1. ¿Xi cayabi Jehová laanu gúninu?

RIUULAʼDXIʼ JEHOVÁ gusihuinni guendarannaxhii stiʼ (Os. 6:6). Ne laaca racaláʼdxibe gusihuinni ca xpínnibe nadxiicaʼ. Biquiiñeʼ Dios stinu profeta Miqueas para gabi laanu naquiiñeʼ gannaxhiinu (Miq. 6:8, nota). Para gánnanu ximodo gusihuínninu ni, naquiiñeʼ gunibiáʼ chaahuinu cualidad riʼ.

2. ¿Xi riníʼ diidxaʼ amor leal?

² Diidxaʼ «amor leal» zeedani biaʼ 230 biaje lu La Biblia. Traducción del Nuevo Mundo. ¿Xi riníʼ ni yaʼ? Lu glosario stiʼ Biblia ca ná: «Laani nga guendarannaxhii ni rucaa tuuxa gacané stobi, ne laaca laani nga guiale de laanu guidxaaganu sti binni ne cadi guixélenu de laa dede ora maʼ bíninu xiixa para gacanenu laa. Stale biaje ora riete diidxaʼ riʼ caniʼni de guendarannaxhii ni napa Dios ca xpinni, peru laaca caniʼni de guendarannaxhii ni rusihuinni tuuxa sti binni». Ne Jehová nga ni jma rusihuinni guendarannaxhii riʼ. Lu artículo riʼ zadúʼyanu ximodo rusihuinni Jehová qué rusaana de gannaxhii binni, ne lu sti artículo ca zadúʼyanu ximodo zanda chinándanu ejemplu stiʼ Jehová ra qué gusaana de gannaxhiinu xcaadxi binni.

3. ¿Xi gudxi Jehová Moisés?

³ Cadi xadxí de biree ca israelita que de Egipto, guniʼné Jehová Moisés ne gudxi laabe de lá ne de ca cualidad stiʼ.  Gudxi Jehová Moisés: «Jehová, Jehová, ti Dios ni napa misericordia ne riá, rindaa para guidxiichi ne qué rusaana de gannaxhii ne fiel laa, qué rusaana de gannaxhiibe stale mil binni, runi perdonarbe ca ni ruchee ne ca ni qué ruzuubaʼ diidxaʼ» (Éx. 34:6, 7). Né ca diidxaʼ riʼ bisihuinni Jehová ti cosa nabé risaca pur modo rannaxhii. Guidúʼyanu xii ni.

4, 5. a) ¿Xi guníʼ Jehová de laa? b) ¿Xi pregunta chiguicábinu?

⁴ Racá ridúʼyanu caníʼ Jehová naca tuuxa ni «qué rusaana de gannaxhii». Ne zeeda ca diidxaʼ riʼ gadxe biaje lu Biblia (Núm. 14:18; Neh. 9:17; 13:22; Sal. 86:15; 103:8; Joel 2:13; Jon. 4:2). Lu ca textu riʼ, caniʼni de Jehová ne cadi de binni. Nabé risaca para laanu gánnanu stale biaje bizeeteʼ Jehová lu Biblia ximodo guendarannaxhii stiʼ, nanna dxíchinu guizáʼ risaca cualidad riʼ para Jehová. * Nga runi guníʼ rey David sicaríʼ: «Jehová, qué rusaana de gannaxhiiluʼ ne rindá ni ra nuu ca za ca. Dios, ¡qué rusaana de gannaxhiiluʼ ne guizáʼ risácani! Xhaʼnaʼ bandaʼ stiʼ ca xhiaaluʼ ruyubi ca xiiñiʼ hombre guilá» (Sal. 36:5, 7). ¿Laanu yaʼ? ¿Rusisácanu guendarannaxhii ni napa Dios cásica biʼniʼ David ni la?

⁵ Para guiénenu ximodo nga qué rusaana Dios de gannaxhii, guicábinu chupa pregunta: ¿tuu nga ca ni qué rusaana Jehová de gannaxhii? ne ¿ximodo racané guendarannaxhii stiʼ Jehová laanu?

6. ¿Tuu nga ca ni qué rusaana Jehová de gannaxhii?

⁶ ¿Tuu nga ca ni qué rusaana Jehová de gannaxhii? Biblia ná zanda gannaxhiinu ley stiʼ Dios, disciplina stiʼ, gannaxhiinu guendanabani ne cadi gannaxhiinu guidxilayú (Sal. 119:97; Prov. 12:1; 1 Pe 3:10; 1 Juan 2:15). Peru guendarannaxhii stiʼ Jehová riʼ binni si ruluiʼbe ni. ¿Ñee riníʼ nga qué rusaana Jehová de gannaxhii guiráʼ binni la? Coʼ, ca xhamigu si Jehová nga qué rusaana de gannaxhii. Qué rusaana Dios stinu ca xhamigu. Nápabe ti cosa galán para laacaʼ ne qué ziuu dxi gusaana de gannaxhiibe laacaʼ.

