1. Yehova onnitumererya exeeni?

YEHOVA onnivaha efaita yinceene ophenta wekeekhai. (Hos. 6:6) Nave oniphavela wira arumeyi awe avaheke efaita ophenta wekeekhai. Omurumaka profeta Mikeya, Muluku ahu onnintumererya wira nihaana okhalana ophenta wekeekhai. (Mik. 6:8) Masi nihinatthi oweha moota nikhanle ahu oowooniherya ophenta wekeekhai, nrowe niwehe ele onitaphulela aya ophenta wekeekhai.

2. Ophenta wekeekhai exeeni?

² Ophenta wekeekhai exeeni? Nuulumo noowi ophenta wekeekhai, ninniphwanyaneya ikwaha 230 Tradução do Novo Mundo da Bíblia Sagrada. Masi onitaphulela exeeni ophenta wekeekhai? “Moolumo Ootthokiheriwa a mBiibiliyani”, ataphulenle so nuulumo noowi ophenta wekeekhai: “Ophenta ohinimala, woororomeleya ni ovarexexana. Ikwaha sinceene onnihimmwa ophenta Muluku oniwooniherya awe apinaatamu. Nave, onnihimmwa ophenta apinaatamu anooniheryana aya mukina ni mukhwaawe”. Yehova ntakiheryo nuulupale na mutthu onooniherya ophenta wekeekhai. Mwaha ola, ninrowa oweha moota Yehova oniwooniherya awe apinaatamu ophenta wekeekhai. Mwaha onittharelana, ninrowa oweha moota arumeyi a Muluku akhanle aya ootakiha ophenta wekeekhai wa Yehova vaavo aniphentana aya mukina ni mukhwaawe.

3. Etthu xeeni Yehova aamulenle awe Moise?

³ Moohipisa nuumala aIsarayeli okhuma wExiitu, Yehova aahimuleela Moise nsina nawe ni mikhalelo sawe. Owo aahimmye so: “Miyo k’Apwiya, Apwiya Muluku òmoriwa ikharari ni òvilela, òpisa onanariwa, òrera murima ni òroromeleya. Miyo kinnarerela murima atthu n’an’aya n’osulu aya mpakha oholo onkelelahu; miyo kinnileva sottheka saya n’uhiwelela waya n’itampi  saya”. (Okhum. 34:6, 7) Ni moolumo ala oovara murima, Yehova aahimuleela Moise etthu ya faita yinceene, eyo piiyo, ophenta wawe wekeekhai. Eyo enihela muhina exeeni?

4-5. (a) Mukhalelo xeeni muulupale Yehova onooniherya awe? (b) Mwaha ola, ninrowa waakhula makoho xeeni?

⁴ Yehova khahiyo paahi onihimya wira ookhalana ophenta wekeekhai. Masi-tho, owo ‘tòsareya’ ophenta wekeekhai. Moolumo ala anniphwanyaneya ikwaha sinivikana 6 mBiibiliyani. (Moth. 14:18; Neh. 9:17; Esal. 86:15; 103:8; Yow. 2:13; Yona 4:2) Ikwaha sotheene anrumeeliwa aya moolumo awo, onihimmwa Yehova paahi, ohiya apinaatamu. Khamunoona wira etthu yoovara murima Yehova wiihimya mmansawe wira toosareya ophenta wekeekhai? Vannooneya oratteene wira Yehova onnivaha efaita yinceene ophenta wekeekhai. * Eyo ti etthu yaamwiirinhe Mwene Davidi ohimya wira: “Muluku! Oniphenta wanyu onkhuma osulu . . . Muluku ahu! Oniphenta wanyu ti wororomeleya tthiri. Atthu antthyawela mmuttutthini wa mapuph’anyu”. (Esal. 36:6, 8) Ntoko Davidi, hiyo onninisivela vanceene ophenta wekeekhai wa Muluku.

⁵ Wira niiwexexe ele enitaphulela aya ophenta wekeekhai, nrowe naakhule makoho manli. Makoho ene taala: Tani Yehova oniwooniherya awe ophenta wekeekhai? Ninttottela sai mureerelo ophenta wekeekhai wa Yehova?

6. Tani Yehova oniwooniherya awe ophenta wekeekhai?

⁶ Tani Yehova oniwooniherya awe ophenta wekeekhai? Biibiliya onihimya wira hiyo sinninsivela itthu sinceene ntoko ‘olima’, eviinyu, makhura, “ottaruxiwa”, osuwela ni “ankhili”. (2 Wah. 26:10; Mir.  12:1; 21:17; 29:3) Musuweleke wira ophenta wekeekhai khonooniheriwa itthu sihikhanle sikumi ni inama, maana anooniheriwa paahi apinaatamu. Nto niireke Yehova onniwooniherya ophenta wekeekhai atthu otheene? Nnaari. Owo oniwooniherya ophenta wekeekhai atthu yaale arina waataana wa vameekhaaya ni yena. Muluku ahu onnaaphenta vanceene apatthani awe. Ohiya-vo, sookhala itthu sinceene oniphavela awe waapakela ni khonikhala-khala ohiyaka waaphenta.

