STADI 48
“Yufala i Mas Tabu”
“Yufala i mas tabu long evri fasin blong yufala.”—1 PITA 1:15.
SINGSING 34 Mi Mas Holemstrong Long Jehova
BIGFALA TINGTING *
1. ?Wanem advaes we aposol Pita i givim long ol Kristin bifo? ?From wanem i luk olsem se i no posibol blong folem?
NOMATA se yumi gat hop blong laef long heven o long wol, be yumi evriwan i save kasem gudfala samting from advaes we aposol Pita i givim long ol tabu Kristin long faswan handred ya. Hem i talem se: “Yufala i mas tabu long evri fasin blong yufala, olsem Tabu God ya we i singaot yufala, from we Baebol i talem se: ‘Yufala i mas tabu from we mi mi tabu.’” (1 Pita 1:15, 16) Ol tok ya oli soemaot se yumi save folem fasin blong Jehova we i beswan eksampol blong stap tabu. Yumi save stap tabu mo yumi mas tabu long evri fasin blong yumi. Maet i luk olsem se i no posibol from we yumi sinman. Be eksampol Pita we i bin mekem plante mastik, i soemaot se yumi save stap “tabu.”
2. ?Long stadi ya bambae yumi tokbaot wanem?
2 Long stadi ya, bambae yumi tokbaot ol kwestin ya: ?I minim wanem blong stap tabu? ?Baebol i tijim wanem long saed blong fasin blong Jehova blong stap tabu? ?Olsem wanem yumi save stap tabu long evri fasin blong yumi? ?Mo olsem wanem fasin blong yumi blong stap tabu i joen wetem frensip blong yumi wetem Jehova?
?I MINIM WANEM BLONG STAP TABU?
3. ?Plante man oli tingbaot wan man we i tabu se hem i olsem wanem? ?Weples yumi save faenem stret mining blong tok ya?
3 Plante man oli ting se wan man we i tabu, hemia wan man we i neva smael mo i werem ol klos blong ol pris. Be hemia i no tru. Baebol i tokbaot tabu God ya Jehova se hem i wan “hapi God.” (1 Tim. 1:11) Mo Baebol i tokbaot olgeta we oli wosipim hem se “oli glad.” (Sam 144:15) Jisas i agensem ol man we oli werem ol spesel klos mo oli mekem ol gudfala samting nomo blong ol man oli lukluk olgeta. (Mat. 6:1; Mak 12:38) Ol Kristin oli save mining blong tok ya stap tabu from ol samting we Baebol i talem. Yumi save se God we i lavem yumi mo we i tabu, bambae i neva askem yumi blong mekem wan samting we yumi no naf blong mekem. Taswe, taem Jehova i talem long yumi se, “yufala i mas tabu,” yumi sua se yumi naf blong mekem. Be i tru se blong stap tabu long evri fasin blong yumi, fastaem yumi mas kasemsave se i minim wanem blong stap tabu.
4. ?Tok ya “tabu” i minim wanem?
4 ?I minim wanem blong stap tabu? Long Baebol, tok ya “tabu” i minim ol bilif mo ol fasin we oli klin o tabu. Tok ya i minim tu, wan samting we oli jusumaot blong yusum long wok blong God. Long sem fasin, yumi save stap tabu sipos ol fasin blong yumi oli klin, yumi wosipim Jehova long rod we i stret, mo yumi frengud wetem hem. Yumi glad tumas se nating se yumi sinman, mo Jehova i tabu we i tabu, be yet hem i wantem tumas blong kam gudfala fren blong yumi.
“JEHOVA . . . I TABU, WE I TABU, WE I TABU”
5. ?Yumi lanem wanem long saed blong Jehova tru long ol enjel?
5 Jehova i klin long evri samting. Yumi save samting ya from tok we ol seraf, hemia ol enjel we oli stap klosap long tron blong Jehova, oli talem. Sam long olgeta oli talem se: “Jehova komanda blong ol ami, hem i tabu, we i tabu, we i tabu.” (Aes. 6:3) Ol enjel oli save fren gud wetem Jehova nomo, from we oli tabu. Hemia nao from wanem taem wan enjel blong Jehova i kam long wol, ples we hem i kamtru long hem i tabu. Hemia nao samting we i hapen long Moses, taem faea i laet long wan smol tri.—Eks. 3:2-5; Jos. 5:15.