7. ¿Ximodo rusihuinni Jehová nadxii guiráʼ binni?

⁷ Rusihuinni Jehová nadxii guiráʼ binni. Sicaríʼ gudxi Jesús ti hombre láʼ Nicodemo: «Nabé gunnaxhii Dios guidxilayú [guiráʼ binni], nga runi bidii tobi  lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:1, 16; Mat. 5:44, 45).

8, 9. a) ¿Xiñee qué rusaana Jehová de gannaxhii ca xpinni? b) ¿Xi chiguidúʼyanu?

⁸ Casi maca bizéʼtenu que, qué rusaana Jehová de gannaxhii ca xhamigu o ca xpinni. Rihuinni zacá ni pur ca diidxaʼ ni guníʼ rey David ne profeta Daniel. David bicaa: «Cadi gusaana de gannaxhiiluʼ ca ni runibiaʼ lii» ne «qué ziuu dxi gusaana Jehová de gannaxhii ca ni ridxibi laa». Ne Daniel guníʼ: «Jehová, Dios ni dxandíʼ, Dios ni nandxóʼ, [...] ne qué rusaana de gannaxhii ca ni nadxii laa ne rinanda ca mandamientu stibe» (Sal. 36:10; 103:17; Dan. 9:4). Casi maʼ bidúʼyanu ca, qué rusaana Jehová de gannaxhii ca xpinni ni runibiáʼ laa, ni ridxibi laa, ni nadxii laa ne ni rinanda ca mandamientu stiʼ. Ruluiʼbe cualidad riʼ xquídxibe, ca ni runi adorarcaʼ laabe modo racaláʼdxibe.

⁹ Dede ante gúninu ni ná Jehová, maca bisihuínnibe nadxiibe laanu cásica nadxiibe guiráʼ binni (Sal. 104:14). Peru ra bizulú biʼniʼ adorarnu laabe, jmaruʼ si gunnaxhiibe laanu. Ne Jehová cayabi xquidxi qué ziuu dxi gusaana de gannaxhiibe laa (Is. 54:10). Ne David peʼ biiyaʼ dxandíʼ ni ná ca diidxaʼ riʼ: «Maʼ gadxé modo zuni tratar Jehová ca ni qué rusaana laa» (Sal. 4:3). Yanna, ¿xi naquiiñeʼ gúninu ra maʼ nánnanu maʼ gadxé modo runi tratar Jehová xquidxi yaʼ? Sicaríʼ guníʼ ti hombre ni bicaa salmo: «Ti binni nuu xpiaaniʼ qué ziaandaʼ laa ca cosa riʼ, ne zaníʼ ique ca cosa ni runi Jehová purtiʼ qué rusaana de gannaxhii» (Sal. 107:43). Pur ni ná textu riʼ, guidúʼyanu chonna modo racané guendarannaxhii stiʼ Jehová laanu.

10. Ra gánnanu qué ziuu dxi gusaana Dios de gannaxhii laanu, ¿ximodo racané ni laanu? (Salmo 31:7).

¹⁰ Qué ziuu dxi guirá guendarannaxhii ni napa Dios laanu. Lu Salmo 136, riete de guendarannaxhii riʼ 26 biaje. Primé  versículo stini ná: «Lagudii xquixe peʼ Jehová purtiʼ nachaʼhuiʼ; purtiʼ qué ziuu dxi gusaana de gannaxhii» (Sal. 136:1). Ne lu ca versículo 2 hasta 26 riete ca diidxaʼ riʼ stale biaje: «Purtiʼ qué ziuu dxi gusaana de gannaxhii». Ora ridúʼndanu salmo riʼ, ridúʼyanu gadxé gadxé modo rusihuinni Jehová guendarannaxhii ne qué rusaana de gusihuínnini. Ca diidxaʼ «purtiʼ qué ziuu dxi gusaana de gannaxhii» cayabi ni laanu qué ziuu dxi gusaana Dios de gannaxhii xquidxi. ¡Guizáʼ ratadxí ladxidoʼno gánnanu qué rusaana Jehová ca xpinni! Sínuque riuube gaxha de ca binni ni runi ni nabe, jmaruʼ si ora cadíʼdicaʼ ra nagana. ¿Ximodo racané ndiʼ laanu? Ra gánnanu qué rixeleʼ Jehová de laanu rusiecheʼ ni laanu ne rudiini stipa ni caquiiñenu para gudxíʼlunu ca guendanagana stinu. Laaca racaneni laanu ti cadi guireʼnu de lu neza ni ziné lu guendanabani (biindaʼ Salmo 31:7).

