1. მუშ კეთებას ელამჩანა იეჰოვა?

იეჰოვაშო ართგურ ჸოროფა მნიშვნელოვან რე (ოს. 6:6). ათეშ გურშენ თის ოკო, ჩქი ხოლო თეცალ დამოკიდებულება მიღდან დო წინასწარმეტყველ მიქაშ პიჯით ელამჩანა, გეგმიფრჩქინათ ართგურ ჸოროფა (მიქ. 6:8, სქოლიო). მარა თეშო დიო საჭირო რე, ქიგებგათ, მუ რე ართგურ ჸოროფა.

2. მუ რე ართგურ ჸოროფა?

² „ახალ ქვეყნიერებაშ თარგმანს“ ფრაზა „ართგურ ჸოროფა“ ბრელშა რე მოშინაფილ. მუჭოთ „ახალ ქვეყნიერებაშ თარგმანიშ ბიბლიურ სიტყვეფიშ განმარტებეფს“ რე ენწყუმილ, ართგურ ჸოროფა გერსხილ რე ართგურობაშა, ვალდებულებაშა დო მანგარ ემოციურ სიახლოვეშა. თე თვისებაშ გიმორჩქინაშ არძაშ უჯგუშ მაგალითის იეჰოვა მარზენა. თე სტატიას ქიგებგენთ, მუჭო გიმირჩქინანს იეჰოვა ართგურ ჸოროფას. უკულიან სტატიაშე ქობძირუნთ, მუჭო შეულებნა ღორონთიშ მსახურეფს თე თვისებაშ ართიან შქას გიმორჩქინა.

3. მუ გაუცხად იეჰოვაქ მოსეს მუშ დუდიშ გურშენ?

³ ეგვიპტეშე ისრაელიშ გიშაჸუნაფაშ უკულ ხეთეშე იეჰოვაქ მოსეს მუშ სახელ დო თვისებეფიშ გურშენ გაუცხად. თიქ უწუ: „იეჰოვა, იეჰოვა მოჭყოლოფე, შხვეფიშ გაჭირებაშ გურშა მიმაღალარ დო ითვინენსინ ფერ ღორონთ რე; ხვეიანო გიმირჩქინანს ართგურ ჸოროფას დო ირიათო ასრულენს მუშ სიტყვას. ანთასეფშო გიმირჩქინანს ართგურ ჸოროფას, პატიენს დაშებულს, უდუჯერებუობას დო ცოდვას“ (გამ. 34:6, 7). თეშნერ ენწყუმათ იეჰოვაქ მოსეს მუშ ართგურ ჸოროფაშ განსაკუთრებულ მხარე ქაძირუ. მუ რე თენა?

4, 5. ა) მუჭო ეჭარ იეჰოვაქ მუშ დუდ? ბ) მუ კითხვეფს გუვარჩიენთ?

 ⁴ იეჰოვას ვა უთქუალ, ნამდა თის უბრალოთ უღჷ ართგურ ჸოროფა, თიქ თქუ, ნამდა „ხვეიანო გიმირჩქინანს ართგურ ჸოროფას“. ბიბლია დღას ვერინუანს თეცალ დახასიათებას ადამიანეფიშ მიმართ, თინა თაშ ხვალე იეჰოვას ეჭარუნს. არგამა რე, იეჰოვაშო მანგარ მნიშვნელოვან რე თე თვისება. მუშო ოკო რაგად, დავითიქ ხოლო ათეშენ თქუ: „იეჰოვა, ცაშა ანჭუ სქან ართგურ ჸოროფა . . . მუზმათ ძვირფას რე, ღორონთ, სქან ართგურ ჸოროფა! სქან ფსუალეფიშ ოროშ თუდო გითუფორუანა დუდის ადამიანეფ“ (ფსალმ. 36:5, 7). ჩქი ხოლო, დავითცალო, მთელ გურით ქუვაფასენთო ღორონთიშ ართგურ ჸოროფას?

⁵ ართგურ ჸოროფაშ მნიშვნელობას ჯგირო ქინვანჭათინ, გუვარჩუათ ჟირ კითხვა: მიშ მიმართ გიმირჩქინანს იეჰოვა ართგურ ჸოროფას? დო მუჭო შემლებნა იეჰოვაშ თე თვისებაშე ჯგირობუა მიბღათ?

6. მიშ მიმართ გიმირჩქინანს იეჰოვა ართგურ ჸოროფას?