Tok ya “Jehova i stamba blong olgeta samting we i tabu,” i stap long wan gol plet we oli putum long kaliko we i stap long hed blong hae pris (Haf 6-7)
6-7. (1) Folem Eksodas 15:1, 11, ?olsem wanem Moses i soemaot se God i tabu? (2) ?Wanem i rimaenem ol man Isrel se God i tabu? (Yu luk pija long fran pej.)
6 Afta we Moses i lidim ol man Isrel i gotru long Red Si, hem i talem long olgeta se God blong olgeta Jehova, hem i tabu. (Ridim Eksodas 15:1, 11.) Ol man Ijip we oli stap wosipim ol giaman god, oli no tabu. Hemia i sem mak tu long ol man Kenan we oli stap wosipim ol giaman god. Taem oli stap mekem wosip, oli bonem ol pikinini blong olgeta olsem sakrefaes, mo oli stap mekem ol rabis fasin blong seks. (Lev. 18:3, 4, 21-24; Dut. 18:9, 10) Be Jehova i defren, bambae hem i neva askem ol man we oli wosipim hem blong oli mekem ol samting we i doti. Hem i tabu we i tabu. Mo blong mekem ol man Isrel oli tingbaot samting ya, Jehova i askem olgeta blong wokem wan gol plet mo putum long kaliko we i stap long hed blong hae pris. Long gol plet ya oli raetem se: “Jehova i stamba blong olgeta samting we i tabu.”—Eks. 28:36-38.
7 Tok we i stap long gol plet ya i soemaot long evri man se Jehova i tabu we i tabu. Be maet wan man Isrel i no save luk gol plet ya from we hem i no save go klosap long hae pris. ?Hemia i min se hem i no save se Jehova i tabu? !Si! Evri man Isrel oli save se Jehova i tabu taem oli ridimaot Loa long fored blong ol man, ol woman, mo ol pikinini. (Dut. 31:9-12) Sipos yu bin stap long taem ya, bambae yu harem ol tok ya se: “Mi mi Jehova, mi God blong yufala, mo yufala i mas . . . tabu from we mi mi tabu.” “Yufala i mas tabu long fes blong mi, from we mi Jehova, mi tabu.”—Lev. 11:44, 45; 20:7, 26.
8. ?Yumi lanem wanem long ol tok blong Levitikas 19:2 mo 1 Pita 1:14-16?
8 Naoia bambae yumi tokbaot ol tok we i stap long Levitikas 19:2 we Jehova i talem se oli mas ridimaot long ol man Isrel. Jehova i talem long Moses se: “Yu toktok long ful asembli blong Isrel, mo yu talem long olgeta se: ‘Yufala i mas tabu, from we mi Jehova, mi God blong yufala, mi mi tabu.’” Ating Pita i tokbaot ol tok blong vas ya bakegen taem i talem long ol Kristin se oli “mas tabu.” (Ridim 1 Pita 1:14-16.) I tru se tede yumi no moa stap aninit long Loa blong Moses, be ol tok we Pita i raetem oli soemaot klia lesen we yumi lanem long Levitikas 19:2, we i se Jehova i tabu mo olgeta we oli wosipim hem tu oli mas tabu. Tok ya i go long yumi evriwan, nomata se yumi gat hop ya blong laef long heven o long paradaes long wol.—1 Pita 1:4; 2 Pita 3:13.
“YUFALA I MAS TABU LONG EVRI FASIN BLONG YUFALA”
9. ?Levitikas japta 19 bambae i givhan long yumi olsem wanem?
