1. Mampirisiky atsika han̈ino ma Jehovah?

TEN̈A raha maventy amy Jehovah fitiavan̈a tsy miovaova io. * (Hosea 6:6) Tiany ho karaha zen̈y koa fahitantsika izio. Nan̈iraka paminan̈y Mika izy hampirisiky atsika ho ‘tia fitiavan̈a tsy miovaova’ io. (Mika 6:8) Kanefa, alohany atsika hahavita zen̈y, mila haintsika antsendriky ino ma fitiavan̈a tsy miovaova zen̈y.

2. Karakory ma olo manan̈a fitiavan̈a tsy miovaova zen̈y?

² Olo araiky koa manan̈a fitiavan̈a tsy miovaova io, izy tsy vitany tia olo araiky amy fô, fa von̈ono koa izy tsy hivadiky aminolo io ndreky tsy hiala izy foeky. Jehovah ten̈a modely tsara amy fan̈aboahan̈a fitiavan̈a tsy miovaova io. Hidinihintsika ato akory han̈aboahany Jehovah izio aminolombelon̈o. Ho hitantsika amy man̈araka ndraiky fa, mangala tahaka Jehovah atsika izikoa mifen̈y man̈aboaka toetry io amintsika samby atsika.

3. Ino raha nivolan̈iny Jehovah tamy Mosesy?

³ Tsy ela, tafarandro Israelita aby io niala ta Ezipty, nikoran̈iny Jehovah tamy Mosesy azovy An̈aran̈anany avio ino aby toetrinany. Ho izy: “Jehovah, Jehovah, Zan̈ahary mamindra fô ndreky tsara fan̈ahy, tsy mora meloko, be fitiavan̈a tsy miovaova sady ten̈a tia fahamarin̈ana, man̈aboaka fitiavan̈a tsy miovaova amy taranaka andrivony mifandimby, mamela heloko sady man̈ambela hadisovan̈a ndreky fahotan̈a.” (Eks. 34:6, 7) Hitantsika iô fa ten̈a miavaka fomba nan̈ambarany Jehovah tamy Mosesy momba Fitiavan̈anany tsy miovaova io. Ino ma izio?

4-5. a) Ino raha nivolan̈iny Jehovah momba ain̈inany? b) Ino aby fan̈ontanian̈a mila dinihintsika?

 ⁴ Jehovah foeky nivolan̈a fa izy tsy raha manan̈a fitiavan̈a tsy miovaova fo fa, farandraha be eky izio aminany. Mimpody matetiky amy Baiboly ao volan̈a io. (Nom. 14:18; Neh. 9:17; Sal. 86:15; 103:8; Joela 2:13; Jona 4:2) Isaka volan̈a io mimpody ao, manôndro Jehovah fo izio fa tsy olombelon̈o. Ke matoa toetry io voaton̈ono matetiky amy Baiboly ao, dikanizen̈y ten̈a raha maventy aminany izio. Zen̈y nahavy Davida nivolan̈a karaha ty: ‘Jehovah, mahatakatra lan̈itry fitiavan̈anao tsy miovaova ... Valera marin̈y fitiavan̈anao tsy miovaova, Zan̈ahary e! Ke mitady alokaloko ambany elatranao zanakolombelon̈o.’ (Sal. 36:5, 7) Karaha Davida, asa anao mba mankasitraka fitiavan̈any Jehovah tsy miovaova io?

⁵ Baka mazavazava amintsika dikany fitiavan̈a tsy miovaova io, alô atsika handiniky fan̈ontanian̈a aroe aby ty: Azovy an̈aboahany Jehovah fitiavan̈a tsy miovaova? Avio ino hatsaran̈a ho azonolo an̈aboahany toetry io?

6. Azovy ma an̈aboahany Jehovah fitiavan̈a tsy miovaova?

⁶ Koran̈iny Baiboly fa maro raha mety ho tiantsika, karaha ataony: ‘Mambôly’, ‘divain ndreky menaka’, ‘fan̈anaran̈a’, ‘fahaizan̈a’ avio ‘fahendrena.’ (2 Tan. 26:10; Ohab. 12:1; 21:17; 29:3) Fitiavan̈a tsy miovaova ndraiky tsy mety haboaka amy raha, fa aminolo fo. Ndray zen̈y, tsy kila olo han̈aboahany Jehovah izio, fa olo tsara fihavanan̈a aminany fo! Zan̈aharintsika io tsy mivadiky aminolo ataony naman̈a. Tsisy andra tsy itiavany iro, avio maro tsara ankitin̈y raha noman̈iny Jehovah nindro aminy hoavy.

