1. Evetiyo lipi Yehova a tu ĩha?

YEHOVA o sanjuka oku lekisa ocisola ka ci pongoloka. (Hos. 6:6) Eye o vetiyavo afendeli vaye oku setukula ocituwa caco. Pocakati cuprofeto Mika, Suku yetu o tu vetiya “oku sola ocisola ka ci pongoloka.” (Mika 6:8, etosi) Pole, oco tu ci linge, tu sukila oku kũlĩha eci ci lomboloka ocisola ka ci pongoloka.

2. Nye ci lomboloka ocisola ka ci pongoloka?

² Nye ci lomboloka ocisola ka ci pongoloka? Ondaka “ocisola ka ci pongoloka,” Vembimbiliya li Kola Epongoluilo Lioluali Luokaliye, yi sangiwamo 230 kolonjanja. Yi tiamisiwila pi? Ndomo ci sangiwa ponepa “Elomboluilo Liolondaka Viembimbiliya,” oyo “yi tiamisiwila kocisola ci vetiyiwa lohuminyo, lesunga, ocili kuenda ukamba walua. Ondaka yaco olonjanja vialua yi tiamisiwila kocisola Suku a kuetele omanu, pole, yi tiamisiwilavo kocisola omanu va li kuetele.” Yehova eye ongangu ya velapo koku lekisa ocisola ka ci pongoloka. Ocipama cilo, ci ka lombolola ndomo Yehova a lekisa ocisola ka ci pongoloka komanu. Vocipama ci kuãimo, tu ka konomuisa okuti omo tuafendeli va Suku tu pondola oku setukula Yehova poku lekisa ocisola ka ci pongoloka komunu lukuavo.

3. Yehova wa lisitulula ndati ku Mose?

³ Noke liotembo yimue eci va Isareli va tunda Kegito, Yehova wa lisituluila ku Mose poku tukula onduko yaye kuenda ovituwa viaye. Eye wa popia hati: “Yehova, Yehova, Suku umue  ukuahenda, ukuacikembe, o livala konyeño kuenda ukuacisola calua haico ka ci pongoloka, haeye ukuacili, o lekisa ocisola ka ci pongoloka kolohulukãi, ecela okulueya, levĩho kuenda ekandu.” (Etu. 34:6, 7) Lolondaka evi viwa, Yehova wa sapuila Mose ocina cimue ca velapo catiamẽla kocisola caye ka ci pongoloka. Ndamupi?

4-5. (a) Ndamupi Yehova a lisitulula? (b) Apulilo api tu konomuisa?

⁴ Yehova ka lisitulula lika ndomunu umue o kuete ocisola ka ci pongoloka, pole, eye “ukuacisola calua haico ka ci pongoloka.” Ondaka yaco Vembimbiliya yi tukuiwa eci ci pitahãla olonjanja epandu. (Ate. 14:18; Neh. 9:17; Osa. 86:15; 103:8; Yoe. 2:13; Yona 4:2) Ondaka yaco eci yi tukuiwa yi suñamisiwa lika ku Yehova, okuti komanu hakoko. Eci hẽ ka ci komõhisa Yehova oku situlula ocituwa caye cocisola ka ci pongoloka? Kuenje tu pondola oku limbuka okuti ocisola ka ci pongoloka ca velapo kokuaye. * Eli olio esunga lieci Soma Daviti a popela hati: “A Yehova, ocisola cove ka ci pongoloka ci pitĩla toke kovailu, . . . A Suku, ocisola cove ka ci pongoloka ciwa cimue! Omãla vomanu va sanda ocitililo vulembo wavava ove.” (Osa. 36:5, 7) Anga hẽ ka tu sanjukila ocisola ka ci pongoloka ca Suku ndeci ca linga Daviti?

⁵ Oco tu kũlĩhe eci ci lomboloka ocisola ka ci pongoloka, tu konomuisa apulilo avali: Ku velie Yehova a lekisa ocisola ka ci pongoloka? Kuenda tu kuatisiwa ndati lovilinga via Yehova viocisola ka ci pongoloka?

6. Ku velie Yehova a lekisa ocisola ka ci pongoloka?

⁶ Ku velie Yehova a lekisa ocisola ka ci pongoloka? Embimbiliya li tukula ovina vialua tu pondola oku sola ndeci, “oku lima,” “ovinyu,” “ulela,” “epindiso,” “ukũlĩhĩso,” kuenda “olondunge,” oku tukulako ño vimue. (2 Asa. 26:10; Olosap. 12:1; 21:17; 29:3) Ocisola ka ci pongoloka, ka ci lekisiwa kovina; ci lekisiwa lika komanu. Pole, Yehova ka lekisa ocisola ka ci pongoloka komanu vosi. Eye o lekisa lika ocisola caco, ku vana va kuete ukamba wa pama laye. Suku yetu, ukuacili kakamba vaye. Eye wa likuminya ovina viwa kokuavo kuenda ocisola caye kokuavo, ka ci pui.

