1. Aha do na didok si Petrus tu halak Kristen di abad na parjolo, jala marlakku dope hatana i tu hita saonari?

DIDOK si Petrus do, “Alai songon Debata Nabadia na manjou hamu, badia ma hamu di sude parniulaonmuna. Songon na nidok ni na tarsurat i, ‘Ikkon badia do hamu, ai badia do Au.’” (1 Ptr. 1:15, 16) Tu akka halak na harapanna mangolu di surgo do didok si Petrus hatana i. Alai marlakku do tong i tu hita, nang pe harapanta mangolu salelengna di tano on. Ikkon tatiru do Jahowa Debata na badia i, ikkon badia do hita di sude parniulaotta. Pos ma rohatta sanggup do hita mangulahon i. Sipata olo do ra tahilala dang mungkin boi hita badia ala dang sempurna hita. Alai taingot ma si Petrus, hea do piga-piga hali ibana mangulahon kesalahan, nang pe songon i didok do ibana halak na “badia”.

2. Aha do na lao tabahas di artikel on?

² Di artikel on naeng tabahas ma alus ni akka sukkun-sukkun on: Aha do arti ni hata badia? Aha do na diajarhon Bibel taringot tu sifat ni Jahowa na badia? Songon dia do carana asa badia hita di sude parniulaotta? Jala, boasa boi gabe lam jonok hita tu Jahowa molo badia hita?

3. Tikki didok sasahalak badia, aha do na ro tu pikkiran ni piga-piga halak, alai aha do na didok di Bibel?

³ Adong do na mandok molo halak na badia i, i ma akka pamimpin agama na penampilanna serius jala dang parekkel. Alai dang songon i na didok di Bibel. Debata na badia do Jahowa, alai didok do tong Ibana “Debata na marlas ni roha”. (1 Tim. 1:11) Akka halak na manomba Jahowa pe, didok do “marlas ni roha”. (Ps. 144:15) Asing ni i, hea do dipissang  Jesus akka pamimpin agama na mamakke jubah jala na mangulahon na denggan holan asa badia diida halak. (Mat. 6:1; Mrk. 12:38) Ala holong roha ni Jahowa tu hita, dang mungkin dipangido Ibana hita mangulahon paretta na so sanggup taulahon. Alani i, tikki diparettahon Jahowa tu hita, “Ikkon badia do hamu,” berarti na boi do taulahon i. Alai asa boi hita badia, ikkon jolo taattusi do lapatan ni hata badia.

4. Aha do arti ni hata “badia”?

⁴ Aha do arti ni hata “badia”? Molo di Bibel, hata badia berkaitan do i tu parange na ias, pangalaho na denggan, jala berhubungan do on tu ulaonta manomba Jahowa. Boi do muse dipakke hata badia lao mandok halak na dipapulik lao marhobas tu Debata. Jadi boi do hita didok badia, molo denggan pangalahotta, tasomba Jahowa, jala molo jonok hubunganta tu Ibana. Pasti las hian do rohatta mamboto on. Alana nang pe dang sempurna hita, boi do hita marale-ale tu Jahowa Debata na tung massai badia i.

5. Aha do didok akka suru-suruan taringot Jahowa?

⁵ Debata na badia do Jahowa di sude ulaonna. Jala songon i do na didok akka serapim, i ma akka suru-suruan na melayani di tahta ni Jahowa. Didok nasida, “Badia, badia, badia do Jahowa Pamimpin ni Akka Tentara.” (Jes. 6:3) Marale-ale do akka suru-suruan i tu Jahowa. Boi pe jonok hubungan ni akka suru-suruan i tu Jahowa, tottu ala badia do nasida. Alani i ma, molo ro akka suru-suruan tu sada inganan di tano on lao pasahatton hata ni Jahowa, gabe dohot do inganan i badia. Songon i do na masa tikki makkatai suru-suruan tu si Musa marhite api na marsigorgor di tonga-tonga ni ramba na marsuga, gabe badia do inganan i.​—2 Mus. 3:2-5; Jos. 5:15.

6-7. (a) Sesuai tu 2 Musa 15:1, 11, songon dia do si Musa patuduhon na badia do Jahowa? (b) Aha do na paingotton halak Israel na badia do Jahowa? (Ida gambar sampul.)