11. Casi riete lu Salmo 86:5, ¿xi rucaa Jehová guni perdonar?

¹¹ Runi perdonar Dios laanu purtiʼ qué rusaana de gannaxhii. Ora ruuyaʼ Jehová maʼ guca arrepentir ti binni de ca pecadu stiʼ ne cayuni stipa pur guchaa, runi perdonarbe laa pur guendarannaxhii stibe. Sicaríʼ guníʼ David de Jehová lu ti salmo: «Qué huayuni castigarbe laanu biaʼ ca pecadu stinu ne nin qué huadiibe laanu ni runi merecernu pur guiráʼ ni maʼ bicheʼnu» (Sal. 103:8-11). Pur ni bizaaca David, nanna xi runi sentir ti binni ora ruchiiñaʼ conciencia stiʼ laa. Peru laaca gúnnabe nuu Jehová listu para guni perdonar. Lu ti oración, bizeeteʼ David xi rucaa Jehová guni perdonar (biindaʼ Salmo 86:5). Runi perdonar Jehová purtiʼ guizáʼ nadxii guiráʼ ca ni rucaa ridxi laa.

12, 13. ¿Xi zacané laanu pa cayuni sentirnu náparunu donda pur ca cosa ni cadi jneza bíninu dxiqué?

¹² Pa guni cometernu ti pecadu, jneza nga guiuubaʼ ladxidoʼno purtiʼ zanda gucaani laanu gaca arrepentirnu ne guchaʼnu. Peru nuu caadxi xpinni Dios ni riníʼ ique náparucaʼ donda pur ca cosa ni cadi jneza ni bíʼnicaʼ dxiqué. Riníʼ  íquecabe qué ziuu dxi guni perdonar Jehová laacabe neca maʼ guca arrepentírcabe ne maʼ bisaanacabe ca cosa ni cadi jneza ni bíʼnicabe dxiqué. Pa zacá cayuni sentirluʼ, ni zacané lii nga guiníʼ íqueluʼ racalaʼdxiʼ Jehová gusihuinni nadxii lii.

¹³ ¿Ximodo racané ndiʼ laanu? Neca nácanu binni ruchee, zanda gúninu ni ná Jehová né guendanayecheʼ ne gápanu ti conciencia nayá. ¿Xiñee yaʼ? Purtiʼ «rusiá rini stiʼ Jesús, Xiiñibe, guiráʼ pecadu stinu» (1 Juan 1:7). Pa careʼnu gana pur xiixa defectu ni nápanu, cadi guiaandaʼ laanu racalaʼdxiʼ Jehová guni perdonar ca binni ni gaca arrepentir de ca pecadu stiʼ. Guidúʼyanu ximodo biiyaʼ David guendarannaxhii stiʼ Jehová ne modo runi perdonar. Laabe bicaabe: «Purtiʼ cásica jma nasoo guibáʼ que guidxilayú la? zacaca jma nacháʼhuibe né ca ni ridxibi laabe. Biaʼca zitu nuu de ra rindani gubidxa ne dede ra riaaziʼ ni, biáʼcaca nga zitu riguíxhebe ca xtóndanu de laanu» (Sal. 103:11, 12). Rihuinni dxíchica, racalaʼdxiʼ Jehová guni perdonar laanu (Is. 55:7).

14. ¿Ximodo bisiene David rapa guendarannaxhii stiʼ Dios laanu?

¹⁴ Rapa guendarannaxhii stiʼ Dios laanu para cadi guixélenu de laa. Sicaríʼ gudxi David Jehová lu ti oración: «Ra nuuluʼ zanda gucacheluáʼ; zápaluʼ naa de ni naguu xizaa naa. Zaguuluʼ naa leʼ ne zucaaluʼ ridxi purtiʼ cayuʼnuʼ naa libre». Ne laaca guniʼbe: «Ni napa confianza Jehová qué rusaana de gannaxhiibe laa» (Sal. 32:7, 10). Tiempu bibani ca binni ni riete lu Biblia, rapa ca muru stiʼ ti guidxi ca binni que de ca enemigu sticaʼ. Zaqueca nga laanu, guendarannaxhii stiʼ Jehová rapa ni laanu de ca cosa ni zanda gusirá fe stinu. Ne pur guendarannaxhii stiʼ Jehová, ruchiña laanu ra nuu (Jer. 31:3).

15. ¿Xiñee zeeda gaca guendarannaxhii stiʼ Jehová ti lugar ra zanda guilanu ne ti lugar nadipaʼ?