9 Blong mekem tabu God blong yumi i glad, yumi mas lanem olsem wanem blong stap tabu. Blong mekem olsem, Jehova i givim sam advaes blong givhan long yumi. Mo yumi save faenem ol advaes ya long Levitikas japta 19. Hibru skola ya Marcus Kalisch i talem se: “Hemia i wan impoten japta long buk blong Levitikas mo long ol faswan faef buk blong Baebol.” Rimemba se Levitikas japta 19 i stat wetem tok ya: “Yufala i mas tabu.” Taswe, naoia bambae yumi tokbaot sam vas long japta ya we i save givhan long yumi blong stap tabu evri dei long laef blong yumi.
?Loa ya long Levitikas 19:3 we i tokbaot ol perens, i sud pulum ol Kristin blong mekem wanem? (Haf 10-12) *
10-11. ?Levitikas 19:3 i talem se yumi mas mekem wanem, mo from wanem hemia i impoten?
10 Afta we Jehova i talem long ol man Isrel se oli mas tabu, hem i gohed se: “Yufala evriwan i mas respektem papa mo mama blong yufala, . . . Mi mi Jehova, mi God blong yufala.”—Lev. 19:2, 3.
11 I klia se i impoten blong obei long oda ya blong respektem ol perens blong yumi. Tingbaot ol tok ya we Jisas i talem, taem wan man i askem long hem se: “?Wanem gudfala samting we mi mas mekem, blong mi kasem laef we i no save finis?” Long wan smol haf blong ansa we Jisas i talem long man ya, hem i talem se hem i mas ona long papa mo mama blong hem. (Mat. 19:16-19) Jisas i tok agensem ol Farisi mo ol skraeb from we oli stap mekem eskius blong no lukaot gud long ol perens blong olgeta. Taem oli mekem olsem, oli “mekem tok blong God i kam nating nomo.” (Mat. 15:3-6) “Tok blong God” i inkludum namba faef Komanmen we yumi faenem tu long Levitikas 19:3. (Eks. 20:12) I gud blong tingbaot se tok ya long Levitikas 19:3 we i se yu mas ona long mama mo papa blong yu, i kamaot afta long tok ya: “Yufala i mas tabu, from we mi Jehova, mi God blong yufala, mi mi tabu.”
12. Folem Levitikas 19:3, ?i gud yumi wanwan i askem wanem kwestin?
12 Taem yumi tingbaot komanmen ya blong ona long ol perens blong yumi, i gud yumi askem se: ‘?Mi mi stap ona long ol perens blong mi?’ Sipos yu harem se long ol yia we i pas, yu no mekem samting ya, i gud yu stat naoia blong kam gud moa long fasin ya. Yu no save jenisim samting we i pas, be yu save mekem bes blong yu naoia blong spenem moa taem wetem ol perens blong yu, mo halpem olgeta. O maet yu save givim ol samting we oli nidim long saed blong bodi, spirit, mo filing. Sipos yu mekem olsem, yu stap obei long oda ya we i stap long Levitikas 19:3.
13. (1) ?Wanem narafala komanmen we i stap long Levitikas 19:3? (2) ?Olsem wanem yumi save folem eksampol blong Jisas long Luk 4:16-18?
13 Levitikas 19:3 i talem wan narafala samting we yumi mas mekem blong stap tabu. Hem i talem se yumi mas kipim Sabat. Tede ol Kristin oli no moa stap aninit long Loa blong Moses, taswe yumi no nid blong kipim Sabat evri wik. Be yet, yumi save lanem plante samting long eksampol blong ol man Isrel blong kipim Sabat, mo gudfala blesing we oli kasem taem oli mekem olsem. Sabat hem i wan taem blong wosipim God * mo spel long ol wok. Hemia nao from wanem long Sabat dei, Jisas i stap go long sinagog long taon blong hem mo i ridim Tok blong God. (Eks. 31:12-15; ridim Luk 4:16-18.) Komanmen ya we God i talem blong “kipim ol sabat” i sud pulum yumi blong makemaot sam taem evri dei blong mekem ol samting long saed blong spirit. ?Olsem wanem? ?Yu save mekem sam jenis, blong yu save obei moa long komanmen ya? Sipos oltaem yu makemaot taem blong mekem ol samting long saed blong spirit, bambae yu frengud wetem Jehova, mo hemia nao impoten samting we yu mas mekem blong stap tabu.