7. Akory nan̈aboahany Jehovah fa izy tia olombelon̈o?

⁷ Samby an̈aboahany Jehovah fitiavan̈a aby olo jiaby. Karaha ty ho Jesosy tamy Nikodemosy: ‘Be ankitin̈y fitiavany Zan̈ahary donia ty [na olombelon̈o], ke namiany Zanany lahitokana baka tsy hofoaty lan̈iany olo mino izy fa hahazo fiain̈ana tsisy farany.’—Jaona 3:1, 16; Mat. 5:44, 45.

8-9. a) Ino mahavy Jehovah man̈aboaka fitiavan̈a tsy miovaova amy panomponany? b) Ino raha hidinihintsika iziô?

⁸ Eraka raha nikoran̈intsika tio in̈y, olo tsara fihavanan̈a aminany fo han̈aboahany Jehovah fitiavan̈a tsy miovaova io fa tsy olo jiaby. Ahitan̈a zen̈y iziô raha nivolan̈iny Panjaka Davida ndreky paminan̈y Daniela. Karaha ty ho Davida: ‘An̈aboaha fitiavan̈a tsy miovaova fo lan̈iany olo mahay anao.’ ‘Maharitry mandrakizay fitiavan̈any Jehovah tsy miovaova,  ke izio haboakany aminolo mavozo izy.’ Karaha ty koa ho Daniela: ‘A Jehovah Zan̈ahary marin̈y e, anao man̈aboaka fitiavan̈a tsy miovaova aminolo mankatia anao ndreky mitandrin̈y didinao.’ (Sal. 36:10; 103:17; Dan. 9:4) Koa andininy aby io zahavan̈a, man̈aboaka fitiavan̈a tsy miovaova amy panomponany Jehovah, fotony iro tia izy, mavozo izy, ndreky mitandrin̈y didinany. Olo manompo izy amy fomba ankasitrahiny fo han̈aboahany izio.

⁹ Talohany atsika nanompo Jehovah, atsika efa nan̈aboahany Jehovah fitiavan̈a edy, karaha olo jiaby. (Sal. 104:14) Fa atsika koa fa nanjary panomponany, atsika an̈aboahany fitiavan̈a tsy miovaova. Sady Jehovah lastio efa nan̈amia toky panomponany fa ‘tsy hadosony amindro foeky fitiavan̈anany tsy miovaova.’ (Isaia 54:10) Tsapany Panjaka Davida raha zen̈y, ke ho izy: ‘Miavaka fomba hitondrasany Jehovah olonany tsy mivadiky.’ (Sal. 4:3) Mandrisiky atsika han̈ino fahaizantsika raha jiaby zen̈y? Karaha ty nambarany panoratra salamo: ‘Lan̈iany olo misy jery handiniky raha jiaby zen̈y, sady hampifantoko sain̈inany amy fitiavan̈any Jehovah tsy miovaova.’ (Sal. 107:43) Baka amy Jehovah torohevitry tsara io. Ke atsika iziô hizaha fomba telo an̈aboahany Jehovah fitiavan̈a tsy miovaova io ndreky hatsaran̈a azontsika baka amizio.

10. Nan̈ino mahatsara atsika mahay fa maharitry mandrakizay fitiavan̈a tsy miovaovany Jehovah? (Salamo 31:7)

¹⁰ Maharitry mandrakizay fitiavan̈a tsy miovaovany Jehovah. Mimpody in-26 volan̈a io amy Salamo 136 ao. Karaha ty koran̈iny andininy 1: ‘Ataova mersy Jehovah, fotony tsara izy; tsy miovaova fitiavan̈anany sady maharitry mandrakizay.’ (Sal. 136:1) Rango aminy andininy 1 firaka amy faha-26, mimpodimpody ao fivolan̈ana fa ‘tsy miovaova fitiavan̈anany sady maharitry mandrakizay.’ Atsika koa fa mamaky salamo io, an̈isany raha mahalany fan̈ahy atsika mahita fa Jehovah tsy vôly man̈aboaka fitiavan̈a tsy miovaova io, ary amy fomba isankarazany. Man̈amia toky atsika zen̈y fa tsy miovaova foeky fitiavany Jehovah panomponany. Man̈aboaka fitiavan̈a  amindro fo izy sady tsy miala iro, intsaka eky iro koa fa mandalo raha sarotro. Nan̈ino raha zen̈y mahatsara atsika? Fahaizantsika fa Jehovah ten̈a tia atsika, mahavy atsika ho ravoravo ndreky hahazo angovo fo hanohizan̈a fanompoan̈a, ndray atsika miaritry ny mafy.​—Vakia Salamo 31:7.