⁶ Dung selamat halak Israel mangalewati Laut Merah, marende do si Musa, didok ibana do di endena i na massai badia do Jahowa. (Jaha 2 Musa 15:1, 11.) Molo halak Mesir na manomba akka patung, dang badia ibadat ni nasida. Songon i do tong halak Kanaan. Dipelehon halak i do anak ni nasida lao manomba akka debata na so sittong i jala diulahon nasida do seks na so patut. Hape dihagigihon Jahowa do akka ulaon sisongon i. (3 Mus. 18:3, 4, 21-24; 5 Mus. 18:9, 10) Alai molo Jahowa, dang hea dipangido Ibana asa diulahon akka naposona ulaon sisongon i. Ai dang ulaon na badia i. Jadi lao paingotton halak Israel na massai badia do Jahowa, disuru Ibana do asa diukir hata “Na Badia do Jahowa” di lempengan mas na diikkat di sorban ni sintua ni malim.​—2 Mus. 28:36-38.

⁷ Hata na diukir di lempengan mas i, pasti gabe sipaingot na takkas tu sude halak Israel. Alai songon dia ma molo adong halak Israel na so boi mangida i ala dang hea ibana juppang tu sintua ni malim? Boi do diboto ibana na badia Jahowa? Boi. Alana tiap dijahahon patik ni Jahowa tu bangso i, takkas do dipaboa hata i. Jala sude do nasida boi mambege i, bawa, borua, dohot dakdanak. (5 Mus. 31:9-12) Seandaina disi hamu najolo, pasti jotjot do dibege hamu hata songon on: “Au do Jahowa Debatamuna. . . . Alani i, ikkon badia do hamu. Ai badia do Au.” “Ikkon badia do hamu di jolokku, ai badia do Au. Au do Jahowa.”​—3 Mus. 11:44, 45; 20:7, 26.

8. Boasa porlu taparsiajari 3 Musa 19:2 dohot 1 Petrus 1:14-16?

⁸ Taida ma jo paretta ni Jahowa tu halak Israel na disurat di 3 Musa 19:2. Didok Jahowa tu si Musa, “Dok ma tu halak Israel, ‘Ikkon  badia do hamu, ai badia do Au. Au do Jahowa Debatamuna.’” Ayat on do ra na dikutip si Petrus di suratna tu halak Kristen na mandok, “Badia ma hamu.” (Jaha 1 Petrus 1:14-16.) Memang dang mangihutton Patik ni si Musa be hita saonari, alai ala dikutip si Petrus do hata i, berarti ikkon tadalatton do paretta i. Taingot ma, Debata na badia do Jahowa, jadi ikkon badia do hita na manomba Ibana. Ikkon sude do halak Kristen mangulahon paretta on, dang soal harapanna naeng tu surgo manang mangolu salelengna di tano on.​—1 Ptr. 1:4; 2 Ptr. 3:13.

9. Aha do na boi taparsiajari sian 3 Musa 19?

⁹ Lomo do rohatta mambahen las roha ni Jahowa, Debata na badia i. Alani i, berupaya ma hita asa badia. Lao mamboto carana mangulahon i, taparsiajari ma 3 Musa bindu 19. Si Marcus Kalisch, sahalak peneliti Alkitab mandok, “Sian sude isi ni bukku 3 Musa, bindu 19 on ma bindu na paling penting. Bahkan bindu 19 on do tong na paling penting sian sude isi ni bukku 1 Musa sahat tu 5 Musa.” Saonari, taparsiajari ma piga-piga ayat na adong di 3 Musa 19 i, lao mamboto songon dia carana asa boi hita badia di parngoluotta siganup ari. Tikki tabahas akka ayat i, sai taingot ma hata on: “Ikkon badia do hamu.”

10-11. Paretta aha do na disurat di 3 Musa 19:3, jala boasa ikkon tadalatton i?

¹⁰ Dung didok Jahowa tu halak Israel ikkon badia do nasida, didok Jahowa ma muse, “Ikkon pasangaponmuna do bapakmuna dohot omakmuna . . . Au do Jahowa Debatamuna.”​—3 Mus. 19:2, 3.

¹¹ Diparettahon Jahowa do tu hita asa tapasangap natua-tuatta. Massai penting do taulahon i. Hea do adong sahalak bawa na manukkun tu Jesus, “Dia do ulaon na denggan na ikkon huulahon asa boi dapottu hangoluan na saleleng ni lelengna?” Didok Jesus ma, ikkon dipasangap ibana do omakna dohot bapakna. (Mat. 19:16-19) Hea do muse dipissang Jesus halak Parise dohot akka siboto surat ala dang dipasangap nasida natua-tuana. “Dibahen [nasida] do gabe dang marlakku hata ni Debata alani [adat ni nasida].” (Mat. 15:3-6)  “Hata ni Debata” na didok Jesus tu halak i, termasuk ma i patik palimahon dohot paretta na tarsurat di 3 Musa 19:3. (2 Mus. 20:12) Jala taingot ma, sebelum didok Jahowa paretta lao pasangappon natua-tua, jolo didok Ibana do, “Ikkon badia do hamu, ai badia do Au. Au do Jahowa Debatamuna.” Jadi takkas ma, massai penting do tadalatton paretta ni Jahowa lao pasangappon natua-tuatta.