MEKEM FRENSIP BLONG YU WETEM JEHOVA I KAM STRONG MOA
14. ?Levitikas japta 19 i tokbaot bakegen wanem stamba trutok?
14 Levitikas japta 19 i talem bakegen stamba trutok ya we i save halpem yumi blong stap tabu. Long en blong vas 4 i talem tok ya: “Mi mi Jehova, mi God blong yufala.” Tok ya o sem tok olsem i kamaot 16 taem long japta ya. Hemia i mekem yumi tingbaot fas komanmen ya se: “Mi mi Jehova, mi God blong yu . . . Yu mas wosipim mi nomo. Yu no mas wosipim ol narafala god.” (Eks. 20:2, 3) Evri Kristin we oli wantem stap tabu, oli mas meksua se i no gat wan samting o wan man i kam moa impoten i bitim frensip blong olgeta wetem God. Mo from we yumi karem nem ya Witnes blong Jehova, yumi gat strong tingting blong no mekem eni samting we save sakem doti long nem blong hem.—Lev. 19:12; Aes. 57:15.
15. ?Ol vas long Levitikas japta 19 we oli tokbaot ol sakrefaes, oli sud pulum yumi blong mekem wanem?
15 Ol man Isrel oli soemaot se oli akseptem Jehova olsem God blong olgeta, taem oli obei long ol loa blong hem. Levitikas 18:4 i talem se: “Yufala i mas folem ol desisen we mi mi stanemap, mo yufala i mas holemtaet ol loa blong mi mo yufala i mas obei long olgeta. Mi mi Jehova, mi God blong yufala.” Japta 19 i tokbaot “ol loa” we ol man Isrel oli mas folem. Eksampol, long vas 5-8, 21, 22 i tokbaot ol sakrefaes blong animol. Ol man Isrel oli mas mekem ol sakrefaes ya long wan fasin we i no mekem ‘tabu samting ya we i blong Jehova i kam doti.’ Taem yumi ridim ol vas ya, hemia i sud pulum yumi blong wantem mekem Jehova i glad, mo blong givim sakrefaes blong presem hem, we i stret long tingting blong hem olsem Hibru 13:15 i talem.
16. ?Loa ya long Levitikas japta 19, i rimaenem yumi long wanem?
16 Blong stap tabu, yumi mas glad blong stap defren long ol narafala. Be i no isi blong mekem olsem. Samtaem ol fren long skul, long wok, ol famle we oli no bilif, mo ol narafala oli save pulum yumi blong mekem sam samting we i blokem yumi blong wosipim Jehova long rod we i stret. Sipos i olsem, yumi gat wan impoten desisen blong mekem. ?Wanem i save givhan long yumi? Traem luk smol haf blong rul ya we i stap long Levitikas 19:19, we i talem se: “Yufala i no mas werem klos we oli wokem long tu defren tred we oli miksim.” Loa ya i givhan long ol man Isrel blong oli stap defren long ol nesen we oli stap raonabaot long olgeta. Tede yumi no stap aninit long Loa blong Moses, taswe i no rong blong wan Kristin i werem ol klos we oli wokem long koten we i miks wetem linen. Be yumi no wantem kam olsem ol man ya we bilif mo fasin blong olgeta i agensem ol tijing blong Baebol, nating sipos oli ol fren long skul, o wok, o famle blong yumi. I tru se yumi lavem ol famle blong yumi mo ol neba blong yumi. Be yumi no mas fraet blong stap defren long ol narafala, taem yumi mas mekem wan desisen we i soemaot se yumi obei long Jehova. Hemia i impoten from we sipos yumi wantem stap tabu, yumi mas stap defren long ol narafala, from we yumi blong God.—2 Kor. 6:14-16; 1 Pita 4:3, 4.
?Wanem lesen we ol man Isrel oli lanem long Levitikas 19:23-25, mo yu lanem wanem long ol vas ya? (Haf 17-18) *
17-18. ?Wanem impoten lesen we yumi lanem long Levitikas 19:23-25?