7. Yehova wa lekisa ndati ocisola komanu vosi?

⁷ Yehova wa lekisa ocisola komanu vosi. Yesu wa sapuila ulume umue o tukuiwa Nikodemo hati: ‘Suku wa sola calua oluali, [okuti  omanu,] wa eca Omõlaye wongunga okuti, wosi o kolela kokuaye ka nyõliwa, pole, o kuata omuenyo ko pui.’—Yoa. 3:1, 16; Mat. 5:44, 45.

8-9. (a) Momo lie Yehova a lekisila ocisola ka ci pongoloka kafendeli vaye? (b) Nye tu konomuisa cilo?

⁸ Ndomo ca tukuiwa ale, Yehova o lekisa ocisola ka ci pongoloka ku vana va kuete ukamba wa pama laye okuti, afendeli vaye. Tu pondola oku mola uvangi waco kueci Soma Daviti kuenda uprofeto Daniele va popia. Ndeci, Daviti wa popia hati: “Amamako oku lekisa ocisola cove ka ci pongoloka ku vana va ku kũlĩha.” “Ocisola ka ci pongoloka ca Yehova ci kala otembo ka yi pui ku vana vo sumbila.” Kuenda Daniele wa popiavo hati: “A Yehova Suku yocili, [una] o lekisa ocisola ka ci pongoloka ku vana vo sole, haivo va kapako ovihandeleko viaye.” (Osa. 36:10; 103:17; Dan. 9:4) Ndomo ca lekisiwa vovisonehua evi, Yehova o lekisa ocisola ka ci pongoloka kafendeli vaye omo vo kũlĩha, vo sumbila, vo sole kuenda va kapako ovihandeleko viaye. Yehova o lekisa lika ocisola ka ci pongoloka ku vana vo vumba lonjila ya sunguluka.

⁹ Osimbu ka tua fetikile oku vumba Yehova, tua kuatisiwa locisola Eye a lekisa komanu vosi. (Osa. 104:14) Omo okuti tuafendeli vaye tu kuatisiwavo locisola caye ka ci pongoloka. Kuenje Yehova o likuminya kafendeli vaye hati: “Ocisola cange ka ci pongoloka lalimue eteke cupiwa kokuove.” (Isa. 54:10) Handi Daviti wamisako hati: “Yehova o ka tata lonjila yimue yilikasi omunu o pokola kokuaye.” (Osa. 4:3) Yehova poku tu tata lonjila yimue yilikasi, ci tu vetiya oku linga nye? Ukualosamo hati: “Omunu wosi ukualondunge o ka kapako ovina evi kuenda o ka sokolola lutate kovilinga via Yehova viocisola ka ci pongoloka.” (Osa. 107:43) Cilo, tu konomuisa olonjila vitatu ndomo afendeli va Yehova va kuatisiwa lovilinga via Yehova viocisola ka ci pongoloka.

10. Tu kuatisiwa ndati poku kũlĩha okuti ocisola ka ci pongoloka ca Suku ci kala otembo ka yi pui? (Olosamo 31:7)

¹⁰ Ocisola ca Suku ka ci pongoloka ci kala otembo ka yi pui. Catiamẽla kocisola ca Suku ka ci pongoloka, ca tukuiwa 26 kolonjanja  Kolosamo 136. Kocinimbu catete tu tangako hati: “Eci olopandu ku Yehova, momo eye uwa; ocisola caye ka ci pongoloka ci kala otembo ka yi pui. (Osa. 136:1) Ocinimbu 2 toke 26 tu tanga olondaka viokuti, “ocisola caye ka ci pongoloka ci kala otembo ka yi pui.” Osimbu tu tanga ovinimbu vikuavo viosamo eyi, tu komõha calua ndomo Yehova a lekisa ocisola caye ka ci pongoloka otembo ka yi pui, volonepa vialua. Olondaka viokuti, “ocisola caye ka ci pongoloka ci kala otembo ka yi pui,” ci tu ĩha ekolelo liokuti, ocisola Suku a kuetele afendeli vaye, ka ci pui. Ci lembeleka calua oku kũlĩha okuti Yehova ka liwekapo lonjanga kocisola a kuetele afendeli vaye! Pole, eye o kakatela ku vana vo vumba, o kala lavo ca piãla enene kotembo yohali. Ndomo tu kuatisiwa: Oku kũlĩha okuti Yehova o kala letu, ci tu ĩha esanju kuenda ongusu tu sukila, oco tu tẽle oku liyaka lovitangi kuenda oku amamako oku u vumba.—Tanga Olosamo 31:7.