12. Songon dia do caratta mandalatton paretta na tarsurat di 3 Musa 19:3?

¹² Dung taboto massai penting do pasangappon natua-tuatta, olo do ra gabe ro tu rohatta sukkun-sukkun on, ‘Nga hupasangap be natua-tuakku?’ Molo tahilala hurang dope na taulahon lao pasangappon natua-tuatta, tapadenggan ma i saonari. Misalna, boi do talean unggodang tikkitta mangurupi nasida, taparade kebutuhan ni nasida, taurupi nasida asa toktong marlas ni roha, jala asa togu hubungan ni nasida tu Jahowa. Molo berupaya do hita mambahen songon i, berarti nga tadalatton be paretta ni Jahowa na tarsurat di 3 Musa 19:3.

13. (a) Paretta aha do muse na tarsurat di 3 Musa 19:3? (b) Songon na tarsurat di Lukas 4:16-18, aha do na boi tatiru sian Jesus?

¹³ Di 3 Musa 19:3, adong do muse paretta na asing, i ma mandalatton “ari Sabat”. Memang hita halak Kristen dang mangihutton Patik ni si Musa be, jadi dang taulahon be Sabat mingguan. Alai adong do parsiajaran na tadapot sian paretta i. Molo ari Sabat najolo, ikkon istirahat do halak Israel sian karejona jala dipakke ma kesempatan i lao patoguhon hubunganna tu Jahowa. * Alani i ma tikki ari Sabat, lao do Jesus tu sinagoga na di Nasaret lao manjaha surat na badia. (2 Mus. 31:12-15; jaha Lukas 4:16-18.) Jadi sian paretta ni Jahowa taringot Sabat i, marsiajar ma hita, ikkon taparade do godang tikki lao patoguhon hubunganta tu Jahowa dohot melayani Ibana. Menurut hamu, nga diulahon hamu be i? Molo dilehon hamu do godang tikkimuna melayani Jahowa, boi ma gabe lam jonok hamu tu Ibana jala gabe boi ma hamu badia.

14. Aha do na mulak-ulak didok di 3 Musa bindu 19?

¹⁴ Di 3 Musa bindu 19, mulak-ulak do hita dipaingot asa toktong badia. Contohna di ayat 4, adong do hata na mandok, “Au do Jahowa Debatamuna.” Di 3 Musa bindu 19, adong do 16 hali diulangi hata “Au do Jahowa Debatamuna” dohot hata “Au do Jahowa”. Hata na adong di ayat 4 on, pasti paingotton hita tu patik parjolo na mandok, “Au do Jahowa Debatamuna . . . Holan Au do na ikkon disomba hamu. Unang somba debata na asing.” (2 Mus. 20:2, 3) Jadi sesuai tu ayat i, asa boi hita badia, ikkon tabahen do Jahowa na paling penting di ngolutta. Jala unang ma tabahen gabe roa goar ni Jahowa. Ala Saksi Jahowa do hita, sai taingot ma sude na taulahon dohot na tahatahon, berpengaruh do i tu goar ni Jahowa na badia.​—3 Mus. 19:12; Jes. 57:15.

15. Aha do na boi taparsiajari sian patik ni Jahowa di 3 Musa 19 taringot mangalean pelean?

¹⁵ Molo dihaholongi halak Israel do Jahowa, pasti dioloi nasida akka parettana. Di 3 Musa 18:4, didok Jahowa do, “Toktong ma oloi patikku jala ulahon parettakku. Au do Jahowa Debatamuna.” Akka ‘paretta’ ni Jahowa i, disurat do sebagian di 3 Musa 19. Misalna paretta ni Jahowa tu halak Israel taringot pelean, na disurat di ayat 5-8, 21, 22. Ikkon manat do halak i, asa unang sappe ‘ramun dibahen nasida pelean na badia na dilehon tu Jahowa’. Parsiajaranna tu hita, toktong ma tapuji  Jahowa marhite marbarita na uli. Ai sarupa do i songon pelean tu Debata songon na tarsurat di Heber 13:15.