17 Tok ya “mi mi Jehova, mi God blong yufala” i sud halpem ol man Isrel blong oli mekem frensip blong olgeta wetem Jehova i kam moa impoten long laef blong olgeta. ?Olsem wanem oli save mekem samting ya? Levitikas 19:23-25 i tokbaot wan rod. (Ridim.) Traem luk olsem wanem ol tok ya bambae oli gat paoa long ol man Isrel taem oli go insaed long Promes Lan. Sipos wan man i planem ol tri we i karem frut blong kakae, hem i no mas kakae frut blong hem blong tri yia. Long namba fo yia, bambae oli tekem ol frut ya i go long fes blong Jehova blong yusum long tabu ples. Mo long namba faef yia, man ya i save kakae frut blong ol tri ya. Loa ya i sud halpem ol man Isrel blong kasemsave se oli no mas putum ol samting we oli nidim long fasples. Oli mas trastem Jehova se hem nao bambae i givim ol samting we oli nidim, mo oli putum wosip blong hem long fasples. Jehova bambae i meksua se oli gat naf kakae, mo hem i enkarejem olgeta se oli mas glad nomo blong givim presen i go long ples blong wosip, hemia tabu ples.
18 Loa we i stap long Levitikas 19:23-25 i mekem yumi tingbaot ol toktok blong Jisas Antap Long Hil. Hem i talem se: “Yufala i stop blong wari tumas . . . se bambae yufala i kakae wanem, o bambae yufala i dring wanem.” Mo hem i gohed se: “Papa blong yufala long heven i save we yufala i nidim ol samting ya.” God bambae i givim ol samting we yumi nidim, olsem we i stap mekem long ol pijin. (Mat. 6:25, 26, 32) Yumi trastem se Jehova bambae i lukaot gud long yumi. Mo yumi givim “presen blong sori” blong halpem olgeta we oli gat nid. Mo tu, yumi glad nomo blong givim presen mane blong givhan blong pem ol samting we kongregesen i nidim. Jehova i luk taem yumi glad blong givim ol samting olsem, mo bambae hem i givim pei long yumi. (Mat. 6:2-4) Taem yumi glad blong givim samting, yumi soemaot se yumi kasemsave long lesen we i stap long Levitikas 19:23-25.
19. ?Ol vas long Levitikas japta 19 we yumi tokbaot long stadi ya oli givhan long yu olsem wanem?
19 Yumi tokbaot sam vas nomo blong Levitikas japta 19, mo oli givhan long yumi blong kasemsave olsem wanem yumi save kam tabu olsem tabu God blong yumi. Taem yumi folem fasin blong hem, hemia i soemaot se yumi stap traehad blong stap ‘tabu long evri fasin blong yumi.’ (1 Pita 1:15) Plante man we oli no wosipim Jehova oli stap luk ol gudfala fasin blong ol man blong God. Mo hemia i pulum sam long olgeta blong oli presem Jehova. (1 Pita 2:12) Be i gat plante moa samting we yumi save lanem long Levitikas japta 19. Nekis stadi bambae i tokbaot sam narafala vas long japta ya, mo bambae i halpem yumi blong stap “tabu” long ol narafala haf blong laef blong yumi olsem we Pita i talem.
SINGSING 80 God i Gud Tumas, Yu Traem Trastem Hem
^ par. 5 Yumi lavem Jehova tumas mo yumi wantem mekem hem i glad. Jehova i tabu mo hem i wantem se ol man we oli wosipim hem oli mas tabu. ?Olsem wanem? ?I posibol blong ol sinman oli stap tabu? Yes. Advaes we aposol Pita i givim long ol Kristin, mo loa we Jehova i givim long ol man Isrel bifo, i save halpem yumi blong stap tabu long evri fasin blong yumi.
^ par. 13 Blong kasem save long Sabat mo lesen we yumi save lanem from, yu luk stadi ya “I Gat Taem Blong Wok Mo Spel” long Wajtaoa blong Disemba 2019.