11. Koa Salamo 86:5 zahan̈a, ino mahavy Jehovah man̈ambela hadisovan̈a?

¹¹ Baka amy fitiavan̈a tsy miovaova mahavy Zan̈ahary man̈ambela hadisovan̈a. Baka amizio mahavy Jehovah han̈ambela hadisovan̈anolo ten̈a mibebaka ndreky vôly man̈ano raha tsy manjary. Karaha ty ho Davida panoratra salamo, momba Jehovah: “Izy tsy mamaly atsika eraka fahotan̈a vitantsika, na mamaly hadisovan̈antsika erakany tokony fanaoko atsika.” (Sal. 103:8-11) Hainy Davida tsarabe fa mijaly olo hinjehiny eritreritry zen̈y. Kanefa, hainy koa fa Jehovah ten̈a ‘von̈ono han̈ambela hadisovan̈a.’ Ino mahavy Jehovah man̈ambela hadisovan̈a? Koran̈iny Salamo 86:5 ao valiny. (Vakia.) Davida koa fa nivavaka, izy nivolan̈a fa be ankitiny fitiavan̈a tsy miovaovany Jehovah, ke zen̈y mahavy izy man̈ambela hadisovan̈anolo mangataka familankeloko aminany.

12-13. Izikoa anao man̈ameloten̈a baka taminy hadisovan̈anao taloha, ino raha mety han̈ampy anao?

¹² Atsika koa fa manota, rariny atsika izikoa manen̈iny, ary raha zen̈y mahasalama atsika. Baka amy nen̈iny io mahavy atsika hibebaka ke hiova. Misy panompony Jehovah sasany ndraiky tsy vôly man̈ameloten̈a nohony fahotan̈a vitandro. Iro mieritreritry fa tsy hambelany Jehovah foeky hadisovan̈andro, ndray iro efa nibebaka. Izikoa zen̈y raha tsapanao, tsaraova fa Jehovah von̈ono han̈aboaka fitiavan̈a tsy miovaova aminao.

¹³ Nan̈ino raha zen̈y mahatsara atsika? Fotony ndray atsika tsy lavorary, vitantsika fo manompo Jehovah amy feony fieritreretan̈a madio. Nan̈ino? Fotony ‘lio nalatsakany Jesosy in̈y man̈adio atsika ho afaka amy fahotan̈a jiaby.’ (1 Jaona 1:7) Ke izikoa anao kivy baka taminy hadisovan̈anao sasany, aleva onon̈o fa Jehovah von̈ono han̈ambela hadisovan̈anao izikoa anao mibebaka ankitin̈y. Koran̈iny Davida fa mifandray familankeloko ndreky fitiavan̈a tsy miovaova. Karaha ty ho izy: ‘Karaha  halavirany lan̈itry ndreky tany, habezan̈any fitiavan̈a tsy miovaova aboakany Jehovah aminolo mavozo izy. Miran̈a halavirany antin̈iana ndreky andrefa, an̈adosoany fahotan̈antsika lavitry atsika.’ (Sal. 103:11, 12) Hita baka amy zen̈y fa Jehovah ten̈a von̈ono ‘hamafa hadisovan̈a ankitin̈y.’​—Isaia 55:7.

14. Akory nataony Davida nan̈azava fa miaro atsika fitiavan̈a tsy miovaovany Jehovah io?

¹⁴ Fitiavan̈a tsy miovaovany Jehovah io miaro atsika amy lafiny arapan̈ahy. Davida nivavaka karaha ty: ‘Anao ataoko tany fisitrihan̈a; anao hiaro zaho izikoa fa an̈atiny sarotro. Haravoan̈a fo hataonao man̈odidin̈y zaho, fotony anao man̈avotro zaho. ... Laniany olo matoky Jehovah kodidin̈any fitiavan̈a tsy miovaova.’ (Sal. 32:7, 10) Taminandrany Baiboly, nisy riba vato habobe nan̈odidin̈y tanàna. Izio niaro olo nipetraka tao izikoa fa nisy fahavalo nanafiky. Fitiavan̈a tsy miovaovany Jehovah io miran̈a riba vato habobe, miaro atsika amy raha jiaby mety handrobaka fihavanan̈antsika aminany. Efa fitiavan̈a tsy miovaova io edy mahavy Jehovah man̈ano raha han̈aton̈antsika izy.​—Jer. 31:3.