¹⁵ Biquiiñeʼ David sti cosa para gusiene ximodo rapa Dios xquidxi. Sicaríʼ bicaabe: «Ra nuu Dios dxandíʼ zanda guilaʼyaʼ, Dios ni qué rusaana de gannaxhii naa». Ne laaca guniʼbe: «Laabe nga ni qué rusaana de gannaxhii naa ne ti lugar nadipaʼ para naa, ra zanda guilaʼyaʼ ne ni rulá naa, escudu stinneʼ ne ra nuusibe zanda chaa» (Sal. 59:17; 144:2). ¿Xiñee guníʼ David naca guendarannaxhii stiʼ Jehová casi ti lugar ra zanda guilá ne ti lugar nadipaʼ para laa? Purtiʼ ratiica si nabézanu, pa nácanu xpinni Jehová, zápabe laanu ne qué zudiibe lugar chuʼ xiixa ni guxheleʼ laanu de laabe. Ngaca nga ni cayabi Salmo 91 laanu. Sicaríʼ guníʼ hombre ni bicaa salmo riʼ: «Naa zabeʼ Jehová: “Lii nga ti lugar ra zanda guilaʼyaʼ, ti lugar nadipaʼ para naa”» (Sal. 91:1-3, 9, 14). Laaca zacá ga guníʼ Moisés (Sal. 90:1, nota). Ante gátibe, guniʼbe caadxi diidxaʼ nabé galán. Sicaríʼ bicaabe: «Maʼ xadxí nga naca Dios ti lugar ra zanda guilá binni, né ca nabe ni qué ziuu dxi guinitilú nuabe lii» (Deut. 33:27). Ca diidxaʼ «né ca nabe ni qué ziuu dxi guinitilú nuabe lii», ¿xi rusiidiʼ ni laanu de Jehová?

16. ¿Xi chupa ndaayaʼ ricaanu? (Salmo 136:23).

¹⁶ Ora ruyúbinu guilanu ra nuu Jehová, ratadxí ladxidoʼno purtiʼ nánnanu zápabe laanu. Neca zacá, zándaca ziuu biaje zuni sentirnu triste ne zareʼnu gana. ¿Xi zuni Jehová pur laanu ora guizaacanu nga yaʼ? (Biindaʼ Salmo 136:23). Né stale cariñu zandísabe laanu né ca nabe (Sal. 28:9; 94:18). ¿Ximodo racané ndiʼ laanu? Ra gánnanu qué zusaana Dios laanu zacané  ni laanu guietenaláʼdxinu chupa ndaayaʼ ni maʼ ricaanu. Primé, ra tiica si nabézanu nánnanu ra nuu si Jehová zanda guilanu. Ne guiropa, guizáʼ rizaalaʼdxiʼ Bixhózenu ni nuu guibáʼ laanu.

17. ¿Xi zanda guni crenu? (Salmo 33:18-22).

¹⁷ Casi maʼ bizíʼdinu, ora tídinu lu guendanagana, nanna dxíchinu zacané Jehová laanu para cadi guixélenu de laa (2 Cor. 4:7-9). Sicaríʼ bicaa profeta Jeremías: «Pur qué rusaana Jehová de gannaxhii qué huanitilunu, purtiʼ qué ziuu dxi gusaana de gusihuínnibe riabe» (Lam. 3:22). Zanda guni crenu, qué ziuu dxi gusaana Jehová de gusihuinni nadxii laanu, purtiʼ sicaríʼ guníʼ ti hombre ni bicaa ti salmo, «cayuuyaʼ Jehová ca ni ridxibi laa, ca ni cabeza cadi gusaana de gannaxhiibe laacaʼ» (biindaʼ Salmo 33:18-22).

18, 19. a) ¿Xi cadi naquiiñeʼ guiaandaʼ laanu? b) ¿Xi zazíʼdinu lu sti artículo ca?

¹⁸ ¿Xi cadi naquiiñeʼ guiaandaʼ laanu? Dede ante gúninu ni ná Jehová, maca rusihuínnibe nadxiibe laanu, cásica nadxiibe guiráʼ binni. Peru ora bizulú biʼniʼ adorarnu laabe, bidúʼyanu jmaruʼ si gunnaxhiibe laanu. Ne guendarannaxhii ca rucaani laabe gápabe laanu. Qué zudiibe lugar chuʼ xiixa ni guxheleʼ laanu de laabe ne zuni cumplirbe ni maʼ guníʼ stiidxabe gudiibe laanu. Racaláʼdxibe guibáninu galán (Sal. 46:1, 2, 7). Nga runi, intiica si guendanagana cadxaagalunu, zudii Jehová laanu stipa ni caquiiñenu para cadi gusaananu laa.

¹⁹ Maʼ bizíʼdinu ximodo rusihuinni Jehová qué rusaana de gannaxhii ca xpinni. Ne laaca ribézabe gusihuínninu nadxiisaanu. Lu sti artículo ca zazíʼdinu ximodo zanda gúninu ni.