⁶ ბიბლია მირაგადნა, ნამდა ჩქი შილებე მიჸორდან ბრელ მუდგარენ, მაგალთო, „სიმართლე“, „სიბრძნე“ დო „თინა, მუთ ჯგირ რე“ (ფსალმ. 99:4; იგავ. 29:3; ამოს. 5:15). მარა ართგურ ჸოროფა თეცალ მუდგარენეფიშ მიმართ დღას ვეგმიხანტუ, თიშ გიმორჩქინა ხვალე ადამიანეფიშ მიმართ რე შეიოლებერ. თეშ უმკუჯინუო, იეჰოვა ირკოჩწკუმა ვეგმირჩქინანს თე ჸოროფას. თინა ართგურ ჸოროფას გიმირჩქინანს თინეფიშ მიმართ, მიდგას განსაკუთრებულ ურთიერთობა უღჷ მუწკუმა; ჩქინ ღორონთ მუშ მეგობრეფიშ ართგურ რე, ჯგირ მომავალ ოკო თინეფშო დო დღას ვემიოტენს.

7. მუჭო გიმირჩქინ იეჰოვაქ მთელ კაცობრიობაშ მიმართ ჸოროფა?

⁷ იეჰოვაქ მთელ კაცობრიობაშ მიმართ გიმირჩქინ ჸოროფა. იესოქ ნიკოდემეს უწუ: „ღორონთიქ ქვეყნიერება თეშ ქიჸოროფუ, ნამდა ქიმეჩ მუშ ხვალეგუნაჭყეფ სქუა, მუშენდა მიდგას თინა წანს, ვა ღურას დო მარადიულ სიცოცხლე უღდას“ (იოან. 3:1, 16; მათ. 5:44, 45).

8, 9. ა) მუშენ გიმირჩქინანს იეჰოვა ართგურ ჸოროფას მუშ მსახურეფიშ მიმართ? ბ) მუს გუვარჩიენთ?

⁸ მარა, მუჭოთ ჟიშე მიფშინეთ, იეჰოვა ართგურ ჸოროფას ხვალე თინეფიშ მიმართ გიმირჩქინანს, მიდგას განსაკუთრებულ ურთიერთობა უღჷ მუწკუმა. თენა იძირე მეფე დავითიშ დო წინასწარმეტყველ დანიელიშ სიტყვეფშე. მაგალთო, დავითიქ თქუ: „სქან ართგურ ჸოროფა ვემიარკა თინეფს, მით გიჩინენს“. „იეჰოვაშ ჸოროფა ართგურ რე დო მარადიულ მუშ  მოშიშეფიშ მიმართ“ (ფსალმ. 36:10; 103:17). თეს გეძინელ, დანიელიშ 9:4-ის ბკითხულენთ: „იეჰოვა, ჭეშმარიტ ღორონთ, სქან ჸოროფა ართგურ რე სქან მოჸოროფეეფიშ, სქან მცნებეფს იცვენან თინეფიშ მიმართ!“. თე შთაგონებულ სიტყვეფშე იძირე, ნამდა იეჰოვა ართგურ ჸოროფას მუშ მსახურეფიშ მიმართ გიმირჩქინანს, მით იჩინენს თის, უღჷ თიშ შიშ, ჸოროფა დო იცვენს თიშ მცნებეფს.

⁹ იეჰოვაშ მსახურებაშ დოჭყაფაშახ ბღებულენდით თი ჸოროფას, ნამდგას იეჰოვა მთელ კაცობრიობაშ მიმართ გიმირჩქინანს (ფსალმ. 104:14). მარა თიშ თაყვანიშმცემელო გინიფრთითინ თიშ უკულ ღორონთიშ ართგურ ჸოროფას ხოლო ბგინაფლენთ. იეჰოვა არწმუნენს მუშ მსახურეფს: „ჩქიმ ჸოროფა ართგურ იჸუაფ“ (ეს. 54:10). სინამდვილეს, მუჭოთ დავითიქ გიმოცად მუშ დუდშა, „იეჰოვა გეგშაგორუნს მუშ ართგურს“ (ფსალმ. 4:3). მუჭო ოკო მიფქცუათ ჩქი, მით იეჰოვაშ განსაკუთრებულ ჸოროფას ბღებულენთ? ფსალმუნმაბირექ თქუ: „ქიდეკვირებ ირფელს ბრძენ დო ტომბაშე დეფიქრებ იეჰოვაშ ართგურ ჸოროფაშე“ (ფსალმ. 4:3). მორთ გუვარჩუათ სუმ მხარე, მუჭო გიმირჩქინანს იეჰოვა ართგურ ჸოროფას დო ჩქი მუ ჯგირობუას ბღებულენთ თავრეშე.