7. Yehova oonihenrye sai wira onnaaphenta apinaatamu otheene?

⁷ Yehova ohooniherya wira onnaaphenta apinaatamu otheene. Yesu aahooniherya eyo vaavo aavaanela awe ni mulopwana mmosa iihaniwa Nikodemo. Yesu aamulenle so: “Tthiri, Muluku oophentexa olumwenku, mpakha onvaha Mwanawe mmoseene, wira otheene ale  anooniherya omwaamini yoowo, ahipwetexiwe, masi akhalane okumi woohimala”.—Yoh. 3:1, 16; Math. 5:44, 45.

8-9. (a) Xeeni Yehova oniwooniherya awe ophenta wekeekhai arumeyi awe? (b) Inamuna xeeni ninrowa ahu othokorerya?

⁸ Ntoko nihimmye ahu wanipacerya, Yehova onniwooniherya ophenta wekeekhai atthu yaale paahi arina waataana wooloka ni yena, niire so, arumeyi awe. Moolumo a Mwene Davidi ni profeta Daniyeli, annooniherya eyo. Mwa ntakiheryo, Mwene Davidi aahimmye so: “Mwasuke mophentani mwanyu ale anosuwelani”. “Apwiya annaphenta vohimala-tho ale anattittimiha”. Nave profeta Daniyeli aahimmye so: “Nyuwo Apwiya Muluku! Nyuwo mw’àlupale ni òttittimiheya: nyuwo munnisuka watàna n’ale aníwelela ikano sanyu; nyuwo m’òroromeleya n’ale anophentani”. (Esal. 36:11; 103:17; Dan. 9:4) Moovarihana ni moolumo ala, Yehova onniwooniherya ophenta wawe wekeekhai arumeyi awe mwaha woowi annimusuwela, annimoova, annimphenta ni anniiwelela malamulo awe. Yehova onniwooniherya ophenta wawe wekeekhai ale animurumeela ntoko oniphavela awe.

⁹ Nihinatthi opacerya omurumeela Yehova, owo aaninooniherya ophenta oniwooniherya awe apinaatamu otheene. (Esal. 104:14) Masi nuumala opacerya omukokhorela, hiyo ninnittottela mureerelo ophenta wawe wekeekhai. Yehova onnaaleela arumeyi awe otheene wira: “Wophentani waka khunonyanyalani-tho”. (Yes. 54:10) Davidi aahimmye so: “Apwiya annapakela sotikiniha apatthani aya”. (Esal. 4:4) Nto, enamuna Yehova onnithokorerya awe, ehaana oniiriha opaka exeeni? Nasalimo mmosa aahimmye so: “Arina ankhili etthokelele orattene itthu iya sothene; esuweleke waphenta waya Apwiya”. (Esal. 107:43) Tthiri iya miruku sooreera sinikhuma wa Yehova. Vano nrowe nithokorerye inamuna 3 Yehova oniwooniherya awe ophenta wekeekhai arumeyi awe ni moota nikhanle ahu oottottela mureerelo ophenta wawe wekeekhai.

10. Osuwela wira ophenta wekeekhai wa Yehova khonimala, onnikhaliherya sai? (Esalimo 31:8)

¹⁰ Ophenta wekeekhai wa Muluku ti woohimala. Moolumo awo, annilavuliwa ikwaha 26 Esalimo  136. Eversiikulu 1 ya Esalimo 136, ninsoma so: “Mwattottopele Apwiya, mana t’òrera murima: oniphenta waya ti wohimala”. (Esal. 136:1) Okhuma eversiikulu 2 mpakha eversiikulu 26, ninniphwanya moolumo oowi “oniphenta waya ti wohimala”. Vaavo ninsoma ahu iversiikulu sikina sa Esalimo ela, ninnihakalala vanceene oweha inamuna soovirikana Yehova onnooniherya awe oniphenta wawe wekeekhai ohinimala. Moolumo oowi “oniphenta waya ti wohimala”, anninikupaliha wira enamuna Muluku onaaphenta awe arumeyi awe, ti woohimala wala khoniturukeya. Ti voolipiha oweha wira Yehova khonaakuvela ohiya waaphenta arumeyi awe! Ohiya-vo, okathi Yehova onipacerya awe omphenta mutthu yoowo onimurumeela, owo khonihiya omphenta hata okathi wa mixankiho. Moota ninttottela ahu mureerelo: Osuwela wira Yehova khonihiya oniphenta, onninihakalaliha ni onninivaha ikuru wira nivilele mixankiho sahu ni ohihiya weetta ephiro eniphwanyiha okumi.—Musome Esalimo 31:8.

