумтэм вапумъёс улэ Солэн гажан-жалянэз» кылъёсты выльысь но выльысь веран оскытэ милемыз, Инмар аслэсьтыз калыксэ яратэмысь ноку уз дугды шуыса. Тырмымтэосмес адӟыса но, Иегова милемыз номырлы ярасьтэм адямиосын уг лыдъя но милесьтым уг куштӥськы. Со интые, оскымон эш кадь, со дась милемлы юрттыны, тужгес но секыт дыръя. Соглаш луоды, дыр, та туж буйгатэ! Кыӵе пайда со милемлы вае? Куке ми тодӥськомы, Иегова милесьтым ноку уз кыштӥськы шуыса, та милемлы шумпотон но кужым сётэ, кудъёсыз туж кулэ шуг-секытъёс пыр потон понна но азьланяз но солы оскымон ужан-тыршон понна. (Лыдӟе Псалтирез 30:8.)

11. Мар Иеговалэсь мылкыдзэ ӝутэ простить карыны, Псалтирез 85:5 лыдэ басьтыса?

¹¹ Инмарлэн оскымон яратонэз солэсь мылкыдзэ ӝутэ сьӧлыкъёсты простить карыны. Иегова адӟе, куке сьӧлык лэсьтэм мурт ӧпкеле но шонертэм сюрессэ кельтэ. Оскымон яратон Иеговалэсь мылкыдзэ ӝутэ сьӧлыкъёсты простить карыны. Тани мар вераз Давид Иегова сярысь: «Законлы пумит улэмъёсмы понна вӧсь ӧз кары, сьӧлыкъёсмы понна пунэмзэ ӧз берыкты» (Пс. 102:8—10). Давид ас вылаз шӧдӥз, макем вӧсь луэ, возьытлык йырйыку. Озьы ик со валаз, Иегова простить карыны дась шуыса. Псалтирьын 85:5 со гожтӥз, мар Иеговалэсь мылкыдзэ ӝутэ сьӧлыкъёсты простить карыны (лыдӟе). Та вӧсяськонэз лыдэ басьтыса, Иегова простить каре соосты, кинъёс со сярысь куро, малы ке шуоно солэн оскымон яратонэз туж бадӟым (Пс. 102:11).

12, 13. Мар юрттыны быгатэ, азьвыл лэсьтэм янгышъёсмы понна сюлэммы милемыз пыкылэ ке?

¹² Адями лэсьтэм сьӧлыкез понна ӧпкеле ке, со умой но пайда вайыны быгатэ. Куке адямилы возьыт, со солэсь мылкыдзэ ӝутыны быгатэ ӧпкельыны но воштӥськыны. Озьы ке но Инмарлэн куд-ог ужась-тыршисьёсыз азьвыл лэсьтэм янгышъёссы понна асьсэды укыр зол янгыше уськыто. Соос вань сюлмысьтызы ӧпкелизы ке но, соос малпало, Иегова соосты ноку простить уз кары  шуыса. Тӥледлы но таӵе шӧдонъёс тодмо ке, тӥ соослэсь мозмытскыны быгатӥськоды. Мар тӥледлы юрттоз? Эн вунэтэ: Иегова тӥледлы оскиськымон яратонзэ возьматэ но солэн тӥледлы юрттэмез потэ.

¹³ Кыӵе пайда со милемлы вае? Тырмымтэосмы шоры учкытэк, ми быгатӥськомы шумпотыса но чылкыт возьытлыкен Иеговалы ужаны-тыршыны. Со луыны быгатэ, малы ке шуоно «Пиезлэн Иисус Христослэн Вирыз котькыӵе но сьӧлыклэсь асьмеды сузя» (1 Иоанн 1:7). Тӥ азьвыл лэсьтэм янгышъёсты понна ӧпкелиды ке но та дырозь соос понна асьтэды янгыше уськытӥськоды ке, тодады вайылэ, Иегова простить карыны дась гинэ ӧвӧл, солэн туж потэ тӥледыз простить каремез! 102-тӥ Псаломын Давид возьматӥз, Иеговалэн оскымон яратонэз но простить каронэз ог-огенызы туж герӟаськемын шуыса: «Макем ӝужыт музъемысен инбам, сокем ик быдӟым Кузё-Инмарлэн гажан-жалянэз Солэсь кышканэн улӥсьёс понна. Макем кыдёкын шундыӝужан шундыпуксёнысен, сокем кыдёке законлы пумит улэмъёсмес Со палэнтӥз» (Пс. 102:11, 12). Зэм, Иегова вань сюлмысьтыз простить каре (Ис. 55:7).

14. Кыӵе ӵошатон сярысь вераз Давид, Инмарлэн оскымон яратонэз сярысь веракуз?

¹⁴ Инмарлэн оскымон яратонэз милемыз уте. Давид Иеговалы кырӟаз: «Тон — мынам Шобретэ; Тон монэ куректон-кайгулэсь утиськод, мозмытсконлы шумпотонэн Тон монэ котыртӥськод. ...Кузё-Инмарлы оскиськыса улӥсь муртэ гажан-жалян котыртэ» (Пс. 31:7, 10). Вашкала дыръёсы, тушмонъёслэсь утиськон понна, карез борддорен котырто вал. Озьы ик Иегова но уте милемыз оскымон яратонэныз, ми солы оскымон кыльыны мед быгатомы шуыса. Со сяна, милемыз уте Иеговаен эшъяськон, кудӥз луыны быгатэ солэн оскымон яратонэзлы луыса гинэ (Иер. 31:3).