10. მუ ჯგირობუა მოუღ ჩქინდა თის, ნამდა იეჰოვაშ ჸოროფა მარადიულ რე? (ფსალმ. 31:7)

¹⁰ ღორონთიშ ართგურ ჸოროფა მარადიულ რე. ართგურ ჸოროფაშ თე მნიშვნელოვან მხარე 136-ა ფსალმუნს 26-შა რე მოშინაფილ. პირველ მუხლის ბკითხულენთ: „მადლობა ქუწით იეჰოვას, მუშენდა ჯგირ რე თინა. მარადიულ დო ართგურ რე თიშ ჸოროფა“ (ფსალმ. 136:1). 2—26 მუხლეფს ირიათო იმეორებ ფრაზა, „მარადიულ დო ართგურ რე თიშ ჸოროფა“. მუჟამსით თე ფსალმუნს ბკითხულენთ, მაკვირენა, მუსხინერო გიმირჩქინანს იეჰოვა ართგურ ჸოროფას მარადიულო. ფრაზა, „მარადიულ დო ართგურ რე თიშ ჸოროფა“, მარწმუნენა, ნამდა ღორონთიშ ჸოროფა მუშ ხალხიშ მიმართ დღას ვეთირუ. მუნერ გურიშემაკინალ რე თიშ რჩქინა, ნამდა იეჰოვა ხეთეშე ვემიოტენს მუშ მსახურს. თეშ მანგიორო, ელურე თის, განსაკუთრებულო რთულ სიტუაციეფიშ  დროს. მუ ჯგირობუას ბღებულენთ თავრეშე: თეშ რჩქინა ჩქი მარზენა ხიოლს დო ძალას, ნამუთ მოსაჭირნა რთულ სიტუაციეფიშ გარზებელო დო სიცოცხლეშ შარას გილაულარო (წეკითხით ფსალმუნიშ 31:7).

11. მუჭოთ ფსალმუნიშ 86:5-შე იძირე, მუ გინაჭყვიდირაფუანს იეჰოვას, რდას მპატიებელ?

¹¹ ღორონთის ართგურ ჸოროფა გინაჭყვიდირაფუანს პატიებას. მუჟამსით იეჰოვა ორწყე, ნამდა შემცოდველ მთელ გურით ინანიენს დო მეტო ვაგრძელენს ცოდვაშ კეთებას, ართგურ ჸოროფა თის გინაჭყვიდირაფუანს პატიებას. ფსალმუნმაბირე დავითიქ იეჰოვაშ გურშენ ჭარჷ: „ჩქინ ცოდვეფიშ გურშენ მოკუთნუდესინ თეშ ვემმექცის დო ვართ დაშებულშენ მოფთხის მოკუთნუდესინ ფერ პასუხ“ (ფსალმ. 103:8—11). დავითიქ მუშ დუდშა გიმოცად, მუშმანწარა რე, მუჟამსით კოჩის სინდის აწუხენს, მარა თინა ხოლო ქიგეგ, ნამდა იეჰოვა მპატიებელ რე. მუ გინაჭყვიდირაფუანს იეჰოვას, რდას მპატიებელ? პასუხ მოჩამილ რე ფსალმუნიშ 86:5-ის (წეკითხით). მუჭოთ დავითიქ თქუ ლოცვაშ დროს, იეჰოვას ართგურ ჸოროფა გინაჭყვიდირაფუანს, ქაპატუას თინეფს, მით თეს თხინს.

12, 13. მუ მიმეხვარებნა, მუჟამსით ზედმეტო ბწუხენთ ულირს დაშებულიშ გურშენ?

¹² შეცოდებაშ უკულ წუხებას ჯგირ შედეგეფ მოჸუნს. თიშ შეულებ, გეგნმოჭყვიდირაფუან მონანიება დო საჭირო ნაბიჯეფ გეგნმოდგუმაფუან. მარა ღორონთიშ ნამთინე მსახურს ამდღარშახ აწუხენს სინდის ულირს დაშებულიშ გურშენ. თინეფ ფიქრენა, მუდგანერო ვემინანუანინ, ღორონთ დღას ვაპატიენს. თეცალ გრძნობეფიშ გერჯგინას მიგეხვარებნა თიშ რჩქინა, მუჭო გიმირჩქინანს იეჰოვა ართგურ ჸოროფას მუშ მსახურეფიშ მიმართ.