11. Moovarihana ni Esalimo 86:5, etthu xeeni enimwiiriha Yehova onilevelela?

¹¹ Ophenta wekeekhai wa Muluku onnimwiiriha olevelela. Vaavo Yehova oninweha awe mutthu aapanke etampi, ottharuwa ni murima wotheene ni onakhootta mweettelo awe woohiloka, ophenta wawe wekeekhai onnimwiiriha omulevelela mutthu owo. Omuhimyaka Yehova, nasalimo Davidi aahimmye so: “Khannìrela hiyo siso simphwanelahu: khannilivela sotakhala”. (Esal. 103:8-11) Davidi aanisuwela oratteene moota vaniwereya aya ni moota oniriipiha aya murima wiivaha nthowa. Masi owo aahoona wira Yehova toowaakuva olevelela. Etthu xeeni enimwiiriha Yehova waakuva olevelela? Waakhuliwa waya ori Esalimo 86:5. (Musome.) Ntoko Davidi aahimmye awe, Yehova onninlevelela mwaha woowi owo onniwooniherya ophenta wekeekhai atthu otheene aninvekela wira aalevelele.

12-13. Akhala wira ninniivaha nthowa mwaha wa soovonya sahu sa khalai, etthu xeeni enrowa onikhaliherya?

¹² Vaavo nimpaka ahu etampi, ti vooloka oriipiwa murima maana onooniiriha onvekela Yehova wira onilevelele, ottharuwa ni opaka marukunuxo. Arumeyi akina a Muluku annitepa wiivaha nthowa mwaha wa etthu yoohiloka apanke aya. Awo anuupuwela wira Yehova khonikhala-khala aalevelelaka hata anvekenle ene wira aalevelele ni ahiyale ene opaka  itthu soohiloka. Akhala wira nyuwo munoonela siiso, nwehe moota Muluku oniwooniherya awe ophenta wekeekhai arumeyi awe. Nto eyo enimookhaliheryani vanceene.

¹³ Moota ninttottela ahu mureerelo: Hata niri ene anatampi nnoowerya omukokhorela Yehova moohakalala ni murima wooloka. Eyo enniiraneya mwaha woowi “ephome ya Yesu, Mwaana a Muluku, ennittipiha itampi sahu sotheene”. (1 Yoh. 1:7) Akhala wira nyuwo munnikhulumuwa mwaha wa soovonya sanyu, muhiliyale wira Yehova onniphavela vanceene waalevelela anatampi anittharuwa ni murima wotheene. Nwehe moota Davidi oonihenrye awe ovarihana okhanle eriyari ya ophenta wekeekhai ni olevelela. Owo aalempe so: “Ntoko erimu envikanaya elapo, siso ophenta waya onnavikana ale anattittimiha. Ntoko vanrakamelanaya onikhuma n’unikela nsuwa, siso Apwiya anninimwalanyiha ni sottheka sahu”. (Esal. 103:11, 12) Tthiri Yehova Muluku “òwakuva olevelela”.—Yes. 55:7.

14. Ophenta wekeekhai wa Muluku onnikhapelela sai?

¹⁴ Ophenta wekeekhai wa Muluku onninikhaliherya okhapelela waataana wahu ni yena. Onvekelaka Yehova, Davidi aahimmye so: “Nyuwo mwà ntthyawelo naka: munnikisuka okathi woxanka. Miyo kinnitthapa, kilaleyaka okòpola wanyu. . . . Vano ale animuroromela Muluku, anorerihiwa ni waphenta wawe”. (Esal. 32:7, 10) Khalai ixiri suulupale, saanirukurerya epooma ni saanaakhapela atthu yaakhala epooma eyo wira ahitupheliwe ni awanani aya. Mwa enamuna emosaru, ophenta wekeekhai wa Yehova ori ntoko ixiri sinnikhapelela wira ehikhale etthu yaarowa ohonona waataana wahu ni Yehova. Nave ophenta wekeekhai wa Yehova, onninikhaliherya omwaattamela.—Yer. 31:3.