15. Маин Иеговалэн оскымон яратонэз кельше изкарлы но утиськон интылы?

¹⁵ Со сярысь, кызьы Инмар аслэсьтыз калыксэ уте, Давид таӵе чебер кылъёс вераз: «Инмар — мынам дурбасьтӥсе, Инмаре монэ жаля уго». Мукет псаломын Иегова сярысь Давид тазьы гожтӥз: «Со мынам гажась-жалясе, изкаре, утиськон интые, Мозмытӥсе, мынам щитэ — мон Со вылэ оскиськисько» (Пс. 58:18; 143:2). Малы Давид Иеговалэсь оскымон яратонзэ ӵошатӥз изкарен но утиськон интыен? Кытын гинэ ми медам улэ, кӧня дыр ӵоже гинэ ми солы медам ужалэ-тырше, Инмар милемыз утьыны тыршоз, милям соин кусыпъёсмы медаз сӧриське шуыса. Иегова сярысь та выллем малпан вань 90-тӥ Псаломын но, кудзэ Моисей гожтӥз, вылды: «Мынам ватӥськонэ, мынам утиськонэ» (Пс. 90:1—3, 9, 14). Моисей Иеговаез утиськон интыен нимаз 89-тӥ Псаломын но. Нош кулон азяз Моисей ватсаз на: «Ватӥськон интыед пумтэм вапумъёс ӵоже улӥсь Инмар дорын, Солэн котьку кужмо луись суйбыгыт улаз утиськиськод» (К. Зак. 33:27). «Солэн котьку кужмо луись суйбыгыт улаз утиськиськод» шуыса веран Иеговалэн оскымон яратонэзлэсь эшшо одӥг аспӧртэмлыксэ возьматэ на. Кыӵе аспӧртэмлыкез со возьматэ?

16. Кызьы Иегова милемлы юрттэ? (Псалтирь 135:23).

¹⁶ Иегова милям утиськон интымы луиз ке, ми номырлэсь ум кышкалэ. Но куддыръя, куашкам мылкыдын улыса, ми чылкак катьтэммиськомы. Мар каре Иегова, куке адӟе, милям мылкыдмы куашкамын шуыса? (Лыдӟе Псалтирез 135:23.) Со милемыз юнматэ, ӝутэ но выльысь пыд выламы султыны юрттэ (Пс. 27:9; 93:18). Кыӵе пайда со милемлы вае? Ми оскиськомы, Инмар милемлы котьку но юрттоз шуыса. Нырысетӥез, кытын гинэ ми медам луэ, милям котьку утиськон интымы вань. Кыкетӥез, яратӥсь инмысь Атаймы ми сярысь туж сюлмаське.

17. Кыӵе осконмы милям вань Инмарлэн оскымон яратонэзлы луыса? (Псалтирь 32:18—22).

¹⁷ Кызьы ми эскеримы та статьяын, кыӵе гинэ шуг-секытэн ми медам пумиське, ми юн оскыны быгатӥськомы: Иегова милемын ӵош но со юрттоз милемлы солы оскымон кыльыны (2 Кор. 4:7—9). Иеремия пророк вераз: «Кузё-Инмарлэн гажан-жалянэз ванен асьмеос ӧм ыше-быре, уго Солэн гажан-жалянэз ӧз на быры» (Бӧрд. 3:22). Ми юн оскиськомы: Иегова милемлы оскымон яратонзэ возьматэмысь уз дугды, малы ке шуоно псаломъёсты гожъясь тазьы вераз: «Кузё-Инмарлэн синмыз Солэсь кышкасьёс, Солэн гажан-жалянэзлы оскиськисьёс вылын улэ». (Лыдӟе Псалтирез 32:18—22.)

18, 19. а) Мар сярысь тодамы возёно? б) Мае ми эскеромы вуоно статьяын?

¹⁸ Мар сярысь тодамы возёно? Иегова вань адямиосты яратэ. Солы ужаны-тыршыны кутскеммылэсь азьло, со милемыз но яратӥз. Но Иеговалэн калыкез пӧлы пырыса, ми ас выламы шӧдӥмы солэсь оскымон яратонзэ. Иегова милемыз ӟыгыртэ кадь. Со милемыз ноку уз кельты, котьку милемыз утёз но вань кылсётонъёссэ быдэстоз. Солэн потэ, ми соин пырак дауръёс ӵоже мед эшъяськомы шуыса! (Пс. 45:2, 3, 8). Соин ик, кыӵе гинэ шуг-секытэн ми медам пумиське, Иегова милемлы кужым сётоз солы оскымон кыльыны.

¹⁹ Ми эскеримы, кызьы Иегова аслаз ужась-тыршисьёсызлы оскымон яратонзэ возьматэ. Но со возьма, ми ог-огмылы но оскымон яратонмес мед возьматомы шуыса. Кызьы сое возьматоно, эскериськоз вуоно статьяын.