¹³ მუ ჯგირობუას ბღებულენთ თავრეშე: არასრულყოფილებაშ უმკუჯინუო, შემლებნა ხიოლით დო სუფთა სინდისით ვემსახურათ იეჰოვას. თენა შეიოლებერ რე, მუშენდა „იესოშ ზისხირ ირნერ ცოდვას მითხინუანა“ (1 იოან. 1:7). მუჟამსით თქვან არასრულყოფილებაშ გურშენ გურ გაფნა გოტახილ, რშუდან, ნამდა იეჰოვა მზათ რე, ქაპატუას მომნანიებელ შემცოდველს. ყურადღება ქიმიაქცით, მუჭო აკავშირენს დავით ართგურ  ჸოროფას პატიებაწკუმა: „მუჭოთ ზეცა რე დედამიწაშე ბრელით უმოს მაღალას, თეშ ბრელით უმოს დიდ რე თიშ ჸოროფა თიშ მოშიშეფშო; მუჭოთ ბჟაეიოლ რე შორს ბჟადინოლშე, თეშ დამთხინუეს თიქ ჩქინ ცოდვეფ“ (ფსალმ. 103:11, 12). არგამა რე, ნამდა იეჰოვა მზათ რე, ქაპატუას ადამიანეფს (ეს. 55:7).

14. მუჭო ეჭარ დავითიქ ღორონთიშ ართგურ ჸოროფა, ნამუთ ფთხილანა?

¹⁴ ღორონთიშ ართგურ ჸოროფა სულიერო ფთხილანა. დავითიქ იეჰოვას ლოცვას თეცალ სიტყვეფ უწუ: „სი რექ ჩქიმ დუდიშგითაფორაფალ, სი დოფთხილანქ გაჭირებაშე. ხიოლიშ მეძახინით ქუგმაშაყარუ ხალხ, მუშენდა დამირსხენქ . . . იეჰოვაშა დაიმენდებულ თიშ ართგურ ჸოროფათ რე თხილერ“ (ფსალმ. 32:7, 10). ბიბლიურ დროს ქალაქის გოჸუნდუნ თი კიდალეფ თხილანდჷ ხალხის ნტერეფშე. იეჰოვაშ ართგურ ჸოროფა მოგენს კიდალას, ნამუთ ფთხილანა ირფელშე, მუდგაქ შილებე გილალუას ღორონთწკუმა ჩქინ ურთიერთობა. თეს გეძინელ, იეჰოვას ართგურ ჸოროფა ოხვარ, ნამდა მუწკუმა დუმაახლოვან (იერ. 31:3).

15. მუჭო მოგენს იეჰოვაშ ართგურ ჸოროფა დუდიშგითაფორაფალს დო ციხესიმაგრეს?

¹⁵ დავითიქ ხოლო შხვა სიტყვეფით ეჭარ, მუჭო თხილანს ღორონთ მუშ ხალხის. თიქ ჭარჷ: „თინა გურხვეთ გიმირჩქინანს ართგურ ჸოროფას დო თინა რე ჩქიმ ციხესიმაგრე, ჩქიმ დუდიშგითაფორაფალ დო მარსხებელ, ჩქიმ ფარ, ნამდგას დუდის გითუფორუანქ“ (ფსალმ. 59:17; 144:2). მუშენ დუკავშირ დავითიქ იეჰოვაშ ართგურ ჸოროფა დუდიშ გითაფორაფალს დო ციხესიმაგრეს? სოდგა ვა ფცხოვრენდათინ, სოიშახ თიშ მსახურეფ ვორეთ, იეჰოვა დოფთხილანა ირფელშე, მუდგაქ შილებე თიწკუმა ძვირფას ურთიერთობა გილამლუან. თეცალ აზრის ვორწყეთ 91-ა ფსალმუნს ხოლო. თე ფსალმუნიშ მაჭარალქ თქუ: «მა უწინქ იეჰოვას: „სი რექ ჩქიმ დუდიშგითაფორაფალ დო ციხესიმაგრე“» (ფსალმ. 91:1—3, 9, 14). მოსექ ხოლო თეცალო ეჭარ იეჰოვა (ფსალმ. 90:1; სქოლიო). თეს გეძინელ, ღურაშ წოხოლე მოსექ ხოლო ართ გურიშემაკინალ ფრაზა გეუძინ: „ჯვეშ დროშე რე ღორონთ სქან დუდიშ გითაფორაფალ, თიშ მარადიულ კილეეფ სქან თუდო რე“ (კან. 33:27). მუს მეჩიებნა იეჰოვაშ გურშენ ფრაზა, „თიშ მარადიულ კილეეფ სქან თუდო რე“?