11. Ndomo ca tangiwa Kolosamo 86:5, nye ci vetiya Yehova oku ecela?

¹¹ Ocisola ka ci pongoloka ca Suku cu vetiya oku ecela. Eci Yehova a limbuka okuti umue ukuekandu wa likekembela kuenda wa siapo ovilinga viaco vĩvi, ocisola ka ci pongoloka, cu vetiya oku ecela omunu waco. Ukualosamo Daviti wa popia eci ca tiamẽla ku Yehova hati: “Eye ka tu tati ndomo ci likuata lakandu etu, ndaño oku tu fetuluinya ndomo ca sesamẽla lakulueya etu.” (Osa. 103:8-11) Daviti wa kũlĩhĩle evalo kuenda esumuo li tunda kowanji wutima, eci u ku vetela evelo. Pole, eye wa kũlĩhĩle okuti Yehova “wa likapelako oku ecela.” Nye ci vetiya Yehova oku ecela? Etambululo li sangiwa Kolosamo 86:5. (Tanga.) Ocili, ndomo Daviti a ci popia vohutililo, Yehova ecela omo wa piãla kocisola ka ci pongoloka ku vosi vana vo pinga ongecelo.

12-13. Nda okuti tua sumua omo liakulueya o kosimbu, nye ci ka tu kuatisa?

¹² Eci tu lueya ca sunguluka oku livetela evelo omo lieci tua linga? Eci ci tu kuatisa oku pinga ongecelo loku linga apongoloko. Pole, afendeli vamue va Suku ka va liwekapo oku livetela evelo omo lioku sokolola kakulueya avo o kosimbu. Ovo va sima okuti Yehova lalimue eteke a va ecela, ndaño okuti va pinga ongecelo kuenda va liwekapo oku linga eci  cĩvi. Nda o kasi oku liyaka locitangi caco, kũlĩha okuti Yehova o yongola oku lekisa ocisola caye ka ci pongoloka kokuove.

¹³ Ndomo tu kuatisiwa: Ndaño ka tua lipuile tu pondola oku vumba Yehova lutima wa yela. Eci ci tẽliwa, momo “osonde ya Yesu Omõlaye yi tu yelisa kakandu etu osi.” (1 Yoa. 1:7) Nda wa sumua omo liekandu limue wa lingile, ivaluka okuti Yehova o yongola oku ku ecela nda ove wa likekembela. Limbuka elitokeko Daviti a linga liatiamẽla kocisola ka ci pongoloka kuenda ongecelo. Eye wa soneha hati: “Ndeci ovailu a lepa calua okuti ilu lieve li sule, ocisola caye ka ci pongoloka, cinene ku vana vo sumbila. Ndeci utundilo u kasi ocipãla lutakelo, haico eye a kapa akandu etu ocipãla letu.” (Osa. 103:11, 12) Yehova o kuete onjongole yoku “ecela lutima wosi.”—Isa. 55:7.

14. Ocisola ka ci pongoloka ca Suku ci tu teyuila ndati ndomo Daviti a ci lombolola?

¹⁴ Ocisola ka ci pongoloka ca Suku ci tu teyuila konepa yespiritu. Daviti poku likutilila ku Yehova wa popia hati: “Ove wuciwundilo kokuange;O ka ndi teyuila kovitangi. O ka ndi kokela oku talama pokati komanu vana va ka kaluka lesanju momo ove wa ndi yovola. . . . Una o kolela Yehova o teyuiwa locisola Caye ka ci pongoloka.” (Osa. 32:7, 10) Ndeci ovimano via enda oku ñuala olupale luosimbu oco vi teyuile omanu va kalamo, ocisola ka ci pongoloka ca Yehova ca tu ñuala, oco ci tu teyuile konepa yespiritu kovina vi pondola oku kapa kohele ekolelo lietu. Kuenje ocisola ka ci pongoloka ca Yehova, ci tu vetiya oku amẽla kokuaye.—Yer. 31:3.