16. Parsiajaran aha do na tadapot sian 3 Musa 19:19?

¹⁶ Asa boi hita toktong badia, ikkon barani do hita berbeda. Sada tantangan do on. Olo do gabe direhei keluargatta na so Saksi hita, direhei dongan sasikkola, manang dongan sakarejotta. Bahkan olo do ditekan hita mangulahon akka ulaon na dihasogohon Jahowa. Molo songon i do na masa tu hita, boha ma carana asa boi tabahen keputusan na denggan? Taida ma prinsip na adong di 3 Musa 19:19. Didok disi, “Unang pakke hamu abit na dibahen sian dua jenis bonang.” Alani patik ni Jahowa on, gabe takkas do tarida na berbeda halak Israel sian akka bangso na di sakaliling ni nasida. Memang dang mangihutton Patik ni si Musa be hita saonari. Jadi boi do tapakke baju na dibahen sian dua jenis kain na berbeda. Alai adong do na boi taparsiajari sian i. Ikkon barani do hita berbeda sian halak na so manomba Jahowa, misalna sian dongan sasikkola, dongan sakarejo, dohot sian keluargatta na so Saksi Jahowa. Tottu holong do rohatta tu nasida, alai ikkon tapatudu do na umholong rohatta tu Jahowa. Penting do taulahon on, asa boi hita toktong badia. Alana, nungnga dipapulik hita lao marhobas tu Debata.​—2 Kor. 6:14-16; 1 Ptr. 4:3, 4.

17-18. Aha do parsiajaran na penting na boi tadapot sian 3 Musa 19:23-25?

¹⁷ Hata “Au do Jahowa Debatamuna”, pasti paingotton halak Israel asa mambahen Jahowa na uppetting di ngolu ni nasida. Songon dia ma carana? Di 3 Musa 19:23-25 dipaboa do songon dia carana. (Jaha.) Didok Jahowa, molo dung sahat halak Israel di Tano na Dijanjihon i jala disuan halak i akka hau disi, dang boi diallang nasida parbue ni hau i saleleng tolu taon na parjolo. Di taon na paopatton pe, ikkon dilean do parbuena i gabe pelean tu Jahowa. Dung taon palimahon pe baru boi diallang nasida parbue ni hau i. Patik ni Jahowa on paingotton halak Israel asa mangutamahon Jahowa, dang kepentinganna sandiri. Ikkon pos do roha ni halak i na sanggup do Jahowa paradehon kebutuhan ni nasida. Jala lomo do roha ni Jahowa asa unang holit halak i mangalean sumbangan lao mendukung ibadat di tabernakel.

¹⁸ Patik na disurat di 3 Musa 19:23-25 paingotton hita tu jamita ni Jesus na di dolok. Didok ibana, “Unang be holsoan hamu mamikkiri . . . sipanganon dohot siinumonmuna.” Boasa? Didok Jesus do muse, “Diboto  Amamuna na di banua ginjang i do na porlu sudena i di hamu.” Jadi, pos ma rohatta sai paradeon ni Jahowa do sude kebutuhanta. Alana pidong sajo pe dilean Ibana do mangan. (Mat. 6:25, 26, 32) Denggan do muse molo taurupi akka donganta, alai unang ma tapaboa-boa ‘silehon-lehonta’ i tu na asing. Jala rade ma hita mangalean sumbangan tu huria. Pasti diparrohahon Jahowa do na taulahon i, jala pasu-pasuonna do sude pengorbananta i. (Mat. 6:2-4) Alani i, berupaya ma hita mangalean na undenggan tu Jahowa, jala unang ma holit hita mangurupi na asing. Molo taulahon i, berarti nga tadalatton be paretta ni Jahowa na tarsurat di 3 Musa 19:23-25.

19. Nungnga tabahas be 3 Musa bindu 19, aha do parsiajaran na dapotmuna sian i?

¹⁹ Nungnga tabahas be sebagian patik na disurat di 3 Musa bindu 19, na mangurupi hita asa toktong badia songon Jahowa. Molo torus do hita berupaya maniru Jahowa, boi ma hita ‘badia di sude parniulaotta’. (1 Ptr. 1:15) Asing ni i, molo diida akka halak na so manomba Jahowa pangalahotta na denggan i, gabe dipuji nasida ma Jahowa. (1 Ptr. 2:12) Alai adong dope na boi taparsiajari sian 3 Musa 19 na mangurupi hita asa boi “badia”. Taparsiajari ma i di artikel na mangihut.