15. Nan̈ino ma fitiavan̈a tsy miovaovany Jehovah io ampitovisin̈y amy tany fialofan̈a ndreky tran̈o fatatra mare?

¹⁵ Nampiasa sarinteny hafa i Davida nan̈avazan̈a fomba hiarovany Jehovah panomponany. Ho izy: ‘Zan̈ahary ataoko tany fialofako; izy man̈aboaka fitiavan̈a tsy miovaova aminaka.’ Karaha ty koa ho izy momba Jehovah: ‘Man̈aboaka fitiavan̈a tsy miovaova aminaka izy sady miaro zaho miran̈a tran̈o fatatra mare. Izy fialofan̈a azo antoko ndreky pan̈avotro zaho; ampinganaka izy sady fialofako lera zaho mila vonjy.’ (Sal. 59:17; 144:2) Nan̈ino ma fitiavan̈a tsy miovaovany Jehovah io nampitovisiny Davida amy tany fialofan̈a ndreky tran̈o fatatra mare? Na aia na aia tany misy atsika, izikoa atsika mbala manompo Jehovah fo, amezany atsika raha jiaby ilaintsika hiarovan̈a fihavanan̈antsika aminany. Mikoran̈a raha mitovitovy amy zen̈y koa Salamo 91. Karaha ty voasoratra ao: ‘Ho zaho amy Jehovah: “Anao fialofako sady miaro zaho miran̈a tran̈o fatatra mare.” ’ (Sal. 91:1-3, 9, 14; 90:1) Mosesy koa mba nampiasa sarinteny an̈aboahan̈a fa Jehovah miaro atsika. (Sal. 90:1) Taloha helinizy hofoaty, ty raha mankahery nisoratiny: “Zan̈ahary io fialofan̈a rango taminy andra taloha tan̈y. Iro baontan̈ananany aby maharitry mandrakizay io manohan̈a anao.” (Deot. 33:27) Nan̈ino ma Mosesy nivolan̈a fa ‘baotan̈anany Jehovah maharitry mandrakizay manohan̈a atsika’?

16. Akory an̈ampiany Jehovah atsika? (Salamo 136:23)

¹⁶ Mahatsiaro voaro atsika izikoa fa matoky fa Jehovah io fialofan̈antsika. Fa ndray zen̈y, mety hisy fotoan̈a atsika kivy mare. Mamango atsika man̈amboatra jery fa tsy mety avoamboatra. Akory ataony Jehovah man̈ampy atsika? (Vakia Salamo 136:23.) Sambôriny amy tan̈ananany atsika, baka io izy ampiangana atsika moramora, baka atsika tsy halahelo eky. (Sal. 28:9; 94:18) Nan̈ino raha zen̈y mahatsara atsika? Manjary matoky atsika fa Jehovah iô fo hanohan̈a atsika. Misy fomba aroe an̈anaovany zen̈y: Voanalohany, hiaro atsika fo izy ndray aia ndray aia tany misy atsika. Faharoe, mikarakara atsika fo Babantsika be fitiavan̈a andan̈itry an̈y io.

17. Ino ma raha atokisantsika? (Salamo 33:18-22)

¹⁷ Efa hitantsika tio fa, na ino na ino raha sarotro diavintsika, mety matoky atsika fa Jehovah han̈ampy atsika fo baka atsika hahavita tsy hivadiky aminany. (2 Kor. 4:7-9) Karaha  ty nambarany paminan̈y Jeremia: ‘Baka amy fitiavan̈a tsy miovaovany Jehovah io mahavy atsika tsy lany ripaka, fotony tsisy farany famindrampônany.’ (Fitom. 3:22) Matoky atsika fa han̈aboaka fitiavan̈a tsy miovaova amintsika fo Jehovah, fotony Baiboly efa nivolan̈a fa ‘masony Jehovah mandiniky olo mavozo izy, tsy azovy zen̈y fa zay olo man̈anten̈a fitiavan̈a tsy miovaovanany io.’​—Vakia Salamo 33:18-22.

18-19. a) Ino raha mila alaintsika onon̈o fo? b) Ino raha hidinihintsika amy man̈araka?

¹⁸ Ty raha mila alaintsika onon̈o fo: Talohany atsika nifidy hanompo Jehovah, atsika efa nan̈aboahany Zan̈ahary fitiavan̈a, miran̈a olo jiaby. Fa atsika koa fa nanjary panomponany, atsika nan̈aboahany fitiavan̈a tsy miovaova, ke maro hatsaran̈a azontsika. Baka amy fitiavan̈a tsy miovaova io mahavy Jehovah mampiasa baontan̈ananany mahery hiarovan̈a atsika. Tsy maintsy ataony raha hahavy atsika harikitry izy fo, avio tsy maintsy hitantirahiny koa iro raha maro tsara efa nampan̈antin̈ainy atsika. Tiany ho kamaradiny fo atsika mandrakizay! (Sal. 46:1, 2, 7) Ke na ino na ino problemo mandalo amintsika, hamezany Jehovah atsika angovo ilaintsika baka atsika hahavita tsy hivadiky aminany.

¹⁹ Hitantsika tiô akory an̈aboahany Jehovah fitiavan̈a tsy miovaova amy panomponany. Tiany Jehovah han̈aboaka fitiavan̈a tsy miovaova aminolo hafa koa atsika. Ke hidinihintsika amy lahatsoratra man̈araka, akory mety han̈anaovantsika zen̈y.