15. Ocisola ka ci pongoloka ca Yehova ci sokisiwa ndati locitumãlo ceteyuilo?

¹⁵ Daviti wa tukula ovindekaise vikuavo oco a lekise ndomo Suku a teyuila afendeli vaye. Eye wa soneha hati: “Suku eye ocitililo cange ca koka, Suku una o lekisa ocisola ka ci pongoloka kokuange.” Daviti wamisako hati: “Eye ocisola cange ka ci pongoloka haeye ociteyuilo cange, Eye ocitililo cange ca koka kuenda onjovoli yange, ociyepelo cange kuenda Kokuaye oko ndi vunda.” (Osa. 59:17; 144:2) Momo lie Daviti a sokisila ocisola ka ci pongoloka ca Yehova locitililo cimue kuenda ociteyuilo? Ndaño tu kasi kovitumãlo via litepa, pamue tua fetika ndopo, ale osimbu oku vumba Yehova, eye o ka tu ĩha eteyuilo liosi tu sukila oco tu lave ukamba wetu uwa tu kuete laye. Ohuminyo yimuamue yi sangiwa Kosamo 91. Usonehi wosamo yaco, wa popia hati: “Ndi ka sapuila Yehova hati: ‘Ove wucitililo cange kuenda wuciteyuilo cange.’” (Osa. 91:1-3, 9, 14) Mose wa tukulavo ondaka yaco yocindekaise catiamẽla kocitililo. (Osa. 90:1, etosi) Kuenje, osimbu Mose ka file, eye wa tukula olondaka vikuavo viocindekaise via posoka calua. Eye wa soneha hati: “Suku eye ocivundilo tunde kosimbu, ovoko aye ka a pui a kasi vemẽhi liove. (Esin. 33:27) Ondaka “ovoko aye ka a pui a kasi vemẽhi liove,” yi tu sapuila nye catiamẽla ku Yehova?

16. Volonjila vipi vivali Yehova a tu kuatisa? (Olosamo 136:23)

¹⁶ Eci tu tenda Yehova okuti, ocitililo cetu tu kolapo. Pole, pamue tu sumua kuenda citava okuti tu amamako lesumuo liaco. Eci tu pita locitangi caco, nye Yehova a tu lingila? (Tanga Olosamo 136:23.) Eye o kapa ovoko aye vemẽhi lietu, o tu votola kuenda o tu kuatisa oku yula esumuo liaco. (Osa. 28:9; 94:18) Ndomo tu kuatisiwa: Tua kũlĩha okuti olonjanja viosi tu pondola oku kolela ku Suku kuenje eci ci tu kuatisa oku ivaluka okuti tu ka kuatisiwa volonjila vivali. Tete, kocitumãlo cosi tu sangiwa, tua kũlĩha okuti Yehova olonjanja  viosi o tu teyuila. Vali, Isietu wokilu ukuacisola o tu tata.

17. Omo liocisola ka ci pongoloka ca Suku, ekolelo lipi tu kuete? (Olosamo 33:18-22)

¹⁷ Ndomo tua siata oku ci konomuisa, eci tu liyaka lovitangi, tu koleli okuti Yehova o tu ĩha ekuatiso tu sukila oco tu amameko lekolelo. (2 Va Kor. 4:7-9) Uprefeto Yeremiya wa popia hati: “Ka tua nyõliwile omo liocisola ka ci pongoloka ca Yehova, momo ovilinga viaye viohenda, lalimue eteke vi pua.” (Asiõ. 3:22) Tu pondola oku kolela okuti ocisola ka ci pongoloka ca Yehova ci kala vokuetu momo ukualosamo o tu sapuila hati, “ovaso a Yehova a lavulula vana vo sumbila; vana va lavoka ocisola caye ka ci pongoloka.”—Tanga Olosamo 33:18-22.

18-19. (a) Nye tu sukila oku amamako oku ivaluka? (b) Nye tu ka konomuisa vocipama ci kuãimo?

¹⁸ Nye tu sukila oku amamako oku ivaluka? Osimbu ka tua fetikile oku vumba Yehova, tua kuatisiwa locisola Eye a lekisa komanu vosi. Omo okuti tuafendeli vaye, etu tu kuatisiwavo locisola caye ka ci pongoloka. Omo liocisola Yehova a tu kuetele, eye o tu teyuila lovoko aye. Eye olonjanja viosi o kamẽla kokuetu kuenda o ka tẽlisa ohuminyo yaye kokuetu. Eye o yongola okuti tu kala akamba vaye otembo ka yi pui! (Osa. 46:1, 2, 7) Omo liaco, ndaño tu liyaka lovitangi, Yehova o ka tu ĩha ongusu tu sukila oco tu amameko lekolelo.

¹⁹ Tua siata oku mola ndomo Yehova a lekisa ocisola ka ci pongoloka kafendeli vaye. Kuenje eye o lavoka okuti etu tu lekisavo ocisola ka ci pongoloka komunu lukuavo. Tu ci linga ndati? Tu ka ci konomuisa vocipama ci kuãimo.