15. Ophenta wekeekhai wa Yehova ni ntthyawelo, onivarihana sai?

¹⁵ Davidi aahipaka nlikanyiho nikina wira ooniherye moota Muluku onaakhapelela awe arumeyi awe. Owo aalempe so: “Nyuwo mookivaha ikuru: miyo kinnotthapelani; nyuwo mokòpola, Muluku aka munikiphenta”. Nave omuhimyaka Yehova, Davidi aahimmye so: “Apwiya ti mpatthani aka n’ulipa waka: awo t’anikakiha, t’anikòpola. Miyo kinnatthyawelela Apwiya wira ekàkihe: awo t’aniwìweleliha atthu aka”. (Esal. 59:18; 144:2) Xeeni Davidi ohalaka olikanyiha ophenta wekeekhai wa Yehova ni ntthyawelo? Moohicikha opuro ninkhala ahu, akhala wira ninnimurumeela Yehova owo onoonikhapelela wira ehikhale etthu yaarowa ohonona waataana wahu ni yena. Etthu emosaru Yehova onnileiherya awe enniphwanyaneya Esalimo 91. Mulipa-oolepa esalimo ela, aahimmye so: “Mwahimerye Apwiya wira: ‘Nyuwo ntthyawelo naka n’ulipa waka’”. (Esal. 91:1-3, 9, 14) Nave Moise aahirumeela nuulumo nimosaru ninlikana ni ntthyawelo. (Esal. 90:1) Ohalaka okathi vakhaani wira okhwe, Moise aahilavula etthu yoovara murima. Owo aalempe so: “Okhuma khalaixa, Muluku ti ntthyawelo nanyu: okhuma wopajeryani, Apwiya ti nlipiheryo nanyu”. (Otum. 33:27) Moolumo oowi “Apwiya ti nlipiheryo nanyu”, anooniherya exeeni voohimya sa Yehova?

16. Mwa inamuna xeeni piili Yehova onnikhaliherya awe? (Esalimo 136:23)

¹⁶ Okathi nnimpaka ahu Yehova okhala ntthyawelo nahu, ninnikhala oovareleleya. Hata vari siiso, okathi mukina hiyo pooti oriipiwa murima nihinoona etthu yoopaka. Okathi ene yoowo, etthu xeeni Yehova onrowa awe opaka wira onikhaliherye? (Musome Esalimo 136:23.) Owo onoonikhupaarela ni mooreerela murima onoonikhaliherya ohiya oxanka. (Esal. 28:9; 94:18) Moota ninttottela ahu mureerelo: Okathi wotheene nihaana omuroromela Muluku, nto eyo enoonikhaliherya mwa inamuna piili. Yoopacerya, moohicikha opuro ninkhala ahu, ninnisuwela wira Yehova  onoonikhapelela. Ya nenli, Tiithi ihu a wiirimu oophenta onninikhapelela vanceene.

17. Mwaha wa ophenta wekeekhai wa Muluku, etthu xeeni ninkupali ahu? (Esalimo 33:18-22)

¹⁷ Ntoko niwenhe ahu, hata nikhalanaka mixankiho nikupaliki wira Yehova onoonikhaliherya wira nihihiye okhalana waataana wooloka ni yena. (2 aKor. 4:7-9) Profeta Yeremiya aahimmye so: “Othunku w’Apwiya khumanle: omoriwa waya ikharari khurimenle”. (Wikh. 3:22) Nto nikupaliki ni murima wotheene wira Yehova khonrowa ohiya onooniherya ophenta wawe wekeekhai mwaha woowi Biibiliya onihimya wira “Apwiya t’anasuka ale aniwova: ale anroromela orera waya murima”.—Musome Esalimo 33:18-22.

18-19. (a) Etthu xeeni nihinreerela ahu oliyala? (b) Mwaha onittharela, ninrowa othokorerya exeeni?

¹⁸ Etthu xeeni nihinreerela ahu oliyala? Nihinatthi opacerya omurumeela Yehova, owo aaniniphenta ntoko onaaphenta awe apinaatamu otheene. Masi nuumala opacerya omurumeela ninnittottela mureerelo ophenta wawe wekeekhai. Okhala wira onniniphenta, Yehova onninikhupaarela ni onninikhapelela. Owo khonikhala-khala oninyanyalaka ni onoomaliherya itthu sotheene onileihenrye awe, maana owo oniphavela wira nikhale apatthani awe mahiku otheene. (Esal. 46:2, 3, 8) Nto hata nikhalanaka mixankiho, Yehova khonrowa ohiya onivaha ikuru wira nihihiye ororomeleya.

¹⁹ Mpakha-va, nooweha moota Yehova oniwooniherya awe ophenta wekeekhai arumeyi awe. Nave oniphavela wira niwooniheryeke ophenta wekeekhai atthu akina. Ninrowa owerya sai opaka eyo? Mwaha onittharela ninrowa oweha moota nikhanle ahu oopaka eyo.