16. მუჭო მოხვარნა იეჰოვა? (ფსალმ. 136:23)

¹⁶ ონდო იეჰოვა რე ჩქინ დუდიშგითაფორაფალ, ირო თხილერ იპჸუაფუთ, მარა მინშა გურგოტახილეფ ვორეთ დო ძნელ რე თეცალ გრძნობეფიშ ჩათხინაფა. თეცალ დროს იეჰოვა მოხვარნა (წეკითხით ფსალმუნიშ 136:23). „თიშ კილეეფ ჩქინ თუდო რე“, ფრთხილას გენწმოდგინანა დო ქიმმეხვარებნა კუჩხიშ გერინას (ფსალმ. 28:9; 94:18). მუ ჯგირობუას ბღებულენთ თავრეშე: ჩქი შემლებნა ღორონთიშ იმენდ ირო მიღდან. თეშ რჩქინა ჟირ მუდგარენს მოხვარნა. პირველ, სოდგა ვა ფცხოვრენდათინ, მიჩქნა, ნამდა იეჰოვა ირო დოფთხილანა. მაჟია, ჩქინ მოჸოროფე ზეციერ მუმა მანგარო ზრუნენს ჩქინდე.

17. მუშა მარწმუნენა იეჰოვაშ ართგურ ჸოროფა? (ფსალმ. 33:18—22)

¹⁷ მუჭოთ გებგით, პრობლემეფიშ დროს შემლებნა დარწმუნებულ ვორდათ, ნამდა იეჰოვა ქიმმეხვარებნა, ართგურეფქ ქუდოფსქიდათ (2 კორ. 4:7—9). წინასწარმეტყველ იერემიაქ თქუ: „იეჰოვაშ ართგურ ჸოროფაშ გურშენ ვეფსპუთ, ულიებ რე თიშ ჭყოლოფა“ (გოდ. 3:22). შემლებნა დარწმუნებულ ვორდათ, ნამდა იეჰოვა ირიათო გეგმირჩქინანს ჩქინ მიმართ ართგურ  ჸოროფას, მუშენდა ბიბლია მეჩიებნა თეს: „იეჰოვა ყურადღებას ვარკენს მუშ მოშიშეფს, თინეფს, მით თიშე ართგურ ჸოროფას ელჷ“ (წეკითხით ფსალმუნიშ 33:18—22).

18, 19. ა) მუ ოკო ფშუდან? ბ) მუს გუვარჩიენთ ანწიან სტატიას?

¹⁸ მუ ოკო ფშუდან? სოიშახ იეჰოვაშ მსახურებას დიბჭყანდით, ჩქი ღორონთის თეშ ვუჸორდით, მუჭოთ მთელ კაცობრიობა უჸორს. მარა ასე, მუჭოთ ღორონთიშ თაყვანიშმცემელეფ, თიშ ართგურ ჸოროფაშე ბღებულენთ ჯგირობუას. თე ჸოროფაშე გამომდინარე, იეჰოვას ჩქინდა გოფორაფილ აფჷ მუშ კილეეფ დო ფთხილანა. იეჰოვა ირიათო დუმაახლოვენა მუწკუმა დო შეასრულენს ირფელს, მუდგა მუშ მსახურეფს დეპირ. იეჰოვას ოკო, ნამდა მარადიულო თიშ მეგობრეფ ვორდათ! (ფსალმ. 46:1, 2, 7). თაშ ნამდა, მუდგა სირთულეს ვეშეფხვადათინ, იეჰოვა ქომჩანა ძალას, ართგურეფქ ქუდოფსქიდათ.

¹⁹ ჩქი ქობძირით, მუჭო გიმირჩქინანს იეჰოვა ართგურ ჸოროფას მუშ მსახურეფიშ მიმართ. თინა ელჷ, ნამდა ჩქი ხოლო გეგმიფრჩქინანთ ართგურ ჸოროფას ართიან შქას. მუჭო შემლებნა თეშ კეთება? თე მნიშვნელოვან საკითხის ანწიან სტატიას გუვარჩიენთ.